Hruaitu Issue 89

A HAWLAWLNAK
Editorial….1
Hna tuantu tha…2 – 3
Spain Ram…..4 – 5
Sunlawih tlak Lai tlangval….5
Kawhhran Thuthan….6,12
Maw LCF……7
Myanmar Thuthang….8 – 9
Local Thuthang….10 – 11
Leitlun Thuthang….13 – 17
Kanmah Sung thu….18 – 19
General Knowledges…20
Capo…..Inside Back Cover

“HRUAITU  thuthangca sung ih suakmi pawl hi Editorial hmuhdan le
ngaihdan a si thluh lo; a ngan tu  bulpak pakhat ciar  ih  hmuhdan
nganmi an si.”

EDITORIAL

Pathian thu lo cun!
Laimi hi Pathianin inzangfak ih Malaysia tiangtiang in hruai thleng,
cu lawng hman silo in a thangso zomi ram pawl tiang kan thleng theh
zo. Hihi Pathian zangfahnak ruang lawng ah a si. Asinan, Pathian
thlawsuah kan dawnmi pawl hin kan miphun le kan biaknak hmel a siat
ter tla a bang ka ti.
Malaysia kan dinhmun khal ah LCF ti’n Falam mi pawl kan fuan khawm aw
ih; “pahnih khat par ih lungkimlo nak le pahnih khat par ih
thinnatnak men ruang ah?Falam pawlkom dang kan ding tivek kan mit
rori in a vawn hmuh tik ah mangbangza a si ko.
Peng dang kan rual hrekkhat cun, ?Falam pwl cu Falam lak ihsin an
suak ih, Falam sit ti’n an ding, zo pawl sawn so Falam ti khal kan
fiang cuca lo; Falam sit le tuh ( kawl tong) an si pei maw? tiah an
sim ka vawn theih le ve ten KL khawpi sungah cangai kua ka hawl. Hmu
sehla cu ka lut hla zo ding.?Cucu milai pawl hmuh dan le ruanak a si.
Ziangkhallo le Pathian thu sawn tu cun zumtu hi kan thlennak kip ah
khawmnak va tuah ih; kan Pathian hi a tam thei tawp ih thangthat ding
biak ding in zirh. Zumtu kan ti awk le veten Pathian thu ih ke a karh
mi kan si. Falam, Filam le Folam kan va si khal le Pathian thu ih kan
hruai awk sung cun Pathian kan parah a lungawi ding ih kan phun in
cawisang ding.  Kan mahte kan cawisan awk le ti thei, ding thei, feh
thei tiah kan porhawk pang cun puartthau pawl a huatu kan biak
Pathian ih kut tuar ding cu kan covo a si.
Pathian thu lo cun..miphun, Kawhhran, Ram le Milai hrimhrim hi kan
rak ding thei hrimhrim lo. Rei kan daih lo. Kan pawlkom, miphun
duhdawt hmin sal ih kan hnatuan nak le kan pumcawmnak hrang ih nitin
te hna kan tuannak ciau ah ?Pathian thu?nunpi in ?Falam?pawl ke karh
kan zuam ciau pei uh!

Hnatuan tu T.ha
                                                       By.  Rev . S.
Ni Luai

“Ziang nan tuahkhal ah phun zai rero lo le el awk rero lo in tuah uh
( Phil 2 : 14 )?”

Inn tumpi sungah pakan le bel kheng a phunphun an um. A hrekkhat cu
ngun ih tuahmi, a hrekkhat cu sui ih tuahmi, a dang pawl cu thing ih
tuahmi le thir ih tuahmi thingkuang, bizu, tohkham pawl an si.
A hrekkhat pawl cu puai caan ah hman mi le nitin ih hmanmi tla an um.
Himi thilri pawl hmuahhmuah hi inn neitu ih a duh caan ah a hmanmi
lawngte an si thluh.
Cubangtuk in minung hi a ngaingai ah cun riantu sal vek men kan si.
Bible in Bawi pahnih kan neih thu in sim. Bawi pakhat cu Pathian a si
ih pakhat thung cu setan a si. Bawi pakhat ih a hman duhmi cu
ziangvek so a hman duh? A bawipa kut tang ih daite le fel zet ih  kut
rori in hna a tuan taktak tu lawng khi a hman duhmi an si theu.

Hnatuantu thalo cu a tuan ih tuanlo in ka lawng tong rero, thu menmen
elawk rero tu pawl an si.    Cu pawl cun zianghman thathnemnak an
suahpi thei dahlo.  Cuvek pawl cu Bawipa in ziangtik hman ah hnatuan
tu tha a ti dahlo ding. Inn sung ih thilri pawl hin pakhat le khat
elawk rero hai sehla, nang san na tlailo kemah lawng ka bawipa in in
hmang duh nang cu a lo hmang duhlo, asilole kemah lawng in hmang
ringring, ka baang tuk tiah elawk ringring hai seh la, inn neitu
bawipa a awlawk a sawng ding. Cutivek inn sungsang cu a inn a mawi
thei dahlo.

Krihfabu hnatuan tha
Mithianghlim Paul in Khrihfabu hnenah ih cakuatnak ah a tambik
tongfang a hmang mi cu, ?thu elawk rero in zianghman san a tlai lo,
at hna men a si?tiah a ti ringring. Kawhhran kan ti mi hi a neitu cu
Jesuh Krih a si. Kan nih zumtu pawl hi innpi sung ih um mi thilri vek
kan si. Kan Bawipa in a duh caan ah hman awk tha ten hmanawk tha ding
in ralring te’i kan um a tha.
Zokhal a thalo mi hmuahhmuah a hrial ih thiangte in a um a si ah cun
hnatuan sung lawi hrang ah hman a si ding. Ziangahtile pum pe mi a si
ih hna tuan tha tuan ding ah a tiar aw cetcet mi a si ruangah, a
bawipa ih hman tlak a si ( 2 Timo 2 : 21 ).

Innsang siseh, miphun siseh, khawpi siseh, khawte siseh tongfang
menmen an el awk ih an to awk rero ah cun an thang thei dah lo. A
netnak ah cun an  then thek darh men. At thlak za le zianghman thei
cuca lo ih thu elawk cu hrial aw, cubangtuk elawknak cun tawhawknak a
suak ter ti na theihmi a si tiah Timothe hnen ah Paul in ralrinnak a
pek. ( 2 Timo 2 : 23 ).
Kawhhran a thanso ah cun innsungsang le miphun a thangso ve. Kan than
dan hi Pathian dan vekin than kan tum ringring ding. Cuti asile kan
than dan a dik ding. Than kan ti tikah hin Pathian daan ih kan than
lo ah cun than daan dik a si theilo.
Curuangah David Siangpahrang in Bawipa, na duh dan in ka nun hi i
thang ter aw tiah thla a cam theu.

Tulai zumtu dinhmun hrekkhat cu elawknak a tam tuk. Krihfa upa pawl
ruangah, Pastor pa ruangah, cu nu ruangah kha pa ruangah ti ih thu
elawk cu tan thlang uh si. Tong tam lo ten Bawipa hi a rian cu tuan
uh si. Midang kha nang na khawm dah lo, thenhra then khat na pe
dahlo, thla na cam dahlo ti zawng ih pakhat le pakhat elawk rero hnak
in a kawmtu si le a petu si ding ah; zumnak, ding-felnak, duhdawtnak
le daihnak thawn Pathian hna tuan tu tha si ding ah napi in zuam ciau
uh si.

Hnatuan tu tha pawl cun, an ka in ?kei cu Pathian duhdawt tu ka si,
kei cu miphun duhdawt tu ka si?tiah an tong rero lo. Na tong mi hnak
in na kut in a tuan ih tuan tu si hi tum ringring aw! Cumi cu hnatuan
tu tha an si.

                                           Spain Ram
Local hmin: Espana
Khawpi bik : Madrid
Mipum : 39.1million
Area :      505,000sq km
Official tong hman : Spanish ( Castilian )
An paisa hman : Peseta (pta )

History
B.C. 8000 – 3000 hrawng ah Iberians tiih kawhmi miphun, North Africa
ram ihsin Spain ram ah an rak lut thawk. 1000 B.C. hrawng ah celtic
timi miphun pawl an ra thleng ve. 600 – 500 B.C hrawng ah Greek le
Carthaginians pawl an rawn thleng ve.
Roman pawl hi B.C pathum harwng ah an rawng lut ve ih; Christian pawl
khal A.D. 1 ah Spain ram an ra thleng thei fang a si. Spain cu A.D.
711 ah Muslim pawl in an rak uk nan A.D. 722 ah Christian pawl in an
rak neh sal. 1970 lai ah, Spain hi Europe ram hmuahhmuah lak ah
sumdawnnak lawm cakbik an rak si.
1975 kum ih an siangpahrang Franco a thih tikah King Juan Karlo
timipa in uknak a rawn kai. King Juan hi Spain ram mipakhat uknak (
dictatorship ) ihsin democratic ram ih cang ter tu pabik a si.
Spain hin 1986 kum ah Eurpean Union ( EU ) cu an zawm ih; 1997 kum ah
North Atlantic Treaty Orginasation ( NATO ) khal a zawm.
Spain ram ih mipum 39.1 million lak ah hin Madrid khawpi ah million
thum an um; Barcelona ah 1.5 million; Valencia ah 750,000; Seville ah
715,000 an um. Spain ram hi Roman Catholic ram ti sehla a sual lo
ding. Mipum 20% lawng in regular in biakinn ah an khawm.
Spain ram ah hin Spanish ( or ) Castilian tong an hmang tambik ih
khawpi tum deuh le tourist office tivek lawng ah mirang tong hi hman
a si.
Money
Spain paisa nawi ( coin ) cu 1,5, 10, 25, 50, 100, 200 le 500ptas an
sii ih; paisa hnah cu 1000, 2000, 5000 le 10,000 pawl an nei.
Bank hi zarte ni ah1pm tiang lawng an awng ih tlawngkai nikhat in
ninga tiang cu 8am – 2pm tiang an awng.
Hnatuan caan
A tlangpi thu in Spain mipi pawl cun week day ah zinglam 9am ihsin
2pm tiang an tuan ih; zanlam 5pm ihsin 8pm tiang hna an tuan. Dawr le
khual tlawnnak agencies pawl cu tlawngkai niruk ni khal ah an awng aw
ih; Museum hmuahhmuah khal an awn caan le khar caan bangaw rep in an
tuah.
Exchange Rates
Australia……….A$ 1 – 87ptas
Canada ..C$1 – 96pta
euro……….1euro- 167pta
France…1FF – 25pta
Germany…DM1 – 85pta
Portugal…100$00 – 83pta
New Zealand..NZ$1 – 75pta
UK …….1UK – 245pta
USA….US$ 1 – 151pta

Maw LCF

LCF cu lungleeng in a um,

Mi phun tling Pathian biakkhawmnak khawpi cu!

Zan khua var te a tap thluahthlo maw,

mitthli a biang parah luang vivo maw!

A rak t.an tu pawl in an zuar thlai,

A dodal tu ah an cang t.heh!

Mi phundang ram ah a um;

Kan ta ti ding ram hman neilo in!

A fate pawl sumsaw in bum hloh an si!

Hnam dang le phun dang kut ah!

An hlawnthil cu rawl ah an thleng,

An pumpi nun nak ding ah cun!

Daan khal zohman in an zirh nawnlo;

Bawipai hnen ih langnak an ngah nawnlo!

Nauhak le naute pawl lamzin ah an sawn an ril ral hma pu bang in!
A rak thawk keh tu Pathian hmai ah an do aw an t.hek aw;

Sehtan ih lungawi kimter tu ding ah!

Maw LCF, Bawipai hnen ah na kulhnak phar rori au hai seh;

Zan var te tho cingcing aw la Bawipa cu ko cingcing aw!

Bawipai hmai ah na thinlung natnak cu tidai bang inluang ter aw!
Na covo Bawipa lawng a si ;
A hnen lawng ah na ruahsannak hmun camcin hram seh!

         By : Ela

                    MYANMAR THUTHNG

Yangon : Cozah in Mung Tawng te’i  Biakinn khar sak
Burma ralkap cozah cun Yangon khawpi ih a thang cak zetmi Evangelical
Kawhhran an khar sak thu September 7 ah advocacy group pawl cun an
phuang.
US ihsin thlahmi, Christian Freedom International ( CFI ) timi pawl
kan ram sung ih hna tuan rero pawl cun, ?Kyauktada Township, Yangon
ih um Full Gospel Assembly biak inn cu ralkap cozah in an khar sak
thu?report an dawng.
Official, State Peace and Development Council ( SPDC ) cun, Reverend
Mung Tawng, Full Gospel assembly hruaitu bik cu; Kawhhran cangvaihnak
hmuahhmuah tawp thluh ding in thu an pe.
Hmin tarlan lo mipakhat in Leitlun pum ihKristian hmuahhmuah hnen ah
Burma ram ih Kristian pawl hrang thlacam a dil ih, ?kan ram sungah
mah le pathian ciau zalentak ih biak theinak daan cu kan nei a ti.
Yangon ih Full Gospel Kawhhran hi kan ram sung ih kawhhran thang
cakbik le super star ih ding mi rori a si ih; Pathian in thlawsuah a
pek zetmi Kawhhran khal a si.

Kan ram ah biakinn tamtuk ralkap cozah in inkharsak hi riahsiatnak
ngaingai a si. Cozah cun Human right kan dinpi tiah ram dang hnen ih
an aupi rero lai ah an tuahmi cu mi aabik hman ih theih ding rori a
si.

1988 kum ihsin kan ram ah hin daan mumal a um nawn lo. Ralkap cozah
cun a duhduh daan phuah thar in uknak a kai.

Myanmar cun Tuluk hnenah signs…
Myamar cun China hnen ihsin $ 45.8million man thliri lei ding in
signs a thut thu kan dung tlawngkai niruk ni ah Kawl ram state
thuthangca in a phuang.
Hi bungrua hi giant hydro power project hrang ih a leimi a si ih;
cucu Yeywa project ti’n an ko. Hi project hi Myintnge tivapi ah tuah
ding a si ih kan ram sung ih tidai power project tumbik ding khal a
si.

Myanmar Vanzam India ah zam lo ding
Myanmar Air ways International cun September 15,2005 ihsin New Delhi
lam a zam nawn hrihlo ding. Ziangtik tiang kan khar ding ti cu fiang
ten kan rel theilo nan, tawkfang cu kan cawl ding tiah airline public
relations manager Win War Oo cun AFP a sim.
Vanzam an cawlh ter san cu passengers an umlo tuk ruangah a si ih;
hmun dang passengers booking rak tuah zo pawl henlam ah kan zam sawn
ding tiah Win War Oo cun a sim bet. Hi vanzam hi zarh khat ah New
Delhi direct in veithum rori a zam mi a si.
Myanmar mipi thawngtel hnatuan HRIM TER
Myanmar cun a ram mipi thawng tampi cu hna a tuan ter hrim ih; an ram
a lawng an inn a siat bal ih a thawi hai, a phunphun in mipi pawl in
ralkap kut an tuar rero tiah amnesty International cun kan dung
tlawngkai nihnih ni ah report  an report. Myanmar ihsin Thailand le
ram dang iha tlan suak pawl 100 leng London Wathdog pawl in Interview
an tuah nak ah Myanmar ih mipi pawl har zia cu fiang sawn in a lang.
Fiang ten an hmuhmi cu kan ram ah ralkap in mipi thawng tampi ralkap
hna phunkim antuan ter; faang khal ralkap hrang ah an cing ter;
ralkap hrang fangfai tla an pu ter…cakvak lo deuh pawl cu an that
bet, tiah Amnesty International ih cahmai 23 report nakah ngan a si.
Ralkap pawl hi cozah in mahte khawpkham hawlding ( self-sufficient )
hawl ding ti ih a phuan hnu ah hivek mipi lak ih harnak hi a karh
ciamco. Mipi hlawnthil rinsan in ralkap pawl cu an cangvai a si tiah
an reprt bet.

LOCAL THUTHNG

Mahathir : US le Britain hi terrorist an si
Iraq le afgisnitan ih civil pawl that rero tu “US le Britain hi
terrorist an si?,tiah Mahathir, Malaysia Prime Minister hlun cun kan
dung Friday ni ah a si.
British le US thu phuangtu hrekkhat cun Mahathir hi thuhman a sim lo
tiah an diknak dinpi in a tongmi pawl cu an let hngal a si. Mahathir
hi Malaysia ram a hruai lai ah Deputy Primr Minister Anwar Ibrahim
thawng a rak thlak dah ih; cumi thu thawn pehpar in Leitlun dem a
hlawh zet tu pa  asi.

US le British pawl cun Iraq civil pawl thih nak ding ah vanzam ihsin
bomb kahnak sente an hmet men; Iraq in Mass Destruction a nei timi
khal thu phan, curuangah anmah hi terrorists cu an si tiah meetingnak
ah a phuang a si.

Thai Muslim pawl Malaysia ah
Tahiland ih Muslim mahte a dangte ih um duh pawl buainak ruangah kan
dung January thla ihsin milai 800 hrawng in an thih phah zo.
Kan dung zarh ah Thai ih Muslim 131 rori Malaysia ah an ra tlan ih;
Mahathir cun Malaysia ih um ter tlak an si tiah a rak phuang. Asinan
Thailand cun an ram ih buainak tuah theutu Muslim pawl hi Langkawi ah
meeting an neih ringring thu an phuang ve ih: Malaysia hi terror pawl
bawmtu ah an puh ve.

Malaysia ih India Tempul ah an biakmi pathian (  rulpi ) a ralngaw
Kan dung tlawngkai nikhat ni ah Phuchong ih India Temple sungah
rulpi, Cobra tiih kawhmi a ra lut ihAmman tiih an kawhmi pathian lm
hmai ah ni thum sung rori a ra lan aw.
Cumi pathian a biak tu pawl mipi thawng tel in rul cu an va zoh. Hi
King Cobra rul hi meter 5 ih sau a si ih, an pathian zuk hmai ah cun
a lu tung ziarziar in duty a tuan. A zohtu pawl cun rul mit le an mit
a tawn awk le thlawsuah dawng ding in an thei aw ih lucy that beisei
in an pan zut zo.
Sri Mariamman Temple hi an sak nak kum 123 a rei zo ih, himi zuk a
biak tu pawl cun; ?kan pathian in kan zumnak cak ter ding in inra
vehvai a si?an ti.  Hi biaknak ih thuk deuh pawl cun banhla, hnawi le
thing rah phunphun rul hmai ah cun an va ret ciam co.
King Cobra, rulpi ( a par zuk ) cun hi Temple hi nithum sung a caam
hnawh hnu ah daiten a suah san.

Malaysia ah  RM 1 tlang (Coin ) thi ding
Kan dung tlawngkai nikhat ni ah Bang Nagera cun official in RM 1
tlang hmuahhmuah cu December 7 ihsin an thih ter ding thu an phuang.
An phuan ni ih sin Malaysia hmun tin ih cozah banks pawl ah fangkhat
tlang neitu hmuahhmuah in fangkhat hnah ih thleng theih a si thu tla
an phuang cih. Sumdawng hrekkhat cun an buai thu an tar lang ih; 100
thleng ding ih bank an feh tik ah 75 lawng tla an ngah ruangah a si.
Ziangahtile an paisa tlang lakah a lem a rak tam tuk.
Tuitum ih RM 1 tlang an thih ter tum naksan khal hi paisa lem a suah
tamtuk ruang ah a si.

                                               Thuthan
September 18, 2005 khawm  can hmang tu ding pawl

Can kai tu   :          Pa Richard K. Immanuel
Zapi hrang thlacam:         saya Hrang Tiam
Thuthangtha sim:          Rev. S Ni Luai
Thawhhlawm ap :           Mai Cia Sui
Solo  :          Mai SarahMawi & Simon
Awn Mawi tumtu :   Joseph Zung Thang
Hlarem :   Zion veng
Praise & Worship :  Ela & Nu Mang Mang

Kan dungzarh thawn pehpar aw in
Khawm can   Khawmtu Thawhhlawm  Mithar   3
Zarhpi zing          127           151.50
Zarhpi zan            35               36
Zarhte zan            57             96.90
Tlawngkai
ni thum zan         24               27
Rawl ul thlacam  15
Note : Can kan thiah mi pawl in nan hmang theilo ding a si ahcun
Salai Pa Vum 012- 6858 104 ah a rang theibik ih simthei dingah kan lo
dil.
Pangpar hlu
Pa Mang hrin Kulh in a fanu kum 8 a kim nak suahcam lawmnak ah pulpit
pangpar a rak hlu. Bawipai thlawsuah nak a par ah um ko seh.

           LEITLUN THUTHANGHRILKHAWM

Indonesia Vanzam tla : Milai 147 thi
October 5, 2005 tlawngkai ni khat ni ah Indonesi Passengers phur
vanzam a tla ih milai 147 rori an thi. Hi vanzam, Boeing 737 – 200 hi
kum 25 ih upa a si ih; tuitum ah hin passengers 116 le vanzam hnatuan
pawl a phur. Mangbangza a simi cu passengers 16 thilo in an luat ih;
an lakah  naute thlariat mi khal a nu’i cawi cing in a nung ve.
Hi Mandala Airline hi Medan Airport ihsin 500m a sannak ihsin
cangsual a si. 100m hrawng a zam ih nasatak in a hnin ih 500m a thlen
cun  Puak awn kan thei ih  meisa khal vanzam sung ah a rawng khat
hngal tiah a luat mi pakhat in a sim. Vanzam hi mipi tamnak lamzin
laifang ah a tla ih inn khal a siatsuah hnuaihni; a tlaknak hmun ah
milai 47 cu a nen that bet tiah Official cun an phuang.
Vanzam tla ah hin North Sumatra province Governor khal a thi tel ve.
Governor hi President Susilo tawng ding in Jakarta lam pan tum a si.

Iraq president : Saddam Hussein vei 20 thah tlak a ti
Iraq president Jalal Talibani, Iraq president dinglai cun Saddam
Hussein  hi kum 24 Iraq rampi a rak uklai ah milai 100 tampi that
ding ih thu rak pe tu a si ruang ah a mah khal hi vei 20 hnak ih tam
thah tlak a si tiah kan dung tlawngkai nihnih ni ah Iraq TV a sim.
Kan dung zarh ah Saddam hin a Lawyer hnen ah a tualthah mi pawl a mai
ka rori ih a phuan thu a sim tiah President hin a phuang bet.
Ahleice in Saddam hi 1980 kum ih Kurd miphun pawl thawng tampi a rak
thahmi pawl ruangah thitlak a si thu President hin a phuang. 1987 le
1988 karlak ah Saddam hin an ram ih Kurd miphun 180,000 rori a thah
thu tla mipi theih rori ah a phuang bet. 1982 kum ah  Shite miphun
pawl a burpi in Dujail ah Saddam ih thupeknak in thah an si thu khal
tuitum ah President hin a phuang bet.
Saddam Hussein ih thuhla hi October 19, 2005 ihsin fiang sawn ih rel
thawk ding a si.

Michael Jackson : US ih Katarina harnak tuar pawl bawm ding
Michael Jackson cun tuitum ih US mipi, Katarina thlipi le tilian tuar
pawl bawmnak hrang ah hla tampi a phuah ih, Leitlun hlasak thiam pawl
thawn record tuah ta hrat in; cui mangbang pawl bawmnak hrangah a
hman ding thu kan dung tlawngkai nihnih ni ah Leitlun theih ding in a
than.Jackson hi African rethei pawl hrang ah US$ 60million rori rak
hlu tu a si.
?Ka ram mipi pawl hitluk harnak an tuar ka hmu ih; daiten ka to men
thei hrimhrim lo?tiah Leitlun pop star cun a phuang. Leitlun ih music
thiam pawl, hlasak thiam pawl hmuahhmuah khal in dinpi ding in ka
sawm a si tiah a than bet.
Jackson hi kan dung zarh ah kum 47 a kim ve zo ih; tuitum US harnak
tuar pawl hrang ih a phuahmi Albam hmin cu ?From the vottom of my
heart?ti a si ding. Micael hi 1982 kum ah Leitlun pum ih albam
zuarkhawng tambik, ?Thriller?timi rak suah tu khal a si.

New Orleans ah Mithi ruak siar thawk
Kan sund zarh ih thlipi zazet, Hurricane Katrine cun New Oreleans
khua cu a siatsuah neh nasa. A pekte ah cun fehnak ding theilo mi
mangbang an tamtuk ruangah mithi ruak hi siar man khal an silo. Tidai
ih ruak an hmuh khal le sir ah an re hluahhlo men. Tu cu tidai khal a
mal deuh thlang ih mithi ruak siar lam ah an buai celcel. Thu theitu
pawl in an phuan dan cun mithi ruak hi hmun tin ah hmuh ding a
um..asinan, ziangzat ciah an thi ti cu official ih phuan theih asi
hrih lo. Helth  & Human Services Secretary, Michael Leavitt cun mithi
ruank hi a malbik ah 10,000 tal an kim a zum.

New Orleans ih thlipi le tilian in a thah hlei pawl cu America ram
state dangdang ah kuat suah an si ih; Texas lawng hman ah milai
230,000 lenglo an kuat lut zo. US cozah pi cun bawmnak le khawpi tuah
that sal nak tuanvo a tuan rero lai a si.

China ah Typhoon ruang ih thi karh sinsin
Kan dung baite ih Tuluk ram nuai thu Talim thlipi ruangah milai 72
rori an thi zo. Anhui bial ah 52 an thi zo ih, Wenzhou bial ah mi 15
an thi bet.
Tu ahhin milai 20 hrawng cu an thuhla theihlo in an hlo lai ih; cui
tlun ah tilian hinphone line, le mawtaw lamzin, inn le thilri tamtuk
a siat suah a si. Mipi tamzet cun thidai thiang in ding khal an nei
lo.
Anhui bial ah hin milai 100,000 rori in an inn le lo tanta in hmun
dang an pan zo ih; Zhejing bial khal ah ting khat lenglo in inn le lo
an suahsan zo.
Hi Typhon Talim hin zarh hmaisa ah Taiwan a rak nuai zo ih milai
pahnih an thih ih hlei ah thilri tampi a siat zo. Hi lam ih zirmi
pawl cun a rei hlan ah nazi pakhat ah peng 100 ih cak Typhon Nabi
timi cun Japan ram a nuai ding thu khal an phuang cia.

Israel pawl Gaza trip ihsin suak
Israel uktu Saron ih thu peknak vek in Gaza Strip ih Israel pawl
hmuahhmuah cu kan dung zarh ah an suak fel zo. A suak duhlo pawl khal
Israel ralkap pawl cun thazang hmang in an dir suak a si.
Hi mi rualrual hin Palistine ih ?Hamas?hruaitu 7 pawl cu an hmin le
an thlazuk thawn Leitlun hmuh ding ah an tar suak. Palestine pawl hin
Hamas hruaitu pawl hi tui hlan ah an tarsuak dahlo; asancu Israel
pawl in an thah sak theu ruangah a si. Tuitum ih Israel pawl Gaza
Strip ihsin an suah ruangah Palestine pawl cun an nehnak lanter in an
hruaitu pawl hmin an tarlan nak a si.
Hamas pawl hi 1990 kum  ihsin an rak ding thawk ih Israel pawl cu
bomb thawn cawp le cawp ah an thih hnawh theu. Tuitum ih an hotu
tumbik pawl hmin an tarlan mi cu : Mohammed Deif, Ahmad al-Jabari,
Marwan Isa, Raed Saad, Ahmed Ghaldour, Mohammed Abu Shamala le
Mohammed al-Sanwar pawl an si.

Miss England ah Muslim fala tling
Kan dung zarh tlawngkai niruk ni ah England cun an ram ih fala
mawibik hrilnak an tuah ih; Muslim fala, Hammas, 18, Kohistani cun
pakhatnak a ngah riai.
Muslim pawl cun hi fala hi an resia nasa; mai taksa mawinak lanter
tahrat ih mipi hmai ih pho lanawk hi Muslim kawhhran dan a silo tiah
a phun phun in soisel ih an hna tuan cu bansan lohli ding in an dil.
Asinan, hi fala hi bansan lamlam; December tha ih Leitlun fala
mawibik hrilnak ding hman ah tel a tumlai thu, pakhatnak rori lak a
beisei thu a phuang. Muslim hruaitu pawl hin an ngaidan an rel ih ka
demlo; mai ngaidan rel cu Leitlun ah kham awk theih a si lo, cuvek in
kei khal in ka ngaidan ka relve ih, in upat sak ve ka zum.

Ka sungkua pawl in tuitum ih ka laksawng ngah ruangah hin in
lungawipi zet..cucu ka lungawi zawng a si, tiah thil tisual ih a ruah
awk lo thu hi fala te hin a phuang ve a si.
Hi Muslim fala mawi hin kan dung zarh ah a zuampi England fala mawi
40 rori hleih in pakhat nak a ngah riai a si.

Leitlun hlasak thiambik 10 hrilsuaK

Leitlun ih hlasak thiam bik 10 ( top ten ) hrilnak netabik ah santhar
hlasak thiam lak ihsin Briteny Spear lawng a tel ban. Mi hlun pawl
lawnglawng hril suah an si nak hin ?Hip Hop?tivek hnak cun mihlun
pawl ih hla hi Leitlun milai in an rak uarbik ti cu a fiang rori a
si. Cu pawl  cu :
1. Nirvana : Smells Like Teen Spirit
2. The Eagles : Hotel California
3. U2 :  One
4.  Michael Jackson : Thriller
5.  U2 : With or Without You
6.  The Beastles :  Yesterday
7.  Briteny Spears : Toxic
8.  Michael Jackson :  Billie Jean
9. John Lennon : Imagine
10.  Led Zeppelin : Stairway To Heaven

Miss Malaysia hrilnak
Kan dung tlawngkai ni li zan ah KL khawpi ih Hotel picang tak sung ah
Malaysia  rampumpi ih fala mawi ( Miss Malaysia ) hrilnak an nei.
Cunah Emmeline Ng Wei Shu, 22, ( a lai zuk ) cun a zuampi 17 pawl neh
in pakhatnak lukhuh a ngah riai.
Hi fala hin December thla ah Sanya, China ih tuahding Leitlun fala
mawi hrilnak ( Miss world ) ah Malaysia rampi aiawh in a tel ding a
si.

Fimthiamnak hrang mai taksa zuartu nunau tam sinsin
Liberias ram ih nunau 80% rori cun an ram har tuk ruangah;
fimthiamnak zir nakding hrang sum hawl in an taksa an zuar thu
International charity pawl cun thu an than.
Ahleice in School girls pawl lak ah hivek  taksa zuar hi an tam.
Anita tiih theimi fala nu te cun a laklak le mipa pawl thawn kan vak
hlo theu…Liberian dollar 100- 250 karlak ka ngah theu a ti.

                             Kanmah Sung thu

Tulaifang Malaysia LCF thuhla tawi :
Malaysia LCF cu September 4, 2005 ihsin duhnalo cing in hmunhnih ah
kan hrek aw.  LCF  hin Kawlram ihsin Pastor a kawhmi Rev. Za Thelh Lo
cun, Malaysia LCF cu kum hnih, thla 5 le ni 19 sung a kaihruai ih;
Kawhhran upa 12 pawl thawn hna a tuan tlang thei nawnlo ruang ah a
hna ihsin a suah thu Sunday sun khawmnak ah mipi zate theih in a than
a si.
Malaysia Upa le Pastor karlak ah hmuhawk thiamlonak hi a suahnak a
rei nawn zo.

Kan Pastor cun,  LCF sumpai ih in bawm cu KLBC Pastor le Upa pawl
hmai ah; “tu ih upa pawl thawn cun Pathian hna hi ka tuan thei
nawnlo, kemahte a thar in rawngbawlnak thar  ka din duh?ti ih a tong
hnu ah Kawhhran upa pawl cu, kuai le hrekawk hnak cun tiin lungrual
ten Kawhhran mipi hmai ah an hna ihsin an cawl. Cunah Pastor khal in
lungkimpi in mipi khawmnak ah thla a cam sak.

A hmai zarh khawmnak 28 October, 2005  ah mipi in Upa pawl hi kan
hrilmi an si ih an mai thute in an cawl theilo tiah thu an dinpi ih;
LCF khawmnak ah mipi zate votes lak a si. Cunah Upa pawl cawlh ter a
duhtu vote 10 hrawng an um ih lakluh sal a duh tu 75 hrawng an um.
Votes tam sawn, mipi duhnak  vek in Kawhhran upa pawl cu Pastor
thlacamsaknak thotho in lakluh sal an si.
Pacang pakhat ih rak tong zomi a si vek in, kan Sayapa cun LCF Upa
pawl thawn hna a tuan thei nawn cuanglo ruangah a hmai zarh September
4, 2005 khawmnak ah hitivekin LCF Pastor ihsin a cawlhnak thu hi a
than. LCF a suah san rualrual ah a mah a duhtu pawl, Pastor uknak
hnuai ih lungrual ten a feh duh tu pawl cu September 11, 2005 (
Sunday ) ihsin KLBC pawl biakinn ah  a khawmpi ding thu khal mipi
hmai ah a than cih.
LCF cu tu fang ah cun khaltu neilo tuu rual vek kan si ih; hmun hih
ih khawmaw ding thuhla kan theih tikah kan riah a sia in kan tha a
nau zet. Asinan, Pathian in milai hi in rem lo ah cun, Pathian in
milai thinlung hi in thleng lo ahcun; milai lam tumnak cu a lak men a
si ti cu tuitum ah fiangten a rahsuak kan hmu. KL ih a ra khawm
theilo Limi unau hmuahhmuah le Leitlun ram tinkim ih a thlengmi unau
nan zaten Malaysia ih Laimi ( Falam tong hmang ) pawl hmun khat te ah
ti hliarhlo ih lungrual ten Pathian kan biak khawm sal thei nak ding
hrang thlaza in rak camsak ve ciau uh.

KLBC: LCF bawm nawn lo ding
Malaysia LCF biakinn insansak tu Kuala Lumpur Baptis Church cun LCF
sung ih buainak a um hniaihniai ruangah Laimi pawl in bawm nawn
hrihlo ding thu September 9, 2005 ni ah in sim. Kan biakinn   cu
Laimi silo in ?Karen?pawl an khawm ter ding thu tla KLBC Pastor cun
LCF hruaitu pawl hnenah a sim bet. Kawhhran ( denomination ) pakhat
in, Fellowship ( denomination dangdang rawiaw khawm ) an bawm tik ah
hivek thil a cangmi hi thildanglam tuk cu a si cuanglo.

KLBC hin rawngbawlnak tampi an neihmi lak ah; Kawlram mi, phun
dangdang pawl hi Mission branch hnuai ah in bawm a si. Tui ni tiang
ih biakinn in sansak tu le kan tulhaimi pawl in bawm theu tu KLBC
hruaitu upa pawl hnen ah  kan biak Pathian hmin in lungawi thu kan
sim duh ih; Pathian in mi tampi bawm thei vivo dingin thlawsuahnak
pek vivo hram seh ti khal kan thlacamnak a si.

LCF:Pathian biaknak ding inn kan tul
Malaysia LCF cun, tu ih kan khawmnak hmun ah hin kan hmai 18
September, 2005 tiang lawng kan khawm thei thlang ding; curuangah
Pathian hnen ih bawmnak dil ciau ding ah le; Amah Pathian biak
khawmnak ding hmun remcang kan ngah lohli thei nak ding ah thlacamnak
in in rak bawm ciau uh tiah HRUAITU rak siartu unau  nan zaten Krih
hmin in kan lo sawm a si.
LCF timi cu, pawl pakhat doctrine le hmuhdan lawng a thlun thluh
theimi pawlkom a silo ruang ah; a thlunmi Pathian rinsan le Pathian
kutcak zoh cing in   mahte ke ih din ding cu  a liang ih a tlami hna
a si.  Curuangah LCF duhdawttu ngaingai na si ih, miphun duhdawt tu
ngaingai na si ah cun kan Falam mi pawl in fuankhawm tubik kan
Fellowship neihsun te hrangah na ding ve lo ding maw???

                        GENERAL KNOWLEDGES

Terror donak ruangah paisa ngah tambik
Leilung tlun cawkbuai thluh tu terrorist pawl donak ruang ih laksawng
dawng tambik tu cu Iraq mi a si ih; July 2003 ah US cozah cu Saddam
Hussein ih fapa upabik  pahnih Uday le Qusay tei umnak ih hruai tu pa
a si. Hi pa hi US cozah cun terrorist donak ih mi rinum tiah laksawng
$30million rori an pe.

Milai that tambik siibawi na thei maw?
United Kingdom ih doctor Harold Shipman cun a damlo kilkhawimi 215
rori a thih ter ih; a mah khal tualthat case in kaih a si.
Hi mina pawl hi a si dawhnak ruang ih thi an si ti theihsuah a si ve
ten January 2000 ah hi sibawi hi  damsung thawng tla ding in a thuhla
rel a si ih; January 13, 2004 ah a mahte thawng inn ah a khai that
aw. Harold hi milai that tambik siibawi tiah recorded a si.

Lawyer tuan reibik
American pacang Albert R Alexander cun Lawyer ( thuthentu) kum 105 a
kim tiang a tuan. A mah hi Leitlun Lawyer tuan reibik a si.  1926 kum
ah Missouri, USA ah lawyer a tuan thawk ih 9 July, 1965 tiang rori a
tuan.

Tualthat tambiknak ram
UN pawl ih phuandan cun Leitlun ah Colombia tluk ih tual that tamnak
ram a um lo. 1998 – 2000 karlak tiang an ram milai 100,000 lakah 65
cu tual thih in an thi.

Private Meithal ngahbik ram
USA mipi pawl hi Leitlun ih meithal ngahbik an si. 1990 kum ih an
rampi sungthu an vawn zingzoi tik ah 40% cun mai inn ciar ah meithal
an rak nei.
USA hin meithal 200million hnakih tam an nei. An ram ih pitling mipum
zat hnak hman in a tam sawn tinak a si. Hi meithal pawl hi raldonak
ih hmanmi meithal pawl siar tel a si lo.

                            HRUAITU CAH DUH HRANG
.Hruaitu zarhtin thuthang hi KL ih ra khawm theilo unau pawl hrang
zawnruahnak thawn kuat suah ringring a si. Na cah duh le na Address
le contact numbers Editors hnen ( Hruaitu contact, Inside Front
Cover ) ah rawn kuat lohli aw.  Na hnatuannak hmun ah kan Lai tong
rori ih nganmi thuthangca a ra thleng ringring ding

                                            Capoh
300,000 Kyat Kawhhran

Tualte vanglai ih zumtu pawl cu an zumnak a hnget khoh tuk ih buh
pawl le hnahcang pawl tivek men ah an buai lo an ti. Ni khat cu
Tualte khua ih cathiam hmaisabik pa Mizo ram ihsin sumdawng puah tak
in kua a tlung. Mizoram ih an pu le cun members 1 na neih le ting
hnih kan lo pek ding an ti ih; khua a va thlen ve ten zosi ting thum
duh tiah tlang au a fial hngal an ti.
An khaw pawl cu inn khat hnu inn khat, veng khat hnu veng khat lut
tahrat in pawl sawm cun a vak. Tualte sanlai ih 300,000 nafam cu
Mawtaw lei a theih. Mitcaw le hnaset, cawm tu hai tuk pawl pa li nga
in an thlun ih; tui ni tiang tualte suahsan sianglo in kyat 300,000
ngah beisei in an hngak cuahco  an ti….Hi..hi..awih um lo tuk
aw..Hu,hu, hu….

Thlacam thiampa
Laitlang khaw pakhat ah nuhmei nu’i cawpi a hlo a si hmang. Nuhmei
nu’i beidong tuk cun an khua ih tarlam  deuh pakhat hnen ah thlacam a
va pan. ?Ka pu, ka cawpi hlo hrang ah thla in cam sak aw?a va ti.
Putar cun, ?bawipa, nuhmei nu’i cawpi cu a her tuk ih a vak hlo rero,
innsang a buai ter tuk, asinan nang tlangval ah va hawlsak aw he?tiah
thla a rak cam sak.
A thaisun ah Nuhmei nu cun, putar cu a va pan lala ih, lungawi thu in
simsak aw, ?ka cawpi a ra tlung lala?a ti. Putar cun, “bawipa,nuhmei
nu’i cawpi cu cawpi fim, cawpi thuawi a si ti aw, a ra tlung sal ih
kan lung awi?tiah a rak cam sal lala.A nithumnak ah nuhmeinu cun, ka
cawpi a hlo sal thla in camsak lala aw tiah Putar cu a va pan sal.
Putar :  Na cawpi le ka uite khal thei hlang, a duhduhnak ah va vak
hlo ko seh! ?bawipa cawpi cu nava hmuhsal khal le mi saih a hmang, a
dunglam va naih hrimhrim hlah..Amen?ti’n a rak cam sak an ti.
A NEITU
LCF
CHIEF EDITOR
RICHARD K. EMMANUEL
JOINT EDITOR
VL BAWITHANG
SENIOR ADVISORS
ANDREW THANG ( PATE )
REV. S. NI LUAI
PEHZAWMNAK
TO :
42 – 14, WISMA CITY TOWER, JALAN ALOR
50200 KUALA LUMPUR,
MALAYSIA

PHONE :
012 – 6402232 ( ELA )
E-MAIL
hruaitu@…
richardemmanuel4u@…
vl_bawithang@…

(Visited 73 times, 1 visits today)

Comments

comments

Comments

%d bloggers like this: