Hruaitu Issue 178

Hruaitu Thuthang
vei – 178
April 6, 2008
 
 
 
 
ZOHFELTUI’  Awkam
 
                        Easter sunday hnu-ah low sunday kan hmang. Thawhsalnak ni ihsin ni 40 hnu-ah Bawipa cu van ah a kaiso. Kohhran in Pentecost day hman ding kan nei lai. Bawipai’ ratsalnak thiam zet ih kan sim rero laiah prophet thusuak bangtukin kan dung nai te-ah sms in ‘A rei hlan ah Bawipa a rasal ding’ tiah midang 9 hnen ih kuatsal ding ca a um hnuaihni. Thungai a si, a kuatsal lo tu hrangah kum 9 sung harnak a um ding an ti bet. Laimi tampi kan it thaw thei nawn lo. Malaysia ah kan dinhmun a tep deuhdeuh.
                        Kumdang hnak cun kan pumkhatnak a tam deuhdeuh abang. boruak tha lo le nikhua se tuk karah biak inn tleitu kan tam deuhdeuh. Israel pawl Egypt sal an si laiah harnak-in pumkhatin a tuah,an duh le an dilbik mi cu ‘luatnak’ a si. Kan thlacamnak Pathian  in inpawmpi can a thlen len kan damsungah Malaysia kan hai nawn zik lo. Kan tefa le hrang khal ah kan umnak ram, sal kan si-nak hi kan ngai nawn lo ding ti kan fiang zo.
                        Ruahnak dang a umlai, Daniel thlacamnak sal ding le a dil mi pawl sim dingah Gabriel cu fial a si laiah, Persia kilvengtu  vancungmi cun lamzin ah ni 21 sung a rak kham ti kan thei. ( Dan 10:13). Malaysia kilvengtu khawsia vancungmi hin ziang tiangso kan thlacamnak inkhamsak ve ding?
 
 
 
HILLSONG MUSIC AUSTRALIA(HMA)
 
( kan dung zarh peh…)                                            -Salai Kawl Lian
 
 
Thuanthu:
 
 HMA hi Hillsong Church ih hram bulpi bik pakhat asi. Hi Kawhhran hi Pastor Brian ih hoha mi asiih a thangso cak zet mi Kawhhran tla asi. Ahlan deuhah cun ‘The Hills Christian Life Centre’ tiih ko asiih high school pakhatah ni mipum 45 ra pung khawmin  14 August 1983 ih dinmi asi.HMA cun 1988 ah hla 11 um nak “Spirit And Truth” album cu a hmaisa bik album ah an hun  tuah. Hi album hi anmai Kawhhran le an kiangkap rual le pi tha hrekkhat pawl lawngin an thei. Asinan, 1990 ih an tuah mi ‘Show Your Glory’ album cu ramsungah lawng sinawn lo in Autralia ramleng lam Europe ram lam tiangah  zuarsuah hmaisa bik a hung si thei thlang.’Hillsongs’ cu a hung thansoh vivo tikah Kawhhranin kum ziangmawzah arak hman rero
 
zo mi office cu duhtawk nawn lo in an album zuarsuah nak lam buaipitu dingah  Christian Marketing Autralia cun tuanvo a lak a tul thlang asi.
            Hitiih an hung thansoh cak vivo tikah cun Hillsong Conference an tuah theu mi khal ahlan hnakin a letin mipi an hung pung vivo hngal. An hlaphuah mawizet le thiam zetih Pathian an hun thangthat thuptho mi cun an khawsak nak Australia lawng ah sinawn lo in leitlun pumhuapih Music company tam zetin an album rak suahsak dingin an cuhaw ciamco thlang. Tuni ahcun ram 90 ah an hla hi saklar zet mi asiih mai tawng tete ih lehling mi khal tamzet a um ti theihfiang  asi.1997 Hillsong Music Australia cun Australia marketing le distribution hmunhma hmuahhmuah a hun lak thei theh. Cutin HMA cun  music album a ti suah mi pohpoh cu a zuartu hnenah direct in a pe suak zurzo thei thlang fawn asi.
            1999 ah cun Warner Music Autralia thawn lungrual nak(agreement) tuahta in an album hi an rak suah sak ve. Cuisin, July 2003 ah Sony Music Australia thawn lungrual naktuah lehin ‘Hillsong Live album’ cu nasaten market ih zuarsuah thei ding tiangin an hun tuah pitling thei  vivo.Zarhtin te in leitlun sak le thlang, sim le hmar ih um zumtu, an hla rak ngai le an album rak zohtu pawl hnen ihsin email le  cakuat  tam zet  an dawng ringring. Pathian in Hillsong hmangin an nunih  A sunlawi zia le A maksak zia  alangterawk mi cu an rak sim ve hai.
            Live Praise & Worship AlbumsA hmaisa bik Live Album cu 1992 kumih tisuah mi  “The Power Of Your Love”asiih 1993 ah “Stone’s Been Rolled Away” in a dung ahun thlun hngal. Himi album 2 hi video cassette ih anrak zuk mi ansi veve ih hmailamih a dang Live album ra suak lai ding pawlih lamzin tha zet rak sialsaktu ansi.
2007-“Savior King”
2006-‘Mighty To Save’
2005-‘God He Reigns’
2004-‘For All You Have Done’
2003-‘Hope’
2003-‘Unified Praise-Hillsong and Delirious’
2002-‘Bless’
2001-‘You Are My World’
2000-‘For This Cause’
1999-‘By Your Side’
1998-‘Touching Heaven Changing Earth’
1997-‘All Things are Possible’
1996-‘God Is in The House’
1995-‘Friends In High Places’
1994-‘People Just Like Us’
1993-‘Stone’s Been Rolled Away’
1992-‘The Power Of Your Love’
               Peh vivo lai ding.…….
 
 
 
LEITLUN  THUTHANG
 
Ar natnak Tuluk ram ihsin a suak thawk
 
: Leitlun ram tampi ah harnak a phunphun tuahtu ar le vate natnak ( bird flu ) cu ramkip ah a karh vivo ruangah tuikum ihsin thawk in USA cun himi natnak zohfel ih tawlrel ding in Thailand-ah center a tuah tum. Vate le Ar natnak ( H5N1 virus ) hi kum 1999 ah Tuluk ram ihsin a rak um thawk ih, 2001 ihsin 2007 sungah South East Asia ram sungah ar 1,40,000,000 ai tam cu a lak in an that zo. Mithiam pawl cun, “ar taksa ihsin H5N1 virus a karh hlan-ah virus neitu ar cu- cui virus ruangah a thi theu, asinan, arsa le ar ek ihsin ngah thei an si”  an ti.
 
 
Serbia ram ah buainak a thawksal : NATO ( North Atlantic Treaty Organization ) in kum 1999 ah Kosovo ih buainak titawp ding in bomb nasa zetin a rak thlak hnu-ah tui kum ah cui buainak vek thotho cu an thawksal. Inn sungsang 2,000,000 umnak Kosovo, Serbia ram hi Serb miphun ram a si nan, a ramsung minung 90% cu Albanian miphun an si ruangah, cui Albanian pawl cun an umnak ram cu kan dung February thla-ah independent phuan an tum a si. Serbia kiang ih Hungary cun Albanian pawl thazang a pek ruangah Serb pawl cun embassy zung khal a phit. Serbia pawl hi an mal ko nan, cozah tuanvo, palik le security hmuahhmuah hi anmai kutah an ret thluh thei ruangah ‘Albanian pawl in independent an phuan nak cu leiltun dan thawn a mil aw thei lo’ tiah an el. Hi ram hi history ah Leitlun ralpi rak suahthawknak a si.
 
 
Germany ah Osama thluntu an relh : Germany ram intelligent thuneitu pawl cun an ram sungah Osama thluntu Al-Qaeda member 700 hrawng an um ding tiah German thuthangca ‘Der Spiegel’ hnen ah an sim.German inteeligent agency cun muslim hel pawl cun North Africa ram tampi ah an umkhawm ih, thazang an la rero lai tiah an ti bet. German ram ih muslim tapung tuan tum rero pawl cu n Afghanistan le Pakistan ram ih muslim tapung pawl hnatuanpi dingin le member hawl in an vak rero tiah agency cun an zum.
 
 
 
Pope Benedict in muslim pakhat ti a hnim : Vatican, Rome ah nikum ihsin Muslim phunsang tlawngta 138 hrawng cun internet ihsin leitlun pumpi ih Krihfa le Muslim pawl biaknak lam ih unau sinak le Pathain duhdawtnak cotlangtu sinak ding ah ‘A Common Word’ tiah thunuam relnak hmun pakhat an rak tuah. Himi thawn pehparaw-in kan dung  easter sunday hlan ciah zarhte ni-ah,an hruaitu Magdi Allam ( Milan khawpi thuthangca ‘Corriere della Sera’ ih deputy director ) cu amai duhdan vekin  Pope Benedict XVI cun ti a hnim ( baptise ).
Himi thuhla ruangah Algeria le Morocco ram cun Allam le midang pawl cu nasa zetin ‘muslim dodaltu muslim’ tiah an sawisel. Catholic le muslim pehtlaihnak khalah Pope cu napi-in an sal. Asinan, Allam ih tuanpi Aref Ali Nayed ( director of Royal Islamic Strategic Studies Center, Amman ) cun, “hi thil hi biaknak pahnih karah thuthup tuah ding ih tumtahnak a si lo, leitlun daihnak ding le pakhat le pakhat par ih zangfahnak kan neih cio ding ah a si sawn” tiah a ti.Saudi Arabia thuthangca pawl cun Allam cu ‘Muslim dodalnak duhdawttu’ tiah an ti. Algeria ram thuthangca larbik ‘El Khabar’ cun “Allam cun muslim sawiselnak tongkam a neilo a si ahcun a thiltuah cu thil thupi tuk ih ruat ding a silo” tin a ngan. Saudi siangpahrang Abdullah cun a ram sung ih Krihfa le Judaism hruaitu pawl cu a ko ih a ramsung ih muslim pawl cu rak tawk ngah pang lo ding in thu a relpi.
 
 
Iraq ram ah tihnung bik March thla a cem : Iraq ram ih bomb phuah le do-awknak ruang ih thihnak cun daih ni a nei thei lo. A hleice-in tukum march thla ih thi zat cun an ram cu harnak in a fehsan deuh lo tiah a tifiang. March thla sungah milai 923 an thi ih, 1358 cun hliam nasa zet an tuar. Nikum march thla-ah milai 1861 an thi ih 2700 hrawng an thi a si kha.
 
 
 
 
Mi 11 thattu nunau damsung thawng thlak : Inn sungsang hnatuan bawmphah cingin anmai inn sung rori ih nupi-nu pawl thattu nunau pakhat Juana Barraza ( kum 50 ) cun kum 2000 ihsin mi 11 a rak that kim zo ih, kan dung tlawngkai ni khat-ah a damsung thawngtla ding in thuthensak a si. Juan hi mi 40 hrawng thihnak thawn pehpar-aw in an zum bik mi a si nan, mi 11 thihnak lawng a theisuaksal thei. Kum 759 sung thawngtla ding a si nan, an ram Maxico dan cun kum 50 lawng thawngtlak a sian ruangah damsung thawng inn sungah a um ding. Juan hi 2006ah kum 80 mi a thah ihsin a kai zo . Amai phuan awk dan ahcun, a nauhak laiah a nu-in mipa pakhat hnenah a rak zuar dah,curuangah nunau kum upa lam parah phubalak a duh a si.
 
Minute pathum sungah nupi pahnih then : Kan dung tlawngkai ni hnih-ah Kuala Terengganu court, Malaysia ahcun Roslan Ngah cun a nupi pahnih cu an ram dan vekin minute pathum sungah a then ( divorce ) thu a phuang. Roslan hin a nupi hmaisa bik Norhayati Ismail thawn 1986 ah an nei-aw, fa 4 an nei. Cui hnu 1995 ah nupi pahnih nak Mastura Ahmad thawn an nei-aw sal ih, fa pahnih an nei. A nupi pahnih le a fa 6 thawn 2000 tiang inn pakhatah an um tlang. 2001 ah nupi dang a neisal ih, fanu pakhat an nei nan, cui a nupi pathumnak thawn 2004 tiang an um tlang. Tui tum ih a nupi then hi amai duhdan si lo-in, a nupi te pahnih in an duh ruang ih then a si tiah a sim. A then mi nupi 2-nak Mastura hi kum 35, nurse tuanlai a si ih, Norhayati hi kum 46 a si. Kan theih vekin Muslim dan ahcun nupi duh zatzat a neih thei ko nan,bangret ih zoh an tul.
 
 
Mino thinlung buainak
 Tuluk ramah fala kum 19 cun vanzam siatsuah ding le, a zam laiah hmun tampi siatsuah cih ding in a tumtah tiah a phuang aw. Hinu hin Beijing  vanzam cu Urumqi ah tlakter a tum. Urumqi hi Xinjiang ih muslim tamnak bik khawpi a si. Japan ram Okayama province-ah kan dung tlawngkai ni-nga-ah mi pakhat (kum 18) cun cozah hnatuan pakhat cu tlangleng zin-ah a tul tla ih, tlangleng cun a pal that cih. Hi tlangval hin himi ni-ah hin mi pakhat thah a tum cia rengreng tiah a phuang aw. Ibaraki province khalah Masahiro Kanagawa ( kum 24 ) cun a farnu thah a tum ih, a tawng thei lo ruangah tlangleng station-ah meithal a a kap ciamco ih mi 1 a thi,mi 7 in hliam nazet an tuar. Hipa hin march ni 19-ah putar kum 72 mi a rak that zo. Japan ram hi USA vekin meithal neih theih nak ram a si ve.
 
Korea ramah dan khuah deuhdeuh ding : South Korea ram cun tunai te-ah an ramsung ih hman lohli ding dan thar an tuah. Kum 13 kim lo thawn it tlang siseh, nunau mipat lam thawn pehpar-aw thei thil tuah rengreng hrang ahcun ‘thihnak’ lo cu hrem dan ding a um lo ( death penalty ) a si. Thuthentu in a zangfak ta-hrat a si hmanah ‘damsung thawng a tla ko ding’ ti a si. Hi dan hi kan dung ih nunau nauhak hlo thuhla ruangah an tuah thar mi a si. Kan dung ih nauhak hlo cu kum 11 mi pahnih le kum 9 mi pakhat an si ih, anmah firtu pawl in an sualpi hnu-ah an taksa an tan thluh ih, an phum.
 
 
 
Suu Kyi ih party pawl au-aw :
Kan dung tlawngkai ni thum-ah Kawlram democratic party hruaitu Daw Aung Suu Kyi ih dungthluntu pawl cun rampi hruaitu hrilnak dingah NDL duhtu pohpoh mipi cun vote thlaknak cahnah ( ballot paper ) ah ‘No ’ tin ngan ih, vote thlak ding in mipi hnen ah an ngen. Khatlam ahcun UN envoy Ibrahim Gambari cun Kawlram cozah cu Indonesia ram vekin democracy ram a si lai ding tiah zumnak a neih thu UN ah a sim ringring. 
 
 
 
 
EI LE IN, LEITLUN  BUAINAK
                                    ( by  BiakChawn )
 
 
 
Kan dung naite-ah Indonesia-ah eiding har tuk ruang ih san-dah-piah nak ( demonstration ), North Korea ram ah ei le in harnak ruangah Thailand ram ah refugee a tawmtawm in an tlan nak, Cambodia ah ei in that lo ruang ih pumnatnak tlang hri pakhat tulai Thailand prime minister-in a rak ngah ve nak, Thailand ih loneitu pawl in lei lehnak ah cet aiah naa ( buffalo ) an hmansal nak ( zinan le datsi khung tuk ruangah ), Egypt ram ih harnak ruangah tangka hlutnak a tlakniam nak( inflation ), Peru ram mipi tamsawn in alu ( potato ) lawng an ei rero nak, Haiti ram nitin hlawhfa ih eihawltu pawl in an fa le tlawng an fehter thei nawn lo nak, Philippine ram khawpi bik  Manila  sungkaw tampi in fangfai an ei thei nawn lo nak pawl hi sim thiamtu hrang ahcun leitlun hin ‘PAM’ kan tuar thawk vekah a cang ding.
           
 
Kanni laimi thinlung ih um ringring ding cu nikum September thla ih phungki pawl hohanak thawn mipi thawng tampi in hmunkipah eiding thilri man a khung tuk ruang ih san-dah-piah nak cu a si ding.
                       
 
 
Indonesia ram cu agriculture country a si fawn, North Korea ram cu nuclear bomb le energy tuah thei ram a si si, Cambodia cun leitlun ah tourist a thawngthawng in an hip ( an ramah hlanlai inn zoh cawk lo a um ), Thailand cu Asia ramah tourism le international trading lamah number 1 an silo maw? Egypt ram cu leitlun ah leilung thatnak ( Nile tiva kap ih leitha ) a si fawn, Peru cu hanghnah hangrah nei tam bik a si ringring ti aw? Haiti ram cu hnatuan tam bik an si kha, Philippine teh cathiam tamnak ram ti kan thei, kan kawlram teh sui le ngun tamnak bik ti sehla zo so in el ding? Laitlang lam ih kan rawl ei theu, kawhawl le vainim, busul le laifaang,  kawlrawn lam kan vaih hnu ih kan thil ei, Malaysia ih kan ei in, kan hni-puan le kan feh duhnak MCK, Kachin dawr le kawl dawr pawl hi!!?
                                   
 
 
Kan rinpi bik USA ram ihsin kan thawk pei. Kum 2007 sungah USA ah ei in man 4% in a khung ih, kum 1990 ihsin a khung bik kum a si. Leitlun sumdawn nak ih raltha le hlawhtling rero lai Tuluk ram ah khal tuikum ihsin sa man 58% in a thangso. An tangka Yuan hlutnak tla 7.1% in a tlaniam ( inflat ), hihi kum 11 sung ih a niam bik kum a si. Kum 1980 ihsin tuluk ram cun ramdang ihsin ei ding a tul zat cu 150% in a thangso ih, India cu a pahnihnak a si. USA cun kumtin zinaan ( crued oil ) sam ruangah buainak a tawng ve ringring fawn. Zinaan nei tam bik ram, Saudi Arabia, United Arab Emirate, Kuweit le Iran, Indonesia le Brunei pawl cun ramdang ihsin ei ding an tul ringring. Leitlun ih cawhnawi lam le caw-sa kuatsuak tam bik Australia le Argentina cun kum 2006 ihsin an thilri man 37% in an tikhung.
                       
 
Leitlun ah ei in man cu kum 2006 ihsin 23% in a khung so thluh ih, caw hnawi man 80%, fangfai le thildang ei bik 42%, zinaan 50% in a thang so. Ukraine ram le Russia cun kumtin ei ding neitam ram a lem ih, wheat ( jhung hmauh ) le grains and nuts ( pe phunphun ) ramdang ta an lei. Cameroon ram cun an business hartuk ruangah an eiding a zuar zel ih, nitin eiding nei lo-in an thi rero. Somalia mipi tampi cu khawpi leng hnawmhnawk karah eiding hawl in an vakvai. Japan ramsuak ‘mayonnaise le miso’ pawl man cu vanah an kaiter, bio-fuel an tuah ruangah an ram ah behrum le sitii an daih aw dah lo. Egypt ramah roti man 35% in a kai,
                       
 
 
Kan dung 2007 December ah leitlun ram 37 cun ei le in an daih awlo thu le harnak an tuar thu an sim, ram 20 lawngin ei in man an control thei fangfang. Kawlram fang man khun dan cu nitin rocket vekin a zam in a zam so an ti bet. United Nations World Food Programme cun tu kum hrang mi farah 89,000,000 cawmnak dingah US $ 500,000,000 in a daihaw lo. Kan Laimi hrang nawmnak dingah Eliza bang thlawsuah dil thei prophet kan tul ngaingai!!!
 
 
Rev. Run Cung Mang thawn hmaiton thusuhnak
 
 
Hruaitu:        : Na nu le pa hmin suahnak khua in sim thei pei maw?
Pastor:          : Ka pa cu Pu Nam Ceu a si ih ka nu cu Pi Cawi Men a si. Ka pa cu in thihsan zo ih ka nu cu in dampi lai. Ka suahnak khua cu Falam peng Laizo uksuh Zalai khua a si.
 
 
HT :                :Na inn sungsang dinhmun nupi fanau pawl?
Pastor:          :Kan nu hmin cu Sung Za Len (Blue staff nurse) a si ih Bualkhua mi Pu Victor Kap Lian ih fanu a si. Pathian in fapa rosunglawi unau thum i thluasuah: Samuel Van Lal Mawi, Peter Dun le Elisha No San Mang tla an si. Samuel hi Yecawng Tetkatu ah B.E first year a kailai. Peter phun 8 le Elisha phun 7 an si.
 
 
HT:                 : Zirnak lam ah ziangmi tiang na zir?
Pastor:          : 1977 kum ah phunhra ka ong ih, 1982 ah B.A (Eco.) le 1986 ah B.Ed. degree ka ngah. Biaknaklam ahcun Zomi Theological College ihsin B.R.E degree (1993) le Myanmar Institute of Theology ihsin M.Div. degree (2001) ah ka ngah.
 
HT:                 :Pathian hna ziangtik in na rak tuan thok, kum ziat na                                  tuan zo?
Pastor:           :1978 in 1993 tiang acozah hna, tlawng saya kum 15 ka rak ttuan hmasa. 1993 kum April 1 ihsin Assistant Pastor (Youth) dinhmun in Lairam Falam Baptist Church ah Pathian hnatuan hram ka thok. Atu April 1, 2008 cun kum 15 ka kheng zo.
 
 
 
HT:                 :Pathian hna na tuan thok ihsin harsa na ti bikmi le na                                lungawi bikmi?
Pastor:          :Pathian hnattuan ih a nomnakbik ka timi cu mipi hrangah thla kan cam tikah kanmai’ nunram ah thlarau thazaang kan ngah. Mipi thlarau rawl fah ding tumtah ih Bible le cabu tampi siar in timtuahnak ka neih tikah hmuhnak le theihnak a kau, thin hna a ngam ih thlarau thazaang a ngah aw. Kan simmi ruangah mipi nun ih thlarau thazaang ngahmi hmuh tikah thin a nuam sinsin. Asinan, tuurual sungah dungtolh le Pathian thu ngaih sak lo, zumtu tisamituk an um ahcun thin a baang duhzet ih a ngaihven daan ding har ka tizet.
 
 
 
HT:                 :FBCY ah Pastor kum ziat na tuan?
Pastor:          :Falam Baptist Church, Yangon ahhin kawhhran a din hlan deuhte, le a din pekte ihsin ka rak tel ve. MIT ih M.Div. ka kai phah in hlawh-lang (part-time) in 1997 ihsin ka rak tuan ih, hlawh-leeng (full-time) cun 2001 ihsin ka thok. Curuangah kum hra ka ttuan ti’n siar a theih (ka ruat aw).
 
 
 
HT:                 :A lo thei dah lotu pawl in Vankau Arsi Magazine ihsin                              na hmin kan lo theihmi hi ziangti’n na ruat?
Pastor:          :Ka lungawi daan a phundang  hleice. Kan Falam ttong in tikcu hmantei’ tuni tiang magazine suakmi Vankau Arsi magazine ah zohfeltu (chief editor) ka ttuannak ihsin le sermon le cahram tete ka nganmi ihsin i theitu an um ih ka lungkimzet. Calai duhtuk mi ka si ih calai ihsin mipi ih theih mi si cu ka lungawi daan a nasa cuang.
 
 
 
HT:             : Kan Calai ah ziangtik ihsin na lut thok in na thei aw?
Pastor:       :Tlawng saya ka ttuanlai ihsin calai ka rak duhzet ringring ih Pastor ka ttuan hnu 1993 ihsin Falam Chin Christian Literature Society (FCCLS) ah Sungtuan bawmtu dinhmun in ka rak thok. Cumi hnu cun nasatak in ka tithei tawk ka ttuan ve hnohno.
 
 
 
HT:                 : Calai le Pathian hnatuan a kalh awknak a um maw?
Pastor:          : A kalh awknak a um in ka hmu lo, a kop aw sawn in ka thei. Kawlram le Lairam Pathian thu kan theihnak hi Calai in a thok tisehla kan palhtuk lemlo ding. Bible le Cabu phunphun kan neihnak in Pathian hnatuan a cak sinsin.
 
 
 
HT:                 Laica zirnak cabu tiangtiang ngan suak dingah                                            ziangmi in na thinlung a lo tho ter?
Pastor:          Laica Zirnak cabu ngan dingin ka thinlung i thotertu cu, mi tampi in “Laica ka thiam lo” an ti ka thei ttheu. Acozah in zir in sian lo ruangah Laica thiam lo an tam deuhdeuh fawn. Kan fanau pawl in kan Laica an thiam lo asile hmailam ahcun kan nunphung: ttong le Calai a hlo ding phaan a um.
 
            Culawng si loinm Laica Ngan daan ah thu hmunkhat nei loin, mah duh daan ciar in, danglam hniaihniai ih ca kan ngan rurimi hi ka hnak i dohzet. Magazine, News letter, le internet ih kan Laica nganmi tampi ka siar tikah, an suahpimi thuhla (content) cu a tthazetzet na’n, an cafangkom ngan (present) daan in ka thin i hnaihnok ttheu. Laica Cafangkom ngan daan ah thu hmunkhat neih thei ding ka duhtuk ruangah Laica Zirnak cabu ka ngannak a si.
 
 
 
HT:     Laica Zirnak na ngan tikah ziangmi harsatnak na tong?                              Ziangtluk hlawhtling in na thei?
 
Pastor:          Duhkhung takin ngan suah ka tum, Formula chart tiang ngansuah ka tum tikah caan neih lo le thiamtuk lemlo thawn cu ka baangzet paam. A suahnak ding sumsaw Lailun Foundation in in bawm ih lungawi um ngaingai.
 
Lairam Falam peng sung le Kawlrawn LBA le  khua tin ah, Yangon ih “Thaal Tlawngpit Laica Zirnak program” ah Text Book ah an hmang ti ka thei ih ka lungawizet. Ramleeng hmun tampi ihsin tla cabu in cah ciammam tikah bangman ka nei, ka hlawhtling a si hi ti’n Pathian ka thangtthat.
 
 
 
HT: Rick Warren ih cabu ” Tumtahnak ih Fehpimi Nunnak ” na let theh tikah ziangtluk na diriam? Harsatnak na tonmi tla in ruah hnik?
 
Pastor:          Himi cabu hi ka duhtukmi a si ih Mirang in siseh, Kawlca in siseh ka siar. Kan Laimi tampi in siar ve in thlarau thazaang ngah ve hngai seh timi hi ka thlacamnak a si ih, thiam lo cing te’n ka let tikah, thla 7 rori ka rei. Pastor tuan phah man lo cingin zaan siim le zing thlapit ih ngan a si ih ka baangzet ttheu. Computer keimah te ngan a si ih proof reading le print out, layout design le offset namter thawn kumkhat rori a rei. The Purpose Driven Ministry of Myanmar ih suahsakmi a si.
          Cabu a suah tikah mipi in an duhzet, an tthathnempizet ti ka thei ih ka diriam nasa. Cabu uk 2000 kan nam ih atu a cem thluh zikte zo. Ram sung ram leeng hmuntin ah zemdarh a si ih bangh manhla ka tizet ih thluasuahtu Pathian ka thangtthat
 
 
 
 
HT:     Kan Falam Calai ngan daan bang awk lomi ah rel rem theih                      vivo a si in na hmu maw?
 
Pastor:          Ahlan hnakin atu cu tampi kan relrem thei zo, in ka hmu. A reihlan ah santhar mino pawl cun thu hmunkhat in kan fehpi thei ko ding ti’n ka zum. Kan harsatmi lakah ka hmuh daan ahcun, James Herbert Lorrain (Mizoram ih missionary, Lushai cangan daan tuah saktu) ih zirh daan [a aw b ch .. system) le Joseph Herbert Cope (Lairam ih missionary, Laica in tuah saktu) ih in zirh daan [a b c d …system] pahnih kan fiang lo ruangah a sibik in ka thei. Laimi cun a b c d (IPA International Phonetic Alphabet) hi thlun sehla, a aw b ch thawn cokpolh (compromised) lo sehla zianghman buainak a um lo lawlaw.
HT:     Kan Laica kan duhdawtnak hi mai’ hmuh daan ih fehpi a tha                     maw? Zapi lungrual thei teh a si ko lo maw?
Pastor:          Pa Tuan ih hla “Mai’ thu tete sawh” kan ti sung poh ahcun lungrualnak le Laica Ngan daan ih thu hmunkhat neih ding cu kan hlat hrih ko ding. Asinan ruahnak kau le ttha nei in “Laica ih hleicetnak (the uniqueness of Chin)” kan theihthiam ahcun zapi lungrualnak kan nei thei cing ko ding. Ahleice in Kawhhran le Zumtu Pawlkom in Bible le Hla cabu, magazine le thuthangca kan suahmi tete ah “Cangan Daan fumfe (Norm & Consistency) nei thei tumtah vingvo sehla amah te’n “cafangkom ngan daan kalhmang ttha” (standardized word combination) cu kan sersiam thei mai ko ding ti’n ka hmu.
 
 
 
HT:     Hmailam kum ziat hrawngah kan Calai ngan duh daan ah               kan lungrual thei ding tin na hmu?
Pastor:          Thinlung thiang neitu santhar mifim le zirsaang tthangthar nonawn san ahcun ol ai te’n Bible le Dictionary zoh le thlun in an lungrual mai ko ding. Atu tiang Laica in Dictionary zoh ding kan neih lomi hin kan Laica tthansonak a fuungter in ka thei. Falam Bible siar tam pawl cun cafangkom daan ah thlunmi daan fekfel an nei thluh cio, an buai lo lawlaw. Laica in Dictionary a suah cun Standardized a si cih mai ko dingih el awk a um nawn lemlo ding.
 
HT:     Malaysia ihsin kan Calai hrangah ah ziangtluk tiang hrawng hna kan tuan thei dingah na ruat?
Pastor:          Malaysia hi ram tthangso pakhat a si ih Calai hnattuan theinak ding sanman thilri le sinak a kim. Electric le a tthatuk ih Kawlram ka umlai hnak cun Calai  hna a let in ka ttuan thei ding ti’n ka zum. Computer le Internet mah duh tawk ih hman theih a si hi cun kan miphun hrangah Calai hna tampi ttuan theih a si ko ding. Ahleice in Pathian in sunmang (vision) in peekmi “Calai ih Pathian Hnatuan (Literature Ministry)” hrangah a remcaangzet in ka lungawi ce. Nitin Thlarau Rawl siseh, Sermon siseh, Laica Zirnak siseh, online hnattuannak remcaang dingin LCF in computer le internet broadband tla in ngaihtuah sak ruangah hnattuan a remcaang ngaingai. Atu vek a si le cu hmailam ah cak sinsin ding ka zum.
 
 
 
HT:     Laica Zirnak na nganmi hi na hnatuannak LCF kawhhran ah                      zir theih in tawlrel a tha lo maw?
Pastor:          Tawlrel dingah a ttha ka ti. Ziangtinkim a semrem vingvo ih caan ttha remcaang a um vingvo ding. Calai cu a hnek ih hnek awk theimi thil a si lo ruangah Calai a duhtu taktak pawl hrangah zirh awk ding daan a um ko ding.
 
HT:     Calai lam cu tawk hrih sehla, 2006 ih Malaysia na rak tlawng                  lai, LCF ih thu na sim rero lai ah LCF ah Pastor na tuan ding               ti na ruat dah lo ding ti aw?
Pastor:    Khalai ah zianghman ruah ngaihnak ka rak nei lo lawlaw.
 
 
HT:     LCF ah Pastor tuan ding in sawmnak ca na ngah tikah ziangtin                 khua na ruat?
Pastor:          Ka cal parah ka kut suangin khua ka ruat ngurngo nasa. Pathian remruah le Pathian ih thupeek a si ko ding ti’n ka ngai. Pathian in kei santlai lo tla LCF hruaitu upa pawl thinlung sungah rinsannak le duhsaknak a umter ih hril le kawh mi ka si cu mangbangza taktak a si ti’n ka ruat. Pathian ka thangtthat ih tawlrel khawkhangtu upa pawl parah tla ka lungawi nasa.
 
HT:     LCF ih Pastor na tuan tikah kawhhran pakhat ih hnatuan              thawn a danglamnak ziangmibik a si pei?
Pastor:          Lai Christian Fellowship ti a si bangin miphun le hrinhnam tinkim, Pawl (denomination) tintian kom khawm aw kan si tikah a phundangzet. Khrih ah pumkhat kan sinak fiangzet in ka zir ngah. Ahlan ah mai’ kawhhran ih thurin (doctrine) kha dikbik le thupibik ih kan rak ret ttheumi a dik lozia ka fiang nasa. Pathian thei le rinsan, Pathian thutak sungih nun le duhdawtnak timi hi atak ih nuncih tulmi a sizia ka thei fiang vingvo.
 
 
 
HT:     LCF kawhhran member pawl ziangvek dinhmun thlenpi                dingah ruahsannak na nei?
Pastor:          LCF sungtel zate hi Pathian theitu, a rinsan taktaktu le rinsantlak ih Pathian riantu sithei dingin thlarau-thinlung-taksa ah a kilkip in buk awton ih thanglian pitling dingin Pathian thunung, thuthangtha simphuannak le zirhnak, thlacam saknak le fingkhawi kaihhruainak in cawm thei ding ka tumtahbik. Hlawhtling tuukhal ttha si dingin Pathian hnenah thla ka cam.
 
HT:     Kan mipi pawl in midang hnakin mai’ member ngaihsaktu             na si ding tin kan lo beisei zet?
Pastor:          Mipi ih beisei vekin member pawl thlakung zawn theitu ka si theinak dingah hruaitu le mipilam ihsin thlacam saknak, ruahnak peeknak le zawnruah ttanpi awktonnak tampi ka ttul ve.
 
HT:     LCF khawm awknak le kaihhruai awknak ah na lungkim zetmi le rem na ti lemlomi a um maw?
Pastor:          LCF member pawl hi zumtu Pathian thu hiarhaal le Pathian duhzettu an si ti ka  hmu ih ka hnangam nasa. Ka thlen ni ihsin tuni tiangah zianghman thin hnaihnoknak le zinfetnak ka nei lo. Kaihruai awknak khal ah pakhat le pakhat duhdaw awte le ttihzah upat awk kan thiam ih nuam ka tizet. Ahleice in zarhkhat hnu zarhkhat Pathian biakkhawmnak ah mipi kan tam deuhdeuh ih ka lungawi nasa. Kan Pathian biak daan tla kan tthangphawkzet in ka hmu ih ka diriamzet. Mipi 500 lai vun um tlang vialvo cu mak ka tizet ih, FBCY ka ttuanlai hnakin kan tamdeuh ih nuam ka ti ngaingai.
 
 
 
 
HT:     Member zapi hnenah sawm duhmi na nei maw?
Pastor:          Zumlotu acozah ih uknak hnuai ih ummi kan si ti thei in raalringzet ih um daan thiam ding le zumlotu mipi lakah tlangleeng le hnattuanmi kan si ruangah fimkhurzet ih nun daan kan thiam ding a thupizet. A thupibik ahcun, Pathian thuthlun in, Amah rinsan in, thlangam te ih nun ding a ttul. Ziangkim kan tuahnak ah Pathian hmin sunlawitertu si ding tumtah cio uhsi! Mih khua le mih ram ah alaangte ummi kan si ruangah pakhat le pakhat duhdawt aw, zawnruat aw, ngaidam aw le lungrual teih um kan zuam cio pei.
 
HT:                 Hnatuan dang tampi lakah kan thusutnak in san nak                                    parah   kan lungawi.
Pastor:          Kei tla atu vekin tonnak in neihmi parah tampi ka lungawi ve
 
 
TLANGVAL  LE  FALA  THUHLA
 
                       
Kan dung zarh ah tlangval le fala hrang ah duhdawtnak tlamtling sawn hawl dan kan ngan ih, cahmai hnih lawng a si vekin a famkim lo zet. Asinan Hruaitu siartu hrang ih tumtah bik mi cu tulai san nunau mipatnak lam ih ralring ding ih forhfialnak ( sex education ) a si tiah kan ruahtlang a tha ding.
                       
 
Kan suahnak khawlam vawn ruat hmaisa sehla, kawlrawn lam ih um hrang ahcun nunau thalo le zuar-aw thuhla kan thei thluh ding. Yangon khawpi ihsin Kuala Lumpur khawpi nundan vawn tahthim vivo hman ah, nunau thalo an tam sinsin ti a theih thei. New York le Shanghai khawpi lam cu kan thlen hlan hman-ah kan ruat ban ciau ding. Hivek ih zuar awk nak hi khawpi si-nak le a thangso vivo mi ‘san’ ( civilization and evolution of urban’s lives ) theih theinak ding ih tahnak ( measurement ) cu a si.
                       
 
Leitlun history hlun bik ( oldest civilization ) ih khawpi hmaisa pawl thuhla cu Hruaitu-ah kan ngan zo vekin tampi cun kan thei lai ding. Abraham tei’ khua Ur le a kiangkap khawpi Eridun, Urnamu khawpi pawl cun ca-in siseh thu-in siseh history an nei upa bik. Hi khawpi ihsin nunau zuar awknak cu a rak thawk zo. Nunau mipatnak lam ih thil fel lo Baibal in insim hmaisak bik cu Semtirhnak  4:19 ah ‘Lamek cun nupi pahnih a nei’( polygamy ) ti a si kha. Eden hmuan lenglam ih milai thilsual tuahsal hmaisa bik cu ‘tualthahnak’ ( murdering ) a si ding ih, milem biaknak ( idolatory ) hi leitlun history upa bik ihsin a rak um zo ruangah nunau mipatnak lam sualnak hi a pahnih nak cu a si ding.
                       
 
Nunau zuarawk nak maw um hmaisa, mipa zuar awknak? Hihi thil fiang lo le theihban thei lo an si ko nan, tulai san thawn vawn tahthim sehla, 45% cun anmai duhdan si lemlo-in hi thil sual tuah hi an tuah thawk. 18% cun an cawlhsan sal thei. Nunau 100 ah mipa 12 hrawng an zuar aw ve. Hivek pawl hi sungkaw farah le hartuk ihsin suak an si thluh lo. Science fimnak ihsin chromosome zoh sehla, mipa si ding ih ra suak ding hrangah nunau thinlung nei ding a si tiah theih thei an si lo. Nunau tla mipa thinlung nei ding an si tiah zo-in an thei lo.
                       
 
Science ihsin kan theih loh len Pathian thu-in kan hawl pei. Pathian cun misual cu san sarih nak ( 7th generation ) tiang a hrem theu. Prophet cun ‘Pa pawl in theithur an ei ih, fa le pawl ha a zaa’ a ti. In thlahtu pawl sualnak ruangah, nu le pa sualnak ruangah khal fale pawl camsiat in kan um thei. Bawi Jesuh san ihsin kan zoh sal pei. Mitcaw pakhat,a suahpek ihsin a mit a caw ruangah Bawipa hnenah an hruai ih hitin an sut: Amai sualnak ruangah maw a nu le pa sualnak ruangah? an ti. Bawipa cun, “Zoi’ sualnak ruangah si lo-in Pathian huham langternak dingah a si” a ti.
                       
 
Si!!! Mi tampi cu anmai duhdan vekin an um lo tla a si thei. Anmai sualnak ruangah si lo-in, an nu le an pai’ sualnak ruangah a si lo len, Pathian huham lanter nak dingah an si ve pei maw? Siangpahrang cabu-ah Jepth ih nu cu nunau thalo ( harlot ) a si ti kan hmu. Jerico khawpi ih Israel pawl rak humtu khal harlot a si ih, a thiltuah ruangah a inn ih um hmuahhmuah thihnak ihsin an luat. Cui nunau cu Bawipa Jesuh minung lam in a raksuahnak ding ah thlahtu a rak si ve ( Salmon ih nupi Rahab Matt 1:5 ). Hihi kan palh a si khal len Judah cun a fapa pathum in an neih zo, amai mo Tamar thawn fapa Phares ( Perez ) an nei, Tamar cu nunau thalo vekin a rak cei-aw a si kha ( Semtirhnak 38 ).Bawipa thlahtu a si.
                       
 
 
Tulai san ah nunau mipatnak thalo zet ih hmangtu siseh, mai taksa pum zuar ih eihawltu pawl siseh, Pathian in anmai sualnak maw an thlahtu tei’ sualnak a ngaidam hnu(an sir-awk hnu) ahcun mi ropi an si thei.Asinan, AIDS karh thuhla-ah nunau hnakin mipa in tuanvo an neih ruangah Europe ram tampi cun nunau zuarawk a siang nan,a leitu mipa pawl hremnak dan an tuah.sawn.
( Hmaizarh ah pehsal ding..)                              – BiakChawn
 
 
A suahtu           LCF, Malaysia
 
Editors                     Biak Chawn
                               Kawl Lian
                                                      
Sumkil                     Mang Hlei Sang
Zemdarhtu               Salai Liante
                               Obet Cungte
                               Lal Ruat Lian
                               Khumte                        Calai kawmiti   
                               Johnson Liante
                               Kawl Lian
                               Mang Hlei Sang
                               Biak Chawn
                               Obed Cungte
 
Advisor                   Rev. Run CungMang

Comments

comments

Comments

%d bloggers like this: