Hruaitu Issue 85

EDITORIAL

Fellowship kan ti hi !
Nan rak ruat ve dah maw? Fellowship ti cu mirang tong a si nan kan
Laitong vek rori in kan hmanmi tongfang a si ih, a sullam cu
pawlkomawk or pawlaw khawm tinak khi a si deuhbik. Malaysia ih zumtu
pawl cu Myanmar Chriatian Fellowship, Chin Christian Fellowship, Lai
Chriatian Fellowship le Fellowship phunphun tiin kan ding ciau.
Asinan kan Fellowship ciau hi vawn zoh sehla, ?Worship?timi ?biak
khawmnak?lawng hi kan uar tlangpi thluh. Uarding cu a si ko na in,
kan pawlkom hmin Fellowship timi in a sawh duhmi pakhat le pakhat
pawlkomawknak caan
( Social Service etc…) tla hi kan thlah thlam deuh theu tla a bang
ka ti theu.  LCF khal hi kan biakinn hnakin inntang ih kawldawr ah
kan Fellowshipnak a lang sawn in ka hmu.
Fellowship in a tumtahmi ngaingai cu milai hmuaw dahlo, theiaw dahlo,
rualpi si dahlo pawl rualpi kan si thluh thei nak ding ih
pawlkomawknak, tumtahmi le hmuitinmi bangawlo ciau khalsehla hmunkhat
le tlang khat te ih hna tuan khawm thei nak, Cui tanrualnak thazang
thawn kan miphunle ram hrang Pathian hrang ih tuan khawm theinak
pawlhi a sibik ka ti. Lai Kristian Felowship par bang mawi sinsin
seh!!!

BIBLE, BIBLE, BIBLE HI…
                                           By : Ela
Kan Bible hi Pathian Thlarau   in zumtu mithianghlim 40
rual hmang ih a rak nganmi a si. Bible ahhin uk 66 a um ih Thukham
hlun ah 39, Thukham thar ah 27 a um. Kum 1,500 sung hrawng ih rak
nganmi a si.
A rakngantu pawl hi milai sinak ah dinhmun bangawlo lawngte an si.
Cupawl lakah cun Ngakai tu, Siibawi, Philosophers, Siangpahrang,
Puanthlam tuahtu, Tlangbawi, Leiletpa le Tuu khal pawl an si. An
sinak a bangawk lo ihtlunah an ngan lai ih an tawnmi khal a dang
ciau. Ral dolai caan ih ngantu an um vekin, ral daihzet lai caan ih
rak ngantu khal an um. Siangpahrang tokham ih sin ngantu an um vekin
Thawnginn thim sung ihsin ngantu khal an um.
Thukham hlun ih ngan tambik tu  cu Moses a si ih Genesis –
Deuteronomy tiang uk nga ( Pentateuch ) a ngan.
Thukham thar ih ngan tambik :  Apostle Paul hin Thukham thar ah uk 14
rori a ngan. Thukham thar cabu hrek hnak ih tam rori a ngan.
ZIangtik laiah so an rak ngan :  1450 B.C ( Befor Christ ) hrawng
ihsin 100 A.D. ( After Christ ) karlak ih rak nganmi an si.
Thukham hlun ah ziang bu so ngan hmaisak bik :  Bible tamsawn cun Job
cabu hi Thukham hlun ih ngan hmaisakbikmi a si tiah an pom tlang.
Hmin theihlo mi Israel miphun lak ihsin rak nganmi a si ih 1,500 B.C.
lai ih ngan thawk si in an pom tlang. Bible thiam hrekkhat cun Moses
ih cabu panga hi Bible ih ngan hmaisakbikmi a si an zum ih, 1446 B.C.
le 1406 B.C. ih rak ngan thawkmi a si an ti ve.
Thukam hlun ih cabu ngan netabik cu Malachi a si ih 400 B.C laiah rak
ngan a si.
Thukam thar ih cabu ngan hmaisakbik : James bu hi A.D. 45 ih nganmi a
si ih, Thukam thar ih ngan hmaisakbik a si zum a si. Thuphuan bu hi
Thukam thar ih cabu ngan tetabik a si ih A.D. 95 ih ngan a si.
Tong hman : Kan Bible hi tong cithum in rak ngan thawk a si ih;
cupawl cu Hebrew, Aramaic le Koine Greek tong pawl an si.
Ziangtik ah bukhat ih an rak remkhawm:  Thukham thar cu 375 A.D.
lawng ah an rak remkhawm thei ih Thukam hlun lawngte Jesuh rawn hlan
ah an rak remkham zo.
Mirang Bible lehlin   hmaisakbik cu John Wycliffe in 1382 A.D. ah a
rak tuah hmaisa bik.
Ziangtikah Bible an rak Print :  Johannes Gutenberg cun 1454 A.D. ah ?
Type Mold?a rak tuahsuak ih; cui kum ah cun Bible hi rak print hngal
a si. Leitlun cabu lakih print hmaisakbikmi khal a si.
Bible ih bu saubik cu Sam bu a si ih bu tawibik cu John a si.
Bible bung  saubik cu Saam 119 a si ih Bung tawibik cu Saam 117 a si.
Bible Caang saubik cu Esther 8 : 9 a si ih, Caang tawibik cu John
11 : 35 a si.
Kan Bible bu 66 sungah ?Pathian?ti pakhat hman langlomi cabu cu ?
Esther?cabu a si.
Bible in zaidambik ( Jesuh siarlo in ) a timi cu Moses a si (
Sansiarnak 12 : 3 ).
Bible hi Leitlunah Tong phun 2,018 rori ih lehlin a si zo. Mirang ca
ngan thiam hminthang Shakespear ih ca nganmi hman tong 50 lawng ih
lehlin a si lai.
Bible hi leitlun ih cabu zuar khawm tambikmi a si ringring lai.
Bible Lehlindan
Judah miphun pawl cun khuahlan an pipu pawl ih thuhla nganmi cu an
theitawk in an rak fingkhawi ih; cucu kan Bible ra suah theinak hram
pakhat a si. Ca hmaisa pawl cu tlak ih tuahmi ( tlak pheng ) parah,
savun le phairuang hnah pawl ah rak ngan an si.
Jesuh Krih a suah hlan kum 300 hrawngah Judah biaknak hruitu pawl cun
Original Hebrew cazual   Thukham hlun cu Greek tong in an  an rak
letling. Cucu Bible lehlin hmaisakbik a si. Hi ca letling tu dingah
hin Rabbi le Scribes 72 an hrilaw ih ni 70 or 72 sungah lehlin hna hi
an theh thluh. Curuangah hi an Bible lehlinmi hi Greek tong in ?
Saptuagint?tin an ko; cucu ?Sawm sarih?tinak a si. Hi sanlai hi Roman
Emperor sanlai a si ih Greek tong  cu  Leitlun ih Common tong ( tulai
ih English vek ) a si.
Cui hnu A.D. 500 ah Judah miphun lak ihsin scribes pawl cun ?
Masoretes?( Ngan sal tu pawl tinak ) tiih ko aw in Bible cu kut rori
in an copy ciamco.  Tiberias kiang ih talwnginn ah thumaw tahrat in
hi Bible copy hna hi an tuan. An copy tikah, byheart mi ngan khal an
sianglo, zoh cawpcawp ih ngan ding a si ih, ngan hlan ah ka rori ih
sal awn kohko fekfek ding tiah daan khoh tak thawn hi hna hi an rak
tuan.  Tulai cathiam pawl in an reldan ah, scribes pawl khan Original
an copy tikah ngan sualmi an nei phah phah thu an hmusuak. Asinan
Bible doctrines poimawh pawl cu copy sualmi lakah an tello. An copy
sual deuhmi pawl cu Eg. Palestine pawl khan ralkap 3,000 maw 30,000
an kuat tivek, history pawl deuh a si.
Cumi ihsin thawk in mah le san ciau ah ca thaim hmaisasa in mah le
tong ciau in Bible lehlin hi hnapi ah an rawn neih ih tui ni ah
Pathian zangfahnak in Bible lehlin dangdang tampi siarding kan
neihnak a si.
Kan Bible/Pathian thu  hi a nung Pathian ih thaw rori a si ruangah
Leitlun a cem hnu khal ah kumkhua  in a um ringring ding..Jesuh in a
ti. Bible, Bible, Bible hi !!!

                                             Pathian Tuu

   Rev. S. Ni Luai
Midang thawn a pawlkom aw thei lomi cu mai duhnak lawng ruattu pawl
an si. Midang ruahnak cu an pom thei dahlo.
( Thufim 18 : 1 )

Bawi Jesuh in zumtu pawl
hi ?Ka Tuu?tiah a  ti…John 10 : 27. Tuu nun  ziaza in zumtu pawl
hi kan nun thei nak dingah Tuu nun ziaza kan zir a tul. Tuu nun ziaza
ah hin phun hleihnih lai kan hmu thei ih, cu tawk ih nundan vek ih
kan nun lo ah cun Pathian Tuu kan si thei hrih lo ding.
Cu mi phun 12 sungah pakhat cu, a run run in um mi an si. Kan Bawi
Jesuh in zumtu pawl hi in cah bik mi cu ?hmunkhat te ah umtlang uh
la, duhdawt zet in um uh?a ti. Setan cun thentu si lawng a tum ring
ring. Bawi Jesuh cun pumkhat ah in khawm a tum ring ring.
Kan Bawipa ih thlacamnak ah, “Nang mah le kei mah cu pumkhat kan si
vek in, an nih khal pumkhat ih an can theinak dingah nang mah ih i
pek mi sunlawinak kha an mah khal ka pe ve a si?.John 17:22. Kan biak
kan Pathian mipathum pakhat a si ih, hi hi Pathian sunlawinak a si.
Cuvekin kan nih zumtu pawl khal hi miphun dang tampi kan si ko ding
nan, zumnak pakhat, ruahsannak pakhat le duhdawtnak paklhat in a nung
ding mi kan si.Hi hi kan Pathian in zumtu hnenah thlen ter a
duh.
Tuu rual:
       Tuu cu a rual rual ih tlangkhawm theu an si. Kan Ca thianghlim
tar mi ah `mi dang thawn kom aw thei lo mi cu, mai duhnak lawng ih
nung a si?a ti. Curuangah zumtu hmunkhat ih umtlang duh lo cu, mai
duhnak lawng ih nun a tum ring ring mi pawl an si. Ziang ruangah Tuu
a rual rual in an um thei? A khal tu ih duhnak kha an zoh ring ring,
an mai duhnak in an um lo ih a khal tu ih duhnak in an um ruangah
pumkhat an si thei nak a si.
Tulai zumtu:
         Tulai zumtu hi Tuu kan bang nawn lo. Rualpi thawn um hnak in
mah lawng ih um kan duh  thlang. Pathian hna kan tuan kan ti khal ah,
kan tuan mi cu zumtu then lawng lawng kan tum.
Kawlram Pastor natnak hrirai pakhat cu, a tlunah thuthennak  (action)
an tuah ve ten, a hna in an cawlh ve ten Kawhhran zumtu an then cing
cing. Cu cu Pathian hna kan tuan thei tawk a si.
Kalaymyo Tahan-ah Pastor pakhat in mi nupi a fir sak ih, a kawhhran
cun a hna in an cawlhter ruangah kawhhran dangah a thawn ih, a member
pawl tam zet in an thlun. Hi ti vek zumtu thenawk nak a tamnak hmun
hi Setan hnatuan a si ko ding tiah ka zum.
Sia le tha thleidan thiamnak kan neih nak ding ah thla kan cam ring
ring a tul. Kawlram Kristian pawl hi ramdang kan thlen tik khalah hi
vek natnak in kan dam thei lo. Miphunkhat kan sinak khal kan zah thei
lo ih, kan thenthek thluh, a pawi na sa.
Curuangah Bawi Jesuh in ka Tuu in ti tikah, Tuu cu pumkhat, a run run
ih umtlang mi an si ti thei cing in le kan mai duhnak hawl lo in,
Pathian duhnaK hawl sawn in nung uh si. Laimi zumtu hmuah hmuah hi
toawk lo ten, rualrem zet le duhdaw zet in, Tuu nun zir ring ring in
pumkhat kan si thei nak ding ah mai duhnak hlawn tahratin, Pathian
duhnak , pumkhat sinak hi tlin ter tum tento uh si.

Sayamah Sapte ih khual tlawnnak
                                ( Zarh hmaisa ta peh )

July 18-August 1 Malaysia
Malaysia ka ra thlen ihsin Putra Jaya ih kan laimi, hramlak ih harsa
tuar pawl kan va veh hai. July 27- August 2 ni tiang Canada, Quebec
City ih feh ding ka siih, vanzam tonak ka booking tikah a khat theh.
July le August cu summer holiday peak season a siih tonak a har. Ka
rak booking tuan lo asiti asinan, LCF pawl in, Sunday tiang cam aw
inti mi hi Pathian an lam a tang a si ding, August ni 2 Monday
lawngah U.S kirnak ding vanzam tonak a lawngih, an saduhthah bangin
an hnen ah Sunday tiang ka cam ding. Curuangah Canada khal feh nawn
loin Malaysia LCF ah zantin khawm-awknak kan nei hi Pathian ka
thangthat asi. LCF pastor Rev. Za Thelh Lo le Pawlpi Upa pawl thawn
lungrual ten, zantin ka khawm awk thei hi cu Pathian ka thangthat
ngaingai a si. LCF ah thangphawknak nasa tak a thleng thlang a si.

August 2-  USA
August ni 1, Monday zinglam nazi 9am ah KLIA in Malaysia Airline than
New York, U.SA lam panin kan zam suah cu, zan 9pm ah Sweden ram
Kholam Alenda Airport ah nazi 1:30 sung kan cawl. Cutin New York lam
panin ka zam sal ih, Malaysia can Tuesaday zinglam nazi 7 am ah  New
York kan thleng. New York ah zan khat ka cam. A thaisun ah nazi pa li
sung vanzam to sal lala in, kan umnak khua Kansas City ka thleng
nerno a si. LCF ih thla in cam sak bangin, Vanzam par khalah ka um a
har lo. Vanzam to khal ning thlekthlek vekin ka um lo. Vanzam par ah,
ka itthat thei vivo.

Hardamnak lam
Tui tum ka khual tlawng sung hmuahhmuah ah Pathian zangfahnak in dam
loin voi khat hman ka um lo. Sihmansehla, ka bang tuk deuh ih ka tha
a mal deuh. Malaysia ah rawl thawthaw ka ei nan, ka tawl deuh tho
tho.
Thla hnih le hrek sung Nisa lakih ka vaknakah ka dum deuh fawn.
Ka sam khal a rit deuh in ka theih ruangah, ka tai thleng ka sam cu
ka liang tiang, tawiten ka tan ter. Cutin ka zaang deuh in ka thei aw
aw.

Sumpai lam
Khual tlawng dingih kan pawk ihsin, U.S kir dingih Malaysia ka um
sung hmuahhmuah, ka hman `ul ding le ei le in man le vanzam ticket
man hmuahhmuah cu daih aw ten Pathian in in pe. Ram dang ka feh
tinten, sumpai ka hmang dah lo nan, U.S ka kir hlan Malaysia ka um
sung tlukih ka sumpai hman tam vekin sumpai ka hmang dah lo. A hlan
kum 7 hrawng ihsin rualpi hlun pawl ka tawngih laklawng tete ka pe,
rawl ka do, ka di riam koin rualpi pawl ka zoh. Ziangah tile, tui
thla hnih sungah Malaysia voi 6 ka feh nan, ka rualpi hlun pawl ka
tawng thei dah lo. Tui `um lawnglawng hisi rualpi hlun pawl ka tawn
thei can cu.

Kan Bible Ngantu, ngankum le ngannak hmun pawl

By.Richard Emmanuel
Thukam Hlun
Seemtirnak … By. Moses…1513 B.C…..From Nelrawn.
Suahlannak ….By. Moses… 1512 B.C…. From Nelrawn.
Puithiam….By.  Moses …..1512 B.C. : From Nelrawn.
Job ….By.Moses…1473 : Nelrawn.
Mipum siarnak….By.Moses .. 1473 B.C Moab.
Dan peksalnak….By.Moses … 1473 B.C : From  Moab ram.
Joshua….Joshua… 1450 B.C. : From Cannan ram.
Thuthentu….Samuel…1100 B.C. : Israel pawl kum 11 a uklai ih ngan.
Ruth….Samuel …1090 B.C. : From Israel ram.
I Samuel..Samuel; Gad; Nathan…1040 B.C. : From  Israel
II Samuel…Samuel; By Gad; Nathan…1040 :  From Israel.
Solomon Hla.By.Solomon..1020 B.C. : From Jerusalem.
Thusimtu…By. Solomon…1000B.C. :  From Jerusalem.
Jonah…By.Jonah….844B.C. ( Theih fianglo )
Joel…By. Joel….820 B.C. ( ? ): Judah.
Amos….Amos…804 B.C. : Judah.
Hosea…By .Hosea…745 B.C. : From Samaria ( District )
Isaiah….By. Isaiah…732 B.C. : Jerusalem
Micah…..By.Micah…717B.C. Judah.
Thufim….By. Solomon; Agur; Lemuel…717 B.C. From. Jerusalem
Zefaniah…By. Zefaaniah…648 B.C. From Judah.
Nahum…By. Nahum…632 B.C.  From Judah.
Habakuk…By. Habakuk…628B.C. : From Judah.
Tahhla…By. Jeremiah…607 B.C. : From Judah.
Obadiah…By. Obadiah..607B.C. ( Theih Fianglo )
Ezekiel…By. Ezekiel 591 B.C.: From  Babylon.
I & II Siangpahrang..By. Jeremiah…580 B.C. From Judah/Egypt.
Daniel…By. Daniel…536 B.C. : From Babylon.
Haggai…By. Haggai…520B.C. : From Jerusalem
Zekhariah…By. Zekhariah..518 B.C. : From Jerusalem
Esther…By. Mordecia…475 B.C. : Shushan, Elam.
I & II Sansiarnak…By. Ezra…460 B.C. : From Jerusalem ( ? ).
Ezra…By. Ezra…460 B.C. : From Jerusalem.
Saam…By. David le

midang…460 B.C. : ( Theih fianglo )
Nehemmiah…By. Nehemiah..443 B.C. : From Jerusalem.

Malakhi…By.  Malakhi..443 B.C. : From Jerusalem.
Thukam Thar
Matthai…By. Matthai…41 A.D. : From Palestine
I Thessalon….By. Paul…50 A.D. : From Corinth.
II Thessalon…By. Paul…51 A.D. From Corinth.
Galati…By. Paul…50 – 52 A.D. : From Corinth (or ) Syr. Antioch.
I Corin…By. Paul ..55 A.D. : From Ephesus.
II Corin…By. Paul..55 A.D. : From Mecedonia.
Rom…By. Paul…56 A.D. : From Corin.
Luka…By. Luka..56 – 58 A.D. : From Caesarea.
Efesa…By. Paul..60 – 61 A.D. : From Rome.
Colose…By. Paul…60 – 61 A.D. : From Rome.
Filemon…By. Paul…60 – 61 A.D. : From Rome.
Filipi…By. Paul…60 – 61 A.D. : From Rome.
Hebru….By. Paul…61 A.D. : From Rome.
Dungthluntu…By. Luke…61 A.D. : From Caesarea.

Jeim…By. Jeim ( Jesuh ih unau ) …62 A.D. : From Jerusalem.
Marka :  By. Marka…60 – 65 A.D. : From Rome.
I Timothy….By. Paul…61 – 64 A.D. : From Macedonia.
Titas…By. Paul….61 – 64 A.D. ; From Macedonia.
I Peter…By. Peter…62 – 64 A.D. : From Babylon.
II Peter…By. Peter…64 A.D. : From Babylon.
II Timote…By. Paul …65 A.D. : From Rome.
Judas….By. Judas ( jesuh ih unau ) …65 A.D. : From Palestine (?).
Thuphuan…By. Apostle John…98 A.D. : From Patmos.
I John…By. Apostle John..98 A.D. : From Ephesus ( or ) a kiangkap
II John…By. Apostle John..98 A.D. : From Ephesus
III John…By. Apostle John…98 A.D. : From Ephesus.
A par ih kan tarlanmi pawl hi rak nagn hmaisak a simi pohpoh ihsin a
dawtdawt ih ngan a si.

Milai thu maw Pathian thu?
                                                       By. Pa Ngun
Hre Luai
Zumtu pawl thinlung le ruahnak rualzet in an umtlang; zohman in an
neihmi thilri kha ka bulta a si an ti lo; an neihmi hmuahhmuah kha
pakhat le pakhat an tawmaw. Bawi Jesuh ih thawhsalnak thu cu
dungthluntu pawl in a nasazetmi huham thawn an sim ih; Pathian in an
zate parah thlawsuahnak tampi a rawn burh( Dungthluntu 4 : 32 –
33 ).Dungthluntu pawl nun
hin zumtu tampi kan
nun in sawh ih kan ke karh dan ding le kan thlun  ding, Kristian
pawl lungrualte ih kan um tlang thei dn ding lamzin in khih hmuh.
Dungthluntu pawl thu hi zumtu pawl in a tu ih kan hman dingmi le a tu
rori ih kan tuah dingmi, kan thlun dingmi Pathian thu a si.
Peter le John in Jesuh ih thawhsalnak thuthangtha cu ral tha zet in
an phuang. Tlangsuak upa le thuneitu sang pawl dodalnak le harsatnak
a phunphun thawngtlak tiang tuarin thuthangtha cu an phuang. Peter le
John in Thlarauthianghlim hnatuan le thiltithei dan fiangten an theih
ruangah, an nun ih an hmuh fuh ruangah an suahsan theilo ih, Leitlun
thuneitu pawl le lal le milai thu ngailo in thuthangtha cu an phuan
nak san a si.
Zumtu mai nun ciau rak zohaw in Pathian thuthangtha phuan in khamtu
le Pathian biaknak lamzin ih in dawn kham tu kan pahtlang dingmi thil
pawl hi ziangha a si? Zumnak lam ih kan cah poh le Setan hnatuannak
khal a cak ti hi kan theih ringring a tul.
Zumtu nun le Ngate
Ngate hi a rualrual in ti sungah lungrual zet in an tlang tlang ih an
ral an hmuh le lungpuk sungah an relh. Cubangtukin zumtu khalin
Pathian thlawsuahnak sungah thinlung ruahnak rualzet in umtlang ding
kan si ih, kan ral Setan hnatuannak kan tawn tikah a rang theibikin
Pathian hnenah tlanlut ding kan si. Zumtu in kan thelhmi tampi cu
buainak kan tawn tikah kanmah in kan nawr ih kanmah in a lehkhuh kan
duh theu.
Milai thinlung hmangin Setan a cangvai
Pathian cu milai hmang ih a cangvaih vekin Setan khal milai thinlung
hmang in a cangvai ve a si. Setan cun
zumtu pawl keksadarh thluh le hmunkhat ih Pathian be tlang theilo ih
kan zumnak thlahthlam ih kan um ding hi a saduhthah a si. Pakhat le
pakhat remawklonak, engtaiawknak, dokalhawknak, milai lam ih nehawk
tumnak pawl cu zumtu pawl ih kan domi Setan hmanrua a si.
Thlarauthianghlim hnatuan
Peter le John in Jerusalem ihsin hna an tuan thawk veten
Thlarauthianghlim hnatuannak cu an dawng ih, damlomi tidamnak thu ah
le, tuhlan ih an rak cohlan theilo mi Nazareth Jesuh ih thawhsalnak
thu cu cohlang thei sal in mi tampi thinlung thleng thluh ko in an
lakah Thlarauthianghlim in hna a tuan.
Peter le John in minung thu ngailo ih Pathian thu raltha takih an
phuan ruangah le zumtu dang pawl lungrual zet ih an finkhawmnak
ruangah Pathian cu an parah a lung a awi. Cuiruangah an lakah
Thlarauthianghlim hnatuan cu a thlennak a si.
Kan nih zumtu pawl khalin Thlarauthianghlim a lung a awi theinak ding
ah cun kan miphun le kan hnam hin Thlarauthianghlim thawi kan
hnawihnihawk taktak a tul ih culawng ah milai ih ruah banlomi Pathian
ih hnatuannak cu kan lakah a thleng ve ding.
Suahkeh kezeng pai thu kahlah Peter le John thlacam ding ih biakinn
an fehnak lamzin kap in zangfah bawmnak a rak dil. Peter in i vawn
zohhnik tiah a ti ih, tangka lo pekding zianghman ka neilo. Asinan ka
neihmi ka lo pe, Najareth mi Jesuh Krih hmin in thu ka lo pe, ?tho aw
la feh aw?tiah a ti.
Peter ih a ti le veten a tho ih a feh thei. Pathian ih kutcak cu a
taksa ah a lang iha thinlung sungah lugnawinak in a khat. Mi zokhal
kan milai thinlung thu ruahnak sia pawl tan ih cui thuthangtha a
cohlang theitu kan si ah cun taksa damnak khal a si ih, Thlaraulam
damnak khal a si fawn. Kan tlanlennak ah le kan cetcangnak khalah mi
tihzah le mi hmaizah in kan khat ding.
Cutin zumtu pawl cu milai thuneihnak le Setan cangvaihnak tangrual
ten do tlang ih Thiangthlarau hmuak tu ding kan si. Thlarauthianghlim
cu mi thekdarh tu silo in infinkhawm sawn tu a si.

Thuthang Hrilkhawm

UN in Myanmar AIDS hrang bawmnak tawp ter

Leitlun pum AIDS, Malaria le TB natnak khamnak hrangah sumpai bawm
theu tu UN Aid Organisation cun Myanmar ram sungah ramdangmi khual
tlawng an sianlonak a tamtuk ruangih hremnak ah bawmnak an taqwp ter
ding thu tubaite ah an than.
Hnatuantu pawl ih reldan cun, ralkap cozah in Myanmar ram hmuahhmuah
pal ter an sianlo ruangah an duhvek in hna an tuan theilo. Kan dung
kum ah hi UN Global Fund hin kan ram hrang $ 100million rori hmang
dingin thu an rak relcat zoomi a si.
UN pawl phuandan cun Myanmar ram sungah a malbik milai 600,000 cun
HIV/ AIDS an vei ti an phuang. Cui tlunan TB natnak khal Leitlun ih
tambiknak a si.
Global Fund ( UN ), AIDS, Malaria le TB natnak donak hrang ih hnatuan
tu pawl hi UN le Private copany pawl dinmi a si ih, Leitlun ram 100
rori ah bawmnak hna an tuan a si. Cu pawl cun Burma ram khat
lawnglawng hi an bawmnak an tawpter salmi ram a si. UN rawl lam
bawmtu James Morri, kan dung kan ram a va tlawnlai khalah thuneitu
pawl hnen ah tu hnak ih luatlat in bawmnak zemtu pawl Myanmar ram
sungah fehsukso theinak pek dingin a rak dil zo.

U.N. Fialmi palai Myanmar tlawng
Indonesi Foreign Minister hlun Ali Alatas cun  tlawngkai  ninga ni ah
kan ram uktu ( 1 ) Than Shew  a va tawng . Alatas hi 2003 kum ah kan
ram remnak ding hrang le Suu Kyi suahnak ding hrang  Myamar hrang ah
UN in a rak ruatmi a si.
Kan ram hruaitu a va tawng tikah Democracy reform thu cu relpi a
tumlo thu a phuang cia lawk. UN in a mai liang ih an hngahmi Kawlram
rem awk theinak ding thu le UN thawn an pehtlaih awk sinsin theinak
ding lam lawng a relpi ding thu khal a phuang cia.
UN palai thotho Razali khal 2004 ah kan ram a tlawng zo ih, tu hi UN
G. Secretary Kofi Annan rori a tlawng ding lawng a tang.  Annan hin
2006 kum ah Myanmar ramah Democracy reform tuah a si ding ti a rak
phuang cia dah. Curuangah a tongkam nemhnget ding khal in Annan hin
theihtawp ke a karh khal zum a si.

Leiletpa 10 kai, an buh khal lawnsak
Kan dung August 17, 2005 ni ah kan ram ralkap cozah cun Buthidaung
Township, Arakan State ih Rohingya leilet pa 10 rori, suamhmang a
rulpi ih cangvai theu tiah puh in an kai.
Hi leiletpa pawl hi 2million kyats ciar cozah hnenah an pek lo cun
kum 12 sung thawng tla ding ih ti an si tiah Kaladan Thuthangca in a
phuang.
Cumi rualah Ma U Pin District, Irrawaddy Division ah leilet 70 acres
hrawng ih kau ah natural gas a suak ih cozah in an lawnsak rori. Hi
lo an lawnsakmi pawl herkkhat cu Yangoon lam ah kuli hlawh ding in an
pok riai.

Burmese Rulpi ke 13 nei a hlo
Kan dung August 17 ni ah Pennsylvania pa’i rulpi ke 13 nei, 100 pound
ih rit cu a inn ihsin a hloh thu MTD ah update a si. A neitu cun a
rulpi a rilrawn hlan tengteng ah a hmuhsal a beiset zet. Cucu
zarhhnih hrawng tinak a si a ti.  A rulpihi leitlun ih hmin lang rori
dingin a duat hliahhlomi a si.

Buddah ih ha hlo hmusal
Kan dung August 14 ah, Mayanggone Township, Yangoon ih Swedawmyat
purang ah an pathian  Buddah zuk an retmi ih ha sui ih tuahmi cu
rukhloh a si. Asinan cui pathian sui ha hlo cu August 16 ah a firtu
in a ret sal tiah AFP cun an report. Himi an thil rukmi hi 50million
kyat man rori a si ih Khin Nyunt in a kut rori ih a rak pekmi a si.
Curuangah tuitum ih  a rutu khal hi Khin Nyunt ih kuthnuai pawl an si
zum a si.

Myanmar : Tilian ruangah milai 100 thi
KAn dung August 14, 2005 ih AFP report dan in; kan ram Mon State le
Tenesserim Division ah ruahpi a sur tamtuk ih kumdang hnakin tilian
khal a zual. Cui tilian ruangah cun milai 100 hrawng an thi zo.
Inn 350 hrawng khal a siatsuah theh ihhleiah milai 1000 hrawng cun an
inn le lo an suahsan a si. Tlawng inn 15, Lilawn 25 le buh cinnak
loram 1000 acres khal laktlaklo ah an cang theh ih, 40million kyat
man hrawng cu tuitum tilian hin a liamhloh pi a si.
Tilian in a siatsuahnak hmun pawl cu Bokepyin, Kawthaung, Tavoy,
Yebyu, Longlon, Thayetchaung, Tenesserim Division ih Pulaw Township
pawl an si. Ruahpi lawnng a silo ih thlipi tla a nattuk ruangah
Highway pawl hman khar an si.

Israel :
Gaza trip ih mi hrekkhat cun an cozah thusuak thlunlo in an umnak
hmun suahsan an tum hrihlo ruangah; tlawngkai ninga niah Israel cun a
ralkap pawl cu tharum hmang ih dawisuak dingin a fial. Mipi suak
duhlo tamsawn hi Neve Dekalim ah an um ih, hithlil thleng ruangah
ralkap pawl cun cozah thupek thlun in hi hmun hi an zuan hnawh ih
mipi pawl cu suak ding in an fial hrim thawk rero zo. Ralkap thazang
lawng silo in Bull Dawzar hmangin an umnak inn pawl khal nawr siatsak
an si.
Neve Dekalim ih um pawl cun ralkap ra lutding pawl rak khamnak ah
bawm tla rak nawkkang in bottle, arti le lungto tla in an rak deng
ciamco ih ralkap 4 cun hliam an tuar nan an hna tuan cu a kham
cuanglo.

Vanezuela Vanzamtla ah milai 160 thi
West Carribbean Airway Jet cu passengers 152 le vanzam hnatuan pariat
phur in kan dung tlawngkai nihnih ni ah; Vanezuela ram ah a tla.
Zohman dam ih suak an umlo
an thi theh. Hi vanzam hi engine siat ih tla a si thu theih a si.
Vanzam mawngtu in an engine a siat thu report a pek hnu reilote
sungah Airport thuneitu pawl cun an contact thei nawnlo ih a tla cih.
Passengers pawl hi Matenique pawl an si ih, vanzam ih hnatuan pawl hi
Colombian pawl an si.

Baghdad Bomb puak ah mi 25 thi
Kan dung tlawngkai ninga ni ah Iraq khawpi Baghdad ah raltlan pawl in
mawtaw pathum rori bomb an puah ih milai 25 an thi ih midang 51 in
hliam an tuar.
Mawtaw hmaisabik hi al – Nahda bus station ih puahter a si ih,
pahnihnak hi motor park ah, pathumna hi al – Kini ziizung kiang ah
puah ter a si. Mawtaw khal 12 lai a kang sia ih; hi bomb puah tu pawl
hin police pawl maw an bat ih mipi ti khal theihfiang a si hrihlo.

Japan :
Kum 1945, August ni 15 ah Japan ram cu ralpi IInak ih an ral pawl
nehlo in an sung ih; an sunnak cam a vei 60th nak kan dung tlawngkai
ninga ni ah an  tuah a si.
Khai doawk lai ih an sungkhat thi pawl le Leitlun hmun tinkim ih
mithi pawl theih ringring nak ah hi caan hi an hmang a si. Japan ral
lai ih mithi sungkhat ram tin ihsin Japan hnenah an thinnat tuardem
deuhnak ding paisa diltu ram khal tui ni tiang in an um.
Japan Prime Minister, Junichiro Koizumi cun ralpi II lai ih an ramih
ram an rak lakmi pawl ram hnen ah ngaidam a dil ih??Japan ramhin
khatik caan ih kan rak tuahmi pawl kha kan tuah dah nawnlo ding;
napin kan sir aw; a thatlonak cu nikhat hnu nikhat kan hmu deuhdeuh;
milai nunnak lawnsak thatlo zia tla kan hmusuak sinsin; curuangah
ziangtikhman ah hivek thil hi kan tuah dan nawnlo ding tiah Japan ram
aiawh in mithi sungkua pawl hnen ah ngaidam ka dil a si a ti.

Reform Kawhhran Thang SinSin
Leitlun ah Reform kawhhran pehkhawmawknak tum bikbik, Reform
Ecuminical Council ( REC ) le World Alliance of Reformed Churches (
WARC ) cun pehtlaihawknak le hna tuan tlang theinak thuk sawn neih
tum in tan an la rero lai. REC ah hin ram 25 ah kawhhran 39 an nei ih
WARC hin ram 107 ah kawhhran 218 an nei.

Bush :  Evolution Uarlo
America ram ah hin milai hi Pathian tuah kan silo, thilnung fate
ihsin mahte rawn thang vivo kansi timi zirnak( Evolution )  le milai
hi Pathian tuah kan si timi ( Creationist ) pawl hi nasa zet in an
elaw theu. Cun an tlawng rori hmanah milai hi mahte ih rawn um kan si
ti cu subject khat in zirh tel a si.
Asinan, Bush cun kan dung August 1 niah ?milai hi Pathian tuah rori
kan si?timi subject khal cozah tlawngah zubject khat ih zir ding thu
Washington ah a sim. Bush hi politician a si nan, Pathian thu lam ah
cun daiten a um men thei ve hrimhrim lo.
Creationism le Evolution  thuhla hi American scientist pawl lakah
elawk ringring a si ih; National Academy of Sciences le American
Association for the Advancement of science pawl cun Creationism hi
science thawn simfiangnak a umlo ruangah  science vekih zir ding a
silo an ti. Cutilaiah, Discovery Institute, Seattle cun Creationism
lam ihtang scientist 400 hrawng nei in a relaw.

Maradona maw thiam sawn Pele?
Argentine footbawll hero Diego Maradona maw, Brazilian Legend Pele
tih thusuhnak hi ziangtin na let ding? Maradona cun, nan pahnihlakah
zo si thiam deuh ding tiih an suhnak ah cun hitin a let, “Ka n? cun
keimah siih a rel ih, Pele cun a mah siin a rel a ti.? Hi tei pahnih
hi leitlun football laknak lamah cun thuanthu neibik khal an si ding.
Number 10 hruk thei ringring tu pahnih an si. Zo so thiam na ti sawn?

Cabu ka siar hrih lo
England footbawll captain David Beckham ih nupi cun cabu sah deuh
pakhat hman a siar hrihloih, music ngai le magazine tete pawl lawngte
cu a siar paih zet. Spice Girl hlun in a phuanawknak hi Chic
Magazine, tui thla ih suak aha si ih, cabu ka siar dahlo ih, caan
lawng ka neihlo ruangah a si, caan lawng ka neih hman ah music ngai
ka paih deuh a ti.
Victoria hin fapa pathum   Brrokly, Romeo le Cruz a nei thlang ih
fanu lawngte a daw zet. Leitlun ih star hminthang bik pakhat nupi a
si nan, kan pa hi fala pawlin an ngaisak ciamco khal ah ka thik tuk
lemlo a ti. Kemah le kemah hitin ka simaw theu, ?kan pa hi a mawi, a
thinlung le a tha, curuangah fala pawl in an zoh ciamco khalah a mawi
ruagah, pasal mawite ka rak nei a si tiah?ka ti theu tiah …Victoria
hin a pasal cu a uanpi nasa a si.

Clinton : CD Collection
Mi tiawter bik ihsin capo lawngte ih a khatmi nu/pa tiang khal hin
kan thinlungah music cun hmun a rak luah ve theu. Leitlun pa fim
bikbik pawl khal in cawlhnak le lunglen hnemnak ah an hmang ih; cu
pawl lakah America president hlun Clinton khal a tel.
Tu ah hin a hla duhzawng CD pawl collection a tuah rerolai ih ?The
Bill Clinton Music Room?tin a ko. Cubang CD ah cun, ?My one and Only
Love? My Funny Valentine?ti pawl tla an tel. Hi CD collection hi zarh
hnih khat ah zuar suah an tum thu Clinton milai pawl in kan dung
Sunday ni ah an phuang a si.
Malaysia :Methodist Church nemhnget
Kan dung zarh ah Selangor  government cun Malaysia ih Methodist
kawhhran pahnih cu ram hrang ih thathnemnak tuah an sinak nemhnget in
an Biakinn hmun/ramkhal ( approved ) an tuah a si.Hi Methodist
kawhhran pahnih hi cozah ih theihpi mi rori a si thlang ruangah
zohman in an biakinn hmun thuhla le an cangvaihnak ah tibuai thei a
si nawnlo.

LCF Upa hmuahhmuah cawl ding!!
August 19, 2005 zan nazi 11 : 00pm ihsin Lai Christian Fellowship,
Malaysia Upa 12 cun; Fellowship mipi pawl that tlan thei nak ding
ruat in an Upa sinak cu an cawlhsan a si. Hi Meetingnak ah hin KLBC
Pastor, Myanmar Christian Fellowship Pastor, LCF Pastor le LCF upa 8
an kai.
Tuitum  kan upa pawl hna cawlhnak thuthawn pehpar in lenglam minung
zohman ih fialmi le forhmi khal a silo; mahte thlacamnak thawn
lungthiang zet ih tuahmi a si.
LCF a rak din thawk ihsin tuini tiang Upa dinhmun ih lam in hruai
theu tu; Fellowship in harsatnak phunphun a rak tawn  laikhalah hrial
men lawn in rak pahtlang pi theutu kan U le pawl hrangah hin napi
thla campi ringring uh si.  Pathian tihzahnak le miphun duhdawtnak
thinlung thawn a khat mi kan hruaitu pawl hi kan  biak Pathian le kan
miphun hrang tu hnak ih tam sinsin in hna an tuan thei nak ding
khalah thlacampi kan hngilh dahlo pei uh.
Kan miphun rawn hruai vivo  tu ding pawl khal Pathian in lam rawn
hruai in, miphun hruai thiamnak thinlung, cahnak thazang rawn pe vivo
hram seh tiah thlaza kan cam.  Tuurual pawl in duhdawt tu Pathian cun
Malaysia ih Kuli ra hlawh tu Falam tong hmang Laimi malte thek darh
le remlo hniaihniai ih um in sianglo ih kan hrangah a remruatnak
thabik cu a rawn lang ter  a si. LCF par bang mawi sinsin hram seh!!

Baibal zoh lo zuam awknak
21 August 2005 Bible sunday  tuisun khawm ah bible zuam awknak a um
ding. Laksawngkhal maksak buatsaih a si. Baibal bungcang Efesa 6 :
10 – 20 siar a si ding.

Tawng phunkim in bible siarnak
John 14:6 nak kha baibal phun phun, tawngphunphun in siarding asi.
Salai Bawi vum in can a kai ding.

C- Khui ah so an si- CD kha

Salai Bawi Hre, Mapui le rualpi pawl ih CD kha Lairam zuk le zuk
mawimawi ben  (still Image) in tuah thar sal a si ih zoh a nuam zet.
Lairam tlung vek rori in Salai Sen Hngilh Piang in edit
a tuah, a tha nasa. Rak lei ve aw na sir aw lo ding.

Comments

comments

Comments

%d bloggers like this: