Hruaitu Issue 179

Hruaitu
 Zarhtin Thuthang
Vei – 179
April 13, 2008 
 
 
 
ZOHFELTUI’  AWKAM
 
 
               Leitlun ramkip ah ram uktu ding hrilnak thawmvang a tam. Tuikum sungah hrilawknak ruang ih buainak le naing-ngan-zi harsatnak theihding a tam. Siangpahrang uknak nei sau bik ( siangpahrang in full power a neihnak ) ram Bhutan khalin prime minister ding an nei thawk. Nepal ramah kum 250 rak uktu Shah dynasty siangpahrang neta bik cun rampi uktu ding mipi a hrilter thawk.         
            USA lamah president candidate ding in Hillary le Obama thuhla khal a cem thei lo, Malaysia ram hrilawknak a cem ciah ih ramdang mi in duhlotu pawl thu annei deuhdeuh. UN secretary general parah kan beiseinak khal manglam vek ah a cang S.Korea le Taiwan cun president thar ding an hril zo.A buaibik Pakistan khal in mipi hril cozah an nei. Kawlram cun 2010 ah hrilawknak tuah an tum. Cumi hrangah referendum an tuah cu May thla-ah phuan an tum nan a thupte ih rak theicia-tu an um.
                   Kanni’ dinhmun cu a tep deuhdeuh a bang ko nan, dunglam kirsal cu kan duh lo. Asinan, Kan miphun covo dingah Bawipa lawng a tang, zindang kan hawl lai maw? Bawipa hi no.2 ih ret men ding a si nawn lo.
 
 
                  
 
 
 
Lai rawn val in thu i ruah’
 
            2006 Dec20 ah malaysia ka thleng ve,
            Laimi fala ka tong ih ka bia hai,
            Apahal i ti ka lung a let.
  
            Adang fala Ph:in kabe sal lala,                                 
            Laimi na silo maw?
            na tong a va paive i ti
            ka lung a hlo.
 
            SMS in midang ca ka kuat sal lala,
            let dan aphun2 si ko ka mang a bang.
 
 
            Lai tong le lai ca ih kuat na hringhran
            Hnamdang tongdang ih leh cu-
            San kan man tinak maw
            kan pilhlo tinak sawn saw?
            Ka thei thiamlo kei lungmawl khawte fa in.
 
                                                                        -by Lairawn Val
 
 
Sermon
 
 A Nungmi Raithawinak
 
– Rev. Run Cung Mang
 
Cuti a si ruangah ka u le ka nau tla, a tamzetmi Pathian ih in zaangfahnak ruang ahhin nan ruangpumpi cu a thiangmi le cohlan tlak raithawinak bangtuk in Pathian hnenah pe uh tiah ka lo dil. Cumi cu Pathian hnenih nan peek dingmi biaknak taktak cu a si.”  – Rom 12:1
 
 
Thuhmaihruai
 
Laimi kan nunphung hi vun zirzoi tikah Pathian nung kan theih hlanpi ihsin khawsia khuavang hnenah “raithawi” timi rak neitu miphun kan si. Curuangah Khrihfa kan sihnu khalah Bible sungih raithawinak thu kan hmuh tikah theih a har lo, olte’n kan cosaang thei mai. Pathian nung theitu le biatu kan sihnu ah Pathian hnenah “a nung ih apmi raithawinak” vekih ap awk ding timi hi a thupizet.
 
 
 
1.Adam le Evihrangih  Raithawinak nung
 
 A hmaisabik raithawinak nung hramthoktu cu Pathian a si. Minung hmaisabik Adam le Evi thungai lonak ruangah ei lo dingih khammi thingrah an ei ruangah vanlam ah an thlarau mit a caw ih lei tisalam ah an mit a vaang tikah an taklawng fangkheh ih an umlam an thei aw. An ningzak in Pathian tong ngam loin an relh ih theipi hnah in an zahmawh an hup ti Bible in in sim.
 
Milai ih tuahsernak- theipi hnah hnipuan cun rei a daih lo ruangah Pathian in rannung pakhat a that ih savun hnipuan thawn an ningzahnak a hup sak ti kan hmu. Himi hin misual nang le kei ih rundamnak ngahnak dingah mawh nei lo Pathian tuufano Jesuh thihnak ding thu in hmuhsak. Pathian in zaangfahnak thawn sathii luangih raithawinak nung a neihmi ruangah Adam le Evi cu Pathian hmai ah an lang ngam saal ih pawlkomnak an nei  thei saal.
 
Anmahte an tuahmi, a nung lomi raithawinak, sathii luang lomi, theipi hnah ih raithawinak cu Pathian in a saang lo ih Amah Pathian in ramsa thiisen luangin savun hnipuan a tuah sak. Cubangin, kannih leitlun misual pawl tla Pathian thawn pawlkom aw thei dingah kanmah ih dingfelnak, tuahtthatmi le zuamnak in a ngah lo, cumi cu a nungmi raithawinak a si lo. Cuhnak in, Pathian in kan hrangah mawh nei lo, sual thei lo Tuufano Jesuh thiisen thawn in tlennak kan zumnak thawng lawngin rundammi Pathian fahniang kan si thei. 
 
 
 
2. Abel ih Raithawinak nung
A pahnihnak raithawinak nung a thawitu cu Abel a si. Pathian thu in, “Abel in Pathian a zum ruangah Pathian hnenih a peekmi raithawinak cu Kain ih raithawinak hnakin a tthadeuh. A zumnak ruangah Pathian lunghmuinak a co ih miding ah cosaan a si. Ziangahtile a laksawng cu Pathian in a co sak. Abel cu a thi zo nain a zumnak sungin mi hnenah thu a simlai rero,” ti’n in sim. Kain cun thiisen tel loin a lo sungsuak thlairah thawn lawng raithawinak a nei. Cutikah Pathian in a cosaan sak lo.
 
Curuangah thiisen tel lomi Kain ih raithawinak cu a nungmi raithawinak a si lo. Sikhalsehla, Abel cu a tuu faate suak hmaisabik pawl a that ih a sa tthatnakbik Bawipa a peek. Abel tlun le a peekmi parah Bawipa cu a lung a kimzet (Seem. 4:4). Himi khal hi milai pawl ih kan nunnak taktak, kan thinlung sung taktak in zumfeknak thawn Pathian hnenah raithawinak peek loin, a pawnleeng men lawngin Pathian kan biak le kan thangtthat tikah Pathian in kan raithawinak in cosaang lo. Sihmansehla, kan tuahtthatnak si loin, kan thinlung sung muril in Jesuh Khrih ih thiisen hnattuannak kan zum lawngah rundamnak kan co thei timi langternak pheenthlam a si. Kain ih raithawinak cu milai titthatnak rinsannak thawn a bang aw ih Abel ih raithawinak cu zumnak taktak thawn thinlungtak ih Pathian hnen kan peeknak hi a si.
 
 
 
 
3. Solomon ih Raithawinak nung
Leitlun ih milianbik Solomon siangpahrang ih lennak thuthup hi zumnak taktak thawn a thinlung tak ih Bawipa hnenih raithawinak nung a peeknak ruangah a si. 2 San. 1:6-7 sungah, “Puanthlaam hmai ih ummi daar biakttheng parah raithawinak pe in Solomon in Bawipa a biak; rannung 1000 a that ih biakttheng par ahcun mei-ur thawinak ah a peek. Cuih zaan ah Pathian cu Solomon hnenah a langih, “Ziangso ka lo peek ding, na duhmi i diil aw,” tiah a ti.
 
Himi in Solomon ih a nungmi raithawinak a peek ruangah Pathian in a duhmi lennak, fimnak le hminthannak thluasuahnak a peek ti kan hmu. Solomon in Pathian ih thluasuah don le co a duh tikah a kaa lawngin Bawipa a biak lo, a hmur lawngin a thangtthat lo ih a lei lawng khal in lungawithu a sim lo. Rinnak thlaici tuh in a zumnak cu a tuahnak, rannung thawngkhat rori peeknak in a langter. Pathian lung a tong ih a duhmi, a dil lomi tiangin Bawipa in a peek ti kan hmu thei.
            Curuangah Pathian hnenah thla ka cam na’n aphi ka ngah lo. Ka ttuan rero ko nain thluasuah ka ngah lo ti’n caan tampi zumtu pawl kan vuihram ttheu. Kan Pathian biak daan hi kan cekfel awk saal a ttul ding. Pathian hnen ihsin thluasuah vanluhnak hmuah duh si in, thinlung takin Pathian zumhnget lo, tthenhra tthenkhat hman pe siang lo, tikcu caan pe in thlacam le paih fawn lo, kan si ahcun ziangtinso a nungmi raithawinak cu kan nei kan ti ngam ding. Solomon cun thinlungtak ih siannak thawn Pathian hnenih a peek ruangah a raithawinak cu a nung, Bawipa in a cosaan sak ih thluasuahnak a let sawmza in a peek a si. Nang le kei khal Khrih le A Kawhhran hrangah siangzet in nung uhsila, kan neihmi tla a hnenah lungawi aipuang te’n siangzet in a nungmi raithawinak thawi thlang uhsi!
 
 
 
 
Thunetnak
            Kawlram ih zuk le mei- ur khangh thawinak zuk an retkop. A sim duhmi cu: ‘Ka nun asile Khrih hrang hnatuan ding, ka thih asile Khrih hrang raithawinak ah” tican a si. Paul in Filipi khua ih zumtu pawl a sawm tikah amai’ nunnak rori ih nunpimi a si ih a aupimi pakhat cu: “Nun timi cu ziangso a si? Kei ka hrangah nun cu Khrih a si” (Phi.1:21) a ti. Thukam Hlun sanlai ih ramsa ih raithawinak si nawl loin, Thlarau Thianghlim san ahcun zumhngetnak taktak thawn pumpeek nun nei in neih le siah thawn siangzet in raithawitu si a ttul.
 
Duhdawt mi zumtu, nang teh ziangti’n na ruat? Na nunnak hi Khrih in a man peek ih leimi a silam na thei fiang zo maw (I Kor 6:19-20). Leitlun caan tawite na nun sungah Khrih hrang nung dingah thutthen catnak na nei zo maw? Nun mannei le mi lungawi,
mi thluasuak na si theinak dingah, Pathian ih khihhmuhmi thiisen telmi raithawinak thlun in, Abel bangin a nungmi raithawinak peek tum aw. Lei thluasuah, van thluasuah cotu si dingin Solomon bangin siangzet in peeknak thawn a nungmi raithawinak thawitu si dingin zuam uhsi!Pathian in thluasuah in peek sak hram seh!
 
 
 
    LEILTUN  THUTHANG
 
 
 
Pakistan Nuclear Scientist a phuang aw :
 
 
 
Kum 2004 ah television ih nuclear tawlrel duhdan thuthup a sim ruang ih an kaih mi Pakistan nuclear scientist Abdul Qadeer Khan cun kan dung zarhpi ni-ah a tumtah mi a phuang aw sal. Khan cun,  “Kan ram aiawh in inmawhsiatnak hmuahhmuah ka phur ringring, asinan, nuclear ka tawlrel ruangah kan ram ka rundam” a ti. Pakistan ram ihsin North Korea, Iran le Lybia ramah nuclear thilri a thupte-ih phurh thuthla-ah Khan hi kaih a rak si. President Parvez Musharraf cun a ngaidam, house arrest ( tulai ih sukyi an kaihdan ) in tutiang an kai. Musharraf cun ramdang pawl in scientist thusuh tumnak pawl cu a siang lo.
 
 
 
Sam mehnak man khung ruangah :
 
 
Tuluk ram sam mehnak dawr pakhat cun sangka ah ‘na duhduh dan in Yuan 38’ tiah an ngan ih, college tlawngta pahnih Zhang Yi le Yuan Sha Sha cun an sam an meh hnu-ah Yuan 12,000 ( RM 5,500 ) an dil. Tuluk thuneitu pawl cun hi dawr hi an phit ter ih, customer hnen ih an duhduh zat tangka an dil ruangah Yuan 500,000 ( RM 228,000 ) an kuan ter bet.
 
 
 
 
Sri Lanka buainak :
 
 
 Kan dung tlawngkai nikhat ah Sri Lanka khawpi-ah tapung LTTE ( Liveration Tigers of Tamil Eelam ) pawl cun bomb an phuah ih, hihgway minister Jeyaraj Fernandopulle le milai dang 13 an thi, a dang 100 cun hliam an tuar. Minister hin marathon ( tlanzuam nak ) opening ceremony a thawk lai fang a si. Cozah ralkap cun LTTE umnak tikulh an bomb an thla sal ih 22 an thi. Tuilum sungah LTTE ralkap 2,653 le cozah ralkap 155 an thi zo. LTTE pawl in milai an thahzat cu 4000 hrawng an si zo. Sri Lanka ram hi Tamil state si ding in kum tampi an do zo. LTTE cun US ram New York, New Jersey, Maryland le Canada, Britain, Australia  le              France ah sumpai le ralthuam hawlin an vak tiah thuthang a um ih, himi tawlrel nak lam ih an director Karunakaran Kandasamy cun LTTE hruaitu le US aiawh pawl tawngawknak hi lamhruaitu vekin a rak cangvaih ruangah FBI pawl in an kai.
 
 
 
 
Olympic cancel lo ding :
 
 
International Olympic Committe cun kan dung tlawngkai nithum ah meeting an tuah ih Tuluk ram buainak ruangah olympic cu boycott ( cancel ) ding a si lo tiah an relcat. Tuilai ah hin Britain, France le dam dangdangah olympic puai hrang ah olympic meisa lamzin ih fehpi-nak an tuah ih, Tibet le anmah tantu pawl sandah-piah nak a um vivo. Tuluk ram cun Tibet buainak thuhla ah ramdang ( USA ) tel lo ding in thu a than.
 
 
 
 
Korea nunau cosmonaut hmaisa bik :
 
 
Kan dung tlawngkai nihnih ah South Korea fala cosmonaut hmaisa bik ding Yi So-Yeon cun an khual tlawn thawknak ding hmun Kazakhstan ram Baikonur space station ah “korea rawlhmeh ‘Kimchi’ tla ka keng” tiah a sim. Vansang ih a khualtlawn nak cu North le South Korea ram 2 pehawsal theinak ding ih hnatuan pawimawh siding in a duh zet. Baikonur satation hi Soviet Union sanlai ih tuah a siih, 1991 ah Kazakhstan cu Soviet ihsin a suah hnu-ah hi hmun hi an hmang vivo. S.Korea hin Yi ih khualtlawnnak hrangah US $ 27,000,000 a cem. Russia tuah Soyut  ATM-ih zam dingin Korea mi 36,000 lai in an rak dil. Tu hi ni 12 sung zam ding an si.
           
 
 
 
France ramah sandah-piah :
 
 
 President Sarkozy ih policy thar vekin France cozah cun an ram sung ih taza-vuan lo ih um pawl kum 1 ah milai 25,000 kuat kirsal nak ding le cumi thawn pehpar-aw in kan dung zarhpi ni-ih ramdang mi, palik kaih tih ruangih tiva dawp ih thi thuhla ruangah France mipi thawng tampi cun Paris khawpi sungah sandah an piah. Mali ram mi (kum 29) cu tlangleng station-ah palik in an rak check ih, kaih an tum lai-ah Marne tiva ah a dawp ih a thi. France mipi cun ‘thihnak hnak in kaih-aw loh lawlaw a tha deuh’ tiah an president policy cu an relsia ( criticise ).
 
 
 
 
 
 
Hmel pahnih nei naute :
 
 
Tulai India ram ih thilmak bik cu naute hmel pahnih nei a si. Lali hi thla 1 lawng a si lai ih, India mipi tampi cun Hindu pathian minung vek ih a suahsalnak ( reincarnation of goddess ) tiah hmun kip ihsin cibai buk ding in an pal. Hi nunau hin hnar (nose) 2, mit (eyes) 4, lei (tongue) 2, ka (mouth) 2 le hna (ears) 2 a nei. A ka pahnih in pawhte ti pek thei a si ih, a mit 4 cu veikhatah an an thep rual thluh. Kan dungah naute ban paruk nei (six arms ) cu sibawih pawlin an rak tansak zo nan, Lali hi ziangtin an tuahding tiah an khawruah a harzet.
 
 
 
 
Thailand ah kawlram mi 54 an thi :
 
            Kan dung tlawngkai ni li-ah  Kawlram ihsin taza-vuan lo ih Thailand ram sung lut kawlram mi 101 phurtu mawtaw tum ( vur retnak ) cu Ranong ( kawhtawng ral lehlam Thailand khua ) ah tipi kap 6 km hrawng hlatnak lamzin kapah a ding ih,mawtaw mawngtu in sangka avawn ong veten amilai phurh pawl tampi an thih ruangah amah cu a tlan hlo cih.Thawthawt har tuk ruangah 54 an thi ih,37 cu nunau an si. Adang 47 cu an kai cih.Mawtaw sung vur cet ( refrigrator ) cu a that loh ruangah boruak um lo-in a sung ih um pawl cun vei tampi  mawtaw phar cu an beng rero nan,driver cun a theilo siding tiah palik pawlin an sim.Driver hi an hawl lai,mawtaw neitu sea food dawr cu thusut dingin an kai.
 
 
 
 
Mona Lisa Hi zo so a si?
 
 Kan dungah Davinci code a lar zet. Kan Bawipa relsiatnak le rundamnak thuthangtha pawl cu milai pakhat ih politics thuhla vekin an ruat. Leiltun milai tampi in an siar, cabu tampi an khawng. Mona Lisa cu Bawipai’ nupi deuh vekin ngan a si. Mary Magdalene le Mona Lisa cu pakhat an si.. tiah an puh. Davinci ih history le a zuk  hmingthang bik pahnih ‘Bawipai’ zanriah sacrament neta bik zuk le nunau hmeltha Mona Lisa zuk cun tumtahmi pakhat nei vekin an ruat.
                        Leonardo Da Vinci hi kum 1452 ah Italia ram ah a suak ih, science skepting le methematic lam tuan in, science thawn pehpar thei mi zuknung tampi khal a ngan. Kum 1500 ah Florentine ( cui sanlai ahcun Germany ram a si ) ah a kir sal ih 1519 ah Cloux ah a thi. A thih hlan ih zuk a ngan tak pawl cu ‘milai vate vek ih zam thei dan’ pawl an si.
                        Tulai san German mithiam pawl cun kum 1503 October thla ih cabu pakhat ah ‘Lisa del Giocondo’ ( Giocondo ih nupi Lisa’ tinak ) cu leitlunah model hmingthang zet a rak si tiah an hmusuak. Heidelberg University ih library cun, “Florentine ih sumdawng hmingthang Giocondo ih nupi Lisa Gherardini cu ‘Mona Lisa’ a si tiah an pawm. Zuk hminsin nak cangantu cu Florentine khawpi ih zung hnatuan Agostino Vespucci a si hi, zuk khawmtu Cicero ih rualpi tha a rak si.
                        Curuangah tulai san ih Paris khawpi ih zuk tumpi an tar mi, ‘Mona Lisa’ cu Bawi Jesuh sanlai ah a um lo ti a fiang. France pawl cun ‘La Gioconda’ tin an ko. Cucu Italian tong in ‘A lungawi mi nupi nu’ tinak a si.
 
 
     
 
 
THEIHKAUH NAK  LE  RUAH DING  TAM
                        ( Compiled by  BiakChawn )
1.         Leitlun vate zam sang bik cu kum 1967 December 9 ah vanzam mawngtu (pilot) in rampei hngawngsau ( whooper swans ) 30 hrawng boruak 8,200 meters ah a hmuh cu a si,cui vate pawl cu Iceland ihsin Ireland lam ih thawn an si. Nazi pakhat sungah thli cahnak thawn 200 kilometers an zam ih, 1300 kilometers ih hlatnak cu nazi 7 sungah an thleng. Antarctic tipi ih vate phunkhat ‘breeds’ cu kum 1 sungah an umnak thawn in 40,000 – 50,000 km hrawng an zam rero theu, an zam hla bik. Europe vur-ram ih ‘White storks breeds’ pawl khal thlatang ah South Africa ram tiang an thawn, 24,000 km hrawng an zam, Israel ram an pal theu. ( Jeremia 8:7 )
 
 
 
 
2.         Shark ( kawl tong in- nga maan ) tum bik ‘whale shark’ cu 18 meters tiang a sau, milai hrangah a tihnung lo. Shark ha ( tooth ) hi thla 1 ah vei 1 a thleng aw ringring. Kum 12 – 15 ah an pitling ih, kum 60 tiang an dam thei. Shark thla ( fins ) pakhat ihsin rawlhmeh puaikhat US $ 400 man tiang an tuah thei.Shark that tambik ram  Maxico cun kum 1 ah 30,000 tons ( 3,000,000 kg ) hrawng an zuar.
 
 
 
 
3.         Kum 2006-07 sung UN General Assembly report ahcun leiltun ah kum 18 hnuai nunau 150,000,000 le mipa 73,000,000 cu nunau mipatnak lam ih forhfial hrim le sualpi an si. Hivek buainak tuahtu le thilsual titu an puhmawh zat cu leitlun nunau hmuahhmuah 36% le mipa hmuahhmuah 29% an si.
 
 
 
4.         Russia ram ih zumtu hrekkhat ‘Doomsday’ ( Thuthennak hngaktu ), member 30-50 hrawng cun tulai super market ih thilri hminsin nak computer code number le credit card number pawl cu setan thawn pehpar mi an si tiah khawpi suahsan in khawleng lam tlangpar ah an umkhawm. An zum dan cun Bawipa hi tuikum 2008 April a silo len May thla sungah a ra ding tiah an zum!.
 
 
 
5.         Rua ( bamboo ) thawn an tuah mi hmuahhmuah ih nem bik ( softest ) cu tulai Thalgo cosmetic company tuah ‘towel’ a si. Cotton hnakin a leh 4 in tidai a hip chak ih, a let 1-in a ro cak sawn. Hi towel tuah dan ah hin, pangang thahnak sii ‘pesticide’ a tel lo. RM 130 man hrawng a si ih, 2008 April thla ihsin zuar thawk a si.
 
 
 
6.         Kum 2006 March thla ih Malaysia ram sung tiva ( tidai ) thianghlim dan level tahtu pawl cun a tlangpi in tiva le tipi kap ih tidai sungah minung siatsuah thei ‘Amonia’ 9.2 mg/p/l ( miligrams per liter ) a um tiah an hmusuak. Amonia hi tiva kipah an um ko nan, 1.5 mg.p.l um-nak tiang cu a pawi tuk lo. Khawpi sung pipe tidai ah ‘chlorine’ a tam tuk ih nupi nu nausiat ( miscarriage ) an tam phah tiah 2007 April ah Health Ministry  cun report a pe.
 
 
7.         Australia ram Newcastle port cu leiltun ah lung-meihawl ( coal ) phursuah tam nak bik lawng-cawlhnak ( harbour ) a si ih, a tlangpi in kum 1 ah coal 85,500,000 tonnes cu ramdang hrangah an phursuak theu. 2008 April thla 6 tiang 22,260,000 tonnes an phur thei ruangah tuikum sungah cun 95,000,000 phur thei an zum.
8.         Spain ram ah milai kha-ruh ( jawbone ) an hmuhsuah mi cu mithiam pawl cun kum 13,000,000 lai a si an zum ruangah Euroup ram ih rak um miphun upa bik ruh sithei ding tiah zumnak an nei. Ahleice-in leiltun miphun hmuahhmuah ah Euroup cu an tuan deuh tiah ruahnak khal a um.
 
 
 
BUAIPI  TLAK  THINHENG NAK
 
Thinheng dah lo milai an um lo. India ram ih ‘Hmar’ miphun pawl cu an thinheng lawng a si lo, “ka thin, ka lung, ka pum, ka ril le ka kawsung hmuahhmuah a heng thluh” an ti theu.  ‘Nunau pakhat a tlangval parah thinhengin a naupai lai cu lamzin kapah a tan, tlawngta pakhat thinheng ruangah a rualpi le tlawng sayama pawl a that, hnatuan nak in an dawisuak ruangah thinheng in a hnatuanpi pawl a that ciamco’ ti thuhla pawl theih ding a tam.
                       
 
Veikhat nasa zetih kan thinheng caan ah ka taksa-in cahnak 500 kcal a sunglak. Kan pumpi cun hlumnak (heat) a suah ciamco ih kan thluak bawmpi cun theihnak (conscience) 10%-30% tiang a ihthahsan. 2007 France president candidate pahnih Nicolas Sarkozy le Segolene Royale cu an debate ih, Sarkozy cun Royale hnenah.“Hitin na thinheng ahcun president tha na si theilo” a ti. Royale cun,“Felfai zet ih thinheng dan a um” tin a sal. Britain Mental Health Foundation
 
cun,‘thinhengnak san bik cu taksa a bangtuk ruangah le khawsaknak vengsung nun a siatbal ruangah’tiah an zum.
                       
 
Greek mifim Aristotle cun, “Milai pakhat sanah thinhengnak ding caan tha a um, thinhengnak tel lo-in ral neh thei a si lo” a ti. Rome sanlai ‘Stoic philosopher’ Lucius Annaeus Seneca cun, “Thinhengnak cu kan ral a si, sualnak dang hnakin thihpi thei bik a si, buainak hi thil pakhat parih thinhengnak ruangah a thleng” a ti ve. Plato cun’ “Thinhengnak cu a tulsam mi thei ding in a lamzin khihhmuh ding,midang puhmawhnak cun buainak a tuah” a ti. American writer Mark Twain cun hitin a khaikhawm: ‘Milai thinhengnak san cu amai sinak le nundan tifiangtu a si’
                       
 
 
Kan Bawipa khal biakinn sung ih tangka thleng ih sumdawng pawl parah nasa zetin a thinheng dah.Kanmai hrang lawng thatnak ding ih thinheng ih buainak hnakin thiltha tuahnak ding ah thinheng ruang ih pumpeknak cu a felfai sawn lo pei maw?
 
 
 
MALAYSIA AH LEHLANG MEN …?
(Laimi nuntu khawsak thlir nak)                                                                                                     
                                                                       
-Salai Durbun     
 
 
 
Malaysia ih Laimi tam zet pawlih tawngkam ka theih theu mi cu “Hitawk hmun cu lehlan nak hmun men asiih thil zianghman tla hi thungai thlakih tuah ngaingai nak ding hmun asilo”timi tawngkam asi.  Nangkhalin narak thei ve dah zo ko ding tiah ka zum.Keicun khitivek tawngkam khi ka lungkim zawng asilo.  Ziangah tile mi pitling le zumtu pakhatih tawng ding mawi  khal asilo. Asile, hitin kalo sut hnik ding .. Malaysia ih kan um lawng hi maw  alangte kan timi cu ? Bible cun hi leitlunah hin mikhual kansiih a langte menih um kan si tiah in sim.
 
Mak ka ti zet mi pakaht a um lai. Pa pakhat Malaysia ih kum rei nawn rak um ve dah pa in”Hitawk hmunah cun Pathian/ Kawhhran lam khal hi a thupi bik lo. Cun, rawngbawl thei ciamco nak ding hmun khal asi lo. Khat le khat remaw dialdo te ih kan um khawm thei ding hi a thupi bik ko ” tiah ati. Hi bang vekih a tawngtu khal kan umaw culci lai asi hrih hi maw.Ziang titha! Zumtu pakaht cun hi leitlunah mikhual pakhat fang men lawng asi ti a theihawk a tul. Asinan, cumi mikhual dinhmunih ding tahratin a langte vekih a um rero lai canah amai duh vekvekin a nung thei lo timi a fiang a tul. Sim duh mi cu a biakmi Pathian nungih tawngkam le zirhdan vekih a nun atul  asi. 1. A um nak le a thlen nak hmun kipah tleu nak a langter theitu asi a tul. A nuncan ziaza kha thiangfai tei a hmanthat a tul fawn. Nupi nei zo fala va ngai zawn tivek le inn lamih nupi fanau hngilh men, sungte unau farah zawnzai pawl ziangih siarnawn lemlo pawl a khih hmuh tel. Taima tei hnatuan hruthro ding asiih ziangkimah rin um te ih umin mi bum kual rero  mi asi lo pei.
 
Thlarau thazang a neih hnu ah cun Pathian thuthangtha a phuang thei ding asi.Hrekkhatin ” Keicu a sim lam talent ka co ve lo, a ziang bikha  ka co khal ka thei awlo” tivekih tawng khal ka thei dah. A dik lo. Asi ding vekin thil hi asilo ti a fiang. Cuti asilo, zokhalin kan nunih Pathian thatzia cu kan sim thiam tengteng atul tiah ka zum. Ziangah cutin kati tile, mi pakhatin thil a tul zet mi thil kha mi pakhatin arak  pek tikah acui thu cu mi hnenih aipuang zettei va sim sawng a thiam theu .A sim ding khal a hngakhlap zet theu fawn asilo maw? Cutivekin, Thuthangtha phuandarh kan timi khal kan nunih a um zo mi kha mi hnenih va sim sawn ti mi asi men. Thil harsa pakhat hman a um lo. Hrekkhatin ” kei cu tawngkam  le ka thiam silo, mi le ka tih thei tuk fawnsi…tvk. ih ro nawi tawk khal kan um vivo. Cukhal a dik cuang lo. Milai pakhat a tawng thei phawttu asiih, Pathian nung a zumtu le a be ngaingaitu asi phawtah cun a tuah thei tengteng a tul tiah ka zum rori. Asim thei  hrih cuanglo asile amah le amah kha a ruatawk nasat a tul lai tin ka hmu.Zumtu cun a zumtu pi pawl thawi kawmawk nak hi a tuah tengteng ding asi tin Bible in insim lala. Curuangah Kawhhran/ Pawlkawm tvk. ih a fur/ thal ih kan tel thei ringring lo hmanah kan man le kan dam phawtah cun kan tel tento ding hi kan tuanvo pakhat asi. Culawng silo in a cui Kawhhran/ Pawlkawm hrang kan tuah thei mi a um asi ah cun kan pum tiang kan pekawk ding tla hi a tul zet ding.
 
“….Lehlang men kansi…” ti hlir tansanin midang hrang thiltha tuah tumlo men tla in um aw hlah. Asile, na tumtah nak hmun le ram na thlen hlan te ah tla Pathian in na nun nak lo laksak ta bang sehla, ziangtin? Vanram na hung thlen ah cun a zia deuh. Asinan, leiltun na run zoh asile cantha na rak neih laiih na hawi le pi , na sung le te pawl hrangih na tuah thei nacingih na tuah duhlo mi pawl kha na hmuh tikah na um khal a nuam lo men thei. Sim duh mi cu napam hmai aw zet ding tiah ka ruat. Laksawng le na hmuh zat ding le hmu silo in na her lunglo rero men thei sokhaw!
 
 
 
 
 
Isarael Sualnak le Zumtu nun
 
-Caleb Van
 
Baibal : :Isaiah 1:1
           
            Israel pawl hi Pathian ih hrilmi miphun an si. Amai hrang ding ih hril hleice mi an si. Asinan Israel pawl hin theithiam lo in anmah le duhnak lawnglawng thlun in an feh. Egypt sal sung ihsin a run suak ih Nelrawn ramcar khal ah ei ding rawl le in ding tidai a pe. Ral lakah nehnak a pek ih anmah ih do tullo in a do sak theu. Cuti in Nitinten Pathian in a hruai ringring nan anmah kel ringring in an um ih an phunnawi ringrin g. Anmah hi Pathian in ka mi pawl a timi cu an si ko nan Pathian duhzawng ih nun hi an tum hrimhrim lo.
 
 
 
 
I. An nun hrimhrim in Pathian an dodal Isaiah 1:1
   
An nun hrimhrim hi Pathian duhzawng ih nun tumnak khal an nei lo ih tlun ah Pathian dodal zawng hlir in an nung theu. Pathian in Amah dodal hi a hua, A duh lo bikmi a si. Tuisun ih zumtu,Pathian ih minung ka si a ti aw cia pawl khal in voi tampi cu Pathian hi kan do dal theu.
 
 
 
 
2. Pathian an thei duh lo Isaiah 1:3
     Anmah semsuahtu,kaihruaitu,sal sung ihsi hruaisuaktu le cawmtu an thei duh hrimhrim lo.
     Ziangruang ah mah duhduh in kan nung? (1) In semsuahtu hi Pathian a si tyi kan nun ih a theih ngaingai lo ruangah a si.(2) In semsuahtu a si lawng si lo in nitin kan nunnak in cawmtu as si hi kan theihfiang lo ruangah a si. Lenglam nun cun kannih Laimi tla cun Pathian cu thei zet vek kan bang theu. A sinan theih taktak nun a thupi a si cu. Pathian theih duh lo hi sual a si. Kan theih theinak ding ahcun sun zan ti lo ih a thu kan siar thei ringring a tul. Baibal siar hi Pathian kan theih thei nak nai bik a siih in theih fiang tertu cu Thlarau Thianghlim a si.
 
 
 
 
3. Thil tha lo an tuah Is.1:4
     Pathian duh lo zawng thil thalo an tuah. Pathian ih duh lo zawng pohpoh cu thil tha lo an si mei. Anmai duhnak le nuamnak ding lawng an hawl ih an tuah theu. Tui sun ih zumtu pawl in teh ziangtin kan nung?
 
 
 
 
4. An mizia a rit tuk Is.1:4
    
Thatnak lam hnak in thatlonak in a buk ringring.Anmai duhnak in a neh ringring.
 
5. Thil thalo in an kaihruai aw v.4
 
6. Pathian an dungtun.v.4
 7. Nawhthuh an ei.     v.4
 8. An lu cu hma in a khat v.5
 9. Pathian an biak dan a dik lo
 
 
 
 
Isaiah 1:12-14
     Peknak le thawinak cu an uar zet nan a petu cu an tel lo. Voitampi cu Pathian hnen ih thil pek hi kan taima zet. Kan neih kan siah cu kan pe thei zet nan kanmai nunnak pek hi cu har kan ti theu kha.
        Thukam hlun thuanthu hi kan siar a si le Israel pawl thuanthu hlir kan hmu. Asinan hih thuanthu hi Pathian in tuisun ih zumtu pawl nun in simnak ding ah le Amah kan ton theinak ding lamzin in hmuh nak a si. Pathian Pathian cu kan ti nan kan nun dan ah Pathian a lal ngaingai lo theu. Kanmai hlawknak kan hawl,kanmai duhnak kha Pathian in thlun sehla kan duh dan cu a si theu. Asinan Pathian sawn cun Amai duh dan ih nung dingih in kawhmi a si.
      
Israel pawl cu Pathian duhlo zawng in an nung ih Pathian ih hremnak an tuar a si kha. Himi hi zumtu pawl kan nun dan in kawhhmuh tu a si. Baibal kan zoh a si le Pathian in zum lotu pawl a hrem dah lo ih zumtu pawl sawn kha a duhlo zawng ih an nun can ah nun a sim theu. Israel pawl hrem an tuar tikah Pathian in Amai mi a si lomi hnamdang pawl kha funghreu ah a hmang a si kha. Israel ih Pathian cu kan Pathian a si ih Abraham,Isaac le Jacob thlawsuah a petu Pathian kha tuisun ih kan Pathian a si.
 
Cui Pathian cu a thik a sia in Amah ren le Amah tihzah ih a thu thlun lawng a duh a si. Tuisun ih zumtu pawl ih kan nun dan ah teh Pathian duhzawng in kan nung tawk maw? Ami Israel pawl bang in kan hel thotho ding ha.
            Pathian ih hrem ka si ti na theih a si ahcun Pathian hnen ah sualsir in thla cam a tul. Pathian in a fa duh cu nun sim lo in a luat ter lo.
Pathian thlawsuah um hram seh.
 
             
 
 
Malaysia le Laimi  dinhmun                                             
                                                                       
-By Reuben Hrang                         
 
            Tufang Malaysia laimi lakih titi lar bik cu oparacy a si .Kan dung zarhhnih hrawng ihsin Malaysia cozah cun a ram sungih  tazavuan loih um  ramdang mi pawl a nuai ciamco thlang .Kan dung zarh sung lawngah lai mi 200, Rohingza 500 a kai ti a si.Tufangah ramdang mi thawngtla 11900 an um ih laimi 1000 hrawng an tel ti a si.
 
February thla sung ih Malaysia cozah hril awknak hi mitin hngak hlap zetih thlir cio a si.Ziangah tile refugee le migrant worker pawl mithmaitha pe theitu cozah kai seh la ,Christian cabinet tam tel thei  seh la ti hi mitin saduhthah a si.Sihmansehla cozah party thun in lalnak a  ngah sal tikah a tum cia vekin thenfainak a tuah ngaingai thlang mi a si..Hi thenfainak sitsinzi hi kan dung February thla in a thawk zo ti asi.
 
Malay ram sungah migrant worker le refugee 2.5 million an um ih.Malay ram sungah tazavuan lo ram dang mi an tam tuk ruangah damiah,mihat,rukru, siihmang an tam  vivo tihi Malay mipi cozah le mipi ruahdan a si.Kan dung February ni 25 sun ih palik pawl ih damaih mi pathum Pataling raya ih  an kah that mi khal kha ramdang mi an si ti a si.Malay palik hotu bikih sim dan vek a si len kum 2006 hnakin 2007 ah hmuhkhin(criminal) 50% in a pung ti a si.
 
Tuah cun Malaysia ah ram dang mi thawng tla an tam tuk ruangah  Immigration  le thawng inn kiltu pawl pehtlaih awknak  online tuah atul thu Immigration hotubik in a sim.Ahleicein an kaih mi kil khawi lawng si loin an nitin rawl man ah cozah butget a cem tuk ti a si. Malay ram sungih thawng tla 33% hi ram dang mi an siih an rawl man lawng ah kum khat RM 4,839,900 a cem ti a si.
 
Malay UNHCR in tuini tiangah Refugee mi 39,000  registration a tuah sak zoih cumi sungah Laimi 12,000, Rohingza 12,700 an tel. Malay cozah in UN refugee conference ah sign a tthu lo ruangah Refugee pawl hi tazavuan loih pawm an siih UN khalin kaihkhihnak le humhimnak ah ziang hman a bawm thei ngaingai lo.Tuah Laimi registration tuah hrih lo mi 20,000 leng lo kan um lai ti a si.
            Malay cozah in a ram sungah Refugee organization tamtuk an um  ruangah refugee thleng an tam sinsin tin a ruat thlang ti a si. Curuangah kan dung zarh sungih Zomi Association of Malaysia hotu pawl a kaih lawng si loin CRC, ACR  le a dang refugee pawlkom hrang khalah ralrin zet kan tul ti a si. Malaysia kan cam sungah himdamtei kan um theinak dingah thlacamnak thawn ttang cio uh si.
 
 
TLANGVAL LE  FALA  THUHLA
                  
( ..kan dung zarhta pehzawmnak.. )
                        Kan dung March thla ah New York governor Eliot Spitzer cu nunau pakhat a tawmpi ruangah a sinak ihsin a bang. International Motoring Federation president Max Mosley le Malaysia minister pakhat Chua Soi Lek khal nunau tawmpi ruangah an sinak an tan ta. Bill Clinton sanlai ih ‘Lewinsky’ thawn an thubuai tla kan thei lai. Kan dung tlawngkai ni khat ah Australia ah fala  pakhat Jenny Deaves cun amai pa thawn nau an neih thu a phuang ih cui an fate cu taza-vuan siding in thuthentu a dil, himi ni-ah Malaysia-ah pacang pakhat cun a unaupa ih nupi cu hnatuanding  tha thei vekin a ko suak ih, a sualpi. Kan theih thei milar deuhdeuh lawng hman sim ding an tam. Kan theih loh-in hivek thilsual hi ziangtluk in a tam ding?
                       
 
Nupi pasal neizo le la neilo lam thu a silo. Nunau mipat nak lam sualnak cun hmunkipah ram a karh vivo. Malaysia ramsung ah Laimi pawl a thupte-in ziang kan cang ve pei? Kan dungzarh sunday ah kan unau hrekkhat thuthangca-ahcun ‘UN card nei ramdang fehzik hrawng ah nunau thalo inn lam ih palik in an kaih thuhla’ an ngan. LCF ah hivek lam kilvennak thu teh ngan a tul pei maw? A tlangpi in nunau hnakin mipa in mawh kan phur deuh a bang. Nunau thalo cu reilo te sungah an umdan ihsin theih thei an si. Mipa cu theih an har zet. Theih an si hnu-ahcun veikhat nak a rak silo theu!
                       
 
 
Olympic, world cup boruak le ziang vek puai caan ih thuamhnaw hlip thluh cing ih mipi hmai-ih um ngam tla mipa an si cuang. British Mental Health Foundation cun, ‘nunau hnak in mipa in sex lamah ningzahnak an nei mal ih, a thuruahdan tla a awlsam; hihin mipa cu nunau hnakin an zalen ti le cui an zalennak cu an hm
(Visited 61 times, 1 visits today)

Comments

comments

Comments

%d bloggers like this: