Hruaitu Issue 87

HAWL AWLNAK
Editorial….1
A tlansan Zo …..2 – 3
Alliance Chin Refugee Secretary thawn hmaitawn thu suhnak.. 4 – 6
Ka zanmang a si ko lo maw!!!….7
Thuthang Hril khawm…….8 –  16
Thuthan…. 17
Kanmah Sung thu…..18
General Knowledges…19
Cross Words….20
Capoh….Inside back cover

HRUAITU thuthang sung ih  suakmi pawl hi Editorial ngaidan le ruah
dan a si thluhlo. Ca ngantu bulpak pakhat ciar ih hmuhdan nganmi an
si.

EDITORIAL
Krih hmel kan hmu thei maw?
Dungthlun tu Peter cun Krih lawng a zoh lai ah tidai par ah a feh
thei. Asinan tisuar lawng a zoh ah cun tidai ah a pil tum riai. Peter
hin tidai, buainak maktar a tawn lai ah Jesuh a hmu thei..Haleluijah.
Harnak le buainak a hmuh in a khur, a ningtih..asinan, a Bawipa Jesuh
a hmuh ruangah…Jesuh in bawmaw tiah harnak lak ihsin a  au ih;
Jesuh in a hnenah bawm a diltu pawl cu ka manlo a ti san men dah lo.
Peter cu Jesuh in a kut ih kai ta hrat in a bawm.
Mary cu a Bawipa an thah sak ih mithli thawn a tah lai ah…cui
mitthli lak ihsin a Bawipa Jesuh a hmu thei. Dungthluntu pawl ih
lawng tomi cu tisuar le thlipi in a buaiter ciamco ih anmahte
theihtawp suah in an au an kiau, asinan Jesuh an hmu theilo, Jesuh an
lawng ah a to ti an rak hngilh riai. An theihsuah veten Jesuh an
thang ih an buainak a dai. An thinphannak a dai.
Duhdawtmi LCF unau, Jesuh Krih rundamnak lawng sung ih kan to lai ah
thlipi le tisuar kan tawnmi hi kanmah te cahnak ih neh thei le daih
ter theih men mi thil a silo ti kan fiang ka duh. Kan nunnak Jesuh
kan thang hlan ah cun tisuar a dailo ding. Ziangtluk cathiam le
degree 7 phur kawp pa/nu na si khal le Jesuh na hngilhpang sungle na
sinak in buainak felter na tum sung cu a lak ih bang nak men a si.
Jesuh pakhat lawnglawng hi kan LCF sungkua in remaw ter theitu le kan
tawnmi buainak thlipi dai ter theitu a si.
Tuisun tuini ih kan tawnmi harsatnak le buainak karlak ihsin Krih ih
hmel kan hmu thei maw? Kan tawnmi pawl hin Krih ih duhdawtnak hmel
mawi a phen pang maw? Nitin ih kan tawnmi, kan tuahmi, kan hmuhmi
pawl hi Krih hmelmawi lang tertu, Krih hmelmawi in hmuh ter tu si
hram seh.

                        A Tlansan Zo ( Ikhabod )

Rev. S. No Luai
Pathian Thlarauthianghlim kha riahsiat ter hlah uh ( Eph 4 : 30 )
Israel miphun hrangah       tih a nung tukmi cu Pathia ih thukam nak
thingkuang an ral pawl ih an lawn ngah hnu ah cun an hrangah nehnak a
um nawnlo; sal ih tan le farah zawnzai lawng a si thlang.
Puithiam Eli san lai ah Philistine mi pawl in Israel miphun pawl an
do ih Pathian ih thukamnak thingkuang an lawnsak lai ah  Eli fapa
Hofni le Finehas an ral pawlin an that. Finehas ih nupi cun nau a
keng ih fapa hring. Amah cu a nau hring in a thih zik rero laiah fapa
na nei an ti ih a hminah “Ikhabod?tiah a sak. Asullam cu, Israel
miphun hnenah Pathian thu kamnak thingkuang a um nawnlo, A tlansan zo
a si tinak a si.
Moses san hnu ah cun Pathian in Israel mi a umpinak cu thukam pahra
ngannak lungpheng pahnih; Manna retnak bel le Aron ih kianghrawl
retnak dingah thingkuang 45inc ih sau, a kauh lam 27inc, a san lam
27inc cu a si.  Hi thukam kuang hi sui in antuahmi a si. Mi phundang
pawl in thingkuang sung ih retmi hi an zoh tikah an thi theh tihi
Pathian sunlawinak a si. Cui thukam kuang cu Israel miphun lakah a
umlo veten mi salah an tang an zonzai, an rethei, an mang a bang theu.
Pathian thukam thingkuang ih hmanthlak cu Pathian ih in pekmi
Thiangthlarau hi a si. Thiangthlarau hi Bawipa Jesuh ih Pa’i hnenah
in dilsak mi a si. Zumtu hmaisa pawl cu Thiangthlarau in a umpi
ringring hai ih sualnakin a neh hai lo. An farah fawn lo Pathian
sunlawinak an lang ter; an nun a maw, an fim, an thangso. Curuangah
zumlotu pawl in Krihfa tiah an hmin an rak sak. A tu tiang zumtu pawl
hi Krihfa tiah kawh kan si nak hi a si. Kan nundan le kan ziaza hi
Krih ih a fa tia’h kawh teh kan tlak maw? Mahte ciar in zohawk a tha,
curuangah zumtu hnen ah Pathian ininpekmi cu Thiangthlarau hi a si.
Thiangthlarau ih inumpi lo ah cun Setan sal ah kan tang hngal a si
mai. Kan miphun ah sualnak a karh ding remlonak le thenawknak a um
ding, himi hi zumtu hrangah cun tih a nung bik mi khal a si.
Thlarauthianghlim riahsiat ter hlah uh
Pathian Thlarau riahsiatnak cu tinlung sung ih mi huatnak le
ralawknak, taksa hiar sualnak le thinhengnak, pakhat le pakhat
hauawknak, zomtaihnak le huatnak thinlung, mai duhnak lawng ih feh,
zuu rit sabah nak, uahnak, pohawknak, hngalnak pawl an si. Hitivek ih
a nung tu pawl cu Thlarauthianghlim in a suahsan hai. Pathian in kan
miphun in tlansan pang ah cun kan hrangah tihnung rapthlak tak kan
tuar ding. Curuangah kan thinlung le kan ruahnak a zaten siam tharmi
si theh uh si. Pathia ih hmuihmel keng ih tuami, a ding le a
thianghlim in a langmi, nunak dik nunthar keng uhsi, tongka mawi a
neitu si zuam uh si, zumlo tu’i hrangah santlaimi tongfang hmang uh
si.  Thuthangtha phuangtu le thlah tu kan si nak dingah kan kut in
thaten hna tuan uh si. Pakhat le pakhat zangfah thinnemnak nei tawn
uh si.
Thiangthlarau kan tlun ih a lungaawi ah cun, Jesuh ih in kam mi ?nun
duh dim nan neih nak ding ah ka ra?a timi mi thutiam  kan co ngah
ding. Kan thinlung ciarah ka ruahnak le ka tuahmi hi
Thlarauthianghlim a riah ka siat ter pang pei maw? ti hi ralring zet
ih kan nun ah cun Pathian tihtu kan si ding. Zumtu kan hrang ih thupi
tukmi cu, Pathia ih a tlansan mi miphun kan silo nak dingah mai
duhnak men ih fehlo ih Pathian duhnak tuah le tuansuak tu miphun kan
si a tul.
Thiangtharau ih a tlansanmi miphun kan si ah cun Setan nih sual sal
ah in kai bet ding. Kan luat theilo pang ding. Fimthiamnak lennak,
pumkhat sinak thawn Leilungpi miphun hi a hruaitu kan si theinak
dingah  cun Pathian thlarau kan tlun ah a lungawi a tul bik. Pathia
Thlarau kan tlun ih a lungawi nak ding ahcun napin thlacam nak  thawn
tan kan la tlang pei uh.

Alliance of Chin Refugee Secretary thawn hmaitawn thu suhnak
Hruaitu : :Na hmin in sim thei kem?
Hrecem: : Ka hmin Hre Cem ka si.
H: : Kan miphun hrangah na hnatuan kaihmi pawl in sim aw?
HC : Zophei Fellowship ah Chairman ka si ih ACR hnatuan nak ah
Secretary ka tuan  laifang a si.
H : Tulai ACR timi hmin in Malaysia Refugee thuhla theih duh pawl in
nan thuhla kan lo thei fiang lo a tawinak in in sim fiang thei pei
maw?

HC : A si, Malaysia ah raltlan in kan um ih miphun pakhat kan biak mi
pakhat Chinmi pawl in
(1) Kan mah le kan ti theimi, kan covo , right pawl hi tlamtlingten
kan ngah theinak ding hrang,
(2) Pengkhat le pengkhat,  hnamkhat  le hnamkhat thleidan um lo in
rualran ten kan zoh awk theinak ding hrangah le(3)  Tuhlan hnak in
kan miphun Chinmi pawl hrangah tampi in refugee status kan ngah
theinak ding duh in ACR kan dinnak a si.

H :Harsatnak nan tawn mi pawl in sim thei pei maw?
HC : Harsatnak ti ahcun tampi kan tawng ko, midang ih sawisel le mi
tha lo ah tla in ruat tu tampi an um. Asinan kan nih cun kan mai
hrangah kan tuan lo. Sum le pai harsa le mah hrang hman hna tuan man
lo khawp in kan miphun hrangah pum kan pe. Sumpai lakkha beisi in
hnatuan mi khal kan fi fawn lo. Kan mai hnatuan ruangah kan miphun in
thlawsuah kan dawn ahcun kan lungthlitum a kim siko.
H : Nan pawlkawm mi cu ziangmi peng tlang deuh bik ih din mi ha a si?
HC : Chinmi phunkim in kan tling. Kan zaten kan tel kim riai, kan
pawlkawm hmin hrimhrim hi Chinmi zapi kawm khawm ti hawi in tuah mi a
si.
H : Office teh nan nei zo maw?
HC : Nei ee, maimai. Kan mahte paisa suahkhawm in kan sang ih nehhnu
ahcun NGO in bawm tu pawl in in sangsak dingah in kam cia zo. ACR hi
Pathian hnen ah tampi kan hlan ih kan miphun harsa hrangah bawmtu tha
si hi kan zuam. Kan mah in rak bawmtu khal an tam zet.
H : Zopawl NGO ha lo bawmtu bik deuh?
HC : ACTS, NHRR, Community Baptist Malaysia, Baptist Union Australia
pawl in in vehvai ih in tanpi bik.
H : Hi pawl cun ziangmi pawl an lo bawm?
HC : 8 August 2005 ah Putra ah holding pawl in Buk ih um pawl an
thlam le an hnipuan pawl an ur sak ih ruangah NGO pawl le kan hotu
upa pawl in va feh in Chintthawng, rawl, siti le rawlhmeh pawl an va
zem vivo. Cui hnu ah Putra Lima maunis hmun khal ah feh in ei in le
hnipuan kan va pek.
H : Tulai fang ah ziangmi a thupi bik in nan tuah rero?
HC : Aiha! in hmuh vekin kan office sang mi ah thiltul pawl kan tuah
ih , a hleice in UNHCR ih hmuh dingah kan minung pawl zuk le cazin
pawl kan tuahfel rero. A hrek cu Cameron Highland lam ah feh in cazin
le a tul mi pawl an va tuah.
H : UNHCR in an lo recognize ding le dinglo teh ziangtin in sim thei
pei maw?
HC : Sim cu ka sim cia thei lo nan, tuvek ten NGO pawl ih tuahtuan
nak in in rak bawm cio uh.
H : Recognized si uhla mipi hnen ah paisa dil in nan cangvai pei maw?
HC : Tuisun ni tiang ih kan thinlung ahcun mipi hnen ihsin paisa dil
ih register tuah ter tivek le phun  in paisa dil cu kan tum hrih lo
lawlaw. Amah lawngte lunawinak kan miphun hrangah a tul a si ti ih an
pek mi cu tha ka ti ve ko. Kanmah cun kan dil zik lo. bawmtlak in kan
miphun hrangah hna kan tuan thei vivo a si ahcun kan parah an lungkim
zet ih a rei hlan ah recognize ( nemhnget/ cohlang ) si ding khal in
thla kan cam rero.    H : mipi hnen ih cah duh na neihmi theih kan
duh?
Hrecem : Malaysia cu kawlram vek a si lo,Democracy ram a si ih, kan
miphun hrangah thil tul le a tha rori tiih kan theih mi cu kan tuah
ding , kan din ding right kan nei cio. A mah lawngte thinlung
thiangten kan miphun hrang thatnak ngaingai tuah  tu kan si hi a
thupi tuk.  Curuangah kan miphun hrang hna kan    tuannak ah thudik
le thil tha kan tuah ko mi cu midang kan va dokalh a si lo ih, kan
mipi pawl khal in mah hrang lawng ruat lo in kan miphun hrangah tin
in bawm kan tul.  Hmailam caan saupi hrangah Chinmi in thudik le tuan
diknak kan mamawh tu.H :Nan Inn tuah tul ah caan tampi i n pek ih kan
lungawi.
HC : Keikhal ka lung awi ve, nan man can len in rak leng theu uh.
“Hmaizarh ah CRC hnatuan tu pawl hnen ah feh in mipi theih tul mi
suhnak kan nei ding. Hruaitu  siar tu pawl in nan theih duh mi
pumpak,  lole pawlkawm a um a sile in rak sim uh la hmaitawn
thusuhnak neih kan tum ding. Ramdang ih um an sile email khal in rak
suh thei kan tum.? Pa Thuam )
ACR Office
601- Jalan Landak
Pudu plaza
Phone : 03- 2145 7632
H/phone 016  3022 124

                Interview By :
              Thomas Thuam

                Ka zanmang a si ko lo maw !!!

an khat cu K.L Bukit bintang Jalan Alor ih fala le tlangval tam nak
bik kan LCF Biakinn kiang ah duh aw tak in ka rak vak rero lai ah
vancung fala a si ko lo maw,khawitawk fala ha si hmang tin ka rak zoh
rero lai ah cui fala nu te cu kan lai fala te hi a rak si ko lo maw.
A mawi tuk lawmmam ih van try hnik san seh la kei nih cu a kemit hman
ka ngah zik lo ding khi a si.A si nan rualpi vek ih va kom cu ka duh
zet,try ding cu ka thinlung ah tla a um in a um lo,ziang ah ti le a
mawi tuk ih kan ban lo ding ti cu a lang cia hi a si ko.A rei deuh2
ih a hmin tla ka thei thlang,ka ihhmu tla a thaw suahso.
Hm..Hm! ka thawpi  cu ka suah ih a mah contact nak ding in a ph thei
seh la a va tha ding ve ka ti ih ka ph thei ding in ka tum ko lo
maw.Ka rualpa thawn kan va feh ih Puite na dam maw?dam ee a aw kam te
cu a tha ngai ngai.Kan laimi fala maw na rak si na tong hlan ah cu
vancung fala a si pei maw kan lo ti ro ri awl.A lung cu a awi ko ding
ka zum.Hmaizarh a van thleng sal ih a ph dil hnik keng mai laimi fala
te te ziang hman kan mah bawn ding khawp in a harsa lo a si khal le a
phone thei lo hnak in thei cu a tha deuh ko lo ding maw tin hmaizah
cing ten cu a ph cu kan van dil ih Ui….Leihnuai tlangval in vancung
fala rualpi ah kom a thei lo vek khi  a si ko.
Vawinga (5) lai cui zan ah ka dil nan ka hlawh cham ta rai.Cu nah
ciah ah E heu!! a nih cun a ruah dan a dang a si maw ka ti ih ka
ningzak cu sihte khur um seh la cu ka lut ko ding.Ka hmai cu welding
meisa vam hnak in hi a sen sawn hmang ko.Ka ningzak tuk cu ka zanmang
si seh la a va tha ding ve ka ti ih um ngaih nak ka thei lo lai ah
rin lo pin ka rak thangaw vuarvi ih ka zam mang a rak si ngaingai
ko.Kaharh hnu hman ah ka mang a si ngai pei maw ti in ka hmai ka va
phiah ih ka mangcu a rak si ko.

Lungawi nak tumpi thawn,

                       LAI PHA DIT
__________________________________________________

                    THUTHANG HRILKHAWM

KL ah tilian

Tui zarh ruasur cun KL khawsung rori khal a buai ter  ( zuk ).
Tlawngkai ni  nga ni ih ruah sur ruangah nazi hrek ruahti lawngin
Pantai Dalam main road cu a buai ter ih mawtaw 6 hrawng cu an talbuai
zet a si.

Pakistan: mi panga khai that ding
Kan dung tlawngkai ninga ni ah Pakistan cozahpi cun 2003 ih an
President Musaraf thah rak tum tu panga an kaihmi cu khai that ding
in an thu hla an rel fel tiah Army thu phuangtu in a sum.
Hi panga laka hin pakhat cu Pakistan ralkap a si.  Dec 25, 2003 ni ah
Musaraf ih khawlak leng lai cu a mawtaw ah bomb puah tum ih a
cangvaih lai ah kaih a si. Asinan himi tum ah hin President kiltu
palik 16 rori in an thih phah.
Hi President thah duhtu pawl hi Muslim hel pawl, Binladen ih milai
pawl an si. President Musaraf cun US thawn naiaw te ih terrorist do
ding ih tim a tuahnak par ih lungkimlo pawl an si.

Than Shwe Singapore Siizung ah um ?
Tui zarh cu Than Shwe ih thuhla lawnglawng Myanmar mipi le Asia
hruaitu pawl hna ah a khat. Thu hman khal theih a har zet. Asinan
August 27 suak Malaysia The Star thuthang ca iha ngan dan cun, Than
Shwe hi Singapore ah sii zoh kawl aw dingin a zam ti a si.
Than Shwe, 73 cu kan dung tlangkai nihnih ni ah Singapore ih sii piah
dingin a zam tin thuthangca cun a ngan nan a natnak lawngte fiangten
ngan lang a si lo.

Hur ruangah Lei neinawnlo ding Thai pa
Thai fala kum 16 nute cu  kan dung tlawngkai nithum ni ah a hnatuan
tlung lam tlangval pakhat, 17, hin a rak sualpi tum. An buanawknak ah
nunau nu cun tlangval pai lei cu a keu tan sak thu Thai Police cun
August 26 ah an phuang.
Hi pai lei hi 3cm rori ih sau a keu tan ih; siizung a thleng rori.

Thailand ah Muslim pathum kapthat
Muslim pathum Thai ram ah kah that an si thu Thai Palik cun tlawngkai
nili ni ah an phuang. Hi an kahawknak hmun,  Narathiwat province hi
Muslim le Buddist buai biknak hmun a si ih, milai tamtuk an that aw
zo.

Chinese Music Zuamnak puai Malaysia ah
Kan hmai September 3 ah khin, Putra Stadium, KL khawpi ah Leitlun
Tuluk hlasak thiam zuamawknak puai an tuah  ding. Cunah, Hong Kong,
Thaiwn, Singapore, Malaysia le Tuluk hlasak thiam hminthang pawl an
kim ding. A zohman RM 290, RM 200, RM 150, RM 90, RM 50 a si ding.
Thei fiang du tu hrangah 03 – 77262002 ah suhhlam theih a si.

Gen Than Shwe an hlawn maw?
Dt.25.8.05  ih Thailand ramin Press conference
an tuah nakah an prime minister  Thaksin Shinawatra cun Kawlram
Ralkap hotu Than Shwe cu a hna ihsi cawlh ter a si timi thu hi thudik
lo a si, ti ah a sim. Kandung zarh sungih hiti vek thuthang ruangah
Kawlram paisa Kyat man a tlak phah.
A sim vivo nakah Thaksin cun, hi thu hi kan thu lak nak hmuntin ihsi
kan zingzoi tikah “thuphan?a rak si, tiah a sim bet. BBC Myanmar
service (London ihsin an suah mi radio) in kandung tlawngkai nihnih
ni ih interview an tuah nakah Sr.Gen Than Shwe cu a hna ihsi loh
theih lo ih cawlh ter asi, tiih an phuan ihsi hi thu ra suak a si.
Yangon ih a um mi ramdang palai pawlin an sim dan ah, Yangon khawpi
cu a dai zet, zianghman buainak hleice khal a um lo, an ttuan dan kel
ten hna ttuan nak lam khal a feh tluang ko, ti ah nitlak nak lam
palai pakhat in a sim.
Asinan, Kawlram fam cu hiti vek thuhla pakhat khat a suah tikah
Kawlram paisa le US dollars thleng man cu a rak ttum man lohli fam
teh. Dt.25.8.05 ni ahkhan US$ 1 ah Kyat 1,170 ihsin 1,165 ah a
tlaniam man a si cu!
Culawng hman asi hrih lo hiti vek thuthang ruangah sumpai a nei deuh
tu tthenkhat pawl cun, Kawlram ah pakhat khat a suak pang ding ti
phangin  Sui lei lamah an rak tliau ciamco, ti ah Yangon ih sumdawng
pakhat in a sim.Kawlram politic dinhmun a thlir ring ring tu
tthenkhat pawl cun, hiti vek titi thu leeng hi a tu ah dai deuh vivo
thlang hman seh, hi thu pakhat hnu pakhat hnenih a darh vivo mi hin
Kum 40 sung ralkap uknak hnuai ih a rak umtu Kawlram mipi pawl cu uk
awk nak thleng ding hrangah a ti hamhaih ter ti  a lang fiang, ti ah
a ti.
Kandung bai te ih Kawlram uktu upa pawl ttuanvo thleng awk nak um
hnuaihni mi ruang khalah Kawlram ralkap cozah pawl hin tanlak natsat
cu an tum lai tho tho ti a lang ter.
                    The Star.26.8.05

Daewoo : Gas test hlawhtling
Kan dung Sunday ni ah kan ram ih Daewoo company cun Shwe area ah gas
a suah ngaingai le suah ngainai lo an testmi cu an hlawhtling thu an
phuang.
Hi an gas hmuhsuah tharmi hi 10trillion cubic feet ihsah a si. Gas
thatukmi a si ruangah paisa tampi khal lakluh an zumawk thu Daewoo
company cun an phuang. Hi Gas hi 2010 ihsin  pump suah a si ding ih;
kumtin $ 100million rori Daewoo hin an lalut ding a si.
Daewoo pawl hin Kawl ram hmun hranhran ah lei an verh nasa ih Shwe
Phyu, Shwe le Ngawe ram hrawng khal ah gas khur tampi a suah thei an
zum lai.
      Myanmar times 22-08-2005   20 : 20

Diaspora Music Band in Dt.31.8.05 ni ih Chin Restaurant ah concert
kan tuah ding an ti mi kha, Chin Restaurant si sawn lovin, Imbi
Bualrawn kiangih Imbi Hall sawn ah asi ding.  Lai fala tlangval 30
rualin, Lai hla, Kawl hla le Mirang hla pawl thawn an lo awih ding
hlei ah Asean ram huapih Lamthiam laksawng ngah tu khalin a thil
thiam a lo zoh ter ding. Na leen lai na caan ve pang kei….!
          Salai Bawi Hre

Paris Innkang ah…
Kan dung August 26, tlawngkai ni nga zanlai fang ah Paris khawpi ih
apparment a kang ih nauhak  14 le pitling 3 rori an kang that tiah
The Star thuthang cun a phuang.  Hi inn kang hi a dawt netabik (
Ground Floor ) ihsin a suak thawk ih ziang tin a suak ti lawngte
fiang ten theih a si hrih lo. Meisa hin nazi 3 sung rori a hliau hai
a si.
Tuitum hi thlali sungah Paris ih meisa a veihnih suahnak a si ih a
hmaisa cu April thla ah a si. Cui budget hotel kang cun milai 24 rori
a kang that.
Tuitum ih apartment kang ah hin milai 23 khal in hliam nazet an tuar
ih; meisa hi a ziambik ihsin a thawk nan a sangbik dawt 7 nak tiang a
kang man a si. A hmutu pawl cun, ?mipi hrekkhat cun thih khal phanglo
in inn dawt 5,6, nak ihsin khal an zuang hluah hlo a ti.

Europe Tilian ah mithi karh vivo
Europe lamah ruahpi a sur tamtuk ih ram hrekkhat cun an tuar rero.
August 26 ah tilian cun  Switzerland capital a hrut ciammam. Europe
ram sungah mithi zat 43 rori an kim zo.
Romania ah 31 an thi ih Austria, Bulgaria, Germany le Switzerland
pawl cun 12 thi in an report. Hi tilian hin inn khal 60 hrawng a siat
suah zo.

Peru Vanzam tla ah milai 41 thi
Peru Flight 204, Boeing 737 – 200 cu kandung August 23 ni ah  a
tumnak Pucallpa thlenhlan 32km hrawngah a tla ih milai 41 an thi. Hi
vanzam ah hin milai 100 an to ih,  Peru ihsin Pucallpa khawpi lam
panih zammi a si. Tui tum hi tuithla sungah vanzam cangsual vei
nganak rori a si thlang.
Passengers hrekkhat pawl cu vanzam meisa kang rero lakah tlansuahnak
hawl ih an au an kiau. Leilung ihsin 10,000ft ih sangah a zamlaifang
ih accident tawng a si ih; accident ih mi thi pawl  lak ah hin
Foreign mi pathum  American nunau, Italian nunau le Cambodea nunau an
tel. Mi dang pawl hi an zaten ziangmi an si ti cu theih thluh a si
hrihlo. Milai 56 cu siizung ah check nghal thluh  an si.
Tuitum accident hi thlisia ruang ih cang a si an zum. Khawpi awn
ihsin thli sia hlawmpi a rawng suak ih cumi in an vanzam cu a pah
rero an zum thu passengers pawl cun an sim. An vanzam cu a tlak hlan
ah a khir in a khir dukdo ti a si.

Asia Summit ah US sawm
Kan hmai December thla ah khin Kuala Lumpur khawpi ah Asia meeting
neih sal a si ding ih; cunah US khal in telpi an beisei thu Asian
Secretary General Ong Ken Yong cun kan dung tlawngkai nithum ni ah a
phuang. 1990 kum ihsin South East Aisia ram hra hi US cun China
kaihruainak tang ih cangvai ding group deuh si in a hmu ih; tuitum ah
hin Ong cun a silo thu phunag in Leitlun level ih sumdawnnak,
terrorist donak le thansonak hrang hnatuan tlang thei nak beisei in
hi Asian pawlkom hi ding a si a ti.

Iran in Neuclear Bomb an nei  ngaingai maw?
US cun Iran hi Neuclear bomb nei ih a puhmi cu a hmanlomi a si tiah
International Atomic Energy Agency ( IAEA ) cun kan dung zarh ah an
phuang. Iran hin Neuclear bungrua mallai cu Pakistan ihsin an lei ih
cu khal cu Bomb tuahnak hrang silo in an rampi sung ih Electrict
thasawn an neihnak ding hrang ah a si thu Iran Neuclear lam ih tuanvo
neitu cun a phuang. Washington in Iran cu Neuclear Bobm nei ih a puh
veten IAEA pawl hin ramsung ah naisawn in an zingawi ih ziang pipa
khal an hmu lo.

Australia : Muslim hruaitu pawl dawi ding
Australia ram cun an ram sung ih Muslim pawl mah te Muslim dan tuah
ta hrat ih um tum pawl cu a rei hlan ah dawi theh an si ding thu
tlawngkai nihnih ni ah an suah.
Australia ram ih Muslim hruaitu hrekkhat pawl cun Prime Minister
hnenah an mahte dan tuahaw ih um an duh thu an sim ih; a phi cu
Australia ram suahsan ding ti a si. Prime Minister Howard cun, ?kan
ram sungah Parliament pawl ih dan tuahmi lawng kan thlun thei; cumi a
thlun theilo tu cu kan ram ihsin suak ko seh?a ti rori. Leitlun ih
thisen suah tambik tu Terrorist pawl hi Muslim lakihsin an si ruangah
Christian ram pawl cun Muslim pawl parah a cang thei tawp in
ralrinnak an tuah theu. Hi thu hi kan dung tlawngkai ni hnih ni ah
Islam hruaitu 14 in Prime Minister Howard an tawn nak ih thusuak a si.

Malaysia palik Indonesia nunau ihpitu an kai zo
Kan dung August 10, zinglam 1 : 00 ah Malaysia police Rais Abdul
Rahman,32 cun Indonesia nunau,22 cu a sualpi. A sualpi hnu zianglam
8 : 00 ah Retiree Zulkifli Shariff cun a rak sualpi bet ve. Hi  tei
pahnih hi August 24 ah Ampang court ah a thuhla relsak a si.
Palik hin Indonesia nu te cu a permit a zohsak ih a nung nawnlo tiah
Taman Kosas ih Apartment pakhat ah a hruai ih cunah a sualpi a si. Hi
nute hin a thin a nuamlo ruangah cate a ngan ih Apartment ih um a
hmhmi pawl hnenah a pekta. Cupawl bawmnak thawn hi palik hi kaih suah
a si.

Europe ah Bird Flu karh sinsin
Europe Khawmual ihmithiam pawl cun tuitum Russia ih vate hri ( bird
flu ) natnak thleng ruangah Europe ram pumpi hrang tih a nung thei
thu Auguse 16 ah ralrinnak thu an than.  Russia ram ah milai 25 rori
in hi natnak hrik hi an vei ve.
Hi vate hri hi Asia ihsin a suak ih Leitlun ram kip ah a karh vivo.
Vietnam  ah milai  milai 115 in an vei ih 42 an thi zo, Thailand ah
milai  17 in an vei ih  12 an thi zo, Indonesia ah 4 in an vei ih 3
an thi zo, Cambodea ah milai 4 in an vei ih an pali in an thi zo ti a
si.
             The Star 27-8-2005

Tiger Bra
August 26 ni ah Japan Tiger Bra ( bawli ) company cun, an company din
kum 70th nak cu sunglawi zet ih an lawm. Hi bra hi tulai Japan
santhar fala pawl cun an uar zet.  Leitlun ram dangdang khal ah a rei
hlan ah kuat suah a si ding tiah Tiger company cun an phunag bet.

Vanzam tla
Kan dung August 16 nia h Athen khawpi thlang lam ah Cypriot vanzam a
tla ih milai 121 an thi tiah thuneitu pawl in an than. Hi vanzam
mawngtu hi German mi a si ih Hans Jurgen Merten timi pa a si ih; a
vanzam hi petrol cem ruang ih tla si in an thei. Tuitum hi tui thla
sung ih vanzam tla a vei ruknak rori a si.

Africa : TB natnak do
Africa ram ahhin TB natnak hin kumtin Million khat  hrawng a that
ringring. Cumi donak ah Africa ram pumpi ih siibawi thiamthiam pawl
an tawngaw khawm ih theih tawp ih tangrual ding in project tampi an
tuah. An meeting cu kan dung tlawngkai ni li nilawng ah an theh. Hi
an meeting nakah hin WHO pawl khalin an telpi ih theih tawp ih bawm
khal an tum.

Uico thih ruangah S$ 3,000 kuan
Sigapore ramih pa pakhat kum 30 mi cun, a uico parah a thinhengtuk ih
electrict in a that. Sigapore thuneitu pawl cun court ahan thlen ih;
hipa hi Singapore dollar S$ 3,000 rori an kuan ter. A uite hi kum
thum lawng a si lai.

Singapore ah AIDS do nasa
WHO ih an phuan dan cun Sigapore ram ah hin HIV/ AIDS vei milai
4,000 – 5,000 hrawng an um ti a si.  Hi natnak veitu pawl lak ah 60%
cu kum 30 – 49 karlak; an cak that laifang caan hmanglai pawl an
si.Cozah cun theihtawp in hi natnak hi a do ih; company hrekkhat cun
Red Light District ( hlawhhlang district ) an tih ah feh tahrat in
condom tla an lak in an zem, an thi tla an check sak. Singapore ah
AIDS do an thawk sal ciamco.
               The Strait Times

                              Thuthan
September 3, 2005 khawm  can hmang tu ding pawl
Bible Sunday
Can kai tu………Pa Lal Sawi Cuang
Zapi hrang thlacam…Rev. Za Thelh Lo
Thuthangtha sim……..Saya Hrang Tiam
Thawhhlawm ap…….Nu Tha Hlei Zing
Solo ……………Salai Ro Vel Thang
Awn Mawi tumtu ……Salai Biak Hre
Hlarem ……………………….Bethlehem
Praise & Worship  ………….Ella & Pathuam
Can kan thiah mi pawl in nan hmang theilo ding a si ahcun  Salai Pa
Vum 012- 6858 104 ah a rang theibik ih simthei dingah kan lo dil.

Pangpar hlu
Mai DimBoih in UN card a ngah mi lungawi thusimnak ah tin tuizing ih
pulpit pangpar a rak hlu. Pathian in a nun nak lamtlun hruai in
thlawsuah pe sinsin hramseh.

Bible Sunday Kha
Kan dung zarpi August 21, Bible Sunday cu Malaysia LCF hrang ah cun
Special ngaingai a si ko. Tong phun kim in Bible siarsuahnak kan neih
ih hlei ah, zohlo Bible cang siar zuamnak khal kan tuah thei. Kan LCF
members pariat ( a par zuk ) rori in Bible zohlo siar an zuamaw.
David Mawia in pakhatnak a ngah ih, Nu Zing Zing in pahnih nak, Mai
Sarah Mawi in pathumnak….midang pawl hmuahhmuah in palinak ciau an
ngah.

Thlacam kan tul
Malaysia LCF hi lenglam mi zohman ih in hnaihnawk lo ih kanmahte
lungrual ten ti hlerhhlo ihPathian kan biak khawm thei nak ding hrang
napin Pathian hnenah bawm dil in au uh si. KL iha ra suak theilo mi
pawl le Leitlun ram dang ih Laimi zumtu  pawl kan zaten theihtawp in
thla kan cam tlang pei uh.

HOME CRUSADE
Pathian lam hruainak in August 22, 2005 ihsin Pudu ah Crusade kan
thawk ih zarhkhat sung zantin Pathian thu zirnak kan nei. Rev. S. Ni
Luai in in zirh ih Pathian Thlarauthianghlim bawmnak in zirtu pawl
khal in an thathnem pizia le Thlaraulam pitlinnak an hmuh zia sim
nuam an ti zet. Zantin LCF members 30 lenglo in Pathian thu kan zir
tlang ih a sunglawi in kan thlarau rawl in fahtu Sayapa par khalah
kan lungawi zet. Pathian in rem a ti cun hmaizarh lamkhal pehzom vivo
ding a si ih; ra suak thei ciau dingah kan lo duhsak zet. Napin
thlacamnak in rak bawm ciau uh tiah  ca siartu unau nan zaten Krih
hminin kan lo sawm.

                 GENERAL KNOWLEDGES

Bible ah Bung ziangzat a um ih Caang ziangzat a um ?
Kan Bible ah hin Bung ( a tumpi ) 1189 a um ih Caang ( a fate )
31,175 a um.
Nazi pakhat sungah bung hra a siar thei.Ni khat ah bung 10 zel ih kan
siar cun kan Bible hi kum khat ah vei li kan siar suak ding tinak a
si.  Ahleice in Thufim hi bung 31 a um ih…..ni khat bung khat siar
ding an duh ruangah Bible bungcang thentu pawl in an tuah hrimmi a
si.

Kan Bible ah Paisa hmandan thu vei ziangzat a um ?
Bible thiam pawl in an phuan dan ah; kan Bible sungah sumpai hmandan
thu in zirnak 2,600 a um ti a si. Cun dingnak/ felnak (
Rightiousness ) timi hi vei 500 in zirh.

Bible Ngantu lakah cawkhal tu nan thei maw?
Amos hi kan Bible ngantu lakah caw khalih pumcaw mi umsun a si.

Bible Ngantu lakah B.A Degree ngah an um maw?
Daniel kha Babylon ram ih sal a tannak ah kumthum a va zirmi kha B.A.
( level ) a si. Cun Paul hi daan ( law ) in P.hd. a ngah tu pa a si.

Hossana ti hi a san kan thei maw?
Hossana ti cu, ?Bawipa in run aw, thla ka cam? ?Lord save us we pray?
tinak a si.

Leitlun biaknak ih pathian ngahbik…cu Hindu biaknak a si. Thlawsuah
petu, kilveng tu, siatsuahtu, humhimtu, fimnak petu etc…ti in
pathian dangdang thawng tampi an nei.

                            SAWMNAK
Kan thuthangca hi hnam dang le peng dang lak ih a mawi sinsin thei
nak ding, Leilung tlun Level ih a mawi sinsin thei nak ding cun
Editorial board lawng ih tuanvo a si lo. Lai nu/pa kan zate tuanvo a
si ti hi a thar ih thei in kan thuthangca ah thu le hla kan ngan ciau
pei uh.

                             CAPOH
Ralttha
Hlanlai ram pakhat ah, an ram Siangpahrang pa cun ka ramsungih mipa
pawl hmuah hmuah lakah  zo si a raltha bik ka hril dingih,  cu pa cu
Suitum cuai 12, ka uk mi ram hrekkhat le ka fanu  ka pek ding ti ah
thu a than.
Cuticun a ram sungih pasaltha ka si a ti aw tu hmuah hmuah cu ralthat
zuam aw dingah Siangpahrang pai tualrawn ahcun an ra suak khawm
thluh. Siangpahrang pa cun,  “khai le…. ka ral tha a si  ati tu nan
um asile hi tiva hi raltha zetin nan kaan suak ding?ti ah Tisartam
(crocodile) rilrawng pawl retkhawm nak tiva cu kaan a fial hai.
Pakhat hnu pakhat an zoh aw ih, thih hnak cun ka ralthat lo tak khal
le poi hlah, ti ah  zo hmanin kaan an tum lo. Asinan, tawkfang a rei
hnu ah, mi pakhat  cu “pa phummm…..?ti leh cui  tiva ah a dawp ta
mai. Zamrang  zet cun khatlam ral a hei tan ih a kaan suak lohli mai.
A zohtu mipi pawl hmuah hmuah cun cupa cu “e heu….a va raltha ve?ti
ah an fak an lawm zawk rero. Siangpahrang pa khalin a thutiam vek
cekci in laksawng cu a pek. “Ka ram sungah nangvek paraltha ka lo nei
hi cu ka hna a ngam tuk. Ka ram mipi pawl hnenah thu cah duh mi le
rel duh mi tla na neih a sile hun sim  ta aw ?ti ah a ti Cutikah anih
cun, “Ralthabik laksawng in pek ruangah ka lungawi zet. Asinan, mitu
tiva kap ka din lai ah ka dunglam ihsin zo ha rinlo paral ih i nam
thla tu kha timi te cu fiang tei thei ka duh hrim hrim?.
          Compose By: Pianga

Pastor thu sim cu
Pastor pakhat cun a sermon ding Bible thu a siar.
Tuah cun (Bible tih hi) Bi-bel kan siar ding?a ti.
Upa pakhat cun : Pastor pa; Bi-bel a si lo. Bai-bul a si sawn a hung
ti.
Pastor cun: ka duh len rampai khal ka ti kei, Vawkte khal ka ti kei
cu. Ka thu thu. Pawn tam hlah.
HU hUI Hui…
By.VL

Zianglo ah….
Pa thang le Za Hnawk Phone in an
biakaw:
                                                              Za
Hnawk: “Tui sim lam cu zianglo kha kan zianglo leh kei
cu.
                          Pa Thang:  “Zianglo ah khan maw?
Za Hnawk: “Zianglo ah khan si  sawn  seh?
Pa Thang: “Si ee! Zianglo ah cing cing khan zianglo cu a nuam
ko?
Sim lam nazi 4:00pm cekci ah cun, an khua kap ih bualrawnah Table
Tennis (Ping Pong) an lek tlang la la. Zianglo lawngte ih biaaw kim
thei cu amak ve pam a si.

A NEITU
LCF
CHIEF EDITOR
RICHARD K. EMMANUEL
JOINT EDITOR
VL bawithang
SENIOR ADVISORS
ANDREW THANG ( Pate )
REV. S. NI LUAI
PEHZOMNAK
42 – 14 WISMA CITY TOWER
JALAN ALOR, 50200
KUALALUMPUR,
MALAYSIA
CONTACT TO :

PHONE
012 – 6402232 ( Ela )
richardemmanuel@…
vl_bawithang@…

Comments

comments

Comments

%d bloggers like this: