Hruaitu Issue 50

Hruaitu Weekly news

Vol. 50

14 November 2004

Calai duhdawttu kan Pathian

Calai duhdawt ruangih, Bible siarding tiang in rak petu kan Pathian
ih zangfah le lamhruainak ruangah, tlaklo le tlinglo cing ten kan
tawlrelmi HRUAITU thuthangca cun Vol. 50 tiang leilungtlun ni eng a
rawn hmuh ve thlang. Kan Pathian in sunlawinak hmuahhmuah co hram seh.

Tuisun November 14,2004 a vei 50 nak tiang HRUAITU siar theih ih a um
hin, LCF kan ttanrual nak fiangten a lang ter ih, hmuhdan le duhdan
bangaw ciaulo khal sehla, kan calai hi kan rak duhdawt in kan rak
upat ngaingai a si ti fiangten a lang. Calai hin miphun lungrualnak
in pe ih, kan theihawklo sungah tampi in khaisang a si tihi Malaysia
Laimi pawl lakah cun thup ding a umlo.

Leilungtlun ih mi hminthang le kan zoh tthim ringring mi pawl khal
khi, calai thawn hla aw dahlo mi hlir an si. Calai hi zirnak,
thiamnak, tthansonak le milai nun khaisang tu hrampi cu a si ko. Kan
calai thansonak hrang Lainu, Laipa kan fimnak le thiamnak, kan
titheitawk te hi ui sianglo in lungrual ten hmai nawr tlang sinsin uh
si.

Editor : : Richard K. Emmanuel

A suahtu : : LCF Calai Comittee, Malaysia.

Bezai

Keimah lawng maw!!

Keimah lawng maw it lo len

Kawmtial zung a rel len lai

Zunci vanram lang an run sung hnuaiah

Me ce lo’n khua dei ve seh.

Kei zun razam hman seh

Nan thlawh pil nim rawn ah

Hawikawm lenpirun rual tha dingah

Tin men ih hngilh lai ci khaw.

Salai Ronald

Bawi Jesuh tthangaw

Ttum khatcu Jesu le a dungthlun pawl cun Galili tiva kan ding in
lawng an to. An zum bikmi Jesu cu lawng hnuai khan sungah a rak
itthat. Culai fangah, thlipi in an lawng cu rawn nuai ciamco khaw,
Bawipai kiang kapih sun le zan um ttheu tu, piang thar, Bawipa be
ring ring tu pawl cu an mang a bang ih ningttih in vansang an lam.

Leile van sersiamtu Bawipa thawn lawng totlan khal ih ning ttih hmang
le phunzai rero hmang milai pawl nundan hi cu aw!!! Dung thluntu pawl
khan, an hnenih um Jesu hnakin thlisia le tisuar lawng kha an zoh ih,
an mai thiamnak le theih nak hmangin him nak an hawl. An thilri pawl
tidai sungah an hlawn, an au an kiau, an thazang le fim thiamnak
hmuah hmuah hmang in himnak ding an tawlrel ciamco. Aw, a va
bangthlak em milai nun hi.

Asinan, dungthluntu pawl khan hngilhmi pakhat te an nei. An hnenah,
an lawng sungah thlisia le tisuar parih thuneitu a um ti an rak
hngilh riai. An theih suah ih an vawn thang hnuahcun, tisuar le
thlipi khalin Bawipai thu cu an el theilo. Duhdawtmi unau, leilung
tlun harnak tisuar le buainak, ningttihnak, nawmcennak, beidawnnak
thlisia phun phun lakih kan tlanlen laiah hin, ” na kiangah kumkhua
in ka um ring ring ding” tiih in tiamtu Jesu hi tthang hngilh siang
hlah uhsi. Kan tawnmi thil hmuah hmuah parah nehtu kan si theinak
dingin, ” Bawi Jesu kan tthang kei uh”. Bawi Jesu tthang aw!!!!!

Ela

Hruaitu ka hmuhdan Cu

Kan Hruaitu weekly news cu vol. 50 nak a kim zo ruangah “Hruaitu
thuthang na hmuhdan ziangtin a si” timi thusuh nak cu a hnuailam
vekin bulpak ciau in an rak let.

Pa Cung Thawng : : Kan bangawk ciau lo ding kei ka hrang ahcun a ttha
ko.

Tluang Lian Bawi : : A kut neh le a ke neh an mawituk, hmailam ah tla
Pathian in umpi ringring hramseh.

Salai Ro Vel Thang : : Kei ka hmuh dan cu ramdangah kan Lai ttawng te
ih cabu kan suah thei hi lungawi um ka ti. Miphun thansonak dingah a
thupi zet in ka hmu.

Pa Thuan ling : : Miphun dang hnen keimah lawng ka um tik ah
mithmaitha ka ngah. Miphun le hnam hawl nak khal ah ka ruat, ziangah
tile mi ram ah mai ttawng ten casiar ding kan nei a ttha hnem tuk lo
maw, zuam sin uh Hruaitu.

Mai Emily : :Kan theih ban lo mi leitlun thuthang siseh, Lai ca siar
tla siseh, theihkaunak(bahutuhttah) a phunphun ka ngah ka thangso
nasa, ka hrangah tthathnemnak tampi ka nei LCF cingcing..he..he..he

Ruata (centre) : :Kei ka hmuh dan ve cu a ttha ko, vol. 50 a kim zo
ruangah tuihnu kan ti thei ding a silen colour in suah thlang sehla
ka duhdan a si. Zarhtin sum thleng rate tla hi ngan thei ringring
sehla, tthanso nak lam ahcun tu hnak in kim thei deuh sehla, kan ram
ih thilri man tla ngan thei sehla ka duhdan a si.

Salai San Hmung: : Thawm nei lo ring zet ih Laimi hrang au rero tu
thuthang ca a si.Hihi ngantu le siartu ih ttanrualnak ih rah a si.
Miphun hrang ttuan hi mai hrang tanta ih tuan a si ruangah mimal te
ih lawngih tuan a si bik.Hruaitu khal a ttuan tu ngaingai cu mimal te
an sinan nan teimak nak parah ka lo fak. Ka hrangah theihkaunak in
petu bik pakhat a si fawn.

Salai Bawi Vum : : A ttha tuk, tam sinsin ngan thei sehla ka duh lai.
Laica thiam lo khal in tampi kan thiam phah,general knowlege khal ka
nei, nun ziaza thanso nak khal tampi thazang ka ngah. Ca in ngan sak
tu pawl in hnattuan bang zet cingin Pathian hnatuan a si ti thei in
ttan an lak mi par khal ah sim cawk lo lungawinak ka nei. Khawm ka
tlung tinten khawm man lo pawl in hruaitu siar duh ruangah in hmuak
theu. Hruaitu na lei maw? tin in sut hmaisa ringring. Veikhat cu ka
lei man hlan ah a cem man, Inn ka tlungih ka rualpi pawl cun ” tuini
na khawm cu kan hrangah man a nei lo, rualpi hrang na ruat lo ” in
ti. Curuangah LCF in hruaitu kan nei hi ka hrang lawng si lo in ka
rual pi pathum cun Hruaitu an siarnak ihsin an kuakfawp mi khal an
phiat phah, lungawi thu sim cawk ding a silo, ka lungawi.

Salai Za Biak Sui : : Hiti ih thu in sut mi ah sim thiamnak zianghman
ka nei lo. A thawk ihsin tuini tiang ka hmuh dan ah 70% tluk cu
miphun duhdawtnak ah kan calai hi a khai sang a si.

Pa Lal Sawi Cuang : :Hruaitu vol. 50 tiang suah theinak canttha in
petu Pathian ka thangthat a si.A siatnak lam cu tuhrih ahcun ka hmu
hrih lo. A ttha tuk ti lo cu sim dan ding khal ka thiam lo. Malaysia
ih kan miphun hnattuan nak lak ah kan hlawhtling bik pakhat a si tiin
ka hmu. Pathian hnen le tawlrel tu pawl hnen ah ka lungawi.

Salai Van Cung Lian : : Kei ka hmuh dan ve ahcun thimnakin a tthangso
rero ahcun a tthangso bik Japan vekin ka hmu. Thu le ca ngan dan in
tla kan thangso cak tuk. A sinan keimah phuhrung awknak tampi ka nei,
a siar lam cu ka ttang nasa.

Saya Ngun Lian : : Calai hi fim nak pakhat a si ih, hnattuan phah
cingin hruaitu nan suah thei cu mak ka ti hlei ah tha ka ti tuk. News
lam hi ttha ka ti nasa, Sermon tawi le capoh lam hi malten zuamawk a
ttul lai in ka hmu. Kum sawmnga a kim zo vek in hmailam khal ah
pacang sinsin ih a feh vivo theinak dingin tla Pathian in malsawm
hramseh thanks!

Pa Ngun : : Ka hrang ahcun zarhkhat hruaitu ka siar ngah lole zo
tihal thawn ka bangawk. Hruaitu ka hnen ih a thlen lo ahcun zohnen ah
a um tin hawl in ka vak.

khimKhim : : A tha ka tituk, thazang ka ngah thei em, fimnak khal
tampi a karh, ka siar ngah lo le ka thin a nuam lo. Zarhtin in siar
ka duh ttheu nan si…..

Salai Ramte : : Hruaitu thuthang ca um lo sehla LCF mipi pawl cu Tuu
ih khawhmuh nak can hman kan hmu lo ding. Hruaitu thuthang a um zarah
kan Laica siar thiam hmuahhmuah in ram tin kim thuthang kan theih ih
hlei ah ram tin kim ttawng thiam tluk kan si.

Salai Sui Than kio : : Thangthar hrangah theihkau nak tampi kan ngah
ih ttha ka ti nasa. A ra lai ding mi can khal ah nan mah hruaitu upa
pawl ih ttan nan lak vivo a duh um nasa.

Pa Run Thuan Hre : : Malaysia ih kan nih kulittuan phah cingih kan
thil tuah mi parah kan level lo lam in a ttha tawk ko lo maw! tiin ka
ruat.

Salai Lal Nei Sum: : Kan LCF hrang ahcun Hruaitu um lo sehla kan mit
a caw in kan hna a set thluh dingah ka zum. Hruaitu hi laimi hrangah
Globalization in thlen pi tu, kan mit le hna in vang ter tu a si in
ka hmu.

Salai Van Tleu Lian : :A ttha, kan LCF member sungih ca thiam lo le
mibang lo deuh pawl kan hrangah a sung lawi hleice. Cun mihrek khat
pawl in ca ngan tu pawl ih duhsaknak thawn ca an rak ngan mi ruangah
mai nun zoh aw ih nun thleng awk nak ah a hmang tu tla kan um.Kan
theih ban lo thuthang tete khal kan thei a ttha tuk lawlaw. Ttan lak
sisin ding a si. Hruaitu a nun khua sau in Pathian in thlawsuh pe
hramseh.

( Hmaizarh ah ngan peh vivo lai ding)

Hliakhlai ( Survey) tu Salai Pa Thuam

President Arafat a thi

Palestine hruaitu lubik pathum cun kan dung tlawngkai nikhat niah,
french siizungpi sung ih thih sual rero tu an hotubik Arafat veh ding
in private vanzam thawn an pawksuak. Palestine Prime Minister Ahmed
Qorie, Foreign Minister Nabil Shaath le PLO Secretary- GeneraMahmound
Abbas tei pathum, Palestine top pawl hin Arafat- nupi ih ttawngkam
mawilo hmanmi pawl ziangah siarlo in an pubik cu an veh a si.

Suha Arafat, Yassar Arafat ih nupi cun hi Palestine hruatu lu pathum
hin kan pa hi a sinak an co duh ruangah

” a nungcing ih phumsak in tum” tiah, French ih fehlo ding in a dawn
hai. Arafat hi a ttha vivo ih dam ten kan ramah a ra tlung kirsal ko
ding tiah Suha hin a rak phuang ve.

Asinan, kum 75 a sizomi, Palestine hruaitu lubik Yassar Arafat cu kan
dung November 11, 2004 niah a thi tiah Doctors pawl cun tlang theih
in thu an than a si. Palestine rampi le Muslim rampawl lungsia ih an
ttah laiah Israel pawl cun, a tuahmi thil parah Pathian in tawk
thlang seh a ti a si tiah, za an beng.

Arafat hin natnak phun phun a tuar ih, tuittum ih a thihpinak bik hi
a thluakah thisen a luh ruangah a si tiah siibawi pawl cun anphuang.

Srilanka ram daihnak hrang

Norway ram in Srilanka ram daihnak ding hrang special ih an thlahmi,
Norway Foreign Minister Jan Petersen le a deputy Vidar Helgesen cun,
cozah le Tiger group pawl remawk ter beisei in kan dung tlawngkai
nihnih niah Srilanka ram ah an lut. Jan hin Srilanka President
Chandrika Kumaratunga le Tiger group hruaitu Velupillai tei pahnih cu
a tawng a si. Srilanka ram ah civil doawknak a daih ruahri beisei a
si.

Drug ruangah thah ding

Australian rammi, Hainoi khawpi ih sem Tran Van Thanh cu sii tthalo (
heroin ) ruangah kaih a siih, thah ding in Vietnam Court cun
tlawngkai ni hnih niah thu an relcat.

Japan linghnin in a nuai

Kan dung tlawngkai nihnih niah lnghnin in Tokyo khawpi a nuai lala
ih, mialai pakua an thi. Hi linghnin hi Richter Scale 5.9 lawng a
siih, kan dung thla ih hninmi hnak cun a dem deuh.

Kan dung october 23 ih ling hnin kha, kum kua sungah Japan ramih
thihnak thlen tambik ttum a siih, mialai 39 rori an thi. Mi 2,600
khal in hliam nazet an tuar rero lai. Khai ttum ah khan, a cang
dahlomi tlangleng(bulet train ) tiang service theilo in a siatsuah a
si.

US le Pakistan biakawknak

US Secretary of state Richard Armitage cun pakistan thawn biakawk nak
a nei thawk. US cun Pakistan cu Iraq thuhla, Afghanistan thuhla le
tharum thawh hmang ( terrirosts ) pawl thuhla tla a relpi a si.
Tuittum hi Bush ih tlin sal hnuah US cun Official ih ramdang thuhla
an tawlrel hmaisak mi khal a si. Tuittum ah hin Pakistan le India
thubuai tiangin reltlannak an nei. Pakistan hin tharum thawh hmang,
al-Qaeda milai pawl aiih an zummi 500 lai an kai a si.

Japan in ralrinnak tuah

Kan dung zarh ah Iraq ih Japan mi lu an tan sak ruangah, Japan cun
terrorist donak ah nasa sawn in cangvaih a tum thu a phuang. Koizumi
cun Iraq hel pawl ih dilnak cu thlunlo in, a ralkap pawl a lakkir sal
duhlo ruangih hi thil hi thleng. Iraq ah hin Japan ralkap 550 hrawng
an tang lai. Japan ralkap pawl hi hmai kum, kum tawp tiang hrawng cu
Iraq ah hin an um lai ding.

Iron cross America an thleng zo

Kawlram ih Music group hminthang zet Iron Cross pawl cun sawmnak an
dawn vekin, kan hm,ai November 27 ah America rami lam an tlawng tum.
Tui ttumah hin Iron Cross awnmawi tumtu pawl le Lye pheu, A Ngee, Zaw
paing le Miu Cyii pawl tla an feh ding.

November 27 niah, awnnak hla Florida state ih Tanda Aye camp ah sak a
si ding. Cun December 6 khin Meriland State ih Georgea ah concert
neih sal a si ding ih, New York khuapi ih K. College ah December 6
niah khin netabik concert tuah an tum. Iron Cross hlasak thiam Lye
Pheu cun tui ttum khual tlawnnak hi thlakhat le hrek hrawng an rei
ding tiin thu a phuang. Tui ttum ih December concert khualtlawnnak ah
hin US lawng silo in Japan lam tiang in pal phah an tum a si.

Khin Nyunt ram zuarthlaitu ah puh

Kawlram Prime Minister hlun Khin Nyunt cu ram zuar thlaitu ah puh in,
kan ram a siat bal thluh lonak dingih kilvenawknak ah kan hlawn a si,
tiah ralkap cozah thuthangca cun kan dung Sunday niah a phuangsuak.

Mah le mah ka sibik hmang rak tiaw ttheu ih, PM dinhmun le
Inteligence hruaitu sinak rak kaikawp tu Khin Nyunt cu kan dung
October 19 niah a sinak in hlawn a siih tlunah kilvennak hnuaiah kaih
hrem in a um a si. KhinNyunt ih Inteligemce pawl 5000 lenglo cu kaih
thluh an si zo ih, a mah thawn pehtlaih nak neitu hmuah hmuah cu
hlawn darh tluh an tum lai.

Khin Nyunt hlawn a si hlan, kan dung September thlaah, a milai pawl
186 le ralkap Inteligences official pawl tla hruaiin Khin Nyunt cu
Singapore ah a tlawng ih, Tuluk le Kawlram ramri ah kaih an tawng
riai tiah Thura Shwe Mahn cun cun a phuang. Hi khual an tlawn ttum ah
hin, Golden Land land ihsin PM khual tlawng nafam cun, 3billion kyat
le lung mankhung ( jade ) 42tons ih rit a rak keng ih, check point ah
an rak kai a si. Khin Kyunt hi ram zuarthlai tu le siatsuah tu cases
pawl in thutthennak zung lam ah thlenpi a si ding ih, a hmai lam can
cu a thim nawn a si. Kan dung thlaah Khin Nyunt ih nupi khal
kilvennak inn sung ihsin tlansuah a tum laifang ah kilveng tu pawl ih
meithal mu tawngsual in a thi ti tla a thang.

Kawlram ralkap Karen raltlan pawlin an kai

Thailan ramri ih Karen raltlan pawl cun, kawlram ralkap 20 lai an kai
tiah New Vosions cun kan dung zarh ah thu an than. Hi ralkap pawl hi
an mahte peaw maw an siih, kahawknak ih an sun ruang hrim hrim ah ti
cu fiang ten report a um lo.

Iran Neuclear thuhla EU in tawlrelpi ding

US president George W. Bush rawn tling sal khaw, a khaw hmuh dan kel
cu a khaw hmuh dan a hei si ko ih. Iran hi Neuclear raltthuam pawl
tuah bansan duhlo ah a puh. Hi mi thu thawn pehpar aw in Europe Union
pawlkawm pawl in thu hla n pawtcat ding ih, kan hmai November 25 ih
EU meetingpi tiang tuah nawnlo dingih dilin chance netabik an pe a si.

Afghanistan President thar

Kan dung zarh hmaisa ah Afghanistan cun President hrilnak an neiih,
Hamid Karzai cun vote tambik ngah in President tohkham cu a to ngah
riai. An ram pumpi ih votes 8,240,538 lakah Hamid hin 4,442,247 ngah
in US uknak hnuah President hmaisabik a rawn si.

BeiJing ah mipum zat malter tum

BeiJing khawpi ah mipum an tthangcaktuk ih cozah rori in a buaipi.
2004-20 hrnag tuahdingmi ( plan ) tumpi an tuahmi ah mipum tthan
demdeuh dan tawlrel an tum nasa.

2020 ah cun mipum 18million lawng um dingin an zuam ding. Cumi umzia
cu, tuih mipum tthang zat 2.5% cu 1.4% lawng ah a tlaniam ding tinak
a si. Tuah hin BeiJing khawpi ah mipi 14.5 milion hrawng an um ih,
million thum hrawng cu inn sang cawp ih khuasa an si ve.1993 kum ih
planing an rak tuah dan ah cun 2010 ah mawttaw ( vehicles ) 1.3 um
ding ih beisei le rimtuah a sinan, tu hmanah 2.2million a um zo.

Singapore PM kum 15 tiang

Singgapre Prime Minister Lee Hsien Loong le a team pawl cun kum 15
sung rori rampi hruai dingin timtuahnak an nei. Party Secretary hna
ihsin suah tumtu Goh khalin, Committee member lawngah tel a tum thu
le, an party hin kum 15 sung cu Singapore hi hruai an tum thu a
phuang.

Khatmandu ah bomb puak

Kan dung tlawngkai nikhat niah, Napel khawpibik Khatmandu ah bomb a
puak ih milai 36 rori hliam an tuar tiah police pawl cun thu an than.
Hi bomb hi, 60million rupee cemih an sak tharmi office kiangah a
siih, cui innpi cu luah ngam khal an um hrihlo. Hi Maoist raltlan
pawl le Napel cozah pawl hi 1996 kum ihsin an doaw thawk zo ih, milai
10,000 hrawng in an nunnak an hloh zo.

Tiger group sangbik in remnak hrang ah…

Srilanka ah, Tiger raltlan pawl le cozah pawl remawknak thu relpi
dingin Norway foreign minister cu kan dung zarhah a thleng zo. 1998
kum ihsin an rak remawlo thawk zoih 65,000 hrawng in anthih phah zo a
si. Tuittum ah hin cui Tiger raltlan heuaitu khal cun remawknak palai
cu a rawn tawng ve a si.

Iraq cun ni 60 sung state of emergency phuang

Iraq cozah cun kan dung Sunday ihsin ni 60 sung rori state of
emergency a phuang. Hi thli hi Fallujah ah US ralkap pawl le Iraq hel
pawl an thahawk nasat tuk ruangah a si. Prime Minister Ayad Allawi ih
hi thu a phuan laifang khal ah hin Bagdad khawpi sungah bomb le
meithal puakawn theih ding catbanglo in a um.

Kan dung cawlhni ah Iraq helpawl cun police station, le ralkap hmun
pawimawh pawl ah luh hnawh in bomb le meithal an puah ih, nihnih sung
lawngah milai 50 laiin an thih phah, cun 60 hrawngin hliam nazet an
tuar bet. Hi state of emergency sungah hin, Iraq ram hmun tin ah
curfew khal tuah a si ding.

JI pawlin Nuke tuah lamah ttanla

South East Asia ih terrosist group, Jemaah Islamiah pawl cun Nuclear
le mipi a burpi ih thih theinak thuamhnaw tuahlamah ttan an la nasa
tiah Australia Foreign Minister Downer cun kan dung zarh ah a phuang
suak.

Hi JI Muslim pawlkawm, 2002 kum ih Indonesia Bali ah milai 202 rori
that tu pawl ih cangvaihnak hi theih tawp suah ihkan hnai hnawk lo a
siahcun, South East Asia hrang ah ttihnung tampi a suak thei tiah a
than bet. Hi pawl hi Philippine le Asia ram dang dang ah a thupten an
ding a si.

Theih kau nak lam

Fa nei tambik

Kan pu Soloman siartello cun, Leilung tlun ih fa hringsuak tambik cu
Russia nu, Feodor Vassilyev ih nupi a si. Hi nu hin 69 rori a hring.
Phir unau tuak 16 a hring ih, pathum pathum in vei 7 a hring bet, a
dang pawl khal thlunaw deuh zel in an suak. Hi nu hi fa hring tambik
ih phuan lawng silo in, fa phir nei tambik ih phuan khal a si.
Ruassia ci fing fing….

Tufa hmel hmu tambik

Leilungtlun milai lakih tufa hmel hmu tambik tu cu US ih Samuel S.
Mast a si. Hi putar hin tufa 824 rori a hmu. October 15, 1992 kumah
kum 96 kim in a thi. Fate 11 a neiih, tu 97, tu chawng 634 le tu
chawng, chawng leh ( great-great gran childrens ) 82 rori a nei bet.

Tlawng nauhak ngahbik tawng

September 2002 ah, India ih Montessori tlawng cun, tlawng nauhak
26,312 an nei ih, leitlun tlawginn pakhat ih tlawng nauhak tambik
tiah phuan a si.

British tlangleng cangsual kha

British high-speed passenger tlangleng cun mawttaw a pah ih, milai 6
an thih ih hleiah 20 hrawngin hliam an tuar. Hi 1735 tlangleng,
passengers 300 phurtu hin speed-full rori ih a tlan lai fangah cui
mawttaw cun tlangleng lamzin cu a rawn pah ih, tlangleng khal a let
rori. Tlangleng lam ih thuneitu pawl cun, tlangleng mawngtu cu an
mawhpuh ih, kumnga sung tlangleng a mawnnak ah mialai milai 42 rori
in anthih phah zo tiah an demnak thu an phuang.

Arryo-in Muslim hruaitu pawl a dil

Philippine President Arryo cun tui Muslim Ramadan fastival sung rori
ah Iraq le Afghanistan ih Philippine civil pahnih an kaihmi cu
suahsak hram dingah leitlun Musalim hruaitu pawl cu a dil. An ram
sungih Muslim pawl hnen khalah Allah hnenah thlacam ih, hi an mai
tuahsualmi zianghman umlo ih an kaih hremmi pahnih hi suah an si thei
nak ding a dil a si. Angelito Nayan le Tarongoy le an rualpi hrekkhat
pawl cu Muslim pawl in an hrekbet lai a si.

Kum tin te Europeon Footballer of the Year hi mi 50 an hrilsuak
ttheu. Tui kum Europe cup sunglawi ngahtu, zan mang lam ih leng Greek
player lakih sin mi 6 rori an kai ve. France ihsin 6 an tel ih,
Brazil ihsin 7 . Hi milai 50 an hrilsuah pawl lakihsin pathum lawng
an hril leh ding a si. Kan hmai December ahkhin 2004 laksawng
ngahttha tu pawl hmin cu phuan an si ding. Zo si na zum?

Kan zuamaw hai kei uh. Pathum rawn hrilsuak awla, cunah na zumbikmi
pakhat rawn hril suak sal aw. Cui na hrilmi cu hi ” HRUAITU” ah hin
na rawn tarlang ding ho khaw. Kan dung kum ih ngahtu cu Zinedine
Zidine, Thierry Henry le Ronaldo pawl tla an si.Football thu lam ngan
tu pawl cun Czech midfielder Pavel Nedved,tu ih Serie A Juventus ih
um mi hi a si.

Romario a cawl zo

1994World Cup ih Brazil star Romario(38),FIFA player of the year rak
ngahtu cu a cawl zo.Games 79 ah goals 64 a thun. Leknak lamah hin
Coach hin thu an nei ngai ngai. Romario khal hi 2002 World Cup ih lek
dingin mipi pawl cun an duh zet. A mah khalin lek a paih tuklai
nan,Sihmanseh, ziang tlukin thiam hmanseh Coach thawn an milawk lo ah
cun a ngah lo. Club khalah a sit nawn lo.

Man U Boss thinlung a bang

Champions Arsenal 2-0 ih an neh hnuah Portsmouth 2-0

in an sung lehih,Man City thawn an draw leh la la. Defen-

der pawl cun Roy Carrol thinlung bang dingin an tuah lo.

Hmansehla, Striker pawl cun an thun thei lo. Fergie hin Louis Saha
leh Alan Smith a ret hmaisa ih ziang an bang tuk lemlo. Neta lamah
Rooney a luh tir lehih a thun thei cuang lo. Striker 3 a lei thar
pawl hin Ferguson thinlung an tibang hrih asi. Dutch pacang Ruud tel
thei lo chu pawi a ti ngai ngai. Hi ti vek cun nehnak laksawng cun
kan hrangah a si lo ding a ti.

Portuguese,Benfica striker Nuno Gomes(28) cu a khuk kehlam a na ih a
cawl hrih ding. Hmansehla, surgery tiang cu a tul lo. Arsenal
Brazilian midfielder Edu cu ni hnih ni Everton thawn an leknakah a ke
a tina ih, Gunners Manager cun pawi a ti zet. Eto hin Gilberto le
Campbell hliam a vung bet lehih ziang tik tiang saw a si ding.Gunner
cun tu thla 30 le Dec1 hin Red Devils thawn an lek leh dingih an
zateih tel thei loh a phang. Oct 24 ih an leknak thuhla cun tu tiang
a awh lai a si.

Thuthan

Hmaizarh(November 21 , 2004) ih can hmang tu ding pawl

Can kaitu Pa Lai Lung Lian

Thuthangtha simtu Re. Za Thelh Lo

Zapi hrang thlacam Saya Thi Sen Man

Solo Salai Bawi Hre & Salai Ma Din

Bible zoh lo siar Salai Ram Hma Ngaih

Thawhhlawm ap thlacam Mai Thawn Za Dim

Hlarem Mino pawl

Awnmawi tumtu Joseph Zung Thang

Kan dungzarh thawn pehpar aw in

Khawm can Khawmtu Thawhhlawm

Mithar 2

Zarhpi zing 126 162

Zarhpi zan – –

Mino khawm 28 28

Zarhte zan 41 71

Zarhpizing thlacam 18

Ipoh um pawl ih khawm a Hlu 223

Hnih hi si ttha bik a si

Thlarau rawl tuh

Khaw pakhatah thlacam khawmnak khal hmang paih dahlo sungkua an um an
ti. An Pastorpa cun, Sunday niah a kawhhran pawl va vehvai hai
khaw, ” nan sung teh, Thlarau tthanlennak nan neimaw?”tiah a va sut.
cuveten, pabik cun, ka pakhacu hlamhmai ci tuh a kut a nung zet nan,
kei ka ci khawlmi kawlhang le ka fapa in a rak ei ngelcel ih, a pawi
ka ti zet. Asinan, a ek va zoh ning khaw a rak ttosal ih, ci tuh cu
ka rak thiam ngai . Cu cu, kan nih innsungsang ih kan thlarau ci tuh
theimi tawkte a si ko…

Nan zumlo le tisin ve reng reng uh

1919 kumah khan, Haikhawl khua laiah hmur hmul sau tuk le khahmul
sautuk cun kuak cawnlo ding tiah signboard an tar an ti cu teh.
Tlangval siittal nawn, hmurhmul sautuk le khahmul sautuk neitupa
cun ” hi signboard tarmi hi a ttullo tukaw tiah, kuak cu a vun cawng
ih, a hmur hmul le khahmul hmuahhmuah cu a kang thluh an ti. A
thinheng tuk cun, an catarmi kiangah cun, ” nan zumlo le tisin ve
reng reng uh” tiah a tar bet ve an ti.

LCF mino

Hruaitu thuthang hi online www.ycld.org ah siar theih ringring a si

Comments

comments

Comments

%d bloggers like this: