Hruaitu Issue 49

Hruaitu Weekly news

vol. 49

November 7, 2004

Editorial

Bush, Pathian mi hril

Tuizarh cu thuthangcabu vawn lei seh la Bush, TV vawn zoh seh la
Bush, Internet lamah khawiha ti khal le Bush tho tho, pacang rual
tokhawm vial vial nak va tel seh la Bush ih thuhla tho tho, ziang ti
ttha mit mennak kip ah George W. Bush. Tulai Leilungtlun ih larbik pa
cu Bush hi a si ko.

Ziang ruangah si hi tluk ih leitlun mipi pawl buaipi le ngaihsak a
hlawh ciamco tihi ruah tham a um. Duhlotu thawng tampi lakah ” Bush,
Pathian mi hril” ti hi ka lungkimnak bik a rak sive ngelcel. Leitlun
ram hmuah hmuah deuhthaw in Bush an duh nawnlo hnu khal ih a term
hnih nak a rawn kai leh tlat hi Pathian in Bush hi a fale pawl hrang
nasazet ih hman a duh lai ti cu US mipi hmuah hmuah le Leitlun mipi
hmuah hmuah hi a hmutu le theitucu kan si ko. Nangteh, ka rual ziang
tin na hmu ?

Tui zarh kan hruaitu thuthang ca khalin Bush ih hmin tello cun
khawlak ka leng ngamlo a tiih, a sung thu kan zohtlang a si pei cu….

Editor : : Richard K. Emmanuel A suahtu : : LCF Calai Commitiee,
Malaysia.

Mail at richardemmanuel4u@…

Lung Put

Mi tlai tluang

Lung put tha

Si cuang lo

Mi ngio fio

Lung put sia

Si cio ko

Mi nung hmel

Bang rep lo

Thin lung put

Bang rep lo

Mi hmel sia

Thleng theih lo

Thin lung sia

Thin sal theih

Mi nung hmel

Kan lung put

Khat le khat

Bang ning la

Lei lung pi

Dang pei maw

By Salai Ma Mang

Falam

Hruaitu thuthang na hmuh dan??

Hruaitu zarhtin thuthang hi Pathian lam hruainak in le kan editor
pawl ih teimak nak zarah hmaizarh ah vol 50 kan kim ding.Tuini tiang
pelh lo ten in ra leisak tu pawl parah kan lungawi ih siartu kan
zaten hlawknak kan nei ciau dingah kan zum.

Curuangah Hruaitu weekly news ziangtin na hmu ( na hrangah ah
ziangtluk tthathnemnak le hlawknak na nei) ti mi thu sannak tawiten
rak nei dingah kan lo sawm. Telephone massege khal in nan rak kuat
thei. Nan rak kuat a sile nan hmin nan ngan ta ding maw!! Cell 012
2118 558

Ka Lungthli ten

Tui ni ka zing tho cu, kan inn kiang ih tlangak ai ngiaungo rero awn
cun ka thinlung in neh zet, tlangak silo in sunttam siawn seh la.
Duhthu ruah ah ruah tamtuk ti a umlo an rak ti kha maw, khawi ha vawn
puaksuak law law keng.

Kan Pathian hin nunau pawl hmuah hmuah thih sual le har zet ih fa
pawi ding ttuanvo in pek mi hi, mipa pawl ih liangah vawn tthum seh
la cu maw!!! Mipapawl naupai, rawl hua le ngawl hmel hmuh ding cu a
hiar um nasa. An favawnmi dam caklo phang le kutke kimlo ih an suah
ding phangin an zuu in le rittheih thil tham khal an ban san vuarvi
rori ding tiah ka ruat.

Kan nih nunau pawl hrangah cun pasal rinumlo cu a

phanumlo nasa ding. Nunau dang thawn an va um tlan tikah fa an vawn
ring ring ding fawn si, lak fa anpai cel cel dingih . Kan nih an nupi
pawl cun ihkhun parin an lakfaman kan rak ei men ding ih, an parah
kan lal hleu hleu ding tinak a si cu. Tuittum cu kan Pastor pain
lakfa a paiih kan hmeh tlak men lo cun a lakfa man le kan bak lai
fawn si kan ti cel cel thlang ding si khawh.

Nupi fanau cawm le a ttul zik fawn si, zet deuh le fahrah cawm ding
an tam sinsin ding tinak a si. Curuangah , hitivekih pa pawl in nau
an vawn cun ” nunau sia le hawi kulhnak sia” ti ttawngkam cu zohman
in an hmang nawnlo ding.

E…hem, ka lungthli ten ka ti nan, duh hnak in ka thleng hla zik a
bang aw… khawi ha thaw vawn la ve ta keng. Hica rak siartu
duhdawtmi u le nau pawl, ka lung thli ten thu ka vawn pawl men men ho
khaw. Hi thu maklo tak hi tthaten vun ruat sal hnik awla, na duhdawt
zetmi nupi le fanau pawl dinhmun ah vawn can hnik aw, khaw ruahnak
tampi a lo pek zumnak thawn….

Ka nunaupi pawl aiawh in,

KIKI.

Thuthan

November 7, 2004 ih can hmang tu dingpawl

Can kaitu Pa Hram Nei Thang

Thuthangtha simtu Pa Mang Tin Sawn

Zapi hrang thlacam Pa Cung Thawng

Solo Salai Cawn Lian Bik &

Bible zoh lo siar Salai Van Lal Hnem

Thawhhlawm ap thlacam Salai San Kip Thang

Hlarem Mino pawl

Awnmawi tumtu Salai Biak Hre

Kan dungzarh thawn pehpar aw in

Khawm can Khawmtu Thawhhlawm

Mithar 4

Zarhpi zing 138 222

Malaysia ih Foreigners pawl hrang…

Kan dung zarh ah Malaysia cozah cun, a ram sung ah ram dang mi danlo
ih hna ttuan an tamtuk ruangah, Passport le ca pawimawh khal ttul
lemlo ih kuat tlun thluh dan lam zin a awng. Cauk ttha neilo pawl mai
ram ih tlung kir sal duh tui hrangah cun, hnattuan nak pu (
employer ) in a tawlrel sak thei. Mawttaw, tlangleng le Vanzam tiang
khal in tlun theih a si. Tuittum ih an thil tuah mi hi, Malaysia ah
Indonesia pawl

danlo ih hna ttuan an tamtuk ruangah an dawinak a si.

Hi mi ca kan ngan ni Nov 4 tiang hin Malaysia ah danlo ih na ttuan tu
12,005 lawng mai ram lam panin an kir ih, Malaysia hruaitu pawl ih
beisei nak cu a kimlo na sa. Tlun duh si, thlahlawh suah hrihloh
ruangih tlung theilo pawl hrangah, Operation room- 03-20939181 ( or )
03-20943108 ah kawh theih ring ring a si tiah, hi lam thi a tawlreltu
Azmi cun a phuang.

Tlangleng in Sai a pah that

Kan dung tlawngkai nikhat tlaiah KL ihsin Johorbaru lam panih
passengers phur tlangleng cun Sai a pah that. Hi Sai rual hin
tlangleng lamzin cu an rak tan lai ngelcelah tlangleng cun a rawn pah
ih, pali cu an luat man nan, Sai nu pahnih cun an nun an can phah
riai. Hi sai hi kum 15 veve an si.

Dodaltu banpi Osma teh…?

Can reinawn a thuhla theihlo in a dai riahriah nan, US rampi meuh in
President hril ding cu a tomen thei nawnlo a si peicu thwmvang a rawn
nei leh tlat. Kan dung US hrilawk hlan teah Binladen ih ca siih
theihmi dawn a siih, Bush a tlinsal a duhlo thu pawl tla hmuh a si. A
thuhla theih naibik vekin Binladen hi Pakistan le India ramri Kashmir
ah a um zum a si.

Malaysia ih ramdangmi pawl…

Malaysia ih ramdangmi danlo ih hna ttuantu pawl hrangah, cozah mai
ram ciau ih tlunnak lamzin a awnsak hnu, nikhat hnu nikhat tlun tum
khal an tam deuh deuh a bang. Kan hmai thla 14 ni tiang khi cu
Malaysia ih Kawlram Airline hmuah hmuah khal booking cia thluh a si.
A man khal an tthan deuh deuh.

UAE President a thi

United Arab Emirate ram President Sheikh Zayed ( a sir zuk ) cu kan
dung tlawngkai nihni niah sunglam natnak in a thi. Hrilawknak an neih
hlan sung cu PM Maktoum Bin in uknak a kai sung ding a si.

Thailand ah tlawnginn khar

Thailand thlanglam ih Muslim pawl cangvaihnak ruangah Tlawnginn pi
tiangin khar tluh a si. Kan dung zarh ah hi buainak hin milai 85 rori
nunnak a liampi ih, biaknak le phun hnam ruangih an thih tambik ttum
khal a si. Narathiwat, Yala le Pattani ah pheicun an buainak a sang
sin sin lai.

Khawpi sung tlawnginn pawl cu khar an si lemlo nan, Narathiwat
district ih tlawnginn pawl cu ziangtik an awngsal ding tih rel ban a
si hrihlo. Hi thahawknak rapthlak hi kan dung zarh ah Muslim pawl in
Buddist hruaitu’i lu an tan sak ruangah, Buddist pawl thin alh in an
thungrulh nak a siih, hi mi 85 ( thi ) pawl hi Muslim biaknak ih
lungruh rual pawl an si. Hi thahawknak thil thleng hi awlai ten
thuanthu ah can ter men ding a silo thu UN lam khal in an phuang.

Lamzin khar

KL khawpi ih sin thlai cinnak ( plantation ) lam ih feh nak lamzin
thar, Sungai Pulai- Cameron high land lamzin pi cu tulai leicim a
tamtuk ruangah zanah khar a si ding ih, khaw eng sung lawng awn a si
ding. Hi lam zinpi hi November 12 tiang khi khar a si dil

Kawlram Muslim 15,000 pawl Bangladesh ah tlan suak

Kawlram thlang lam ih Muslim pawl 15,000 lenglo cu ralkap cozah ih
hniksaknak le tihduhdahnak tuarlo in kan dung zarh hmaisa ihsin
inhnen ram Bangladesh lamah an tlan suak tiah a hmu tu rori pawl in
thu an than.

Leitlun ramkip in Rohinger tiih an kawh mi ( Yakhain Kala ) Muslim
Refugee pawl hi Arakhain State ihsin rawn semsuak an si. Bangladesh
an thlen le veten Cozah hnenah hna ttuan ding an dil hngal ih, an ram
sungah can reisawn khal an um thei nak ding tla an dil hluahhlo.

Hi Rohinger pawl hi bangladesh cun Refugee ngaingai ah an pawm lo.
Asinan, an rawl eiding le harhdamnak hrang ih ttul mi fang fang lawng
an pe hai a si. Kan dung October 30 ah Malaysia ih kawlrammi Muslim
10,000 lenglo um pawl cu, Malaysia cozah cun Refugee ngaingai an si
tiah a pawm sak thu an than. Cun, Malaysia ih Rohinger Refugee pawl
khal in vei zatel rori an dil leuh leuh vekin, refugee ngai ngai ih
pawm an si thu New Strait thuthangca cun a phuang a si.

Arafat a thi hrihlo

Palestine hruaitu lubik rori bese tak ih a vawn na cu Muslim pawl
thin a tham nasa. Yasser Arafat cu thih ngam in a na ih, a besiat tuk
ruangah Frence ramih sibawi thiam pawl a pan. Kan dung tlawngkai nili
ni ah frence Doctor cun a thi hrihlo tin thu an than.

Arafat ih Stuff lakih lubik Ranzi Khoury cun, kan pubik cu thlan sung
ih it vek a si zo, a dam suahsal cu zum a har zet a si a ti. Kan dung
tlawngkai nili niah Palestine Prime Minister Ahmed Qorei cun Arafat
hnen in uknak hrekkhat cu ttuanvo a la thawk zo.

Thailand ah thahawknak karh sinsin

Thai ah sakhuanak ruangih buainak cun daih lam hnak in karh lam a pan
sin sin. kan dung zarh hmaisa ih milai 87 an thih hnu, kan dung
tlawngkai nithum niah pa hra rori an that bet. Prime Minister Taksin
khal hi thahawknak thuhla ruangah hin nasa zet ih dem khal a hlawh
ih, International Police pawlkawm pawl khal in hi mithi pawl ih zuk
tiangin an dil a si.

America Hrilawknak thu

America rampi meuh meuh vawn hrilaw ciamco cu, Myanmar buainak thuhla
hnak cun leitlun mipi cun an rak ngaihsak nasa. Leilun hmun tinkim ah
Bush le Kerry ih thuhla in a khat ih, TV, Internet le Information
Online hmuah hmuah khalah American hrilawknak lawng lawng in a khat
thluh a sibik ko.

November 2,3,4 ni khacu, American mipi pawl khal Pathian pakhat ih
tuahmi silo an bang ka ti. Hngalih lungawinak cu Ar ih riahsiatnak ti
bang in, US mipi million tel in hlim ih an lam rero lai le Party phun
phun thawn Republican hruaitu Bush ih lal term hnih nak an lawm rero
laifang ah mipi thawng tampi hrangah cun, mitthli thawn lungsia
vankai ih an can hman ni a si.

An hrilawk hlan ih mipi ngaidan lak khawmnak ah cun bangaw rialri le
nehtu ding sawn theih harzet khal seh la, an vawn khingaw ngaingai cu
Democratic party pawl hrangahcun mangbak thlak tak cu si ko. US
President hrilawknak ah hin Electorial vote 270 ngah tu kha tling ih
phuan an si ttheu. Tuittum ahhin George W. Bush hin Electorial votes
286 rori ngah in US president tohkham cu kumli sung a kut sungah a
ret sal thei a si. Demoratic candedate John Kerry vethung cun
Electorial votes 252 a ngah ve. Cun Independent aiawhih an mihril
Ralph Nader lawngte electorial vote 0 rori a ngah.

US mipi pawl in vote an thlak ngaingai hlanih Bush duhlo tu ram tampi
pawl khal in an ttawng mi pawl le an lungput thlengin, Bush ih hmaiah
lungawipinak khukbil rori in an sim ciamco hai cu thil mak a si
lemlo.

NBC ih thuthang ih suahmi vekcun, Bush hin popular votes 59,459,765 a
ngah laiah Kerry cun votes 55,949,407 lawng a ngah a si. Ralph Nader
khal in popular votes 400,706 a ngah ve. Percent cun Bush hin 51% a
ngah ih Kerry hin 48%, cun Nader hn 0% a rak ngah ve thei ceu a si
hmang.

John Kerry cun, Bush a tlin ih kei ka tlinlo ruangah kan ram hi a
tthenaw a silo ih, ram hrang tthatnak hawl tlang kan si ruangah kan
nih khalih theih tawk in kn bawm ding tiah, bush cu lungawipi nak
ttawngka tla a thlah. Bush hin a term hnihnak a vun kaih sal tikah,
kan dung an campaign laiih Kerry lamih ttang deuh pawl hmuah hmuahcu
a mai cabinet pawl tiang in tthawn thluh tum hai. US Secretary rori
hman a rei hlanah a tthawn hlo ding.

Kum kimlo mipa nauhak thawn Sex…..

Australia nupinu, fa pathum neizo, tlawng ca zirhtu cun, a pasal
tlawnhlo sungah, a tlawngta nauhak kum 15 mi lawng cu sex a rak
hmanpi thu a mah rori in court ah a phuangaw.

Karen Ellis, 37, ( a sir zuk ) cun an pa thawn an tiawk thiamlo
laifang a si ih hleiah, a pasal khual tlawn lai a siih, tlawng nauhak
kumkimlo thawn an rak it tlang a si. Hi nu ih case hi kan hmai
tlawngkai nihnih niah a thuhla court cun an relfel ding.

Hi nauhak te hi a nule pain an kawk tuk ruangah an inn hmanah um
ngamlo in a tlanih, exam tiangin a sun phah tiah court cu an report.
Hi nu hi point 6 rori in khin a sinan,mipa nauhak cun hartuartuk ih a
relawklo ruangah court khalin an relsak dingni tiang an tthin sal a
si.

Leitlun mi larbik Bush fing fing

Thla rei nawn rampi tuahtthat tum veve ih, Bush le Kerry cun an
khinawk rero hnuah US mipi duhhrilnak rori in Bush cun nehnak a co
ih, a hleice ih lungawipi tu bik a nupi khal in, nidangih an hnamawk
kelte vekmen silo in a hnam ciamco a si hmang.

A fanu tei pahnih khalin, an thu tiam kamawk vekin US rampi hrangah
an ti thei tawk ih ttan an la na sa. Bush hi International hruatu
pawl in an demnak bik cu Iraq par ih a cangvaih dan kha a sibik ih,
asinan tuittum ih a nehnak hin a lamzin zawhmi, a lamzin hrilmi hi US
mipi pawl hrangih himnak tthabik a si tih fiangte ih langter tu a si
ko.

Tuittum ih hrilawknak ih court thutluknak tuahmi le vote siarnak pawl
hmuah hmuah thawn pehparaw in US mipi tamsawn cun fair zet le thiang
hlim zet in an hmu a si. Bush khingtu John F. Kerry le midang khalin
ziang hman relbuai lo ten, Bush ih tlinnak hi an lungawipi theiih,
Kerry cun ” Na kaihhruainak kut sungah Pathian in kan ram hi himdam
ten in hruai hram seh” tiah Bush cu a cibai a si.

Model zuamawknak ah.

Tuluk ram Guangdonng provine ah Leilungtlun model zuamawknak tuah
rero lai a siih, ram hran hran ihsin falamawi pawl cun an zuam aw
rerolai. Kan hmai Nov 14 ah khin final an tuah ding. A sirih zuk hi
guangdong sahmuan ah Model pawl in pawpi an zukpi lai a si.

Malaysia le Thailand in Kawlram Asian ihsin banter duh…

Asia ram tamsawn cun Kawlram ih hruaitu thlengawknak ruangah
democratic lamzin thawn hlaaw deuh deuh in an hmu ih, Asian ihsin ban
ter hman an thin lung a si. Kan dung zarh hmaisa ah Malaysia le
Thailand cun Kawlram hi Asian pawlkawm hman ah telter an duh nawnlo
thu an phuang. Asinan, kan dung zarh ah pubik India ih a tlawnnak ah
cun Democracy lamin zawh an tum thu nasatak in a phuang ve.

Theih kau nak lam

Dawr tambiknak ram pawl

Ram hmin Dawr umzat

1. China 19,306,800

2. India 10,537,080

3. Brazil 1, 595,062

4. Japan 1,240,237

5. Mexico 1,087,995

6. Spain 780,247

7. Vietnam 727,268

8. South Korea 704, 032

9. Italy 697,853

` 10. USA 685,367

Leiba ngahbik ramawl

Ram hmin Leiba zat ( $ )

1. Brazil 237,953,000,000

2. Russia 160,300,000,000

3.Mexico 150,288,000,000

4. China 149,800, 000,000

5. Argentina 146,172,000,000

6. Indonesia 141,803,000,000

7. South korea 134,417,000,000

Hi lists hi 2002 kum ih ta laksuaha si.

Leknak lam

World Cup Nehnak Co Tam Bik….

Leilung tlun bawhlung leknak ( FIFA ) cu May 24, 1904 ah din thawk a
si ih, July 13,1930 ah World Cup hmaisa bik cu Montevideo, Uruguay ah
an rak sit. Cui ni ihsin thawk in tui ni tiang laksawng a ngah tambik
tu cu Barazil an si; kum ( 1958, 1962, 1970, 1994, 2002 ) nga an ngah
zo.

MT. Everest Kaisuak Hmaisa Bik…..

Mount Everest cu leilung tlun ih tlang sang bik, Nepal ram ih um a si
ih, Edmund Hillary ( New Zealand ) le Sherpa Tenzing Norgay ( Nepal )
cun May 29, 1953 zing lam 11:30 ah tlamtling ten an kai suak thei
ruangah tlang sang bik Everest kai suak hmaisa bik tu an si.

Boxing Champion upabik

Archie Moor ( USA ) hi Febuary 20, 1962 tiang khan Leilung tlunah a
rak champion ih, a suah kum ngai ngai hia fianglo nan kum 45 le 48
karlak cu a si zum a si. Hi a champion sung ( 1936 – 63 ) ah hin vei
145 rori nock out in a tummi pawl a rak neh dah a si.

VL Bawithang

Arsene Wenger hi zo saw asih?

Leitlun hmun dang dangih Arsenal fans hnihtirih,vawi 49 meuh hneh lo
nei lovi rak hruaitu Wenger cu 2008 tiang umsal dingin contract a
ngan sal.A mah hi na hmel theih zo maw?

football a lek theu

Wenger hi Oct 22,1949 strasbourg,France-ah suak.A nauhak lai ihsin
baal a lek theu.1967-ah Mutzingclub,1979 Racing a lek kumah an
Champion.1984-ah a chawl.

Manager a tuan

1987 Nancy Club cun Manager-ah an lalut.1988 monaco cun an ko
salih,an tifuh zet.An champion ih France Manager of the year-ah an
hril.1992 Europeon Cup Winners` final-ah Monaco cun final -ah an hneh
loh ruaangah anban.!995-ah Japan lamah a feh daihih a cang tha
zet.Manager tha berah an hril.

Highbury a rak thleng

1996 october-ah Arsenal cun an kovi tu tiangin a tuanih an ban siang
lo ding.Hi kum League-ah 3 nak an si.1998-ah League-ah an championih
manager of the year a si la la.2000 UEFA Cup-ah final,2001-ahLeague-
ah 2 nak.2002-ah premiership le FA Cup an double.2003-ah FA cup-ah
le,2004 Premiership-ah an Champion.

Mutu a cawl ding

Romanian Chelsea`s striker Adrian Mutu cu si (cocaine) a rak hman
theu ruangah FA cun thla 7 tian cawl dingin an ti.October 25,2005
tiang.US$36,800 a kuan ding.2003 ah Italian Club Pama ihsin Million
15.8 i an lei a si

Brown Man U ah a umsal ding

Manchester United Defender Wes Brown(25) cu hmun dang feh loin Man U
ah 2008 tiand um dingin contract a ngen sal.Brown cun `Man U hi nuan
ka ti

ih um ring ring khal ka duk` a ati.

Beckham a blue pei maw?

Real Madrid midfielder David Beckham cu tu season cemah Chelsea ah a
feh men thei.Chelsea hin million 18 in lei an tum deuh ih ziang an
bang ding.David khalin England lamih kir sal khal a duh.A suah nak
Man U ah cun a kir nawn lo hrim hrim ding.England ah cun Chelsea hi a
um cak club a rak si zo.

Champion League

Premier League ih 49 tiang nehlo neilo ih feh vivo Arsenal cu
Champion League ah khal ziang an bang tuk lemlo.

Tui zarhtlawngkai nihnih ni Panathinaikos ( Gre ) cu an mikhual ih 1-
1 in an bangaw. Intek an cang tthalo sawn. Thierry Henry cun goal
hmaisabik a thun ih, France pacang Pascal Cygal cun an mai lamah
rinlo piin a goal pang. Penalty an neh ih, Angelos Basinas cun a goal
lo. Arsenal hrangah cun lungawium tak khal a si.

Cakloh duhlo Barca..

AC Milan hi leitlun club hmuah hmuah in neh har an tibikmi pakhat an
si. Barcilona hi an leknak tin kimah nehloh duhlo in an ttang ttheu.
Milan’s Shevchenko cun min.17 lawnga ah goal a thunih, half time hlan
deuh teah Samual Eto cun a sut sal a si. Min 88 ah Brazilian striker
Ronal Dinho cun goal sunglawi zet thun in nehnak cu an co ngah ta a
si.

Ruud a mak sin sin…

Champion group D ManU le Sparta Prague ( cze ) leknak ah ManU cun 4 –
1 in nehnak an co a si. Dutch striker Ruud Van Nistlerooy hin goal 4
rori a thun. Champion league ah Rudd hin a thun thei zet. Kan dung
Arsanal thawn an lekawknakah Asley Cole parah yellow card a hmu nak
kha action an la ih Premier League ah game thum a cawl ding a si.

Neville tei unau…

Leitlun bawhlung sitnak an unauih bawhlung lek tlang hmuh ding an tam
lemlo. Gary Neville ( 29 ) le Phil Neville ( 27 ) tei unau hi, nauhak
laiih sin Man U ah um an si. Man U ahcun an tlaihsan zet ih, Gery hi
right back a siih, Phil hi midfileder a si. Gery hi leitlun bawhlung
sit thiam Zinedine Zidine le Alexandro del Piero le khalin pahtlang
har an ti zet. Right back ah cun a mah bangtu cu an um lemlo ding. An
unau in kum nga tiang ManU ah um sal dingin thu tiamnak an tuah a si.

Owen a danglam thlang

Real Madrid ah goal thun thei lo tiih an sim rero Owen cun goal 4 a
thun ve thlang.Real fans hnihtertu a si sal zo.Coach Remon cun `ka
player duh zet mia si `at.

LIVE

Sun,Nov 7

Middlebrough vs Bolton(9:55pm)

Man United VsMan City(12pm)

Getafe Vs Valencia(11:55pm)

AC Milan Vs AS Roma(3:55pm) Mon,Nov 8

2005 hrang Falam mino pawl ih dan thar

1. Duhtu nei tam tuk nunau pawl : nan duh mi pakhat vial nan hril
dingih a dang pawl kha nan rualpi dang pawl hnen ah nan ap ta ding.

2. Mah duh tu zianghman ih a rel lo (ngaihsak lo) tucu harsat nak a
tawng tikah cawhkuan ter bet ding.

3.Mai duh mi duh thu sim ngam lo tu cu raldo nak hmun ihsin tlansuak
tu a si ruangah thu then nak hmunah kawh nan si ding.

4. Kum 25 si zo hnu ih nupi pasal nei lo tu cu hnatuan ding can ih
tuan lo tu mize hmin in cawhkuan ter nan si ding.

SH. Piang II

Nupi a nei har awm..

Tivar khuaah tlangval felzet pakhat a um an ti. An khaw fala mawibik
cun a uar tuk ih, ” ka u, loah kan feh ke” tiah a sawm. Sunvu te loah
cun an tawivak rero. Fala nute cun, U…leitlunah zosi na duhbik
tiah, beisei neinawn cun vawn sut khaw, ” Ka nu” tiah tlangvalpa cun
a rak sawn lohli. Fala nui thin nuamlo cun, U… ziang hman tuahlo in
maw kan tlun sal ding a vawn ti sal ih, tlangvalpa cun ” zan thing
tla kan tlun phah kei cu” a rak ti bet. Fala nutei beidawng tuk cun,
Ih hi.. “nangcu na palo tukaw” vun ti sal khaw, tlangval pai thin
tuarlo cun, ” ka palo maw” ti pha in thingkung sangpi parah a kai san
ta an ti. ” Nupi a nei har awm”.

Ela

Hruaitu zarhtin thuthang cu on line www.ycld.org

ah siar theih ringring a si.

Tawlrel tu pawl.

(Visited 44 times, 1 visits today)

Comments

comments

Comments

%d bloggers like this: