Hruaitu Issue-215

HRUAITU THUTHANG

ISSUE 215 NAK

December 21, 2008

 

 

Editorial

 

                   Pathian hrang mipi hrilsuah

               Tuih ni ah LCF cun kum 2009 hrang hruaitu ding kan hril. Himi ni hrangih thlacamtu le timtuahtu cun Pathian le miphun hrang rinsantlakih a ruahmi cu a hril dingih, mipi hril vekin hmai kum ahcun kawhhran hruaitu ding committee thar a suak ding. Cuihsin Mino le Nubu, Sunday School le Mission lam, Calai le a dangdang cu din sal a si ding. Bible lam ahcun kawhhran hruaitu hrilnak hi dungthluntu pakhat Judas aiawhtu an hrilnak ihsin a thawk. Asinan, Judas aiawhih an hrilmi Matthias cu mipi hrilmi a si loih, hruaitu pawlih hrilmi khal a si lo. Dungthluntu dang pawl cun Pathian hnenah thlacam in an dilih, minung thinlung a theifiangtu Pathian cun hrilsak dingin an dil. Cule’n dungthluntu pawl cun ‘camcawhfung an zuuk ih Matthias in a ngah. Cuihsin Matthias cu dungthluntu Judas aiawhin a um. Hih hi kawhhran hruaitu hril daan hmaisabik cu a si.

               Caan a liam vivo ih, Catholic tidan, Orthodox tidan, Anglican le Church of England tidan a phunphun a ra suak. Leitlun Protestant kawhhran 20,000 in anmai’ ttha tidan in kawhhran hruaitu hrilnak an nei. Tidan a rak bangaw khal tampi a um ding. Ziangruangah kawhhran hruaitu pawl hi dungthluntu pawl tuah vekin kan hril awk lo? Rome acozah sanlai ihsin kawhhran cun hmel dangdang a rak nei ih, Constantine cun acozah hnattuantu hmuahhmuah Khrihfa a siter  ruangah biaknak lam cun Pathian ret thupi tuk loin, leitlun nainganzi thawn a rak fehtlang. Cuvek cu a duh lotu an tam deuhdeuh ih, Orthodox, Anglican tivek a ra suak. Milai ih zumnak khal a tahnak um sehla, a niam vivo ti thei a si.

               Asinan, kawhhran hmin cu ziangvek khal si sehla, Pathian hrang hnattuantu ttha kan neih theinak dingah ‘Camcawhfung’ aiawh tulai ‘voting system’ kan rak hmang. A pawimawhbik cu Pathian hnenih hruaitu ttha kan dil hi a si. Zokhal hruaitu kan si thei. Pathian in a hrilsuah dingmi cu minungih rak kham thei a si cuang lo ding. In duhdawttu kan biak kan Pathian hin hruaitu ttha lo thawn mi ramah in umter siang lo ding.

 

 

 

Bezai

 

      Laitlang X’mas

 

Laitlang ahcun X’mas caan ah

Faizong an par, Far hnah an hring

Khawsik dai tla, zilthli a hrang

Thlapi Arsi fiangte’n an lang

Jesuh suah cam kim cuang a bang!

 

Laitlang ahcun X’mas caan ah

Sungkhat kim te’nkan hmang tlang thei

X’mas hla mawi kan sak tlang thei

Biakinn sung ah kan thleng kim thei

Jesuh suah cam thleng ngai kan bang!

 

Laitlang ahcun X’mas caan ah

Zuri sabah hmuh ding an tam

Khaw-lak vaktawi zu-va an tam

Biakinn thleng lo, mah inn thleng lo

Jesuh suah cam hmang sual an bang!

                                     

Van Member

 

        A Sunglawi Christmas

 

Tual leng, upa nauhak ti um lo,

Kan hngah ni eng mawi Christmas cu

Caan liam in thar sal maw

Mitin hmuah lungthin thar in

Hmuak uh si.. Ruuntu Jesuh cu!

 

Tuukhal pawl awi hla sak an thei

Mifim pawl cu ‘si eng’ lam hruai in

Hrin thar fahniang tawng ding ah

Rim thaw ro thil hlan in sunlawi e

Ruuntu Jesuh cu… Kan hrang naute a suak zo.

 

Fapa peek kan si. Amah cu uktu a si

Mangbangza Remruattu, A cakmi Pathian,

Kumkhua ih pa, Daihnak Siangpahrang tiah

Kumkhua in kawh a si ding

Aw…A sunglawi e…Christmas cu!

                                      -Salai Simthli unau

 

 

       PARMAWI SAWKHLEI    

  

Kei salai hrang,

Par dawh cungcuang, sawkhlei parmawi

Duh tuk ruangah, zoh khop thei lo’n

A ziam pang ding, tham ka siang lo

Caan a rei cun, lungthin a phang

Thlisia ruangah, a ttil pang ding

A vuai pang ding, zuah hrih ding cu

Rem thiam nawn lo, ka thieh fiang cun

Siang lo cing ten, duhdawtnak thawn

Dimdoihzet ih, ttot thlang ding cun

Kei val salai, zuam ve ai ee

Sihmansehlaw. …….a pawi tuk ee……

Duhmi sawkhlei,n a dawtnak parmawi

Kei salai hrang, vul lo hman ning

Kei lungthin ah, nang hngilh ni um thei si lo

Veikhat te tal, ka lam her in

I zoh hman law, na hmu ding

a luangmi dawtnak mitthli…!

                                                C.RAM LIAN UK

 

 

Sermon

 

                             Christmas Laksawng

                                                                                 Rev. Run Cung Mang

            Naute cu a nu Mary thawn an vung hmuh tikah

an khuk an bil ih an biak.

An laksawng kenmi sui, frankinsense rimhmui le mura zihmui

an suah ih an pek.”     – Matt. 2:11

Thuhmaihruai:                                                                                                Mi tampi in, “Xmas” asilole “X-mas” ti’n an nganmi ka hmu ttheu. A besiatzetmi cu “Eks mas” ti’n an siarmi (awsuah) hi a si. Ka thei tamzet thlangih ka thin a nuam lozet. X-ray timi thawn a bang aw zik ih “Khrih tel lomi Puai” ti lamlam a va bang zik ve ka ti. Mi tthenkhat in “Mas kan hmang ding” an ti lailai ih Khrih an saal tel nawn lo. Cuticun tisa daan hlir ih puai tuah ding khi a bang ka ti. Himi hi Christ-Xt, Christian-Xtian timi ihsin rami a si ruangah (X hi Cross thinglamtah ai ih hman a si hmang) X’mas tiih ngan ding le siar tikih awsuah daan ding cu “Khrismas” ti ding a si. (Eks mas a si lo). Curuangah atawizawng in ngan loin tusan cu Mirangca zir le thiam san a si ko ih English thlun lawlaw in Christmas ti’n ngan ko sehla a tthabik ding ti’n ka ruat. Ziangahtile hih cafang cu mi zapi ih hmuh tammi a si ko ih a thei lo cu an um lem ding ka zum lo. Mikip in Merry Christmas timi cangan cu ttha tein an siar thiam ko ding.               Mi tampi in Christmas hi laksawng tampi ngah caan a si ti’n an ruat. Nauhak pawl tla Christmas ah laksawng na ngah ding ti’n an zirh ttheu. Curuangah Christmas ah ziangmi ka pe ding tilam hnakin ziangmi laksawng ka ngah ding timi lungput a suak sawn ttheu. Asinan mi tthenkhat cun Christmas lungput diktak nei in mai’ zawn lawng ruahnak le duhhamnak taanta in, “Christmas ah ziangmi ka peek ding?” timi peknak thinlung nei in an timtuah cio. Tulai san, fim san le thlarau san ahhin zumtu tampi cu Christmas caan ah Pathian hnenih a rami vanlam duhdawtnak thawn naute Jesuh Laksawng pek dingin an timtuah cio. Leitlun hmuntin ah khat le khat duhdawtnak laksawng pe aw in caan an hmang ih lungawiza ngaingai a si. Tuih kum Christmas ah ziangmi laksawng thawn rundamtu van bawi fahniang naute Jesuh na hmuak tum?

1.                Pathian in a Fapa neihsun Laksawng in pek                                     Christmas neitu hi Pa Pathian a si ih leitlun mi hmuahhmuah hrangah a Fapa Pathian laksawng in pek caan sunglawi a si. Curuangah mifim thlarau mi pawl in a thlummi  Sweet December an ti. Thimnak le buainak ih khatmi leitlun minung nunnak ah a thlummi le a nuammi thlangam daihnak um dingin Jesuh Khrih cu vancung sunlawinak taanta in leitlun ih a rung suah caan a si. John 3:16 ah “Pathian in leilung a duhdawttuk ruangah a Fapa neihsun a pek” a ti. Rom 6:23 ah, “Pathian ih laksawng cu kan Bawipa Jesuh Khrih thawngin kumkhua nunnak a si” a ti. Paul in, “Sim cawk loin a sunglawimi Pathian laksawng hrangah lungawithu a hnenah sim uhsi!” a ti (2 Korin. 9:15). Thuthangttha Luke 2:10 sungah, “Ttih hlah uh! nan hrangah thuthangttha ka run keng; cuih thuthangttha cu mi hmuahhmuah hrangah lungawinak thuthangttha a si. Tuih zaan rori ahhin David khua sungah nanmah runtu Bawi Khrih a suak zo,” ti’n a um. Isaiah in, “ Kan hnenah naute a suak zo; kan hrangah Fapa pek a si zo,” a ti (Isa.9:6). Pathian ih kan hrang Christmas laksawng cu Jesuh a si. A va sunglawi ve!

2. Vancungmi pawl ih Laksawng cu thangtthat hla a si                   

Thuthangttha Luke 2:13-14 sungah, “Hmakhatte ah cuih vancungmi thawn hmunkhat ah vancung ihsin vancungmi burpi cu an rung langih, Pathian thangtthatnak hla an sak: “A saangbik van ahkhin Pathian cu thangtthat si ko seh; A duhdawtmi minung pawl umnak leilung ahhin remnak leeng ko seh,” tiah an ti. Vancungmi cun Rundamtu pe thei an si ve  lo, sui le ngun pek ding khal an nei lo; an hmuhtonmi pawl midang hnenih tettikhan thei khal an si ve lo ih an ti theisun cu Pathian thangtthatnak hlasak hi a si ko. An hrangah cumi cu Messiah hrangih an titthatbikmi Christmas Laksawang a si. Kannih zumtu pawl tla Pathian thangtthatnak  hla lung thozet ih kan sakmi hi kan Christmas laksawng sunglawi a si thei ve. Mi vekin laksawng pek ding mankhung nei ve lo hmanseh, thinnau ding a si lo. Vancungmi ih thangtthat hlasak hi thuanthu roling a si bangin thangtthat hla saknak in Christmas lawm cio uhsi!

3.  Tuukhal pawl in thuanthu an simmi hi Christmas Laksawng a si            Luke 2:17 ah, “Tuukhal pawl in naute an hmuh tikah vancungmi in cuih naute thuhla an simmi cu mi hnenah an sim” a ti. Tuukhal pawl hi mifarah nauta le mi rethei zonzai an si. Mipi lakah tel thei le mipi hnenih thurel thei mifim le mithiam khal an si lo. Asinan thleidan nei lo Pathian in tuukhal pawl a hngilh lo. Pathian vancungmi in Messiah suahnak, rundamnak thuthangttha cu tuukhal pawl hnenah a thlenter hmaisabik sawn. Mi tangdor le mi lungneem an si ruangah cuih tettikhanmi cu an cosaang thei lohli.                                                         A thinlung takin an zum ih a hna a ngam cih. An tuu khalhmi pawl taanta ngam in vancungmi ih simmi an theih vete’n Jesuh naute tong dingin manhlapzet in an pok lohli. Curuangah naute Jesuh an hmu ngah ih hmaisabik ih an biak ngahtu mi lungawi le mi thluasuak an si. Christmas an hmangfuh ruangah an nunnak a thlengh aw thluh. Ttihnak zianghman an nei nawn loih an hmuhmi le an theihmi thu cu mipi hnenah raaltthazet in an sim in an phuang ngam. Mifarah tuukhal pawl hrang ahcun cuih an tettikhannak le thuanthu an simmi cu an Christmas Laksawng sunglawi a si. Tuni zumtu nang le kei tla tuukhal pawl vekin kan nunnak ih Pathian zaangfahnak thlengmi pawl raaltthazet ih tettikhannak le lungawithu simnak in naute laksawng pe ve cio uhsi!

4.                  Mifim pawl in hlawnthil mankhung Laksawng an pek                    

Matthai 2:11 ah, Nisuahnaklam ihsin mifim pawl cu siangpahrang arsi an hmuh tikah Amah tong ding rori in lamhlapi in an pok suak. Van arsi zoh in thungai thlak in, naute tong ding rori in an hawl tikah rundamtu Messiah cu an hmu ngah riai. Ca Thianghlim in, “In hawl dingih in hmu ding, nan thinlung takih in hawl ahcun (Jer. 29:13)” a ti bangin mifim pawl cu thinlung takin an hawl ruangah an hlawhtling ih an hawlmi an tong ngah.                                                               Tangdornak thinlung an neih ruangah an khuk an bil ih naute Jesuh cu an biak. Culawng si loin an neihmi lakih tthabik an kenmi hlawnthil mankhung pawl siangzet in an suah ih naute laksawng an pek. An laksawng kenmi pawl in Jesuh Khrih cu Rundamtu siangpahrang a sinak, Puithiam saang a sinak le leilung rundam dingih thihnak tuartu ding a sinak pawl a tarlang. Kannih tla Pathian biak dingih Biakinn kan feh tikah a daan men ih fehtu si loin, thinlung takin khawm cio uhsi! Kan khawm tik khal ah kan kut lawng in a fehtu si loin Pathian thluasuah kan donmi siar saal in a hrangah peknak nun nei in feh cio zuam uhsi! Bawipa hrangah Laksawng pakhatkhat timtuah in feh uhsi! Kan thinlung, kan nunnak, kan neihsiah, kan caan ttha le kan thiltitheinak pawl ui loin siangzet in pe cio thlang uhsi! Mifim pawl vekin naute laksawng timtuah cia uhsi!

5. Mary cun thungainak Laksawng a pek                                       

Mary in, “Kei cu Bawipa ih salnu ka si. Na sim vek cun ka parah si ko seh,” tiah a ti (Luke 1:38). Mary ih nunnak kan zoh tikah Pathian in thinlung thianghlim le nunnak thianghlim a neih ruangah Messiah suahnak ih a hrilmi a si ih lungawiza ngaingai a si. Sihmansehla, leilung tisa daan ah pasal dingah duhmi tlangval hamtu nei cia zomi a si tikah nei awk hrih hlanih falahim favun ding cu har a ti nasa ding. A pek awk dingmi hi a saangzet ve a si. Asinan Pathian ih thupek, vancungmi ih simmi parah rinhlelhnak zianghman nei loin, “Bawipa nangmai’ thu vekin si ko seh!” a ti thei ih Pathian thuthlun in a um. Mary cun hlasaknak in laksawng a pe thei ve lo, thuanthu a sim thei ve lo, sui le ngun hlawnthil mankhung laksawng pek ding a nei ve lo. Asinan cupawl tluk ih mankhungmi, a nunnak pumhlum, a thinlung le a sinak zate’n Jesuh hrangah a pek thluh a si. Mi ih theih sualnak, soiselnak, zomtaih nautatnak tuar ding a hreh lo, Jesuh hrangah zianghman uimi nei loin a nunnak le a zeizongza laksawng ah a pek. Kannih tla Bawipa hrangah mi bangin laksawng mankhung zianghman pek ding thilri nei lo hmang uh singla, Pathian ih duhbikmi cu kan nunnak le kan thinlung hi siangzet in pe aw cio uhsi!

Thunetnak:                                                                

Christmas cu peknak a si. Sersiamtu Pathian in hram a thok. Jesuh Khrih in vancung sunlawinak siangpahrang tokham taanta in a nautabik caw rawl einak kuang sungah, caw inn ah a rung suak ih kannih misual pawl rundam dingin in rung hawl. Jesuh in a nunnak kan hrangah a peek aw. Rumdamnak hnattuan a famkimter. Vancungmi in hla in an lawm. Tuukhal pawl in thuanthu ttha an sim. Mifim pawl in hlawnthil mankhung thawn naute laksawng an pek. Mary cun a sinak zate in laksawng ah a pe aw ve. Joseph tla Pathian thupek ngainak in Christmas laksawng a pe ve. Duhdawtmi zumtu unau, na nunnak ttha te’n vun zohfel saal hnik. Christmas puai vei ziangzatlai na hmang zo? Ziangtivek pianhmang in na rak hmang ttheu? Thlaraulam daan in maw tisalam daan in na hmang tam sawn pei ? Christmas ka hmangfuh riai ti’n diriamzet in na um dah maw? Tuih kum Christmas tla sullam neizet le manneizet ih hmanfuh thei zuam hram aw. Na nunnak, na tikcu caan, na fimthiamnak, na thiltitheinak a zate’n naute laksawng ah pe aw thluh tum aw. Lei le van Runtu Bawi Jesuh cu kut lawng ih ton tumtu si loin kutken te thawn lungawi sopar teih tong dingin timtuah hram aw. Christmas Laksawng ah ziangmi na timtuah?

 

 

Article

 

    Naute Jesuh na hrang ah a suak ve maw..

                                                                                             Salai M

           

            Kumpi kumkhat cu a herliam la la…. kan hngak hlap zetmi Christmas caan cu theih man loin a rung thleng sal … ziangtin kan hmuak ding, kan hmuahnak ding hrangah ziangvek timtuahnak kan nei… Nangmah a lo run suaktu ding Naute Jesuh hrangah ziangtivek timtuahnak thawn na hmuak tum….?

            Christmas caan ah Jesuh suahkehnak thuhla hi sim awk a si theu. Cuih a suahnak thu kan sim tam zetmi lak ihsin kan sim dah theu lomi  sung in zirh aw sela ti’n…Jesuh a suah lai caan ih leitlunih a cang dahmi dinhmun  3 thawn.. CU pawl cu..  1) Place ( A suah nak hmun le ram dinhmun  2) Military ( Uktu pawlih dinhmun), 3) Education ( Fimthiamnak lam din hmun pawl thawn thazang la in zir ve cio ding ah ka lo sawm..

1) A suahnak hmun ( Place)

            Jesuh a suahnak khua hi sut aw sela nauhak te tiang in kan theih thluhmi asi. Asinan khatlam zawngih kan simfiang sin ding a si le’n … Leilungpi zuk kha na cabuai parah pharh in zoih aw la a lai ciah kha na kut in tawk aw.. Plalistine ram ( Bethlehem ) a si ih Jesuh suahnak kha a si ding. Pathian ih khuakhan dan hi a mak zetih ziangruangah a si pei ? Leilungpi a lai tak fangih leitlunmi pawl runtu ding a suakter a si pei … A thuthangttha phuang olnak ding  le thuthangttha karhzainak ding hrangah a olsamnak ding hmunbik Bawipa in a hrilthiam hi a mak na ti ve lo maw…?

            Lai miphun hi thlawhsuah kan dawng kan ti pei cu… Ram tin kim ah kan tthek aw thluh .Cuih Ram tinkim pawl   kan zoh a si le’n Falam mi pawl hrangah Malaysia hi a lai tak fang asi kan ti a si le’n a sual tam lo men thei. Third country feh ngah thei hrih lo, mai’ khua le ram ah len tlungsal thei cuang lo a lai tak fangih taang pawl (Beidawng van sang takih um ) hi Malaysia ih um pawl kan si. Curuangah Bawipa in na parah tumtahnak tumpi a nei ding.

            “Pathian kan tawngnak olsambik lamzin hi kan beidawng lai caan a si theu “ an ti bang in a tuih na umnak Malaysia ramah beidawng vansang, thin pit mangbang zetih a ummi pawl hrang ah Pathain hna le miphun hrang hna tampi na ttuan olsamnak dingbik ah Bawipa in a lo ret a si ti thei aw la, na ti thei tawk te’n Bawipa hrang ah le na miphun hrang ah aw…..

2) Uk tu pawl ih din hmun( Military)

Jesuh suah lai caan hi uktu lam dinhmun in kan rel a si le’n leilung pumpi hi  Rome Emperor kut hnuai ah asi thluh. Cuih Rome kut hnuaiah cun Ram(Country and City) tam pi a um. Asina’n, an zate’n Rome kut hnuai ih um an si vekin leilungpi hi khua pakhat vek a si. Ram khat le ram khat hi inn hnen aw an si thluh ih thleidan awknak a um lo , khui ram khal ah feh sukso theihmi a si. Do awknak, thleidan awknak le ram khat le ram khat hmuhsuam awknak tivek a um lo. Inn hnen aw thluh an rak si.

A tlun ih Jesuh suah lai caan Uktu lam pawl dinhmun kan zoh a si le’n khaw khat le khaw khat ,Ram khat le Ram khat rem aw te’n an um ti kan hmu..” El awk um lonak, thleidan awk a um lonak hmun le Do awk a um lonak  hmun le ram  ah Jesuh a suak “ ti kan theih a ttha.

3) Fim thiam nak lam din hmun( Education)

Jesuh a suah lai caan ah Leilungpi hi Greek philosophy ( Greek ruahnak ) ih a ra khuh neh lai tak fang a si. Curuangah ramtin kim le khuatin kim in mah le ttong cio an nei ko na’n an ttong hman tlangbik ( Comom language ) cu Greek tong hi mipi in lung rual te’n an ra hmang khawm. A ngaingai ahcun “Latin” ttong hi ttong upat deuh a ra si sawn na’n  mipi pawl in Greek ttong tho tho hi lungrual te’n an comon language ah an hmang..Curuangah himi sanlai ih an ttong hmanmi kan zoh a si le’n an lung a rual tuk ti kan hmu thei. Lungrualnak hmun lawngah Jesuh a suak .”

Thunetnak

A tlunih kan theih zo bang in Jesuh kan hnenih a suah theinak ding hrangah kan thinlung lamzin kan sial dingmi lak ihsin ‘el awknak, thleidan awknak, lungrual thei lonak pawl hi nasa tak in kan rem a ttul. A tuih na umnak Malaysia hi na Pathian hnattuannak le miphun hrangih hna tampi na ttuannak tthabik hmun a si ti thei aw in….. .(Luk 3:3-6)

 

 

                                    Ester thah tumtu

                                                            -Kei Bawi TaiThio

            Veikhat cu Ester timi fala nute cu a khaan (room) sungih ca a ngan rero lai ah, a khaan sangka in pacang tum zet a rung lut kha a hmu ih a ttih tukah a khur ciamco. Cuih pacang pa cu a kiangah a vunug dingih, “Fala nute, nang hi tuih hnu zath hnih (Ni 14) zanah ka ra dingih, ka lo that ding” tiah a ti. Cu vete’n sangka in a suahsan ta..

            Ester cun a nu le pa a sim. A nu le pa cun zovek so an ti ih, Ester cun a sim thluh. A nu le pa khal an mangbang in an ttih zet. “ Kan lo run (hum) thei ding sawm” tiah an ti. Cuihsin an security (Kilhimtu) pawl hnenah an vung tlan. An security pawl khal in, “Cuvek minung cu kan ttih tuk, kan lo hum (kilhim) thei zik lo” tiah an ti. Ester ih nu le pa cun an thin a phang deuhdeuh ih an veng lalpa (bawi) hnenah an va sim. Asina’n, an veng bawi cun, “Ka lo hun thei zik lo” a rak ti thotho. Cuti cun palik le raalkap pawl khal anmah run ding le bawm dingah an va sawm na’n, annih pawl cun, “ Kan ttih tuk ee, kan lo run thei lo ding” an rak ti ve.

            Ni 5 nak sun a rak thlengih, an bei a dawng tuk ah lamzin in mi a ra pohpoh a thuhla sim in ruuntu ding an hawl vivo na’n an tawng cuang lo. Cutivekih an um laiah Ester cun Pithar pakhat tiang hrol a hmu ih, cuih pitar hnen ah mitthli thawn a thuhla a vung sim. Pita rte cun, “Fala nute, ttap nawn hlah, khitawk LCF biakinn ah zarhtin zarhte ni ah an biakmi an Pathian hnenah ‘rawl ul’ ih thlacamnak an nei ttheu ih, thaisun (Zarhte Ni) khi vat el ve aw la, an biakmi an Pathian in a lo humhim thei men ding” tiah a ti.Ester hrang ahcun pitar nu-ih thusim lo thil dang zianghman beisei ding a um nawn lo.

            Ester hi a nunnak ah, tlangval parih  duhdah zetin a nun ruangah maw, mi rel lam siat tam tuk ruangah maw, sum le pai thilri khalih a duhham tuk ruangah maw, mi thin natnak a tuah tam tuk ruangah maw, pacang pa in hiti lawmmam ih thah tum tiangih a rung turnak?….. .Zarhte zing a rung thlen ahcun ‘zum dawk, zum lo dawk’ te’n a tim a tuah ih, LCF ahcun rawl ul thlacamnak ah a vat el ve. Zumtu a hmun ih a um pawl cun Ester ih mithmai an rak hmuh tikah thinhar mangbang vansang mithmai nei zetin an rak hmu. Thinlung kek kuai in thla a cam ih, zumtu unau pawl cun khuk bilin thla an rak cam sak. A phurrit pawl cu Pathian hnen ah an ap sak. A tlun zawng ahcun thin nuam te’n inn a thleng. Zarh hnih kimnak ni khat lawng a duh ni (Zarhte ni) ahcun LCF ah rawl ul thlacam ahcun a va tel lala. Zumtu pawl cun mithmai pante in an rak hmu thlang. Thlacamnak ahcun “Pacang pa cu thaizan ah a ra sal dingih, kan biakmi kan Pathian in inhumhim theinak ding ah indilpi uh” a ti ih, a hun rawt lala. Zumtu pawl cun Pathian hnen ah khukbil in an dilsak. An ban hnuah lamzin ahcun “Haleluiah..Ka Pathian thangtthat in um ko seh. Bawipa a ttha tuk tiin lungawi so par te’n in a vung thleng.

            A thaizan zarh hnihnak, ni 14 nak zaan cu a khaan te ah thlacam in pacang pa cu a rak hngak. Rinlopi ah sangka a run ong ih cuih pacang pa cu a rung lut. Asina’n, “Thlarau Thianghlim thawn taksa a rawk thuam aw mi fala nute cu a hmuh vete’n ttih le khur thlurthlo in dungah a sip ih sangka in a tlanhlo.

            Zumtu u le nau pawl, kan sual ritphurhmi le kan thinhar kan mangbang vansannak pawl hmuahhmuah khi, zarhte sun rawl ul thlacamnak hmun ah va tthum ta in, innlam ah bulpak thlacam nun nei in kan nitin nun kan hman thei ahcun, Ester fala nute bang in kumkhua nunnak kan co ding a si. Thlacam nun nei cio theinak ding ah Pathian in kan zate’n thluasuah in pe hram she. Amen.

 

 

                             Jesuh maw BAWI?  Nangmah ha LAL?

                                                                        -Salai Kawl Lian

            Leitlunah Lal ttuan hi mi tam zetin an hahiau zetmi thil a si. Ziangahtile mi hmuahhmuahih theih larmi le upat hlawhmi an si theu ruangah a si thei. A dikzet. Ram pakhatih President, Prime Minister tivek tuantu cu a ram mipi pawlin an zah thiamin an upat zet theu. Cun, tulai leitlun pumpulukih larzetih kan theih mi ah cun England Siangpahrang Nu(Queen) le Thailand Siangpahrangpa hi an si. An pahnihih kan zoh asile an ram mipi thatnak le thansohnak ding lawnglawng ruatin an tuan nasa zet ti kan hmu. Anmah tawk veve ah power khal an nei  veve ti khal kan hmu. Asinan, thimnakah Thailand Siangpahrang tla cun lo ram  kau zet a neiih cui a lo buh suak pawl cu a ramih mifarah harsa  hnenah a lak in a zemsuak theu. A ram mipi pawl hrangih a tuan tuk nakah  hospital ah a um can ah Doctor pawlin  hnatuan lam supaw deuh dingin  tla an rak sim. A suahni le hospital ih a um tikvek canah mipi an ra pungkhawm  theu ih a hrangah thla an cam sak theu. Hitivek Siangpa hrang neih cu a ram mipi khalin an duh ringring ko ding tiah ka zum. An ramih Siangpahrang uknak tawp ding khalin an ti zawksawh thei lemlo ding tiah ka ruat. A uar um zet.

            Kannih kan suah le semnak rampi lam kan zoh asile 1962 ihsin Ralkap thuneihnakin General Ne Win in inrak uk thawkih a karlakah U Nu timi in democracy uknak ti fawn siin rampi pumhlum cu Budhism biaknakih tuah tumin  reilo te a rak uk dah tilo cu tuisun ni tiangin Ralkap uknak a si ringring lai. Tu ah asile Senior General Than Shwe in in uk vivo  ih a tlai thlak nasa. Khiti hmuahmuah kum kan zoh asile kum tamzet asiih sankhat sung lai a rei tin khal kan sim thei. Annih pathum khi cu kan ram mipi in a khawpin kan khawp thlekthlek. Asinan, an Lal duhnakin tawp ti a nei thei lo ih an ralnam(meithal) thawn in uk rero cu a si men. Hi pawl hi cu anmahih Lal tuan duhnak a si ti sehla elawk tam tuk dingah ka ret lemlo.

            Asile kannih Zumtu(Khristian) a ti aw pawlih nun teh hi ziang kan bang timi hun thlir peh vivo sehla. A tlunih ci hnih lakah a khuimi sawnah kan um timi cu kan mahten rak zohaw men sehla a tha ke. Khristian inn sungsang ihsin kan suak, kan pitling ti’n kan rel aw huahho theu menih a dik ngaingai pei  maw? A thu cun dik vek bang si, a dik lonak cu a um thei. Ti duhmi sawn cu in hringtu Nu le Pa hman piangthar loih kannih an fa le te pawlin khitivekih kan tawng theu tla khi ruah ding cu a um. Cuti ka ti tikah Nu le Pa piangthar neih tengteng ih pianthar theih ka ti duhnak cu a si fawn lo. Nu le Pa zu le sa rak cen rero le a phunphun ih thil thalo ih sumdawng pawl lakin khal fanau piangthar tha zetzet cu an suak thei ko. Kan sim vivo asile Khristian inn sang kan si, Zumtu ka si ti menih Pathian fa si theinak a um lo. Kanmahin Jesuh cu kan Bawi le Rundamtu ih kan pawm le kan nunpi lawngih Fa sinak co thei kan si sawn.

            Kan sentet lai ah mai’ tisa duhnak a phunphun tuahih kan rak hman can khal a rak um. Asinan, tuican ah ‘ziangtivek in kan hman?’ timi hi a thupibikih kan ret dingmi cu a si. Khrismas a hung thlen tinten Pathian hmaiah khuk bil le thilhthiamin  Nau suahcam lawmin kan um theu. Asinan, tuikum Nau suahcam teh ziangtivek thinlung pu in ha, hi can sunglawi hi kan hmuah tum? Kan thinlung sungrilah amah Jesuh cu LAL ih ret taktak thei in teh kan hmang thei pei maw? Asilole, Khrismas program hman sungte can lawngah lenglam phaw lawng kha mawi le dangnal nawnin Naute Jesuh kan hmuak tum? timi tla mah le mah sut fiangaw thei cio sehla a tha zet. Baibal kan zoh tla asile leitlun ih mi nauta bik tiih kan timi tu khaltu pawl le mifim pawl tla cun tangdawrh  in naute Jesuh kha cibai an buk hai ti kan hmu. Tukhal pawl cun zianghman laksawng pe theilo ih an um lai ah mifim pawl cun an neih le tlin tawkih thil man khung thilri le rimhmui in cibai an buk. An pahnih ih thinlung khi Pathian ih cohlan mi veve a si.Ziangahtile tukhal pawl cun an thinlungah ziang thil hmanin lalnak co nawn loin an tukhalhmi (an tuanvo tumbik) kha tan in Naute hmu dingin an hnatuannak (ei hawlnak) an fehsan. Asinan, mifim pawl cu an sung le te (Baibal sungih um lo) pawl kha sim ta in Naute cibai buk dingin an fehih an rohlu mankhung zetzet kha uinak fate hman nei loin  kum tamzet an rak hngah cuahcomi va hmuh tumin an inn le khua cu an suahsan ngam a si.

            Jesuh suahcam hi kan ei in hawlnak tanta in le kan neih thil le ri kengin cibai kan buk ve thei pei maw? Hitivekih arak hmuak thei thitha lotu kan si ahcun Khristian kan si nak le Piangthar kan rak ti awknak pawl kha nasa zetih kan zohfiang awk a tha ding. Thinlung sungih Naute  kha Bawi asi tiih ret loin kanmah le mah kha LAL si duhnak vek menih kanrak buai culci asi ah lawngte Pathian ih cohlan tlakmi asi hrimhrim lo ding ti cu a fiang zet. Lal duh tuknak hi a tlangpi thu cun sual a si ko. Asinan, Jesuh cu Bawi ih ret thei ih kan um hnu ah Amai’ ruatmi Lal hnatuan ding kan si lawngah thilthabik asi vethung ding tiah kan ruat sawn pei !

 

 

                                AN TI..

                                                                        -Cap Burung

1. Krismas ah zu man a khun tuk khal le’n in paihtu an tam hmel thotho an ti.

2. Kawl dawr le Kachin dawr pawl cu ‘Laimi zu in ding an tam pangah’ tiah X’mas sungah zu tampi khawng thei an tum an ti.

3. X’mas boruak ah hin miphun duhdawttu hrang ahcun zu dawr hnakin biakinn ih thlacam a ttul an ti. X’mas ih zu ri ttheu pawl hin miphun an phatsan awl zet an ti. Lai tong hnakih kawl tong hmang tam pawl hi tthansohnak maw si? an ti.

4. Fala fel le tlangval fel pawl cu X’mas, Fanger puai etc ah hin an theih thei an ti. A fel lo khal hivek caan ah hin an theih thei zet an ti.

5. Hlanlai ahcun fala le tlangval ttha lo cu hringtu nu le pai’ mawh an si an ti, asina’n, Malaysia ahcun midang puh ding a um lo, anmah (fala le tlangval) rori ih sualnak a si an ti.

6. Tulai ih kan Pathian biak dan hi hlan lai hnakin kan tthangso na’n, zumtu ngaingai le zumnak lamih rintlak ngaingai cu kan mal deuhdeuh an ti.

7. Pathian le miphun hrangih pum a pe aw theitu hnakin zianghman ttuan ve lem lo pawl hin sawisel an hlawh ve lo an ti. Midang sawisel na duh lo ahcun ‘hotu/hruaitu si lo mai aw’ an ti. 

8. Laimi pawl hi, midang tlamtlin lonak bawmh hnakin sawisel kan peih sawn lo maw?’ an ti. A sawiseltu khalin, “Keimah tla ka tling lo zet na’n’ ti tawngkam a hmang ringring fawn,.. an ti. Zo so fel le ttha cu?.., zohman in kan thei lo an ti.

9. Thuphan tla hi huaisen zetih a relsuaktu an um ahcun huaisen zetih rak zum maitu khal an um ve men’ an ti. Thuphan hi thudik hnakin a ‘dik hmel’ an ti.

10. Laitlang ahcun fala cu uite thawn tahtthim an si (A duat peihtu hrangah neih hluahhlo thei) an ti ih, Malaysia ahcun laksawng tumpi (bungus=parcel) a si an ti, ramdang (third country) ahcun ‘sui’ vek an si an ti.

11. “Kawlram ah rak um rinring sehla nupi ka nei zo ding na’n!” a titu pawl khi, Malaysia ih an tawng lo ruangah a si an ti.

12. Fala hrangah Malaysia hi awlsam zetih duhtu tawngnak a si ih, tlangval hrang ahcun harsa zetih duhtu hawlnak a si an ti.

13. Fala/tlangval (darling) pahnih pathuam rak kawp hnuaihnitu pawl hi X’mas ah an buai ttheu an ti. Zobik a thlun ding tiah a duhbik a theih thei an ti. Tlangval lai ah hin kawhhran upa ttuan sehla, nupi hawl an awl zet ding an ti.

 

 

                     Laimi Vrs Israel

                                                                   -Cap Burung

 

Lai miphun thuhla hi saupi a theitu cun Israel thuanthu hi fiang zetin hun zir sehla, kan sinak a danglam dan le kan lungput a bawng awk dan pawl a thei suak tengteng ding. Zaingtin laimi pawl hi hmunkip ah kan um ih, kan ttong khal a danglam vivo tiah zir ding tampi a um. A hmaisabik ah ‘Lai’ tinak hi ziang a si pei ? Aizawl North College ka feh lai ahcun mizo ca hitin kan zir: Lalchungnunga’ n laimi man e; pasalttha in khua an kham e..” ti’n. Hih hi mizo thuanthu ih ‘mikei’ thuhla a si. Mikei ‘Lalchungnunga cun minung (laimi) a keu ruangah pasalttha pawl in zohman khaw lenglam suak lo ding in thu an than’ tinak a si. Himi thu thawn pehpar aw in Sociology final year ah thesis sau zet ka rak nganih, leitlun ih miphun hmuahhmuah ah ‘milai’ tinak hmin neitu cu ‘Laimi’ kan si. Laimi cu miphun hmin a si vekin ‘Minung’ tinak a si tiah ka tarlang.

Laimi sinak ihsin tulai ih miphun dang a lar deuhdeuh hi hun zoh sehla. Mizo tinak cu ‘Mi=people’ ti le ‘Zo=hill’ ti a si ih, Mizoram tlawng ca ah khal mizo cu hill-people (tlang parih um milai) tinak a si tiah kan zir. Kawlram ihsin paihte miphun pawl cu India ram (Mizoram) hmun hrekkhat ah an rak feh hmaisak ruangah ‘Pai te’ (Pai=feh; Pai te = a fehtu pawl) tiah anmah le anmah an rak hminsin aw ih, cuihsin an miphun hmin a rak si vivo. Tedim miphun ngaingai hmuh ding a um loih, Tedim cu khawpi hmin a si ruangah a sungah anmah peng ‘Sihzang, Tonzang tivek in an rak danglam vivo ruangah tuih ni tiang India ram ahcun ‘Paite’ ti’n an rak thei aw vivo. Mizo khal anmai’ ttong neitu ngaingai cu hlan laiih bawi a ttuantu ‘Sailo’ pawl ih ttong si loin, Duhlian khua ih an rak hman ttheumi cu tuih ni tiang Mizo ttong tiah an rak phuahsuak ih, an kiangkap ih ttong phun dangdang thawn an bet vivo.

Falam miphun hun ti sehla, Falam cu khawpi hmin a si ruangah, ‘Laimi (Falam)’ ti kherkher a ttul caan tampi a um. Ziangahtile’n Laimi lakah Halkha peng le Falam peng deuh kan rak um ih, kan ttong khal a phun a dang cio ko na’n, tulai san that uk awknak ruangah ‘peng’ in kan rak tthen aw. Falam ttong khal ‘Laizo’ ttong ihsin hram a thawk thei ko na’n a zapi cun a si loih, peng dangdang ihsin a ra suakmi ttong dangdang in tulai san Falam ttong timi a ra suak. Hi hmuahhmuah hi kan umnak thlua le tlang, le kan eihawlnak le kan suksohnak a danglam ruangah a si kan ti thei. Hitawkih kan ralrinnak ding cu, Laimi (Falam) sungah ziangvek ttong danglam khal um sehla, pumkhat kan sinak hi hngilh ding a si lo. Israel pawl cu miphun dangdang in an uk rero na’n a hlanih rak uktu Egypt, Babylon, Persia pawl cun ‘Sal’ vekin an zoh ruangah an ttong an zirh tuk lem lo. Asinan, Greek san a hung thlengih, Alezander cun Jerusalem cu a siatsuah lo na’n amai’ kut hnuai ih a ret ve te’n ‘Greek miphun ziaza le ttong’ cu nasa zetin Judah miphun lakah a rak tlau-aupi ih, khawpi mawi tampi a hun sak ttheh ahcun, Judah pawl cu khawpi lamah an tthan ih, Judah ttong hnakin Greek ttong an rak hmang tam deuhdeuh.

Cu lawng a si lo, Jerusalem ah Kawhhran a dingsuak tikah, kawhhran upa pawl uk awk dan sawisel ih, buainak tuahtu pawl khal cuih Greek ttong hmangtu Judah (Greek-Judah) pawl an rak si. Miphun bang aw ciocio, ttong dang ngainatu cun cuih ttong dang neitu pawlih nundan ziaza cu a cawng ve tengteng ti hi a zum um zetmi a si ruangah, Falam peng ttong hmuahhmuah hin danglamnak nei hman sehla, in uktu kawl pawlih ttong hnakin kan sunlawih thiam a pawimawh zet ding.

Ttong hi ziang tlukin a pawimawh? Judah pawl ‘Jubilee cabu’ thuhla hi malte sim a ttul in ka thei. Pathian in milai a tuah ihsin, Eden hmuan ihsin thawkin ‘Hebru ttong’ in an ttong thawk tiah Judah pawl cun ‘Book of Jubilee’ ah an hminsin. Cuihsin leitlun ah mipum an rak karh vivo ih, Noah sanlai ihsin leitlun ah ‘ Eden hmunih an hmanmi ttong’ a si lomi an rak hmang tiah Judah pawl cun an zir. Cucu Pathian fapa le minung fanu pawl in thuthup an relnak a si tiah ‘Talgum’ simfiangnak ah an sim. Cuihsin Noah tei’ sungkua cu Eden hmuan ih Pathian hman mi ttong rori hmangtu a si tiah an ti. Caan a liamih, Abraham san ahcun Haran khua ihsin Hebru ttong hman vivo tu tiah hminsin a si.

Hitawk ah hin Babel inn sang ihsin Pathian in ttong a phunphun a tuah ko na’n, Hebru ttong cu a hlan ihsin a dnalgam cuang lo tiah zumnak a um. Abraham cun Haran khua a suahsan ih, Genesis bung 14 ah ‘Hebru miphun’ ti cu a hmaisabik ah a ra suak. Abraham in faate tampi a nei ih, cu pawl lakah Isaak cu Hebru ttong hmantu a si. Israel miphun khan Hebru ttong in hminsin an si vivo ih, miphun dang thawn an rawi awk caan ah an ttong sim sual pang pawl cu an that tiah ‘Thutthentu’ (Bible) ah kan hmu.

Falam (laizo ttong tiin tla siseh) ttong thiam tuk lo ruangah Kawlttong hmang rerotu pawl hi, tuih hnu kum ziangzat tiang “Laimi ka si” an ti aw tiah ruah ding a um. Kawl ttong ih ttong zutzo pawl hrang ah Lai ttong zirnak ding caan a um rero lai ti khal hi theih a ttha. Laimi hminsin awknak ding khal hi, hnipuan (Lai thuam) le Vapual zuk lam khal a si lo; ‘Lai ttong rori’ hi a si’. Babylon acozah hnuai ih Israel pawl an ram (Jerusalem) an kir lai ah, mipum malte cun Jerubabel ih hohanak in biakinn rem tthatsal an tum ih, Judah nunau tampi cun miphun dangdang pasal an rak neih zo ruangah Jerubabel cun ‘Miphun dang pasal neitu pawl cu an pasal pawl in Judah ttong le Judah phunhnam ti dan (culture and custums) an cohlan (hman) vivo thei lo ahcun cuih nunau pawl cu an faate pawl thawn an pasal ih khua le ram ah a tlunter ih, an pasal pawl in Judah sinak an pawm ahcun Jerusalem ah an thlun ve. Hih thu hi kan miphun hrangih kan zir ding le zohtthim ding cu a si. Lai ttong le Lai nun a cohlang thei lo miphun dang pawl cu ‘nupi/pasal ih nei lo lawlaw ding in kan zirh awk a cu zet. Ezra san ih Jerusalem biakinn an tuah lai ahcun mipum khal an siat thluh ih, Judah ngaingai ziangzat, Judah le miphun dang a rawi aw mi ziangzat tiah an hminsin. Hivek lungput hi miphun duhdawttu cun a neih tengteng a ttul.

Kan theih dingih thupi zet pakhat cu, Judah pawl rak hmuhsuam ttheutu miphun dang pawl hin ‘an ttong hman’ ruangah a si loih, an Pathian hnakin pathian dangdang le miphun dang bawmhnak an hiar tuk ruangah a si. Laimi in rak hmuhsuamtu pawl an um khal le’n, fiang te’n kan zoh awk a ttha ding. Kan ttong le kan miphun hi Pathian tuahmi le dinsuahmi a si. Zohman ih hmuhsuam thei a si lo. Asinan, kan Pathian biak dan le kan lungput tttha lo ruangah midang tibuai ttul loin kanmah le kanmah kan buaiter awk caan tampi a um. Hitler uknak hnuaiah Judah pawl cun ‘ Judah miphun an sinak’ an langter sinsin. Cuti cingin Pathian in an umnak ding a peekmi ah tlung duh loin damsungih um duhnak an nei vivo ruangah, Pathian Hitler ih kutcak thawn a dawi ciamco. Ramdangih laimi a thlengtu pawl teh damsungih USA , Australia tivekih um ringring ding le Laitlang hman thei duh nawn lo tiang in um kan tum maw? Pathian thinhengnak thawn dawi kir ttul loin Pathian in ziang ruangah hih ram ah in ret tiah kan ruah a ttul ding.

·        * * * * * * * * * * * * *

 

 

World News

 

                                    LEITLUN THUTHANG

Bush in Iraq a tlawng: Kan dung zarhpi ni ah US president George W.Bush cun Iraq ram hotu Iraq ramih US raalkap pawl tawng ding in a tlawng tiah White House thuneitu pawl cun an sim. Bush hin 2003 ih Saddam Hussein a dirh thlak ihsin Iraq ramih mipi kilhimnak thawn pehpar aw ih rampi hotu le raalkap pawl vei 4 a tlawnnak a si Bush cun US raalkap pawl cu lungawithu a sim ih, leitlunih thuneihnak dik lo zetih a hmangtu pawl cu US in a do vivo ding tiah a sim. –AFP

 

Israel in Palestinian a kaihmi pawl suah ding: Kan dung tlawngkai nikhat ah Israel thuneitu pawl cun Palestinian miphun a kaih (hren) mi pawl cu West Bank thuneitu pawl cun rem awknak ding ah a suak thluh ding tiah an phuang. Hih thawngtla 229 pawl hi Israel le Palestinian pawl an buai lai ih an kaihmi pawl an si ih, Palestinian president Mahmoud Abbas cu a khual tlawnnak ihsin a tlun ve te’n suah thluh an si ding. Abbas hin Mecca khawpi ah muslim puai Aidiladha a hman rero lai ih, a feh hlan ihsin Israel le Palestinian pawl karah buainak a suah sal ruangah Israel ram cu rocket bomb thawn an rak kap dah. Asinan, Aidiladha puai vekin Christmas puai cun daihnak a duh ruangah rem awk a ttul a si tiah Israel lam cun an sim. – AP

 

Sri Lanka in LTTE hmunpi an kulh: Sri Lanka acozah raalkap pawl cun tuih kum sungih LTTE hmunpi siatsuah an tumnak cu an fehpi vivo. Kan dung zarh ah LTTE (Liberation Tigers of Tamil Eelam) hmunpibik Kilonochchi thlanglam 8 km ih Terumakrikandi cu raalkap pawl in an lawng zo ih, raalkap le tapung tampi an thi. Asina’n tapung lam le acozah lam cun an raalkap ziangzat an thi ti an sim duh hrih lo. Raalkap vanzam cun Kilonochchi kiangkap hrawng ah bomb a thlak rero ih, tapung nunau raalkap thuneitu khal a thi tiah an sim. Kilonochchi hi Sri Lanka khawpi Colombo ihsin saklam 330 km ah a um. Sri Lanka ih Tamil miphun pawl cun anmai’ umnak ram cu an thuneihnak ramih tuah an tumnak cu ram neitu Sinhalese miphun pawlin an siang lo. – AFP

Siangpahrangnu Elizabeth in sumpai hmang mal:

British siangpahrang sungkua thuhla ngantubik Nicholas Davies cun siangpahrangnu Elizabeth II cu milian sumpai hmang thiam a si tiah kan dung tlawngkai nikhat ni ah a sim. Hih thu hi leitlun acozah tampi in sumpai lamih harnak an tawngmi thawn pehpar aw in Elizabeth cun a tupa pahnih Williams (kum 26) le Harry (kum 24) hnenih a thusim a relsuahnak a si ih, siangpahrangnu cun Williams le Harry cu ‘tangka hman tamnak Night Club le puai dangdangih tel tam lo ding in a forh’ tiah a ti. Elizabeth (Kum 82) cun a tangka hman dan pawl cu ramdang acozah hrauitu pawl hnenah cawng ding in a sim ih, amah rori khal in sumpai a hman dan a rem rero tiah a sim. Siangpahrang sungkua hin kum 1991-1992 ah British tangka sterling pound 87,300,000 an hmangih, 2007-2008 ahcun sterling pound 40,000,000 lawng an hmang. An umnak Buckingham palace ih thilri hman dan ah, ‘minung um lonak khaan cu meisa phit ding, thilri thar lei loin a hlun khal hmansal ding tivek’ khal in daan a tuah. A pasal Pillip cun 1970 ih bawngbi a leimi khal a hruk lai ih, amah khal in 1980 hrawngih a leimi hnipuan khal a hruk rero lai tiah a sim. ‘ Elizabeth hin a hnipuan hruk cia zo a hruk dah lo’ ti a si ttheu na’n Slovakia ram a tlawn laiah a hnipuan hruk kel cu vei hnih rori a hruk tiah Davies cun a sim. Elizabeth II hin British sterling pound 320,000,000 (RM 1,700,000,000) a nei. – AFP

 

Thilsual tuahtui’ nu le pa in tangka kuan: South Korea ram thuthangca Yonhap cun kan dung zarhpi ni ah nunau kum 7 sualpitu tleirawl kum 18 ih nu le pa cu Seol khawpi ih thutthennak cun Korea tangka Won 83,000,000 (RM 217,000) a kuanter tiah a ngan. Thutthennak cun nauhak ih nu le pa cu an fapa an zohkil lo ruangah le nunau mipatnak lam zuknung a zoh ruangih thilsual a tuah ding tiang an theihpi lo ruangah hitin a kuanter ih, nunau ih nu le pa cun Won 225,000,000 an dil na’n an dil zat cu an ngah lo. Thilsual a tuahtu cu kum 10 sung thawng tla ding in thutthensak a si. – AFP

 

Zimbabwe in 5,000,000,000 cahnah tangka tuah:

 

Zimbabwe acozah cun kan dung December 4 ihsin tangka cahnah pakhat lawngah 2,000,000,000 le 5,000,000,000 an tuah thar. Zimbabwe ramih US ambassador James McGee cun president Mugabe cu a ram mipi harsatnak thei duh lotu tiah a puhmawh ih, Zimbabwe mipi 5,000,000 hrangah ei le in ding 70% cu US in a tawlrel sak laiah, an ram ah ‘ti hri’ (Cholera) ruangah mi 760 an thih lai ah acozah cun tidai thianghlimnak cet hman lei loin minister pawl hrang mawttaw thar tampi an lei ih, sumpai in mipi bum an tum ruangah nikum hnakin an tangka Zimbabwe dollar cu 231% rori in a tla niam. Hih ruangah US cun Mugabe ih acozah cu hmaikum march thla ih hril awknak ah midang hnenah thuneihnak ap ding in a forh. US hin tuih kum sungah Zimbabwe hrang US$ 18,000,000 man thilri in a bawm zo. – AFP

 

Miss World 2008 ah Russia fala:

Kan dung zarh zarhte ni ah South Africa khawpi Johannesburg ah Russia fala Ksenia Sukhinova (zuk: a laita) cun miss world 2008 sinak a cohlang. Tuih kumih miss world ding an zumbik India fala Parvathy Omanakuttai (zuk: kehlam) cun pahnihnak a ngah ih, kum dang hmuahhmuah ih a tel ban ve dah lo Trinidad and Tobago ram fala Gabrielle Walcott cun pathumnak a ngah. Miss World hi leitlun fala mawi hrilnak ah a harsabik le a sangbikmi a si ih, Venezuela ram cun vei nga rori an rak ngah zo. – AP

 

Boxing champion Klitchko a cak sal: Kan dung zarh zarhte zaan ah Leitlunih Boxing Heavy Weight champion (WBO,IBF,IBO) Vladimir Klitchko (Ukraine) cun a champion sinak lawngsak tumtu Hasim Rahman (US) cu round 7 nak ah Technical knock out in a neh riai. Round 6 nak ah Rahman (Kum 36) cu veikhat a tlu zo ih, round 7 nak ah referee in Klitchko (Kum 32) cu nehnak a pe. Klitchko cun vei 55 a lehnak ah vei 52 a cakih, vei 3 a cak lo. Rahman cu vei 54 a lehnak ah 47 a cak, 7 cak lo, 2 cak sawn um lo a si. Rahman hi Klitchko thawn lek thei ding in Russia rammi Alexander Povetkin thawn lek hmaisa ding a sina’n, Povetkin cu a ke a nat ruangah kan dung Ocotber thla ah Klitchko a lehpi thei lo ih, Rahman hin a aiawh in a rak lek a si. – Reuters

 

Nunau 10 sualpitu damsung thawngthlak: Japan ram thutthennak cun kan dung tlawngkai nihnih ah British fala 1 le japan fala 9 a sualpitu Joji Obara (kum 56) cu damsung thawng tla ding in thu a tthensak. Joji hin British fala hi a sualpi lawng si loin midang kut in a thihnak tiang a rak tawlrel ruangah tangka tampi a kuan bet. – AP

 

Philippine in tapung thawn daihnak tuah: Philippine acozah cun Christmas boruak le kumthar hrangah communist tapung pawl thawn meithal ih kap aw lo ding in daihnak (ceae fire) a tuah. Asina’n communist lam cun thuhla an ra theihter hrih lo tiah Eduarto Emita cun a sim. Philippine raalkap pawl cun December 24 le 25, 31 le January 1, 2009 ah meithal hmang lo ding in a timtuah. New People’s Army (communist tapung) pawl hin raalkap 5,000 hrawng an nei. –AP

 

Israel ah Russia mi 24 an thi: Kan dung tlawngkai nihnih ah Israel in Russia khualtlawng tonak bus cu Negev nelrawn ah a cangsual pangih mi 24 an thi, 33 cun hliam nasa zet an tuar. Israel hi middle east ram hmuahhmuah ah mawttaw accident malnakbik a si ih, tuih ttumih ramdangmi an thihnak hi 2008 sungah a nasabik tiah Israel radio cun a sim. –AFP

 

UN hotu in Kawlram tlawng duh lo: Kan dung zarh ihsin UN secretay-geneeral Ban Ki-Moon cun Kawlram ih tlawng a duh lo thu a rak sim zo vekin, tlawngkai nithum ah hih thu hi Geneva ih UN zungpi cun a phuang sal. Ban cun Kawlram acozah in mipi uknak (democracy) lamzin ttha tuah ding le Aung San Su Kyi parih an thukammi pawl cu zianghman an talrel hrih loih, hivek bum awknak thuhla a um sung le UN le ASEAN pawl dilnak thlun loih a um sung ahcun Kawlram sungah tlawn ka tum lo’ tiah a sim. –Reuters

 

Independence day hmang: Kan dung tlawngkai nihnih ah Bangladesh le Kazakhstan cun Independence day an hmang. Bangladesh hi hlan lai ahcun Pakistan ram a si ih, India prime minister Indira Gandhi san ah India raalkap pawl bawmhnak in Dec. 16, 1971 ah Bangladesh cun independence an ngah. India acozah cun ‘Vijay Diwas’ tiah raalkap pawl sunlawihnak ni ah an hmang. Bangladesh thuhla hi India le Pakistan karih buainak hramthawknak bik a si ih, tuih ni tiang Kasmir ( India saklam) ramri thuhla ah kum 40 hrawng an buai lai. – Kazakhstan cun 1991 ah Russia ihsin independence an ngahih, an khawpibik hrangah Astana cu an nemnghet. Russia san ahcun Almaty cu Kazakhstan khawpi a si ttheu. An hruaitu Nursultan Nazarbayev cun mipi 98.7% vote in tuih ni tiang president hna a ttuan lai ih, Russia kuthnuai ih an um lai ihsin ‘Space center, nuclear center’ tivekih tuah a sina’n, Kazakhstan cun nuclear thilri zianghman a tuah lo ding tiah a sim. Kazakhstan hi leitlun ram tamsawn in van boruak (space) ih an zamsuahnak hmunpibik a si. –AP/The Star Dec. 17

 

Indonesia in Khrihfa himnak tuah tum: Indonesia acozah cun tuih kum Chritmas le kum thar boruak ah Khrihfa pawl cun hnangam te’n biakinn ih an feh sukso theinak ding ah palik 47,685 cu kilhimnak ttuan dingin a thlah bet ding tiah a sim. Indonesia ram hi leitlun ah muslim tamnakbik (mipum ih siar in) a si ih, Sumatra tikulh saklam, Sulawesi tikulh saklam le Papua tikulh ah Krihfa malte an um ve ruangah muslim tapung pawl kut ihsin palik pawl in an kil ding tiah palik hotu Abubakar Nataprawira cun a sim. – AFP

 

Japan in Christmas hmang lo:

Japan acozah cun tuih ni tiang Chistmas ni cu public holiday vekin hman a duh hrih lo ruangah Khrihfa pawl cun hnattuannak ah harsatnak an tawng. Asinan, Japan ramih khrihfa malte cun Christmas ni ngaingai a thlen hlan ah amah le tuah thei tawk cio in nawmnak (puai) an rak tuah ve ih, Japan mipi khal in laksawng khal an rak pe ttheu. Japan ramih Khrihfa pawl hi ramdangmi Khrihfa in Japan miphun nupi pasal ih an neih ihsin hram a thawk khal a si thei tiah 1992 ih Japan mi pasal a neitu Malaysia rammi Sarah Mori cun The Star a sim. [zuk: Japan ram Khrihfa nauhak pawl in Bawi Jesuh suah lai Drama in alangter)           -The Star(Dec. 15)

 

 

Tuih zarh hrang thufim

 

Christmas lawngih biaknak hrang timtuahtu cu Pathian hrangah hnattuan ttha a ttuan dah lo dingih amai’ innsang khal a zohkil thei lo ding.                                    –Ministry of last trumpet magazine

 

Kan innsung le biakinn kan cei vekih kan thinlung Pathian hrang kan ap lo ahcun Christmas le khawmnak caan hmuahhmuah hi kan hrangah a thahnem cuang lo.                                                                        –Benny Hinns

 

 

Thlacamnak tel lo cun leitlun ah thil mangbangza tuah thei a si lo.                                                                                                – Billy Graham

 

Vanram fehnak ding lamzin cu thlacamnak in fiang zetin a hmuh thei.                                                                                          – E.Dover

 

 

 

A neitu                LCF, Malaysia

 

Editor                     Biak Chawn

Joint Editor            Salai Kawl Lian

                                                      

Zemdarhtu(Circulati on managers)

SalaiLiante

                                  Obed Cungte

                                   Lal Ruat Lian

Khumte                 

Calai kawmiti            

                               Salai Kawl Lian

                               Mang Hlei Sang

                               Biak Chawn

                               Obed Cungte

 

Advisor                  Upa Za Dun

Patron                    Rev. Run CungMang

                              

Contact

                                  Hruaitu

                                  Bangunan Tan Kim Onm

                                  No. 46-48 2nd Floor

                                  Jalan Sungai Besi

                                  57100 Kuala Lumpur

         

   E-mail :                  hruaitu@yahoo. com

   SMS   :                   016 3440 672 ( Biak )

                                   016-302 1254 (Kawl)   

     Pastor                    017 – 3880 848

(Visited 67 times, 1 visits today)

Comments

comments

Comments

%d bloggers like this: