Hruaitu Issue 176

Hruaitu
Zarhtin Thuthang
vei – 176
March 23, 2008
Zohfeltui’ Awkam
Good Friday a liam ih, Easter sunday cu Bawipa thawhsal nak ni theih ringring nak dingah dungthluntu san ihsin tu ni tiang hman a si. Krih ih thawhsalnak hi Krihfa hmuahhmuah hrang ahcun a sunglawi bik kan ti thei ding. Asinan, Krih thawhsalnak theitu le hmutu Rome ralkap pawl cun an thilhmuh le theih mi pawl cu phuang lo ding in puithiam hnen ihsin tangka an la ti kan hngilh lo pei.Tangka, sumsaw le lennak hmuahhmuah hi Krih ih thawhsalnak nun neitu kan sinak in ttemttawn tu an si thei. Malaysia harnak le Laimi kan nundan ah Krih ih thawhsalnak nun nei duh cing ih biak inn thleng thei lo ziangzat kan um lai ding? Zarhtin sunday-ah biak inn kan fehnak san tla hi bawipa¡¦i thawhsalnak ruangah a si ih, cucu a ratsalnak ni a thlen hlan lo cu kan bansan thei lo.
Kawhhran hmaisa bik Jerusalem kawhhran kha, Bawipa a thosal ti an thei fiang ih, an theihfiang tuk ruangah zarhkhat vei khat maw vei hnih hrawng tawng aw mai lo in, an thil neih hmuahhmuah tawm aw in, hmunkhat ah an um. Kan ni san ahcun cang thei nawn lo hman sehla lungrual zet in Pathian hna tuantlang uh si. Ziang tikah so pakhat le pakhat rualpi tha bik vek le unau vekin kan zoh aw thei ding? Krih ih thawhsalnak cu Amai hrang ih nung ding hrang ahcun thawhsalnak tlamtling a si.
  Zan Mang Tal Ah Aw
      – Jasmine Certe
  Na thei zo maw? Mi in – in sim,
  Duh mi a nei zo in ti,
  Asinan mit thlam ah na hmui hmel pangpar mawi,
  Rimhnui te voi khat te hnam thei nak i pek sal aw,
 
  Nang ngai ah ka tap theu ka mit thli,
  Run ti bang a luang ee,
  Nitin ka lo hlam,
  Keimah te lawng tthing riang mang.
  Kan tiam colh ni a thlen tik,
  Ziangtin so lunglen ka tuar ding,
  Ziang ti tha nuam tak in maw;
  Duhnak te zan mang tal ah maw.
 
 Nehtu
    -by: Van member
 Ral ram ih ral nehtu RalBawi:
 Boxing, Wrestling ih Champion:
 Bawlung sit, Bawhlng beng
 Khir le dawp, pet le tlan
 Zuam awk nak pawl ih nehtu
  Uktu Bawi, Lal tohkham
  Cuh awk nak ih nehtu
 
 Thazaang, hriamhrei, thilri thawn…
 Ruahnak thluak, fimnak tongkam thawn…
  Hmin that nak laksawng
  Taikhap, Lukhum, hngawng orh,
  Lemzuk, hnipuan, Ngun Sui
  Hlawnthil mankhung Sumpai
  Capi, cate hminsinnak COTUPAWL
 
 An co mi nehnak a hmun lo.
 ni khat khat ah an sungsal thei.
 Nehtu an mah rori tla an thi thei.
 Mi hmuahhmuah ih an neh thei lo mi
 Thih nak Nehtu Jesuh a si
 A sung sal nawn lo, Kum khua in a neh lan ta.
 Nehtu Jesuh ih Neh nak sunglawi cotu
 Nehtu ih nehtu sin kan si.   
 
Mopuai Sawmnak
Salai Lal Ro Lian le Mai Ni Hlei Kim tei¡¦ in Marh 30, 2008 ah Bawipa biakinn thianghlim sungah a thianghlim mi thit-umnak tuah ding an si ruangah zumtu unau kan zaten sunlawinak pek in telpi cio dingah kan lo sawm.
 
LEITLUN  THUTHANG
 
Indonesia-ah farah pawl san-dah an piah : Indonesia ramah farah hrangah ei ding tha a har tuk ruangah kan dung zarh ah nupi-nu mi 500 hrawng san-dah an piah. Jakarta khawpi lamzin ihsin presidential inn tiang lamzin ah ¡§Allahu Akbar¡¨ tiah an au.An hruaitu Muhammad Ismail Yusanto cun ¡§rawl eiding nei lo in mi tampi an thi. Kum 60 independent ram kan si zo ih, saih-piu-zi ram ( agriculture nation ) kan si fawn, hivek thil a cang hi mangbangza a si¡¨ tiah a ti. Hi mi umtertu bik cu, kan dung thla-ah Magetan district,Java-ah tlawngta nauhak cun eiding hartuk ruangah hri-in a khai that aw¡¦ ti a si. Detik.co ( internet website ) cun tuthla-ah eiding neih loh ruangah naupai pakhat cu a fa 3 thawn an thi¡¦ tiah a ngan bet.
 
Thailand ramah bomb a puak thawk : Pattani hotel ah 5 kg ih rit bomb pakhat cu muslim misual pawl in an puahsal ruangah mi 2 an thi ih 14 in hliam nazet an tuar. Adang pakhat cu palik in an kham man. Cui hnu-ah Pattani tlawng pakhat an bom sal ih, mi-tat ( fire fighter ) 1 a thi cih. Natnak tuartu pawl cu sizung an phurnak lamzin-ah misual pawl in an rak bawhsal. Thailand ah hin province 3 ah muslim an um ih, cui province sung ih buainak ruangah kum 2004 ihsin milai 2,900 lai an thihphah zo.
 
Lady Diana ih zunghruk ah a thisen a umlai : Kan dung tlawngkai nikhat-ah Diana thuhla tawlreltu thuthennak inn ( court ) cun Diana ih zunghruk thar ( engagement ring: Dodi thawn an ham-awknak ih zum ) an hawlsuak. Diana umpi ih zohkiltu ( butler) Paul Barrel cun August, 1997 ih Paris khawpi lamzin ih Diana te accident hnu-ah, a zunghruk cu sizung ih a ruak an retnak ihsin a la tiah a phuang. Thisen a um lai ih, DNA tla nan zoh thei tiah a ti. Diana ih tlangval Dodi al-Fayed ih pa Muhammad cun Diana le a fapa thihnak cu Prince Phillip ( queen elizabeth ih pasal ) in British security force pawl a fial ih, a thah ter tiah a puhmawh ve.
 
South Korea in Refugee hrangah zuam : South Korea cozah cun a ramsung ah North Korea pawl refugee ih an um theinak dingah a rang thei bik ih tawlrel a tum. North Korea hin a liamzo kum 5 ihsin ei le in lamah harnak tampi an rak tuar ih, farah an tam deuhdeuh ruangah an ram cu umnak dingah duh nawn lo-in Thailand ram ah an tlan. Thailand ram ihsin South Korea cozah bawmnak an dil a si.
 
Vietnam ramah ritnak sii ruangah thi dingin thu thensak : Vietnam ram ih suak, Australia ram sinak nei zo Jamine Loung, 34 cu airport-ah a bag sungah herroin 1.4 kg an kaihsak ruangah thi dingin thu thensak a si. Indonesia palik pawl khal in tuluk ram ihsin a ra lut mi ¡¥crystal methamphetamine ( shabu-shabu ) 600 kg an kai ngah ih, a phurtu Chang Chung Wei le a driver an kai.
Nauhak thattu damsung thawngthlak : Japan ram ah Suzuka Hatakeyama, 35 cun a fanu cu tiva-ah a hlawn ih, a thi. A fanu ih rualpi, mipa nauhak tla a dir that. Thuthennak cun a damsung thawng tla ding in thu a thensak. Suzuka hin thawng a thlak hlan ah a thah tak nauhak nu le pa hnenah ngaidam a dil.
Thailand ah Gay thuhla ruahdan thleng : Thailand ram ih Gay ( mipa le mipa ngai aw ) pawl cu, an ram ralkap pawl cun ¡¥thinlung buai¡¦ ti nawn lo-in, mi hnu-fual deuh ( third category ) in a ruat thlang ding ruangah an parah zianghman a tuah nawn lo ding tiah an ti.
Philippine ramah khawsik natnak a tam : Philippine palace ( President inn ) kiang ih university ah bomb a puak ih,tampi in hliam hma an tuar. Security pawl cun mi tampi thusut dingin an kai.Culai ah an khawpi Manila ahcun tu thla sungah mi 150 hrawng cu khawsikpi natnak ruangah sizung an lut. Tui kum sungah a vvei 2 nak a si.
 
Tuluk cozah parah lungawi lo nak tam : Tuluk cozah cun World Olympiv Games hrangah a timtuah rero nan, ramsungah harnak a phunphun a tuar ih, nikhua siatnak, thilri man khungnak, le tulai ih Tibetan pawlin an umnak ram ¡¥independent¡¦ an duhnak pawl an si. Milai 100 lai thihnak a thleng zo ih, tuluk ralkap lam cun tibet mipi san-dah-piah ( demonstration ) daih ternak dingah meithal an hmang ih, nitin thihnak a thleng. India ram lamah khal hi buainak hi a ra thleng ve. India cozah cun Tuluk cozah in meithal si lo-in kaihkhihnak lam thawn buainak hi tawlrel sehla tiah a ti.German ram ahcun Olympic ih telding pawl a tamsawn cun ¡¥Beijing Olympic¡¦ hi tuahsal lo ( boycott ) dingin an duh tiah International Olympic Committee vice president ¡¥Thomas Bach¡¦ cun a ti
 
Singapore misual hotu an kai hrih lo : Kan dung ih thawng inn ihsin tlansuak, singapore vanzam siatsuah tum ruang ih an kaih, Islam biaknak lam ih fehsual ¡¥Jemaah Islamiah¡¦ hotu ¡¥Mas Selamat Kastari¡¦ cun an ram Singapore a suahsan lo ih, hmunkipah relh phah in ramdang a tlansuah hlanah thildang tuah a tum ding tiah amah hawltu pawl hruaitu Wong Hong Kuan cun a ti.
 
US ralkap in Al-Qaeda ralkap 9 an that : Kan dung zarhpi ni-ah US raldonak vanzam cun Pakistan ram sung ih ¡¥Wana, Shahnawaz Kheil Dhoog-ah, Al-Qaeda le Taliban pawl umnak ( anbeunak ) cu bomb-in vei 4 a kap ih al-qaeda 9 an thi ih, 9 cu na zetin hliam an tuar tiah intelligence official cun Reuters news agency an sim.
 
Tipi hnuai ah German raldo lawng an hmusuak : Leitlun ralpi pahnih nak cem zik hrawng ih German pawl raldo-nak lawng ¡¥Kormoran¡¦ cu Australia tipikap ¡¥Shark Bay¡¦ thlanglam tipi hnuaiah an hmusuak.
 
      India ramah thisen zuartu pawl an runsuak : Kan dung tlawngkai ni hnih-ah, Gorakhpur, Uttar Pradesh ah thisen an zuarsak milai 17 cu palik pawl in an runsuak. Hitawk ramah hin sizung in thisen an hai tuk theu ruangah misual hrekkhat pawl cun mi farah pawl cu hnatuan ding thazet pe dingin an ko ih, an thisen an test sak hnu-ah, hmun pakhat-ah an ret khawm ih, an thisen cu zuar ding in an laksak theu. Hiti vek ih thisen an laksak pawl hin thazang an nei mal deuhdeuh ruangah a lung a mit thluh ih, an suak thei nawn lo. An thisen zuar ruangah anmah kaitu pawl cun thlakhatah  1500 rupees ( RM 117 ) an pe. Thisen Unit khat ( 750 ml hrawng ) cu sizungah 4000 rupees ( RM 312 ) in an zuar theu ih, milai pakhat ihsin thlakhatah 30,000 rupees ( RM 2,300 ) an ngah theu.
Hongkong ah Nunau tha lo thah hmang an kai : Hongkong hi leitlun khawpi him bik ( the world¡¦s safest major cities ) pakhat a rak si theu vekin tual thah nak, nunau sualpi nak le thil dangdang tla a mal. Asinan kan dung zarhah Pakistan tlangval ruangah nunau an tlungtlai ngamlo. Nunau thalo pali a rak thatzo tu le cui a thahmi pawl thiltha lawngsak vivo tu cu kan dung tlawngkai ni hnih-ah Tuluk ram Macau ah an kai ngah ih, Maccau ihsin Hongkong-ah an kuatsal.
 
Kawlram le Thailand sumdawngnak lamzin thar : Thailand prime minister Samak Sundaravej cun kan dung zarh-ah Kawlram a tlawng ih, sumdawngnak ding thu a relpi. General Than Shwe thawn tawngaw-in, politics lam zianghman a relpi lo. Samak cun, ¡§Kawlram cun gas tampi a nei nan, pipeline tuahding in tangka a nei lo ih, cucu kan tuahsak ding¡¨ a ti. ¡§Kawlram hi Eroup ram le US lam in an rel se tuk nan, an hruaitu pawl cu thla an cam ringring¡¨ tiah a ti bet. Thailand hi Kawlram ihsin energy lam cotu le leitu bik a si ih, kum tin US $ 2,00,000,000 ( RM 64,00,000,000 ) man a leisak theu.
Malay UN appointment hrang hmin pek a theih zo 
Tuini 18.3.08 ih sin UN card ngah cia pawl sungkhat ben ding CRC,ACR ah UN appointment hrang hmin pek a theih zo.Kan dung tlawngkai ni hnih 11.3.08 ni kha UN zung hmaiah appointment la ding mi an tamtuk ruangah appointment pe loin UN pawlin cozah palik koin mipi an dawi tlan thluh mi asi.UN pawl ruah dan ah cun hiti ih lai mi 2000 leng lo nan pok ciamconak hi UN sandah nan piah tin kan ruat  ti a si.
  Hi thu thawn peh aw in CRC,ACR le laimi communitiy hotu pawl cu 13.3.08 ah UN zungah kawh an si.UN zung tuanvo neitu pawlin an lungawi lonak thu an sim.Laimi hotu pawl khalin a sia lam a si lo thu le appointment la ding mi an si thu simfiangnak an nei.An ton khawm awknak ihsin UN zungih appointment lak tul loin CRC le ACR zungah hmin cazin pein appointment tuah
dingah tuanvo an pek mi  asi.
 Mipi tampi an pok ni hi Malaysia Siangpahrang a khawsung feh ding zindan pi thawn an tong aw ngelcel ti a si .UN zung hmai ihsin a thlanglam lilawnpi tiang mipi an khat thluh ih  Siangpahrang pai lamzin feh ding zinlai ah minte 5 hrawng an kham ngah ti a si.Curuangah UN tuanvo neitu pawlin kan zung hi Malay cozah sawisel kan tong dingih ramdang UNHCR zung umnak ih kan ton zo vekin kan tong pang ding ti kan phang tuk ti a si.
 
Hini ih an sim bet mi cu lai mi pawl  ni kum hnak in tui kum ah USA ih reject mi a let thum in na tam .Ziangruangah tilen  appointment nan neih tik ah nan case nan ral ring loih awl sam tukin intervew nan lut ti a si..Kan dung January thla thawk ihsin OPE lan cia mi pawl case 250 hrawng US in an reject ti a si.Tuah an feh duhnak ram hril sal dingin  an ko sal rero thlang ti a si.
           N.B. Hrang
Mual In Liamsan
 Pa San Piang Kum  47 cun Letpan Chawng ah rinlopi in dam lonak ruangah 17 March, 2008 ah in thih san. Malaysia ah kum 2003 kiangkap ah a rak um mi a si. Malaysia um hlun pawl cun an thei ih  an lainat ui ngaingai. LCF kawhhran Upa Pa Mang Tin Sawn ih u a si. Malaysia  a um sungah Wire (Putra jaya ) le hanghna hangrah cin nak Cameron Higland lam ah hna a rak tuan dah.
 A tanta mi a nau Pa Mang Tin Sawn cu LCF quater ah zumtu unau pawl in khawhar tohpinak le thlacam khawmnak neih a si. Kan Pastor Rev. Run Cung Mang in thazang peknak in Thuthangtha a sim. A tanta mi a nupi fanau hrangah thlacamnak thawn bawm uhsi.
  
Chin Miphun Hrangah FRO
Kan Falam mi hi Laimi thuanthu ah Laimi zate hrangah hnatuantu bik le miphun hruaitu kan rak si ringring. Tuini khal ah kan miphun ih auaw thei in FRO (Falam Refugee Organization ) in nasazet in hnatuan a tuan. UNHCR lam ah hrasatnak na nei a sile rak pan mai aw. Lo bawm dingah Na hrang man cia in a um ringring. Phone – 017 2335 859
 
Malaysia Ram Sung hril awknak Thutawi
  Malaysia ram hi 1957  Independent an ngah  ihsin tui ni tiang  BN- (Barisan Nasional) Party pawl in cozahnak an kai ringring, an Parliament hi MP 222 an um.  Tuitum cu Selangor State, Perak State, Penang State, Kelentan State, Federal Territories le Kedah State timi pawl hmuahhmuah hi dodaltu (Opposition)   in nehnak an co. Anwar Ibrahim ( Former Deputy Prime Minister, Mahathir PM a si lai ih  Deputy a si ) ih a nupi le a fanu an pahnih in MP  an tling.
 
Sabah le Sarawak ih sin Khrifa a si mi Minister le Deputy minister level ah 5 an kai ve. Tuluk pawl tam zet cabinet ah an kai ve. Foreign Minister ah a kai thar tu Dr. Rais Yatim ti mi pa hi Doctor of Law Degree ( Ph. D ) a ngah zo mi a si. ASEAN ah mi hmin thang pakhat a si. Penang ih Chief Minister cu Lim Kuan Eng a si ih Tuluk mi a si. Thuneihnak cotu cun an ram thuahthat an duh nasa ti an tongkam ah a lang fiang zet.
 
Malaysia ram cu State 13 le Federal Territory 2 a um. An zaten State ah hin Sultan timi Siangpahrang an nei theh nawn hai ih cumi Sultan pawl kha Malay Rulers tiah kawh an si. An mah Sultan 9 sung ih sin pakhat hi Ram Siangpahrang ( King ) ah kum 5 veikhat an kai.
2008 Hril awknak ih an hril Prime Minister cu Abdullah Badawi a si ih Deputy Prime Minister cu Najib Tun Razak a si. Cabinet ah ministers 32 an um ih deputy ministers 37 an um an zaten 69 an si. PM in sundawn leilawnnak lam a kai ih, Deputy MP in Kilhim awknak lam tuanvo a lak. Cabinet post ah tling tuk ding ih zum mi ah mi 5 cu Cabinet line-up ah an tel lo. Hmailam ah BN pawl hnatuan dan ziangvek a rak cang ding ti kan thei ban lo. Tuikum ih an hril awknak result zoh in nehhnu hril awknak cu hmuh nuam le Democracy diktak vekin a si vivo ding a bang.
 
THEIHKAUH NAK  LE  RUAH DING  TAM
  ( compiled by – BiakChawn )
1. Philippine sak lam ih tikulh pakhat ( microesia- Asia fate sung ) ¡¥Palau¡¦ ih an hmuh milai 25 hranwg ih ruh ro cu, Johannesburge University ( South Africa ) ih mithiam pawl in tipi kap puk ( cave ) pahnih ah an hmusuak ih, an ramah an  zir fiang hnu-ah milai ci ( homo sapien ) an si nan, an umnak ah ramsa ( mamals: pawhte ti nei ramsa ) an um lo ruangah le tipi kap hramhnah le rannung fate ( near-shore marine organism ) lawng an ei ruangah an taksa ( body ) a fate tiah an ti. Palau ih milai ruhro cu an vawn remkhawm ih, a niam bik 1.1 meter le a sang bik 1.4 meters an si. An ruh umdan hmuhhmuah le an thluak bawm khal tulai san milai ta vek cekci a si. Kan dungzarh ih kan ngan ¡¥Hobbit¡¦ pawl ( science name: homo sapien ) kha an thluak bawm a fate tuk ti a si.
 
2. Leitlun ih electricity hmuahhmuah tuahnak 79% cu fossil fuel ( zinaan le lungmeihawl ) pawl ihsin ngah mi a si ih, 18% cu Natural source ( thli, tidai le ni-sa ) ihsin tuah mi an si. 32.8% cu nuclear power ihsin tuah an si ih, 0.2% cu bio-fuel ( thinghnah le thingrah ) ihsin tuah an si. Kum 2007 sungah USA ram cun an ram ih hmanding electricy 28% cu Thli ihsin an ngah ih, cucu 100 gigawatts hrawng a si. Nuclear power ihsin 360-370 gigawatts an tuah. Kumtin electric power an tul zat cu 1% in a thangso. German ram cun kum 2020 ahcun Ni-sa ( solar ) ihsin energy tuahnak cun an tul mi 20% lai a pe ding tiah an ti.
 
3. Asia ram ih pawpi ( tiger ) tamnak bik Vietnam le India ram ahcun kumtin pawipi le tlavaang ( leopard ) 250-350 thah an si ih, pawpi vun le ha ( skin and tooth ) kai tam bik cu India ram a si. Pawipi vun le ruh hi Tuluk ramah an phur tam bik ih, thuamhnaw ( cultural dress ) le Sii ( medicine ) hrangah an hmang. 4. Tuluk khawpi Beijing ahcun lamzin kap ih mipi hman thei ek inn ( public toilet ) 5,200 hrawng a um ih, Malaysia cun kum 2020 ahcun Kuala Lumpur sung lamzin kap ah ¡¥tandas awam¡¦ ( ekinn ) 500 neih a tum.
 
5. Pope Benedict XVI cun Vatican ih science university feh a tum ih, tlawng hotu pawl in an siang lo. Hihi khuahlan laiah ¡¥Telescope¡¦ hmusuak tu ¡¥Galileo¡¦ cun leilung hi a hlum ( the earth is round ) ti a rak hmuhsuah mi cu a sanlai ih Pope-in a pawmpi lo ruangah a si. Pope cun Science lam thuhla-ah zianghman tuah ding a nei lo tiah an ti.
 
6. Minung 70,000,000 umnak Iran ram hi leitlun ah mawtaw accident ruang ih thih tam nak bik a si. Kum 2002 ihsin 2007 sungah milai 100,000 hrawng cu mawtaw accident ruangah an thi.
 
7. Rupert Murdoch¡¦s News International in London khawpi kiang Broxbourne, Hertfordshire ih news papaer industries ( printing press ) a tuah mi cu leitlun ih tum bik a si ih, a tuahnak ah British tangka ( sterling pound ) 6,50,000,000 ( RM 41,00,000,000 ) an cem.
 
8. Saudi Arabia ram ahcun nauhak lai ihsin nei-awk ( tthit-awk ) hi an uar zet. Neta bik ih nei-aw (March, 2008 ) hi leitlun ih nupi-pasal nei awk ahcun nauhak bik an si ding. Mohammad al-Rashidi, kum 11 cun a causin ( ta-wan-kuai unau ) nunau kum 10 cu damsung ih a nupi dingah a thit. Rashidi hi primary tlawngta lawng a si lai nan, a rualpi le hnenah nupi nei ve lohli ding in a forh bet. Biaknak lam ih an hruaitu le tlawng ih headmaster cun, ¡§Hi tthitawk nak puai hi thil tha bik cu a silo nan, an nupa an damsung umtlang thei hram seh¡¨ tiah thlawsuah a pe.
 
9. USA in March ni 20, 2003 ( tlawngkai ni li ) ihsin Iraq ram a do nak ihsin tu ni tiang Iraq mipi 90,000 hrawng an thi ih, Saddam ih ralkap 70,000 hrawng le US ralkap 5000 hnak ih tam an thi. Kum 2007 sungah mipi ( civilians ) 16,667 le US ralkap 901 an thi. 2007  January thla ah US ralkap 13700 cu Iraq ramah an um ih, tuikum  January thla ahcun 158,000 an um. Kum 2001 ah US in Afghanistan a do nak ah US ralkap 4,415 an thi.
 
10. Leitlun nih Jet engine vanzam tumbik A380 cu ni March ni 18, 2008 thlawngkai nihnih ihsin Singapore Changi airport ihsin London lamah a zam thawk ih, nazi 13 le hrek sungah a thleng. Hi vanzam hin khualtlawng ( passenger ) 449 a phur thei ih, a sungah leknak tla a um. To-nak ( seat ) cu  pakhat le pakhat dipdal lo ding in tuah a si ih, in sawng 7 ( 7 storeys ) tluk ih sang a si. A280 that nak dang cu jet vanzam dang hnak in 17% rori vanzam dat-si ( gasoline ) a hmang mal sawn. 
 
 
MIFIM PAWL  TONGKAM  LE  THUFIM
1. Hlanlai ahcun, ¡§mi harsa na bawm len a nawm can ah a lo hngilh lo ding¡¨ ti a si theu nan, tulai san thar ahcun, ¡§mi harsa na bawm len nidang ah tla na bawm sal a beisei ding¡¨ ti a si. – W. Hills
2. Pathian in leitlun ah milai duhdawt ding pakhat lawng um vek in mitin hi in duhdawt. – St. Augustine
3. Thil ka tuah ding le tuah lo ding thu hmuahhmuah ah Pathian in intheih fiangter theu ti ka hmusuak aw. – Abraham Lincoln
4. Tong tam hnak in tuan tam hi a tha sawn. – English proverb
 
Thlarau lawng in Jesuh cu Bawi a si an ti thei ding
-Pa Mang Tin Sawn
 Korin – 12: 3
 Thukam hlun sung kan zoh tikah Pathian in a fa Israel mi pawl cu Nelrawn ram car ah mangbangza a phunphun thawn a hruai rero nan an thei thei cuang lo. Harsatnak lakin a bawm, a humhin rero nan an zum thei cuang lo. A cancan ah a hrem nan an rim cuang lo. A ngaithiam rero nan an tha thei cuang lo. Minung hlun cun thlarau a si mi kan Pathian cu a theithiam hrimhrim lo.
Cutin minung in kan theih thei lo ruangah ¡§Thukam thar¡¨ a tuah ih thinglamtah ah a mah theithei lo tu kan nunhlun cu a thah in a that lawlaw.  ( Rom 6:6)Cuticun a mai felnak le dingh nak pawl tla in pe men lo in kan sungah a thlarau cu a ret in a ret. Kan mai tuah tuan mi tel riai lo in nan fel, nan tha in ti.
Kan unauza in tuizingah kan nunnak hi kan check awk dingah tawiten kan rel ding. Kan biak mi hi thlarau a si ruangah minung hlun mizia ih biak cu a ngah lo lawlaw ti hi ka rel duh san bik cu a si. Curuangah thlarau le thutak in biak dingah in fial. Jn 4: 24 . Cuti ih kan sim tikah mi tampi cun el duhnak a suak thei. Thlarau ih theihternak um riai lo in a biak theih, a tuan theih. Cucu minung hlun lungput ih biak le tuan dan a si. Paul cun Pathian uknak cu tongkam men a si lo, huham cahnak a rak si ti a hmu, a rak tawng fiang tuk zo..( 1 Korin 4: 20 )
Dungthluntu pawl khal thlarau thianghlim pek an si hlan ahcun an beidong theu, mual an pho ringring. An thla  phang. Jesuh hnenah sun le zan in kum 3 ( thum ) sung an um nanthlarau an neih lo ruangah Jesuh hrangih thil tha an tuah mi pawl cu thuphan 1hlolak ah a cang thluh. Minung in man nei zet ih kan ruah mi hi Pathian mithmun ah zianghman a si lo. (Luke 16 : 15)
Thlarau hnatuan nak hi el theih lo ih a um mi a si rori nan, sim fiang a har ngaingai. Kan taksa sung ih natnak kan neih mi khi sim fiang harzet a um theu. Asinan a tuartu a teptu cun a rel fiang thei lo khal le a thei fel tuk thotho. Kan nunnak in kan sung ih hna a tuan tui tuan dan cu kan thei cio ko ding.
Leitlun ah kumkhua nunnak nei hrih lo ih hnangamzet ih um pawl hi miraltha bik an si. Kan rel zo vekin kan sungih hna a tuantu thlarau cu zo ih thlarau deuh a si ti hi kan ruahthat ngaingai a tul. Anetabik ah Thlarau thawn Pathian ka bia kan ti fingfing ko ding nan, kan tongkam suak ah  Thlarau ih pitling zo pawl cun in theithiam thotho. Tlunlam ih a rami fimnak  or Thlarau cu  ziang dang hnakin a thianghlim. ( Jem 3: 17)
 Cui Thlarau thianghlim cun hi ca a siartu hnenah a thar in theihternak in pe harmseh.
 
JACI VELASQUEZ
Tuitumah khal Pathian in zaihla/awnmawi lamih leitlun huapih a mi hmanmi,  hmeltha le zei, Pathian tihzah zet le a theinak kilkipih Amai ropit nakih tuah le tuan a huam ringringtu, a tul dandan le a tul nak hmunhmunih a thuthangtha khal phuang vuahvo ngamtu thuhla kan hlawmaw peh vivo ke. Nunau, hmeltha hlasak thiam lam  lawnglawng a duhsak tuk tla in rak ti siang hramhlah uh. Thil cu a haha ten a ra vivo lai ko ding.
 
Christian music ih a luh nak hi kum 18 lai a rei ve zo. Tuini tiangin Pathian hlasakih rawngbawl hna a tuan rero tu khal asi. Ram tam zetah tlawngin Christian tour tuah vivo in Pathian duhdawt nak thuthangtha cu phuangin A rawngbawl nak a nei thei.
Tleirawlte asi lai, 01.04.1996 ih a suahmi , “Heavenly Place” album in platinum selling album tiang a hun vawrh thleng ! Himi album sungih hla arak ngaitu leitlun hmunkipih um zumtu mino tam zet hnenin le an nu le pa pawl hnenin tla cakuat tam zet a dawng. Hla 10 um nak album asiih a zaten a tha thluh. A hleice in himi sungihsi mipi ih an duh bikmi hla  cu “On My Knees”  le “A Heavenly Place”timi hla asi.Keikhal himi album a suah pekte ah karak neiin karak ngai ve dah. Ka ngai ning thei lo. Humham a nei zetih a tha tuk tibak lo cu rel ding ka thei lo.Mino pawlih ngai tengteng ding album asi tin ka ruat. Cumi hnu  a tisuah mi “Unspoken”album khal ka neiih ka ngai. Himi khal hi tha zet asi.
 
 Tleirawl lai canih mino tam sawnin an sunmang an neih theu vek rak neive dahtu asiih a cui a sunmang cu Pathian a tihzah nak le a rawngbawl duh nak thinlung ruangah Pathian in a khaisang vivo ih Christian hlasak tu lakah a thiam bik le lar bik sinak tiangih a hun co bantu pakhat asi fawn.
 A pa hi hmun khat hnu hmunkhatih Pathian thusimih a tlawngvak ringring theumi asiih anih khalin a pai dung arak thlun ve theu. Amah khalin Pathian thu a simih asinan,  mipi lamin hlasak dingih an dil theu tikah anih khalin el lemlo in a sak ve theu mai. Cutiih a hlasak vivo nak cun lehhnu lamih  music hmangih Pathian hna atuan nakah a run bawm zet. Pathian in hlasak thiamnak lamah talent tha zet a pek.Christian hlasaktu tam zet lakah hminlar bik pakhat dinhmun a neitu asiih a album khal hi zuar khawng cak bik record a tuah thei riai! Tuini tiangah Pathian hla album pakhat hnu pakhat a tuah rero lai ruangah a hla suah zomi lakihsi a tha bik hril khawm ding timi khal hi thil harsa zet asi hrih lai.
 
A hlasak thiam tuk ruangah American President umnak white house tiangih Pathian hla sakih rawngbawl nak a nei bantu khal asi.
Mirang(English)ih hlasak lawng duh tawk lo in Latin/Spanish tawng khalin album a tuahih a hlawhtling zet. Multi- Gold and platinum selling artist Jaci Velasquez in a hlasak thiam lawmman a dawn mi cu Seven Dove Awards and 16#1 Christian singles asi.
Jaci hi singer, songwriter, author, actress & spokeswoman for major corporations (Pepsi, Doritos, Frizz*Ease, Nickelodeon)tuantu asi. Lawmman a hmuhmi pawl tla cu 7 Dove Awards (Female Vocalist & New Artist of the year)asi. Cuvek thiamthiamin  20 Dove Award nominations, 3 Grammy nods, 5 Billboard Music Award nominations, a Latin Billboard Music Award, a Premio Le Nuestro Award tiangih rak thlengbantu khal asi fawn.Hmeltha, hlasak thiam le zei sina fam cu Mekazin 50 lenglo ah cover ih cuang theitu tla asi betbetih a turu zet.
 
Cun, “Heavenly Place” timi cabu pakhat tla a ngan suak ve. Himi cabu sungah  amah rak ngaisangtu music fan pawl hnenah awnmawi lam thu lawnglawng hnakin thu muril le khungkhai a sim duh mi pawl a ngan tel .March 18,2007 ah “Love Out Loud” timi album thar ati suak. Ruahsannak, harhdam nak le duhdawt nak lam hawi zawngih phuah mi hla pawl a tel. Himi album ah khal  hi hla tha zetzet hlir asi leh cek dingih ngai a cak um zet. Malaysia ram khui tawk hmunih lei theih asi ti a theitu nan um tla le inrak sim thei ve uhla paisa pukcawi cawp khalin ka lei duh ko ding.
 
“Pathian in zaihla mawi thawn Amah biak le thangthat duh zettu asi”
 
Thinglamtah Lamzin 
-by Rev. Run Cung Mang
“Kei ka hrang ahcun kan Bawipa Jesuh Khrih thinglamtah siar lo uar ding dang zianghman ka nei lo. Ziangahtile Khrih thinglamtah ruangah leilung hi ka hrangah khenbet a si zo ih kei khal leilung hrangah khenbet ka si ve.”  ¡V Galati 6:14
 Thuhmaihruai
Paul in, “Kei ka hrangah Khrih thinglamtah siar lo uar ding dang ka nei lo,” a timi hi thu maksak a si. Paul ih nunnak kan zirzoi tikah porh awk tlak le uar ding tlakmi tampi a nei. A miphun, a fimthiamnak le a dingfelnak, tivek pawl. Sihmansehla cumi pawl zate cu zianghman ah a rel loih “Khrih Thinglamtah” thu lawng hi saangbik ah a hlir. A nun sung hmuah thinglamtah thu lawng a tlang aupi ih thinglamtah lamzin zawh in a um.
 Bible ih simmi lamzin tampi sung ihsin “Thinglamtah Lamzin” langfiangtertu dingah lamzin panga pawl ih thuhla tawite ciarin kan zoh duak hnik pei.
Damaskas Lamzin (Tirhthlah 9:22).
Damaskas lamzin hi Paul in piantharnak lamzin a si. A pianthar hlan ih a hmin cu Saul a si. Saul cu Jesuh ih dungthluntu pawl hrem le that dingin an dungin a dawi ih Damaskas khua a thlen zikah hmakhatte ah van ihsin tleunak in a kimvel in a run tlet. Saul cu a tlu ih, “Saul, Saul, ziangahso i hrem?” tiah aw pakhat a thei. Saul in, “Bawipa zoso na si?” tiah a sut. Cuih aw cun , “Na hrem rero mi Jesuh ka si,” a ti. Damaskas lamzin a zawh hlan ahcun Pathian cu a ttan ko nain Jesuh Khrih cu a thei lo. Jesuh thawn an ton awk tik lawngah Saul cu nun thlengh awknak, piantharnak taktak a ngah ih a hmin khal Paul ah a cang. Khrih hrangah nunnak hmuahhmuah pum aptu ah a cang. Jesuh cu Pathian fa a si ti thu a sim. Pathian in Gentile mi lakih thuthangttha simtu dingah a hril ih nasatak in a hmang. Nang teh Jesuh thawn nan tong aw taktak zo maw?  Damaskas lamzin na zawh ve zo maw?
 Emmause Lamzin (Luke 24:13-35)
 Emmause lamzin hi Jesuh dungthluntu mi pahnih ih piantharnak tharthawh saalnak lamzin a si. Cleopas le a rualpa cu Jerusalem ihsin nitlaknaklam ih a ummi Emmause khualam pan ih an fehlai ah an hnenah Bawipa Jesuh a phuanglang aw. Himi te rualtu hin Jesuh hi an hmu dah ko nain an hnenih a feh vetu pa cu zo a si ti an thei lo, mangbangza cu a si. Ziangahtile an theihmi Jesuh cu thinglamtah ah thah a si zo ruangah a si ih an mawh lo. Sihmansehla, Pathian ih Thlarau Thianghlim in an thlarau mit a vaanter tik ahcun Jesuh ti an theithiam saal, zumtu dungtolh an sinak ihsin an tharthawh saal ih cumi hnu ahcun raalthazet in Jerusalem ah kirsaal tahrat in Jesuh thu an sim ngam. Zumtu nang le kei teh Emmause lamzin kan zawh ngah zo maw? Jesuh ih thuhla nganmi Bible kan siar tikah Thlarau Thianghlim ih theihternak taktak kan co zo maw? Kan dungtolhnak ihsin teh A hnen kan pan saal maw?
Gaza Lamzin (Tirhthlah 8:26-40)
Gaza lamzin hi Ethiopia mipa ih piantharnak lamzin asilole dungthluntu Filip ih thuthangtha phuannak le thlarau hlo kaihnak lamzin a si. Ethiopia mipa in Jerusalem ah Pathian bia dingin a ra ih a kirsaaltu a si. A rangleeng parah to in profet Isaiah cabu a siar rero. Asinan a siarmi Bible ih tiduhsannak cu a thei fiang lo. Cutikah Thlarau Thianghlim ih Filip cu a thlah ih Bible ih sim duhmi thutak cu a simfiang. Cutikah Ethiopia mipa cun, Jesuh Khrih cu Pathian Fa a si ti’n ka zum a ti ih piantharnak a nei ih cuih hmun ah tihnimnak (baptism) a co cih. Kannih teh Bible kan siarmi theifiang in piantharnak kan co maw? Cuhnak ih saangdeuh midang pawl Cathianghlim ih tiduhsan a sullam simfiang thei in an pianthar theinak dingah bawmtu kan si zo maw? Filip bangin Gaza lamzin kan zawh zo maw?
Jericho Lamzin (Luke 10:25-42)
Jericho lamzin cu Samaria mittha  
pa ih duhnungza thuanthu mawi sersiamnak lamzin a si. Himi thuanthu hi Jesuh ih tahtthimnak (parable) a simmi a si ih Khrihfa mi hmuahhmuah ih kan tuah dingmi Khristian Nun mawi hmuhsaknak a si. Jericho lamzin ah mi pakhat cu damiah ttaih a tong, a thilri an lon ttheh in an tuahmawh bet, lamzin ah rethei zonzai in a um. Culai ah Puithiam pakhat le Levi mi pakhat in an hmu nain an bawm in an tuamhlawm taa lo. Asinan Samaria mipa cun zaangfahnak thinlung thawn a cang thei tawk in a tuamhlawm. Jesuh in Daan zirhtu saya hnen ahcun, “Feh awla cubangtuk in va tuah ve aw” tiah a ti. Duhdawtmi zumtu, tuni na nunnak ah innhnen ttha na si maw? Midang pawl harsat an ton caan ah bawmtu le hneemtu na si maw? Samaria mi tthapa vekin Jericho lamzin na thlun ve zo maw?
 
Thinglamtah Lamzin (John 19:16-30)
 Thinglamtah Lamzin cu kan Bawipa Jesuh Khrih ih zawhmi lamzin a si. Misual nangmah le keimah ruundam dingah sual nei lo le sual thei lo Jesuh in sualman thihnak timi daantatnak tuar in thinglamtah phur ih retheih zonzaih le zomtaih hmuhsuam a tonnak lamzin a si. Hih thinglamtah thihnak um lo sehla nang le kei hrangah kumkhua nunnak lamzin a um thei lo. Sual ngaidamnak a um thei lo dingih rundamnak timi khal a um thei lo ding. Curuangah Paul in kan Bawipa Jesuh Khrih ih thinglamtahnak siar lo uar ding dang ka nei lo a tisannak a si. Nang le kei teh Jesuh in, “Zokhal ka dungthluntu si a duh ahcun amah duhnak el aw sehla, nitin amai’ thinglamtah phur in ka dung i thlun seh,” (Luke 14:26-27) a timi ziangti’n na cosaang? Jesuh in na hrangah thinglamtah a phur, nangteh a hrangah na phur ve lo ding maw?
Thunetnak
Paul in, “Thinglamtah parih Khrih thihnak thu hi a hloral cuahcomi pawl hrang ahcun aat-hna meen a si; sikhalsehla rundamlai reromi kannih hrang ahcun Pathian ih thiltitheinak le cahnak hmual a si,” (I Kor. 1:18) a ti. Duhdawtmi unau, na nunnak ttha te’n cekfel hnik aw. Damaskas lamzin zawh in na piangthar zo maw? Emmaus lamzin thlun in Thlarau Thianghlim ih lamhruaimi  na si zo maw? Gaza lamzin zawh in midang hnenah rundamnak thuthangttha simfiangtu na si zo maw? Jericho lamzin thlun in mirethei zonzai pawl hneemtu, bawmtu le tuamhlawmtu na si zo maw? Cule Calvary asilole Thinglamtah lamzin na zawh zo maw? Nitinte mai’ tisa duhnak taanta in Khrih le kawhhran hrangah, zumtu le zumlotu midang pawl hrangah pumpeek in thinglamtah phur in Jesuh dungthlluntu na si zo maw?
Hla phuahtu in;
Thinglamtah hruainak innlam ah ka feh ding,
Hih hlei lamdang a um lo;
A tleumi saangka ah ka lut lo ding,
Thinglamtah lamzin thlun locun.
 Thinglamtah i hruai van ah,
Thinglamtah i hruai van ah,
Khih lam thlun tikah lungawinak a si,
Thinglamtah i hruai van ah.
a ti bangin kumkhua thlangam daihnak co dingin Thinglamtah lamzin thlun cio uhsi!
A suahtu        LCF, Malaysia
Editors      Biak Chawn
       Kawl Lian
     
Sumkil         Mang Hlei Sang
Zemdarhtu       Obet Cungte
        Salai Liante
       
Calai kawmiti  
         Johnson Liante
         Kawl Lian
         Mang Hlei Sang
         Biak Chawn
         Obed Cungte
Advisor     Rev. Run Cung Mang
           Pa Tha Nei Thuam
          
Contact
     Hruaitu
     42 A, Upper Ground Floor
     Wisma City Tower,
     JLN Alor, 50200
     Kuala Lumpur
 
Email : Hruaitu@yahoo.com
SMS : 016-972 3214 ( Biak)
  016-302 1254  ( Salai Kawl)       

Comments

comments

Comments

%d bloggers like this: