Hruaitu Issue 90

HAWL AWLNAK
Editorial….1
Nu le Pa theiawknak…4 – 5
Malaysia um Falam mi pawl hram thawknak…7,11 – 12
Malaysia Pastor S. Ni Luai thawn hmai tawn thusuhnak…8 – 10
Myanmar Thuthang…13
Kanmah Sung thu…….14 – 15
Leitlun Thuthang…
16 – 19
Cross Words….20
Capoh….Inside back cover

“HRUAITU thuthang sung ih  suakmi pawl hi Editorial ngaidan le ruah
dan a si thluhlo. Ca ngantu bulpak pakhat ciar ih hmuhdan nganmi an
si.”

Mai Tuanvo theih kan tul!
Leilung tlun ah mai umnak hmun silo ih um hi thil fihnung bik a si ti
cu kan thei ciau ko ding. Milai ek khal ekinn ih a um cun a remcang
ko, nitin te kan lut ringring ko, kan fih lem lo. Asinan lamzin
laifang ih a um cun kan hel hluah hlo, cui lamzin hman cu kan zawh
duh lo. Cuvek cekci in, mai umnak ding silo ih um pawl hi mi
hnawksak, mi thanso dawnkhamtu kan si ti hi kan fiang a tul.
Pathian hna kan tuannak khalah “Pastor laksawng a dawngtu cun Pastor
tuan ko seh, Zirhtu laksawng a dawngtu cun thaten zirh ko seh,
Thuthangtha phuan darh nak lam laksawng a dawngtu cun rinum ten
thuthangtha phuang ko seh?
Zumtu a tiawmi ciauciau lak khal ah cuvek mai hna theilo pawl in
buainak an suahpi ih Kawhhran hmel an balter.
Siipuaizi lam ih pum cawmtu kan si cun, thianghlim ten sumpai kan
hawl pei uh!  Sum le Pathian hna cu kan kawp lo hram pei uh! Ca
thianghlim in pathian pahnih rawngbawl a siang lo. Sum duh luatnak
lungthin ihsin sual dang hmuahhmuah khal a ra suak ti cathianghlim in
in sim.
Kan Laimi khal Pathian lam hruainak in kan thangso vivo, a lungawium
zet. Kan thanso rualrual ah napin kan ralring a tul.
Ziangahtile, “Sehtan in thansonak hi hmanrua tha ah hmang in;
thansonak ti ih kan ruahmi thil pawl hmang in hna a tuan theu?ti hi
nan ruat dah maw? Internet san kan ti rero khal hi tulai nauhak pawl
mihur ih tuah suak theh tu ah Sehtan in a hmang ti teh hi kan ruat
dah maw? Sim duhmi cu, ?Leitlun fimthiamnak lam ih kan thanso
rualrual ah Pathian thu khal ah pitlin kan tul. Balancing life kan
tul tuk tihi a si?  Bawhlung sitnak ah goal bawhtu in ka hmin a
langlo tuk aw, goal thuntu si ka duh ti’n  hmailam ah tlan ciamco seh
la..goal 1 hman a thun dah lo ding, ziangah tile a umnak hmun ding cu
goal area sung ah a si. Cucu sunnak, buainak suahpi tu, rualpi
hnaihnawk tu a si. Duhdawtmi unau, ziang ram khal kan va then le,
kanmah le tuanvo, kan mah le hna ciau, kanmah le Pathian inkawhnak
zawn ciau ah rinum ten hna kan tuan tlang ciau pei uh!!

                              Damnak Kan Tul
                              ( The Divine Healing )

    By : Rev. S. Ni Luai
“Nazareth miJesuh parah ziang bangtuk in Pathian in Thlarauthianghlim
le huham a burh ti tla nan thei theh, a hnen ah Pathian a um ruangah
khaw zakip ah feh tahrat in thiltha a tuah vivo ih Setan ih tuah
siatmi pawl hmuahhmuah a damter thluh( Dungthluntu 10 : 38 )”

Kan Laimi Krihfa ti aw zo mi pawl hi damnak ngaingai kan hmu theilo.
Amahlawngte kan damlonak kan theilo hi a pawi ka ti zet. Kan natnak
cu thei sehla siibawi pan kan thei ding nan. Damnak kan ti hi
thinlung, taksa le Thlarau a pathum in damhnu lwng ah damnak kim a
si. Krihfa si fawn si damlo ih um cu a kaihlo ka ti nasa.
Jesuh neitu kan si fawn si, damlo mi si fawn. Damnak kan ti hi
ziangso a si? Thaten ruat in himi ca hi thinlung sung tak in siar
hnik uh si. Damlonak  ( Sickness & Desease ) le caklonak (
Infarmities ) ih hrampi ( Origin ) cu sual ( sin ) hi a si. Leilung
tlun ah sualnak a luh hlan ah natnak hrimhrim a um lo. Miphun buainak
le sungkua thenawknak, innsungsang siatsuahnak khal a um lo. Eden
hmuan sung ah Adam le Evua Sehtan in sualnak ah a tlukpi veten Adam
tei innsungsang ah damlonak hri rai nasatak a rak thleng.

U le nau thahawk tiang a thleng. Humkhat khalah an um thei nawnlo, an
thenaw thluh. Evua hnenah natnak a thleng hmaisa bik. Ziangahtile
sual ah a tluk hmaisakbik ruangah a si ding. Adam tei sungkua ah
natnak hri rai phunphun a thleng.

1. Natnak phun khat :
Sehtan in sualnak ah a tluksiat pi mi hmaissadik cu Euva a si ih; a
tlun ah natnak a thleng hmaisabik cu nau neih natnak a si. Tui
nitiang ah mipa hnak in nunau hi an taksa ah natnak a tam sawn.
Siibawi ih hmuh dan ah nunau hi damnak ngaingai a um theilo an ti.
Adam hnen ah a thleng mi natnak cu zawnzai zet in buainak
natnak,hrirai a thleng ve. Adam cu a nun sung a zawnzai a san hmuah a
tawi thluh. Euva khal a nun sung na harnak ka thanter ding, fa na
vawn tikah natnak cu a karh sinsin ding, Leilung ih tuahmi nan si
ruangah leilung ah nan cang sal ding tiah Pathian in a ti hai.

2. Natnak phun hnih nak:
Adam le Euva tei fa Kain le Abel hnen ih a thlengmi natnak hrirai cu
tih a nung nasa. Cucu thinheng natnak a si. Himi hi thiltha tuah
duhlo nak in a thawk mi a si. Thilthalo cu ziangso a si? Ma’i duh
zawng ih khawkhang, rualpi ih duhzawng khal a tha tiah ruatsak duhlo.
Ka duh zawng hi thun uh, ka ti bang in tuah uh, ka duh zawng in
Pathian khal ka biak ding, ka ruahnak le ka vision hi a hman bik tiah
thinlung neih hi thil thalo a si. Cumi cun u le nau dang hnen ah
thinheng natnaka suah ter. A cemnak ah unau sungkua an that aw, an
thek darh thluh.Himi natnak hi AIDS natnak vek asi.

Thiltha kan tuah thei nak dingah Pathian ih duhdan hawl le a mah duh
zawng ih nun hi thiltha tuah cu a si ih; himi hi mithalo pawl in an
hmuhsuammi a si. Zianghman ah an siarlo. Curuangah Abel kha a u Kai
in a thahnak a si. Eden hmuan sungah Setan a luh ve ten himi natnak
rapthlak cu Adam te’i sungkua ah a thleng hngal. Cuvek cakci in David
Siangpahrang te insung khal ah a thleng ve. An thinlungah Sehtan a
lut ih Hurnak hrirai, porhawknak hrirai, tohkham duhnak hrirai natnak
in an sungkua in an na thluh hngal.

Saul Siangpahrang thinlung khalah Sehtan a luh veten thiltha a ruat
thei nawnlo. Mi siatsuah duhnak thinlung a hawl. A unau hnenah a thin
a heng ringring. Asinan mangbangza pakhat a simi cu Saul
Siangpahrang, U le Nau tlun ah thiltha a ruat theilomipa kha a thlun
tu an tam ve kha ka awlawk a sawng nasa. Curuangah kan Bawipa Jesuh
Krih in sungkua unau pawl hnen ah thlun dingmi daan hitin in tuah
sak. “Asinan kei cun a unau parah a thin a heng tu cu, thuthennak a
tuar ding. Zokhal si sehla a u nau kha, zianghman ih tha hnemlo a ti
tu cu, thuthentu hmaiah suahpi a si pei ih; a unau kha mi aa a titu
cu Hell meipi sung ah a tla ding tiah phan a um a si?tiah Jesuh in a
ti. ( Mtt 5 : 22 ).

Kan Bawipa Jesuh in sungkua hrang ah thu a zirhmi hi napin kan ruat
pei. a sullam kan theihnak ding ah Pathian hnenah thla kan cam ding.
A tul ah cun hmaiton rori in thu relkhawmnak tla nei sehla tha ka ti.
Himi Jesuh ih thu zirhmi ah hin thupibik (point) pathum a sum.

1. U le Nau par ih thinheng hmang.
2.  Zianghman ih thathnemnak neilo ti ih mi hmuhsuam.
3.  Mah u le nau mi aa va ti ih; ke hnuai ih va pal khi a si.
Himi ruangah a silo maw, miphun khat unau sungkua kan thek darh ih
mi in innautatnak le mi thangsomi miphun kan si theilo nak hi. Himi
bik hi a silo maw? Napin kan thla kan cam pei uh. Kan thinlung ciar
ah Sehtan a lut lo nak ding in rawl ul thlacam a tul. Sualnak in
natnak a suak ter. Natnak in thihnak a suak ter. Himi hmuahhmuah hi
Setan ihsin a rami lawngte a si.

Damnak Famkim
Sehtan sual tluknak ihsin damnak kan hmuhnak ding ah Bawi Jesuh cu
Leilung tlun ah a ra.  Jesuh in Bawipa Thlarau cu ka parah a um.
Ziangahtile mi farah hnen ih thuthangtha sim ding ah hriak tulh in ka
hril zo, saltangmi pawl hnen ih luatnak thu sim ding ah le mit caw mi
in khua an hmuh thei nak ding ah i thlah. Hrem mi pawl luatnak ding
ahle awipa in a minung pawl a runnak ding tikcu a ra thleng zo ti
than ding ah i thlah a si tiah a ti ( Luke 4 : 18 – 19 ).

Zokhal sualnak a tuah ringring tu cu Sehtan ih ta a si. Ziangahtile
Sehtan cu a hram thawk ihsin sualnak a tuahtu a si. Pathian fapa a
langnak cu Sehtan hnatuannak siatsuah theh ding rori ah hin a si. ( I
John 3 : 8 ) Bawi Jesuh lawng kan damnak ding ah le U le Nau rualrem
ten kan um thei nak ding ah a mah lawng kan Bawi le kan Pathian a si.
Remnak le hnangamnak thinlung, taksa Thlarau damnak cu Jesuh lawng hi
Damnak famkim hrang ah sii thabik Pa Pathian ih in pekmi a si. A mah
in kan nih in uktu thimnak huham sung ihsin in runsuak ih a fahniang
uknak sungah in luhpi zo. A fapa thawng in sual ngaidamnak kan ngah
ih miluat kan si zo Haleluijah.
Thinhengnak, thintawinak sung ihsin kan in luat ter zo.

U le Nau hi ka hrang ah santlaibik a si ti hmuh theinak le, ka unau
pa hi mi aa an umlo, Pathian thawng in mifim kan si ti hmuh fiang hi
Jesuh ih in tuahsakmi damnak a si.
Ka duhdawtmi ka rual hardam ih na umnak ding ah le ziang hmuahhmuah
ah semrem ih na umnak ding ah na hrang ah thla ka cam. Thlarau lam ah
damnak in na um ti ka thei. ( III John 1 : 3 ) . Hihi U le Nau par ah
kan cin ding le kan thlacamnak si hram seh. Remlonak le sualnak tuah
ding ah le u le nau thentu ding ah siseh U le Nau par ih thinheng
ding ah Jesuh in Setan kutsung in inrunlo. U le Nau Vanram kan thlen
tiang harnak caan ah bawmaw tawn ding le thinlung, taksa Thlarau
damnak hmu ding ah Sehtan kut sung ihsin runsuakmi kan si zo.

Curuangah U le Nau par ah thinhengnak dam hram seh. U le Nau
hmuhsuamnak le zuarthlainak thinlung dam hram sehla, Jesuh hmin in ka
lo ngen hai a si. jesuh kan damnak, kan famkimnak, kan thianhlimnak,
thiltha lam ah in hruaitu, Leilung tlun mi phunkip hnen ah Pa Pathian
ih rundamnak thuthangtha simtu ding ah kan thinlung kan taksa kan
thlarau in duhdawtaw zet in Pathian ih hnatuanmi miphun si hram uh
si.

                                 Nu le Pa Theihawknak
                                             ( sexuality )

By : Z. Cung Lian Bik
Pathian in milai a tuah thawk tikah sex thawn tuah cihmi kan si bang
in; minung kan nunnak le sex hi thenaw thei ding a si lo. Asinain
tulai minung pawl cun sex hi Pathian in hang ding ih in tuah vek ih
hmang nawnlo in; mai taksa diriamnak le hiarnak lam ah, sualnak lam
ih kan hman ruangah sex hi Leitlun buai tertu bik le Leitlun milai
pawl harnak petubik pakhat ah a rawng cang ti cu kan hna ih kan theih
lawng si nawnlo in kan mit rori in kan rawng hmu thlang, Kan Lairam
le kan innsang rori hman ah kan tawng thlang a si.

Kristian a ti aw tu Lai fala tlangval pawl thaten kan ruat sal hnik
pei uh.  Pathian in sex hman dan ding ih in tuahmi bangtuk in kan
hmang nawnlo ruangah; sual man cu thihnak ti a si bangtuk in..thih
hlohnak tiang kan tawng thlang a si.  A tu AIDS natnak hi cu damter a
theihmi natnak a silo ruangah AIDS natnak lak ah thate ih kilvenawk
dan le ralrin dan kan thiam lo ah cun 2015 hrawng ah Leitlun milai a
hrek rori cu hi natnak hin hmunphiah bangtuk in inphiat ding tiah
mithiam pawl cun an phuang cia a si.

Hi nu le pa umtlannak hi Pathian tuahdan lo vekin milai pawl in kan
hman dan cu a tanglam vekin a si :
1. Nupi pasal nei ciang ih midang thawn sualnak.
2. Nupi pasal ih neiaw fawnlo; duh tawk ih umtlang rero.
3.  Falat tlangval lai ih nupa sualnak tuah.
4.  Pa le fa, tapa le farnu ti pawl thawn sualnak tuah.
5.  Ramsa thawn sualnak tuah.
6.  Pa le pa sualnak le nu le nu sualnak.
7.  Sex thawn pehtlaih in cawngia le movie pawl tuah.
8. Mah le mah zuarawknak tiang sualnak pawl hi an si.
A par lam ih kan tarlangmi pawl ziangmawzat cun kan Lairam le kan
miphun lak khal a thleng ve thlang. Curuangah nu le pa thenawknak
khal kan miphun lakah a tam tuk thlang ih a poi nagingai. Ramdang
thuhla cu ca in maw, thuthang in simaw kan rak thei theu ih; cu pawl
cun kan ram, kan innsang rori hman a buai ter thlang. Fa le an
riangvai, an anhai, innsang ah buainak tampi a suak.

Hrekkhat Krihfa fehsualmi pawl cun, ?Pathian in minung cu reedom in
pek bangtukin le sex cu in rak tuah thawk ihsin Pathian in laksawng
bang ih in rak pekmi a si ruangah, kan duh poh in sex hman hi a
thiang a si? tiah an ti ve. Hivek ruahnak le zirhnak hi zum sual a
awlte ruangah kan ralrin ngai a tul. Bible catlang kha an lakve ih a
silo zawng ih an fehpi ruangah zum sual a awlte. Cui tlun ah AIDS
ralrinnak lam ih hna tuantu pawl in le condom hmang ding lawngte ih
forh fialawk a si tikah; condom hman cun mah duh pohpoh ih cangvaih
ding tiah ruah sual khal a awl te.
A tlangpithu in Canada le US ah cun, guy marriages timi pa le pa
neihawk le, nu le nu neihawk khal mak ah an rel nawn lo. Sualnak mak
theitawp tuah khal pawi an ti lo. Hi bang pawl ih nundan hi kan mah
hnak ih fim le cathiam an si ruangah a thami a si ko ding tiah Laimi,
mirang uartuk pawl hrangah cun ruah sual a awl te. Hi a parlam ih kan
nganmi pawl hi kan Lainun le kan Kristiannak thawn khal ih kalhawmi
lawngte an si ih; kan Bible khal in vei tampi ralrinnak in pek ciami
thil lawngte an si.

Cun, hi sualnak thotho hin natnak phunphun, Phacu natnak, hepatitist
natnak, tak phar natnak le AIDS tiin a suahpi a si. Hi natnak pawl hi
kan Lairam kan miphun sung khalah hmuh ding a um thlang.
Bible sung kan zoh a si ah cun, Pathian in milai in tuah tikah sex
thawn tuahmi kan si ti cu a fiang tukmi a si ko. Asinan, Genesis
sungah khin mipa a itthat karlak te ah Pathian in mipa hnakruh lak
tahrat in nunau cu a tuah a si ti kan hmu. Cun, nu le pa thitawknak
thu ah pa in a nu le pa a tanta ding ih  cuticun nu thawn pumkhat an
si ding a ti.
Hi thu hi thaten kan zoh a si ahcun , nu le pa theihawknak ( pumkhat
sinak) cu ma’i hnakruh a si taktak mi thawn thate ih thitumnak a um
hnu lawng ah nule pa pumkhatnak kha tuah ding a si ti fiangten in
zirh a si.

Genesis sung ih, Onan thuanthu tla kan zoh ah cun; Onan cun a unau pa
a thih ruangah a unau pa’i nupi cu nupi ah a tuah nan, cumi thawn
cithlah a duhlo ruangah mipa cii cu a lengah a suah ter ringring ih
Pathian in a that rori ti kan hmu. Curuangah sex cu nupa khal in
taksa nuam tawlnak men le diriamnak men silo in san khat hnu san khat
a pehawk vivo nak ding le Pathian tuahmi Leilungpi luahkhat tu ding
cithlah nak ding ah, zalen tak ih nupa karlak ah hman ding ih Pathian
tuahmia  si.

Curuangah sex hi tulai san ah ma’i duhduh ih hmang pawl vek ih kan
hman lo nak ding le Pathian duhdan te ih kan hman ding hi kan miphun
le kan ramhrang kan biaknak hrang a thupi tukmi a si.

Malaysia Um Falam mi pawl hram thawknak

  By : Salai Pa Thuam
1994 hrawng ihsin Malaysia ah kan Laimi( Falam) kan rak thleng thawk
( Ca ngan tu kei hi 1996 ah ka rak thleng ve).  May 9, 1999 ah
Malaysia Flam pawlkom ( MFP ) kan rak din thawk. Kan thuken ( Motto)
ah Dingh nak in miphun a thangso ter ( Thufim 14: 34 ).
A hmaisabik In rak hruaitu pawl..
Salai Kap Cong
Salai Mang Mang
Salai Hrin Uk Mang
Salai Thawng Lian Thang
Salai Aye Win
Salai Liang Mawng
Salai Tha Nei Thuam
Salai Tha Kim  (USA ah thleng zo)
Salai Lal Sawi Cuang
Salai Khua Mang
Salai Ngun Than Zam
Salai Ram Than Zau( USA thleng zo)
Salai San Shwee
Salai John Siang
Salai Con Nei Sum
Salai Hrang Lul
Salai Thawng Lian Hmung
Pa Tluang Tin Pum (Lily Pa)
A tlun lam ih upa pawl in 1999 – 2002 tiang MFP hmin in kan Falam
hrangah teimak suah in hnatuan a rak si. 2002 December 24 ni ah MFP
timi cu Lai Christian Fellowship (LCF)  tin a hmin thleng a si.
Cuihlei ah Pathian thu thawn hruai awk si dingah lungkim a si.
A hmaisabik In hruaitu pawl :
Salai Tha Nei Thuam
Salai Mang Mang
Salai Hrin Uk Mang
Salai David Thang
Salai Ronald Tha Tin Mang
Salai Za He
Pa Cung Thawng
Pa Tluang Tin Pum
Pa Nah Mang
Salai Lal Sawi Cuang
Pa Sui Nei Sawn
Salai Hmung Van
Salai San Shwe
Salai Tawk San
Salai Van Cung Lian

Hi Fellowship upa pawl ih kaihhruainak in 16 March, 2003 ah  Rev. Za
Thelh lo cu LCF pastor dingah kawh suak a si.  Cun Malaysia um kan
laimi pawl cu LCF ah hmunkhat le lungrual ten hnatuan khawm a rak si.
Ziangtluk an thin a na pei

MFP ihsin LCF tiangah lungrual thatho ten hna a rak tuan tu, khua a
tlung zo le ram dang a feh zo tu pawl in tui ni ih kan din hmun, then
awknak tiang a rak suak mi pawl in thei tik ah ziangtluk an thin a na
pei!
Pathian kan biak khawmnak ah pakhat le pakhat rualrem lo nak, then
awk ding tiang huat awknak a um lai kan thei dah lo.
Tuu khal tu cun a tuu rual tha ten a khal nan a Tuu rual an rem awk
lo ti khal a si lo. Tuu run rual lakah huat awknak um lo in an then
awk thei ti hi tu ni lawngah ka thei. A va mak em!! Tuu khal tu in a
Tuu rual ih thinlung a then thek thluh maw asilole tha ten a khal lo
ih khawthim zik unau hmel palh tiang a Tuu rual pawl hmu lo in hna
dang a tuan pang sual teh a si kem! / sinahlam ! Ziangkhal sehla a
fiang sawn  mi cu Tuurual pawl thekdarh tuar in an um zo.
Absolom vek kan tul lo
David fapa tlangval hmeltha Absolom cu Pathian thu ngai lo in a pa ih
lalnak a cuh. A pa David ih thuthen nak parah a lungkim lo tu mipi
pawl a rak lem ( Sii zung ) ih a mai lam tang dingah a phunphun in a
tlawn ciamco. Kan unau thu thei lo deuh  le ruahnak danglam a nei
pawl hi Bawipa Pathian hnen feh ding lawng in sim in hruai uhsi, kan
bulpak hlawknak hrang ah si lo hramseh. Absolom kha a pa a do ciamco
nan ni netabik ahcun mawi lo zet in a nun nak a cem. Pathian in then
thek awk le dodal awk a duh lo ti cu a fiang zet.

West le East  Germany hman kha an ramkulhnak  hauhruang bal tahrat in
an kawm awk sal. Curaungah huat awknak nei lo kan nih Tuu rual khal
ziangtluk a rei dingih ziangtin ( Falam )  unau zaten hmun khat ah
Pathian kan biak tlang thei sal ding ti cu kan sim thei ciah lo.
Asinan hmunkhat ah kan khawm tlang thei sal ding timi cu ruahsannak
ka nei ringring.”Milai pawl cun an mai ruahnak vek in thu a ruat ve
lo tu pawl cu misual ah an hmu theu?A sinan kan mah vekin lungput a
nei lo tupawl khal unau kan sinak theihhngilh lo in rualrem dingin
kan thinlung ongkau uh si. Thil ziangkim hi Bawipa’i sunlawinak ah
cang vivo hram seh.

                       LCF Pastor Rev. S. Ni Luai Interview
Hruaitu : Sayapa Hruaitu thuthang ca in thu mallai kan lo sut  thei
pei maw?
Pastor Ni Luai :  Thei tuk ee.

HT :  : Na hmin hmai ih S timi hi ziangtinak so a si?
Pastor :  : Ka piangthar veten Kawhhran mipi in Deacon tuan ding ah
Steven an hril bang in Keikhal in hrilve. 1982 zan ka mang ah Pathian
Thlarau in Steven in Steven tiah ka hmin in thlengmi a si.

HT :  :  LCF ah Pastor ( Tuu khaltu ) in tuan sak ding in zangfah an
lo dilnak parah ziangtin na ruat?
Pastor :  : Leilung tlun ka damsung tawite ah ?Kan inn ah thla in ra
camsak aw tiih sawmnak le, Home crusade in ra tuah sak aw timi
sawmnak hi?ka lungawi bikmi a si theu.  Ahleice in hitluk in kan
miphun in harsat, retheih an tuarlai ih ka miphunpi unau pawl in
hnatuan in sawmmi cu Pathian aw a si ding ti ka zum ih ka lungawi
zet. Keimah lam ah zianghman san tlaihnak ka neilo ih; mipi tuurun
pawl ih thlacamsaknak thazang ka tul nasa.

HT :   : Ziang khua ah na suak?
Pastor:   : Falam peng Ramthlo khua ah ka suak. Ramthlo cu Falam le
Halkha lamzinpi ah a um. Falam ihsin peng 22 a hla ih; Laitlang ih
tlang sangbik pahnihnak Zinghmuh tlang hnuai ih um a si.

HT :   : Ziangtik ah nupi na rak thi? Na innsang nu’i hmin le  fate
ziangzat na nei thlang ti theih kan duh zet.
Pastor :   : 1982, kum 27 ka kim cekci ah Pathian in nupi in pe. Ka
innsang nu’i hmin cu Hmet Cuai a si ih  FBA ih E&M director hlun Rev.
Hrang Hnin ih farnu a si. Fapa pathum le fanu panga ka nei ih; ka
fapa pakhat cun Rakhain ram ih Missionary ka tuan lai ah Pathian hnen
ah in fehsan zo.

HT :  : Na fa le an pitling thlang maw?
Pastor :   :  Ka fanu pahnih cun B.A. an theh zo ih; pakhat tu cun
M.Div ( Master of Divinity ) a peh rero lai. Cun ka fanu pakhat cu
B.A. a zir lai, pakhat cun B.A. a theh zo ih Computer a zir lai rero,
fanu pakhat le fapa pakhat in phun hra an kai lai ih a dang cu Middle
le Primary lawng an si lai.

HT :  : Kawlram ih na Mother Church le ziangvek hna na rak tuan ti in
sim thei pei maw?
Pastor :    : Ka Mother Church cu Believers Church of Jesus Christ a
si. 1992 – 1995 tiang Rakhai State ah Field  Director ka tuan ih;
1995 ihsin 2005 tiang E & M ( Evangelist & Mission ) Director ka rak
tuan.

HT :   : Sayapa, Pastor kum ziat na rak tuan zo? Pastor na tuan nak
ah har na ti bikmi le nuam na ti bikmi in sim thei pei maw?
Pastor :  :  1985 in Evangelist in ka thawk ih Pathain
Thlarauthianghlim lam hruainak ruangah a tu Kum 21 nak ka thleng
thlang. Har ka ti bikmi cu Pathian duhloh zawng ih khaw ruahle
sualnak sung ih thlun duhnak thinlung  neih  hi har ka ti bik. Nuam
ka tibikmi cu, ?Pathian hnatuannak ruangah,  innsungsang harsatnak
tawng cing le mi ih sawisel, mi vuaknak, thawng thlak tiang tuar cing
ih   Pathian thuthangtha sim le Pathian thuthangtha ka sim ih zumlotu
in rundamnak an co ka hmuh hi nuam ka tibik a si?

HT :   :Ziangtik kum ah Reverend na rak ngah?
Pastor : 1993 kum ah Reverend ka rak ngah ih; cui tlun ah December
2004 ah ?World Mission?khal in Reverend in pe.

HT :  : Culo dang teh ngahmi na nei maw?
Pastor : Gospel For Asia Ministry in Asia ram pumpi ah kutsih theinak
Certificate ( Marrage Licence ) tla in pe.

HT :  :  Bible tlawng lam na thehzomi tla theih kan duh zet?
Pastor :  :   Diploma le Bible Training tete, B.R.E.  tla khal ka rak
ngah hnuaihni.

HT :   : Sayapa LCF cu pawl tinkim finkhawm Fellowship kan si fawn;
ziangtin kan kaihruaiawk le a thabik pei?
Pastor :  :  Kawhhran tinkim finkhawm kan si vekin; kan kawhhran ciau
ih a thabikmi hruaiawknak ciau rak suahpi sehla; cui a thabik
finkhawm cun hruaiaw sehla ka duh bik.

HT : : Pastor le Kawhhran upa hi ziangtin hna tuantlang ding ha a si?
Pastor :   : Pastor le Kawhhran upa cu nupa vek kan si. Inn sang
dinsuahnak ah nu le pa a thupi vek cekci in Kawhhran ding suahnak
ding khalah Pastor le Upa pawl cu Nupa vek rori ih umtlang le hna
tuan tlang a tul.

HT : : Kawhhran pakhat thangso ding ah ziang ha thupibik ah na ruah?
Pastor :  : Minung kan sidan ah hin  Thlarau lam ih kan pitlin a
thupi bik in ka hmu. Degree le fimthiamnak, zirsannak rinsan ih
hruaiawk cun ?Miphun le Kawhhran siatsuah a awlte?  Curuangah zirsang
pawl khal Thlarau ih pitlin a thupi tuk.

HT :  :  Sayapa Thlarau lam pitling  timi cu ziangbik so na sim duh?
Pastor :   :  Thusimtu 12 ih kan hmuh bangin Pathian a tihtu le
Pathian thu bang ih a nung theitu hi Thlarau ih pitling an si.
Pathian tih timi cu sual huat hi a si ( Thufim 8 : 13 ). Curuangah
Thlaraulam ih pitling cun sualnak a ruah men hmanah a thin a nuamlo
ih midang hrang ah thiltha tuahnak thawn a nung. Harnak a tawn khal
ah Pathian hmai ah zumtlak in a nung ringring. Pathian a phatsan dah
lo. Lungawi caan a tawn khalah i pe tu Pathian a si ti a thei ih
Pathian hnen ah lungawi raithawinak a pek ringring.

HT :  :  Pastor pakhat dinhmun in innsang cawmnak ruah ruang ih
lenglam sumhawlnak tuah ciamco le hnatuan hi ziangtin na hmu?
Pastor :  :  Pastor dinhmun cu thuthangtha sim in a cawmaw ding tiah
Cathiang in a ti. Tuu khal tu cu tuu hmul in a cawm ding timi lawng
kha ka nunpimi a si.

HT :   :  LCF hi ziang vek Doctrine in hruaiaw sehla tha na ti?
Pastor :   : Doctrine timi cu zumnak a si. Phun hra a um. Himi kan
zumnak hicu a bangaw theh ko ti’n ka ruat. Doctrine ah elawk ding a
um lo.
Cui doctrine 10 cu :
1. Theology ( Doctrine of God )
2.  Bibliology ( Doctrine of  Bible )
3. Chritology ( Doctrine of Christ )
4.  Hamartology ( Doctrine of Sin )
5. Pneumatology ( Doctrine of Holy Spirit )
6. Soteriology ( Doctrine of Man )
7. Angellology ( Doctrine of Angels )
8. Eccleciology ( Doctrine of The Church )
9. Demonology (Doctrine of Demons
10.  Eschatology ( Doctrine of Last Things )
Himi hi zumnak Doctrines a si ih pomlo kan um ka zum lo.

HT :  :  Sayapa, Malaysia ah Falam mi hmun hnih ih kan khawmaw hi
ziangtin na hmu?
Pastor :  Malaysia hi Laimi hrangah cun a laangte ih kan suncaw
eihrawmnak hmun a si. Thaithawh le zanriah  einak hmun  kan thleng
hrihlo, cutawk hmun ih thenawk rero khal tul ka ti lo. Pawi ka ti zet.

HT :  :  Pastor pakhat dinhmun in na tuu rual pawl hruai ding ah
ziangha  a thupibik ah na ruat?
Pastor :   :  Profet Samuel in, “Ka miphun hrangah thla ka cam nawnlo
ah cun, ka lei hi ka dang ah bet mei seh a ti?, curuang ah :
1. Tuu rual hrang thla cam sak ringring le 2..  Tuu rual in Thutak
rawl an ei ih an pitlin theinak ding lamzin tha ih hruai hi thupibik
ah ka ruat.

HT :  :  LCF ihsin a suakmi kan unau pawl parah ziangtin ruahnak na
nei?
Pastor :  :  Minung kan si tik ah kan taksa hi thenaw hman sehla
zumnak, ruahsannak le miphun pakhat kan sinak cu thenawk a theih lo.
Kan thinlung in thenaw hrimhrim hlah sehla tihi ka thlacamnak le ka
saduhthami a si.

HT :  :  Sayapa, duhnalocing in hivek dinghmun ( kan thenawk zo ) kan
thlen zo ruangah; hmailam caan tu ah ziangtin kan feh le a tha pei?
Pastor :  :  Harnak kan tawn ah bawmaw tawn ding in U le Nau hrin kan
si ih; Lungawinak kan tawn caan khal ah lungawipi tlang ding in um
ding kan si. Curuangah,Bawi Jesuh in Matthew 12 : 25 ah, ?Khua siseh,
Innsang si seh, ramle miphun khal siseh an remawk lo ih an to awk
rero ah cun an thangso dahlo ding?a ti bang in; to awk nawnlo in; a
thar in duhdawtnak thinlung innsangpi kan sak ding. Cucu miphun hrang
ah a thabikmi a si.

HT :  : Syapa, caan sauzet inpe ih kan thusuhnak pawl kimten in let
thluh ruangah tampi kan lungawi.
Pastor :  : Keikhal ka lungawi ve.

Leitlun Thuthang Hrilkhawm

US Asian Meeting a tluang zet
Kan dung zarh ah, New York khawpi ah Asian ram hra ihsin Foreign
Ministers pawl US State Secretary thawn meeting an nei. Hi meetingnak
ah hin US Secretary Rice cun Asian upa pawl hi thaten thu a rel
tlangpi hai ih; hmai kum ah Malaysia ih tuah dingmi Asian meeting
khal ah kai tengteng a tum thu le Piano tla tum a duh thu a sim hai.

Tuitum Asian Meeting ih a teltheilo naksan khal Palestine thubuai
ruangah a si tiah, Rice cun a sim hai. Asian ram hruaitu pawl cun  an
mah le ram aiawh ciau in thu phunphun an rel ih; Myamar Foreign
Minister Nay Win khal in; kan ram ih natnak le riittheih thil pawl
pahhlohnak ding thu hla pawl a relpi ve.Malaysia Foreign Minister
cun, US hin Asian ram pawl thawn thaten hnatuan an rak duh ngaingai
tu tuitum ah fiang ten kan hmu thei a ti.

Yangon – New Delhi Vanzam netabik :
Myanmar Airway International  cun; ticket leitu a hmuh dahlo tuk
ruangah a sung a paw ( kawl tong ) ih; kan dung tlawngkai nihnih
simlam ah Last  trip cu India khawpi bik New Delhi lam pan in a zam.
India khawpi bik New Delhi le Yangon karlak hi MAI Boeing 737 – 800
lawng a hlehka rero ih; zarh khat ah vei thum a hlehka. Asinan,
Passengers an umlo tuk ih Myanmar cun a bawidong san tum hrih a si.
Myanmar – New Delhi Air flight hi kan dung kum March thla ihsin neih
thawk a si ih; kum khat lawng a daih a si cu.
India Tourist pakhat cun, hiti Myanmar Airway ah passenger an umlo
naksan hi Myanmar VISAS tuah dan harsat ruangah le Passport tuah man
khung tuk ruangah a si. Passport tuahman lawng hmanah US$ 500 kan cem
a tul ruangah India mipi tamsawn cun Myanmar hi kan pal duhlo, tiah a
sim bet. Airway thuneitu pawl cun kan hmai December thla hrawng ah
India – Myanmar Airway hi an awnsal an beisei.

UN in Myanmar a kap pei maw?
Tui zarh New York khawpi ih US le Asian Foreign Minister meeting nak
ah UN Secretary Kofi Annan cun Myanmar le Human right palbet tu ram
pawl cu UN in napin a ruahsak ding thu a rak sim hai.
Myanmar mipi tamsawn cun UN hi kan ram ralkap kut sung ihsin in luat
ter tu ding; ralkap cocah rawn do ding ah kan beisei theh.  UN khal
in 2006 hi Myanmar hrang ah political change tuah ding kum ah a rak
phuang zo.
Asinan, 1988 kum ih Myanmar ah ralkap cozah in uknak an rak kaih
ihsin tuini tiang UN cun a rinsanmi milai 6 rori a fial zo ih; cu
pawl cun General cu an tawng theh nan boruak thartuk a suahpi hrihlo.
UN cun Kawlram uk tu thawn Political thu reltlang ding in Sadako
Ogata ( UNHCR hruaitu hlun ), Yozo Yokata, Alvaro Desoto, Razali
Ismail,Paulo Sergio Pinheiro le Ali Alatas pawl cu a rakthlah zo.
Riahsiat um tuk a simi cu, hi pawl hi Kawl ram uktu pawl cun hnaset
an rak tun men. An rak tawng ko nan an thu thlunmi zianghman an
neilo. Pin Heiro le Razali tla le phei cu Kawl ram hman luhsal an
siang nawnlo.

Curuangah pabik ih kan zohmi UN khal paper par ih hnatuantu men tla
an bang! 2006 ah teh ziangvek in UN in Myanmar parah a cangvai ding
ti cu zumnak  ih hngah cuahco a tul a si ko. Ziangkhal lole kan ram
hrang ah tu hnak ih na sinsin ih zumtu pawl in thlacamnak thawn than
kan lak a tul na ti ve lomaw?

              Kanmah Sung Thu

UNHCR Meeting-nak Thu
Malaysia ih refugee thu thawi peh par aw in UNHCR in CRC leh ACR cu
Meeting nak nei ding in ni 15.9.05 ah in ko ih mipum ACR lam in 16,
CRC lam in 12 lai kan kai ih nazi 11.30 am ah kan meeting kan
thawk.Kan meeting nak ah UNHCR hotu pa 4 in in kai hruai ih
Registration thu thawi peh par aw in Thu an rak rel cat zo mi cu
meeting kai tu kan za te theih ah in sim fiang hmai sa,cun CRC leh
ACR lam ih sin tawng nak can in pe ih mah leh tha kan ti mi cio cu
kan CHIN mipi ai ah kan rel ru riih thu sut nak ,dil nak pawl kan
nei.Meeting nak ih thu pi thawi peh par aw in Registration thu ah CRC
cu center ti um nawn lo in mipi in mahte direct in UNHCR ah refugee
dil theih asi thu cu in theih ter asi.ACR khal cu center ah a ret
cuang lo ding.
Hi thu thawi peh par aw in Malaysia ram sung ih a um mi NGO pali 4
pawl hnen khal ah peh thlaih nak nei thei ding in Address pawl in pe
asi.Ziang tik ah mi thar hrang kan ong leh ding ti thu cu in sim thei
hrih lo nan kan ong kir teng teng ding ti cu in sim asi.Tu tak ah cun
Mina besia leh mi thu pi pawl deuh hrang lawng ah phi thei asi ti thu
khal in theih ter asi.
Thin sau ten leh lung rual nak thawn kan hngak cio tum tlang kei
cu.ACR card a tuah duh hrang ah tuah thei asi

      CARC

Lal Ci Luai.
UNHCR ziangtik in a rak thawk
United Nations High Commissioner For Refugees ( UNHCR ) cu  December
14, 1950 ah United Nations General Assembly ih rak dinmi a si. Hi
pawlkom hi Leilung tlun pumpi ih refugees buainak fel ter ding le
refuges pawl humhim ding ih dinmi a si.
Refugees pawl an bawm dan tlangpi cu (1)Himdam ten an mai ram ih kir
ter sal. ( 2 ) An tlannak  ram ah localmi vek rori ih umter. ( 3 )
Ram thumnak ih kuat sal pawl a si. Hi UN Agency hin Leitlun milai
refugees  50 million rori, dinhmun thasawn ih ding thei ding in  an
rak bawm zo. Tulai fang ah Leitlun ram 116 ah milai 17million rori an
bawm rero ih; UNHCR hin himi ram 116 sungah hin Staff 6,000 rori an
nei a si.

CHIN Refugee Hrangah:
  Kum 2001 ihsin Malaysia UNHCR Laimi in Refugee sinak kan rak dil
thawk ih, tu ni tiangah mi 700 hrawng cu ramdang an thlrng zo. UNHCR
card a nei zo ih ramdang feh cing ding in an tawlrel sak rero lai mi
2000 hrawng kan um lai. Cun, Refugee sinak dil a duh tuk nanin can
tha ngah thei hrihlo mi 10 000 lenglo in kan hngak lai. Thawsuah kan
dawng kan ti rero laiah, pakhat le pakhat duhnak bangaw lo le
tawngkam bangaw lo ruangah UNHCR in Laimi in zumtuk nawn lemlo ti cu,
mi sim lawng silo in  nitin kan hnatuannak ihsin kan hmu thei.
15.9.05 in an meeting nak vek in, mithar dilnak cu an awng leh ko
ding nan, CRC serial number thlun nawnlo in UNHCR ah mahte dil thei a
si thlang ding.
CRC cahnah le ACR card khal UNHCR in a lungkim pi lo le a pawmsak lo
thu a sim. UNHCR in mithar a kawh dan ding hi: UN zung hmaiah ka va
taansii (tlaraw) ding maw, kan umnak hmunah an mah an rawng sawn ding
ti mi a fiang lo.

Curuangah, zumlo pi in interview inra tuah pang a si khal le, kan thu
sim mi hmuah hmuah a bangawk thluh ih, Laimi in Refugee kan ngah
thluh thei nak ding ah, UNHCR duhdan theifiang tu rawn hmaisa in kan
case ding ngan cia thep thep ih neih a tha ko lo maw! Refugee ah kan
case bangawlo thluh hman sehla, Lairam ihsin rawng kan si thluh nak
ah thu hmunkhat te ih kan feh a tul. Thu pakhat ka sim sual pang mi
hi, keimai hrang lawng silo in ka miphun za ten siat thei nak a si
ih; pakhat ka sim that mi khal hi, keimah pakhat hrang lawng si lo in
ka miphun za te hrangah thatnak a si ti thei ring ring in, miphun
siatsuah tu si hnak cun miphun hrangih thiltha tuahtu kan si ciau
theinak ding ah, pakhat le pakhat rawnaw tawn ring ring in hna kan
tuantlang vialvo pei uh. Lungrualnak in miphun a thangso ter ho
khaw!!!!…….

By: David Mawia

(Leitlun Thuthang Peh)….

Palestine pawl in Synagouge siatbal
Kum 38 hrawg an luah hnu, Kan dung zarh ah Gaza Strip ihsin Israel
pawl cu an suak fel zo. Israel ralkap le mipi pawl in Gaza Stripan
suahsan fel hnu ah Palestine mipi tamnawn, Muslim pirpak deuh pawl
Gaza Strip ah an pungkhawm ih Synagouge, Israel pawl Pathan biaknak
inn pawl meisa in an nawk. An nehnak langter in meithal van lam ah an
kap ih inn pawl tla an siat bal ciamco. Palestine ram cu zan boruak a
thiang thei zetmi a sinan an mei khu ruangah a sen remrem theh.
Tawkfang cu Palestine ralkap pawl khalin zianghman an dawn khamlo; a
rei deuh hnu cun Palestine ralkap pawl in an dawi darh theh.
Israel pawl cun an Synagouge pawl cu an upat tuk ruangah siat bal ta
lo in an tanta ih; an tlansuah veten Palestine pawl cun pathum rori
meisa in an nawk cih, sobul hmang in siatbal khal an thawk, hmun
dangdang ih Synagouge khal an siatbal rero lai a si.
Palestine ralbawi Abytayr cun, Israel ralkap pawl hin thu felfai
zianghman in simta lo in an suah ruangah ralrinnak ralkap khal kan
tuahman lo; curuangah mipi pawl in hivek ih Synagouge le inn pawl
siatsuah an si, tu cu ralkap tam sawnkhal kan thlah thlang ih mipi
pawl cu kan kham thei thlang ding  a ti. Tuitum Israel in Gaza Strip
ihsin a laksuahmi pawl hi milai 8,500 hrawng an si ih Synagouge 19
rori himten an tanta a si.

Milai vun hmang in sumdawnnak tuah
Tuluk company pakhat cun milai vun rori hmang in Europe lam ih zuar
ding milai hrang mawinak phunphun an tuahsuak tiah British titin
thuthangca in 14 September, 05?ah an ngan.
Tuluk pawl cun thawng inn ih mi an thahmi pawl cu; an thih le veten
an vun an hlihsak ih ceiawknak phunphun ah an tuah suak a si. Hi thu
hi Leitlun thuneitu pawl cun an buaipi zet ih thalo zet in an hmu a
si.

Japan : Robot Milai thar tuahsuak
Caktuk ih a tlan reromi Leitlun ah Japan ram cun Robot milai thar an
tuah suak leh zo. Hi Robot ( Setzuk ) milai hi a san lam 1 metre ih
tuah a si ih; 30kg ih rit a si. A man cu US$ 15,000 a si.
Hi Robot milai hin a neitu milai pahnih le midang pariat a hminsin
thei ih; tawngfang 10,000 a thiam. Inn kiltu ( security ), Intek pawl
zingpit ih thangtu, rawl ei caan simtu le a phunphun ih fial theih
ding in an tuah. Tar pawl ret khawmnak khal ah an thahnem zet. Hi
Robot hi a hmin ah ?Wakamaru?tin an ko ih; inn lam hna tuantu,
Secretary le security guard tiang khal ih hman theih ding in tuah a
si. Ziangtik ah Myanmar teh in kan tuah suak ve ding?

Indonesia : Australia embassy Bomb puah tu..
14 September, 05?ni ah Indonesia Court cun kan dung kum ih Australia
Ambassy bomb puahtu pakhat a simi, Alias Rois cu  that ding in a
thuhla an rel fel. Kan dung September thla ah Indonesia ih Australia
Embassy hi Osma ih bawmnak in bomb puah a si ih Indonesia milai 12
rori an thi. Rois hi bomb puahnak ding ih Australia $ 10,000 cu Rois
hin Osma ihsin dawngtu khal a si.

Japan Hrilawknak: Koizumi- in nehnak co
Tulai fang hi Japan rampi cun hrilawknak an neih laifang a si. Kan
dung zarpi ni ah Prime Minister ding lai  ( kehlam zuk ) Koizumi ih
party hruaimi,  Liberal Democrat le an tanpi pawl cun Lower Parliment
seat 480 sung ah seats 307 rori in nehnak an co  zo thu Kyodo News
Agency cun an phuang.
Japan ram hi LPD hin 1955 kum ihsin tuini tiang an kaihruai lai a si.

French ramah Cawhnawi Beer thar
French pacang Marcel Besnard,55, cun kan dung zarh ah Cawhnawi in
Beer thar phunkhat a tuah suak ih; zarhkhat sungah palang 300 an zuar
suak hngal. Hi beer hi ?Lactiwel?ti’n a hmin a vuah ih; cawhnawi 75%,
malt 25% le alcohol 2% rawi ih tuah a si. Hi beer hi 2003 ihsin tuah
a rak tum thawk zo ih tu lawng ah International ih in thei ding in a
suak thei fang. French ram ah cun a lar thar zet.

Thailand Miss thar
Kan dung September 10 ah Thailand cun an ram fala mawibik hrilnak
Bangkok khawpi ah an tuah ih;Atchara Mackay hin Thailand Miss 2005
lukhuh cu a ngah riai. Hi kum 21 fala note hin December thla ah tuluk
ram ih tuah ding Leilungtlun Miss ( World Miss ) zuamnak ah Thai ram
mipi hmuahhmuah aiawh in a tel ding a si.

Tuluk nauhak kum 13 nute in fa a nei riai!!!
Kan dung March thla ah Tuluk ram, Sichuan Province ih um nauhak kum
13 mi cun fa a neih thu China Daily thuthangca in a phuang. Hi nauhak
nau neih nak sanhi a nu le pa’i mawh a si.
Hi nauhak hi an ram ih nauhak kum 15 hnuai 10million lak ih pakhat a
si. Tuluk ram ih nauhak  a tamsawn cu sumhawl dingin sungkhat inn le
pipu hnen lam ih um an si. Media le Sociologist pawl ih zingzoinak ah
65% cun zarhkhat veikhat lawng an nu le pa contact an tuah ih cuhman
cu phone in an bia. Cutlun ah 9% cun an nu le pa an biak dahlo bembem.
Cun Tuluk pacang 82% cun an innsang suahsan in sum an hawl. Hivek ih
nu le pa’i kiang umlo nauhak an tamtuk ruangah sualnak phunphun a
karh ih; kum kim le kimlo khal a um nawnlo. Mai hrang lawng ruat
milai le rualpi pawl khal paihlo milai an tam sinsin tiah China Daily
cun a phuag. Tuluk cozah cun hi buainak hi a cangthei tawp ih buaipi
a tum a si.

Britney Spears-in Fapa te a nei!
Kan dung tlawngkai ni thum ni ah US Weekly thuthangca in Briety
Spears cun fapa te a nei zo  thu an suah. Spear ih fa neihnak thawn
pehpar in Reuters le Leitlun thuthang ngantu tampi in suhnak an tuah
celcel nan; direct in ziang a phi hman an ngah hrih lo.

India Actress Preeti Palik kut sung thleng
India Actress fala mawi Preeti cu kan dung weekend ah India Palik
pawl cun; a director thah a tum thu an theisuak ih an kai. Preeti
hin  a director, Madhue Bandarkhar cun a sualpi thu le thah ding ih a
hro ruangah hivekthil hi  tuah a si thu Palik hnen ah a sim ve.  ?
Mombai ih Film kan tuah lai ah, New Delhi kan thlen ve ten  neiaw
ding in le Film Industry tampi ding dingin director hin in bum a si?
tiah India fala mawi hin Palik pawl a sim.
Preeti hin a director-pa that dingah milai pakhat Rs. 75,000 ( RM
6,408 ) in a sang ih; a thah man hlan ah India palik cun thu an thei
man.  Preeti hin a awm le a thawthawk a awisel ih siizung ah Palik
pawl ih kilven in a um. Director khal hivek thuhla ara suah tikah
ningzak in a innleng hman a suak ngam cuca lo.

US : Katrina mitihi zat 700 lan zo!
US cun Kan dung ih US thlipi le tilian ruangah ih thi zat an siar
rero lai ih September 16, 05?tiang ah 700 an leng an siar thei zo.
US Official cun august 29, thlipi le tilian ruangah ih mithi cu 708
ah an ret. Palik le Ralkap pawl cun inn lawng le harnak tuar pawl
hmun cu an hawl cico lai ih; milai 10,000 tal cu an thih zum a si.
Tilian ruang ih mai inn hlum tlansuahsan tu 180,000 pawl cun hmai
zarh lam ah an inn kel te an ngah sal thei ding khal ruahsanak an nei
ih; US cozahpi cun theihtawp in tuahthatsalnak tuanvo a la a si.

Leitlun tlangleng zin sangbik
Leilung tlun ih Tlangleng zin sangbik cu Tibet ram ih Qinhai
tlangleng zin a si. Tipithuanthum ihsin a sannak 4,767m hmun tlang
par rori ah hi tlangleng zin hi tuah a si ih; 5,000m hrawng ih sau a
pal tlang a si. Kan hmai kum ah Tuluk ram ih Golmud khawpi le tibetan
capital Lhasa karlak khal; hi tlangleng zin hi peh vivo a si ding.

Uico Thlacam thiam
South Kore ram ih Buddist Temple, Buljang Temple ih phungki pawl cun
uico pakhat ?Hama?tiih an kawhmi cu thlacam an zirh ih; duhtawk in
phungki pawl lak ah cui uico cun thla a cam theive zo. Buddist pawl
cun, cui uico cu a hlan ah milai a rak si dah a si ding an ti.

“Bezai
Laicin sempi tei tam lai tiih tluang tlawm cu;
Runthang inn leh fawh cawng tial tikur Menhngel ka run ngai
ruangmang.”
                            By : Ukte

Tong Fim
“Nite cu thaisun hrang ah a liam ih; zingpit te ah nikhat hrang  a
thar in a suak ringring. Curuangah nitin te hi ka hrangah ni thar a
si ringring.”

“Mi pakhat ih uknak ram le mi pakhat ihthuneihnak ram pohpoh ah mipi
in an tuar theu. Leilung tlun ah mipi lalnak ram a thangso ih
mipakhat lalnak ram a cem vivo.”

“Thil pakhatkhat na tuah tikah na fimnak, na felnak, na thiamnak le
cahnak hnakin na thinsaunak in; hlawhtlinnak a lo pe sawn ding!”

                      Hruaitu Cah duh hrang
Lai Christian Fellowship hmin ih suahmi HRUAITU zarhtin thuthang ca
hi Khawmnak lawngah silo in; KL ih rak khawm theilo Laimi unau
hmuahhmuah hrang ah duhsaknak thawn kuat suah ringring a si. Zarhtin
bu 40 lai kuatsuah a si ih; a cah duh hrangah Editors pawl hnen ah
nan contact Address rawn sim loli uh.  Lai tong rori ih nganmi
Sermons, Leitlun thuthang, Myanmar thuthang le Refugee thuhla, Capoh
le Articles phunphun cu na hnatuannak hmun rori ah Malaysia Post-men
pawl in an rawn lo phurh sak ding.

Ed.

Capo
Ha lo pitar
Laitlang ih tlangval pakhat Yangon ih tlawng va kai cun a nu phone a
biak an ti.
Tlangval : Hallo, hallo, hallo..ka nu maw na si?
A nu :  Ruma rama, Yangon tlawng ka kai ee..ti ruang ih mai nu le
halo, halo, halo mi ti rero, ?Yangon na feh hlan ihsin ha ka neilo ti
cu na thei ko ual?.Uico fa biak tlak khal na si lo hi….

Arti  ei ruangah!!
Malaysia thleng Lai tlangval pakhat le a nu phone an biak aw…
A nu : Pate, mi fa le hmuah paisa ting tampi an kuat, nang hmuah na
fehnak man hman  kan bak lai…ziangtikah paisa in ra kuat thei ding?
A fapa :  Aih ka nu ee, Malaysia cu kan zum vek a rak silo! Paisa hi
thingkung par ih lawh hluahhlo ding a rak um lo. Ka renawk tuk nakah
rawl thawthaw hman ei sianglo in kum hnih sung rori arti lawngte ka
ei so khaw!
A nu :  Arti lawngte na ei ruangah phiangsen, paisa hman in kuat
theilo. Kannih Laitlangah cun behrum hman hi kan kawh cekco hawn si
ah. A rang theibik in ra tlung aw.
A fapa : Ka nu, tlun lamlam, kan innsang buainak khal ka ruat manlo, ?
kan kawhhran buai ka fel ter hnu le ka ra tlung ding so khaw?
A nu : Pate, nan buai ve maw?
A fapa : Laimi le buainak cu unau an si ual.
A nu : Ramdang thlen man na nei tuk Pate, na thangso tuk zo ual.

Kan Hni Khekkho
Bawi Jesuh thinglamtah ih an khai laiah Lai tlangval pakhat cu a rak
telve a si hmang.
” Bawi Jesuh kehlam ih an khai mi sawn cun..Nang Jesuh, Pathian fapa
na si ngaingai ahcun damter aw awla, kan nih khal in dam ter ve hmen!
a ti ve ten ..Jesuh thawn kan rualvah cun kan zohaw ih Khek khek khek
tiah kan hni ciamco a ti”.

A NEITU
LCF

CHIEF EDITOR
RICHARD K. EMMANUEL

JOINT EDITOR
VL bawithang

SENIOR ADVISORS
ANDREW THANG ( Pate )
REV. S. NI LUAI
PEHZOMNAK
42 – 14 WISMA CITY TOWER
JALAN ALOR, 50200
KUALALUMPUR,
MALAYSIA

CONTACT TO :
     PHONE
012 – 6402232 ( Ela )
hruaitu@…
richardemmanuel4u@…
vl_bawithang@…

Comments

comments

Comments

%d bloggers like this: