Hruaitu Issue 175

Hruaitu Weekly News
Issue 175
16 March, 2008
 
 
 
 
 
Zohfeltui’ Awkam
 
 
Rawl ei sawmnak Mopuai, lungawi thusimanak puai pawl ah kan feh ih ei ding tinkim in rak pek. Asinan a ci kim in kan ei theh lemlo. Kan duhmi cu tam deuh in kan ei. A cem khal asile kan cah sal mai theu. Cabu kan siar khalah kan duhnak zawn kan siar hmaisa lohli. Kan siar duhzawng tampi in ngan haisehla kan duh. Asinan an ngan tam cuang lo. Ziangah tile mi tampi ih siar ding mi ca a si ruangah mi tampi hrangah ruat in a tha theibikin ngan mi a rak si.
 
        Ca  bu siar dan phun thum a um. 1) Siar zualzo mai ci, 2) siar ih cinken ding tha le 3)siar ih veihnih thum siar sal, a tak ih nunpi cih ding ti’n phun thumin then a theih.
 
        Hruaitu thuthangca khal hi siar zutzo ih theihhngilh mai ding pawl hnakin cinken tlak le kan nunnak lamzin dikah in hruai theitu Pathian thuthangtha tlangaupinak ah hman tum mi a si. A dang nepnawi pawl cu kan mipi casiar peih dingin ngan rawi men mi an si.
 
        Ca hmuahhmuah cu siar theh  ding an si, hmansehla kan nunnak hrang ih nunpi ding tlak  ca cu siar hrimhrim ding le nunpi tum ding sawn a si. Zozokhal kan ca siar duhmi zoh in kan mizia khal theihthei a si. Nang, siar nuam menmen maw nunpi tlak ca pawl na uar deuh…
 
 
 
 
Ka ‘D’awt Leeng Nu’h Mawi Zia
                                                                                                           
                                                                                    -Van member
 
             Rak zoh au law mit nei hmuah in ka ‘D’ mawi zia
           A hoiher dan thle hngual hngo in duh a nun zia
 
           A mawi na fawh ngai e ka ‘D’awt leeng nu thliai thliai
           Cing in cuang e a leen hawi rual lakah ziai ziai
           A liang a tiang a sam thlairem a dum ciai ciai
 
           A hmel ei ttha thing thei rah hmin bang in kiar kiar
           A pawhte khi tlang mual bangin a pawng iar iar
 
           A ha tian rem Tan-tthe bangin an var siam siiiii
           A mit men mawi a lai mu ah a Tle kel kiiiii
 
           Lam a leen ah a Taw a hngial a hluum ttel tto
           A Ngel par ih a fau khih mi an awn sel so
 
                    Rim thaw fem thiam Khuai vah bang in
                    An panh khaw tin Val ttha rual in
 
                    A hmel mawi nak phen thlam hnuai ah
                    Mi lung a sii um men hman ah
 
         Ka ‘D’awt ka ‘D’uat a mawi bik cuang keimaih mit ah
         Mi dang mit ah mawi ve ci maw thei lai lo e.
 
 
 
 
Cakzet le Raalthazet In                       
 
by Rev. Run Cung Mang
 
 
Cakzet le raalthazet in um aw tiih thu ka lo peekmi cu ziangtik hmanah hngilh hlah.
 
Tih hlah. Na  thinbnau hlah.
Ziangahtile Bawipa na Pathian keimah in na fehnak kip ah ka lo umpi ding. (Joshua 1:9)
 
 Kan Bible sirhsan Josuah cabu in, harsatnak ram hih leitlun ih kan leenlai ah ttihhrut le thinphaang beidong ih kan um lonak dingah thlarau thazaang cahnak in peek. Cuih cahnak huham cu minung tisalam ih suakmi si loin, Pathian hnen hlir ihsin suakmi sawn an si.
 
 1. Pathian Thukam sungah cakzet le raalthazet in
 
Kan Pathian cu thukam pelh dah lo rin-um Pathian a si. Pathian in Joshua hnenah, “Na nun sung hmuahhmuah ah zohman in an lo neh lo pei. Moses hnen ih ka rak um bangtuk in na hnen khal ah ka um ding. Ziangtik hmanah ka lo taanta lo ding,” a ti (Joshua 1:5). Josuah cu Pathian theitu, zumhngettu le ring ngamtu a sizia Bible ah kan hmu thei (Mipum 14:6-9). Curuangah zumtu mi rin-um pawl cu Bawipa in ziangtik hmanah in thlauthla dah lo, in umpi ringring a si.Kan bawipa Jesuh Khrih in, “Leilung a cemnet tiang ka lo umpi ding (Mat.28:20), ziangtik hmanah ka lo taanta lo ding in ti (Heb. 13:5). Pathiang fahniang pawl hi ziangtiklai caan khal ah kanmah lawng kan si dah lo, Pathian Thlarau Thianghlim in kan fehnak ih kipah in umpi ringring a si. Nangmah le keimah sawn in umnak kan nei timi hi a thupizet. Pathian ih Thukam (promise) tlunah rinhngetnak na neih ahcun ziangtiklai caan khal ah ziangtlukin zumfeknak le rin- hnangam daihnak na nei thei ringring ding
 
2. Pathian Huham Cahnak sungah cakzet le raalthazet in
 
Zumtu ih cahnak cu a minung sinak ah a tthum aw lo, Pathian thiltitheinak huham par sawn ah a um. Cumi cu Jesuh in, lei le van cu an cemral ding nain ka Tongkam cu kumkhua a hmun ding (Matt. 24:35) a timi le Hebru cangantu in raal naam kap hnih har hnakin a hriamsawn (Heb. 4:12) a timi Bible hi a si. Joshua 1:8 ah, “Thukham cabu cu hngilh hrimhrim hlah, a sungih nganmi bangtuk ih na nun theinak dingah a sun a zaan in siar ringring aw. Cuti ih na tuah asile na tthangso dingih na tuahmi hmuahhmuah ah na hlawhtling ding” a ti.
 
Paul in Timote hnenah, “Ca Thianghlim cu Khrih Jesuh na zumnak sungin  rundamnak ah a lo thlentu, fimnak a lo petu a si” a ti (2 tim.3:15). Curuangah Bible cu Pathian ih Huham (power) a siih rundamfa kan sinak, nun thianghlim kan neih theinak le sualforh kan neh theinak huham a si. Mi pakhat in, Mifim na sitheinak dingah Bible siar aw, rundam na sinak dingah Bible zum awla, nun thianghlim na neih theinak dingah nunpi cih aw,” a ti. Pathian Thu sungah hramthuk na bun ahcun cakzet le raaltthazet in na um thei ding.
 
 3. Pathian Umpinak sungah catzet le raalthazet in
 
Khristian pawl ih sultluannak le hlawhtlinnak cu Pathian ih umpinak in a si. Pathian ih mifel Joseph ih nun kan zoh tikah, “Bawipa cu Joseph hnenah a um ih a hrangah ziang hmuahhmuah a tluang thluh,…a thiltuahmi hmuahhmuah ah a hlawhtling ti cu a bawipa in a hmu,” ti a si (Seem. 39:2-3). Moses ih hlawhtlinnak khal hi, Pathian ih umpinak le amah in “Bawipa, nang locun” timi thinlungput, Pathian rinsan le hngauhsannak thinlung a neih ruangah a si. Suahlannak 33:15 sungah, “Kan hnenah na feh lo ding a si ahcun hih hmun ihsin in fehter hlah aw,” a ti ih, “In umpinak hin leilung tlun ih miphun hmuahhmuah lak ihsin kan hleicet zia a lang ding,” a ti (c.16).
          Kan biakmi kan Pathian cu kan hnenah in umpitu Pathian a si. Profet Isaiah in “Immanuel” ti’n hmin a peekih a tican cu “Pathian kan hnenah a um” tinak a si (Isa.7:14; Mat.1:23). Dungthluntu pawl ih hnattuannak ah le Kawhhran thuanthu santiluan sungah Pathian minung pawl ih hnattuannak ah tla Pathian ih umpinak ruangah an tthangso ih an hlawhtling timi fiangte’n kan hmu thei. Tuni khalah Thlarau Thianghlim in kan hnenah in cencilh ih in umpi ringring. Ramsung ah, ramleeng ah, leitlun khuitawk hmun le ram kan thlen khalah Pathian in kan fehnak kipah in umpi ringring. A sun a zaan in ttihnak le thinphaannak sungah in umpi, ih in kilveng a si. Daniel umpitu Pathian cu kan hnen khalah a um ih cahnak le raalthatnak in peek ih in humhim a si.
 
Thunetnak:
          Mifim pawl in, “Nunnak cu Raaldonak hmun a si (Life is battle field)” an ti. Mi tthangso le mi hlawhtling sitheinak dingah zuam a ttul. Nehtu sitheinak dingah cahnak a ttul, ih tumtahmi hluhsuah theinak dingah raalthat a ttul. Cahnak le raaltthatnak locun tusan ah mibangh ding le tthansonak ngaingai a um thei lo ding. Cuvek thotho in, thlaraulam raaldonak khalah Pathian Thukam (promise of God) sungih dinhngetnak, Pathian Thu (power of God) sungih hramthuk bunnak le Pathian Umpinak (presence of God) lawng ruahsan a ttul. A hmunmi le a fekmi nehnak, tthansonak le hlawhtlinnak cu Pathian lawngah a um.
           Zumtu kan zate’n thlangam tei’ kan um theinak dingah Pathian in A Thu thluasuah malza in sawmsak hramseh!
 
 
Leitlun Thuthang
 
Thai PM hlun Thu thennak zung ah
            Thailand ramih prime minister hlun Thaksin Shinawatra cu 12.03.08 Bangkok court ih an hruai nakah eiru ih an puhnak ihsin sualnak a neih lo thu phuansuak a si.
 
Kandung kumkhat le thlaruk ah nasazet duhlo langter lamzin zawhnak ruangih Thaksin thlaktu Thai ralkap pawl cun nasa zetin a eiruk nak hmuhsuak an tum nan thuhla tenau 2 lawngah sual puhnak ding an hmu. Cumi lakih pakhattu cu tui ni ah a simfiang zo. A dang an puhnak pakhat tu hi April thlacem ah an rel sal ding.Amah tantu mipi pawl cun an thuthennak court zung hmaiah an ra hngak ciamco. Asinan Thaksin cun politic lamih luh sal a tum nawn lo thu a sim. A thuhla neta sawn ih an rel hlanah England ramih tlun sal theinak pek a si. Thaksin hin England ramih Manchester City football club cu july, 2007 ah a rak lei.
        PM hlun Thaksin hi a khualtlawn laiah an ram ralkap pawlin eiru ah puh in kandung 2006 kum ah a lalnak an rak lon sak. Himi ruangah England ramah raltlan in a um lan ta cih. Asinan ramkhelhnak lamih a  tuanpi democratic party pawlin kandung kum hril awk nakih an rawn neh ruangah tuikum February ni 28 ih Thailand ram a ra kir sal leh theinak a si.
 
 Kawlram hlasak thiam Sai Tthi Saing a Thi
 
            Kawlram Hlasak thiam lakih  mi tampi ih uar zet pakhat Sai Tthi  Saing,58  10.03.08 zinglam ah Yangon ih a thi ta mai cu ka ui zet a si. Kan Laimi tampi cun Sun Ceu le Sai Tthi Saing thei lotu an um zk lo. An mah le an san lai ah Kawlram hlasak thiam hminthang tlang par mi an si. Kawlhla hmangin mah le suahsemnak tlangpar ih  a nuam zia le tlangpar mi le Kawl sinak thleng awk dingah kan duh lo zia langtertu an si. Ko Tthi kan upat rualrual in Salai Sunceu khal kan theihhngilh lonak le upat tlak a sinak in mang ter theu.
 
 
Kawlram le Laitlang lam thu tawi
           
Tulai ramsung ralkap thuneitu pawlin pinay hrekkhat (Kachin, Shan, Mon etc…) pawlah rammi hminsinnak (Ntl ID / Hmatpungtin) thawn pehpar in thu thar le style thar a tuah ciamco ih, thimnak ah Kachin ramrelh- ralkap thawn daihremnak lak saltu pawl hrangah cun a zawng (color) khal a dang deuhin an tuah sak tivek le, Mon Pyinay ahcun hmatpungtin tuah hrihlo pawl temporary in (Kawltong in Yayi / Zaazii) in an tuahsak rero tivek thuhla a um .
          Kawlram cun kum 2010 lamah rampi hruaitu hrilnak ( general election ) tuah ding in a timtuah rero ih, cumi hrang ih ‘referendum’ a tuah mi pawl duhlonak lam thu rel/ca ngan zem tu cu kum 3 tiang thawng thlak ding an si. Hrilawknak ahcun phungki ( monk ) le buddhist biaknak lam ih hruaitu pawl cun vote an nei lo ding.
          Cun tulai phun 10 an phti rero laiih, kan dung hrawngah khan Falam ah meisa (Electric) a regular lo/ a thalo zet ti asi.
 
MalaySia UNHCR zung appointment an la thei lo
           
 
February ni 11, 2008 UN zung hmai  buainak a thlen ruang ah zo hman appointment pe lo in cozah palik in mipi an dawi tlan thluh ti a si.UN lam ih sin an than cia vek in 11.3.08 tlawngkai ni hnih ni hi UN card ngah cia pawl an sung khat ben awk ding appointment pek ding ni a si.Pek ding tik cu a kim hlan in UN zung hmai ah mipi an tam tukih hmaisa bik dansi cuh aw in an nor aw ciam co thlang.UN tuan vo nei tu pawl le security pawl in ti fel thei an tum rero ko nan ti ngaih nak a um nawn lo ruangah Malay cozah palik ko in Mi pi an dawi  tlan thluh.
 
A hmu fiangtu pawlih sim danvek asilen mizan 10.3.08 ihsin a riakih dansi tam nawn an um zo ih appoinntment pek ding tikcu ah cun mipi 2000 hrawng kan thleng ti a si.Mi 200 hnen lawng pek ding a si ruangah a co lo phang in hmaisa bik cuh aw in  an buai nak a si.Cuti ih an cuh awk tuk ruangah UN pawl tingaih nak an thei nawn lo ih cozak palik 20 rual  ko in an dawi tlan ter thluh  mi a si.Tu ahcun ziangtin an tuah sal pei ti hi Malay Lai mi pawlih kan thlir mi a si.
 
Reuben Hrang
Kuala Lumpur
 
Rit theih sii nauhak kedam ah thup :
 
London Heathrow airport ah, kan dung tlawngkai ni li-ah nauhak kedam bunlai sungah cocain 15gm kaih a si ih, British pound 675,000 ( RM 4,300,000 ) man hrawng a si. A neitu Elisa Vazquez ( kum 40 ), Maxican nu cu kaih a si ih, nunau kum 11 le mipa kum 13 kedam sungah retin khual a tlawngpi a rak si.
 
Tuluk ramah thilri man khung deuhdeuh :
 
 Tuluk ram cu leitlun sumdawnnak lamah a thangso vivo nan, a ramsungah thilri man a sang deuhdeuh. Consumer Price Index -in a phuandan ahcun tukum sungah Voksa man 58.8% in a kai, Oil ( petrol/diessel..etc ) cu 37.1% in a kai, thingrah le eiding lam 10.3% in, Sii ( medicine ) lam 11.4% in an kai. A tlawngpi ei le in ding tampi cu 18.2% le mipi hman mi pawl thilri man 8.5% in an kai.
 
Maxico-ah kuakfawp dodalnak :
 
Maxico cozah cun kan dung thla-ah a ramsung ih kuakfawp pawl dodalnak dingah dan thar a tuah. Restaurent le Bar ( zu dawr ) ah tla kuakfawp pawl cu sangka te umnak room hran ah kuak fawhter ding le cozah zung, mipi um tamnak pohpoh ahcun fawp lo ding in dan a tuah. Hi dan thar a thlun thei lo tu cun US $ 40,000 tiang a kuan thei ding. Tui kum kumthar ihsin France le Germany cun hivek lam dan an rak tuah zo nan, mipi ngaihdan a bangaw thei lo. Turkey ram ahcun hivek dan hi an thlun thei thluh ti a si. Thailand le Singapore hi Asia ramah kuakfawh thuhla-ah dan nei hmaisa an rak si.
 
World Kidney Day :
 
Kan dung tlawngkai ni li ( 13th March ) kha leitlun pumpi-ah ‘kaileng’ natnak thawn pehpar aw-in caan hman a si. Kaileng siatsuahtu bik cu ‘Chronic Kidney Disease ( CKD )’ a si ih, milian pawl natnak an tih theu, ‘zunthlum ( diabetes ) le tui-ttu (  hypertension ) pawl tla hi kaileng that lo ruangah an si. Leitlun ah kaileng natnak nei 5,00,000,000 hrawng an um ih, 10% cu tihnung zet
 
dinhmun an si. Lung ( heart ) ihsin a ra mi thisen cu ‘renal arteries’ cun kaileng hnenah a kuat ih, a rak khawlhfai. Nikhat ah kaileng in thisen  200 liters hrawng a khawlh. Kaileng thalo pawl hrangah  thlengsak( transplant ) le ‘thisen khawlhsak’( dialysis ) lawng damnak a um.Dialysis cu zarh 1-ah vei 3 a tul ih,a khung zet. Thlengsak hi a tha bik nan ram tamsawn ahcun kaileng hlu-tu ( donor ) an um lo.
 
Jakie Chan in Australia-ah a pa a phum :
 
Holywood filmstar Jakie Chan cun Australia ram khawpi Canberra-ah, a nu Lee Lee Chan phumnak kiang ah, a pa Charlie Chan cu a phum ve. Jackie ih nu hi kum 2002 ah Canberra hospital-ah a rak thi zo ih, a pa Charlie hin kan dung February ni 26 ah Hongkong hospital-ah cancer natnak-in a thihsan ve. Jackie-in a pa a phum ni-ah US ambassador le China envoy tla an tel ve.
 
Phungki hnen ihsin mihur DVD an kai ngah :
 
Kum 900 lai ih rei zomi, biaknak lam hmun thianghlim ‘Maria Lanch Abbey (Bavarian, Germany) kiltu phungki pakhat hnen ihsin mihur zuknung ( pornography ) DVD 230 cu amai umnak room-ah hmuh a si. Hipa hin DVD dawr-ah Gay DVD ( tawhur pawl zuknung ) fir a tum lai-ah dawr kiltu in a kai ngah ih, palik an kaih ter hnu-ah a umnak in hi an check sal a si.
 
Chaldean Catholic Archbishop thihsan thei lo :
 
 Kan dung February 29 ih misual pawl in an kaih ( kidnapped ) Archbishop Paulos Faraj Rahho cu a thi. Rahho hi Iraq ram Masul khua-ih  Bishop a si ih, kum 2003 ih US cozah in Iraq a do ihsin puithiam an kaih neta bik a si. Ruhho kaitu pawl ( kidnappers ) cun kan dung tlawngkai nithum ah telephone-in mah bawmtu bishop Warduni hnen-ah a thih thu an sim ih, sinan a thihdan zianghman theih thei a si lo. Iraq special forces pawl cun Rahhu hi an hawl rero lai.
 
THEIHKAUH NAK  LE  RUAH DING  TAM
                 ( Compiled and edited by BiakChawn )
 
1.       Leitlun ah tipi hnuailam ih cable TV hri sau bik ding cu US le Asia company paruk-in Pacific tipi hnuai-ah tuah an tum. Japan ram Chikura ihsin USA ih Los Angeles tiang,  10,000 kilometers ih sau ding a si. Himi tuahnak dingah Fibre-optic cable hman a si ding ih, kum 2012 ah hman thei a si ding. Asia le US ( Asia-pacific ram ) ram-ah internet le tele-communication lam ih harnak hmuahhmuah  a tawlrel thluh thei ding ti a si.
 
2.       Leitlun ralpi vei hnih nak ( 1939-1945 ) cem ihsin, ram dangdang politics buainak le do-awk nak ruangah refugee a tam vivo ih, tuni tiang milai 34,000,000 cu an umnak thawnsak ( resettled ) an si. Africa ram ihsin refugee an tam bik.
 
3.       Leitlun history-ah raldo awknak tamnak bik cu ‘middle east’ ram a si ih, khawpi lawng awk le siatsuah tam bik cu ‘Jerusalem’ a si ih, Bawi Jesuh thih hnu 70 AD ah general Titus in Jerusalem a siat suah kha, vei 52 a siatnak a si. New Zealand ram hi leitlun ralpi -ah an tel ve dah lo.
 
4.       Tuluk ram hi leitlun ah thilri phunphun tuahsuak tam bik an si ih, asinan thilri tuah thuhla-ah ramdang relsiatnak tuar tam bik an si. Kum 1999-ah an ramsuak fangfai-ah minung siatsuah thei chemical hmuh a si ih, 2000 kumah ‘Ajinomoto’ lem an tuahsuak sal ih Japan company-in an kuanter.
          Tui kum-ah hmuk-ei-thaw ( dumpling ) an tuah cu Japan ram mi 10 in an thihpi zo ruangah Tokyo-ih thuthangca ‘Kyodo’ cun Japan mipi 75.9% cun tuluk ram suak ei in rengreng an tep nawn lo ding tiah a ngan. Hivek buainak ruangah Tuluk President in Japan           an tlawng ding tla a cancel sal ih, tuluk pawl cun an simfiang dan kel te-in, an thiltuah cu zohsal an tum. Kan dung February thla sungah, Denmark ram ih an kaih nga ( Mackerel fish ) cu tuluk ramah June 5,2007 ah an packing hnu-ah Japan ramah kuat a si ih, cui an nga-tin ahcun minung hrangah tihnung zet ‘dichlorvos’ ( organophosphorus pesticide, kawl tongin:‘pu-tat-sii ) cu 0.14 ppm ( particles per million ) hmuh a si ruangah tuluk ramah an kuat kir thluhsal tiah Asahi Shimbun, Kouzai Bussan company cun a phuang. Mackerel fish hi Japan pawl rawl duhbik ‘sushi’ ah an rawi mi a si.
 
5.       Nimthlakau ( lighning ) veikhat kan hmuh theu hin electric power 1000 mega watt a tuah theu ih, second 1/1000 ( then 1000 ih then khat ) sung lawng a si. Leitlun-ah Nimthlakau (ttek tlak) ngah ruang ah nitin milai 1  an thi, asinan, Nimthlakau hi um lo sehla kan umnak leilung ah kan nunnak bik oxygen a um thei lo.
6        Scientist pawl cun milai ci cu ‘homo sapiens’ a si ih, nunau le mipa ci ihsin kan suahdan-ah ‘chromosome’ kawp 23 ( 23 pairs ) kan nei. ASinan, Indonesia ram ih Flores miphun ihsin suak, mi tawizet pawl cu ‘homo floresenic’ an si tiah ‘milai si lo-in, milai bang zet’ an si tiah an ti.Kum 50 sung el-awk nak ( debate ) a um zo nan, meter khat lawng ih sang floresenic pawl hi ‘minung an si velo’ titu scientist pawl cun.‘Chromosome kawp 21 lawng an nei’  ti le ‘ramsa vekin  theihnak le thiamnak thangso tuk thei lo si-nak ( instinct ) an nei tiah an tang tunto. A tantu lam pawl cun milai chromosome tlamtling lo-nak ( abnormality ) cu tesin-fa in an neih vivo ruangah a si tiah an ti.
7.       Tuluk ram cun an ram ih Olympic games ah, Falun Gong ( Falun Dafa ) thluntu pawl cu tel ve a siang lo. Hihi hlanlai tuluk miphun pawl taksa le thinlung harhdamnak ding ih exercise an tuah dan a si ih, 1992-ah tuah tharsal a si. Leitlun ram 80 ah milai 1,00,000,000 in an thlun.
 
 
 
        MIFIM PAWL  TONGKAM  LE  THUFIM
 
1.       Thlacam nak hin leilung pumpi thawnter theitu ih kut cu a             cangvaih ter thei. – W. Sockman
2.       Na sum lakluh vekin Pathian hrangah thil pe ve aw, cuvek in                   na tuah duh loh len na pek vekin na lakluh ding zat a lo                         tuahsak ding. – Martin Harley
 
3.       A cancan len Pathian in a fa le hnangamnak dingah thlipi le           ruahpi cu a daihter ih, a cancan len cui thlipi le ruahpi cu a                    ko ih a fa le pawl cu dai ten a um ter theu. – Frederick Dou                glas
 
4.       Kan tumtah vekin thil a cang lo a si khal len Pathian in kan            hrang ah tumtah mi a nei ringring. – William Matt
 
5.       Kan nunnak hi a se awl tuk ruangah thlacamnak thawn zohkil                  ciau uh si. – Billy Graham
 
6.       Pathian kan duhdawt dan tahnak bik cu, “Amah maw kan              hawl, a hnen ihsin thilpek thlawsuah sawn?”  – Ralph W.                 Sockman
 
7.       Thlacam nak hi na hrangah ziang vek so a si? Na nun hruaitu                   maw, na umhar phentu ding ah? – Corrie Ten Boom
 
8.       Kan damsung ih kan tul le hai mi pawl cu: ei le in, hnatuan,            capoh hlimnak, rualpi tha le nupi pasal tha lawng an si. –            English proverb
9.       Na damsung hrangah a si: kuak na fawp ding maw, fawp lo            lawlaw mai ding? – Yemen proverb
 
 
Jenny Pixler
 
Christian Muzik
          Khristian music thuhla hlawmawk nak hi Rebecca St. James ihsin khan kan dung zarhin kan thawkih tuitumah cun fala mawi le duhnung zet asimi le Pathian tihzah zetih a rawngbawl hna a tuan rerotu hlasak thiam hminthang zet thuhla hlawmawk nakin kan peh vivo ding.
 
Cuti ih Pathian theih taktak nak hram a thawk ihsi cun Pathian thu hi ziangti ih nunpi taktak dingha asi timi le a rawng ziangtin ka bawl  thei ding? timi lam a ruat rero. A thinlung sungrilah Thlacamnak le Pathian biaknak lamah mi ziangtin ka kaihruai thei ding? timi hi a ruahsuahmi a thinlungih ra lang mi cu asi.Marythust University ih music therapy arak zir nakin   hla phuahnak lamah siseh, music ( Awnmawi)  instrument tumthiam nak lamah le hlasak thiam nak lamah thatei tuah thei dingin a bawm zet. Himi a thiam nak pawlhin Pathian rawng a bawl nakah a tangkai zet.Hla a phuah tikah a hmaisa lamah cun tingtang ahmang tlangpi nan neta lamah cun piano hi   a tlawngkai nakih awlai tei hun hman mai ding a remcanih ruangah chord/melody vek hun tuah le hawl nakah a hmang sawn asi.
 
 Kum 14 lawng asi laiih a album hmaisa bik “Invitation”, ‘The Call’ timi hla tha le mawi zet um nak” cu a tumtahmi hlawhtlin nak karbak pakhat nakih a tuahsuak mi asi.Himi album ih a tumtah bikmi cu Khrih Jesuh cu thianghlim te le thinlung zate ih a dungthlun ding timi asi. SpiritandSong.com in a zemdarh(distribute)sak mi asi.Kum 16 asi laiih a phuah mi pakhat “Be With Us, Mary”timi hla cu Mother Teresa ih unau nu (The Missionaries of Charity Play)ih thlacam mi hramih la ih a phuah mi asi.
          Mino pawl hnenah thu tam zet a sim duh mi a um ve.”Na no lai canah Pathian thawnih nelawk ding hi ttih ding asilo. Tu hi Pathian thawn nan pawlkawmawknak le nan nelawknak ti pitling ding ko ih tuah can asi. Pathian in nangmah kha,lo ti pitlin a duhih cuisin, midang tampi khal  ti pitlin vivo ih a ram karhzaiter thei nak dingah nangmah lala hmangin a duhdawt nak kha langter a duh fawn asi.”Mino pawlih tuanvo cu Pathian ih laksawng inpekmi kha a hmin ropit nak hrangah mipi hmaiih kan thiamthil,a hleice ih kan dawn mi hmangih kan tilang thei ding hi a thupi zet. Keikhal khitivek tumtah nak thawi ka thlacam nak ruangah kum 2 sunglai Pathian le Kawhhran hmai ah laksawng in pek mi Pathian thangthat hla mawi pawl kha dik zet le thatho tei ka sak rero hnu lawngah ka hla sak nak lamah khal ka thangso zet asi ti in theihfiangter asi.Cuti ih ka theihfeng hnu ah cun lungawi nunnawm nak le aipuan nak maksak le famkim nak ti pawl ka nei cih thei vivo fawn asi.”
 
St. Tim in music lamih kaihruaitu thatha Matt Maher, Danielle Rose le a hleice in Tom Booth pawl a rak khihmuh sakih a thathnem pi zet. Jenny in Matt Maher ih album pahnih ah hla a rak saksak dah zo vekin Maher khalin fateful day ih ‘The Call’ timi hla a sak nakah hla arak sak bawm ve asi.
 
“Tom hi music lamih a turu zet mi asiih  hlaphuah thiam zetmi asiih hlei ah recording artist mak tara pakhat khal  asi. Music lamih mah le mah rinsanawk nak tiang neithei dingin le thinlungih a mah le amah tiangih rak tumcawpaw ih rak thei thei aw ding tiangin thazang inrak pe ringring theutu asi. A sungte pawl khalin high school ka kai lai ihsin Khrih Jesuh ih hmaika katawn thei nak dingin inrak bawm ve hai.Music lamih thil tam zet inrak khihhmuh le zirh lawng siloin cantha le covo luah thei dingin le malsawm nak phunkim co ding ding tiang khalin lam inrak hruaitu pakhat asi.Khrih Jesuh thawhsal nak thuhla ih ruahsannak nei thei ding khalin inrak zirhtu asi fawn.”The Way Within”timi hla tla hi amah thawi kan phuahtlang mi asi. Ka hrangah hladang tam zet tla a phuahih ka album suah thei nak dingah khal ziangkimih inbawmtu asiih ka upatin ka ngaisang zetmi khal asi.
 
“Hmailam canah music lamah thlacam nak lam hawi zawngih a rawngbawl nak maw asilole music lamih therapist(thiam ropi )si thei dingin maw ka zuam vivo ding tikhal ka thei hrihlo. A pahnih tla khin ka tuah veve men thei fawn. Asinan, Pathian thangthat hla lawngte ka sak tluan vivo ding ti cu  ka fiang zet ko…” tiah duhnung zet asimi, Jenny in ati.
 
Mangbangza Remruattu
 
Isai 9:6
                                                                        Hi hlan kan pu le kan pi san kan Chin ram ah leidoral san a rak si ih, khawkhat le khawkhat hnamkhat le hmankhat an rak do aw. An rak thatmi Lu an tan ih inn ah an tlun, an rak aih ciamco theu. Mi a that tamtam thei cu pacangtha, paraltha an ti aw ih tluangkhawnnak ah an rak hmang theu.
 
San a rung her aw vivo, fimthiamnak lam a pan vivo nan kan Chinmi cun con le laam, zu le sa in ei an zuam awk rero thotho lai. Mirang uk kan si hnu ah tlawngkai hman an rak duh lo. Khawkhat ah paziat in tlawng nan kai dingtin fial awk ih ca zirter awk a rak si.1960 hnu ka cin ban hnu hmanah Tlairawn kua sehvel ah khuangcawi, fangza aih Siahrathat an um lai.
 
Cuvek dinhmun niam zet in kan rak um nan, mangbangza remruattu Pathian cun a thuthangtha phuang dingin Tipi ral ih ringtu an nun pe aw ngam palai a run thlah ih kan chinram ah thuthangtha in ram a la vivo. Tui dinhmun kan thir asile kan chinram ah hmunkip ah krifa sinak kum zabi dar tum in kan lawm cio hi kan Pathian thatnak ruangah a si. Cuticun kan chinram ah bible lam le fimthiam zirnak lam ah mifim mithiam kan nei tam vivo hi mangbangza remruattu kan neih ruangah a si ti kan thei cio ding.
 
Mithiam sang thatha kan neih ruangah Krih thisen ih kan unau Tipi ral mi thawn dawr aw in le rawl kho kil tlang in kan um thei ruangah mi tampi cu hmundang ram dangah feh in fimthiamnak an zir ih an fimthiam zir mi kan miphun hrangah hmang dingin a tlung sal an um vekin a tlungsal nawn lo khal an um. Asinan calai in siseh, an neihmi sumsaw in siseh kan miphun hrangah tan an la in, thathnemnak tamsin in hna an tuan hi lungawinak ngaingai a si.
 
Kan Chinmi le a mah zumtu hrangah kan sun mang hman ih kan man ban lo mi lamzin a dangdang in on sak vivo. Kan unau karen pawl tla cu ringtu hmaisa an si vekin tuisun ni tiangah kan nih hnakin an hmaisa rngring ti kan hmu thei. Cuitlun ah Guam lamzin in on sakih kan milesa tampi Tipi ral kan thleng thei. Hmunkip ramkip ah kan Chinmi umlonak hmun a um nawn lo ti tluk a si thlang. Guam lamzin ihsin a feh mi pawl cu mi neinung deuh in an rak tep ban in an rak co thei.
 
Asinan mangbangza remruattu Pathian in kan Laimi leitlun ramkip thleng thei dingin lamzin dangdang in on saksal. Cui lamzin cu India, Thailand le Malaysia an si. Himi ram ihsin kan Laimi refugee in himi zin in Khrih thisen ih kan unau tipiral ramnuam kan thlen theinak a si. Kan Pathian thangthat si ko seh.  Cumi ram pawl lakah Malaysia hi kan laimi tambik umnak a si.
 
Unau, kan ruah ban lole sunmang hman ih man ban lo mi kan Pathian rem ruahsak mi zar to ih kan um hi a sunglawi in man a neihzia kan thei cio thluh zo. Kan Pathian ih in duhdawtdan le a thatzia kan tep ngah na cingin a mah sunlawih thangthatnak cang thiam lo in zuhmun sahmun ih kan tlanlen hi minung zoh khal ah a mawi lo vekin kan Pathian ninghang riahsiat ding hi kan ruat ve dah maw?
 
Asi ah, tuihnu, kan hmailam ah ziangvekin kan Pathian in kan Chinmi hrangah rem in ruah sak dingih khua in khan sak ding mi hi minung fimnak ih ruah nakin an ruat ban dah lo ding. Curuangah rem in ruahsak le a thatnak zar kan to mi parah Pathian hnenah lungawithu sim uhsi. Cuihleiah  a remruah khawkhannak kan Laimi parah a thlawsuah lamzin in onsak vivo nak dingah Mangbangza remruattu  Pathian hnenah thinlung kekkuai in dil le a duhdan in nung tlang uhsi. Amen.
 
 
TLANGVAL  LE  FALA  THUHLA  THEIH TUL
                       
 
(…. peh zawm nak… )
#Kan dungzarh ah hi thu hi kan tan (obmitted) ih, kan suah lo.#
 
Minung si ding in Nu pumsungah, pangang ( worm ) dinhmun kan si lai-ah, milai theih ban lo in nunau maw kan si ding mipa ti cu a rak tuahfel aw zo. Asinan, mipa le nunau kan si nak ‘sex organ’ cu pumsungah thlakhat kan kim hlan lo theih thei a si lo. Ultra sound cun thla hnih thla thum hnu-ah lawng theih thei mi a si.
                   Tuluk ram, tlangram lam ih um pawl cun fanu hnakin fapa an duhnak ruangah naupai pawl cun fanu an pai ti an theih veten an siatsuah theu. Hiruangah Tuluk ram, minung tamnak bik ahcun nunau pakhat umnakah mipa pasarih an um ti a si. Tlangval hrangah nupi hawl a har zet ding a bang. Hivek thotho-in tuluk pawl cun nupa theih ding ah, an suah ni, thla le kum thawn pehpar mi cazin an tuahsuak ih, cui nupa cun nau te tuah ding tikcu caan-ah ziangvek nau kan pai ding ti theih theinak dingah ca-in an nei thepthep. Hi tla hi a rintlak cuang lo a bang.
                   Mipa le nunau kan sinak bik hi, pum sung kan um thawk ihsin Pathian in in serhsiam danah milai tidanglam thei silo-in a um cia. Mipa ci le nunau ci vawn tawngaw ciah cun tidai phunkhat ‘chromosome’ an pai veve ih, kawp 23 veve an si. Cui kawp 23-nak cu mipa le nunau kan sinak ding ih thuneitu an si. Nunau cun XX tiah gender chromosome phunkhat lawng an nei. Mipa cun XX le XY phun hnih an neih ruangah, mipa ta XY a cak deuh len nunau a suak ih, XX a silen mipa ah a suak ding. Hi thil hi scientist thiam bik hman in an tidanglam theilo cu a si.
                   Hlanlai ahcun, pumsung naute mipa le nunau sinak thu le, mi banglo OR kutke kimlo OR mit caw cia neih thuhla-ah a paitu nunau lam that lo-nak vekin an ruat theu. Sinan, tulai thiamnak cun, hi hmuahhmuah hi mipa lam chromosome ruangah ti an thei.
 
 
                   Mipa zokhal in, naute nunau hnakin mipa neih an duhnak le nunau cu mipa vekin thil ti theilo vek ih ruahnak an pai mi hi, kan suahnak hmun ram nunzia le kan pipu thuhla a si tlangpi. Asinan, leitlun history ihsin nunau cu mipa hnak cun an dinhmun a niam deuh kan ti thei ko. Tulai san kan zoh asilen, hmun kip-ah mipa tuah thei lo tampi cu nunau-in an tuah thei. Thil tuah lam si lo in, kan bangawk lo-nak bik cu, Pathian in in serhsiam dan ( nature ) a si.
                   Baibal cun “Mipa cu nunau tel lo in a um thei lo ih, nunau tla mipa tel lo-in a um thei lo” a ti ( I Kor 11 ). Hi thu hi, nunau mipat nak lam si lo-in, leitlun ih milai kan si dan hram thawk nak simfiangnak cu a si sawn ding a bang. Minung hmaisa bik Adam cu Pathin in a kutin leidip ( dust ) thawn a tuah; minung pahnih nak Eve cu Adam ih hnak ruh ( rib ) ihsin a tuahsal ih, kan ni minung pathumnak phun cu nunau le mipa kar ihsin ( by birth ) kan suak.
                   America ram ih mipa 90% hrawng cun an vunzim an tan ih, hihi biaknak lam thawn a pehpar aw mi cu a si lo ti a si. Malte vawn bet ka duh mi cu, mipa 65% in an san sungah kan mipatnak cu vei khat tal an met ih, nunau cu 95% an si. Hithu hin milai cu Pathian in in tumtahpi mi lamzin hnakin kanmai tisa duhnak kan thlun tam deuh ti hi a ti fiang. Bawi Jesuh cun, “van ram ahcun nupi pasal a um nawn lo ding ih, van mi vekin kan cang ding” tiah in zirh. Pathian sungkua member hrang ahcun, “a tul lem lo ih ‘SEX’ hman” cu a ruah khal ruah tha a si lo. Pathian hnen ih um van mipi pawl hrangah nupi pasal a thupi nawn lo nak san hi in zirh bik cu a si.
                   Genesis bung 6 nak ahcun, Pathian Fa le pawl cun milai fanu pawl cu mawi an ti ih, fa tiang an rak nei. Hihi vancung mi, Pathian in a dawi zo pawl an si sawn pei. Rom bung 1:24-26 ahcun Pathian ih zohsan milai pawl nunzia kan hmu. Nunau mipat nak lamah an duhduh tuah theinak an nei. Nunau le mipa sinak lam hnak in, nunau le mipa si ding ih in tuahtu in ziangso tumtahnak a neih ti hi a thupi sawn cu a si.                                                         
 
-BiakChawn
 
Cover back inside
 
 
USA Na Feh Ding Asile 
    
Mirang tong thiam lo hrang khal ah hnatuan ngah theinak hmun, Hnatuan tha hmu thei dingin bawmtu, harsat tawn tik khalah Laimi rinsan ding umnak hmun asimi,
Malaysia ihsin a fehmi kan Falam mi tam pi hnatuan hmu lo in harsatnak a tawngtu pawl khal an thawn awk theh. A hnuai ih Address hi UN na feh tikah  rak pe aw. Laimi harsa bawmtu dingah Pathian remruat cia an rak um.
                
                 Hre Mang
                
                 1110 Beal Cout,
                 Indiana Polis, In 46217
                        Ph : 3178892318
 
      Ramdang Feh Ding Pawl hragah
 
 
UNHCR ihsin ramdang fehsuaktu ding pawl hrangah Mawtaw mawngnak laisin a tul. Form tuah / phi nak ding hrang khal ah tampi a ol phah. Na hrangah man olten tuah  sak theih a si.
 
                                                Contact .. S Sangte 017-310 8011
 
 
A suahtu          LCF, Malaysia
 
Editor                     Biak Chawn
Joint  Editor                       Kawl Lian
                                                      
Sumkil                    Kawl Lian      
Zemdarhtu             Obet Cungte
                               Salai Liante
                                                                              
Calai kawmiti        
                          Johnson Liante
                          Kawl Lian
                          Mang Hlei Sang
                          Biak Chawn
                          Obed Cungte
 
Advisor     Rev. Run Cung Mang
                 Pa Tha Nei Thuam
                                                                                                                  
Contact
              Hruaitu Thuthang
              42 A, Upper Ground Floor
              Wisma City Tower,
              JLN Alor, 50200
              Kuala Lumpur
         
Email : Hruaituthuthang@yahoo.com
SMS : 016-972 3214 ( Biak)
             016-302 1254 ( Salai Kawl) 
 

Comments

comments

Comments

%d bloggers like this: