Hruaitu Issue 73

HRUAITU ZARHTIN THUTHANG
Vol. 73
May 29, 2005

Table of Contents

Editorial …………..1
Beer Kawhhran ……. 2
Thlarau in khat uh….3
Steven Rualthankhum Interview..4
Na duhzetmi thawn…7
Ramdang thuthang… 8
Kawlram thuthang….11
General Knowledges.. 13
Kan mah sung thu….. 14 – 17
Leknak lam ……… 18 – 19
Hlim hi harhdamnak…..20

Editorial

RAWL UIH EI CU SUNG A DOK

Kan ni lai mi ih kan hmeh duh bik mi cu ziang asi ti in sut hai sehla
sa a suan ih suan kan ti cio dingah ka zum. Zing khat cu ka nu in ar
a that ih a suan in in suan sak, Lai lam ti cu sa ei khaat thawn .
zing kan rawl ei cu thaw ti fa hran in ka pum puar lai hman thei man
lo khawp in ka ei, a sun lo ka suak zan lam ka tlung cu zingih kan
rawl ei kha ka thin lungah a tang . ka ril rawng phah thawn zingkan
rawl ei vek ei ding hngak hlapin coka ah cun kalut lohli. Bel ka vun
kau ih kan ar sa thing cu a rat uih hem hem.
A si nan a uih nak kha ruat nawn loin a thawt nak lawng in ka thin
lung i neh ih. Kan rawl hmeh thing cu puar ttek tti cun lungnuam zet
in ka ei ciam co. Ka U le in ei hlah na pum a na dinginti cingnan an
tong cu ka thin lungah a lut lo. Ka rawl ei mi lawnglawng ka ruat
rawl ka ei khawp hnu tawk fang cun ziang hman ti man loin ka pum na
in a thokih ka pum nat hnu rei lo te cun ka luak luak le ka sung dok
cun i tlak buak ciam co. ka sungdok ka luak luak a roh tuk ruangah Fa
lam si zung pi ah in kuatih sizung thla khat le a hrek lai ka um
hnuah l e ka sdungkhat paisa tam tak kacem ter hnu lawngah ka dam tha
thei sal.
Cuti vek thiam thiam in lei tlun kaih hruai awk nak lam khalah kaduh
tuk ti ih thil mah hrang hmin thatnak le mah lam awl nak zawng lawng
ruat ih thil kan ti poh ah kan mual pho in rualpi lak khal ah kan zak
a zum theu, ih kan hna tuan nak khal ah kan sunglawi thei lo ih mual
pho nak in in tlak loh li theu.
Cuvek in thil kan ti poh ah mah ih tha ti nak lawngle mahih pawi lem
lo ti nak si loih , in thlir tu mi tam sawn ih a tha tha lo ti mi zoh
thiam phah ih feh dan kan thiam asi le kan ke kar nak ah tluk siat
nak hnakin cah nak lam ah hmai kan nor vivo thei ding asi. Cu lawng
si lo in lung rual nak thlen tu a si dingih ral hrut mi ral that nak
ah a cangding.
Mi aa mi fim zirh awk nak vek a si ding, mah lawng fim aw ter le mah
ih duh dan lawngih feh tumih, Mi phunpi tluk siat hnakcun ziang hman
tuah lo law law atha, mah duh zawng lawng ruat ih Rawl uih ei ih sung
le khat neih siah cem theh ding hnak cun Rawl uih ei khal ka tum nawn
lo, mah zawn ruatlo mi dang zawn ruat ding ah Hruai tu in a lo sawm
asi.

Beer Kawhhran

Beer kawhhran thuhi kan theinak in kauhtertu pa khat a si beisei ih
ngan ka si. Thlun uhsi timi lungput ih ngan ka silo.
Beer church ih registered tuah zomi an siar netabik result cu, ?ram
26 sungin, members 100,000 rori an kim zo?
Beer church tiih kawhmi hi organozation pakhat a siih, mirang pawl ih
dinmi a si.A dintu pawl cun Leitlun hi hmun nuam sawn le thasawn ih
tuah tumtahnak thawn an dinmi a si. Leitlun milai zaran cun Beer in
an duh ciau ih, mai milaipi pawl thawn nuam zet ih um khal an duh
ciau. Party ah beer in milai a punkhawm ter ih, cui beer ah cun milai
nun thleng theitu, mi beidong pawl thinlungah beiseinak pakhat khat
luh ter theitu khal a si.
Beer hi mi duhdawtnak, bawmnak le thiltha tuahnak ah kan hmanpi ding
a si ti cu an rel uarbikmi a si. Christian tampi in beer hi an hua
ih, a sinan, beer church pawl cun thiltha tuahduhtu biaknak pawl
hmuahhmuah thawn danglamnak neilo in an relaw.
Beer Church kan ti tikah, ?beer hi Pathian vekin kan bia ailo ih,
milai kan sisungah, social nun le rualpi pawlnak ah a thupi tukmi le
tha tukmi a si ruangah beer kawhhran tiih koaw kan si. Leitlun ih
beer in tu hmuahhmuah hi kan kawhhran sungah nan tel? tiah a dintu
pawl cun an phuang.
Beer hi nunau mipa tikhal umlo, vun rawng bangawlo, sam design
dangdang leziang phun hnam khal in kan inntlang theimi, milai bangaw
rep ih in tuahtu khal a si, tiah an ngan bet.
Jesu in beer a tuah?
#25541;ana khua ih Mopuai ah, Bawi Jesu in Wine silo in Beer a tuah?
tiah Bible thiam scholar pakhat cun a ngan. Hi thu hin a lo barakhaih
ka zumlo. Asancu, kan Bible hi English ih rak nganmi a silo ih,
cangan hlunbik ( original ) ah Aramic ih nganmi a si, cumi cangan ih
a ti duh san cu wine silo in ( strong drink ) a si tiah hi Bible zir
pa hin a ngan. Cui strong dring timi cu wine tiin Bible letling tu
pawl hin an letling ih, a hmanlo, Beer tiih lehlin sawn ding a si a
ti.
1800BC lai ihsin Middle east ah Greep hi Meddel East ah tamtuk hnuh
ding a rak umlo, grain timi ( tulai ih beer an tuahsuaknak bik
theirah cikhat)hi a rak tambikmi a si. Curuangah Mediterian region
hmuahhmuah ah wine silo in grain ih tuahmi beer hi a rak lar tuk,
Mopuai le punkhawmnak nikhua ah wine siloin beer an inkhawm theu tiah
a ngan bet.
#25555;esu cun tidai kha wine ah a cang ter sisawnlo in beer ah a
cang ter, culawng silo in sacrament an tuah tikah wine zemlo in beer
an rak zem ti hi kan zaten kan fiang ka duh. Himi thu ka ngan mi hi a
hmanlo a sile kumkhua hremnak ka parah thleng seh?tiah…hi thu
ngantu hin Wine le Beer thu hi a ngan a si.
Source : Beer Church

Tlarau in khat uh
Ephsian 5 : 15
Ela
Wine/ Beer ih riit hnak in Thiangthlarau ih riit/ khah ding hi
Pathian thu cun in fial.
Tulai zumtu pawl kan nundan ka bantawk ih ka zoh ve rero tikah,
Thlarauthainghlim ih khah ringring kan tultuk in ka hmu. Thlarau ih
khah ti teh hi kan fiang maw? Kan piantharnak, rundam kan sinak mual
ahhin hnangam zet in kan to hiah hiah sawn ha?
Thiangthlarau hi ziangvek ha a siih, ziangvekin ha hna a tuan ti
fiangten kan theih duh cun….zawi sermon le Ideas hman sut hniai
hniai lo in kan Bible zoh ohli ding a si ko. Ahleice in Act (
dungthluntu ) sung hi siar men silo in, a zir in kan zir sal pei uh.
Hi cabu hi, Thiangthlarau hnatuannak cabu ti tla in kawh a si.
Thiangthlarau ih khah tihi zumlo tu pawl nunah beisei ding a silo,
rundamnak cozo tu nang le kei ih nunram ah hin nitin ih khah sal kan
tul ringring. Na pianthar niih Thlarau na comi kha, a dang thlarau in
rawn lo khah ter tul tinak a silo.
Dungthluntu hi thaten na siar cun Rundamnak ngahzo nan, Thiangthlarau
colo, a theih hman thei bembem lo na hmu ding. Peter te pawl rori
hman Penticost ni ah Thiangthlarau an parah a thleng zo nan, a thar
zel in thlarau in an khat. Zumtu unau, nitin te Thlarau ih kan khah
thei nak ding thla cam tento uh si.
Zumtu hmaisa pawl kha, Thiangthlarau ih an khah lo ah cun thazang an
neilo ih, an Bawipa hman an rak hum ngamlo. Peter le John…Penticost
ni hnu ah thuneitu pawl in an kaih tikah, huaizet in milai thu hnak
in Pathian thu an ngai sawn ding thu an phuang. Pathian hrang ah an
peisa le can cu rello, an lu tiang hman an phum ngam. Thiangthlarau
ih khah cu ralthatnak a si.
Thiangthlarau hnatuan dan thawn pehpar in, cumi khami lai, cumi khami
ih campaign nakah ka rak codah, cutin khatin Thlarau in inrak hmang
dah tiih…. buhthing rin ih rin men a ngah lo. Thiangthlarau a
cozotu, dungthluntu pawl khan nitin te cui Thlarau ih bawmnak dilin
thla an cam. Cui an Thlarau comi cun nitin an nunah khah ter sal
dingin a dil ringring theu.
Thiangthlarau ih khah ticu..zuu rit thawn tahthim suhla kan fiang bik
ding ka zum. Zuu kan inn hlan ih kan rel ngamlo le kan ralhrutnak
hmuahhmuah cu, zuu in invawn ciah neh hnu cun an hlo theh ih, tihhrut
zetpa kha…zosi inngam tiin khawlak ah champion vekrori in kan au
kan kiau. Thiangthlarau ih khat pawl cun zuu ri pa vekin, a mai
caklonak, tlinlonak le fellonak hmuahhmuah hnakin Pathian cahnak a
zoh ringring ih…Thiangthlarau ih a khah hlan ih a tuah ngamlomi, a
phuan ngamlomi..Pathian thu, milai pawl nun dan ding le..Thlarau in a
fialmi hmuah hmuah cu raltha zet in a tuah theu.
Cumi nuncu, zumtu nang le kei hin kan tul bikmi a si ko ee.
Thiangthlarau ih khat pawl nun ah cun duhdawtnak le ngaidamnak a lang
ringring ih Doctrines le t.ukmawt.ak, leitlun thilri menmen ah an
buai dahlo.
Curuangah Paul cun Thlarau ih khah hi kan tul zia thei in..Ephesian
zumtu pawl ( Thlarau co zo tu pawl ) hnen ah Thlarau in khat ringring
uh tiah ca a rak kuat nak a si.
Duhdawtmi unau, kawhhran le miphun kan hruainak ah siseh, innsang le
fellowship kan hruainak ah siseh, nitin rual kan pawlnak ah siseh,
sum le pai kan hawl nakah siseh… Thiangthlarau ih kan khah ringring
a tul. Cucu kan lam tluannakding zin thabik a si. Thiangthlarau ih
khan khah ringring thei nakdingah bawmnak dilin thla kan cam ringring
pei uh.

Steven Rualthankhum thawn hmaitawn thu suhnak!!

Hruaitu : Na hmin le insang, family background in sim theih peimaw?

Khum : Steven Rualthankhum ka siih, kawhduatnakin khumte tiah in ko
t.heu. Kum 32 ka hmang lai. Ka pa cu Pu Khuanglianthang a siih, ka nu
cu Pi Mangtlem a si. Unau suahpi panga kan um. Insang ka nei zo ih,
fanu pakhat le fapa pakhat ka nei. Ka nupi hmin cu Susan a si ih, ka
fanu cu Sophia Lilymawi ( Mawimawi), kum 5 mi a siih, a nauhak sawn
cu Syrus Dinsang a siih thla riat mi lawng a si lai. Tu hi Australia
ah kan um.

Hruaitu : U Khumte ti#25255; kan lo ko poh peicu…., Vanzam na mawng
ti#25255; na thuhla kan rak thei ih, na zir suahzomi le na hnat.uan
theih kan duh zet ?

Khum : Kumruk lenglo Aviation traning leh Pilot ( vanzam mawng ) hna
ka rak t.uan. Tu fang hi Master of Business Administration ( Aviation
Mgt ) ka zirbet rero laifang a si.

H : Na fale cu Australia ah an piang vasikhaw! Lai t.awng teh an
thiam maw?

Khum : An tlawngkainak le suahvah tinten mirang t.awng hman a si
ruangah, Mirang cu an nal deuh, asinan nu le pa in Lai t.awng lawngte
in kan bai ih an thiam ve tuk ko.

H : Beisei banlopi in Malaysia ah kan lo tawng ih, na ra tlawng men
mawsi?
Khum : Si, Yangon lam ih ka nule pa siseh, cun ka u Sapte le unau
dang pawl thawn Malaysia ah kan cahawkhawm a si.

H : LCF teh ziangtin na hmu?
Khum : Nan thawmvang ka rak thei phahphah ih, tucu ka mit rori in ka
lo hmuh tikah nan picang ka ti nasa. Laimi khal nan tam ih, thil
tampi tuah theimi khal nan nei, lungrualten t.anla sinsin uh.
H : Kawhhran vek kan vawnsi tikah, milai pakhat ih hruaiawk hi
ziangtin na hmu?

Khum : Milai pakhat ih hruaiawknak cun t.umsuk lam a pan t.heu ih, pa
ruk sarih ih hruaiawk nak cun t.hanso lam a pan t.heu in ka hmu.
Pakhat hnak cun a tam cu a hnget khauh sawn. Uk khee khal pakhat hnak
cun tampi remkhawm a rinum sawn.

H : Kan Hruaitu thuthangca teh ziangtin na hmu.

Khum : Kuli hlawh dingih ramdang rawng kan si vekin, mai?hnat.uan
phah cing ih hivek thuthangca nan suah thei hi cu picang ka ti zet.
Kan miphun le calai hrangah theih tawp rawn suah khawm vivo uh.

H : CD na suah ding ti thu kan rak theiih, thungai mawsi?

Khum : Hlasak hi ka paihzet. Vanram ah Pathian t.hangt.hat tu pwl cun
sinak sangbik an co. Kan dungah Australiah ih International khawmnak
ah hlasak in sawmve ih, kan Laihla, ?Lungthlitum?timi ka sak.
Pathian zangfahnak in ka fanu Mawimawi thawn kawl hla in Pathian
t.hangt.hatnak hla kan than rero lai. Hmai thla lam cun kan t.heh ko
ding. Cun, #25559;awi Christian Media?timi tla ka awng ih,cunah
leitlun ih Pathian mihman pwl sermon pawl hrilkhawm ngai theih
ringring a si.

H : Hnamdang t.awng ih Pathian t.hangt.hat hi ziangtin na hmu ?

Khum : Kan unau Karen pawl khi vawn zoht.him sehla kawl web tumpipi
le kawl t .awng hmang rori group/pawlkom tum pipi ah, hruaitu an si
vivo ih hna khal tam sawn an t.uan thei. Cumi tiang tal cu sithei
dingin Laimi khal hin zuam tlang ciau sehla a t.ha zet. Curuangah
hnamdang t.awng ih Pathian t.hangt.hat timi khal hi Laimi hin kan
zuam ding rori a si ko. Hla suah thei tu kan Laimi lak ah kan um a si
cun, ka thei tawk ih ramt.ang ka zuam ringring.

H : LCF t.hansonak dingah forhfial duhmi tla na nei maw?

Khum : Neituk ee. Secular le Bible siseh, ziang zirnak khal hin
Pathian thil tuahmi le Pathian ropitnak lawnglawng zir a si.
Curuangah, LCF t.hansonak ding cun kan zirthiamnak le fimnak men hi a
tawk lo, Pathian mihman, Pathian ih hman thei mi kan si a thupibik in
ka hmu.

H : Netabikah, Laimi kan hmin a dangdang ten kan ngan hi t.ha na ti
maw?

Khum : Unevarsal level in kan zoh a siahcun kan hmin a dangdang te ih
nganmi hnak in a kawm ih ngan t.ha deuh in ka hmu. Rual Than Khum ka
siih, Mirang pawl cun Steven Khum ti lawngin in ko. Ka family hmin (
hmin netabik, Khum ) lawng an la ih Rual Than khi a hlo zo. Kemai
hmin rori a simi Rual Than khi a hloh ka sianlo ruangah a zaten kawm
in Rualthankhum tiin ka ngan ih, Steven Khum sinawnlo in Steven
Rualthankhum ka si.

H : Kan thusuhmi hmuahhmuah thinsauzet in inletmi parah tampi kan
lungawi.

Khum : Kei khal ka lungawi ve.

Na duh zet mi thawn nan thenawk tikah

Duhdawt mi tih cun kan nu kan pa, kan u le nau khal an si thei. Cun
Kan nupi kan pasal,kan fala, kan tlangval khal an si thei fawn la
la.Then tih khal hi Pathian Lai relin thlanmual infeh san khal then
tho tho. Nupa then aw khal bang rep. Hnatuan ruang ih hmun dang an
feh khal (transfer) le refugee ong ruang ih ram dang in fehsan khal
t.hen tho tho a si.
Ziangkhallole, na duh mi zet cun lo then tik ah ziangtin na um ding?
Na tuar dan ding cu nangmah le nangmah hman na thei lo ding. Kan
duhzet in in then cun a mal le a tam cu na tuar ko ding. Asinan in
then ta dan thu ah thumaw in a tuar dan cu kan tawng ko ding.
Kan duh dawt zet mi in, in thih san cun kan lung a sia, kan tap, thin
na zet in in tan. Asinan khua a hung rei cun, kan hnen ah an ra kir
thei nawn lo ti kan theih ih kan tuar nak hmuahhmuah cu a nep thei.
Cuvekin kan duh dawt le in hmundang ramdang ih infehsan tikah kan
ngaizet kan um a har cuahco. Hmansehla ni khatkhat ah cun tawngaw leh
sal ding ti ruahnak in inhnem thei sal.
Kan duhdawtbik mi kan nupi pasal in, kan duhzet laiah in then thutthi
hai sehla, nangcun na duh zet ko fawn a tuar a har pam ding. Na duh
zetmi, mi hrang a cang ding na ruat tik le na thin a na sinsin ding.
Cu lawngte cu na damsungah hngilh har na ti ko ding. Na mang ih na
man can pheicu na zing tho na rum cuahco ding.
Rualtha ziangruang khal ah siseh, na duhmi zovek khalin siseh a lo
then tikah nangmah na sualnak hmu aw hram awla, Pathian in ka parah
hnatuan a duh ti in ruat thiam hramaw. Hi Leilungtlun kan umlai
ahhin, Pathian in ziangvek khal kan tuar a siang tihi na theih fiang
ka duh. Malaysia na umlai ah hin kua lamah siseh na parah thilna
duhlomi a thleng tikah na thin tihar duhhlah. Na nolai na that lai ah
hin nangmah a losersiamtu Pathian thei ringring awla, a mah in na lam
a lo hruai ding. Pathian kan ziangtinkim a si fawn si!!
Peter L.H.L
Khaw rua

Ramdang thuthang

India Cinema hall ah bomb puak

India cinima hall pahnih ah bomb a puak ih milai 20 in hliam an tuar.
Hi Cinima hall hi Karol Bagh ,West Delhi ih um a siih, minute 15 dan
ah an puak tlang a si. Hi bomb puak ruangah hin India ih zohnuam hmun
hrekkhat cu khar a siih, hall dangdang khal ah security nasa sawn ih
tuah a si.

Lamzinpi ah Vanzam t.um

Russia vanzam pakhat cu kan dung tlawngkai ninga niah accident in
Vietnam Highway ah a tum.Russia vanzam tuahmi AN2 cu a engine a sang
tuk ruangah Vietnam ih Ninthuan provone, Bac Ai district pakhat ih
Highway rori ah a t.um.

Tuluk nunau taklawng

Tuluk ram ah nunau taklawng in sumdawng an tamtuk ruangah cozahpi in
a dawn kham. Ahleice in University fala pawl cun tak lawng rori in an
tlangleng ih, thla an zuk, a phunphun in paisa an hawl. Hi taklawng
ih um hin milai zahumnak a hloter tiih cozahpi cun a kham hai.

Indonesia Miss Universe ah

Indonesia hin an ram dan le culture khal ah, mai taksa mawinak lailai
lanter tahrat ih mawi zuam hi an duhlomi a si nan. cozah thar, khaw
tang kau deuh a rawn ding ih, Sari Devi ( a sirzuk ) hin Bangkok
khawpi ah Miss Universe laksawng a zuam ve ding. A mah hin 2005

Indonesia Miss a si.

Leitlun level ih an veikhat tel nak ding a siih, an uar zet…ziang a
bang lai ding kan thlir ke cu. May 31 ni ah khin Bankok khawpi ah
leitlun fala mawi, Miss Universe hrilnak an nei ding. Leitlun ram
ramsawn ihsin fala mawi pawl cu an thlengkim thluh thlang. Zo si
laksawng ngah ding. Palestinian hruaitu in Bush tawng
Kan dung zarha ah Palestinian ram hruaitu bik Abbas cun an ram
sumdawnnak lam le political lam ih bawm beiseiin US president Bush a
tawng. Bush khal in Abbas hi daihnak le democracy duhtu ngaingai a si
ih pawm in a dilnak hi a rak cohlan sak a si.

Annan Sudan ah tlawng

UN Secretary Kofi Annan cun kan dung tlawngkai ninga niah dahnak le
remnak tuah dingin Sudan ramsung a lut. Annan hin Sudan ah hin dainak
le remnak khal a relpi thei beisei a si.

Pakistan bomb puak ah milai 20 thi

Pakistan ah Shite Musilim pawl cun biaknak lam puai tumzet an nei.
Cui puai ah cun bomb a puak ih milai 20 rori an thi. Hi thihcilh bomb
puak ah hin milai 150 hrawng in hliam nazet an tuar bet. A kiangkap
ih hmutu pawl cun hi bomb puak ih thi pawl hi,an taksa hman a darh
theh, zawi lu le ke ha ti khal theih theih a silo an ti. Hi thihnak
rapthlak thlennak hmun hi Pakistan Prime Minister unmak inn ihsin
peng khat lawng ih hla ah a si. Hi bomb puah tu pawl hi rinhlehmi cu
an nei nan kaih ngah an si hrihlo.

Australia fala Indonesia ah thawng tla

Kan dung May 27 niah, Australia fala Schepelle Corby, kum 27 nute cu
cozah theihpinak tello ih sum dawng tiih kaih a siih, kum 20 thawng
tla dingin Indonesia court cun a thuhla an rel cat a si.Court ih an
feh ni ah cun Indonesia ih Australia um pawl khal in an pankhawm ih,
Australia Prime Minister John Howard khal in ?Corby hi a sual ruang
ah maw suallopi sual ih puh ruangah so thawng an thlak??tiah a thin
nuamlo thu a phuang ve.

Mobile phone le thluak cancer

Tu baite ah Swedish mifim pawl cun khawpi le thingtlang ih mobile
hmangtu pawl in hriselnak fiang ten an zir ih an thil hmusuah ,
British Journal pakhat, Occapational and Enviromental Medicine ih an
thusuah dan cun khawpi leng ih um mobile hmang tu pawl hrang ah
thluak cancer ngah a awl sawn thu an sim. Ziangah tile, station thawn
naiaw lo ih an um ruang ah electromagnitic radiation signal a cak
sawn ih cu cun thluak cancer nak a suahpi ti a si.
Hi research team hruaitu professor Lennart Hardell, University
Hospital,Orebro, Sweden ih tuan laiin a thusim dan ah cun ,tumour hi
Mobile phone kum 10 tiang hman hnu ah lawng hmuhsuah theih a sih thu
a sim. Minung harhdam tha1470 le thluak cancer ngah 1429 pawl
harhdamnak an zoh nakah kum 3 sung an hman ah, khawpi ih um hnak in
tlangram ih um pawl hi a hrek thum in an ngah awl sawn thu an hmu
suak.
Britiain le French le Sweden ram ih scientish dang pawl cun mobile
hmang hin hriselnak ah a that loh thu evidence an um loh thu an sim
ve. 2002 Finland mithiam hrekkhat in minung cell hmang in thluak a
khawih an sim thlang. Cumi rak rel tu mithiam khal an um tho.Ziang
khal siseh, kan thei ding mi cu hrekkhat in hriselnak lam thu pi zet
ih an ret lai ah,hrekkhat cun business lam an ret thupi sawn.
Tahthimnak ah Cold drinks khal hi indingmi hrisel tuk ih sim a si lo.
Sihmanselah midang pawl cun an sipuai-yi a siat thei ruang ah an rak
el ve theu a si. Curuangah tu ih Swedish Scientish pawl ih thul
hmuhsuah hi tha te ih kan theithiam a tha sawn ding. Mithiam pawl cun
earphone hman a safe sawn thu an sim i , hi hi thlun a tha.

Comments

comments

Comments

%d bloggers like this: