Hruaitu Issue 181

Hruaitu Issued no. 181

 

Cangvaih a tha
Zoha umlak men a paih  rero tu um ke?! Cutivek mi cu an um men thei nan an mal zet thei. Minung cu umlak men ding kan si lo. Kan cangvaih a tul ringring. Kan cangvaih lo tikah kan taksa a kham dingih cuihnu ah natnak thalo tla kan ngahcih thei. Hnatuan timi hi kan nawmpi zet theu. Pathian khalin hnatuan dingih in timi kan si.
   Tulai Malaysia ih um kan Laimi pawl a hrekkhat cun hna nasa zetih an tuan lai ah a hrekkhat pawl cun neihcia ei le u le nau ih cawmhlawm mi pawl an um tin kan hmu thei.  Hnatuan pawl cu rel ding a um lo lawlaw. A tuan thei na ih a tuan lo tu pawl hnenah  hitin thu suh nak nei bangta sehla…. Ziangruangahha hna na tuan ve lo? Na harhdam tthittha lemlo mawsi? Na neihcia hi cem thei lemlo ah maw na ruah? Asilole na cathiam nak hi na hmang taktak thei hnai lo mawsi? tivek khin. Kan kiangkapih mifim, mi neinung hrekkhat pawlih nun kan zoh asile hnatuan hi an zahpi lo nasa ih an tuan hruthro rero asi ti fiangten kan hmu thei.
  Paisa ngah ding lawnglawng kan ruah tuk theu tla hi a that lo caan a um men thei. Cuhnak ih thupi  ka ruah mi cu kan thinlung in ti nuamtu le inti zangkhai theitu pakhat asi timi hi asi. Cuihleiah mah le mah zum-awknak kan timi tla in pek fawn. Leitlunih na nunsung can tawite ih nawm taktak na duh a sile nati thei tawkte ih hna na tuan a tul ve.
Asile,cikhat talin hun cangvaih tum thlang hnik law.
DUHDAWTMI  KA  NU
Salai john
Ka nu…ka nu
Ka sem hlan ihsin in cawm thanglian tertu ka nu
Na duhdawtnak sung ihsin hitia ka si zo
Na duhdawtnak theithiam loin maw
Caan tha hmuah ka hmang liam theh?
 
I kawk le nun i simmi ka hrang thiltha ti ka rak thei lo
Atu lawngah na duhdawtnak ka theifiang
A tlaizo maw ka nu in ngaithiam hram aw
Santlai lo na fa ka fim tlaituk maw?
 
Ka fiang zo na¡¯n titheimi ka nei lo
Ka kiangkap ka zoh ih thimnak lawngin a khat
Thu ka ruat, thinphaan mangbangnak lawngin a khat
Ka hmuhnak le ka ruahnak khal a thim theh
 
Bawmtu ding ka hawl, ka hmu lo
Hnemtu ding ka hawl, ka tong cuang lo
I bawm theitu le i hnem theutu ka nu
Nangmah ngai ruangah ka mitthli
ka hmai khat in a luang
Ka fa … Ka fa
Ka fa sumpai hawl dingah pacang zet in
Ka duhdawtnak tangsung in na pawksuak zo
Ka lungawi in ka hnangam rinsantlak fa ka lo nei
 
Ka fa…mi khua le ram ah zonzaih tuarih na au aw ka thei
Na nu ka thinlung cu meisa bangin a alh
Tuar daan ka thiam lo sunzan in na nung cung ka lo ttah
 
Ka fa…na hawlmi cu sum le pai a si kha thei aw
Zu le sa nomcennak hawl hram hlah
Na rualpi pawl mi pawl ralring ten maw ka fa
Hmanseh rualpi tha cu sui le ngun an si
 
Ka fa…tongkam thawn mi neh a duhtu pawl khi
Tuannak thawn va neh hai aw
Mi aa a si lo ahcun a phuhrung aw dingih
Mi taimazet ah a cang saal leh ding
 
Ka fa…hawl aw, na thazaang suah in taimak in
Pe aw a lo petu Pathian  hnenah
Khawl aw kan inn sungsang hrangah
Hmang aw a tawkfang te¡¯n na thazang hrangah.
 
 
Hlawhtlinnak Thuhrampi
Rev. Run Cung Mang
¡°Bawipa cu Joseph hnenah a um ih a hrangah ziang hmuahhmuah a tluang thluh. Bawipa Pathian cu Joseph hnenah a um ih a thil tuahmi hmuahhmuah ah a hlawhtling.¡±
¡°Bawipa Pathian cu Joseph hnenah a um ih a zaangfah ruangah thawnginn uktu bawipa khal Joseph parah zaangfahnak thinlung a neihter.¡±
¡°Ziangahtile Bawipa Pathian cu Joseph hnenah a um  ih a thil tuahmi hmuahhmuah ah hlawh a tlinter.¡±                                                      (- Seem. 39:2-3, 21,23)
Thuhmaihruai
Leitlun mi hmuahhmuah in ¡°Hlawhtlinnak (success)¡±  timi cu kan duh thluh. Nitin heh le maw tiih thla kan camnak, hna kan ttuannak, fimthiamnak a phunphun kan zirnak, le kan timlaam ih kan zuamnak a zate cu ¡°hlawhtlinnak¡± kan duh ruangah a si. Hlawhtlinnak cu the concise dictionary in, ¡°tumtahmi pakhat tlinsuahnak, hminthannak, lennak le dinhmun saang ngah (success is the acomplishment of an aim or purpose, the attainment of fame, wealth or social status)¡± ti¡¯n a simfiang. Mi hmuahhmuah in tumtahmi le lungthlitum saduhthah kan nei cio. Cuih kan hmuitinmi pawl ziangtluk in kan ngah
timi hi hlawhtlinnak timi cu a si. Kan Bible sungih hlawhtling nun neitu tampi sungin Joseph ih nunnak zirzoi in ¡°hlawhtlinnak thu¡± malte kan zoh khawm hnik pei.
 
1.  Pathian hnen ihsin Phuan-langnak a ngah.
Joseph ih nun thuanthu tluan kan zirzoi tikah annih hi Pathian ih phuanlangnak cotu a sizia kan hmu thei. Pathian in Joseph hnenah mang (dream) a peek. Joseph ih hlawhtlinnak thuthup hi amai¡¯ fimthiamnak le zuamnak ruangah sibik loin, Pathian ih phuanlangnak (revelation) asilole  (vision) peekmi ruangah a sisawn. Dvek cekci in an mang ih tican cu a kim ttheh (Seem. 40:22).
 Culawng hman si hrih loin, Pathian ih umpinak le phuanlangnak ruangah Faro ih mang phundangzet tla a leh sak thei. Seemtirnak 41 sungah Egypt siangpahrang Faro in mang phundangzet a man. A thin a nuam lo ngaingai. A ram sungih pol pawl le mifim zate a ko ttheh. A mang cu a sim ttheh hngai na¡¯n a leh sak theitu zohman an um lo. Cutikah Faro in Joseph cu a ko ih, ¡°Mang ka nei ih zohman in an let thei lo. Nang cu mang an lo simmi fiangte in na let thei ti in sim,¡± a ti. Joseph in, ¡°Kei ih ti theimi a si lo, Pathian lawngin fiangte in a lo sim thei ding,¡± (cc.15-16) a ti. Pathian ih phuanlangnak a cotu Joseph in a mang ih sullam cu a leh sak thei. Faro rori in, ¡°Hi pa vekin Pathian thlarau ih umpimi midang khui ahso kan hmuh ding. Pathian in hih thil hmuahhmuah hi a lo hmuh hrangah nangmah hnakin thil a theithiam sawn le a fimsaawn zohman an um lo,¡± a ti (cc.37-39).
2.Pathian hnenah Rin-umnak  a nei.
Joseph nunnak kan zirzoi tikah, mi dingfel le mi tlaitluang a si. Mi nunneem le mi rin-um khal a si fawn. A ule pawl ih an iksik le an tisiat tum rerolai khal ah lehrul ve le tisiat ve a tum lo. Pathian hnenah rin-um in ngaithiamnak a nei. Sal ih an zuar tik khal ah Pathian in a umpi ih retheihnak a tong lo. Potifar ih inn ah a thleng ih rinsantlakzet in hna a ttuan. Solforhnak a tong na¡¯n Pathian  hnenah le a bawipa tlunah rin-umnak a nei ih sualnak sungah a tla lo. Zianghman mawh palhnak nei loin thawng-inn a thleng. Asinan Pathian in a umpi ih thawng-inn sung khalah mit-hmai ttha a ngah. Thawnginn kiltu in a rinsanzet. Thinlung thianghlim le rin-unnak a neih ruangah Pathian in a umpi ih a tuahmi hmuahhmuah ah hlawh a tlinter.
 Zumtu kannih tla Pathian zumhnget in rin-umnak kan neih ding a thupizet. Nipi Ni lawngih Pathian theitu a  hmin men Khrisfa si loin khuitawk hmun le zovek lakih kan um khal asile Pathian fa kan sinak kai hnget in rinsan tlak ih um ding kan si.  Kan biaknak le kan zumnak ah rin-umnak nei ding kan si. Leitlun tisa duhhiarnak ah thlun le tluril maitu si loin Joseph le Daniel bangin Bawipa ah rin-umnak neitu si zuam ding. Mai¡¯ miphun tlun ah tla rin-umnak neitu si zuam ding. Mai¡¯ nupi pasal parah tla rin-umnak nei ringring ding. Mai¡¯ rualpi ttha le hnattuanpi pawl tlun ah siseh, khuapi vaangpi innhnen vengpa le sungkhat unau pawl par khalah rin-umnak neih a ttul. Rin-umnak neih hi hlawhtlinnak thuthup a si.
3. Pathian in a Umpi  ringring       
Joseph ih hlawhtlinnak thuthup hi ttha teih zirzoi tikah amai¡¯ fimthiamnak le thiltitheinak ruangah si loin, Pathian ih umpinak le bomnak ruangah a siziaaglamzet mang a man lawng si loin, midang ih khuaruahhar mang tla a tican lehsak theinak Pathian ih a peek. Joseph in, ¡°Mangleh theinak cu Pathian ih peekmi a si¡± a ti (Seem.40:8). Dik lozet ih puhmawh nak a tuar, asinan thawnginn sungah Faro ih sabit petu le sang petu ih mang manmi a lkan hmu thei. Ziangruangah a ule pawl in an siatsuah thei lo ih, ziangah Egypt mi pawl in tuahmawh loin Potifar hnenah a thleng sipei tile Pathian ih lamhruainak ruangah a si. Ziangruangah sualforhnak ah a tlu lo ti asile a rin-umnak ruangah Pathian in nehnak thazaang a peek ruangah a si. Thawnginn sung tiang ih hlawhtlinnak a ngah, mang a leh thei khal Pathian umpinak ruangah a si. Faro ih mang a leh sak thei ih siangpahrang lung tongin dinhmun saang a thlen theinak tla Pathian ih umpinak ruang thotho ah a si.
 Zumtu hi ziangtik hmanah kanmahte lawng kan si dah lo, Pathian in a Thlarau Thianghlim in in umpi ringring. Bawi Jesuh in, ¡°Leilung a cemnet tiang nan hnenah ka lo umpi ringring ding,¡± in ti (Matt.28:20). ¡°Ziangtik hmanah ka lo thlauthla lo dingih ka lo taanta lo ding,¡± (Heb.13:5) in ti. Pathian in Josuah hnenah, ¡°Na nun sung hmuahhmuah ah zo hman in an lo neh lo ding. Moses hnenih ka um bangin na hnen khalah ka lo umpi ding, ziangtik hmanah ka lo taanta lo ding. Na fehnak kip ah ka lo umpi ringring ding¡± a ti (Joshua 1:5,9). Curuangah zumtu cu nitin kan nunnak ah Pathian fahniang kan sinak tettikhaan theitu si dingin Pathian in in umpi ih sualforhnak phunkim lak khal in luatnak le neh theinak in peek a si.
                  
 Thunetnak
Mifel Joseph ih hlawhtlinnak thuhrampi cu ¡°vision neihnak, rin-umnak, le Pathian ih umpinak¡± a si. Moses ih hlawhtlinnak thuhrampi khal kan zingzoi asile ¡°Pathian ih umpinak¡± ruangah a si ti fiangte¡¯n kan hmu thei. Moses in Pathian a rinsan, ¡°Bawipa nang kan hnenih na tel lo ahcun hih hmun ihsin in fehter hlah,¡± (Suah. 33:15) a ti ruangah Pathian a lung a awi ih a fehnak lamzin tluan ah cat baang loin a umpi. Daniel ih hlawhtlinnak thuhrampi khal kan zoh asile mi dingfel a si, Pathian rinsan in nikhat ah veithum thlacam ringringtu a si ruangah Pathian in kiosa kua sung ihsin khal a ruun suakih fimnak, thiltitheinak le thluasuah phunkim a peek ti kan hmu.
 Hih leitlun kan nunnak caan tawite sung ahhin milai in saduhthah tumtahmi, hmuitinmi le zuammi kan nei. Caan tampi ah ka hlawhtling lo pang ding ti kan phaangzet. Asinan kan theih dingmi thupizet cu: Joseph, Moses le Daniel bangin Pathian zumhngetnak nun kan neih ding a thupi ngaingai. Culawng si loin ziangkim ah Pathian rinsan in, ¡°Bawipa Nangmah locun¡± timi lungput thawn nitin thlacam kan ttul. Thinlung thianghlim, nun thianghlim nei in Pathian ah rin-umnak kan neih ahcun, Pathian in in umpi dingih ziangkim kan tuah kan ttuanak kipah hlawhtlinnak in pe ding a si.
Hlawhtlinnak thuhrampi cu vision neihnak, rin-umnak le Pathian ih umpinak hi a si.
  
LEITLUN  THUTHANG
Thailand ah nga ei ruangah mi 140 in an tuar: Kan dung tlawngkai nikhat ni ah Thailand ram, Nan province ah mi thai rawl phunkhat, nga ihsin tuah (puffer fishball) ei ruangah mi 140 cu siizung ah an lut. Hihi nga an retnak ah tur (poison) a um ruangah a si tiah doctor pawl in an sim. An dinhmun hi zoh rerolai a si. -AFP
Singapore ah natnak maksak: 1972 kum ihsin an hmuh suah zo, ¡®hmur le ka¡¯ natnak (HFMD: hand, foot and mouth disease) cun tuih kum ihsin Singapore a ra saal. Enterovirus (EV71) hin tulai ahcun Singapore ah tuih kum sungah mi 7050 in an ngah, kan dung tlawngkai nikhat ah 527 in an ngah thar. Kum 2000 October ah milai 140,000 rori in an rak tuar dah ih 7 an thi. 1972 ah 104 lawng an rak um ih, reipi a hloh hnu ah USA, Britain le Canada ah tla hmuh vingvo a si. Hih natnak hi chicken pox le measle vekin ril natnak ruangih um a si tiah Dr. Tay Chong Hai cun a ti. – (Star 21 & 24 April)
Vanzam parah naute a thi: Atlantic tipi parih a zam theu mi Lufthansa cu German ihsin USA lam a fehlai ah a sungih to ve nauhak pakhat cu lamzin ih a thih ruangah Ireland ram Shanon airport ah a ttum phah. Vanzam ih a tomi pohpoh cu Irish palik in thusut dingin an ttumter thluh. Palik pawl cun naute thihsan thawn pehpar aw in zohman kaih ding an thei hrih lo na¡¯n, cuih vanzam cu ¡®Addis Ababa¡¯ ihsin German ram ih ra lut hmaisa a si ruangah, cuih naute cu ¡®Ethiopia rammi¡¯ ti an thei. -AFP
Denmark cun embassy zung pahnih a khar: Denmark acozah cun Muslim prophet Muhammad ih cartoon zuk suah thuhla ruangah Algeria rem le Afghanistan ram ih embassy zung pawl a khar. Kan dung ih ttawnttok (cartoon) zuk ruangah tutiang buainak hawl an umlai. ¨CAP
Japan raalkap thlaanmual dodalnak: South Korea president thar in tulai Japan ram ih a khualtlawnlai ah Japan politician pawl in leitlun raalpi veihnih ih Japan raalkap pawl an phumnak thlaanmual (Yasukuni shrine) an pal ruangah Korea nupinu tampi cun an ram sungih Japan embassy hmai ah sandah an piah. Leitlun raalpi veihnihnak World War II ih Japan raalkap in Korea fala an sualpi le an tihrim pawl cu nasazet in an aupi. Japan raalkap 2,500,000 an phumnak Yasukni thlaanmual ahhin Leitlun raalpi veihnihnak sanlai ih raalkap daan bawhsiat ruangih raalpi a daih hnu ih thutthentu pawlin an hawlbik (war criminals) Japan raalkap 14 khal phum an si. Hih hmun hi 2001-2006 sungih Japan prime minister Koizumi in arak pal ttheu ruangah Japan le Tuluk ram pehtlaih-awknak khal in a siatpi. Kan dungah Japan PM Yasuo Fukuda cun a pal ruangah Tuluk president Hu Jintao cun a pal lo phah na¡¯n, May ni 6-ah pal dingin an rem-aw saal. (AFP)
Tuluk ram ah tidai thianghlim lo ruangah natnak: Kan dung tlawngkai nihnih ah Tuluk ram thlanglam Guizhao province ah tidai thianghlim lo ruangah mi 200 cun nikhat sungah natnak HepatitisA an ngah. Tulai ram tthangso vingvo pawl hin tidai lam thianghlim lo ruangih natnak tihnungbik Hepatitis A & B hi an buaipibik a si ih, Hepatitis B cu milai in zarhkhat sungah an thihpi thei ruangah tulai ahcun naute hmuahhmuah himi khamnak siidawt an si. (-Reuters)
Pope Benedict XVI USA kawhhran a remh: Kan dungzarh ihsin USA a thleng zo ih, Pope Benedict XVI hin New York khawpi ah ¡®caan thianghlim¡¯ a hmang rerolai. Pope hin USA a um sungah Catholic kawhhran sungih nunau mipa sualnak um phahphah theu le milai diknak covo thawn pehparmi thil tampi a tawlrel. USA cu upat tlakzetmi ram a si tiah a ti. Leitlun ih Catholic mino pawlkhawm ni (World Catholic Youth¡¯s Day) hmang dingin Australia a fehlai ding. World Youth¡¯s Day hi 1986 ihsin Rome khawpi ah an rak hmang thok, kum 3-ah veikhat an hmangih, 2005 kha Germany ah an hmang . July 15-20 tiang cu  Sydney (Australia) ah a si ding. (AP)
Osama le Obama cu unau an si maw?: Jonesville, South Carolina, USA ih ¡®Church of God¡¯ pastor pakhat cun a biakinn hmai ah US democratic president si dingih zuam rerolai ¡®Obama¡¯ le USA acozah in an hawl rerolai ¡®Osama¡¯ hmin cu ngan kop in poster a taar. Tlawngkai nili ni ah pastor Roger Byrd cun, ¡°Hihi naing-ngan-zi lam cu a si lo¡± a ti. Hrekkhat cun Obama, United Church of Jesus ih khawm theu hi muslim lam deuh si dingah an ruat. Pastor Byrd cun a thil nganmi cu ka phoih saal ding tiah a ti.
Tony Blaire  tlangleng sungah an kai: British prime minister tuan reibik Tony Blair cu kan dung tlawngkai nithum ah USA feh dingin Heathrow airport cu tlangleng in feh ih, ticket a neih lo ruangah ticket check-tu cun a kai riai. Nikum June thla ihsin prime minister sinak a cawlhsan hnu ah leitlun ramkip ih a thusimnak ihsin a malbik British tangka 500,000 ngah ringringtu hin tlangleng ticket man Pound 24.50 a pai lo riai thei cu mangbangza a si. A kaitu cun a ngaithiam saal ih, a to ter.
South Korea ah ar ting 50 that: South Korea ram cun tunaite ah an ramsung ih ar zuatnak hmun tampi ihsin ar natnak (bird flu- H5N1 virus) an hmuh ruangah a ram sungih ar zuatnak hmunpi (poultry farm) 25 ihsin ar 4,850,000 hrawng cu kan dung zarh sungah an that zo. Prime miniter cun himi virus dodalnak dingah ziangvek ih tam khal siseh, kan that vivo lai ding tiah a ti. – Star 21/4/08
Kawlram thuthang: Kan dung zarhpini zanlam nazi 8:20 hrawngah Yangon khawpi lamzin kap ah bomb a puakih, cuih hnu minute reilote ah ¡®Trader hotel¡¯ kiang ah a dang a puaksal tiah Star cun a ngan. Hi bomb ruangah hliam tuar an um loih, palik le acozah lam ihsin thuhla zianghman theih thei a si lo nan, Kawlram acozah cun Aung San Su Kyi ih hruai NLD member hrekkhat pawl thiltuah a si ding tiah a puhmawh. Kawlram ralkap acozah cun ram uktu ding hrildaan le naing-ngan-zi fehpi duhdaan policy cu referendum a tuah ih, May 10 ah phuansuah a tum. Cuih referendum ahcun ralkap lam cun parliment ah 25% sinak a nei cia ding ti le Aung San Su Kyi cun ramdangmi pasal a neih ruangah ram uktu si dingin ¡®hril theih a si lo ding¡¯ ti pawl a tel. Asinan, Kawl thluak an hmang ttheu vekin Yangon khaw sungah tlawngta nauhak pawl cu ¡®cangan (slogan & banner) thawn lamzin ah acozah duh daan tlangaupi rero in an umlai.
Ramsung thuthang: Kan dung tlawngkai nikhat zinglam zani 10 ah Lenggeng camp ah palik le lah-wah-kah pawl dodal in buainak a um. Kawlram mi 60 hrawng le Indonesia,Vietnam le Cambodia rammi tla an tel. Zung inn sungah lut in computer tla siatsuah a si. Meisa an nawk na¡¯n zianghman cu an nawk kaang man lo. Himi thuhla ruangah Kawlrammi 6, Indonesia mi 6, Vietnammi 1 le Cambodiami 1 cu an kai. (Kai cingin an kaisin bet) Star thuthang latu cun, ¡°Thawngtla pawl zohkil daan ah lungkim lonak a um thei maw?¡± tiah a sut na¡¯n, thuneitu pawl in zianghman an saal lo. Asinan, an mikaih pawl cu, ramdang feh dingih an dilnak UN in a pomsak thei lo ruangah an thinheng a si pei¡¯ tiah palik bawi Osman cun a sim.   Malaysia acozah cun Rela pawl traning tuahnak ding hmun thar 3 tuah a tum bet. Cucu Negeri sembilan, Pahang le Perak ah an si. Tuih an neih ciami cu Sungai Udang (Malacca), Sungai Petani (Kedah) le Tuaran (Sabah) ah an si. Tuih kum sungah ramdangmi 73,938 kaih an si zo, tiah Home minister Syed Hamid Albar cun a sim. -The Star
Queen Elizabeth in birthday party tuah: British siangpahrangnu cun kum 82 a sinak birthday cu kan dung April ni 2, tlawngkai nikhat ah London khawpi thlanglam, Windsor Castle, Buckingham palace ah sungkua in party a tuah. Queen Elizabeth II-nak hi ram 16 ah Head of State sinak a neilai ih, alar deuh pawl cu Jamaica, Canada, Australia le New Zealand an si.
THEIHKAUHNAK  LE  RUAH DING  TAM
   ( compiled by Biak Chawn )
1. Kan dung zarh ah leitlun ih khawpi innkhaan (room) san man khungbik a sangsang ih hminsintu ECA cun Hong Kong khawpi cu leitlun ih inn sanman khungbik khawpi a si tiah a ti. Hih innkhaan tahnak hi room 3 umnak lawng tah an si. Hong Kong ih innkhaan 3 nei san man cu thla 1 ah US $ 9,700 (RM 31,000) hrawng a si. Russia ram khawpi Moscow cu 2 nak a si ih, New York cu 3 nak a si. Tokyo le London cu 4 nak le 5 nak an si veve, Mumbai ( India ) cu 6-nak, 7-nak Seol ( S.Korea ), Singapore cu 9-nak a si ih, Ho Chi Minh city ( Vietnam ) cu 10 nak a si. Leitlun khawpi inn sanman khungbik 10-ah Asia ram 6 rori a um. Leitlun ram khawpi dangdang ahcun a tlangpi in thlakhat inn sanman khungbik US $ 2,950 (RM 9,400) a silai ah Asia ram lawng ahcun US $ 3,820 (RM 12,200) a si.
2. Indonesia ram, Java tikulh ih Cililin khawte tlangval ¡®Dede¡¯ (kum 35) cu a tleirawl lai ihsin vun natnak a phunphun ruangah tu ni ahcun a kut le a ke cu ¡®sihlik (wart) in  a khat thluh ih, cui sihlik pawl cu an thang deuhdeuh ih, a kut le ke hmuahhmuah khuh thluh in thingkung zung vekin a tuah. Kut zung le ke zung hman theih thei nawn loin a kut le ke zimlam pawl cu, thing hnah in thingkung an khuh bang in, a vun cawr le sihlik thang ringring pawl cun an khuh thluh. Vun natnak lam zirtu (dermatologist) pawl in an pal ih, an bawmnak ruangah a kut le ke cu mal tete an tan ih, tu-ahcun a kut in balhla khal a ei thei. Thingkung minung ti a si (A kiangih zuk).
3. Milai hmul neih thei lonak (neih hmuahhmuah hman tla kawng thluh) ¡®Alopecia¡¯ hi leitlun milai 100,000 ah mi pakhat in an nei. Hivek natnak phunkhat umtertu hi kham awk daan a um lo na¡¯n, hmul a tlakter thluh ti lo cu ttihnung zianghman a tuah lo. Taksa ih hmul umtertu ¡®gland¡¯ hmuahhmuah cu ¡®Alopecium algea¡¯ ruangah hna an ttuan lo.
4. Merai (epilepsy) hi thluaklam tthat lo ruangah (neurological disorder) a si ih leitlun ah milai 50,000,000 hrawng in hih natnak hi an tuar. Natnak a suah zikte ahcun a hmaisabik ah an mit in khua a hmu fiang lo. Hihi thluak sungih electric fehnak lamzin a ¡®short¡¯ ruangah a si. Himi a short tam deuhdeuh le milai ruahnak khal a harhfim ngaingai thei lo. Kut le ke khal an duhduh in (thluak ihsin a rami signal vekin) an cangvai ve. Tulai san ah a damnak ding sii a um lo na¡¯n, a malter thei. Thluak operation lawngin a hlo na¡¯n, 11% lawngin an dampi.
5. Leitlun ih milai tamnakbik ram Tuluk ram ah 2007 ah mawttaw 47,000,000 hrawng a um ih (hihi kum 1947 ih USA ram ih mawttaw umzat a si) , cucu milai 1000 ah 44 lawng in mawttaw an nei tinak a si. 2007 ah USA ahcun milai 1,000 ah mi 800 cun mawttaw an nei. Euroup ram le leitlun ram cangkang ahcun 1000 ah 600 in mawttaw an nei tlangpi.
6. Mars leilung ah kum 2009 September 15 le October ni 8 karah  NASA cun rocket (sattelite) a kuat saalnak ding ah US $ 5,65,000,000 budget an tuah.1996-98 ah ¡®Sojournor¡¯ (11.34 kg ih rit) an kuat. 2003  ah Spirit le opportunity (174.2 kg ih rit) cu tuni tiang an thlah lai. 2009 ahcun 862 kg lai ritmi Mars Science Laboratory (MSL) an kuat dingih,  Mars leilung ah thilnung a rak um dah pang maw ti hi scientist pawl theih hiarbikmi pakhat a si. Mars hi Ni heltu planet (leilung) pa 4-nak a si ih, Marcury, Venus le kan umnak Earth hi a sangsang in an um. An tumdaan cu cover dunglam ah tahtthim aw.
 
Pu Thawng Hu Lian thawn Hmaitonnak
(Tulai Iraq ram ih US ralkap ttuan laimi)
HT:  Na suahnak nu le pa, na unau pawl le Laitlang ih nan umnak khua, nan sungkua dinhmun saudeuh in in sim thei pei maw?
THL: Hmaisabik ah lungawithu ka sim duh. Iraq ka umlai ah U.S. ih Radio Station, Television le Journalist pawl tla in thu in sut ttheu ih annih cu maksak ah ka ruat lemlo. Asinan, atu cu mai¡¯ Laimi News Agency pawl in hiti vekih interview in tuahmi cu keimah cun thungaipi vekin ka vun ruat aw ih ka lung a awituk. Kei hi Zathlir khua ah ka suak ih Unu (farnu) duh umzet 7 le naupa rinsantlakzet 1 ka nei. Ka pa cu Mang Ceu, kanu cu Sa Tin Cuai an si ih,tucu inthihsan veve zo. Ka u le  4 cu Kawlram ah an umlai, midang pawl cu U.S. ah an um. Mi in pu Hu ti¡¯n in ko ih tlangval ka silai na¡¯n hokhaw.  Dec 10, 1975 ah ka suakih Zathlir ah Phun 4 ka ong. Zathlir ka umlai ah, mi vekin leeng ka to, vate ka pel, lo ka rit ve ko.
HT: Ziarnaklam ah ziangmi pawl na zirsuak?
THL: Community College ah Associate of Science (Business Administration) ka ttheh zo ih, tufang hi Georgia State University ah Political Science in kum 3- nak ka kai rerolai. 2009 kum cem zawng ahcun tlawng ka ttheh tum. Ziang ka ttuan ding ti cu ka thei hrih lo. Asinan, tuah duhmi cu ka nei. In cawmtu ah nupi tla nei sehla ka duh, lo le cawm saktu tla nei sehla cu a tthazet ding na¡¯n.
HT:  Ziangtik kum ah USA nan rak thleng?
THL:   September 11, 1996 ni ah kan rak thleng.
HT:      Ziangti¡¯n USA ah nan lut?
THL: Vanzam kan to fam teh maw. Ke ih feh cawk ding a si ual lo. Ka lo capoh men, Ka u nui¡¯ pasal (Theng Mawi pa) in in tawlrel sakmi a si ruangah famkim lozet in ka rel sual pang ding. Kan hrangih harsatnak pawl famkim lo ih rel ka duh lemlo. A  thiltitheimi pawl le hminthatnak pawl cu amai¡¯ rel dingin ka khek duh sawn.
HT: Ziangtik in USA ralkap na tuan thokih atu ah ziang dinhmun na si?
THL: Ralkap ka luh duhnak hi a reizet zo na¡¯n, sungkhat pawl ih duhsak lemlo ruangah ka lut lohli lo. May 18, 2002 ah Basic Combat Training (mihrek khat cun Boot Camp tin an thei) ah ka feh. Kawl tong ka thiam ruangah le College ka rak kai zo ruangah ¡®Senkhat le hrek in kan lo thokter ding¡¯ in ti na¡¯n ka duh lo. ¡°Ralkap menmen in ka thok duh¡± ka ti ih ¡®sen nei lo¡¯ in ka thok .
Ziangruangahtile thil hi a niambik in ka thok dah ti hi faate ka neih le¡¯n ka sim duh hai. Atu cu, Senthum (Sergeant) ka thleng.
 HT:  USA ralkap tuan dingah ziangvek dinhmun lawng in a luh thei? Zirnaklam, kum le ruangrai pawl ah teh ziangvek cin an la?.
THL: Mi tampi in in sut ttheu. Hihi ahleice in Laimi pawl hin U.S. ralkap luh hi hartuk dingin an ruat a si hmang. U.S. hin Ralkap phun 5 an nei:  U.S. Army, U.S. Air Force, U.S. Navy, U.S. Marines, le U.S. Coast Guard  an si. Hih ralkap pawl hi Regulation le Policy a dangdang cio kan nei thluh. Kei hi U.S. Army ah ka lut ih Army thu ka lo sim pei cu. Ralbawi (Officer) ttuan ding ahcun a malbik BA/Bsc neih ih, U.S. rammi si a tul. Bokhat (Second Lieutenant) ngah ni ah kum 32 hnak in nauta si a tul. Asinan ralkap menmen ttuan ding ahcun, permanent resident card (Green Card) neih a tul. Entrance exam. phih a tul ih cumi cu a ol na¡¯n Mirang tong malte tal thiam lo ahcun a hardeuh men. Kum hi cu, 32 hnak ih nauta a tul ih mipa hi 5 feet (60 inches) saan a tul. Nunau hi a cekci in ka thei fiang lo na¡¯n 4¡¯8″ hrawng a si. Sii (Illegal Drugs) tham kan si le si lo, Physical check-up an ma¡¯n in check thluh. Ralkap tuan tluk luh ol hnatuan cu, U.S. ah a um lo ding ti¡¯n ka ruat.
 
HT: Ralkap nan tuannak ah ziangvek harsatnak nan tong dah? A nuamlam teh ziangvek tluk?
THL: Harnak hnakin a thatnaklam hi rel ding ka thei sawn ding. Mitampi hi training lai har an ti ih an tuar thei lo, suak saal an tamzet. Kei har ka tibikmi cu zingpit nazi 4:30 in kan tho ttheu. Zing ihhmuzet lai ih thawh cu nuam ka ti lo caan a tam ko. Hramlak kan vahnak, thilrit phurh tivek cu Laipa hrang ahcun caw khalh phah ih khuaite bu laak hnakin a har lo. Nisa lak le khawsik lakih kan vah cu a tamzet.
Puai tuah vekih thilnuam cu a si lo na¡¯n, cawn ding thil ttha tampi ka hmu. Ralkap sungah miphun dangdang, ttong dangdang le biaknak dangdang kan um. Asinan, kan zaten U.S. hrangah lungrualzet le duhsak-awzet, run-awzet in hna kan tuan tlang. Harnak le bomnak kan ttul tikah ¡°khai¡¯ Kawlmi, Laimi, khai¡¯ Hispanic, khai¡¯ Christian pa¡± ti¡¯n in taan dah lo. Biaknak dangpa, phunhnam dangpa khal, ttong dang hmangpa khal khi lungrualzet in tuantlang vualvo a si tikah kan Laimi sung ahhin teh, Falam, Hakha, Tidim, Thlantlang le miphun
dangdang pawl hi hivek in hnatuan tlangthei sehla ti¡¯n saduh ka that. Pakhat le pakhat, phun le hnam dangdang hmansehla, ttong dangdang, biaknak dangdang khal sisehla, Laimi ti¡¯n thleidannak um lo le iksiknak um loin lungrualzet in hnatuan sehla, Lairam le Lai miphun pawl hi kan thangsozet ding ti¡¯n ka zum. Zohhnik Iraq ram hi, miphun le miphun, hnamkhat le hnamkhat, Biaknak bang aw, Shia le Sunny pawl an do aw ciamco ih zosaw a tuartu? An mipi pawl in harnak an tuar sawn.
HT: Kan Laimi hrangah USA raalkap tuan ve hi ttha na ti maw?
THL: Tha ka petuk lawlaw. Pupa tongfim an ti theumi:  ¡°A par na duh le, a hling khal poi hlah¡± an ti bangin thil ttha kan duh ahcun harsatnak cu kan tuar  thei a ttul.
 HT: Na hmailam caan ah ziangtivek ih feh vivo na tum, hmailam ah kan miphun hrangih na tumtahmi pawl teh in sim thei pei maw?
THL :Tlawng hi kum 2009 cem hrawngah ka ttheh thei ding a bang. Tlawng ttheh in ziang ka ttuan ding cu ka thei lo na¡¯n tuah duhmi cu ka nei. U.S. State Department (Foreign Affairs) ah counselor, political adviser, foreign officer lam ttuan ka paihzet ih ka ngah thei pei  maw ti¡¯n ka ruat. U.S. ahcun acozah (government) hnatuan cu mipi pawl ih upat cu a si lemlo na¡¯n, khatlam ah hivek hnatuan ka ngah thei a si ahcun tuihhnu kum 5/10 sungah Kawlram lam ah US government ai-awh in hnatuan ka ngah thei.
HT: Kan Lai mino hrangah thucah duh le simduhmi na nei maw?
THL : Lungawi um nasa. Laimi kan hrangih thucah thei ding cun dinhmun le sinak ka nei lo. Asinan, ka ruah daan le thil ka hmuh daan lawng ka vun lo sim pei. Midang le ramdang kan bang theinak ding kan tum a si ahcun, Kan Lai daan hi tampi kan thlengh a ttul ti¡¯n ka hmu. Hitawk ka umnak ram thawn tahtthim ka duh. (ngol hmangzet na si le¡¯n  a hnuailam thu hi siar nawn aw hlah). Cuih daan ka timi pawl cu, kan hnatuan daan, kan thuruah daan, kan Lai daan hrekkhat pawl an si. Laimi hi kan dunglam kum za reipi ihsin tuhmui le hreitlung, namtong hmang in lo kan thlo, lo kan vat. Vun zoh hnik, tuihsun ni tiang khal ah cumi pawl thotho kan hmang lai. Kan tthangso maw tthangso lo ti cu rel ding a um lo. Tuihnu lam kum ziangzat tiang so hitin kan umlai ding?
 Mirang tong thiamnak pakhat ka duh zet mi cu, ¡°Thil na tuahbang lawnglawng na tuah asile, thil phun dangdang ka ngah ding ti¡¯nkan thiltuahmi, kan ruahdaan hi tampi¡¯n kan thlengh a ttul ding. Laimi tampi cu,  harsazet in le kan neih hmuahhmuah thawh thluh in ramdang le ramthangso kan ra thleng ih an daan thatha le an thiltuahmi thatha zir le thiam kan tum lo. Kan Lai um-ih-um kan tum thotho. Um menmen hi thansonak a si lo ti hi an thei lo a si ke¡¯m ka ti. Kan um kelte in zarhkhat ah nazi 40 hnatuan in mitampi cu kan hna a ngam hluihli theu. Hnatuan kan hawl khal len, hnatuan awl deuh kan ti.  Milianzet pawl hi zoh hnik sehla. Zingpit mi thawh hlanah hnatuan an feh, mi hnakin hna an tuan rei. Hnatuan awlte zarhkhat ah nazi 40 ka tuan titla cu rel tlak a si lo.  An ning hman a zak lo mawsi ka ti duh. Curuangah hokhaw Ngol hmangzet (Zathlir tlawn hmang) na si ahcun siar nawn hlah ka lotinak.  Thu dang a um le¡¯n email in maw cakuat in maw in to ciamco thei.
HT: Caan tampi in pek ruangah kan lungawi.
THL: Kei tla tampi ka lungawi. ruat aw hlah.¡±Kannih tla,
  
HRUAITU  HNENIH  CAKUAT
Hruaitu hi tu ahcun Top (1) a si in ka thei…a dang a um hnuaihni na¡¯n, nan suah thabik in ka hmu ih nan News khal soisel ding a um lo nasa.    -Salai Uk Lian (New Delhi)
Ed : Kan lungawi.
Editor,zaangfah te’n a vei? 176 cahmai 18, catlang 20 nakih rawngbawl ti tel loin hna a tuan  tiin a famkim thei lo mawsi? zaangfah te¡¯n SMS leh saal aw..    -017-3905574
Ed : Hruaitu sungih cangan le cahram pawl hi a ngantu bulpak cio ih ruahdaan a si vekin Laica an ngandaan khalah Hruaitu cun thuneih a tum lo. Asinan,  siartu hrangih harsa ding pawl cu remsaal an si.
Editor,
Nan cahram nganmi thuhla ah ka rualpa thawn kan el aw deuh ih thusuh duhmi ka nei. Tahthimnak ah ‘a’ double (daan, caan) na hman lomi thuhla a si. Veikhat siarnak ah siarfuh thei lo can ka nei. Ziangtin?
       -Salai John (Loke Yew)
Ed : Veikhat siar ih fiang lo cu vei 2 nak ahcun a fiang dingih,  na siar tam len na buai nawn lo mai ding a bang.  Si ee, Laica ngan daan hi phunkhat lawng um ding asinan, duh daan phunkhat lawng a si fawn lo ti aw.
Tuanvo neitu pawl,
HT thuthangca nan titha nasa!
  -Upa Za Dun (Alor)
Ed : Kan zuam rerolai, lungawi.
HT tuanvo neitu pawl,Hruaitu thuthangca hi tu ahcun Malaysia ah  No.1 a si. Nan thuthang lak daan khal nan thiamzet in ka thei.   -Reuben Hrang
Ed : Thazaang inpe theutu ruangah tuih ni tiang kan feh rero lai a si. Lungawi.
 
Laica kan Zir pei
                                                                                          – Saya Run
¡°Hruaitu¡± hi zumtu pawl a kilkip: thlarau-thinlung-taksa tthanlen pitlinnak ruahsan in ih suahmi a si. Kan LAICA hi mipi in dikzet ih kan thiam theinak dingah cahram pianzia in maltete¡¯n kan suah vingvo ding.
Laica ah danglamnak ummi pawl hminsinnak
Kan Laica hi Mirang ih tuahsakmi le Mirangca parah hrambunmi a si ko na¡¯n Laica a sinak ah Mirang Cangan daan thawn a bang awk cekci thei lonak maltete a um. Cumi cu Laica ih danglamnak (distinctive) a si ve ti¡¯n ka ruat.
Malte¡¯n vun zoh hnik sehla:
1. a si. 
Mirangca(English)ih ¡°am¡¯ ¡°is¡± ¡°are¡± ¡°was¡± le ¡°were¡± simnakih hmanmi a si.
Curuangah ¡°asi¡± ti¡¯n kom ih ngan ding a dawhzet.
Thuthimnak ah: ¡°He is a boy.¡±  ¡°Amah cu mipa nauhak asi¡± ti¡¯n.
Asinain ¡°I am a teacher.¡± Kei cu saya kasi timi ahcun kom a mawi nawn lo.
Culawng si loin, asi kan kom ahcun ato, ading, amawi, asia,..tivek pawl tla kom ttul ding dinhmun an si. A cang thei lo deuh ding a bang.
Curuangah Laica ih danglamnak pakhat (exeptional case) ah cohlang thei in ¡°Amah cu mipa nauhak a si.¡±¡°Keimah cu saya ka si¡± ti¡¯n kom loin ngan ding
2. _pawl.       Himi hi thil pakhat hnakih tam (plural number) sim duh tikih hmanmi a si. Tlawngta pawl (Students), Cabu pawl, (books), Nunau pawl (ladies).
Mirangca noun ahcun _s bet men a si ih _pawl bet cih ding a si ve ko.
Asinan, pawl cu cafang pali rori kom cu a mawi lo (a dik lo tinak cu si loin).
Siangpahrangpawl, theologianpawl, philosophypawl,…ti ih kom thluh hnakin,
Siangpahrang pawl, theologian pawl, philosophy pawl, tiih ngan tikah a mawi,siar a ol sawn, a sullam khal zianghman a hnaihnok cuang fawn lo.
3. aw le awk.   
An duhaw, an apawk, an toaw, hruaiawknak, tiih kom hnakin  ¡°An duh aw,¡± ¡°an apaw¡±
 ¡°an to aw¡± ¡°hruai awknak¡± ti¡¯n kom loin ngan sehla a ttha sawn in ka hmu. Siar sual le theih sual ding khal a um lo ih a fiang sawn.
4. a tthazet. 
Mirangca (very good) zoh ahcun kom lo ding a awm-angzet ko nain kan Lai tong hmun tampi ahcun kom ding a mawizet in ka thei. Thuthimnak ah ¡°Cakzet le raalthazet in um aw¡± (Joshua 1:9) timi hi a remzet(consistency).
¡°Cak zet le raaltha zetin¡± tiih ngan hnakin a dik sawn in ka hmu.
5. a mawituk.
Mirangca (very beautiful) timi ah kom lo ding a awm-angzet ko nain a mawituk ti¡¯n kom sehla a mawi sawn
 
6. a tumbik ding a bang!
Mirangca (biggest) a si ih a tum bik tiih then hnakin kom ih ngan hi a dik sawn ding a bang. ( a fatebik=smallest, a kaubik=largest,…)
7. atu ah,  lai ah,  hmai ah,  hnu ah,  hnuai ah,…….
a) atu ah:   Mirang in ¡°Now¡± a si ih ¡°atuah¡± ti kom mawizet a si.
    Asinan ¡°atuah¡± ti cun sullam dang a nei zik thlang.
b) lai ah: Mirang ih ¡°during¡± sim duhmi a siih ¡°laiah¡± tiih ngan ding a si.
    Asina¡¯n awphei pathum ¡°aia¡± tong aw ciamco hi tripthong le si fawn lo ah!
c) hmai ah: Mirang in ¡°before¡± a sihih ¡°hmaiah¡± ti¡¯n kom ding a si.
    Asina¡¯n ¡°aia¡± a si ruangah siar a hardeuh ih ¡°hmai ah¡± ti¡¯n a remcang sawn.
d) hnu ah: Mirang ih ¡°after¡± simduhmi a si ih ¡°hnuah¡± ti ih kom ding a si ko.
    Asinan ¡°hnuah¡± cu siar sual a olte, ¡°hnu ah¡± tiih ngan ahhin a `hasawn ding.
e) hnuai ah: Mirang ih¡±under¡± tinak a si ih ¡°hnuaiah¡± ti¡¯n kom ding a si ko.
    Asinan ¡°hnuaiah¡± cu vowel pa 4 ¡°uaia¡± rori kom cu a buaithlak deuh.        Curuangah ¡°hnuai ah¡± tiih then ih ngan ding a tha sawn.
Hminsin:
parah (on), tlunah (over), tangah (under), dungah (after), hnenah (unto), dingah (for), hrangah (for), le ruangah (because),…tivek pawl cu siar sual ding le theih sual ding a um lo ruangah kom ih ngan ding hrimhrim an si.
awk¡± ¡°an to aw¡± ¡°hruai awknak¡± ti¡¯n kom loin ngan sehla a ttha sawn in ka hmu. Siar sual le theih sual ding khal a um lo ih a fiang sawn.
 
Hillsong Music Australia(HMA)
                           -Salai Kawl Lian
Ka ngainin thei dah lomi, Pathian khalin a ram karhzai thei vivonak dingih hmanraw thazetih a hmanmi, mino tamzet pumpekawknak, Khristian music band pakhat HMA thuhla asiartu nanzate parah Pathian in anmah vekih thinlung takte le thawzet tei Amah thangthat thei vetu nansi theinak dingin ruahsannak tamzet ka nei asi.
Award & Recognition-AustraliaHillsong United  neta bik  Album ¡®The I Heart Revolution¡¯ cun a hmaisabik hrangah the Australian Album chart ah No.3 nak a thlengih Albums Chart ah No. 8 nak a thleng ban. Tui neta bikah , The Australian Record Industry Assonciation(ARIA) cun anmai ram, Australia ih Gold status timi ah Hillsong Australia  tuahmi  CD 17 le DVD 7 cu  zumngam thlepthlepmi ah acohlang. ¡®Praise& worship album pakhat, ¡®Peolple Just Like Us¡¯ timi in ARIA Platinum status ih a tahfungah hmunhma a lak ve ta riai asi cuh!
Hillsong United album ¡®Look To You¡¯ khalin ARIA Gold status a hun tawng ban ve thotho.Hillsong Kids DVD ¡®Jusus Is My Superhero¡¯ timi khalin ARIA Gold status ahung thleng ban ve. Hillsong United ih  neta bikih suahmi ¡®All of The Above¡¯ album cun kum 2007 ah ARIA charts ih No.6 nak ahun hit(Mirang tawng). Cuihlei ah iTunes  timi internet ih download tuah tambik sinak No. 2 nak khal a coban lala. July 2005 ah ¡®God He Reigns¡¯ album cun a hmaisabik nakah tin ARIA charts ah No. 2 nak ahun luah. Cun, DVD suahmi tu sawn khalin ARIA Top 20 DVS charts ah No.1 ah ahun vawrh thiamthiam.July 2004 ah ¡®For All You¡¯ve Done¡¯ album cun ARIA charts No .1 ah a thlengih Top  100 lakah zarh 11 rori hmun a luah thei. DVD suahmi khalin  the ARIA Top 40 DVD charts ah No.4 tiang a thleng ban.July 2003 ah ¡®Hope¡¯ album in ARIA Album charts ah No.3 nak ahun co. DVD suah mi sawn thung cun ARIA Top 40 DVD timi ah No. 1 nak ahung thlengban vuahvo thei.July 2002 ah ¡®Blessed¡¯ album in ARIA Top 100 Album charts ah no.4 nak aluah.  DVD suah mi sawnin ARIA Top 40 DVD charts ah No.2 nak tiang ahung thleng.September 2002 ih suahmi ¡°Blessed¡± album cun USA ah Khristian albumih zuarkhawng bik No.2 nak tiang a hun vawrhban lala.
Awards& Recognition- International
Hillsong Music Australia cun leitlun pumpuluk ih an album zuar suah tamnak lamah a hlawhtling zet. ¡¯30 gold le platinum sales awards¡¯  timi laksawng a dawng. Mi a thawng tampi ih duhzetmi le zumzetmi an hung si vivo.
The Hillsong United album, ¡®All of The Above¡¯ US Billboard charts ah hmun thum lai ah No.1 nak a luah vuahvo men! Cumi pawl tla cu ; Contemporary Christian Album chart, top Praise and Worship Album and the Digital Christian/Gospel Album chart  tla a si.Culawng asilo,  Billboard¡¯s Top 200 Chart ah khal no.60 nak a hun luah ban. Canadian Christian Retail Chart lamah khal No.1 ava luahban vivo asi cu! A ropi nasa! 2007 ah Nashville, USA  ih um the Gospel Music Award cun United (HMA hnuai ih mino music band pakhat) hnenah Khristian hlasak thiam pawl hrangih a pek theumi laksawng ¡®International Impact Dove Award¡¯ cu a hlan a si.
¡®Blessed¡¯ album khalin Nashville, USA ih the Gospel Music Awards cun Dove Award timi laklsawng ngah theive dingin¡¯ kumkhat sungih Praise&Worship Album thabik¡¯ hrilsuah dingmi (nomination) ah a tel. ¡®Blessed¡¯album hi USA ram ah September 2002 ah zuarsuah a si ih  an ram ih Khristian album zuar khawng tambik No.2 nak asi.
¡®You Are my World¡¯ album khalin Nashville, USA ih the Gospel Music Awards cun 2002 Dove Award hrangah ¡®kumkhat sungih Praise&Worship Album thabik¡¯ hrilsuah ding lakah atel.¡®By Your Side¡¯ album khalin  Nashville, USA ih the Gospel Music Awards pekmi  2001 Dove Award  dawng ve ban dingah ¡®kumkhat sungih Praise&Worship Album thabik¡¯ hril dingah a tel.
Hillsong Australia ih an hotu nu bik Darlene Zschech ih hla nganmi ¡®Shout to the Lord¡¯ cun Nashville, USA ih the Gospel Music Awards ih pekmi 1998 Dove Award  lawmman dawng theive dingin ¡® kumkhat sungih hla larbik¡¯ hril ding lakah atel.Hillsong Australia ih an hotu nu bik Darlene Zschech ih hla nganmi thotho, ¡®My Hope¡¯ khalin 2004 kumah Nashville, USA ih the Gospel Music Awards tuahmi  2004 Dove Award dawng ve thei dingin ¡®kumkhat sungih thinlung lam ciahneh theitubik Hla ¡®hrilsuah ding lakah telh asi.
Tuih zarh hrang thufim
Tong sup-awk theinak hi sui vekin a sunglawi, asinan, a awn reromi leeng ke cun sitii thuh a hlawh sawn.  
-English proverb
Thinheng cingih simmi tongkam cu a cakbikmi rang    khal in a dawi kir baan nawn lo.  – Chinese proverb
Phunsang tlawng kai dah lo hrang ahcun mifim tongkam ngannak cabu siar hi thil thabik a si.         – Sir Winston Churchill
 
 
A suahtu         LCF, Malaysia
Editor                      Biak Chawn
Joint Editor            Salai Kawl Lian
     
Advisors                Rev. Run CungMang
                               Pa Tha Nei Thuam
   
Contact 
                               Hruaitu
                              42 A, Upper Ground
                              Wisma City Tower,
                              Jalan Alor, 50200
                              Kuala Lumpur
(Visited 82 times, 1 visits today)

Comments

comments

Comments

%d bloggers like this: