Hruaitu Issue 68

Hruaitu Zarhtin thuthang

Vol. 68

10 April

Editorial

Mirang tawng thiam hi fimnak a si maw?

          Ziang tin kan ruat ding. Mi rang hi leitlun ah an sunglawi
ih kan uar zet. An tawng khal thiam kan duh. Ziang ah ti le leitlun
ah hin an tawng hin khual a tlawn theih ih thiam lo ram khal an um lo
ding. An tawng lawng si loin an tangka khal hi a sunglawi bik. Cu
ruang ah mi rang pawl hi an tawng le an mah kan ngai sang a si.

            Tawng hi a thu pi zet. Zirnak lam ah Ph.D ngah ding cun
lei tlun tawng panga hrawng thiam a tul teng teng. Cu mi ah cun
Mirang tawng hi a tel lo thei lo. Mi rang tawng hi thiam ding in kan
zuam thluh. Mi rethei khal siseh mi rang tawng a thiam cun kan ruat
dan a dang. Asihle mi rang tawng hi kan ngaisang ih an tawng thiam hi
fimnak a si maw? Mirang tawng thiam hmuah2 hi an fim maw? Mirang
hmuah2 hi an fim kem? Mi rang si ve lo cu an fim lo tih nak maw si
ding?

               Leitlun ih fim thiamnak lam ah cun Japan le tuluk pawl
hi an si ve. Hlan lai ihsin mifim an rak si thlang. An za ten mirang
tawng an thiam na zum maw? Thiam cu um hman selah thiam lo tampi an
um. Fimnak lam ah cun mirang tawng thiam lawng hi kan sim ding maw
si? Si lo ve. Fimnak cu mirang tawng ah a si lo. Mah minung ah a si
sawn. Mifim cun mirang tawng khal a thiam  sawn a si. Mi rang tawng
thiam hmuah2 hi fim ding ah kan ruat theu.

        Mirang tawng thiam mi hi zuri le hlo hlak pawl tam pi an um.
Fim ding ah kan ruat a sih ah cun mi fim cun zuri ring2 in a um ding
mawsi? Mi rang tawng thiam lo hi fim lem loah kan ruat a sih le mifim
um tha duh lo le zuri ring2 cu mirang tawng thiam lo hnak in a aa
sawn a sih-ding cu!!..

             J>E

Calai hi kan ke a si

                                                          By- Richard
Ela

          Tumkhat cu Imbi lam rualpi inn ah ka va leng ih, an cabuai
parah cabute pakhat ka hmu.  Ka vawn zoh ih a kawm ah cun ¡°
Hruaitu¡± tiah a rak nganaw ka hmu. Cuveten ka vawn kau lohli ih kan
Lai tawng te ih nganmi ca ka vawn hmu dukdi cu nelrawn ram ih ti hna
sar suak vek rori ka si.  Ka lungawi tuk ah to khal to manlo cun ka
vawn siar zutzo.

            Ka lennak rualpi le Laitawng thiam fumfe lo pa a si
fawn.  Ziangtin hi Lai tawng rori ih nganmi cabu te hi, kan unau tei
hnen lam lam a thlen tiah ka mang a bang.  Cui cabu te cu khuaruah
har le mangbang nawn ih ka siar rero lai ah, cahmai panganak ih ka
siarngahmi cun ka lung a thar ter rori.

            Cahmai panga nak ih ka siar ngah mi cu, ¡° Cabute cun,
kei cu milai pawl ih an len ngamlonak le an feh hreh nak hmuah hmuah
khal hriallo in khawlak ka leng vivo ih, kan Lai tawng te hi ka aupi
rero.  A hrek cun ziang na bang tin in lei ih, a hrek cun kan unau
pawl an thuhla ziang a bang tin in lei ih, a hrek cun ka  thu phurhmi
pawl theih duh ah in lei ih, a hrek cun in zuarsuak tu pawl hmaisawng
in in lei ih,  a hrek cun Leitlun pumpuluk ih khawlak leng vohvo thei
pa ka si ti theiin in lei¡±, a ti.

            Ka vawn siar zawm vivo ih, cahmai paruk nak ah cun a
thinnatnak thu pawl ka vawn siar ngah la la.  ¡°  Cabute cun, zarhtin
te, tawng le calai a cuh aw rero mi miphun pawl lakah hin khawtleu
hmuh ve ring ring ka duh nan, in duhsak tu hmuah hmuah pawl hin ka
suah theinak ding ih tawlrel dan lawng te an thiamlo tuk hi ka ning a
na.  Tangkhawm vialvo ih siatnak thatnak simaw loin, hnam dang phun
dang le peng dang hnen ah ka tlamtlinlo nak thu hlei hlei an va
phuang ciammam ih, an hrang ih ka pal tlangmi hling le tur pawl hmuah
hmuah tla ziangah an rello.  Kei cun kan miphun lak ih itthat rero
pawl pahnih khat tal thang beisei in le miphun thang harh hmaisa pawl
ka dawt tuk ruangah ka lennak khua hman karh ter sin sin ka tum lai
ah, hrekkhat cun ka thu phurhmi le ka lamzin fehdan men ah an rak
buai ciamco. Herod ih naute suakpek a rawt that vek ih rawt that
tumin ka luh suahnak sangka tiang hren hnan rero ka tuar.
Ziangkhallolen leitlun cemtiang au vivo keng¡±, tiah  cabute
cun a thinnat thu a rak au rero.

            Cahmai pasarihnak ka vawn keu bet law law cu, ¡° Cabute
cun ninghang zet in kawhhran paisa hawlnak men ih hnatuan ka silo
nan, kemah ruangah khawm hman nuam tilo an um ti ka theih in ka thin
na tuk tiah a tap.  Paisa RM 2 ih in leitu pawl hrang lawng ih nganmi
ka silo, mi farah le milian, mifim le mi aa, ziang vek mi hrang khal
ah in siar duh cun ka awng aw cia ring ring.  Paisa tampi kemah
ruangih kawhhran in a neih hnak cun kawhhran mipi in theihnak tampi
an neih ih raltha zet ih an kum 70 leitlun anhman thei nakding cu ka
duhbik mi asi ko e¡±, tih tiang ka vawn siar ih; Hruaitu leinak
neihloh ruang ih Malaysia LCF Biakinn luh nuam ka tilo nak thinlung
hmuah hmuah ka rak palh riai ho maw!  Hi cabute hin ka hrangah phut
neilo rori in simaw i rak welcome theu ti cu ka vawn theifiang rori.

            Duhdawtmi u le nau pawl kan tawng, calai le hla pawl hi
kan phun le hnam, kan pengpi humhalhnak le thansonak hrang kan ke
tthabik an si ti hi a thar in vawn mang sal uh si.  Calai a caklo nak
ah miphun an hloral deuh deuh ih, calai a cahnak ah mipi khal an fim
deuh deuh.  Kan lei le ka sung rori ih a suak tambikmi, kan mit rori
ih a siar tambik mi hi kan Laica si thei sehla cu, Lairamah  tlang
tawng (Common Languages) thuhla ih thinnat le buai rero khal a tullo
ding.  Calai hi kan ke a si.

                          Sok hlei par

                                                      Joseph Zung
Thang

        Leitlun thuthang hawltu pawlin tlang par ih sokhleipar hi
hmun tampi ah a um lo an ti. A umnak hmun cu Israel ram, Austrilia
ram, le kawl ram lawng ah a um an ti. Kawl ram hman ah Kachin state
le Chin state lawng ah a um.

        Sokhleipar hi pangpar hmuah hmuah lak ihsin a mawi bik cu a
si lo nan a sunglawi zet mi pangpar phun khat a si.Mi zo khal in
sokhleipar kan hmuh tik ah senhluai hlo ih a um kha zoh loin kan um
thei lo.

       Pangpar dang cu a zoh lawng ka zoh. Sokhleipar cu a kung ah
tang loin cem theh in ka lak theu a si.A mawi tuk tih thei ah zo khal
in kan ei pangpar lakah ei theih mi par cu sokhleipar lawng hi a si.
A va sung lawi ve.

      Cu bang tuk in milai khal mifim zet  kan ti nan zohman ih hman
thei lo,ral tha, micak zet nan zo hman ih hman theih loh,milian zet a
si nan zo hman bawm lo,ca thiam zet zo hman ih hman loh mi cu a par
mawi zet nan ei thei loh par vek a bang.

      Mihring ih tlawmngaih zet le duh dawt nak thawn,a fim nak a cah
nak a thiamnak,le a lennak hmang tu pawl cu misunglawi tak an si.

      Sokhleipar bangin mi hmuah2 ih ei thei mi le mi hrang ih
thiltha tuahtu pawl cu an sansung ah thlawhsuah an ngah sin2 ding.

Hmel hlim ih um dah lo mi cun Dawr awng hlah seh.

Chinese proverb

Thomas Thuam thawn hmaitawn thu suhnak malte

Hruaitu :  Hruaitu thuthangca in thu mallai lo suh kan duh ih can in
pek thei pei maw?

Answer : A ngah ko ziangha? Tihnung tuk cu a si em lo keicu.

Q  :  Na hmin hmai ih mirang hmin hi ziang tik ihsin so na hman ih
ziangruangah so na hman?  Kan nih naule pawl hrangah te hmang ve zel
dingin in fawrh maw?

Ans : Ka rualpi pawl in Thuama tin in ko ih ka Boss tei pawl in ko
thiam lem lo tikah Thomas tin in ko ih cutin Thomas ka si der mai ko.
Ka uar bik mi cu ka phunhra on nak ih ka rak hman mi hmin Salai ti mi
a si.

Q  :  Malaysia ah kum ziangzat ciah ha na um zo ih, khua lam ah
kirsal teh na tum nai maw?

Ans:    Tuikum August thla in kum kua a kim curco thlang ding. Ka nu
le pa in in dam pi sung ahcun kir thei cu ka duh ih a tum khal ka tum.

Q  :  Malaysia ah kum cuzat na rak umzo ih, na thlen hnu ih na
hnatuan suahnak ah ziang ha relnuam na tibikmi le miphun hrang ah teh
ziang tik tiang so hnatuan na tumtah?

Ans: Kan miphun thanso nak ih a thupi zet ih ka ruah mi kan LCF a cah
sinsin theinak ding ahcun a sun a zan in ka rel paih/nuam ih, ka ti
thei tawk ah nasa zet ih tuan suah ka beisei.

Q  :  Malaysia ih LCF hi ziangtin nan rak din thawk ih, ziangvek
tiang thlenpi ha in tum?  LCF ah President na tuan thawknak tla theih
kan duh zet?

Ans : 2002 December 24 ( X-mas tan zan) zan ah MFP ( Malaysia Falam
Pawlkom) ti mi hmin kha LCF tin kan thleng mi a si.

MFP hmin in kan upa tei pawl in kan miphun nasa zet in in rak-

zoh. Tui ni ih LCF cu MFP ih zang sawng tu kan si. Aw! sim cengmang
sau deuh in ka sim duh. LCF din a si hlan ahhin MFP in khua a ruah
rero tik ah Malaysia ah in zoh tu ding Pastor kan tul tuk tik ah
Pastor ko ding in khua ruah a si. Pastor kawhnak ding hrang ih kan
lung rual zia le kan rak cangvaih nak pawl hi tui ni ah hmundang
ramdang thleng hman sehla kan hngilh awk dah ding ka zum lo. USA lam
a thleng tu khal an um zo. Aw, kha lai can te kha kan miphun hrangih
Foundation pakhat cu a si ko lo maw!! LCF a thawk ihsin ka tling lo
zet nan Pathian in hotu dingah in rak hril ih tui ni tiang.

Q  :  Malaysia LCF thanso khamtu bik ih na ruahmi theih kan duh ih,
kan thanso nakding lamzin thabik na timi khal theih kan hiar zet?

Ans : Kan mah tawk ten kan thangso cak tuk ko in ka thei. Thimnak ah
(1) Lai numawi

                  (2) CARC ( Chin Agape Refugee Centre ) hi pawl kan
zoh a si ahcun LCF hnatuan nak le LCF ih kan din hmun a si tin ka
thei. Thlarau lam ahcun kan cak tuk lem lo. Himi lam ahcun Pathian
hnatuan kawhhran upa le saya pawl kut ah a um.

            Fellowship kan si vek in Fellowship thinlung kan put a si
ahcun kan thangso vivo ko ding. Cun Thlacam lam hi kan teimak vivo ih
Pathian hnen ah  thu kan rawn vvivo a thupi bik.

Q…Lai tawng hmang biakinn sungih kawlhla le hnamdang hla pawl hmang
ih hlasak pawl hi ziangtin na ruat?

Ans.. Pathian maw minung ha kan biak timi kan theih fiang ahcun buai
ding a um lem lo. Mai Laitawng fualfo cu a ngai nat um deuh ko nan ,
a minung ih zir a si ko ka ti.

Q  :  Kan dung baite ah nupi mawizet tla na hrilzo ih, innsangdin
teh ziang a bang na ti ?  A har na ti bikmi le a nuam na ti bikmi in
sim thei peimaw?

Ans.. Inn sungsang din cu a tul mi le Pathian thlawsuah a si tin ka
pawm. A har bik mi cu ka nupi duhdawt mi nunnuam in ka ret thei lo mi
a si. A nuam ka ti mi cu A tam tuk ha..ha .ha.

Hruaitu :  Kan thusuhmi pawl in let thluh ih tampi kan lungawi.

Bus cangsual ah milai 23 thi

     Ni thum niah Vanezuela ram Caracas hmun ah passenger phur bus
pakhat cu a cang sual ruang ah minung 23 an thi ih mi 15 hrawng in
hriam an ngah. Hi accident hi highway ih a tlan lai a siih a feh cak
tuk ruang ah le zu rui cing ih an mawn ruang ah a si ding tih police
pawl cun an sim.

Nias Island ah linghnin a um sal

Mi 1,000 leng lo  thi

       Dec 26 ah Asian lam  siatnak in thlen zoih cui hnu rei lo teah
a rak thawk salhi, leitlun ih um ve hrim2 ding maw Pathian
cangvaihnak ti hi ruat ding a um. Nikhat niah Nias ih linghnin cun
Indonesia mi 1,000 leng lo nunnak a la leh. Nias Island hi Indian
Ocean kiang Sumatra dung lam ih um a si. Nias hi thla 3 feh ta ih
siatnak ah tuar nasa pawl an si ding.Hi linghnin hi south Acech ihsin
miter 2/3 tiang a si. In sang, airport, le biakawknak
(telecomunication) khal a ti se thluh. A kiang kap ih um ram khal in
hi tuar nak hi an rak tuar ve.

Asian meeting ah Kawlram in Chair-tuanvo a….?

          Kan hmaikum ih Asia niphun 10 regular meeting tuahnak ah
Kawlram in Chairman tuan ding ih relfel cia a sinan, NLD hruaitu pawl
an suahduhlo le thuneihnak an pek duhlo ruangah Malaysia le a
kiangkap ram pawl cun Kawlram cu Chairman tuan tlak ah an hmu lo.

            UN khal in tuitum ah Kawl cozah hin Pi Suu Kyi an suah
duh cuanglo a siahcun hi tianvo hi kai tlaklo an si tiah a hmu.
Philippine ramah  a vei 112th nak leitlun ram 145 aiawh in dantuahtu
mi 1,300 in Inter-Parliamentary meeting an neih hlan ah, Asian MPs
cun thu rel khawmnak an nei sal ding ih,cunah  ahleicein Kawlram
thuhla khal hi rel a i ding.

Siti Nurhaliza London ah Concert a tuah

          Malaysia hlasak thiam hmin thang, Malaysia Celine Dion tiih
an kawh theumi, Siti Nurhaliza, 26, cun April 1 niah London khawpi ih
royal Albert Hall ah sunglawizet in concert a tuah a si.    Concert a
tuahlai zuk rori tumpi in Hall luhnak ah taar a siih, fund khal a
ngah thazet.  Ukrin ram, Japan ram, Netherland ram, Frence ram le
Indonesia ram pawl ihsin sunlawihpitu tampi London ah an zamlut ve
ih, Malaysia ihsin thahnem tawk,a nu le pa unau pawl tiangin an feh
thluh.  Siti hin, London ih a um sung ahhin mirang hla rori in albam
tuah suak thei a beisei ih, tuitum ih a concert nakding hi
International level ih in cawisang tu ding a si tiah a lungawi thu
Interview tu pawl a sim.  Tui kum neta lam ah Siti hin Pereth,
Australia ram ah concert a tuah sal ding ih, Malay-lam le pipu hla
pawl tla sak a tum thu a phuang cia.

Foreign-mi Malaysia ih hnatuan pawl hrang special meeting

          Malaysia ih ramdang mi hnatuan pawl thuhla thawn pehparaw
in kan hmai tlawngkai nikhat niah Cabinets pawl in special meeting an
nei ding.  Hi meeting hi kan dung zarh ih neih dingin phuan zo a
sinan, Home Affairs Minister Datuk Azmi Khalid ih nupi thihnak
ruangah hmai zarh ih thawn a si.

            Hi meeting hi Deputy Prime Minister Datuk Tun Razak in a
hruai ding ih, Malysia company phun phun ih dilnak vekin rmdangmi
tampi hnatuantu an tul thuhla, cun an ramih degree ngahzo hna tuan
neilo le hna tuan zuam lemlo pawl khal sawr dan pawl an ngaihtuah
ding.  Malaysia ih ramdangmi pawl hrang ziang thu tal thathnemnak an
relsuak peimaw?

Miss Malaysia Universe

          Malaysia fala mawibik lasawng cu Sabah fala Angela Gan,23,
nute (a sir zuk ) hin a ngah ta riai.  RM 35,000 lai a ngah ih
hleiah, kan hmai May 31 ih tuah ding Miss Universe 2005 ah Bangkok
khawpi ih tuah ding ah Malaysia ram aiawh in a tel ding a si.
Lungawi mit thli lakih hlim hmel hi…zoh ve hman!

Refurgee Camp khar dingin Malaysia cozah in dil!

          UNHCR pawl hohanak hnuai ih um, Sabah ih Refugee camp cu a
zamrang theitawp ih khar dingin Malaysia thuneitu pawl cun an ding.
Hi camp hi 1970 kum ihsin rak ding thawk a sizo ih, tui ni tiang
Refugee 62,206 rori an um tiah Home Affair Ministry in an report.
Sabah ih mipum 20% rori an si.  Sabah ahhin camp 6  a um ih, an
nundan a hmanlo ruangh ah an tam fawn ih, thawiaw le sualnak phun
phun tuah in khua an sak ruangah hmundang ih thawnsak an tum a si.
Culawngsilo in tawphnawk tukih mipi umkhawm nafam cu natnak hri phun
phun a leng ciamco ih, hmun engthawl deuh ih thiarawk an tul hrim
hrim a si.

Indonesia Linghnnin ih thizat 2,000 kim thei men

          Kan dung December 26 ih Indonesia mipi thawng tampi an thih
hnu, kan dung tlawngkai nikhat niih linghnin cun Indonesia milai
1,000 lenglo nunak a hlohpi lala.  A rapthak tu ee!!  Vice President
Jusuf Kalla cun ¡°building sia report thawn ka tuat tikah, tuitum mi
thi hi 2,000 leng kan kai ding¡±, tiah a phuang.

            Indonesia President Sosilo rori hman a mang a bang rori.
¡° Kan dung linghnin tum ih runtu pawl hman kut an khawlh manhlanah,
hitivek in siatnak kan twng lala hi cu mak ka ti tuk¡±, tiah phuang
phah in Inmergency comittee a ko hngal.  Tuitum ih a nuainak, hi
Sumatra Island ah hin milai 10,000 hrawng an um ih, mi ziangzat ciah
an thi ticu fiangten theih a theih hrihlo.  Mithi ruak hawl in an
buai rero lai a si. Thlacamnak thawn bwm ciau uh si.

Malaysia LCF in mithi kan nei

          Laitalng Thlanrawn khua, Pa Ni Uk, kum 36 mi cun kan dung
zarh ah in thihsan ih, March 31, 2005 ni ah KL ih kan Saya pawl in
ruak vuinak an va tuah.  Pu Cem Kulh ih fa Ni Uk hi Malaysia a
thlennak thla riat hrawng lawng a si ih, KL ihsin km. 500 lenglo a
hlatnak hmun Penang lamah kuli hlawh rero lai a si.

               KL Lai Christian Felloship aiawh in kan senior Pastor
Rev. Za Thelh Lo, Pastor David Hrang Tiam, LCF President Pa Thomas
Thuam le LCF upa Salai Ronald Thatin Mang pawl tla cun tlawmngai suah
in ruak vuinak an va hmanpi a si.  Pa Ni Uk in a tanta mi nupi fanau,
sungkhat unau hmuah hmuah hrang ah thla napin campi ciau uh si.

Theih ternak

           Kan dung Chin National Day lai ih angki kan zuarmi pawl
kha man pe lo ih rak hruk nan um hnuaihni a si hmang.  Tuanvo a latu
pawl an mangbang thlang, miphun hrang tuan rero ih bulpak pakhat ih
phurrit phurh ciamco hi thil mawi khal a silo.  Curuangah zangfahten
khami angki man rakpe hrihlo pawl khan Salai Bawi Hre hnenah a rang
thei bik ih rak pe ciau ding ah kan lo theih ter a si.

Hla dilnak

         Malaysia thleng kan Lai nonawn te Mai Sarah Mawi cun Lai hla
rori in albam thun a timtuah ih, a tul bikmi hla pawl in bawm ciau uh
si.  Hla pekding nei cun Salai LCF mino hruaitu pawl hnen ah pek ding
a si.

French an Muslim pawl in tlawng thar awng

          French cun kan dung deuh ihsin an ram in zirnak tlawng inn
sungah biaknak hran hran ih an hman theumi lukhuh, Kross awrh, le mai
biaknak thlun ih an tuah theumi ( simbol ) pawl tuah a dawn hnu ah,
Muslim pawl thinheng in an mai tlawng rori an awng tiah Islamic
thuthangca in a phuang.

            Muslim fala hrekkhat pawl cu an lukhuhnak thawn tlawng an
ra kai tik ah tlawng ihsin dawisuah tla an tawng, hrkkhat thinheg cun
lu ziat kawlh law law tla an um.  Cuve hniaihni tuar theilo in hiti
vek ih Muslim tlawng a ding phahnak a si.  Lukhuh nak thawn French
tlawng ihsin an dawisuahmi rori 806 an kim.

Kawngsang in AIDS le Cancer a ……?

          Australian sii thiam pawl cun an ram sung ih kawngsang pawl
khin AIDS zohkawlnak si hrampi le Cancer damnak sii bulpi lam ah
thathnemnak an neih thu kan dung tlawngkai nili niah an phuang.
Kawngsang, Kawlram ih malaria hrik in tuh thluhtu rori sii thabik ih
vawn cang ding cu zum a har nasa na tive lo maw?

Pope John Paul II thi

          Pope John Paul II cun kan dung tlawngkai ninga ni ah
Pathian hnen ah in cawlh san ih, Leitlun mipi tamsawn thinlung a hnin
ter in a lauter zet.  Tuitum hi Leitlun ram hruaitu President, Prime
Minister, le upa pawl tawnawk khawm tamnak bik asi.  Bush le Laura,
Clinton le Bush ih pa, cun Leitlun ram hruaitu tum hmuah hmuah pawl
in a hmun rori ah feh in Pope hi thlahnak an tuah……………….
Hmaizarh ah kan peh ding.

Saudi Prince ih nupi an kai..!!

          Kan dung tlawngkai ni hnih niah Saudi Prince ih nupi cu FBI
pawl in an kai.  Hi lal nuhin Indonesia nunau pahnih hnenum ah a rak
fial hrim ih, a thu an lunlo le na tuk tuk in a rak hrm theu.  Hans
Al Jader, 39, nu hi court ih khin a si ahcun kum 140 thawng thlak
theih a siih, US$ 2.5million ( RM 9.5mil ) rori kuan ter theih khal a
si.

Leitlun Building sangbik ding sak rero

          Burj Dubai Tower tiih kawhmi hi Leitlun ih building sangbik
si rori ding ih sakmi a si.  US$ 900 million cwm ding in sak thawk a
si zo.  Hi buildingpi hi 2008 lawng ah an theh ding.2,313ft. ( 705m )
hrawng ih sang a si ding ih dawt 160 rori a um ding.  Foundation hi
165ft ih thuk in an lai ih, 110,000 ton ih rit khal sak thei ding ih
tuat a si.  That 37 tiang hi Hotel a si ding ih, a sangnak bik cu
khua cuannak le private club pawl an si ding.

            Tu ih Leitlun innpi sangbik cuTaipei ih ah a um ih,
1,671feet in a sang.  That 101 a um.  A pahnihnak cu Malaysia ih Twen
Tower hi a siih that 88 nei in 1,483ft ih sang a si.  A pathiumnak cu
Chicago ih Sears Tower a siih, that 108 nei in 1,450ft ih sang a si.
A pali nak cu Shanghai ih Jin Mao Tower a siih, that 88 nei in
1,380ft ih sang a si.  A pang nak cu Hongkong ih two International
Finance Center a siih, 88 floor neiin 1,352ft ih sang a si.  Hi hmuah
hmuah pawl hleih ding rori ih tawlrelmi Dubai inn sangpi cu sak
luihlo rero lai a si.

Indonesia hi Leitlun ih Muslim tamnakbik le lungruhnak bik ram pakhat
a si.  Cumi ih an  President rori in mipi thawng tel tel ih an vawn
thih cun Biakinn sung lut in Kritian Pathian a upatnak a lanter ve
ko. ( a sir zuk ).. President Susio le a nupi Kristiani Herawati cun
kan dung tlawngkai nili niah Gunung Sitoli ih Santa Maria biakinn ah
linghnin tuar pawl hrang Pathian hnen ah zangfahdil in thla an cam a
si.

Gas leak ruangah Tuluk mipi 28 thi

          Kan dun tlawgkai nihnih niah Tuluk simlam ah Gas phur truck
cu speed full ih a tlan lai a tiyre a puak ih mawtaw dang a pah.
Mawtaw mawngtu pahnih cu an accident nak hmunah an thi hngal veve.
Hi truck hi gas a rak phur ih gas leak cun a kiangkap ih milai 28
rori a that. Cun hi gas ruangah hin 350 in siizung an thleng bet.
Hitawk hmun kiang ih um milai 10,000 rori khalin cun an inn an
tlansan a si.

Indonesia hi Leitlun ih Muslim tamnakbik le lungruhnak bik ram pakhat
a si.  Cumi ih an  President rori in mipi thawng tel tel ih an vawn
thih cun Biakinn sung lut in Kritian Pathian a upatnak a lanter ve
ko. ( a sir zuk ).. President Susio le a nupi Kristiani Herawati cun
kan dung tlawngkai nili niah Gunung Sitoli ih Santa Maria biakinn ah
linghnin tuar pawl hrang Pathian hnen ah zangfahdil in thla an cam a
si.

Gas leak ruangah Tuluk mipi 28 thi

          Kan dun tlawgkai nihnih niah Tuluk simlam ah Gas phur truck
cu speed full ih a tlan lai a tiyre a puak ih mawtaw dang a pah.
Mawtaw mawngtu pahnih cu an accident nak hmunah an thi hngal veve.
Hi truck hi gas a rak phur ih gas leak cun a kiangkap ih milai 28
rori a that. Cun hi gas ruangah hin 350 in siizung an thleng bet.
Hitawk hmun kiang ih um milai 10,000 rori khalin cun an inn an
tlansan a si.

President tuan nauhakbik na thei zo maw?

        Haiti President Jeqn-Claude Duvalier hi leitlun ih President
tuan nauhakbik ah phuan a si.   Duvalier hin 22 April, 1971 ni, kum
19 a kim ah,  a pa Duvalier cu a lalnak in a sawng thawk ih 1984
tiang Haiti President a tuan a si.  Duvalier hin ni 293 a kim ah
rampi President a tuan ih, tulai Leitlun ih President tuan nauhakbik
ih record a si.

UN ambassador nauhakbik teh zosi?

        Laura Sweeting June 1, 1984 ih suak cu,  2,000 kum ah UN
ambassador a tuan ih, Leitlun milai lak ih ambassador nauhakbik ih
phuan a si.  Ambassador a tuan thawk hin kum 16 mi lawng a si lai. Hi
tilaiah Leitlun ah tidai thiang neihloh ruangah milai 5,000 nitin an
thih lai a siih, hi tlawng nauhak nute hi nauhak pawl hnenah a hleice
ih thah a si.

* Pathian hnen ihsin thil ropi beisei awla, Pathian hrang ah thil
ropi  tih tum aw.         William Carry

@ Miin a fala/tlangval a duhdawt bik ih a nu leh pa, a duhdawt rei
bik.                           Ireland thifim

+ Coffee le duhdawtnak cu a sat lai ih in a tha bik.

                                               German thufim

Olive Cing  tambik ram

        Leilung tlun ih Olive hmuan tuah tambik le Olive ngahbik
ramcu Spain ram  a si.  Kumtin Olive 970,000tonnes ( 2.1billion lb ih
rit ) an ngah ring ring a si.  Catalonia le Andalusia region ah Olive
hi an cing tambik.  Spain le Italy kawm hin Leitlun pumpi ih Olives
54% cu an luah a si.

Queen lianbik

        Queen Elizabeth II, UK Lalnu hi leitlun Queen hmuah hmuah
lakih lianbik a si.  Hi lalnu hin kan dung kum 2004 tiang $
660million dollar a nei.  Kan dung kum lawng hmanah a sumsaw 60% rori
a karh ter bet.  Lalnu Elizabeth II hi milai nunglai lakah  Leitlun
Queen tuan reibik khal a si.  21 April, 1926 ah a piang ih,  6
Febuary, 1952 ah a pa King George VI a thih ihsin UK lal lukhuh hi a
rawn co thawk a si.  Kum 2002 kumah a lal kum 50th nak campha hman a
lawm a si.

Queen tuan reibik ( thizo )

        Great Britain lalnu Victoria,  1876 ih India Empress tiang
rak sifawn cu thuanthu ah lalnu rak tuan reibik a si.  Kum 63, ni
216, 1837 – 1901 tiang rori uknak a rak kai a si.

Lek Nak Lam

Champions League kan zoh leh

Quater-Final First Leg result

         Kan theih zo vekin leg hnih nak an theh hnuah lawng simi-
final an kai ding. Club tha pawlin an suah san ih a tha pawl lawng an
tang lai. A can hi zing lam 2:30 si hman selah hna tuan hlah lo in
kan zoh tho a sih hi.

Liverpool hrang ah lawmnak ropi

       Anfield ah a siih Liverpool cu Juventus khal siseh an tih lo.
Baros le Garcia hi an thupi zet. Steven Gerrard khal in thiam nawn in
a lekpi. Defender Hyphia le Luis Garcia in goal sunglawi an thun.
Juve Capt. Del Piero khal a cang tha thei lo. Tranzeguet khal a hmel
kan hmu tam lo.An neh lo lam a bang. Asinan, Liverpool hin Italy lam
an tlawn hun ah ziang an vung bang ding? An goal neih mi hi an suah
ter loah cun Semi an kaisan ding a si.

Milan pahnih lek kha

      Italy ah hin Milan tih pahnih an um. Inter le AC tih a si.
Ziang sawn hi maw tha ding? AC cun an mikhual hmaisa ih Inter hin
leitlun ih Defend nei tha Milan hi an pal lut ngah lo. ACMilan cun 2-
0 in an neh. Jaap Stam in a thun hnuah Shevchenko cun a thun bet.
Inter hi an lungkim zik lo. An mah ram ah an lek leh kei an rak ti ve
nek ding maw kan zoh kei cu?

Chelsea an puar thau

       Blue pawl hi an neh thei zet. Chelsea fan na sih ah cun
lawmnak tampi na nei ding. Ziang ah maw? 4-2 in Bayern Munich an neh
ruang ah. Coach Mourinho cu leknak sungah a lut thei lo. Hman selah a
nau le pawl hin an pu hi rak zoh thei lo hman selah

neh loh an duh lo. Chelsea ah hin English mi tam an um lo tih kan
thei. J.Cole hin 4` lawng ah goal a thun ruang ah a thiam a si loih a
thiam ruang ah a thun sawn a si. Lampard 60` 70` ah a double ih 81`
ah Drogba hin a thun bet. Bayern keeper Kahn hi leitlun goal kil
thiam si hman selah a celh lo a si. Goal hnih cu an thun ve. An lek
dan ah hin Chelsea hi an cang tha sawn. Hi vek a sih ah cun Chelsea
hi bayern hnak in Semi an kai hmel sawn a si. Hmanseh, hmai nithum
niah German ram ah an vung tlawng ve zik ih ziang tin an rak lek pi
ve ding tih cu sim theih a si loih a zoh ih zoh a tul a si. An
lungkim thei lo nasa.

England pasaltha ding ah Eriksson ih hril mi pawl

World Cup 2006 Germany ah Dam ten an lek thei kem?

An hmin teh na thei thluh maw?

Ferguson lalnak a cem maw?

    Scott pa hin England ram ah lalnak a rak co tih kan thei. Kum 15
tiang a rak um zoih tuah cun a can a cem zo mawsi le. A nau le pawl
hin neh lo an nei tam thlang. Kan dung ah tla an hmelma pawl in goal
tampi in an neh laiah an ni cun 0-0 in an lek leh la la. Aw.. MU fan
pawl  thin bang zet in na um ding maw? Lek lai ah neh hman selah goal
thun hi neh nak sawn a si.

Cisse rak kir thuai seh: Benitez

     France international striker Djibril Cisse cu season thawk lam
ah a ka ruh kuai ruang ah Liverpool a suah san ih manager cun season
theh lam ah cun a ra kir thei thlang ding tih thu nili niah a sim.

Pennant a suak zo

   Arsenal winger Pennant cu March 1 niih thil in cingin mawtaw a
mawn ruang ah thawng in ah thla thum sung tiang um ding in an ti a si
nan ni li niah an suah leh zo. Birmingham in kum khat sung an san mi
a si. A lek thei thlang ding. A mah hi England Under 21 star a si tih
na thei maw?

Mourinho a kuan

Champions League Barcelona thawn an lek lai ah Swiss ref. Frisk cu
half-time ah a complain ih UEFA cun 20,000(Swiss tangka)(US 16,750)
le Chelsea khal 75,000 (US 62,800) an kuan ter a si. A kuan men si
loin Bayern Munich thawn an lek voi hnih sung cu  Field a lut thei lo
ding. Sihmanselah ziang hman tih a nei lo a si.

Hnih hi sii tha bik

Na Hni fen kha

Khua pakhat ah `tamahyuayamah` sunglawi zet lai ah Falm myo in
(tamah) thiri pi an suah.Zan varin a man an rel ih kometi pawlin
zingpit ten tlang an au ter. Thil ri lei thlang uh law an ti. Pa cang
pakhat cu a vung pok ve ih dawr ah a vung thelng tik ah a tho pek ih
a lungzi fen mi cua nupi ih ta sawn a lak ngah a rualpi pawlin na hni
fen mi zoh aw.  Na nupi ta sawn a si an ti ihan hnih san ciam mam.
E..cu vek men nan hni.. kan nih kan thleng aw ring2 a sih si a ti.

                     Khualtlawng pahnih

           Khual tlawng pahnih an tawngaw. Pakhat sawn cun ¡°ka rual
khui tawk lam in na ra?a ti ih a ni cun ¡°dunglam in¡± a ti.A sut leh
ih ¡°tuteh khui lamah sawn na feh ding? ¡°ka hmai lam ah¡± a ti leh .
A sut la la. Tui zan lam khui ah na riah ding. Puan sung ah a ti. An
pahnih in na sa tak in hau aw. An rem awsal ih khual an tlang
vivo.Khua pakhat ah an

thleng.A rualpa sawn cun cuih khua ah theih thiam mi a neih ruang ah
ka rual khui tawk ah sawn kan riah ding tiin a sut. Mi tha pa
in ..nang cu puan sung ah na riak ding ih kei cu ka rual pa inah ka
riak ding a ti. A puan a pek ih nang cu khaw leng ah puan sung ah
riak aw tiin a puan a pek ih a tan ta. Cu pa cu a zan ah mikei in a
ei ih a hlo ral ral ta.

Joseph  Zung Thang

Damten Mangtha/ Sun tha

Comments

comments

Comments

%d bloggers like this: