Hruaitu Issue 177

HT vei – 177

 

Hruaitu
Zarhtin Thuthang
vei – 177
March 30, 2008
 
 
Zohfeltui’ Awkam
 
LCF ihsin mi 36 ram dang ah
 
Tuni le thaisun a bang awk lo, thaisun ah Ninu in ziangmi a rak suahpi ding ti kan theih ban lo mi hi bawipa ih duhmi a rak si, cucu a mai thlawsuah khal a rak si fawn. Hmailam can theicia sehla tap le aihramnak in hi leitlun a khat ding.
 
Kan LCF khal hi Bawipai kut cakin a rak dinsuah lai kum 2002 ah mi 70-100  hrawng lawngin an rak khawm thei nan, tuni ah Pathian kutcak a lang vivo ih mi 400 lenglo an rak khawm thei. Tuithla sungah kan member sung ihsin
 
Pa Ngun Hmung tei   innsang           mi 5  Newzeland
Pa Ngun Lian Uk tei innsang            mi 4  USA
Nu Sui Thuan tei innsang                  mi 4  USA
Pa Sui Lian Thang innsang                mi 6  USA
Pa Ngun Nawl innsang                      mi 6  USA
Pa Tawk Lian Mang   innsang           mi 5  UAS
Salai Cung San                                   mi 1  USA
Salai Cungte                                       Mi 1 Australia
Anzaten                                               mi 36
 
 Hmailam caan ah ziangvek tikcu can khal ah Bawipa hmin sunlawinak ah si vivo hramseh.
 
 
 
Na Duhdawt mi
by Jasmine Certe
                   ( …….   ) Duhdawt mi ti le
                        Duh timi na thei maw
                        Cun a taktak si lo mi
                        Ruahsan hi sullam a nei maw
                       
                        Tipi thuanthum ti khi
                        Haite in na suak kang thei kei maw
                        Kurtai khi a thupte ih ei khal len
                        A thlum thotho
 
                        Sa an kap hlan ah
                        Puahnak ding thing an sat dah maw
                        Na ei thei lo mi in
                        Na pum a lo puar ter thei lo
                        Na duhdawt mi cu thinna in tan hlah.
           
 
Sermon
 
Thlangam Daihnak
-by Rev. Run Cung Mang
 
“Zianghman ttih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding; ka lo hum dingih ka lo ruun ding” (Isaiah 41:10).
 
 
Thuhmaihruai
           
A siatral cuahcomi hih leiram ih na leenlai ah na ttulbikmi hi ziang a si? Ahleice in ttih ding hlir ih a khatmi hih Malaysia ram na um sungah ziangmiso na poimawhbik? (oprasi, palik, rela, damiah,…) Mi hmuahhmuah in kan ttulbikmi cu thlangam daihnak (peace) hi a si ko. Kan Laittong ahhin “hnangamnak” timi kan nei ih “thlangamnak” timi khal kan nei. Thukdeuh in simfiang tum hnik sehla – “hnangamnak” cu thinlung sungih ttihphaannak um lo daihnak khi a si kan ti thei. Kan rinsanmi le kan rualpi ttha kan kiangnai ih an um caan ah kan hna a ngam hlunhli. Asinan “thlangamnak” cu cumi hnakin a nasadeuh. Kan kiangnai ah rinsanmi zohman um lo hmanseh, kan nunnak ah ttihphaannak hlir in in kulhvel hmansehla, kan sunglam nun, kan thlarau nun cu Pathian Thlarau Thianghlim ih umpinak thawngin dai ziarzi in a um thei. Cumi cu thlangamnak kan timi le kan ttulbikmi cu a si.
 
 
 
1.  Zianghman ttih hlah!
           
Leitlun hi ttihphaannak hlir in a khat. Milianzet khal in a tlaksiat ding le a farah saal ding a phaang ih micak khal in amah hnak ih caksawn suak leh ding a phaang ve. Thuneihnak saangbik nei ram uktu bawi pawl tla hril an si nawn lo ding an phaang. Mi hmuahhmuah ttihphaannak nei lo zohman kan um lo. A tam le a mal a simen. A luar le luar lo lawng a si ko. Sihmansehla kan biakmi kan Pathian in zumtu a tefa pawl cu “Zianghman ttih hlah!” in ti (Isa. 41:10). Ziangah sipei? Dr. Simpson in, kan Bible sungah “ttih hlah” timi thawn a bang awmi ttongfang hmun 365 lai ah a cuang. Kumkhat ah ni 365 a um ih, curuangah zumtu cu nikhat te hman ttihphaang ih um ding in siang lo a si, a ti. Ka lungkimzet. Ttihphaannak leiram ah kan um ko nain “Zianghman ttih hlah!” in titu a cak Pathian kan nei. Pathian hmin sunglawi sin koseh!
 
 
 
2.Zianghman in lo phaangter hlah seh!
           
Zumtu cu kan beunak lungpi Jesuh a si ruangah ziangtluk buainak sumzing in in kulh hmanseh phaan ding a um lo. Ziangahti le “phaang hlah” in titu Pathian kan nei. Paul in, “Ziang thuhla hmanah donhar in um hlah uh. Thla nan cam tikah lungawi aipuang in na duhmi cu Pathian hnenah dilsawn uh. Cuti ih nan tuah asile minung ih ruah baan lomi Pathian ih thlangam daihnak in nan ruahnak le nan thinlung cu Khrih Jesuh sungah a kilhim ding,” a ti (Filipi 4:6-7). Zumtu pawl cu ziangtiklai caan khal ah Pathian in in umpi ih thlakung in zawn ringring ruangah hnangamte ih um ding kan si. Immanuel Pathian in, “Nan hnenah ka um” in timi cu rinhngetnak thawn pom in nuncih zuam cio uhsi! Pathian kut cak sungah himnak famkim a um ruangah ziangtik caan khal ah hnangam tein um aw. Jesuh dungthluntu pawl in an thinphaan caan ah an Bawipa an ko ih an hnangam bangin Bawipa sawm ringring uhsi. Bawipa in, in namnuaitu leitlun harsatnak tilet le tisuar cu a hlohter mai ding. 
 
 
 
3. Keimah cu Na Pathian ka si.
           
Saam ngantu in “Bawipa kha an Pathian ih a neitu miphun cu mi thluasuak phun an si, Bawipa in a rothil ah a hrilmi pawl cu mi thluasuak an  si,” a ti (Saam 33:12). Israel pawl ih an duh awknak le an tluangkhawnnakbik hi Pathian ih mihril kan si timi ahhin a si. Kannih Laimi tla Pathian ih rundammi kan si, Israel thar kan si. Jesuh Khrih cu i Runtu le ka Bawipa tiih a pomtu hmuahhmuah cu Pathian in ka fahniang ti’n in ko ih Pathian cu kan Pa a si. Pathian cu thlarau nun ih kan Pa a si ruangah zo in so in neh thei ding? Pathian kut cak sung ihsin zoso in long theitu um ding? Paul in, “Nannih cu nunnak ah Khrih thawn thawhter nan si zo ruangah Pathian vorhlam kap Khrih tonak vancung ram ahkhin nan thinlung bun uh,.. Nan thi zo ih nan nunnak taktak cu Khrih thawn Pathian sungah thuh in a um a si,” a ti (Kol. 3:1-3). Curuangah “Keimah cu na Pathian ka si” in titu Pathian kutcak sungah himdam te’n um uhsi!
 
 
 
4.  Ka lo cakter dingih ka lo bawm ding
 
Leitlun mi cu mi cak lo le mi ttawnttai hlir kan si. Kanmahte kan nunnak hi sekent pakhatte hman a humhim aw theitu kan um lo. Sualforhnak a neh theitu tla kan um lo ih tisa duhnak hlir ah a tlangleengmi kan si thluh. Sihmansehla lungawiza thutak cu Pathian in, “Ka lo cakter dingih ka lo bawm ding” in ti. Samson cahnak petu Pathian cu kan Pathian a si ve ih Solomon fimnak petu Pathian cu kan Pathian a si ve thotho. Paul hhnenah thlaraumi sitheinak huham petu Pathian cun tuni khalah Amah a ringtu poh cu thlarau thazaang cahnak in pe fingfing a si. Mani-tusun-thaisun ziangtik hmanih danglam dah lo Pathian cun kan harsatnak le kan ttulsamnak ah in bawm thei. Khawvel thinharnak thli sia ih in nuai rerolai khalah tuar theinak thazaang le neh theinak huham in peek ringring a si. “I ko uh, ka lo let ding, mangbangza thil khuaruahhar ka lo khmuhter ding” (Jer. 33:3) in titu Pathian ko ringring in Amah ah rin-umnak le rinsannak kan neih ahcun a dingfelnak vorhlam kut cak in in ruun dingih in humhim ding a si. Kan duhmi le kan beiseimi ziangkim ngah thei dingin in bawm ding a si.
 
 
 
5. Ka lo hum dingih ka lo ruun ding.
 
Bawipa in harsatnak sumzing sung ihsin in humhim dingih ttihnung raapthlakza dodalnak le tisiatnak sung ihsin in ruunhim ding. Thukam pelh dah lo Pathian cu Amah a ringtu poh cu an harsat buainak sungin a hum ih a ruunhim ringring. Leiram ttihphaannak le Malaysia ram thinharnak sung khalah Bawipa duhdawtnak sungih na tthum awk taktak ahcun minung ih peek awk thei lomi le minung sinak ih mahte ngah thei lomi, Pathian hnen ihsin lawng a rami thlangam daihnak in na khat thei ding. Na nunnak a lo hum dingih a lo ruun ding.
 
 
 
 
Thunetnak
Thlangamnak (Peace) cu mikip ih kan duhbikmi le kan ttulbikmi a si. Cuih thlangamnak cu hih leitllun khuitawk hmun hmanah a um lo. Lei le van seemsuahtu Pathian hnen lawngah a um. Cuaruangah kan Bawipa Jesuh a suahhlan kum 700 ihsin a hmin ah Mangbangza, Remruattu, A cak Pathian, kumkhua ih Pa, Daihnak siangpahrang (Prince of Peace) tiah kawh a sicia zo. Tuni khal ah kan biakmi kan Pathian cu lei le van ih thuneitu saangbik le cungnungbik Bawipa a si. Paul in, “Bawipa kan lam ih a ttan ahcun zoso in dodal thei ding?” a ti bangin kan thinlung zate’n Bawipa cu zumhnget in kan rinsan ahcun zohman in dodal thei lo dingih nehnak thantar thawn Pathian kan rian thei vingvo ding. Cuticun ttihphaannak ih khatmi hih leiram ahhin thlangam daihnak thawn kan um thei ding a si.
 
 
 
 
LEITLUN  THUTHANG
 
Fake Information a tam :
            Misual hawltu an buai rero laiah mipi lam ihsin thuphan information dik lo rak petu an um ringring. Singapore cozah sun le zan an hawl rero ‘Mas Selamat Kastari’ umnak thei vekin bus driver pakhat cun palik hnenah report a pek ruangah kum 1 le thla 9 sung thlawng tla dingin thu thensak a si. Hi driver pa hin palik hnen ihsin laksawng ngah a duh ruangah hitin thuphan a per tiah a phaung aw sal. Kastari kha February 27 ah a tlansuak a si kha. January ni 9, Taman Medan,Malaysia ih nunau nauhak Sharlinie ( kum 9 ) hlo an hawl rero laiah Pakistan tlangval cun palik hnenah information dik lo a rak pek ruangah kaih ve  asi.
 
 
 
East Timor ram ah daihnak a um thei lo : Kan dung February 11 ih East Timor President Jose Ramos Horta kap ngahtu le prime minister to-nak mawtaw rak khamtu tapung pawl cun daihnak an duh thu an sim rero nan, ramsung ih an cangvaih vivo ruangah cozah cun ‘state of emergency’ cu thlakhat sung a sauter bet. Tapung pawl hi Australia pawl bawmnak thawn an hawl rero ih, tampi an kai zo nan an hruaitu bik an kai ngah thei hrih lo.
 
 
 
President Arroyo le sumpai eiruknak :
            Philippine mipi cun an president Gloria Macapagal Arroyo duhtu le duhlotu zat survey an tuah ih, nikum October ahcun 39% in sumpai eiru in an puh. 2008 Feb-March in survey neta bik ahcun amah duhlo tu Filipinos mipi 51% an um tiah an ti. Hiti vek ih opinion poll ( ngaidan vote thlaknak ) an tuah ringring ruangah mipi then hra ih then kua cun Arroyo an puhnak hi ngainuam a ti tiah survey tuahtu cun an zum. Arroyo hin ‘telecommunication’ lam thansonak ding ih budget US $ 3,30,000,000 ( RM 1,050,000,000 ) a eiru tiah an puhmawh a si.
 
Bhutan ram cun ram uk dan a thleng ve. An Siangpahrang neta bik Jigme Khesar Wangchuck cun hi uknak thlengawk hi ram mipi hmuahhmuah lungawi tlang theinak ding ah a si’ tiah a ti. Democracy ram vekin hrilawk nak an theh veten Buh\hutan United Party cun parliment seat 47 ah 44 an ngah hnu-ah thuneihnak an kai cih. Siangpahrang cun political power a nei ko ding nan, rampi uknak ding policy thar an tuah ding a si.
 
 
 
Taiwan in president thar an nei : Kan dung zarhte ni-ah ( 22.3.08 ) Taiwan cun president hrilnak an nei ih, kum 8 lai president tuantu, Democratic Progressive Party hruaitu Frank Hsieh cu Kumingtan hruaitu Ma Ying Jeou cun a neh. Taiwan  hin kum 1949 in thawk in Tuluk ram ihsin zalen nak ngah dingah nasa zetin arak zuam zo nan, tu ni tiang Tuluk hnen ihsin an inndang thei lo. Asinan, Jeou ih hruainak cun Taiwan tipi kap 160 kilometers ih sau cu, Tuluk lak ih himnak dingah thil pakhatkhat a tuah ding ih, tuluk thawn cun economic lawngah sungkhat kan si ding tiah a ti.Taiwan hin tih cing in  United Nations Organization ah amai hming thawn  member si ding a tumtah ringring. Hi tumtahnak referendum hi Tuluk cozah cun a ngeih lo zet ih Taiwan cu UNO ah ‘Republic of China’ tin tel ve mai sehla a duh.
 
 
 
Greece ramah Olympic meisa an muat thawk : Kan duing tlawngkai ni khat ah Greece ram ih Olympic suah thawknak hmun, Olympia tlangpar temple-ah kum 2008 hrang Olympic meisa cu an muat thawk. Tuluk ram Olympic tawlrelnak hruaitu Liu Qi cun thu a sim lai-ah human right lam hnatuan tu France mi pahnih cun sandah an rak piah ih, thusimnak microphone lawng ih, “Milai diknak hmuhsuamtu ramah Olympic tuah si hram hlah seh” tiah an au. Sandah piahtu pawl cun Olympic flag ih rinkual panga cu ‘misual hrennak handcuff vekin slogan ah an ngan ruangah kaih an si.
 
 
 
France le Britain cun nuclear thuhla reltlang :
 
Kan dung tlawngkai ni li-ah France president Nicolas Sarkozy le a nupi Bruni cun Britain ram an tlawng ih prime minister Gordon Brown an tawng. Hi an khualtlawn nak hi kum 12 sung ih France prsident in Britain a palsal nak hmaisa bik a si. A hlan ahcun France le Britain hin USA  in ramdang a donak thuhla-ah ( foreign invading policy ) an rak rem awlo theu. Ram pahnih hruaitu pawl cun Nuclear summit thuhla, Olympic thuhla le Dalai Lama thuhla pawl an rel. Ram pahnih cun nuclear energy tuah lotu leitlun ramah electronic thilri a tam thei bik kuatsuah ( bawm ) an duh ih, asinan, Britain cun  kum 2012 Olympic a tawlrel a tul ruangah France in Olympic boycott a duhnak cu a pawmpi lo. France cun tuluk-in Tibet mipi tampi a kaih ruangah Olympic boycott ding European Union ram hmuahhmuah lem a tum thu a sim. France ram hin a ramsung ih electric power 80% hi nuclear ihsin a tuah ih, Britain cun 20% tuahding in nuclear power a hmang.
 
 
 
 
France ram first lady Bruni  sawiseltu :
           
France president Nicolas Sarkozy ih nupi Carla Bruni cun sawiseltu a nei tam deuhdeuh. Bruni hi fashion model tuantu a si vekin kum 1993 ah photoghrapher Michel Comte cun tawlawng ih a umlai, George Seurat ih modeling style cu a rak zuk. Zuk lakhawmtu pawl cun British fashion models Kate Moss le Naomi Campbell ih zuk pawl thawn April ni 10 -ah mipi hmai ih zuarnak ( auction- lilam nak ) an nei tum. Amal bik US $ 4,000 in an thawk ding. Culai fang ahcun 1.75 meter ih sang Bruni cu Harper’s Bazaar fashion megazine editor Lucy Yeomans cun, US president John F.Kennedy ih nupi Jacqueline Kennedy thawn an mawidan a rak tah thim.
 
 
 
 
Bangladesh in Independence day puai tuah :
 
Kan dung tlawngkai ni thum ( 26.3.08 ) kha Bangladesh ram independence dat vei 37 nak a si. Mirang pawl uknak ihsin independence ngah neta bik khal an si. Bangladesh ram hi tu hlan ahcun ‘Weat Pakistan’ ti a rak si theu ih, political buainak a phunphun ruangah kum 1971 ah anmah in cozah dang an nei ve. Himi thuhla ah Pakistan cun India cozah cu a mawhsiat ih, tu ni tiang Jummu le Kasmir state ( India ) ram cu an ram a si tiah neih a tum rero.
 
 
 
Peru ramah Dinosaur ruh an kai : Arequipa, Peru ah kan dung tlawngkai ni hnih-ah palik pawl in vanram thilphur ding thiarsak tu bus cu an check ih, 8.5 kilograms ih rit dinosaur kha ruh ( jawbone ) an kai. Peru cozah cun kum tampi ‘fossil traficking’ hi an rak kham zo. An ram ah khua hlanlai ih dinosaur ruh tampi cu ramdangah an phurh hlohsak thluh theu. Arequipa ih an kaih ngah hi ‘bony triceratops’ dinosaur ruh a si ih, archaeologist pawl cun kum 6,500,000 ih upa a si an zum. Triceratops pawl hi North America thlanglam ah an rak um tam bik theu.
 
 
 
 
Tuluk cun Olympic boycott ding an phang : Tuluk ram cun an ram buainak ruangah internatioanl olympic organising committee in olympic cu a boycott ( canceal ) sal ding ti a phang. France president  Nicolas Sarkozy cun ‘Tuluk ram cun ramsung buainak a tawlrel thei lo a si ahcun, Olympic opening ceremony tla ka boycott ding’ a ti ruangah Tuluk cozah cun a hlan ih a rak kham theu Europe ram journalist pawl cu a kosal ih, buainak um nawnlo nak hmun ‘Himalaya’ ah lawng a hruai. March 10 ihsin thawkin Tibet mi 140 an thi zo nan, tuluk cozah cun 20 lawng an thi a ti. Tibet cun kum 1959 ihsin independence an dil zo ih, mitampi India ramah an tlan. Tibet hruaitu ‘Dalai Lama’ khal hi 1959 ihsin India ramah a um zo.
 
 
Nunau thahnak tam sinsin
 
Hongkong ih nunau tha lo thattu an kaih hnu-ah, France ram ih nunau 7 lai sualpi ih thattu Fourniret cu kaih a si ve ih, thuthennak a hngak lai.
 
UN zungin mi 100 hnenah appointment an pe                                                                        
 
-By N.B.Hrang
 
Kan dung tlawngkai ni hnih ni (25.3.08) ah UN zungin card ngah cia sungkhat ben ding mi 100 hnenah appointment an pe suak ti a si.March ni 11 ni ih UN zung hmai mipi tam tuk ruangah appointment pe loin palik an dawiter hnu ah tuhi an pek hmaisabik a si. UN zung in an zung hmaiih dansi tul nawn loin CRC le ARC ah hmin pe dingin an ti mi  asi.Cumi hmin cazin pekmi sung ihsin CRC in 50 ACR in 50 an zaten mi 100 hnenah appointment pek an si.Tuah sungkhat ben ding hmin petu 800 lenglo an um lai ti a si.
 
Registaion thar thawn peh aw in kan dung 2007 mass hlan te ih Kawhtawng le Thailand lakih lawngtla  mi 40 hrawng thih tumta anung mi 46 hnenah registation an tuah sak ti a si.Mi bang lo,Aids nat nei ,naupai,emergency hrangah cun an phit ti a um lo nan mi pi vangtlang hrangah cun thuthar a um hrih lo.Lai mi tampi in rampi kan thlen theinak dingah thlacamnak thawn ttang cio uh si.
 
 
DAN   LE   AN  HRAMTHAWKNAK
 
(By     -BiakChawn )          
 
Leitlunah ziang tik ihsin Dan a rak um? History ih ngan kan theih thei hmaisa bik le tulai san tiang hin milai kilven nak ding le misual hrem nak ding hi ziangtin a rak um? Hruaitu siartu hmuahhmuah in a tlangpi kan theih tul mi pawl le kan ruah tlang ding ih tha ka ti pawl famkim lo zetin vawn ngan ka duh.
                       
 
 
1.Dan hramthawknak cu kan bible ahcun ‘Ei hlah’ ti ihsin a thawk. Sinan, hi article ahcun leitlun history lam ngan a si ding ih, Baibal lam cu kan ret tha phawt pei. Milai cun ‘ca ngan le ca siar’ kan thiam hlan ihsin ‘Dan’ kan nei zo kan ti thei. Milai ih duhdawtnak cun inn sungsang ihsin ‘tuah hlah’ ti le ‘tuah aw’ tin Dan cu a thawk. Hihi Robert Mardock cun a cabu-ah ‘ca ngan le ca siar thiamnak a um hlan khal ah milai then thumj ih then hnih cun Dan an nei ih, milai pakhat a thih ahcun a thilri cu zo-in cohlang ding ti thu-ah Dan a rak tam bik’ tin a ngan. ( Ethnographic Atlas – University of Pittburg press 1967 p.862 ).
                       
 
 
2.  Kum 3000 B.C hrawng ihsin Egypt ram cun mipi zohkilnak ding ah Dan an nei zo ih, cucu ca-in an ngan ti theih thei an si. Asinan, misual an hrem pawl cu mitthi phumnak thlan pakhat ‘pyramid’-ah ret ding in mitthi kuang ah a nung cing in an rak phum theu cu 3000 B.C hlan ih ‘ca ih ngan loh Dan’ a si thei. Ziangah ti len kum 2000 AD ah Egypt ram cun an ram history an theih ban thei ihsin kumm 7000 an si-nak puai an rak tuah.
                       
 
 
3. Babylon ram siangpahrang Hammurabi in Dan a tuah cu a si. Cucu 1760 B.C a si ih, Nebukadnezar um hlan kum 900 hrawng ah a si. Cui Dan cu mi hmuahhmuah siar thei ding khawpi sumdawngnak ah lung phun a si ih, sumdawng ( trader ) pawl le sal ( slave ) thuhla a tam bik. ( Nebukadnezzar in Jeruslam a siatsuah kha 860 B.C hrawng a si )
 
 
 
Hammurabi siangpahrang sanlai ihsin ‘mit aiah mit, ha aiah ha- kuan ding’ ti le sal pawl hminsin nak hlohtertu cu a kut tansak ding. A sal tlansuah tertu cu thah a si ding, sal cun nupi pasal an nei-aw thei ding’ ti pawl an lar thawk. Hihi ‘Code of Hammurabi’ ti a si. Mosi sanlai ah khal miphun tamsawn cun an hmang.
                       
 
 
4. Tuluk ram an si. Tuluk ram ah ca-in dan an rak tuahnak cu Xia dynasty ( Xia siangpahrang sungkua le thlah pawl sanlai ) ihsin a thawk. Hi dan pawl hi leilet ram hmansak awk thuhla ih dan ( feudalism ) a si ih, Xia sanlai ah tuluk ram ih ram fate uktu bawi pawl cun ral an neih tik cu-ah anmah bawm lohli ding ih thukam tu pawl hnen-ah leilet ram cu an san ter theu.
                       
 
 
5. Greek siangpahrang Solon sanlai a si. Babylon ram cu Persia in an siatsuah zo ih, Persian san neta lam a si. Greek pawl in Persia an do rero ih, ram an la vivo. 600 B.C – 500 B.C hrawng a si. Hihi Europe ram hmuahhmuah in Dan an cawngnak bik cu a si ih, Solon sanlai ihsin biaknak le ram uknak lam cu lamzin dangdangin an then thawk.
                       
 
 
Rome sanlai ih Dan pawl hi paruknak kan ti thei. Kum 451 B.C hrawng ihsin Roman pawl cun Greek dan cu tuah danglam deuh in dan picang ngaingai an nei thawk. Inn sungsang, miphun si-nak le sal tawlrel dan a tam bik. Misual cu thinglamtah par ih khenbeh, thuthennak ah diknak cotu cu ‘lung rang ( marble )’ pek, inn sungsang ih pa bik in a fapa cu sal si ding in zuar sehla, cui a fapa cun a Pu in a duhzat tangka cu kuli tuan cing in a pe kim sal thei a si ahcun a suaksal thei. Vei thum a Pa-in a zuar hnu-ah ‘a fapa’ cu a luat ding ih a pa cun a zuar thei nawn lo ding. Mi pakhat a rak Aaa thut a si ahcun a thilneih mi par ih thunei tu ding cu a sungkhat naih bik mipa a si ding.
                       
 
 
India ram cun 400 B.C ihsin singpahrang thlun nak dan Arthashastra le Hindu biaknak lam thluntu hrang Dan ‘Manusmriti’ an rak nei. Hindu biaknak hi khawitawkin a rak thawk ti kan thei lo nan, biaknak dan an tuah hi an hram thawknak vekin tla a sim thei. Hi dan pawl hi pasarih nak cu an si.
                       
 
 
Europe ram tampi cun Rome rampi a tluksiat ihsin amai ram lak zat an uk ve vivo ih, cui an ram uk sung ahcun dan an tuah. Hi dan pawl hi Rome sanlai ihsin an rak thlun mi pawl tuah danglamnak ( modified ) an si. Kan hminsin ding cu, Greek sanlai ah Alexander the great cun ‘Greek miphun tidan’ ( Helenism ) hi a tlangau-pi vivo ih, tu ni tiang phunsang tlawng ah Greek word hman rero lai a si. Cucu Solon in policyi a rak tuah,  Alexander ih pa ‘Phillip’ ni a rak thlun ve cu a si. Cuvek thotho in British pawl in leitlun ram tampi an uk ih, anmai dan le thil tuahdan pawl cu ramkip ah an than. Hihi Dan tangkai le thasawn ( political laws ) kan neih thawk nak cu a si.
                       
 
 
Rome sanlai ih dan pawl cu a tihnung bik ih rel a si theu. Mi bumhmang le rukru tla tualthat vekin an hrem caan a um. Tipi ih hlawn, a nung cing ih phum, thih tiang ih thawi etc. Hivek tuartu ah hin midang huat ruang ih hla rak phuahtu tla an tel. Nu le pa thattu cu dip tumpi sungah an ret ih tipi ah an hlawn. Cui dip sung ahcun uico, rul, arpa le zawng mi keu hmang tla a thun tel cih.
                       
 
 
England ram ahcun kum zabi 17 nak hrawng ahcun nunau sualpi nak le tual thahnak hi a bangrep in an ruat. Mi nupi ihpi tu le milem a betu cu thah tengteng ding an si.
( Hmai zarh ah peh a si ding – Ed )
 
 
HILLSONG MUSIC  AUSTRALIA(HMA)
 
by Salai Kawl Lian
 
Christian music thuhla kan peh vivo ding. A siartu pawlin ziangtluk hlawk nak nan  nei hai timi tla theih a cak um zet theu. A hrekkhatin a thulam lawng siar an um lai ah a hrekkhat calai lam a tuicin pawl cun cafawng hman dan le cafang kawm dan lam tla inrak suttu an um theu. Mihrekkhat pawl leh thung cunt t.rawngbawl aii ah hnatuan hman a theih lo maw? Tivek tiangih mi rak sut tawk tla an um. Tawngfang hmandan thuhla hi tampi rel ding a um ko. Asinan, kei ka fehpit ve dan cu a zawi tawng asi ti rero aiin hnampi pawlih fehpit dank an hman asile kanta asi hngal mai timi lam sawn hi asi. Cutiih ka ti ruangah kan Lai tawngfangih fiang keukeu um nacingih tul hnai lo tuk hman kual lam ka timi asi cuanglo. Kan tawng a farah ka duhlo ka ti nak asi sawn.Nangkhal na ngai dan pawl kha  ziangtik lai khalah tlawng zetin bulpak hmaitawnawk tikcu ah simaw asilole  SMS in simaw in(asinan na hminngai kha zahpi lo te ih telhin) inrak sim thei tum awla a tha zet ding tiah ka ruat.
 
 
Tuitum ahcun a hu aho ih Pathian thangthat(Praise& Worship team)pakhat thuhla ka hril suak leh asi hi. Annih hi Pathian in maksak takin hmanraw tha zet le hriam zetih a hman mi pawl an si. An hlanih P&W team hmuahhmuah hun hleihin leitlun pumpi ih an album an zuar suah tam bik le khawng cak bik pawl ah an hung tang thei asi. Kannih Laimi lakah khal an hla a kel ekih kan sak mi siseh, kanmai tawngte ih let tahratih kan sakmi tam nawn a um ve zo ko. Pathian biak thangthat hla ka ngaina a ti aw cin cun kan thei deuh tlangpi ko ding tiah ka zum.
 
 
 
Praise & Worship timi thu tahwn mallai thuhla hlawmawk ka duh ta. Ziangah tile kannih kan Laimi pawlin himi thu pawl hi kan theihthiam a tul ve zet tiih ka ruah ruangah asi.
 
 
 
Pathian hi can bikhiah nei deuhih hnatuan theu asi ti cu kan thei cio ko ding. Bible hlun lamah PA sinak lawng phuangaw in a cangvai. Cuihnu deuh ah Fapa Jesuh tin kan lakah rung tlanglengin a phuangaw lehsal. Cun tu a neta bikah cun Thlarau thianghlim in a cangvai lala.Kannih miphun lakah hman tuihlan deuhah cun Thlarau thianghlim timi a rak pawm duh lo tutla an rak um ve ko. Asinan, tuini ah cun kan zate deuh thaw in Thlarau thianghlim le a hnatuan mi pawl cu kan pawl thluh thei thlangih a lung um ka ti zet.
 
 
 
Khitivek deuhkhin  tuihlan kum za ziangmawzah lai ah cun Christian hym book timi hi kawhhran tinah hmanlar deuh bik a rak si(hiti ka ti ruangah Hym book ih hla zaten Pathian in a hmang nawn lo ka tinak asilo). Asinan, tuini kan zoh asile a sanih milin music lamih mithiam ropi mino/upa pawlin hla thluk thatha hawl suakin style a phunphun bunin an tuahih an hlawhtling zet hai asi. Cumi pawl cun Tape cassette,CD le VCD ih ngai le zoh lawng si lo in kawhhran tam zetah khal khawm canih hman lar vivo asi. A hleice in  himi hla thluk thar asilole santhar hlahphuah dan style hmangih Pathian biak le thangthat nakin mino thinlung a dengnehih,  mi  thawngpi  pawl tla in Bawi Jesuh cu an Bawi le vRundamtu ah an run pawm ve thei hai asi.
 
 
Traditional Church timi hnamdan hmang/thlun  deuhih Pathian biak le thangthat nak khalin hmun le ram a nei nawn lo deuhdeuh thlang . Ziangahtile tuihlan kumza tampi san laiih hla phuahthiam pakhat in a hla phuah dan style le a tawngfang hman dan pawl kha tuisanih zumtu pawl hrangah theihthiam a harsa deuhih Pathian khalin a khatilam zawngin hna a tuan peh lemlo  timi khal hi Pathianih mihman tam zetih hmuh dan le ngaidan khal asi. Tuihlanih biak inn sungih kut zabeng dah lo le ban a vai dah lotu pawl khalin tuni tuisanah cun khitivekkhin an tuah thei ve thlang. Kan bible sungih Siangpahrang David in Pathian cu lam le kut zabawng phahih a thangthat timi a fiang sinsin in ka thei. Kannihn kan miphun lakah khal Pathian mihman pawl hmangin hlathar thatha tam zet inpe zo. Cumi pawl kan hun sak dupdo cun thinlung khal danglam zetin inrun fang ruahruahih thazang kan ngah zet tlangpi in ka thei.
 
 
 
Asile kan hlawmawk ding mi thuhla lamah kan feh thlang pei aw…..
 
Zoha  Hillsong Music Australia(HMA)?
 
 
 
HMA cun kum 15 rei music album a phunphun a tuah mi cu ram 90 ih um zumtupi unau pawl hnenah a thlen thei asi.
A Tumtah Mi:Pathian in Hillsong Church hrangih hnatuan a pekmi lakih thupi zet pakhat asi.Australia ram sungah lawng silo in leitlun pumpi huap khalin rawngbawl nak a nei thei fawn asi.Kawhhran pawl hnenah Pathian ralthuam le thazang pek nak lam hna a tuan.Hillsong Church ih senior Pastor Brian in music ih hlawhtlin dan asim nakah “Kan thil tuah zomi zate ih kan zoh asile Church neih timi lawng hi asi men(hitawk zawnih Church ti a hmanmi hi zumtu pawl hmunkhat te ih Amah Pathian nung biak le thangthat timi a khih hmuh mi asi.Anmai Hillsong kawhhran neih ding a ti nak asilo. Cangantu).Himi hi Pathian hnatuan inpekmi asi.Music timi cu mipi hnenih thlenterih an thinlung neh ko tuahih Pathian lamih fehpit thei dingih laksak timi asi.Pathian biak timi cu Church spirit timi asi.Hla pawl cun Church ih thinlung a run suntlang asi.
 
 
 
Himi worship team hi Pastor Darlene ih hoha mi asi. Anih hi hla lar zet “Shout to the Lord” timi hlaphuahtu asi.Hi hla hi  zumtu lakih hla lar zet pakhat asiih leitlun pumhuapih um zumtu unau mipum million 30 in zarhtin ten mai kawhhran ciarah an sak ringring hla khal asi. Darlene hi hlasak thiam zetzet le musician thiam zetzet pawl thawn an tuan tlang hai. Cuihlei ah duh  erte ih training an pek mi khal mi tam pi an um ve lai. Cumi pawl cun anmah  le an tikcu rem can dandan hawlih rak pe in training anra kai theu hai asi. Himi pawl hin anmai kawhhran ciarah Praise and Worship(P&W)thatei an kaihhruai awk thei ve nak dingih tumtah nak nei cio mi an si hai.
 
 
 
Music hmangih a bulpi le tumtahmi pawl cu:-
1.Mitampi  Pathian ih nunthar an neih thei nak ding. Hi nunthar aneitu pawl khalin Pathian kan Bawipa an biak le an thangthat thei ve nak ding.
 
2.Zumtupi unau pawl thazang cakter.Kawhhran le Ministry tivekih tulsam mi pawl bawm hna tuan. Bible cu hrampiih bun tahratih zirhawk nak, Kaihhruai awk nak , Pathian biak le thangthat pawl tla asi.
 
3.Pathian in Hillsong hmangih a thilti mak le a hnatuan mi thu pawl hi zumtu unau pawl hnenah le zumlotu pawl hnen khalih sim le phuan pawl tla asi.
  Hmaizarhah peh vivo ding……..
  
 
 
 
TLANGVAL  LE  FALA  THEIH  TUL
 
( .. pehzawm nak… )  
                        “Pai’ duhdawtnak cu a al, Nu duhdawtnak cu a thlum” ti a si theu. Hi thu hi zokhal in kan thei ko.  Hrekkhat cun pai’ duhdawtnak ‘ a al’ ti cu, a thlum hnak cun a thaw lo nan, a tel lo cun um thei a si cuang lo tiah an ti. Nui’ in duhdawtnak cu duhnungza a si ih, a thlum tuk ruangah lamzin tha ih inhruaitu a si vekin lamzin tha lo ah khal kan fehsual theu nak san a si an ti.
                       
 
Fate duhdawtnak hi rel danglam thei a si lo ih, vawn ruah ngaingai ahcun in duhdawtnak cu an rak bangaw ciah, asinan, in duhdawt dan cu a phun a dang. Fate hlawn siang nupi nu tampi an um: fate an vawn pai ih, vengsung ih sungkhat le rualpi hmaisawng ruangah maw ( a fate pai thawk dan felfai lo ruangah ), ek in le tiva ih vawn hlawn men duh nunau an um. ( Asian style ) Fate neih veten ‘Orphanage home’ lam ih umter cih tla an tam ( western style ), nau pai an si ti thei awk veten siatsuah cih ( modern style ) an um. Cucu nunau thuhla tlangpi, a selam cu a si.Mipa cun, mai fala naupai ruang ih ‘kawk’ men ( western style ) mai’ fala ih nau neih cu, “ in zawn lo” tin tan ngam ( common style ), mai’ fate in paisak tu nunau rori ( sawn ) cu ningzah ruang ih tlansan ( Tribal style ), fala naupai siatsuah cih ding ih forhfial cih ( Asian style ) an tam. Mipa mawhnak lam tlangpi a si.
                       
 
An pahnih in vawn tah tthim sal sehla. Ralpi ruang ih mai’ sa himnak duh ruangah, mi tampi cu inn le lo tlansan in hramlakah an tlan theu. Hi vek caan ah hin mipa hnak in nunau-in  fate a duhnak cu a tam. “Ral hmai ah khal fate run ding cun thih tiang a ngam” ti a si. Mipa cun cutawk ahcun ‘fate run lo-in “ziangtin ka thungrul sal ding?” tin a ruat sawn theu ti a si. Nawmnak caan ih duhdawt awk nak hnakin  harnak caan ih duhzwk nak cun milai duhdawtnak a simfiang sawn kan ti ngam a si ahcun, Nui’ duhdawtnak cu a thlum kan ti thei ko ding.
Mipa hrang ahcun, ‘Fate duhdawtnak langter dan tha bik cu, a hringtu nupi duhdawtnak a si” ti a si. ‘Fate cawitu nupi nu ih ban tha caklo zet cun rampi a tuah tha thluh thei’ ti a si. Thu dik sawn cu, mipa le nunau in duhdawtnak thu an sim thawk ihsin an hmailam caan hrang ih thil tul le pawimawh ngaingai an rel fuh a thupi bik kan ti thei ding.
                       
 
Thiknak ( jelousy ) ruangah le pakhat le pakhat zum awk ngam lem lonak ( doubt ), umharnak ( solitude ) le hiarnak ruang ih ngai awknak ( long for desire ), khawtlang le sungkua, miphun, biaknak lam ihsin harnak ( social and custumary and religious concerns ), tong hman ding le umnak ding hmun ram ( language and domicile condo ) thuhla ih buanak, le thildang tampi hin duhdawtnak ngaingai hi a tidanglam thei lo tiah na rak zum a si ahcun,…. na ti tha. Mi tampi cu hivek ruangah an buai celcel theu.
                       
 
Sociologist pakhat, UNO ( United Nations Organization ) dintu lak ih tel ve Giddon cun, leiltun milai hrang ih thupi bik cu, “nunau mipatnak, inn sungsang, hnatuan” tiah a ti. Hihi Giddon ih thufim dimond pathum ti a si. Mipa le nunau in duhdawtnak lamzin an hawl tlang duh a si ahcun, hnatuan thuhla le cawmawk nak ding sumpai tawlrel dan ( career and occupation budget management ) hi rel hmaisak bik ding a si ih, cui hnu-ah fate thuhla rel tengteng ding  ti thei aw. Hite pathum hnu ahcun duhdan le ruahdan dangdang tla um thei hman sehla, a rem thei thluh ti a si.
                       
 
 
A tlangpi in mino si lai ih manhlap tuk pawl hrang ahcun duhdawtnak hi a famkim thei lo. Arei hlan ah harnak a tawng cing. Curuangah Tuluk pawl cun, nikhat  nawmnak ding ah zu in aw, thla hnih khat sung nawm nak dingah nupi nei aw,…” tiah thufim an nei. Duhdawtnak lamzin tha bik hril thiam hnu-ah lawng, fate duhdawtnak le thil dang dang a famkim thei. (..peh lai ding.. )
                        – BiakChawn
 
 
 
Riahsiatpinak
 
LCF Nubu hotu Nu Lawng ih a naupa Pa Hlawn Kip Thuan ( Thuathuan) in March 24 ah Mawtaw Accident nak in Falam ah in thihsan. Malaysia um Zumtu unau pawl khal in March 25 ah khawhar a tuartu Nu Lawng tei hnemnak thlacamnak cu Quater ah neih a si.Hmuntn ih um a tanta mi a fa le a sungkhat pawl hrangah thlacamnak thawn bawm cio uhsi.          
 
Thufim
Na zan mang cun thil pakhat tuah ding in thazang na neihzia a lo sim a si. – Helen Schucman ( 1909 – 1981 )
 
 
 
A suahtu           LCF, Malaysia
 
Editors                     Biak Chawn
                               Kawl Lian
                                                      
Sumkil                     Mang Hlei Sang
Zemdarhtu               Obet Cungte
                               Salai Liante
                                                                              
Calai kawmiti          
                               Johnson Liante
                               Kawl Lian
                               Mang Hlei Sang
                               Biak Chawn
                               Obed Cungte
 
Advisor                    Rev. Run Cung Mang
                               Pa Tha Nei Thuam

Comments

comments

Comments

%d bloggers like this: