Hruaitu Issue 51

Hruaitu Weekly news

Vol. 51

November 21,2004

Editorial

Bawi Jesu ka duhbik

    Leitlun ralpi II nak hnulam ah, milai pawl hin kan thlun bikmi mi
panga an um.Cupawlcu Jesu, Socrate, Buddah, Confucius le Muhammad
pawl tla an si.Hi hruai tu pawl lakahhin zoso na duh bik?

confucius cun, thih hnu thil umdan ding an suhnak ah, ” milai nun
hman kan thei thluh theilo ih, thih hnu thil umdan cu ziang tin kan
thei thei ding?, tiah a rak let hai. Leitlun mipi pawl in kaihruaitu,
hi hruaitu pang pawl lak ah hin, Bawi Jesu lawng lawng hi ” Kumkhua
nunnak ( eternal life ) in simfiang theitu lawng silo in, in pe thei
tu a si ruangah, kei cun ka duh bik”!!!

     Editor : :  Richard K. Emmanuel

     A suahtu Lai Christian Fellowship

Lai ramhrang

Ka hei cuan tawn  maw

Thinlung mit thlam in

sem nak Lairam

Tlangsang leh  parmawi

cerh ti thiangcung ih

thing lam tah thuanthu.

Hngilh hrim thiam  hlah lang      sandeng leidai khur  thlentiang.

Roin umlei Lai kumza.

Zuamsin uh   Tthangsin sehlaw      semnak lairam leh laimiphun

Tlangtin kanin vanrang  hnuaiah        cerlian ninu bang

E ve seh laimi phun           Suakthuan  nonawnkan san ah.

Ling mangin hnin  law   lainun mawi

Tluangdang  kan hman ah

Zaamseh  cungvan mei  bangin

                        Pa Nah Mang

Zo ka si?

By: Piangte

     Zo ka si ti fiangzet in theithei ding ahcun a tanglam ih thusut
nak pathum hi na sut aw ta a tul ih felfai ten na theihthiam khal a
tul.

Dam sungah ziangsi ka ngah duh bik mi a si? Ziangvek minung si ding
ka duh/tum? Zo ka si?

     Na dam sungih thupi zet mi thil na tuahtum tikah hi mi thu
pamthum sut nak hi suh aw loin um a theih lo. Himi pawl felfai ten na
sang thei ah cun, na zum nak, na tumtah mi le na um dan a thanso rero
lai ti nak a si. Hi mi pawl a zaten sang thiamtheh ding cu a awl lo.
Hi mi pawl sang theitheh ding ah cun, thil tulmi tam pi a um. Asinan,
na duh mi le na tumtak vek in thil tuah suak le pithlin ding na duh
ah cun, himi thusut nak pathum hi sang thei ding ah na zuam a tul.

Zo ka si, khui lam pan in ka feh ti na theih ding hi thu pi zet mi a
si. Himi thei theih nak ding ah a tanglam ih thusut nak pawl hi a
bawmtu an si.

     Ziangsi i nuam tirtu, i lungkim tirtu le ka nun a san a neitir
tu? (Himi na theih fiang lawngah, na duh nak a lo kimtirtu ding lawng
na hawl thiam dingih a tul lo mi kha na hlawn thiam ding.) Ka hrangah
nuncang tha timi ziang a si? Sakhua nak lam ah ziangsi ka pom/zum
dann?

     Ziangvek hna tuan si ka tumtah? (Tiduh san cu, tha a lo thotir
mi, na thiam/paih mi le na nun duh zawngih paisa a lo ngah tirmi hna
tuan na hawl a tha)

     Nu le pa si nak ah ziangsi ka pawm dann? (Zovek
minung/nupi/pasal thawn um na duh, nan um duh dann, nan tumtahmi pawl
a bangaw maw?)

Nu pi/ pasal nei ka tum maw? (Neitumah cun, ziangvek minung/ ziangtik
ah? Himi ih na sang dann hi, a dang na tumtahmi pawl thawn a kalhaw
maw?)

Nau nei ka duh maw? (Duh ah cun, pa ziat/ ziangtik ah? Na duhdann hi
a dang na tumtah mi pawl thawn a thlunawthei maw?)

     Khui ram/hmun ah um ka duh? (Ziang vek nikhau/ tlangram maw phai
rawn/ khawte, khawpi, unau le rualpi naih deuh nak/ ziangvek inn hnen
pawl etc..?)

     Ka man caanah ziang tuah si nuam ka ti? Ka si nak ziangvek in mi
hnenah ka lang tir duh? (Na si nak cu, na hnipuan hruk dann, na
thiltih/tuahmi le na mi biak dann, na thil zum/ruah dann, na thil
neih, na pumruang, na aw pawl hi a tlang pi cun an si. Himi pawl
lakah na caknak bikle na tlasamnak bik pawl theithiam in na rem thiam
a tul .)

Zovek pawl si pawl nuam ka ti ih/ zaingruang ah?

Ka nun dann le midang pawl nun dann thangso tir ka duh/tum maw? (Na
duh asi le, ziangti zawng in/ziang tin cu pawl cu na pithlinthei
ding?)

Sungkhat, rualpi, inhnen le vawikhat nak hmumi milai pawl thawn
ziangvek pawlkom awknak nei ka duh?

Thih nak timi ka hrang ah ziang a si?

Tuhnu kum 5, 10, 20 ah ziangvek si tuah ka tum?

     A mawitawk in zo ka si ti thei thiam ding ah cun, a zaten si
theilo hman ah a tam sawn hi sang theih an tul. Mi malte taktak lawng
in felfai zet le pom tlak in himi thusuh nak hi ansang thei. Himi
pawl a tamsawn na sang thei ah cun, na thanso nak ding ah tam pi a lo
bawm bak ah, na sang thei hrihlo mi pawl hrangah tla bawmtu an si
ding.

Thaten ruat fel in a tlun lam ta pawl na sang thei ahcun, zo ka si ti
a lo theihtirtu ah a lo bawmtu an si. Na damsungah ziang na ngahduh
timi le ziangtin cu mi ngahnak ding ah ka tuah ding timi in ziang/zo
na si ti a lo theihtir ding. A tlun ih thusutnak awl hi a awl zet an
bang nan, sang theitheh ngaingai ding an har zet. Ziangah tile a
hrekkhat cu thilcang rero le feh rero lai mi an si ruangah tla a si.
Curuangah thil thlengaw dingmi pawl hi, theicia ringring in ralring
ten um a tul. (Tahthim nak ah….na hnatuan nak , na um nak thleng
aw/thawn aw ti pawl.) Thil na duh, na zum, na tuah theu mi tla cu
cann a thlengawvek in an thlengaw thei. Cu pawl cu na cohlan thiam
ih, zo ka si ti a mawitawk ih na theihahcun thil thleng aw ding mi
pawl hrangah na ralring bakah na tumtah mi na pitlin theinak ding ah
lam a lo hruaitu an si ding.

     Zo ka si ti na thei aw loah cun, ziangmi tumtah nak hi ka
hrangah a thabik ti na theithei lo ding ih, na tumtah mi pawl cu
thulolak ah an cang ding. Zo ka si ti na thei aw ah cun na tumtah mi
lamzin ah a lo hruaitu a si ding ih na tumtah mi lo pithlin tirtu
ding ah le na damsung, san nei zet in a lo um tirthei ding.

     Zohthim mi cabu:

Kirt-Ashman, K. K. & Zastrow, C. (4th edition). “Understanding human
behavior and the

Social environment.” Nelson- Hall publishers/ Chicago.

  Guiness World Record a ngah thei pei maw?

    Tuluk putar (a sir zuk ) hi 2.38m  ih sang pa hin, Leitlun putar
sangbik le cakvakbik si a beisei ih, Guiness record nak tharbik ah a
tel ban men thei. Hi putar hi kum 53 a sithlang ih, Mongolia,
Autonomous region ih um a si.

************************************

Hmai zarh ih FootBall lek ding pawl

     Wed, Nov 24- 3.30am ( Monaco Vs Liverpool ), 6am ( Manchester
United Vs Olympique Lyonnais ).

     Thurs, Nov 25 – 1.20am ( CSKA MOSCO Vs FC Porto), 3.30amGermain
pawl an si.

Arafat kha Israel pawl ih thah a si maw?

          Kan dung zarh tlawngkai nili niih leitlun suahsan tu
Palestine President Yassar Arafat ih thih dan thu thawn peh paraw in,
Arab ram pawl hmuah hmuah cun Israel pawl in tur cikhat hmang in an
that a si tiah an rel cel cel.  Palestine Prime MinisterQuier ( a sir
zuk ) khal in French rampi cu Arafat ih thihnak thuthawn pehparaw in
cipciar deuh ih report pe ding ah le a siizung umnak capawl hmuah
hmuah Leitlun mipi hmuh ih publish  sak  thluh dingah a dil.  Asinan,
French cun, arafat ih sungkhat pawl hnen lawngah hi thil hi an pek
ding thu in an let.

            French Helth Minister Philippe Douste-Blazy cun arafat ih
thih na thu ah hin, tur ih hrai ( poisoned ) a sinak awm ziang hman
hmuh ding a umlo a ti.  Sharon hin Arafat thah a tum thu vei tampi a
rel suah zo ruangah Palestine hin Israel hi an hmu tleu a si.  Ziang
khallole, Palestine mipi thawng tampi an ttah rero laiah Israel mipi
pawl cun Pathian kutcak a lang tiah an lungawi ni a rak si ve.

England ah Kuak fawh an dawn

          Kan dung tlawngkai nihnih niah, Cozahpi rori in England ih
mipi suahkhawmnak hmuh hmuah hmuah, Restaurent, Pub le Bar pawl ah
kuak fawh an kham ding tu an suah.  Hi thu hi Parliment in an lungkim
a si ah cun, kum li sung stric nawn ih kham a si ding tiah harhdamnak
lam Secretary John Reid cun a phuang a si.

Tlangleng let ah milai 120

          Kan dung zarh tlawngkai nihnih ni zinglam ah Australia
saklam ih passenger phur tlangleng cu a cangsual ih a let.  Hi
tlangleng hin passengers 156 le  hna ttuantu 7 rori a phur ih, milai
pakhat hman an thi lo hi siibawi pawl an mangbang zet.  Asinan, 120
cun hliam an tuar a si.  Hi 120 pawl lakah hin 35 cu an bese nawn ih,
a dang cun hliam tenau men an tuar.

ndonesia ah linghnin

          Kan dung zarh tlawngkai ninga ni ah Indonesia ram, Java
saklam ih Alor tikulh bial ah ling a hnin ciamco ih milai 25 hrawng
an thi zo.  Hi linghnin hi tehnak Richter Scale 6.0 ih na a siih, tui
zarh tlawngkai nihnih niah linghnin tehnak 4.5 ih cakmi in a nuai sal.

            Alor tikulh bial sung ah hin mipum 169,000 hrawng an um
ih, hi linghnin hin 8,000 hrawng cu umnak inn neilo ah a tuah a si.
Mith zat hi siar rero lai a siih, khawte berhcep tuk ih um pawl tla
ziang tluk in an tuar ih ziang zat an thi ti zingzawi rero lai a si.

Mosul ah an kapaw

            Iraq ram khawpi pathumnak Mosul ah cun America ralkap
pawl le Muslim lung ruh pawl an kapaw ciamco.  Hi khawpi ah hin US
cun ralkap 5,000 hrawng a ret a si.  Tulai fangah cun,  Iraq rampi
sungah Fallujah le Mosul hi khua buai bik le meithal a puah tamnak
bik a si.

India in kashmir ih ralkap a kirtersal

          Kan dung tlawngkai nihnih niihsin, India cun  Pakistan
thawn an ramri kashmir ih a ralkap pawl cu a hruaikir thawk.  India
hin a ralkap pawl a kir ter hi, Pakistan thawn remawknak tuah a duh
sawn ruangah a si.

Christmas  Day Party ah Zuu inn sianglo

          Australia Bondi beach ih tuah dingmi Chrismas  day Party ah
cun zo hman zuu in sian a silo ding tiah ralriannak thu thancia a
si.  Kan dung kum ah, hitawk hmun ah hin mlai 40,000 lai in Chrisman
party  an tuah thei a si.  Security pawl tla an sang ih , hi party ah
hin zuu palang hrim hrim hmuh an duhlo.

AIDS test hmaisa, Licence ngah

          India ram ah mawttaw mawnnak Licence ngah duh pawl cun AIDS
hrik an neih le leihloh an test hnu lawngah peksuah an si thlang ding
tiah New Delhi Telivision cunkan dung tlawngkai nikhat niah a
phuang.   Hi thusuak hi, Idia ramah AIDS a karh deuh ih an hmuh
ruangah a si.

Colin Powell :  US State Secretary-cun a hna a suahsan

          George W. Bush-in a term hnih nak US presidency a vawn kaih
ngah ve ten, a a remlo zawng  hruaitu pawl hlawn ding thu a suah
hngal.  Cui hmin list lakah cun S1. Powell khal hi a tel.

            Powell cun pacang tak in kan dung zarh ah Secretary hna
ihsin a mah te a suak vuarvi.  President Bush khal in lungawi ten a
rak pawmpi ih, term khat sung rori a taimak nak parah a upat thu tla
a sim. Powell hin kan dung kum Febuary 5, ah Bush in Iraq do a tum
thu thawn pehparaw in, lung kimlo lam ah a rak ttang ih, Bush cu do
lo ding in a rak el.  Culawng sil in kan dung tuittum US President
hrilawk hlan teah, thla ruk sung rori Bush hnenah ramdang policy an
tuah dan a duhloh thu a rak thlen zo. Bush ih tumtah danah cun,
Powell hi tui hnu kum khat lawng ttuan ter ih, a aiah Rice hi thun a
tum.  Asinan, a tumtah nak cu, a tum hnak ih zam rang ih Powell hi a
hlawh tlin ter a si.  Powell hi Iran Neuclear thu hla, North Korea le
Pakistan thuhla pawl a tawlrel dan ah hin hmintthat nak tampi a nei
ih, US mipi tamsawn khal in an ui zet a si.  Powell ih rual ah hin
Cabinet member sungin mi pawimawh pathum,  Agriculral Secretary,
Education Secretary leh hruaitu lu pakhat cun
suahnak thu an suah ve.  Hi thil thleng hi Bush ih duhdan le
lungkimnak thawn tuah mi a si.

Rice :  US Secretary thar

          Rice hi Birmingham, Alabama ah Nov 14, 1954 khan a rak suak
ih, kan dung zarhpi niah a kum 50 kimnak ( birth day ) khal hlim zet
in a lawm.  Rice hin US national security kum hnih sung a rak ttuan
ih, cabinet members lak ih pawimawhbik pakhat khal a rawng si.

            Powell a hna ihsin a suah veten, Rice hi Bush ih hril cia
mi a sivek in, Bush cun kan dung zarh ah khan US  State Secretary
ttuanvo  cu a pe hngal a si.  Bush cun, ” America rampi hmel cu
nangmah hi na si ding ih, na hmel siat le America a hmel sia ding, na
hmel tthat le America khal kan hmel a ttha ding, ram dang in US in
hmuh danding bik cu nangmai parah a tthumaw tambik a si”, tiah Rice
cu Secretary tohkham a pek ni ah a forh ta.  Rice khal hin a Boss pai
hnenah cun ” nang mah hi, US mipi pawl him dam ten in umter theitu le
terrorists pawl do neh tubuk President na si” tiah lungawi ten a hna
thar cu a rak cohlang ve.

Asinan, hi thil hi Senate ih nemhngeh sal ding a si lai.

            Rice ih nu hi Music lam ih Master a siih, a pa tlawngah
principal a ttuan.

            Rice khal hi a nuin music lam thiam zet in a rak zirh dah
ih, cun, Standford University ah kum 19  a siin degree a rak ngah.
Rice hi Russia ttawng khal thiam zet a siih, US ahcun nunau State
Secretary ttuan hmaisabik khal a si.

            “Ka vun rawng ruangah rualpi pawl hnakin a let hnih rori
in thil ziang kim ah ka zuam ttheu”, tiah Rice hin lung tho zet in a
phuang aw.  Nunau a sivek in, rampi Secretary ttuan ding rori cun
deusawn tu a nei ko nan, rice cun US rampi tthansonak le himdamnak
hrangah a theih tawk suah a tum thu a phuang ve a si.

            Official hlun pawl le ding lai pawl lak ah peh
tlaihawknak ttha lilawnpi tuah ding khal hin Rice hin ttuanvo tumpi a
nei a si. American cabinet member 25 lakah, milai 6 rori cun an hna
an bansan zo.

Kawlram thil man (Yangon)

Fangfai Dip khat      Ks  8,500

Siti ( Mipe)             Cuai khat      Ks  1,800

Vawksa            Cuai khat      Ks 2 ,200

Alu                        –                       Ks     250

Hangbo            Pum khat            Ks     100

Khasuan sen       Cuai khat            Ks     200

Khasuan rang     Cuaikhat             Ks     900

Thing                    Cuai khat     Ks  2,000

            Yangon khuapi sungah cun lakphak khuat khat ( normal ) ah
70 a siih, Good Cial cu 100 le 150 tla a man. Malaysia ah cun RM. 1
lawng a si nan.

Rak nganve ciau uh…

          Kan calai, Lentlang, Rihli le Hruaitu zarh tin thuthang
damcak zet ih a tlanlenvivo thei nak ding hrang, kan thiamnak, fimnak
le theihnak ui sianglo ten thawh khawm vialvo uh si.  Laimi hrangah
cun Laica siar a nuam bik ih, kan Lai ttawng teih calai kan neihmi
pawl hi upat nak thawn kilkhawi in, ca siarding ttha ttha kan neih
thei nakding ah ” ca rak ngan ve ciau
uh”.                                                     Ed.

Thuthan

Hmaizarh(November 28, 2004) ih can hmang tu ding pawl

(Nubu can)

Can kaitu                                  Nu Zing Fam

Thuthangtha simtu                Pa Nah Mang

Zapi hrang thlacam             Pa Lal Sawi Cuang

Solo                                         Mai Sarah Mawi

Bible zoh lo siar                        Mai Mangte

Thawhhlawm  ap thlacam            Lal Fak Zual

Hlarem                                     Mino pawl

Awnmawi tumtu                Salai Ramte

Kan dungzarh thawn pehpar aw in

Khawm can                 Khawmtu            Thawhhlawm

Mithar                        4

Zarhpi zing                    180
248

Zarhpi zan                   58
44.50

Mino khawm                         –                       –

Zarhte zan                    61                    99

Zarhpizing thlacam             23

Rawl ul thlacam            8

Pangpar hlu

            Mang Mang tei nupa in Pathian hnen ihsin an ngah mi
thlawsuah sung in a mah sunlawih nakah tin Pangpar an rak hlu. Kan
Bawipa Pathian  hmin cu sunlawih in um sehla siang zet ih Pathian
hnen pe tu parah thlawsuahnak um ko seh.

Leknak lam

               VLBawithang

     Emlyn Hughes 🙁 Aug 28, 1947 – Nov 9,2004 )

Liverpool le England Captain Hughes, kum 57 cun catuan ram ah in feh
san ta. Tuesday ni ah football fan tam tak cun vuinak thei ter nak ah
an uniform a sen an hruh theh. Hughes hi 1970 hrawng vel ih hmin
thang tak a rak si. Bawhlung sit a thiam mai a si lo,a cak ih  a tuan
a tha bawk a si.  A taksa cem hman sehla a hmin cu a dai mai mai thei
zik lo.

Ka theih tawk cun ka caang ko

Arsenal Striker Thierry Henry cun ni kum ih thawk ihsin natnak
(Achilles) ka neiih 70% lawngin ka lek thei.A thawk hi har ka ti ih a
rei deuh cun ziang  a bang tuk lo.Hmanseh ka theih tawk cun ka cang
ko a si a ti.Sihmanselah,Premiership ih goal nei tam bik a si lai.

Ke ruh kuai rungah thlahnih cawl zo hnu, steven Gerrard cu lek
theisal ding dinhmun a thleng sal. Hmaizarh tlawngkai ni thum ni ah
Monaco thawn Champions league an lek tik ah, a lek thei ve ding. Tui
season sung cun ka natnak khal a suah ka zum nawn lo a ti.  A dam ih
Real Madrid cun tu ihsin thawk in lei duh ah an rak  ngiat leh zo.
Real Defender Salgado cun rung feh thei sehla ka duh tuk a ti.
Hmansehla Liverpool pawl cun an captain hmundang ih feh cu an siang
ngai kem, ti mi ruah ding a um.

Tlangpar ah Brazil an tlu ( back cover )

            World champions Brazil cun kan dung Wednes day ah Ecuador
cu goal khat in an neh lo. Peru cun an ram kiang Chile cu 2-1 in an
neh ih Paraguay cun Uruguay cu goal khat in an sung.

            Brazil striker Ronaldo cun “kan lek sungah Luna ka nei ih
thli tha ka hai nawn a si” ti phah in a theh tiang a lek thei. Brazil
player pawl hi an lek hlan nazi 48 ah Europeon ihsin an thleng khawm
ih cui lai fangah an do ding mi pawl khal cu an rak man thepthep zo.
Ronaldinho cun angki phawih rori in pawi a ti zia a lang ter ih,
Coach Carlos A. Parreira khal in a pawimawh bik cu qualify hi a si a
ti. A hnuai ih ta pawl hi S. America ihsinWorldcup qualified pawl an
si.

Agentina (mark 22) , Brazil           ( mark 20)

Paraguay ( mark 16) , Ecuador ( Mark 16)

A nauhak thinlung a tang lai a si: : Rooney ( back cover )

            Spain le England  Friendly match cu kan dung wednesday ni
ah Bernabeu ( Real) ah an lek. England player pakhat cu a nauhak
thinlung a cem hrih lo a si. Kum 19 a si zo ih thanso khal a cu tlang
nan Spain goal kil tu Casillas parah mawi lo zet in a cang ih
dawisuah a si hlan ah Eriksson cun ALan Smith  a thleng ter lohli.

            England Coach, Rooney  hin goal thun ding  a theih hngilh
ih thil dang a thinlung sungah a rak ret sawn. A nauhak tuk lai ih
zir ding khal tam tuk a nei lai, thil a rak tuah sual pang a si. MU
striker Rooney hin Emlyn Hughes hngilhlonak, a ban hruk dum a hlawn
kha a ti sual na sa. England coach in Rooney ih parah a riahsia lem
lo.

            Beckham:  A  mah hi pitling zet a bang, asikonan a umdan
in nauhak a sidan a lang ter, player pitling paawl hnen ah  a zir tul
lai a si. A mah Beckham khal hi 1998 world cup ah mawilo lotak ih rak
cangvai tu a si ve.

Ukraine timitvangtu Shevchenko

World cup qualifier ih Turkey lam ah goal hnih thun tu AC milan
striker Andriy Shevchenko cu a sunglawi zet. Ziangruangah tile
Ukraine hi World cup an veikhat luhnak ding ih sangka hawngtu a si.
2006 Germany   ahcun hmel thar kan thei thleng ding.

Tuzarh leknak results

Europeon Zone

1..Andorra 0-3 Holland

   Armenia 1-1 Romenia

   Macedonia 0-2 Czech Rep

2.Geogia 2-2 Denmark

   Turkey 0-3 Ukraine

    Greece 3-1Kazakhstan

3.Luxembourg 0-5Portugal

   Liechtenstein 1-3Latvia

   Russia 4-0 Estoni Cyprus 1-2 Israel Malta 0-2 Hungary

Mopuai maksak

    Ttumkhat cu, Haikhawl tlangval upa lam deuh hi a pa in nupi neih
a fial an ti.  A nauhak lai ihsi a rak duhmi nute thawn cun an vawn
ngiaraw ve pan lo maw.  An mopuai ni ah cun, Pastor hmaiah thu
tiamkamaw ding in khuk an bil tlang.

     Pastor cun Salai, Mai…hi a kut a ke kiak in, van siatnak
pakhat khat tawng seh la, duhdawt zet in na pawm thei tho tho kem
tiah mipi hmai rori ah aw thangnawn khin  a vawn sut. Cui tlangvalpa
cun khua ttha ten a vun ruat khuaukhi ta ih “Zo si mai hmailam can
rel thei ding’ tiah Pastor cu a let an ti ko lo maw.Cuveten
Mai…khal cun kei khal mai tawkih fala, kei, tiawve loziang ka si,
hmai lam can ka rel thei ve celo tiah an mopuai cu an ttiak an ti cu
teh.An hngahhlapbikmi ni cu khua ruah khuaukhi ruangah a tlaknak
kelah a tla sal anti.

                            Ela

Hruaitu zarhtin thuthang hi online www.ycld.org

Khal ah siar theih ringring in a um.

Damten Mangtha/suntha

(Visited 54 times, 1 visits today)

Comments

comments

Comments

%d bloggers like this: