Hruaitu Issue 88

EDITORIAL
Buainak, Buainak, Buainak
Duhdawtmi ca siartu unau, kan Leilungpi buaink in a khat hi mak na ti
ve maw? Cui buainak pawl cu milai in kan tuah suakmi tla a um, cun
Leilungpi ( Natural)  ih a suahpimi tla a um. Leitlun thuthang kan
siar tam deuh deuh le buainak thu kan hmu tam deuhdeuhhi mangbangza
cu a si ko.
Tuizarh sung TV, Radio le Thuthangca pawl kan zoh tik ah milai a
thawng thawng in an thi. Umnak ding inn le lo hman neilo in an tlan;
an tlannak ah nunau pawl in sualpi le kaihhrem an tawng; mithi zun
ngai in an tap. Leitlun hi a buainak in a khat ko. Ziangruangahso
Pathian sersiam mi milai pawl hin hivek buainak kan tawn ciamco;
ziangruangahso hnangam te le thin dai te ih kan cawlh men theilo…ti
hi na ruat ve dah maw? Ding fel te ih nung ding in in sersiamtu
Pathian ih remruatsak vekin milai hi kan um loh ruangah a si lo maw?
Pathian thlawsuahmi ram, vanram fate kan timi America ram in tui zarh
sung ih buainak an tawnmi lawmmam teh khi zawi suahtermi so a si? Kan
nih Laimi khal hi kan luat cuanglo. Pathian in thlawsuah in pekmi
Refugee zangfahnak ah kan buai. Pathian in kan miphun finkhawmnak
dinig hrang thlawsuah in pekmi LCF khal ah kan buai. Thaten kan ruat
tlang sal pei uh. Sehtan hin kan thanso a phang, kan dinghnget a
phang, kan cak a phang tuk ih a phunphun in in bum rero men a si. Kan
biak Pathian hmai ah tangdor ten pakhat le pakhat rian aw tawn in;
tlamtlinlonak ngaithiam aw ih, thatnak zawnte zohaw tawn ih kan nun a
tul.  Pathian kut kan tuar lonak ding le, Buainak,buainak, buainak ih
a khat mi leitlun ah ?Buai lo?te ih kan tlanlen thei nak ding cun kan
Pathian hmai ah Khuk bil ringring kan tul na ti ve maw?

Kawhhran Ih Tumtahmi ( The Purposes of the Church )
                                                              By
Richard Emmanuel
Kawhhran :
Kan Bible in
Kawhhran tiih a kawhmi cu ?KRIH ZUMTU DIKTAK? pawl an si. Thukham
hlun ihsin himi tawngfang hi hman a rak si zo. Deut 4 : 10 kan zoh
cun, ?Pathian in Moses hnenah Israel mipi pawl a biak thei nak ding
ah kokhawm ding in a fialnak?tongkam kan hmu. Cumi ih a
hmanmi  “Gather the people to me?( King James Verson ) ti tongfang hi
Original Septuagint cun tui san ih Kawhhran kan timi vekin a hmang.
Pung khawm ?Gather?timi tawngfang hi Hebrai cun ?qahal?ti’n a hmang
ih; Greek cun ?ekklesiazo?ti’n leh a si. Thukham thar ah cun ekklesia
( noun ) ti’n kan hmu, Mirang in Church an ti ih kan Lai tong cun
Kawhhran tin kan ko.
Curuangah Krih zumtu umkhawm pawl hi Bible in Kawhhran tiih a rak
kawh ruangah ?Fellowship?kan timi khal hi
?Kawhhran?tiih kan kawhawk tikah a sualnak a umlo tinak a si. Laimi
tampi in kan thinlung sungah ?Kawhhran?timi cu Denominations (
Methodist, Baptist, Presbyterian, Lutheran, Assembly of God etc…)
lawng ah tla kan ruat sual theu hi a pawi zet. Ziangkhallole ziangvek
hmin kan va put khal ah Krih zumtu kan si ah cun ?Kawhhran?kan si
thluh ko.  Cui Kawhhran cun din san le tumtahmi pathum a nei. cu pawl
cu : Pathian biak , zumtu pawl zirh ding le Leitlun milai  hmuahhmuah
hrang ih rawngbawl ding hi a si.
1.  Pathian Biak ( worship )
Kawhhran in a tumtahmi hmaisabik cu Pathian biak ( Worship ) a si.
Paul cun zumtu ( Kawhhran ) pawl hi Pathian bia ih Pathian
thangthatnak hlamawi phunphun sak ringring ding le Lungawithu sim ih
Thlaraulam hla tla sak ringring ding  ah in fial. ( Col 3 : 16, Eph
1 : 12, Eph 5 : 16 – 19 ).
2. Zumtu lak ih rawngbawlnak/Zirhawknak ( Teaching )
Cathianghlim cun Kawhhran cu zumtu, piangthar pek pawl thlahthlam lo
ih Pathian thu zirh ringring le cawm ding in in fial. Zumtu si men hi
Paul cun a tawk a ti lo, cui zumnak ah cun zumtu hmuahhmuah hi kan
pitlin a tul a si a ti. ( Col 1 : 28, Ephesian 4 : 12 – 13 ).
Curuangah Kawhhran in a tumtahmi cu zumtu hmauhmuah famkim le pitling
zet ih Pathian hnen ih hruai ding cu a si.
3.Leitlun Milai hmuahhmuah hrang rawngbawl
Kawhhran ih a tumtahmi pathumnak cu Leitlun milai hmuahhmuah hnen ih
rundamnak thuthangtha phuan le mi hmuahhmuah hrang ih thltha tuah hi
a si.  Jesuh in miphun hmuahhmuah hnen ah thuthangtha phuan a fial (
Mtt 28 : 19). Culawng silo in Thukham thar cun Kawhhran cu zumtu
lawng silo in zumlotu ( Kawhhran leng minung ) pawl khal thilri le
sumsaw ih bawm ding in a forh. ( Dungthluntu 11 : 29 ; II Cor 8 : 4;
I John 3 ; 17 ). Bible cun Kawhhran cu ?kan ral pawl tiang ih duhdawt
ding in in zirh (Luke 6 : 35 – 36 ). Kawhhran in a zohthimbik ding
Bawi Jesuh rori in ?a mah zumlo tu pawl, Kawhhran lenglam milai pawl
a dam ter ih, an hnenah thuthangtha phuang in an rawng a bawl sak?
Cucu Kawhhran in a rawn tuan sunzom dingmi a si ko.
Thu tlangkomnak
Kawhhran/ Felowship sung ah himi purposes pathum hi rualzet ih hmuh
ding a umlo ah cun, cui kawhhran cu a harhdam theilo ih a thangso
thei fawn lo. Himi pathum lak ah hin ziang so thupi bik ti tla kan
ruat men thei.   A pathum hin a pawimawh thluh, pakhat tanta ih
pakhat kan uar ciamco ah cun a tlamtling thei cuang lo.
Khawmnak ( worship ) lawng a uarmi Kawhhran sungah cun; an members
pawl Pathian thu theilo in an um ding ih; an zumhmang le ruahnak men
in an feh ding; ziangtik hman ah zumtu pitling an suak theilo ding.
Bible zirnak ( Teachings ) lawnglawng a uarmi Kawhhran cun Pathian
biaknak le thagthat nak nun an tlaksam ruang ah an  Thlarau nun a ro
deuhdeuh ding ih doctrines lawngte a nal in an nal ding.
Ziangahtile, kan Bible in a simmi Pathian thangthatnak le Pathian
biaknak in a suahpi mi hlimnak ( Joy ) cu an nun in a tep dahlo ruang
ah a si.
Thuthangtha phuan ( Evangelism ) lawng te a uar mi Kawhhran khal
ziangtik hman ah Pathian thu ah an pitling theilo ding. Members
lawngte an tam zet menthei nan Kawhhran ah ?Duhadwtnak ngainagi?hmuh
ding a umlo ding. Thianhlimnak nun khal cui Kawhhran ah cun hmuhding
a umlo ding.
Curuangah Kawhhran/ Fellowship sung ah; hi Biak Khawmnak, Zirhawknak
le Thuthangtha phuannak hi bangaw rep in kan hman a thupi zet a si.
Kan LCF sung khalah hin tu hnak in Bible zirhawknak le Thuthangtha
phuansuahnak lam hi kan uar sinsin a thupi  zet. Cucu kan hna ding
hrimhrim khal a si. Kawhhran cun a tuandingmi a tuan ih a tuah dingmi
a tuah lawnglawng ah Pathian lung a awi ding ih thlawsuah khal kan
dawng ding.

SAWMNAK
Leitlun ram dangdang ih a um mi,  Laimi unau kan zaten kan calai
thansonak ding hrang le kan tong humhimnak ah siseh; kan biak Pathian
Laimiphun lak ih a sunlawinak a lan vivo nak ding hrang siseh
Malaysia ihsin kan suahmi HRUAITU zarhtin thuthang ah Sermons, Fimnak
lam thu, Leitlun theih kauhnak lam, Lai thuanthu le cahram phunphun
rawn nagn ciau ding ah kan lo sawm ih; kan zate hrang ah kau zet ih
awn khal a si. Kan thuthang ca hi zarhtin te suah a si ih, Pathian
lam hruainak in a vei 88th kan thleng cuahco zo. Malaysia Laimi lakah
zartin copies 140 hrawng zuar suah ringring a si.  Kan calai le tong
thansonak ding ah cun milai pahnih khat ih tanlak lawng a tawk lo.
Kan zate ih tan kan lak tlan a tul a si lo maw?

French Ram

French hi Western Europe
ram lak ih ram kaubik pakhat a si.
An khawpibik : Paris
Mipum :             58.3million
Area :                551,000sq km
Official Tong :  French Franc

An ram ih tuah suakmi hmin nei deuh pawl cu : tennis ( 1496 ), hmul
ziahnak ( 1762 ), coffee tuahnak ( pot ) 1800, Mitcaw pawl ih
cangan/siar zirnak ( Braille ) 1824, Nat sawng tu sii ( Aspirin )
1853, battery ( 1912 ), Sakawr tenbehnak savun hri ( 1943 ) pawl an
si.
French ram hi Leitlun ah Wine in tambik ram khal an si.  Kumkhat  ah
Wine 63.5 Litres rori an in.  French hi Leitlun mila ih tlawn
tambiknak ram pakhat khal a si. 1997 lawng hman ah milai  61.5million
tourists tlawng tu an nei.
Thuanthu ( History )
Franch ram ah hin milai hi kum 90,000 – 40,000 lai ihsin rak um thawk
ih theih a si. 25,000 kum hrawng ah khan ( stone Age ) lung hrim san
tiih an kawh san lai ah  Cro – Magnon pawl in lung puk sung ih zuk an
ngan mi pawl tu tiang in hmuh theih in French ram ah a um.
Cun Celtic timi miphun pawl hi 1500 le 500 B.C. karlak hrawng ah
French ram ah hin rak uh ih theih a si. Ticun French ram cu  B.C. 52
hrawng ah Julius  Caesars  ( Rome ) Emperor in a rawn awp.  Hi
Emperor hin 5th century tiang a rak awp. Century 5th ihsin franks (
French a rawng suahnak pa ) le Germanic group in ram cu an rawn la
sal.  Frankish sung ihsin Morovingians le Carolingians pawl in French
ram cu 5th century ihsin  10th century tiang  an rawn awp. 732 kum ah
Charles in French cu a rawn neh lala ih, French cun Spain thlun lo in
Muslim pawl an thlun ding a si tiah dan a tuah. Asinan 9 century ah;
Scandinavian Vikings ( the Norman ) cunFrench thlang lam cu a rawn la.
1415 kum ah English in French cu an la ih  kum hnih hnu ah English
Siangpahrang Henry IV cu French siangpahrang ah a rawng cang. 1530s
Protestant Refomation a rawng lar cuaco ih  French kha cu John Calvin
ih Hteoty in a rawng khuh theh. Curuangah 1562 – 98 tiang kha biaknak
ruangah doawknak ram sung ah a thleng. Huguenots ( French
Protestan ), Catholic Leage, le Catholic Monarch tiah group thum in
an then aw.
French ram cumi dangdang in an uk ih, 1004 kum ah Napoleon  cu
Siangpahrang ah a rawng cang. 1812 kum ah Napoleon cun Russia a do
hngal. 1871 kum ah Leitun ralpi Inak a arwng suak ih French cu
Germany lak ah an sung riai. Cunah ralkap 1.3 rori an thi ih million
khat hrawng cu piangsual ah an cang. 1919 ah ralpi 1 nak cu a tawp.
Parish cun 25 August, 1944 ah luatnak an rawn ngah. 1958 kuma ah
Gaulee cu President a rawng si ih;  1969 kum ah Georges Pompidou in a
rawng sawng. 1974 ah Valery Giscard a rawng ding  ih, 1988 tiang rori
French President a tuan. 1995 kum ah tu ih President ding lai Jacques
Chirac cun vote 52% rori in President a rawng kai. 1997 hrilawknak
khal ah a tling vivo ih tuini tiang a tuan lai.
French hi  UN Security Council ih Member hlun 5 lak ih ram khat a si.
1966 kum ah French hin NATO ralkap ihsin an bang.
Biaknak :
French hi Germany, Luxemborg le Belgium ram kiang ih um a si ih
Europe ih ram kauzet khal a si. Mipum 58.3million lak ah  20% cu
Parist hawng ah an um.
French mipi 80% cun Catholic kan si an ti aw nan, a tamsawn cu
Baptistma cotu an si ih, malte lawng an khawm theu. Hlocaust ti ih
kawhmi Milai hmang ih raithawinak puai an tuah tum ah Judah miphun
75,000 rori thah an si. Tu ah Judah Comunity cu 650,000 hrawng an si.
Tong hman
Leitlun milai 122million rori in French tong hi anhmang. Ahleice in
Haiti, French Guiana le Louisiana hrawng ah hman tam a si. French cun
an tong hi Leilun tong a si leh ding timi an tlaihsan zet. Leitlun
ralpi I nak tiang kha cu French tong hi Letlun tong ( International
Langauge ) a rak si.
Visas
USA, Canada, Europe ram pawl, Australia le New Zealand rammi pawl
hrang ah Visas lo in thlathum sung um theih a si.Tourist Visas hi
thlathum tiang a nung thei.
French paisa cu French franc ( FF ) ti’n an ko. Pia 5,10, 20 an nei
ih Bank Note 20,50,100, 200 l3 500 ca pawl a um. French ram sung ah
cun American Express Card, Master Card pawl hnak in Visas card hi
hman tambik a si.
Sumthleng Rate cu :
Australia A$ 1 – 3.44 FF
Canada  C$ 1 – 3.51 FF
euro           E 1 – 6.60FF
Germany  DM 1 – 3.35FF
New Zealand NZ$ 1 – 2.91FF
Spain             100pta- 3.39FF
UK                 UK$ 1 – 9.23 FF
USA                 US $ 1 – 5. 43FF
        Sourse : Lonely Planet

                                      RALRING AW
Zuamzet in va tuan aw;
Asinan sinak sang va cuh
hlah.
Siang zet in va peaw;
      Asinan nawh thuh va pe hlah.
Ral tha zet in um aw;
Asinan va huat suak hlah.
Paisa hi tam piin hawl aw
   Asinan va duh ham hlah.
Nangmah le nangmah rin sanaw aw;
Asinan mi vanau tat hlah.
Din hmun sang ngah ding zuam aw;Asinan va hngal hlah.
Fim thiam nak na zir thei zat in ziraw ;Asinan va uar aw hlah.
Na tithei tawk mi va bawm aw;Asinan mi’h sal va si hlah.
Tangdor zet in um aw
Asinan mi’n lo hmuhsuam hlah hai seh.

                                                      By : Francis
Lal Uk
                                                              (
Lailun )

                                             Pathian remruat

                By : Ella
Khuahlanlai ah Israel ram
sung ih Hmuan pakhat ah thingkung pathum bangaw rialri ten an cerh
tlang. Cui thingkung pawl cun an pitlin tik ih an hnatuan danding,
visons pawl an rel tlang ciamco.
Thing pakhat cun, a pitling tikah siangpahrang umnak innpi saknak ih
hman ka duh. Inn mawite saknk ah in hman cun milian le mifim pawl tla
tla ka sungah an um ding ih, ?hi thing cu a va mawive in te ding ih,
mi hmuahhmuah in upatnak in pek ding?a ti.

Thing pakhat cun, ?keicu ka pitlin tikah Lawng puan zarnak ban sangpi
si ka duh, cule Leitlun ram kip ah feh in Lawng cawlhnak tinkim ah ka
thleng thei ding?a ti.
Thing pathumnak cun, ?Public Hall si ka duh, hallpi ka si cun ka sung
ah mi tampi an cawl theu ding ih, ka thatnak hmuahhmuah an hmu ding?a
ti.Hi thing pathum hin an pitlin tik ih an tuah ding le tuan ding
saduh an that ih an mai remruahnak cu felfaiten an nei ciau. An rawn
pitling ngainai.
A hmaisabik thing cu an hau ih an tan thluh. Cui thing cun caw rawl
peknak kuang an tuah. A sangtu thing khal cu an hau ve ih  nga
kaihnak lawng tuahnak ah an hmang. Cui lawng cu Galilee tiva ah a feh
rero theu. A netabik thing khal cu an hau ih misual pawl hremnak
ding ?Thinglamtah?tuahnak ah an hmang.

Hi thuanthu hin milai pawl reruatnak le Pathian remruatnak fiang ten
a lang ter. Thing kung pathum hin duhdan le remruahnak an nei ciau
nan; an remruahnak hnak ih tha ah an cang thluh. An remruat vek in
thila rawng cang lo. Asinan, a sunglawibikmi Lei le van sersiamtu
Bawi Jesuh ih suahnak ?Cawkuang? Leitlun a tlanlen lai ih a to
theumi ?Lawng? Leitlun misual pawl hrang raithawinak a tuahnakding ?
Thinglamtah?ah an rawn cang theh.

Cuvekin, milaikhal hi Pathian cun kan ruahnak phen ah in hman a duh
theu. Kan duhnak lenglam ah in hman a duh theu. Remruahnak neih hi a
thupi tuk nan; Pathian remruahnak pom ( Amen ) thiam hi a thupi sawn.
Pathian in zumtu nang le kei ih thatnakding hrang ah remruahnak a
nei. Cui Pathian in rem in ruah sakmi cu fiangten kan hmuh thei nak
ding ah Thlarau mit meng kan tul, napi ih thlacam kan tul a si lo maw?

            KAWLRAM THUTHANG

RM 4million man Lung mankhung Kawlrampi pathum in hloh ter
Kan dung zarh ah Kawlram lung lam ih sumdawng pathum cun kan dung
Sunday ni ah Malaysia ah an lung an hloh ter. Hi thilthleng hi hmun
hnih ah a si.
Lung sumdawng kum 43 le kum 38 cun Jalan Ampang ah breakfast ei ding
in an feh. An lung man khung ( RM 3million ) cu beg sung ah an ret.
An rawl einak cabuai ihsin cabuai dang ah buffet an va ei duak ih an
bag cu an hngilh. An cabuai ih an kirsal tikah a rak hlo man.
Ampang Jaya palik Chief Azri cun CCTV ih an rak zoh nak ah cui an
rawl einak hotel ah mipahnih in beg keng ih an suak tiah Malay Mail a
sim. Lung neitu tei rualpa pakhat an rinhlelh mi cu an kai ih nili
sung thu an sut ding.
Himi ni thotho ah Kawlram lung sumdawng pa in mawtaw sung ih a lung
mankhung ( RM1million ) retmi cu an ruk sak ve. Jalan Genting, Klang
ih Restaurant ah rawl a ei ih a mawtaw ( Proton Waja ) cu Restaurant
kiang ih parking 100metres a hlatnak ah a parked. Rawl ei khawp
mawtaw ih a lut tum cu a lungman khung a bag cawp in  a hmu nawn lo.
Mawtaw alarm awn lo ih tawhhrenmi sung lut thei cu Malaysia palik
pawl khal an mangbang rori. Lungmankhung RM3million hloh tu tei
pahnih hi August 11 – 14 tiang Jalan Ampang, Five Star Hotel ih
Lungmankhung suah ( show ) nak ih tel tum an si.

Ruahsannak!
Ruahsannak neilo , thingkung ro bang;
Thathnemnak um lo sersiam mi hrang.
Ngah hrihlo hman ning, Ruahsannak kei ka dam san
Thingkung hring bang kei ka hrang;
Nunnak thaw thawk ding in pe,
Na thlam dainuam kei ka hrang thlanti hul ter tu;
Na hnge va tinkim  riah buk,
Na mawinak khua le ram hrang;
Maw Ruahsannak Laimi hrang  Deirel Arsi
Hmai in rawn hruai camcin aw!

Myanmar ah Cricket Federation din tum
Kawl ram Actor Nyunt Win,65, le minta ( kawltong ) hrekkhat cun an
hminthannak cu Cinima lam lawng ah silo in Leknak lam khal ah her an
tum. Nyunt Win cun “ram dang khal leknak lam ah an thangso ih kan ram
khal a thangso hrimhrim dingmi a si ve ko, tui kum sung tengteng ah
Myanmar Cricket Federation kan dinsuak ding?tiah kan dung zarh ah AFP
a sim.
Ralkap cozah hin ram sung ah ziang Organization khal zalen tak in a
um ter siang lo. MCF hrang khal hi ralkap pawl lungkimnak  a tula si.
Leknak cu leknak a si ringring ko, kan ram mipi pawl thinlung ah kan
lek dahlomi le kan tuah dahlomi tiang in International level ih kan
feh a tul thlang tiah Nyunt Win cun a tumtahnak ruh zia  a rel bet.
Kan dung June thla ah Asian Cricket Council ( ACC ) cun Myanmar hi
associate member ah a pom zo.

Yangon :
Tui zarh cu Yangon khawsung khal a dai reprep; thuthang danglam pipa
khal a um lo. Sumdawnnak lam khal kel an awh sal thluh. Sui man a
kai  timi lawng tuizarh kan ram ntrest ding umsun a si deuh bik.
Amahlawngte mipi pawl in Radio ngai lam ah tan an la nasa zet.

Asian Film Kutpi ah Myanmar telve ding
Tui kum sung ah Asia ram pathum Sout Korea, Tuluk le India ih tuah
dingmi Film kutpi ah Myanmar khal an tel tum ve thu kan dung
tlawngkai nihnih ni ah Kan ram Local zarhtin thuthang ah an suah.
August 26 ah ?Gwangjun Film Festival?cu South Korea ah neih a si ih, ?
GRHF Film Festival?cu Hainan Province, China ah November thla khin
tuah a si ding; cun “International Film Festival?khal Toha, India ah
neih a si ding.
Hi Film kutpi hrang Kawl Film an hrilsuahmi cu ?Secret Mist?timii
film a si ih US$ 160,000 hmang ih tuahmi a si.
Hi film hi Mirang tong in sadanthu ( kawl tong ) mi khal a si. Hi
Film ah hin Academy nahtu Luu Minn cu actor a tuan ih Siangpahrang
Kyansitta ih thuanthu (  1084 – 1113 tiang kawlram uktu ) ih tuahmi
film a si. Hi Film tuahnak ah hin Malaysia PWC companyu khal in tampi
an bawm.

Source ; Xinhua

SPDC : Gen Than Shwe ih thawmthang parah Meeting tuah
Kan dung August 27 ni ah Burma ralkap cozah, State Peace and
Development Council ( SPDC ) cun Gen Than Shwe ih thuhla ah thuthang
a tamtuk ruang ah thu relkhawmnak an tuah. Cunah, Gen Than Shwe cu
dam cakzet in a um thu an phuang.
Kan dung zarh ih Than Shwe damlo thu; a sinak ihsin hlawn thu pawl
hmuahhmuah kha source hnget neilo a si thu an phuang. Brig – Gen Kyaw
San cun Than Shwe hi nitin te Yangoon ih ralkap zung HQ ah a hna
thaten a tuan ringring ko; ziang natnak ruang hman ah ramdang siibawi
pan ding in a suak lo tiah a than bet.

Myanmar: HIV/AIDS; Malaria le TB natnak tam
Kawlram ih AISD, Malaria le TB natnak hrang ih ramdang bawmnak cu a
tawp fel zo. Global Fund, UN rawngbawlnak Leitlun ramkip ih himi
natnak ruattu pawl bawmtu pawl cun Myanmar ram sung ah an duh vekin
khual an tlawn theilo ruangah ( ralkap in feh sianlonak hmun an nei )
hi bawmnak hi UN cun an phit a si. Dr Min Thwe, AIDS Programme deputy
director cun, bawmnak an phitsak hi kan ram mipi hrang ah a poi zet a
si, kan tumtah dan ( project 0 vek khalin ziang hman a cang thei
nawnlo ding?tiah AFP a sim.

Kan ram ah hin HIV/AIDS natnak thawn khua a sa rero tu milai 330,000
rori an um. Cui tlun ah tuberculosis ( TB ) natnak vei 97,000 anum
bet. Kumtin milai 600,000 in Malaria natnak an ngah ih, kumtin 3,000
hrawng an thi. Malaria natnak hi rethei pawl lak ah a tam bik theu.

Dr Min Thwe cun, ?Global Fund bawmnak tluk hi cu Myanmar hin kan ngah
dah nawnlo ding, asinan kan theitawkte cun hna cu kan peh vivo ko
ding?tiah poi a ti zia a phuang bet.
Laurie Garrett cun, ?Vietnam le India hrawng ih HIV/AIDS cun Burma
lam an hawi theh zo?tiah a ngan. Leitlun pum in ralkap laknak Buma cu
zangfak zet in an zoh cuahco ko.

   LEITLUN THUTHANG HRILKHAWM

US : Leitlun ah ralthuam zuarsuak tambik
United States hi Leitlun ah ralthuam zuarsuak tambik ram a si ih a
lei tambik ram cu Developing contries an si. US hin 2004 kum lawng ah
ralthuam US$ 9.6billion man rori an zuar suak. Leitlun pum ih an
zuarsuah man cu US $ 37billion a si. China, India le Egypt hi
ralthuam lei nasabik ram an si. Russia hin US a sang ih Leitlun
ralthuam zuar suak tambik pahnihnak an si.

Dr. Mahathir le Nupinu pakhat mipi hmai ah pomaw?
Kan  dung August 31,  National Day ah Malaysia Prime Minister hlun Dr
Mahathir cu International Trade and Industry Minister Datuk Seri
Rafidah Aziz cun mipi le upa pawl hmai rori ah a va pan ih mitthli
thawn a va pom. Hi nu hi Mahathir Prime Minister a tuan lai ih a hna
tuanpi khal a si ih; kum tampi ruahnak bangawklo ruang ah rem aw lo
ih rak um an si.
Rafidah hin ziang a sim ti cu mipi hnen ah theih ter  a si lo.
Asinan, mipi cun ngaidam a dil a si an zum. Mahathir cu hlimhmel a pu
ringring ko. Hi tilthleng hi Putrajaya ih Merdeka puai lawmnak ah a
si ih; Malaysia King, Queen le Prime Minister pawl khal an kim
thepthep. Malaysia ih callang bik pa rori in mi nu a vawn pom cu Asia
milai pawl thinlung ah cun ngaithiam a har deuh a si ding Malaysia
thuthang ca tinkim ah an pomaw lai zuk a khat theh.

Mai pasal pomlai rori that tu cu!
American nupinu,  Ann Kissel ( zuk ) hin a psal a thah ruang ah
damsung thawng inn to ding in  Court cun September 1 ah a thuhla an
rel fel. November 2003 ah Kissel, 41, hin a pasal cu Strawberry
Milkshake sung ah tur rawi tahrat in a that a si. A pasal hin then a
tum thu le an fate pathum khal hruaisak thluh a tum thu a sim veten
hi thil hi tawlrel a si thu Kissele hin court cu a sim.  A pasal hi
Tuluk mi a si ih; hi thil thleng hi Hongkong ih an inn ah a si.

America ah siatnak rapthlak thleng
Malaysia cun an ram National Day lawmih an nawm vutvo lai ah America
le China cun THLIPI le TILIAN ruangah siatnak rapthlak ruangah
buainak menmen lo an tawng. Hi tlisia hi ?Hurricane Katrina?ti’n an
ko. Tuizarh tlawngkai nikhat ni ah America cu a caktukmi thlipi-vir
in a tuam ih cui siatnak ruangah Mexico tipi ( Gulf of Mexico ) a
liam ciammam ih; ahleice in New Orleans cu tipi in a khuh theh a si
ko.
New Orleans mipi hmuahhmuah cu an khua suahsan ding in cozah in a
than ih; an kiangkap State  Houston ah an thawn aw rero lai. Hi
thlipi le tilian ruang ih inn le lo suahsan tu hi 60,000 hrawg an si.
Hi pawl hin an thlilri mankhung le inn le lo hmuahhmuah hnak cun an
nun humhim duh ah an khawpi cu mitthli thawn an suahsan a si. New
Orleans ih thilri le inn pawl cu hi tilian hin 80% cu  a khuh theh;
milai khal 100 leng an thi zo. Buainak a fel hrih lo ruang ah milai
ziangzat in an thih phah ti cu an phuang thei ve lo.
US President George W. Bush khal a buai zet ih a mah rori in harnak
tuar pawl hnen ah Helicopetar ih feh in a bawm hai. Cozahpi rori in
bawmnak le rundamnak hna a la ih; Red Cross pawl lawng hman 40,000 an
kim. Mi hrekkhat cun Hirosima an ti ih, hrekkhat cun Hell an ti ih,
ziang khal va si sehla tulaifang ih American pawl buainak bik cu
ziangtin mangbang pawl kan runsuak theiding ti a si ko.
1969 kumah hivek siatnak hi America cun a rak tawng dah ih
Mississippi lawng hman ah milai 100 tlun an rak thi.
Tuitum siatnak hi mihrekkhat cun ?Tsunami?ti khal in an ko. September
11, 2001 ih World Trades cim hnak in a ramthlak sawn.
President Bush cun a pa Bush, President hlun le Clinton khal mi
mangbang pawl hrang bawmnak fund hawl sak ding in bawm a dil ding.
ABG Good Morning Amirica pawl in Interview an tuahnak ah, Bush cun, ?
Kan  mipi pawl an mangbang nak le rilrawng tihal ih  an um hi ka mit
rori in a hmu; bawmnak khal a tu rori ah an ngah theh ko ding?a ti.
New Orleans ih siatnak tuar pawl hi Houston ah cozah cun a thawn rero
lai ih Bus lawng hman 475 rori a service ih cu pawl cun peng 350 a
hlatnak hmun ah mi mangbang pawl cu an thiar lut zutzo. Helicopter le
Lawngpi khal hliam tuar pawl bawm ding in a khat thepthep.
Hi lawngpi hi Siizung ah hman a si. Hi lawngpi sung ah hin Operation
tuahnak room 12, le mina hrang ihkhun 80 a um ih tumkhat ah mina 1000
lai buaipi theinak khawp ih tum a si.
273m ih sau lawng ah hn Siibawi 56, Bawmtu 258 le lawng hnatuan 63 an
um. Cu pawl cun a cang thei tawp in rundamnak hna an tuan ih mina
pawl an zoh a si.

Tsunami tuar pawl in US lainat
Asia ram Tsunami rak tuar dah tu pawl cun US hnen an tuarnak an
theihthiampi thu le an lainat thu an kuat hai.
Kan dung Indian Ocean Tsunami khan Ram 13 sung in milai 232,000 rori
a that. Indonesia Aceh lawng hman ah 170,000 an thi.
Australia, Indonesia le Leitlun ram dangdang pawl cun US siat tawn
nak ah an tuarpinak thu an kuat hai. Bawm an tulnak khalah stan-by in
an um thu Bush hnen a thleng tam ze.

US Ralkap pawl Bawmnak hna tuan
Tuitum america siat tawnnak ahhin ralkap 18,100 rori in runsuahnak
hna an tuan ve. US cun himi thil thleng ruangah Afganistan le Iraq ih
a ralkap pawl cu kawh tlun a tum cuanglo.
                                                                The
Star : 1& 2/9/05

Thlipi in China a nuai : Milai 790,000
September 1, 2005 ni ah Tuluk ram cu Typhoon Talim thlipi in a nuai
ciamco ih milai 790,000 rori in an inn le lo an tlan suah san. Tuitum
ih thlipi hi Tuluk ram ih Natural siannat rapthlakbik khal a si.
Hi Talim thlipi hi nazi pakhat sungah 144km ih cak in a hrang mi
thlipi a si ih tuitum ah hin Fujjian le Zhejiang Province hrawng a
hrut a si.  Fijian ah hin milai 500,000 in an inn l lo an tan ih;
Zhejiang Porvince ihsin milai 291,000, cun 3000 cu nga kai pawl an si.
Hi thlipi ruangah mi pahnih an thi ih milai 24 cun hliam an tuar.

48th Malaysia National Day
August 31, 2005 ni khacu Malaysia um milai ziangvek khal in ziang ni
so a si ti cu kan thei thluh ko. An National Day a si. A vei 48th nak
a si ih; Malaysia ram pumpuluk rori ah Items phunkim ih lawmnak puai
tuah a si.
KL le pheicu…zan 12 : 00 cekci in Bombs an phuah thawk ih nazi hrek
sung rori cawllo in vansang ah rawng phunkip in bomb a puak. Hi thil
puak awn hinLeilung hman a thlir ter thei.
KLCC park ah milai thawng tampi an pungkhawm ih 2005 Merdeka Concert
an tuah. Cunah Mlaysia Prime Minister Department ih Datuk Seri Nazri
Abdul Aziz le Deputy Minister Joseph Entulu Belaun pawl an tel.
Sungei Wang Plaza hrawng ah mipi thawng tampi, Putrajaya lam khalah
thawng tampi, PenangAmbang Merdeca hall khal ah 10,000 hrawng, Teluk
Intan, Labuan le Malaysia hmun tinkim ah 48th National Day hi a
sunglawi thei tawp ih lawmnak tuah a si.

48th silo in 42 sawn a si?
Sabah hruaitu pawl cun tuitum ih  Malaysia National day hi a vei 48
nak si sawnlo in 42 nak lawng a si lai tiah an phuang ve. Asan cu
Penisular Malaysia in August 31, 1957 ah luatnak an ngah; cumihnu
Sabah le Sarawak ( Eastern Malaysia ) hin August 31, 1963 ah an ngah
ve. Sabah hi Malaysia dinsuah a sihlan ah Malay miphun rak um
khawmnak hmaisa sawn a si. September 16, 1963 kum ah Malaya,
Singapore, Sarawak cun Malaysia tiih formed-aw ding in an rak
lungkim. Curuangah tui tum hi a vei 48th nak silo in 42 nak lawng a
si lai tiah Prime Minister’s department  Tan Sri Bernard Dompok cun a
sim.

Genting Merdeca Show
Kan dung tlawngkai ninga ni ah Malay hlasak thiam hminthang Sam Hui
le Sons Scott ( zuk ) cun Merdeca hmuahnak Concert Genting Highland
ah an tuah. Zotu mipi khal an thahnem in an puai khal International
level rori a si tiah a zohtu pawl cun Star ah an ngan.

Australia tlawng Saya Sex ruangah thawng thlak
Australian Physical Education Saya, Travis Glenn Robertson, 27, cun a
tlawng ta nauhak kum kimlo pawl thawn sex a hman theu thu kan dung
zarh ah  theihsuah a si ih; kum thum sung thawng tla ding in a thu
hla rel nghal a si.
Tlawng nauhak kum 15 nu te, kum 17 nu te le kum 16 nu te cu Hotel ah
hruai in a rak ihpi thu theihsuah ih kaiha si.

Singapore President Hrilnak
September 1, kandung tlawngkai nili ni ah Singapore cun  rampi
President hrilnak an nei ih; dinglai President Nathan ( a hnuai zuk )
cu a tling sal lala. Nathan hi a tuan rei deuhdeuh ih Singapore mipi
khal in an duh deuhdeuh. October 1996 kum ah President ih hril a si
ih; July 1999 kum ah an hril sal; Tuitum hi a term thumnak a si.
Kumruk sung rori Singapore rama hruai thlang.

Internet sungah taklawng fala zohtu tam sinsin
Tuluk ram ah Internet sung ih taklawng fala zuk pawl zohtu an tam
sinsin thu zingzoi tu pawl cun kan dung zarh ah report an tuah. Zan
tin Tuluk milai 20,000 cun Internet ih taklawng fala pawl an zoh thu
an phuang ih; ?tuhlan deuh kha cun, thluak kimlo deuh pawl lawng in
an zoh hmang kan ti ih a rak si lo: zikhat hnu nikhat zohtu an tam
deuh deuh a si?tiah research tuahtu pawl cun Shanghai Daily ah an
suah.

Leitlun milai damreibik a thi
Kan dung August 30, 05?ni ah Leitlun milai lak ih damrei bik, ( zuk )
Dutch nunau  Van Andel cu kum 115 mi siin a thi. A zan it cu tho ding
um nawnlo in a itlan ta. 1890 kum ah a suak ih kan dung June 29 ni ah
a kum 115th suahni a lawm a si.

Bruce lee & Jackie Chan Tuluk pasaltha
Tuluk film tuahnak 100 kimnak puai an tuahih; cunah Bruce Lee  ih
Enter The Dragon timi kha hril in sunlawihnak lakawng an pe.  Bruce
Lee hi himi film a tuah lai 1973 ah  a thi. Asinan Leitlun ah a hmin
cu a thi theilo. Jackie Chan  le Stephen Chow khal Tuluk pasal tha ah
hrilsuah an si ve. Tulai fang hi Asia ah ?Venice Fil Festival?timi
zohnuam kutpi an tuah laifang a si ih; September 10 ah theh a si
ding. Cunah Asia Film hmin nei pawl hmuahhmuah an feh khawm ih ?Seven
Swords?ih actress pathum Charlie Yeung ( Hongkong ), Kim So-Yeun (
Korea ) le Zhang Jingchu ( China ) pawl tla an thleng zo. Zo in
laksawng a ngah ding ti cu kan hngak a si pei cu.

Victoria : Ca  cu ka siar ve ko
Beckham ih nupi Victoria cun Leitlun theih rori ah ca a siar dahlo
thu a rak phuang dah. Cui thu ruangah relsiat a hlawh tamtuk ih, ?Ca
cu ka siar ve ko nan, a cem tiang siar ding cun caan ka pe theilo, Fa
pathum pawm hnawk thawn cun ka tinak a si?tiah kan dung zarh ah a
thiam thu Leitlun aha than sal.

Diana hngilhlohnak
Kan dung August 31 ni kha Princess Diana ih thih campha a vei 8 nak a
si nan, London lal sungkua cun hngilhlohnak zianghman special in
antuah lo. Diana ihfapa pahnih Prince William le Princ Harry khal
himi ni ah hin an hna tuan kel te an tuan. A san cu, Diana hi Prince
Charles thawn an thenawk ruangah a si. Asinan, Leitlun milai thinlung
ah cun Diana hi hngilh ti a um thei lo ding. Diana hi 1997 kum ah
Paris khawpi ah mawtaw accident in a thi a si.

Pope : Fa tam sinsin in nei uh!
Pope Benedic XVI cun Catholic pawl hnen ah Society thansonak ding
hrang ?fa tam sinsin in nei uh?tiah kan dung tlawngkai nihnih ni ah a
forh hai.
Naute neih hi laksawng a si ih, phun le hnam hrang ah cahnak khal a
si tiah zarhtin ih a thu ngai theutu mipi 15,000 pawl hnen ah a sim.

India : Kashmir ah remnak duh
Indian Prime Minister Manmohan Singh cun August 31 ni ah Kashmiri
hruaitu pawl cu remnak relpi ding in a sawm. September 5 ah khin
India le Kashmiri cu an biak aw ding a si.

Iraq  ah thihnak rapthlak
Kan dung tlawngkai ni thum ni ah  Iraq khawpi Baghdad ah thahawknak
rapthlak a thleng ih milai 1000 zikte an thi. Iraq ah hin Sunny timi
Muslim le Shite Muslim tiin group hnih in an um. Shite pawl hin
America bawmnak zarah uknak an kaih lai fang a si ih. Tuitum hi Shite
pawl in pathian be dingih an pungkhawm lai  Sunny pawl in thihcilh
bomb thawn an rawn puah hnawh a si.
Tuitum ah hin Shite mipi 700 lai cu an thi hngal ih 390 lai siizung
anthleng. 2003 March thla ih Saddam Hussein America in a do tilo ah;
tuitum hi Iraq ah a burbur ih thih tambiknak khal a si. Mithi rual
pawl cu ?Mass Grave”an ti ih, khur an laihmi ah an phum khawm thluh a
si. Tuitum ah hin pathian biak ding ih pungkhawm pawl hi million khat
lai an kim. Mithi tambik hi nunau le nauhak an si ih Sunny ( Saddam
ih milai pawl ) pawl ih phuba laknak a si ding tiah an zum.

                       BIBLE CODE CU ZIANG SO A SI?
Kan Bible hi Code hlir in a khatmi ca thianghlim a si. Ram thangso
ah cun Bible ih Code um hi an uar zet ih; ni neta ih thil thleng
ding; 2001 ih Washington inn sang cim ding pawl tla  cui Code ah cun
an rak hmusuak cia a si. Code ti cu mirang tong a si ih, a umzia cu ?
thu thup/ tawh?tinak a si. Tahthimnak ah Isaiah 53  bung pumpi ah
hin ?Jesuh?timi tongfang hi hmuh ding a umlo nan. Hiti ih kan siar
menmi phenah ?Jesuh?ti hi fiangten hmuh theih in a um. Code an
siardan cu….. “P H O J P F L E Z M B S P E M U A W X H K E ?
A par tlar ( sentence ) ah hin ?JESUH?timi tongfang khi cafang pathum
kartlak hlir ah fiangzet in a rak phum aw a si. A hnuai ih ?Code?kan
ngan suahmi ah hin cafang               karlak  zel ah  LCF ih kan
Saya pathum hmin phum a si. Na hmuh thei tawk ball-pen in hminsin aw.
A Z K L Z K T A P A E T R Z T Q Z X D H P I W R L B I R

                                          CAPOH

Leitlun laksawng Falam tlangval in ngah!!!

1919 kum ah Leilung tlun ih thil hngilh hmangbik milai hrilnak a um
ih; Haikhawl khua Falam tlangval pakhat in laksawng pakhatnak a  rak
ngah riai an ti.
Cui tlangval vu Falam ih a pu tei inn ah a tlawng ih; nikhat cu
thirleng thawn Falam khawsung ah a leng. Lansung ( kawl tong ) hrawng
a thlen ah fala mawite pakhat thawn an tawngaw ih thunuam  rel tlang.
An kawmawk theh ah Lansung ih a thirleng domi cu a hngilh ih ke rori
in a tlung. Ni thum hrawng a thirleng cu a hngilh roru.
Ni khat cu a pu in, Pate kanthirleng khawi ah na heih? tiah a sut.
Cui tlangval cun, ka theilo, rleng khal ka hmang lo tiah a tong bet
an ti. Zan itlo rori in a ruat rero ih Lansung ih a tanmi kha a
theisuak sal. Vuk tiah a tho ih va zoh khaw, a do vek cekci in a
umnak kelte ah a rak um lai. Cui tlangval cun cumi kum thotho ah nupi
a nei ih mothar zan ah a nupi hngilh in a Pu’i kiang ah a riak an ti.

Note : Kan thuthangca ih kan nganmi pawl hi Editorial hmuhdan le
ruahnak lawng nganmi a si lo; ca nangtu bulpak pakhat ciar ih hmuhdan
nganmi a si.

Email Contact :
hruaitu@…
richardemmanuel4u@…
Phone : 012 – 6402232

Comments

comments

Comments

%d bloggers like this: