Hruaitu Issue 48

Hruaitu zartin thuthang

A vei 48 nak

October 24, 2004

Editorial

Diknak hi thup theih a silo

Leilung tlun thil hi kawpi neilo thil pakhat hman a um lo. Thim a um
ih khua eng khal a um, a dum a um ih a var khal a um, thil ttha a um
ih thil tthalo khal a um, hnih can a um vekin ttah can khal a um,
bumawknak a um ih ” diknak” khal a um a si. Milai kan thil tawnmi lak
ih harbik pakhat cu, kan tumtah vek ih thil a rawng silo can le
pakhat le pakhat kan theih thiam tawnawklo can hi a si ko.

Tulai santhar ah cun, duhdawtnak a hlo ruahro thlang ih

” diknak” hmu ding khal in milai pawl umlo nak ih hawl a ttul thlang.
Lai nonawn pawl tthaten kan ruat kir sal hnik pei uh!!! Kan pipu pawl
ih diknak an rak ngainat zia le, khat le khat duhdawtaw te ih an rak
tlan len dan nun mawi te kha. Kha tin thuanthu menah maw kan liam ter
ding.

” Maw diknak, bumawknak le thlisia phunkip lakah lengin, khua hman
tang thiamlo in um khal awla, kan Lai mino pawl lakah hin rawn
parsuak leh hram aw maw!!! “Diknak hi thup theih a silo”.

Editor : : Richard K. Emmanuel

A suahtu : : LCF Calai Committee, Malaysia.

Mail At : richardemmanuel4u@…

Minung pakhat ciauin tuah theimi kan nei

Tui ni tiang kan dinhmun hi zohsakl ciau hnik uhsi. kan ram, kan
miphun, kan kawhhran ziangvek dinhmun kan thleng thlang? Mai duhnak
hrang lawngih nung kan si pang pei maw? Kan ram a har, kan miphun in
mi kan banglo kan ti teh kan zoh cuahco men ding maw? Milai in kan
mah tawkin tuah theimi kan nei ciau, cupawl teh ziangvek canah so kan
suah leh ding. Hman nakding can tla kan neilo pang a phanum zet. Kan
neih sumsaw thazang le fim thiamnak kan miphun hrangah akan suaha cu
tuk zo.

Esther thuanthu hi kan zoh hnik pei! Judah miphun hmuah hmuah thah
thluh ding an ti tikah, Mordekai in Esther hnenah fehin ” Hi bangtuk
tikcu can ah hin daiziar in na um a siah cun, van ihsin Judahmi
bawmtu a ra dingih nang le na innsang cu nan cem ding” tiah a t. (
Est 4 : 14 ). Esther le Mordekai ruangah an miphun pi in luatnak an
hmu.

Esther thuanthu hi kan zoh tikah, siangpahrang fa le bawi fa khal an
rak silo, sal dinhmun vekih mairam suahsan tahratih miramih khua a
satu an si. Asinan, an miphun an duhdawt ruangah Pathian in
siangpahrang dinhmun tiang a cawisang a si. Esther cun a nunnak hrang
hman ruatlo in siangpahrang dan cu a bal ngam. An miphun hrangih tuah
a ttulmi cu ngamzet in le Pathian thu rawn phah in hna attuan ih
zehnak khal a co. Pathian in in cawisang seh tiphah ih mipi duhdan
zoh men in hna a ttuan lo. Tui ni canah, mai ram sung hmanah um
thiamlo ih mibang beisei ih kan vahsuahnak khal hi kan miphun
cawisang tu le kan hmailam nun khaisang sin sin tu ding kan si. Kan
miphun khaisang ih hruai tu dingah Pathian in nunau, mipa, mifim,
mithiam le milian tiin a hrillo, a mah rinsan ih miphn a duhdawtu
lawng a hril. II Sing 7 : 3-6 khalah kan hmuh mi cu, phar pali hmang
khalin Pathian in Syria ralpawl a neh ter.

Curuangah, kan miphun hruaitu pawl ih tlinlo nak tete khal sawmsoaw
in keikhal kan miphun hrang ah tuah theimi ka neive ti thinlung thawn
hmai nawr ciau uhsi. To men ding kan si nawnlo kan cu tuk zo. Biaknak
le miphun thawn a hlaaw mi miphun cu rannung hman kan tluklo tinak a
si. Rannung hmanin a miphun hawl a thiam. Mah tawk Lainu Laipa, tomen
can a si nawnlo. Mah le kan tuah thei tawk ciauah ttan la tlang ih
Vapual rinumnak la in kan ram le miphun hrang ttuan ttentto uh si.

Salai Biak Hre

Khaw”i Lamah So Na Um?

Leitlun minung hmaisabik, kan pa Adam hnenah Pathianin “Khuiah so na
um?” tiah a sut. Zumtu nang le kei khal a tu ah Pathianin khuiah so
na um tiin in sut.Mai umnak hmun thei lo hi leitlunih mi aa bik kan
si. Adamin Pathian a let (phi) sal dan cu ” Hmuanih na rat thawm ka
theiih ka lawngte in ka si ruangah ka ning a zakih ka relh a si” tiah
a ti. Zumtu u le nau, tuisun ni ah nangteh a phi na pek dan ding
ziang vek a si? Pathian thawm theiin ningzakih relh tu maw na si
ding, maw… Pathianih thawm theiih lungawi aipuangih rak hmuak tu
sawn ha na si ding nangmah leh nangmah na ruat fel awk a tul a si.
David Mawi

Chin ( Falam) sungkua thurel tlangnak

A hmun Pa Hrin Uk Inn

A caan October 17,2004

A tikcu 5 pm

Mipum 86

Can kaitu Salai Tha Nei Thuam

Meeting ap thlacam Pa Sui Lian Thang

Fawrh fialnak Salai Solomon Lal Ci Luai

UNHCR thusimtu Salai David Mawi

Agenda

(1)Pawlkawm dinding thu

(2) Sumpai thuhla

Thurel cat mi pawl

(1) Malaysia ramsung um Chin raltlan (refugee) in kan hmailam can ah
tlamtlingten UNHCR bawmnak kan ngah theinak dingah dikzet le
felfaizet in hnattuan theinak ding hrang pawlkawm dinsuah a si.
Pawlkawm hmin cu Chin Agape Refugee Centre a si.

(1) Pawlkawm hrangih tuanvo kai tu ding pawl,

Salai David Mawi Coordinator

President Salai Solomon Lal Ci Luai

Vice President Pa Run Thuan Hre

Secretary Salai Bawi Hre

Asst. Secretary Salai Siang Hu Thang

Treasurer Pu Sui Lian Thang &

Salai Ro Vel Thang

Auditor Salai Ronald Tha Tin Mang

Join Auditor Salai Eddy Mal Sawm

Salai David Thang member

Mai Lal Fak Zual –

Salai Tha Nei Thuam –

Salai Hrin Uk

Hnattuan dan ding cu committee pawl tuizarh October23,2004 ah thurel
tlangnak neih sal a si dingih hmaizarh sungah thuhla fiang deuh in
than nak neih a si ding.

Prime Minister Khin Nyut an kai ngai maw???

Kan dung October 18 niah, kawlram Prime Minister Khin Nyut cu a
tohkham ihsin hlawn a si tiah Thai thuthang cun October 19 ah a
phuang suak. Asinan, Thai PM cun Khin Nyut hi, kaih silo in Prime
Minister dinhmun ihsin a sinak kel te ah a tla sal sawn a si a zum
thu tla a phuang ve. Kawlram PM an kaih thu ah hin thuhla fiang fel
ngai ngai theih a har zet. Tulaifang ah hin Yangon khawpi sung cu dai
khep khep in a um nan, cozah hmun pawimawh le zungpi kiangkap, hmun
kipah kilvennak lam ttuantu ralkap pawl an um khep khep a si. Khin
Nyut a hlo tina maw, an kai ti na maw, sii zungah a um ti na maw, a
sinak an thlengsak ti na maw, Kawlram PM thuhla cu a phun phun in rel
hluahhlo a si ko. Asinan October 20 ih Malaysia ” The Star” thuthang
ca cun Khin Nyut cu rampi zuarthlaitu ( corruption ) ah puhin kaih a
siih, kilvennak hnuaiah ( house arrest ) a um, tiah an suah.

Soe Win kawlram Prime Minister thar

PM Khin Nyut cu a harhdamnak ina tlin nawnlo ruangah le rampi paisa a
eiruk tamtuk ruangah, Senior General Than Shwe ih hmin tthutnak thawn
a tokham ihsin hlawn a siih, Lt- Gen Soe Win cu Prime Minister ih
hlankai a si tiah ralkap cozah cun thu an than. Cun Vice Gen Teing
Sein khal cu Secretary 1 ih hlankai a si.

Kin Nyunt hi Mandalay ah AIDS thuhla relkhawmnak ih a tel hnu, Yangon
a ratlun veten Jun ta ih lubik pakhat a simi Vice Senior Gen Maung
Aye le ralkap hotu lu pawl cun an rak kai a si. U Win Maung cun Khyin
Nyunt an kaih hi kawram hrangah cun thil mak danglam le thlengawknak
nasazet tiang thleng thei ding a zum thu a phuang . PM Khin Nyunt hi
ralkap Inteligences background ihsin rawn kaiso a si ruangah tuittum
thil ahhin a lam ih dingngam ngaingai tuding an um zum a si lemlo.

Kawram hruaitu pawl an thlengawk ruangah hin NLD party hrangah cun
thawsuah vuarvinak ding zianghman a um cuanglo. Asancu, tuih kan
Prime Minister thar hi, ” NLD pawl cu, tharum thawh ih ramuk tum pawl
an si” tiih ruahnak neitupa a si tiah kawlram mipi hrekkhat cun an
hmu a si. Thai thuneitu pawl khalin kawlram uknak thlengaw ding cun
nasatak ih ttuan a ttullai ding thu an phuang ve. Kan ram uknak
thleng danglam duhtu ramdang Vuankyi Win Aung le Vuankyi dang 4 rori
kan dung September 18 niah hlawn an sizo fawn, curuangah kan ram ih
thlengawknak ngaingai thleng ding cun thil awlai a silo tiah U Win
Myin cun a hmuh dan a phuangsuak ve.

Suu Kyi suahnak hrang Leitlun hlasak thiam pawl in….

Kawl ram NLD hruaitu Suu Kyi kilvennak inn ihsin a luat theinak ding
hrangah leitlun hlasak thiam hminthang pawl cun, hla thunkhawm dingin
an tawlrelih, October 26 ah ngaitheih ih suah a si ding. Hi Leitlun
hlasak thiam pawl hin hla 27 rori in, Nobel laksawng tiang ngahtu Suu
Kyi cu suah sak an duhzia lanternak ah an thunkhawm ding a si. An
ngahmi paisa hrekkhat cu US ih kawlram thlengawknak ding hrang
ttuantu pawlkawm ( US campign for Burma ) pawl hrang a si ding.
Democracy hruaitu Suu Kyi hin 1989 le 2004 karlak ah Leilungtlun ram
tinkim ihsin laksawng ( 65 )rori a dawng a si.

US thuthangca pawl in ttanlam langter

US President hrilawknak ih tawngaw ding Bush le Kerry cun tulaifang
cu Florida mipi pawl neh tumin an ttuan nasa. USA ih thuthang cabu
tum deuh deuh pawl khal in an ttanlam lang zet in an ngan. New York
Times le Boston Globe thuthangca cun, ca siartu pawl cu Kerry vote
dingin an fak ciamco ih, The Chicago Tribune le Dallas Morning News
cun Bush vote dingin an casiartu pawl cu an lem ve rero.

President Bush ih unau pa hi Florida Governor a siih, a mipi pawl
Kerry hnenih vote thlaklo dingin ttan a rak la ve nasa hmang. Bush le
Kerry tei pahnih hrangah hin zarh thum khal thusimnak can an nei
nawnlo. Ziang tluk an ttuan ding.

Booker laksawng ngahtu Alan

British ca ngan thiam hminthang Alan Hollinghurst cun kan dung
tlawngkai nihnih niah International Literary Booker laksawng a ngah
riai. Hi cabu ( picture ) ” The line of Beauty” ti thupi hmangih a
nganmi ruangah hi laksawng EU paisa 50,000

( RM 343,559) hi ngah a si. Ca sungthu ahcun, tulai mipa ( guy ) pawl
ih cangvaihnak le lenglam mawinak lam hlir ngan a si. Kum 50 mi
Hollinghurst hin lsksawng a dawn niah, “hi cabu hi kemai nun rori
khal hmuh fiangawk ka beisei ruangih ngan ka si” tiah a phuangaw.
Aliamciami kum 36 sungah, mipa thuanthu ( guy fiction ) thawn
pehparaw in, Alan hi International laksawng dawng hmaisabik tu khal a
si.

Lebanon Prime Minister-in a hna a cawlhsan

Lebanon billionaire Prime Minister Rafiq Hariri cun an ram politic
buai hniai hniai ruangah, kan dung zarh khan a hna a suahsan
vuarvi. ” Ka suahnak ca hi cozah hnenah ka aap ih, hrilawknak khalah
tel ka tum nawnlo law law” tiah kum 12 rori Prime Minister rak ttuan
tu Hariri, 59, Sunni Muslim pacang cun rampi hmaiah a phuangaw.

Japan ah Typhoon thlipi

Kan dung zarh ah Typhoon thlipi cun Japan ram a nuai ciamco ih milai
63 rori an thih hngal ih hleiah mi 25 cu tuini tiang an hlo lai.

Cun hi thlipi ruangah hin milai 150 lenglo cun hliam nazet an tuar
bet tiah Japan thuthangca in a suah. Tuittim ih mithi pawl tamsawn hi
tipi ih lawng thawn hna ttuan tu pawl an si.

Van zam le vahicles tamnawn cu service an dawn ruangah milai 103,000
cun tlawnvahnak lamah harnak tiang an tuar phah ih, inn thawng tampi
cun Electric hman ding an neihlo phah bet. Inn 493 rori tilian in a
cim ih, Inn 90 cu luah tlak nawnlo ah an cang; cun inn 128 cu leicim
in a tisia thluh bet. Thli lawng silo in ruahpi vanawn in a nuai bet
ciamco ih, Japan mipi hrekkhat hrangah cun buaipi kum a thleng a si
ko. Tui kum sung lawngah Japan ram hi thlipi in vei 20 rori a nuai
zoih, milai nunnak 120 lenglo a liampi thlang.

Afghan hrilawknak kha

Afghan ram cun kan dung baite ah President hrilnak an neiih, an ram
mipi hrekkhat hnakih tam rori in Hamid Karzai cu President ah an hril
a si. Tui ttum hi Afghanistan hrangah cun direct ih President an
hrilnak hmaisabik khal a si. Hamid Karzai hin 60% rori in a mah khing
tu pawl cu a neh hai a si. Taliban pawl uk nak, Civil doawknak,
Soviet pawl uknak, Communist pawl uknak le British/US ukbehnak hnuai
ih can saupi rak hmang ttheu tu Afghan mipi pawl hrangah cun, tui
ttum ih direct president hrilnak can an ngah hi a sunglawi zetmi can
( chance ) a si ko.

Malaysia ah danlo ih hnattuan ru ramdangmi pawl hrang…

Malaysia ram sungah danlo ih a umtu ramdang mi hmuah hmuah hrangah
mai ram ciau ih tlun kirsal nak can ttha, ni 17 sung cozahpi cun a
awnsak ding. Kan hmai October 29 ihsin thawk ding a siih, ni 17
sungih tlung duh an um cun thuneitu pawl khal ih hnai hnawk lo dingin
Putrajaya cun thu an suah a si.

Hi mi can pekmi sungah vanzam ih tlun a duhtu pawl hrangah cun, an
tlun kirnak ram ih pawm thei ding mi ca

( documents ) pawl le passport thawn lawng khal KLIA, Bayan Lepas
Ipoh, Batu Berendam Kuching le Kota Kinabalu vanzam hmun ihsin tlun
theih a si. Ramdangmi danlo ih hna ttuan tu pawl cu an hlawh kim te
ih pe lohli dingah boss pawl cu thuneitu pawl cun an dil a si.

Malaysia ah Kyansitta film an suah

Kawl ram siangpahrang hlun Kyansitta ih thuanthu an cannak film cu
Malaysia zohnuam zungpi rori ah suah rero lai a si. Na zoh hrihlo a
siah cun KLCC le Sunway Pyrmid zohnuam zungpi ah suah a siih, October
30, 31 zinglam 10: 00am ah rak zoh ve teng teng aw. Ticket cu RM 15
lawng a siih, Zayyar Store le KL ih kawl dawr hrekkhat ah tla ticket
lei cia theih a si.

Bill Clinton Kerry ttan dingin…

Bill Clinton cun kan hmai zarh ah Democratic candidate John Kerry
ttan dingin le campaign bawm dingin a natnak ihkhun ihsin thawhsuah
ve a tum a si. Kum 58 mi US president hlun cun Kerry cu theih tawp
suah ih ttan lakpi a tum thu a phuang nasa.

Heinz Kerry in Laura Bush hna ttuan ngai ngai a neih le neihlo a
sut…

Teresa Heinz kerry, John Kerry ih nupi cun US President dinglai Bush
ih nupi laura hin hna ttuan ngai ngai khal a neilo tiah nautat nawn
in a ttawng suak. Asinan, Bush ih milai pawl cun Librarian hna attuan
thu le Inn sungsang ah zirhtu tthabik hna a ttuan thu in an let.
Laura Bush cun ” Inn sung kilkhawi le, fa le lam ttha ih zirh hi hna
tumbik le pawimawhbik cu a si ko” a ti ve. Heinz Kerry hin ”
Librarian” a si ka rak hngilh pang a si, in ngaithiam uh”, tiah Laura
Bush cu ngaidam a dil sal.

Tuluk Gas puakah mi 60 thi

Kan dung zarhah Tuluk ramih meihawl pukah gas a puak ih milai 60 cu
an thi hngal. Mi 88 khal an thih le nun khal theih lo in an hlo ih,
tui kum sung Gas puak ih thih tambik ttum le siat tuar tambik ttum
khal a si. Hi Gas hi kan dung tlawngkai nihnih niah, Henen Provin ih
Daping mine sungah puak a siih, lei laitu milai 446 hrawng an um ih
298 cu an luat man a si.

French ah tlawng nauhak lutuam an dawn

French ram cun kan dung deuh ah tlawng inn sungih Muslim pawl lutuam
tttheu cu khamnak dan thar an tuah ih, hi dan hi hngeh ter sin sin
khal a si. Kan dung zarh lawng hmanah Muslim lutuam ih tlawng ra kai
pawl 6 lai cu tlawng ihsin an dawi . Hi dan thar duhlo hin tlawng
nauhak 70 hrawng cun zasazetin an duhlohnak an lan ter. Kan dung thla
ah French hin, cozah talwng inn ih Christian pawl ih cross, Musilim
le Siksh pawl ih lu tuamnak pawl tla hman an sianlo thu dan thar an
tuah a si.

Susilo in Indon hrang thutiamnak a tuah

Kan dung tlawngkai ninga niah Indonesia President thar Susilo cun
rampi hruai dingin mipi le a cabinets thar pawl hmaiah thu tiamnak a
tuah. Susilo hi Leitlun Muslim tamnak bik ram ih direct president
hril hmaisakbik mi khal a si. Susilo hin Megawati sanlai ih rak tlazo
ram hruaitu pali tla cabinet member ah a lalut bet sal ih, hi thutiam
nak ni ah hin Megawati ih hmel hmuh ding a um riai lo.

Theihkau nak lam

Savun Boot tumbik cu..

2001 kum ah Pasquale Tramontana

( Italy ) cun Leitlun ih zavun boot tumbik cu a rak tuah ttheh. Hi
boot hi 13ft. ih sau le 31ft. ih tum a si. Kum nga sung a tuah hnu ah
Lire ( Italy paisa ) 25million ( $ 11,416 ) rori a cem a si. Hi kedam
hi 614lb ( 280kg ) ih rit a siih, savun khal 40 hide hrawng hman
thluh a si.

Mitkharh ( Sun glass ) larbik

Ray-Ban sungless hi 1998 tiangah unit 10 million rori khawng ttheh a
si. Ray- Ban company ih tuahmi lakah Waifarer model hi 1953 ihsin
hman theih a rak si zoih, Leithlun Sunglass thuanthu ah zuar khawng
tambik mi khal a si. Italian company luxottica pawl cun 1999 ah an
ram ih Ray-ban Sun Glass an khawng dan thu an report nakah 372.1
million a kim ban a si.

Paisa lalut tambik model cu..

Brazil fala Gisel Bundchen cu leitlun model hmuah hmuah lakah paisa
lalut tambik ( top ) rori a si. Hi fala nute hin 2001 ah $
12.5million a hlawh suak a si tiah June 21,2002 ah Forbe Celiberty
100 lists cun an suah.

Mawttaw saubik

Leitlun mawttaw saubik cu 100-ft ( 30.5m ) a siih, US pacang Jay
Ohrberg ih tuah suahmi a si. Hi mawttaw hi zohnuam ( film ) pawl tuah
nak ding le Leitlun minung pawl in mak danglam an ti ding hrim hrim
ih tuah suah mi a si. Hi mawttaw sung ah hin tidai khawlhnak kuang
pawl tla ret cih a si.

Mawttaw fatebik

Leitlun mawttaw fatebik ( a hnuai zuk ) cu UK ih Peel ingeneering
company in 1962 le 1965 karlak ihan rak tuah suahmi kha a si. Hi
mawttaw hi a saulam 134cm lawng a siih, 99cm ih kau/ tum, 53cm ih
sang lawng a si. A rih lam khal 130lb lawng a si.

Thuthan

Hmaizarh ( 31 October, 2004 ) ih can hmangtu ding pawl

Can kaitu Pa Lal Sawi Cuang

Thuthangttha simtu Pa Sui Lian Thang

Zapi hrang thlacam Salai Pa Ro Sum

Solo Salai Lai Lung Lian &

Salai Biak Tin Ceu

Bible zoh lo siar Salai Vai Hre Lian

Thawhhlawm ap thlacam Nu Zungte

Hlarem Mino pawl

Awnmawi tumtu Joseph Zung Thang

Kan dungzarh thawn pehpar in

Khawmcan Khawmtu Thawhhlawm Mithar 5

Zarhpi zing 154 363 Zarhpi zanlam ( mino) 55 77. 50

Zarhpi zan 24 –

Zarhte zan 49 88.70

Zarhpi zing thlacam 24 –

Fang er Puai

October 31,2004 ahLaimi pawl ih ni sunglawi kan neihmi Fang Er Puai
Lai kumthar cu LCF biakinn ah kan hmang ve ding. Sang le a dai in
tlangnak kan nei ding..

Leknak lam

Khawi lam ha na ttan? ( Sun 24, 11:00pm ESPN )

Manchester United Vs Arsenal

English Premier League a vei 10 nak ih ManU le Arsenal Old Trafford
ih lek ding pawl hi kan hngahhlap zetmi cu a si. Premier League ahcun
team zohnuam bik khal an si ko. Ferguson le Wenger khal an elaw rero
a sibik. Lektu ding pawl lakah cun Arsenal skipper Vieira a tel thei
ziklo ih,asinan Edu le Gilberto an um ko. Arsenal hi point 11 ih
thlauaw ManU hin an kham thei pei maw? Goal 8 nei zotu Thierry Henry
hi Rio Ferdinand hin a kham thei pei maw? England defender cakzet Sol
Campbell hin Englan rawlthar Wayne Rooney le Alan Smith tla hi ziang
tin a pahtlang thei ding. Ruud Van Nistelrooy tla a umlai. C. Ronaldo
ke hi Ashley Cole hin a kham thei pei maw? Ziangkhal sisehla,
bawhlung cu a hlum ih rel theih a silo.Tuzanah kan thei kei cu.

Rak zoh hrelh hlah:

Sun Oct 24 ( ESPN )

8: 55pm- Southampton Vs Birningham City

11 : 00pm- Man U Vs Arsenal ,7 : 00pm – Siena Vs Juventus

8 : 55pm- As Roma Vs Pelermo,11 : 00pm- Parma Vs Lazio

Monday 25 ( Super Sport )

2 : 25am – AC Milan Vs Inter Milan

Wed 27 ( SS ) 2: 40am- Millwall Vs Liverpool

Thursday 28 ( SS ) 2 : 40am- Man City Vs Arsenal.

`Nehnak co theilo ManU…

Manchester United manager Sir Alex Ferguson cun tui ttum cu player
ttha ttha, nehnak co thei dingin ka nei. Hmansehla, duh hnakin ka
thleng tam tuk deuh mawsi ding, ka tisual a si a ti. Fergie ih honak
hin ManU hin Premier League game ( 9 ) ah ttum thum lawng neh ih
table 6 nak lawng an si ban. Tui zan (24/10/04) ah point (11) rori ih
a sangsawn tu Arsenal thawn Old Trafford-ah an lek ding; an caang tha
nghin ding maw khual dawngtu’n ek an thlau sawn ding? A zoh lo tui
hrangah cun a pamhmai tuk ding..

Gerrard damtikcu hngakhlap…

Liverpool captain Steven Gerrard damlo khal in dam lam a pan vivo.
Tui kum sung rori ih a lek sal thei khal zum a si. Liverpol ttan tu
hrangah cun dam hlohhlo aw tiih thlacam sak a phu zet. Gerrard hi
midfilder goal thun thei a si khal Leitlun bawhlung zohtu pawl cun
kan hngilh lo. November 3- ih champion league Anfield-ah Deportiveo
thawn an lek tikah a tel thei a zum thu Maneger Benitez cun lungtho
zet in a sim. Midfielder Antonio Nunez, Real Madrid player hlun thawn
an dam tikah cun mithar 2 kan nei ding a si tiah a sim bet.

Nehnak co theilo ManU…

Manchester United manager Sir Alex Ferguson cun tui ttum cu player
ttha ttha, nehnak co thei dingin ka nei. Hmansehla, duh hnakin ka
thleng tam tuk deuh mawsi ding, ka tisual a si a ti. Fergie ih honak
hin ManU hin Premier League game ( 9 ) ah ttum thum lawng neh ih
table 6 nak lawng an si ban. Tui zan (24/10/04) ah point (11) rori ih
a sangsawn tu Arsenal thawn Old Trafford-ah an lek ding; an caang tha
nghin ding maw khual dawngtu’n ek an thlau sawn ding? A zoh lo tui
hrangah cun a pamhmai tuk ding..

Gerrard damtikcu hngakhlap…

Liverpool captain Steven Gerrard damlo khal in dam lam a pan vivo.
Tui kum sung rori ih a lek sal thei khal zum a si. Liverpol ttan tu
hrangah cun dam hlohhlo aw tiih thlacam sak a phu zet. Gerrard hi
midfilder goal thun thei a si khal Leitlun bawhlung zohtu pawl cun
kan hngilh lo. November 3- ih champion league Anfield-ah Deportiveo
thawn an lek tikah a tel thei a zum thu Maneger Benitez cun lungtho
zet in a sim. Midfielder Antonio Nunez, Real Madrid player hlun thawn
an dam tikah cun mithar 2 kan nei ding a si tiah a sim bet.

Bekham: Tih hrim ruangah Yellow Card

World cup qualifier England le Walse an lek laiah Captain David
Beckham in Ben Thatcher parih Yellow Card a hmuh nak kha a tihrim
rori a si thu hmaitawn thu suhnak ah a phuangaw a si. England ram cu
a hnin rori, relsiatnak khal tampi a dawng. FIFA President Sepp
Blatter-ih thinlung khal a hnin ter zet. Asinan, kan dung tlawngkai
nithum ni ah ngaidam a dil sal. Beckham cun Yellow Card veikhat ka
ngah zoih, ka ngah leh sal cun ka cawlh a ttul ding. Ka tuahmawh aw
ih Ajerbaijan thawn leknak ah tel theilo ding dinhmun ih ka ding
ccengmang tiin, depdet suah ih Yellow Card ngah cu ka hril sawn a si
a ti. “Hi thu ahhin, player hmuah hmuah parah le fans parah
ngaithiamnak ka dil ih, a hleicein Coach Eriksson parah ngaidam ka
dil a si”, a ti. FA cun actions an laklo ding thu daily mail cun an
suah ih, asinan paisa pound 100,000 laicu a kuan a ttul men thei.
Captain sinak khal a kai vivo ko ding.

Sii a rak hmang ngaingai a si pei maw?

Romanian ban hnget zet Adrian Mutu, English Premier League team
Chelsea striker cun sii hman sianlo mi a rak hmang thup ti theihsuah
a si. Ziang sii bik a hmang ti lawngte theih a si hrihlo. Veihnih
test hnu khalih a positive lai a siah cun, can reinawn cawlh ter a si
ding. Asinan Mutu cun hi thil hin ka thin i hnin ter ih, ka zum
banlomi thil khal a si, tiah sii a hmanlo thu a phuang suak ve.
By:VLBawithang

Hnih hi si ttha bik

AN SI DEUH LO

Tui tum tlawngkai nihnih niah Lai fala thar an thleng tiah thuthang a
um si hmang? Kan LCF Salai pa cu a hnatuan nazii pm 7 tiang tuan ding
asinan nazii pm 5 ah a theih mi rualpi hmuak dingin a tlung an ti.
Salai rualpi pawlin capoh ah Phone in fala hnenah Salai na rualpi ka
si tiah biak aw an tiih kawldawr in kan hngak aw ding tiah a
sim.Salai in “zosaw na hmin” tiah a sut nan a sim duh lo,a mangbang
tukah a hlan ih a fala nu hmin in ” Certe na si maw” a ti. An rualpi
fala pawl in le si ee. ” D V” in thei lomaw ka lo ngai tuk” a tiih
Salai cun a ningzakah “ngai ve tho ee” a ti. Salai cun sital zet le
thatho zet cun ka fala nu ka tawng thlang ding tiah lungawi ten
kawldawr lam pan cun a feh ih a ruah vek a rak si ta lo.A theih cia
mi a rualpi an rak si ta riai.

LCF tlangval fing fing

Malaysia LCF tlangval pakhat cu zarhpi sun khawm nakah Bible zohlo
siar dingin an fial. Sunday zing cu a helh hawlh tuk takah a mawca
hruk lai rori a hawl in, ” zo ha ka mawca hruk” tiah a hawl vutvo. Na
ke ih kha ziang ha tiah a rualpi pawl in an vawn sim veten ” Sorry,
Pathian thu in in neh tuk ih cunah ho khaw in ngai thiam uh, tui zing
ka Bible thu siar dingmi khal ngaithiamawknak thua si ding” ti phah
in LCF biakinn lam a pan voh vo… an ti.

LCF Mino

http://www.ycld.org ah Hruaitu, Rih Li , Bingbi le article a phunphun
siar theih a si.

(Visited 53 times, 1 visits today)

Comments

comments

One Comment

  1. vmYCO1 dwjugjpjuuoc, [url=http://xkpobuaqlafd.com/]xkpobuaqlafd[/url], [link=http://nrvlrapgvacm.com/]nrvlrapgvacm[/link], http://yrwpiykzvvod.com/

Comments

%d bloggers like this: