Hruaitu Issue 44, Sep 27, 2004

Hruaitu

zarhtin thuthang

Vol .44

Editorial

Tthan tawp

Kan Bible sungih kan hmuh vekin, thil ziangkim hin mah le can ciau an nei. Thingkung le Pathian tuahmi thil ziangkim khal in, sersiamtu mawi ter dingah an sidan ding ciauin tthan lam an pan. Asinan, thil ziang kim hin tthan tawp le tawp ni cu an nei thluh.

Kan nih milai khal hi tthang vivo ding le, in tuahtu mawiter tu ding ih sersiammi cu kan rak si ko. Milai hrekkhat cun thil kan vawn thiam deuh le theihdeuh hnu, degree kan vawn ngah le mi ih faknak tete kan vawn theih tikah kan tthan in fung ter ttheu. Kan theihmi le thiammi pawl hi kan tthan in tawptertu silo in tthan vivo kan ttul zia in fing ter tu si ringring sawn seh la.

Kan sungkua, kawh hran, miphun le pengpi kan hruainak le kan mah private nunram ciau ah a tthang rero lai maw kan si, kan tthan a tawp zo sawn? Kan lei taksa pum cun tthantawp ti nei hmansehla, zirding le theih ding hlir ih a khatmi Leilungpi sungih khua a sa rero tu kan si vekin, kan nih Laimi pawl khal mi kan banglonak zahpi lo ih in helhkamtu sisawnin Leitlun ramdeng le Van tawng rori ih tthang ding kan si.

Editor : : Richard K. Emmanuel

Join Editor : : Steven Tha Tin Kham

Asuahtu : : LCF Calai Committee, Malaysia.

Kan Lungawi

Malaysia LCF hmin ih suah mi, “ Hruaitu” zarhtin thuthang ca damcak zet ih a nun vivo thei nak ding hrang, volunteer rori ih in tawlrel sak tu LCF president Thomas Tthuam le Secretary David Thang, mai ngah dingmi umlo ti thei cing ten zarh tinte Biakinn sungih in zuarsak ttheu tu Pa Hrin Kam, Salai Suite, Salai Lian Zii Mang le LCF mino hmuah hmuah; Kan Pathian, miphun le calai duhdawt ruangih Cahram, Sermon, thufim, hnihsuak le thuthang phun phun rawn thawh khawm ttheu tu LCF members pawl le, Kawhhran hrang hmarngai zet ih in rak leisak ttheu tu: Internet sungih sin can ttha ui sianglo ten in rak siarsak tu, zumtu unau kan zate hnenah Pathian thlawhsuah malza a thar in tlung hram seh!!!

Relsiatnak le dotu tampi karlak ah kan calai hrang ah hi vek ih kan ttanrual thei vivo cun, kan “ Hruaitu” hin mi a bang vivo dingih; Leilungpi milai maktara pawl lak khalahah Lailun suak Laimi pawl, lam ttha in khihhmuh tu le lam in hruai tu pakhat a si ko ding. Ziang kim parih khua a khang tu le a thupte ih in zoh ringring tu kan Pathian cun Laimi pawl lam in hruai in, in khaisang vivo hram seh ti hi kan saduhthah le thlacamnak tumbik a si. Kan calai hrangah kan fimthiamnak le thei tawk suah ciau ih ttangkhawm vivo in hmaiah nawr sin sin uhsi.

Norway Ram

Norway ram hi vur le dai tlak ringring nak tlang ram, Europe ram mawi zet pakhat a si ih 323,878sq km ih kau a si. Norway ram hi a liamzomi kum 10,000 lai ih sin rak din thawkmi Kristian ram a siih, an local hmin cu “ Norge” tiin an ko. Leilun ralpi I nak laiah Norway hi ttan lam neilo ( neutral ) a rak si. Leitlun ralpi II nak ih thlahnih sung rori an ttan ttentto hnu April 9, 1940 ah Nazi kut sungah an rak tlu lut. June 1945 ah Norway lal sungkua pawl cun an mai ramteah an rak tlung kir sal ih, 1957 tiang kha lal Hakon in a rak uk. Lal Akon ih fapa Olav V hin 1991 tiang kha Norway ram hi raldai zet in a rak uk ih a hmin khal a thang zet.

An khawpibik cu Oslo a siih, mipum 4.4million hrawng umin Europe ram ah cun mipum malnakbik ram pakhat a si. An capital khawpi ah hin mipum 495,000 hrawng an um ih, Bergen khawpi ah 224,000, Trondheim khawpi ah ( 145,000 ), cun Stavenger ah 106,000 hrawng an um. Norway milai tamdawn cu Nordic, Alpine le Baltic miphun ihsin suakkeh mi an si.

An ttawng hman mi

Norway ram hin ttawng hman tambikmi ( official ttawng ) pahnih an nei ih Bokmal le Nynorsk (NN ) tin an ko. Hi ttawng pahnih hi cozah tlawngah an zirh veve. Bokmal hi an Lal sungkua pawl le mi hlun deuh pawl ih hman tam mi ttawng a si. Khawpi tum deuhdeuh sungah cun Bokmal hi an hmang tlangpi. Hi ttawng hi an ram mipum 80% hnakih tam in an hmang.

A pahnihnak Nynorsk ( New Norwegian ) hi kum 1500 laiih ttawng hman mi thleng duh tu pawl ih hman mi a siih, an ram thlanglam ih um pawl le thingtlang khawte ih um pawl in an hmang tlangpi. Asinan, hi BM le NN ttawng hi an ram mipi pawl cun an thei kawp thluh ko. An khawpi le Tourist tam deuhnak hmun pawl ahcun Mirang ( English) ttawng khal kauzet ih hman a si.

Theih ttul dang te te

Norway hi ram daituk a siko nan, tlawng duh tui hrangah May le September karlak ah khawdai a dem deuh. An man canah cun harhdamnak hrangih khawlak vah ( walking ) le nga siau tla an uar zet. Norway inn sangih va len cun, ei ding an tuahmi hmuahhmuah a kim hlan ah inding an hun mi pawl kha tham hrim hrim lo ding. Mi thar hrangah lamzin zuk ( mipung )pawl cu cabu dawr le tourist office pawlah a lak ih lak theih in a um.

Norway paisa Korne hi Leitlun ( International ) cun NOK tiin an ngan ih, Europe ram thlanglam cun Nkr tin an ngan laiah an ram sungah cun “kr” tin an ngan. Paisa nawi ( coin ) 1, 5, 10, 20 pawl a um ih, cahnah 50, 100, 200, 500 le 1000 pawl tla a um. American Express, Visa, Master Card le Diners Card pawl tla an ram pumpi ih dawr tum deuhdeuh ahcun hman theih thluh a si.

Norway ram code cu ( phone ) 47 a si ih, Internet sung in, www.norway.org/ thawn an ram thuhla duhmi pohpoh hmuh theih a si. Electric current cu 220v ( 50 ihsin 60Hz ) a siih, kua hnih nei plug an hmang tlangpi. Sunday niah Bank, Store ( dawr cekhnawk )le rawldawr tam sawn cu khar thluh a si. Kum 18 kimlo cun Beer le Wine pawl in sian a silo….

Note : Europe ram pawl rawn ngan phahphah kan tum ding.

Leitlun Awnmawi

Music thuhla ngan dngih in sawm ruangah tampi ka lungawi. Music thiam le theitu tampi nan um ko ding, asinan ka thei tawk ten ka rawn ngan ve a si keicu. Music hi mi tampi cun an ngai an siarnak ihsin an thinlungah thiamve duhnak an nei ih, a thiamcia pawl tum awn an theih tikah an kiang rori ih hmuh le theih ten teng an duh. Music awn le tumdan phunphun an hmuh tikah thiamve duhnak, sak ve duhnak, an thinlung sungah a rawng lutih duh hril ding khal a rawng pek cih.

Music uar le duh taktak pawl cu an ziaza ah hmuh theih in a lang. An uarbik mi kha thiam dingin an zuam ih, zoh mawi le mawilo khal ruat nawnlo in music lam ih hmin thang pawl sammehdan le hnipuan hrukmi tiang cawngin an nundan an cawng. Music hi sanpi herdan thlun in milai pawl thinlungah hna a ttuan ttheu.

1928 ah New York khawpi ih music puaipi ihsin Guiter hin mipi thinlung ah hna a ttuan thawk ih hmuh a si. May 1956 ah Rock and Roll mino hla sak thiam Break Saly ih sakmi riahsiatnak hla ( Heart Break Hotel ) timi CD cu mipi pawl in an rak uar tuk ih, Break ih hlasak mi ihsin Leitlun mino pawl cun Guiter hi ti huho in an rak uar a si tiah fiang ten kan hmu thei. Curuangah awnmawi hin leilung tlun milai pawl kan mah le san tiluan dan thlun in kan uar zawng le uarlo zawng khal a dang vivo. Guiter thawh kehnak a sang sang ten zarh tin rawn ngan thei ka rawn tum ding.

Guiter Thawhkehnak

Tui ni Guiter hmin thannak kan zoh tikah a tawi tuk lai kan ti thei. Asinan, kum 1000 lai a reizomi thuan thu neitu a si ve. B.C 1000 laiih rak suahmi Aramayna timi sungah AD 600 lai ta Guiter thawn bangaw zikmi Ruk Chuan cu an rak hmu.

Guiter thuanthu kan zoh tikah Guiter hi Arab ram ih sin an rak uar thawk ih, Sekary miphun pawl in “ Kitara” timi ih sin an rak uar thawk tin kan hmu thei. AD 711 ah Moor timi miphun tenau pawl cun Persia ih Juda ral an rawng donak ihsin Guiter le thilri phun phun tla rwng suak bet ih hmuh a si. Cui an thil tuah suak tharmi pawl cu Spain ramah an phur lut ciamco. Hi pawl hi tuini ih kan hmuhmi Guiter pawl thawn an bangawlo nasa, a fate zet ih ( Tayaw ) thawn an bangaw sawn.

Apakhatnak Guiter cu Rebec tin an rak ko ih hri 3 a nei. A pahnihnak cu Kithara tiin an ko ih hri 14 a nei, a pathumnak khal Kitara tiih kawh thotho a siih hri 7 neimi a si. Asinan, tulaii sanah cun a tum awl ding le mawi thei ding zawngin a phunphun an rawn tuah suak tikah a hnget zetmi Guiter thuanthu pawl tla a hlo vivo. Kum zabi 12 hnu in hri riat nei a rawng suak ih Guttern tin a thang ciamco. Hi Guiter hi AD 600 lihsin 1450 karlak sung cu Leitlun milai tam sawn ih rak uarmi le hman mi a si.

Salai Bawi Hre

Iraq donak ah Annan ih hmuhdan

BBC thuthang lam ih ttuan nei pawl cun kan dung tlawngkai nihnih niah UN Secretary Kofi Annan cu, Iraq donak hi UN dan tuahmi thawn a kalh aw maw? ti le, kan hmai January thla ih Iraq ram hrilawknak ding pawl an sut.

Annan cun US le British in UN lungkimpinak tello ih Iraq an rak do kha cu dan a silo tiah a let hai. Hi ttawngfang hi Annan hin a hman duhmi a si lemlo nan, an suh leuh leuh ruangah, theih nan duh ngaingai ahcun ti ih a ttawngmi a si. Asinan, British cun himi ni rori ah hin Iraq do hi dan vek a si lawng siloin a ttul hrimhrim thu le Veto nei ram hrangah cun danvek rori a si zia phuang in Annan ih thu phuan suah cu an el hngal. Annan cun kan hmai January thla sungah Iraq rampi hrilawknak tuah a si ding thu a than bet.

Indonesia mipi pawlin President an hril

Indonesia mipi pawl cun kandung 21 niah direct-ih President an hrilnak hmaisabik le round netabik hrangah vote an thlak. President ttuanlai Megawati Sukarnapotri cu kan dung votethlak hmaisak ah President candidate thar Susilo Bambang Yudhoyono cun a neh ih tuittum netasawn ih result hi kan hmai October thla thar ah phuan suah thei beisei a si.

Indonesia ramah hin Legislature pawlin hruaitu an hril ttheuih, curuangah tui ttum hi mipi in direct ih President an hrilnak hmaisabik ttum khal a si. Kan dung April thla ih hrilawknak ah Indonesia ram tipikap khua 14,000 ih vote thlak thei 150 million pawl ih vote siarnakah, Megawati ih Security hlun Yudhono hin a neh a si. Kan dung April thla hrilawknak ih candidate panga lakah Megawati le Yudhono lawng hi tui ttumah an tang a si.

Hi tei pahnih hi hnattuan tlang dah an rak si vekin ram hruai an tum dan khal a dang tuk lo ih, an ram ih bombs puah hmang pawl tihlo ding le an ram sumdawnnak khaisang dingin thu tiamnak khal an tuah ve ve.

Malaysia ah Burpi tthi aw

Kan dung zarh ah Mirang pawl nundan cawngin Malaysia Tuluk pawl cun a burpi in tthit umnak an tuah. Penang khawpi ah Tuluk nupa kawp 29 rori cun nikhat niah, Hall khat sung rori ah sunglawi zet in an tthi aw ciamco ih, mipi tamnawn in hi tthitumnak puai hi an sunlawihpi a si.

Miss America ( back cover )

Mirang fala mitpawl riairi te cu kan dung zarhte niah Miss America ah hril a si. Albama fala mawi Deidre Downs,24, nute cu America ram pumpi ih fala mawibik tiah phuan a siih, Kiss tu a ngah in a hlim zet. Hi fala nute hin mawiman, ceiawk paih ttentto man ah laksawng US$50,000 ( RM 190,000 ) rori a ngah tthuttthi a si.

1921 kum ihsin America fala mawi hrilnak hi neih thawk a rak si zoih, tui ttum ah hin fala mawi 52 rori in an zuam aw. Hi Florida fala mawite hin Florida fala mawi Ericka Dunlap, 22, hnen in hi tohkham hi a ngah a si.

Tuluk pa in a mipatnak ngahsal

Kan dung April 6 zan laifang ah Hu, tilawng ih theihmi Tuluk pa cu a nupi rori in a mipatnak namte in a tan sak ih hnawmbawm ah a hlawn sak bet.

Cuveten a thilri cu backet sungah vur thawn ciah tahratin sizungpi lam a pan cih. A thlen veten Siibawi pawl in an rak tuamhlawm hngal ih, thla nga lai a liam hnu, kan dung zarh ah Hu cun “ tuah cun mipa pakhat ka sisal zo” tiah a dam fel thu a phuang tiah Tuluk thuthang ca pakhat in a phuang. Hi pa hin nupi nei cing ten nunau dang thawn an umtlan ruangih hi thil hi tuar a si.

Iraq ram ih hman ding Meithal thar

Energy Gun timi, pem le neh zianghman umlo ih milai nazet ih tuah theinak meithal British cun an tuah suak zo. Hi Microwave meithal hi Iraq ramih civil thulunglo pawl hrangih hman ding tiah tuahmi a si. Hi meithal kah tuartu cun pem umlo in nazet a tuar ding ruangah Iraq mipi pawl kan mawng thei deuh ding ti ruahnak thawn tuaha siih, kan hmai kum lawngin hman thawk a si ding.

Chrismas hrangah timtuahnak

Singapore ah cun December thla thlen ding hi an hngak hlap cuang a bang. Tuisun ni ihsin thawkin Chrismas hrang nasa zet in timtuah nak an nei ciamco. Orchard zinpi ah cun Chrismas thingkung pawl khat tlertler in an phun zo. Kan dung zarh ah Singapore ih kawhhran 50 lenglo cun lungrual ten December 25, Chrismas ni hrang timtuahnak an tuah. Kumtin Singapore ah hin 500,000 lenglo cun chrismas an lawm ttheu a si.

Beijing ah Vanzam ttumnak thar

Tuluk cozahpi cun Beijing khawpi ah a pahnihnak International airport thar cu tui hnu kum 10 sungah din thei dingin thu an relcat. Hi airport hi Leitlun ih hmin lang rori ding ih tuah tum a siih, a hmun ding pawl khal zohfel thluh a si zo.

Iraq ruangah America sumdawnnak a tlakniam phah maw?

America democratic party candidate Kerry cun Bush hin kan rampi sumdawnnak lam hnak cun ralpi ruangih hliam tuar le doawknak ruangih siatbal pawl tuah tthatsalnak lamah a buai ih, rampi sumdawnnak khal tampi kan tlak niam phah tiah President Bush cu tlaksiatnak president siin a puh. Bush hin ram sung mipi pawl ih hna ttuannak le ei in hawlnak lam hnakin meithal le raltthuam ah a buai ih hruaitu ttihnung a si a ti.

Asinan, Bush ih campaign manager Ken Mehlman cun Bush ruangih hna ( job )1.7milion rori kan dung kumih rak suak mi hman rel lang duhlo le hitivekmenih a ttawng cu Kerry hi thil a tthalo zawngih hmu tu a si a ti.

British mipi tamsawn cun..

British mipi 75% cun Iraq ih an ram ralkap um pawl hmuah hmuah cu can bithliah in kawhkir sal thluh an duh. Curuangah, an Prime Minister Blair cu an hnek rero nan a hmin thei cuanglo. Blair cun US le British ralkap pawl hin Iraq ram mah te ih an din thei tik le hnget zet ih an tlanlen thei tik lawngah an ram panin an tlung kir fang ding tiah kan dung zarhpi niah a phuang bet. Tui zarh hnih sung lawngah hin Iraq ramah milai 300 lenglo an thi. Iraq ramhi thihnak dar cun a tlan san ngah ngai ngai hrihlo a si. Iraq ah hin British ralkap 8,500 rori an tang lai.

President Bush in hmai a atthi

November 2, ih US hrilawknak umding hrang Bush le Kerry cun ttantu mipi hawlih theihtawp suah in campeign an tuah rero lai ih, Gallup polls- in mipi duhdan an lakkhawm netabik ah cun Bush cun Point 13 in Kerry cu a neh lai. Bush hin Iraq a donak le ramdang policy ruangah nasazet in relsiat le do a tawng ih Leitlun ram tamsawn khal in US President dingah an duh nawn lo.

US hrilawknak ahhin mipi ngaidan lakkhawm ih mark ngah mal sawn tu President tohkhm ih to an tampi. Cupawl lakah George Bush rori khal hi a tel. October 2000 ih hrilawk hlanah, Bush hi mipi ngaidan lakkhawm nakah point 10 rori in a niam sawn nan President a ngah thotho. Reagan khal cuvek cekci in president a rak ttuan.

Haiti tilianah milai 600 thi

America khawmual ram pakhat a simi Haiti ah tidai a lian ciamco ih kan dung tlawngkai nihnih tiangah milai 600 rori an thi zo. mithi zat hi hi hnakih tam a si zum a si. Haiti hi Ameri khawmualpi ih ram retheibik pakhat khal a si, ziangah tile tilian in vei tamtuk a nuai ttheu ih, thilri hnget le ttha ngaingai an nei theilo. An thingkung pawl hman rawl suannak ah an hmang ttheh ve ko. Hi tilian ruangah hin inn le thilri tampi cu hman le luah tlaklo in tthiatbal a si.

Britney Spears pasal a neisal

Britney Spears cing cing damsung pawm ding a ngah la la a si hmang. Kum 22 lawng a silai mi Britney cun kan dung zarhpi niah Kevin Federline, fa pahnih nei zomi thawn an tthiaw. Britney hin kan dung January 2 niah a nauhak lai rualpi Alezander thawn nazi malte sung lawng an rak neiaw zo. Nuthlawi le pathlawi tawngaw cu ziang tik tiang an daih ding ti kan rak zoh sal a si pei cu.

Theih kauhnak lam

( General Knowledges)

Telecom Company tumbik

Tokyo khawpi, Japan ih Nippon Telegraph cu leilung tlun Telecom tumbik a si tiah phuan a siih, 2002 kumah hnattuan tu ( hlawhfa ) khal 213,000 rori an anei.

Telephone Fatebik

September 16, 1996 kum ih USA pacang Jan Piotr ih tuahmi Telephone hi leitlun phone fatebik ih phuan suah a si ih cui phone cu 1.8 – 0.8 inch lawng a si.

Telephone line buaibik

Leitlun ram khat le ramkhat karlak ih telephone line buaibik le hmang tambik nak cu US le Canada ram an si. 2001 kumah US le Canada ramhnih tei phone line hman cun 10.4 billion rori a kim a si.

Email Web kaubik

Man kuan ttullo ( free ) ih E- Mail kuatawk theinak web kaubik le hmang tu ngahbik cu Microsofts Hotmail hi a si. 2002 ih hmin sinnak an tuah danah, Leiltlun pum ah milai 110 million cun hi web hi an hmang a si.

Internet hmang tambik khawmualpi

Europe hi leitlun ih Internet hmang tambik ram an si. September 2002 kum ih Mithiam Nua ih hminsinnak ah cun Leitlun ih Internet online hmang tu 605.6million pawl lakah 190.91 million cu Europe khawmualpi ihsin an si. Asia/Pacific ahhin 187.24million hmangtu kan um ih Internet hmang tambik pahnihnak kan si.

Prime Minister ttuan saubik sungkua

1947 kum ihsin Prime Minister hmaisabik Nehru Ghandi tei sung hin an tefasin san thum tiang rori India ramah Prime Minister ttuanin an rak hruai thei. Jawaharlal Nehru cun, August 1947 ih India luatnak ngah ni ihsin PM a rak ttuan thawk ih 1964 kum ih a thih tiang a rak hruai. Cun a fanu Indira Ghandi in 1964 ihsin a pai ai a rawn awh ih October 31, 1984 kum ih an thah tiang a rak ttuan. A nu an thah kum ah hin rampi hrilawknak rori in Rajiv Ghandi, Indira Ghandi ih fapa upabik cun a nui tohkham a rawn luah ih, 1989 tiang hna attuan. Rajiv Ghandi khal hi May 21, 1991 ah an that lala. Cun Rajiv ih nupi Sonia Ghandi kha kan dung baite hrilawknak ah PM tohkham ih to dingah hril sal a si nan, India Lal sung a silo ruangah hrotu pawl ttihin a hna a ttuan ngamlo.

Thuthan

Hmaizarh ( 03 September, 2004 ) ih can hmangtu ding pawl

Can kaitu Salai Tha Nei Thuam

Thuthangttha simtu Rev. Za Thelh Lo

Zapi hrang thlacam Salai David Thang

Solo Salai Ronald &

Salai Emmanuel

Bible zoh lo siar Salai Za Biak Sui

Thawhhlawm ap thlacam Nu Zungte

Hlarem Mino pawl

Kan dungzarh thawn pehpar in

Khawmcan Khawmtu Thawhhlawm

Mithar 5

Zarhpi zing 131 202

Zarhpi zanlam ( mino) 61 97

Zarhpi zan 32 42.20

Zarhte zan 43 29

Zarhpi zing thlacam 23 –

Thi ralnak thawhhlawm – 176

Thlacam khawmnak

Zarhpi zing 6:30 am ah LCYF pawl ih kaihhruainak in kan Biakinn ah thlacam nak neih ringring a si. Zozo khal a manman le a pumpe awk thei pawl in zarhte zan rak riak in, zarhpi zing thlacamnak ah ttanlak cio uh si.

Rinsanmi kan member lak ihsin

(Thlathum hrang )

No. Hmin Tiamkamzat

1. Ceu Thawng 100

2. Vun Lun Thawng 50

3. Tluang Kip Thang 150

4. Thawng Ci 50

5. Uk Thang 50

6. Biak Pi 100

7. Ki Kim 50

8. Mang Pi 50

9. Uk Uk 50

10. Van Hum Thang 50

11. Aung Aung 50

12. Din Pi 50

13. Mawi Pi 20

Rm 820

Note: :A tlunlam ih Pathian hmai le minung hmaiah Pathian rinsan in a tiamkam tu pawl hi Jalan Ipoh Batu 5 ih um kan LCF unau pawl an si. An par ah tampi lungawinak kan nei. Pathian in an zapi ten umpi in kilveng ih thlawsuah a pek ciau nak ding hrang thlacam nak thawn bawm uhsi.

Kawh theih a si

LCF Mino vice president Salai Ro Vel Thang cu a hnuailam ih ph No. ah rak ko uh la kawhhran thu ttul nan rak sim thei. Fala pawl hrang ahcun miss call lawngin a ngah, a mah in a rak lo ko kir sal mai ding.

Cell: :012- 6400 838

Kan Lungawi pi

Malaysia LCF sungkua hnih, Nu Tthui te le kan hlasak thiam Mai Mapui te sung cun UNHCR bawmnak in kan hmai zarh sungah Norway lam pan ih in zamsuah san thei ding ruangah kan lungawipi zet. Pathian in lam hruai in kilveng vivo hram seh.

Kan miphun hrangah

Lailun Foundation hi leitlun ramtin um kan Laimi (Falam) pawl in kan miphun hrang hnattuan nakah hmunkhat ten hna kan ttuan thei nak umsun a si. Ramsung ih an hnattuan mi pawl lak ah Awnmawi lak sawng,laimi calai,cathiam laksawng, Falam khal ah clinic a free in an awng, Chin dictionary khal tulai fangah tuah rero lai a si.

Hitluk in kan miphun hrangah hna an ttuan ih kan ti thei tawk cio in bawm ve le sungtel rak lut ciau dingah sawm kan si. Sungtel fee Rm 10 (Damsung) a si. Sumpai cu Nu Zungte le PaThuam hnen ah pek theih a si. Malaysia ihsin sungtel mipum 30 lengkai kan um zo.

Kan miphun hrang hnattuan nakah teimak suah cio uhsi.

PaThuam

Hnih hi Sii Tthabik a si

( Laughter the Best Madezine )

Mak vetak silawm

Pastor pakhat khawm paihlo tuk cun kawhhran upa pawl a ko ih, hi tin thu relkhawmnak an nei. Pastor pa cun zarhtin kan khawm ttheu hi a tam tuk deuh. Missionary hna ttuan phah thawn ka buai thei tuk. Curuangah khawm hi kum khatah vei khat lawng si sehla, cumi veikhat khawm kan neihmi khal cu “ Nu bu pawl khawm” si sehla, kawhhran upa le Pastor tel ttullo in; cuti a si thei le Pathian hna hi nasa sinsin in ka ttuan thei ding a ti.

Veikhat thlacam a tawk

Kawhhran upa pakhat cu rawl eizik len, thlacam ti a nei dahlo. Mi pakhat in ziangrungah thla na cam dahlo ti’n a sut ih, kawhhran upa pa cun kan fang inn ih ka ret laiah thla ka va cam zo so khaw.

Curuangah kan fang inn ih ta a cem hlanlo ka thlacamnak ah a tel thluh zo si. Keicu kum khat hrang kan fang inn ah veikhat thla ka va cam ttheu ih, kan kawhhran tthansonak ding hrang khalah kum thawk lamah veikhat thla ka rak cam zo, ziang thei fiang hnailo in thla na cam dahlo in ti men hlah aw….

Salai Eddy

Damten mangttha/ sunttha . Hmaizarh ah kan tawngawk leh ding.

Comments

comments

One Comment

  1. Pingback: synvwimn

Comments

%d bloggers like this: