Hruaitu Issue 174

Hruaitu Thuthang
  Issue. 174
9 March, 2008

Zohfeltui’ Awkam

Hruaitu thuthangca siartu nan zaten cibai! Hruaitu na siar ruangah
ziangmi thathnemnak na ngah? Asilole zarhtinten na lei ih na siar
menmen? Culole LCF ih suah mi asi ruangah sayate le upa hmaisawngah
na lei men ih siar lo in  na ret men theu?

Hruaitu Cangantu pawl in cu pawl cu kan lo theih sak lo. Asinan
harsatnak phunkip, hnatuan bang hnianghni ten tuan hnu ah casiartu
hrang le kan mipi, kan member hrang ruat in Pastor le tawlreltu pawl
in tawlrel ih mipi kutah thlen pi a si. Pathian khal in himi
thuthangca thlawsuah pe sinsin hramseh.

Hruaitu thuthangca zarhtinten  lei ih siar ringringtu le veikhat hman
lei tumlo, siar dah lotu cu kum khat a rei ahcun an theihnak le an
ruahnak a bang awk lo hrimhrim ding. Na lei ih na siar ringring
ahcun na theih manlo kar ah danglamnak pakhat tal cu a umtengteng
ding. Na theihnak a tam dingih theihnak tam nanana cu na fim deuh
ding. Pathian thuthangtha na siar tam ahcun theihnak na nei dingih
theihnak ihsin nunthar, nuncaknak na ngah ding.

Thla za cam
  * Maw… Bawipa
  Cungnung bik Pathian
  Na sal pa kei in
  Na ke hram ah kun in
  Hitin thlaza ka cam
**  Har sat nak phunkim lak in
   In humhim hram aw
   Ti si sawn lo in
   Harsat nak phun kim
   Pah tlang thei nak ding
   Tha zang cahnak ii pe hram
*** Rethei zonzaih
  Nat nak phun za kim
  In tuar ter hram hlah
  Ti si sawn lo in
  Tuar suak thei nak ding
  Thinlung cah nak
  In pe hram aw

****  Ka ral do nak
   Leitlun thim hnuai ah
   Bawm tu hawl ih
   A vak tawi tu si lo in
   Na thi sen cah nak thawn
   Neh nak co tu in si tir hram
***** Cun……….
  Neh nak ka co mi pawl hi
  Na sun lawi nak si in
  Ka tlin lo nak hmuahhmuah
  Na ke hram ah
  Ka run lo hlan
  In co hlang hram aw.  J. V Mawi

NAPI IN ZUAM AW
  – Rev. Run Cung Mang
  (2 Timote 2:22)
  Thuhmaihruai:

Lai Christian Fellowship, Kuala Lumpur, Malaysia ih Mino Pawlkom LCYF
ih kum khat sung Thuken (Theme) ah 2 Tim. 2:22 kan hril. Hih Bible
bung-cang sungah thlarau thazaang laak dingmi tampi a um. Dake’s
Bible cun Timote hnen ih Thupeek pariat (8 Commands to Timothy) ti’n
a hminsin. Pathian ih mihman le Kawhhran hrangah hmantlak rinsanmi na
si theinak dingah napi in zuam aw. Bible in, “Nolai taksa hiarnak cu
tlansan awla thinlung thiangin Bawipa ih bomnak a diltu pawl thawn
hmun khat ah dingnak, zumnak, duhdawtnak le daihnak ngah dingah napi
in zuam aw,”in ti. (1Tim 6:11; Gal 5:19-21; Col 3:5-10)
  Paul in thlaraulam ih a fa a simi Timote kha Pathian ih hmanmi si
dingin a forhfialnak a si.  Caang 20 ihsin kan siar asile Khristian
Nun cu khokheng thawn a tahtthimnak kan hmu thei. Inn tumpi sungah
khokheng a phunphun a um. A hrek cu Ngun ih tuahmi an si ih a hrek cu
Sui ih tuahmi an si. A hrek cu zaanthing le tlak ih tuahmi an si. A
hrek cu ni sunglawi caan ih hman ding an si ih a hrek cu nitin hman
menmen ding an si. Zokhal a ttha lomi hmuahhmuah a hrial ih thiangte
ih a um a si ahcun hnattuan sunglawi hrangah hman a si ding.
Ziangahtile pumpe mi a si ih hnattuan ttha ttuan dingah a tiar aw
ttheptthepmi a si ruangah a Bawipa ih hman tlak a si, a ti. Zumtu
unau, ahleice in MINO! Na nunnak tthate’n vun check hnik! Bawipa ih
hman theih mi na si maw? Nitin a menmen ih hman ding fang maw na si,
asilole ni sunglawi le caan sunglawi ih hman ding so na si? Sui le
Ngun ih tuahmi maw na si zaanthing le tlak ih tuahmi so na si?  Nun
thianhlimnak ziangtluk in na nei?

1.  Nolai taksa hiarnak tlansan thei dingin “Napi in Zuam aw.”
Bawipa hrangah hmantlak kan sitheinak dingah tuah ding a um vekin
tuah lo ding- phundang in kan sim asile hrial ding le tlansan dingmi
a um. Cumi cu a thupi nasa! Midang ih thlarau thazaang derdainak ding
le tlukrilhnak ding a si ahcun kan duhhiarmi ei-in, zuuk le hmawm tla
kan suup awk thei a ttul. Satan ih tukforhnak kan doneh a ttul. Mino
ti cu tisalam ah damcah taklai a si ih hiarhaalnak a tam. Pathian
hmin sunlawitertu kan sitheinak dingah cuvek pawl cu kan tlansan ngam
le tlansan thei hrimhrim a ttul.
  Bible ah tlansan (flee) timi ttongfang hmun tampi (104) lai ah a
cuang. Cumi sung ihsin hmunli ah zoh duak sehla: 1) Nu le pa sualnak
kha hrial uh [1Cor 6:18]; 2) Milem biak cu hrial uh [1Cor 10:14]; 3)
Tihnungza tisa duhnak [1Tim 6:9-11]; le 4) Nolai tisa hiarnak [2Tim
2:22] pawl an si. Bible sungah kan zohtthim dingmi Pathian ih mihman
maksakbik cu Joseph hi a si. Joseph in a hnenih a thlengmi
sualforhnak ¨C nolai tisa hiarnak cu raaltthatak in a nei thei riai a
si kha. Pathian hnenih rin-umnak, nupi pasal parih rin-umnak le fala
tlangval parih rin-umnak in hih tukforhnak hi neh a theih. Pathian
rinsan in, thlacamnak le Pathian Thu sungih umnak in hih sualforhnak
hi kan neh thei asile Pathian in ni sunglawi ih a hmanmi kan si thei
ding.
  2. Dingnak nei dingin “Napi in Zuam aw.”
  Pathian ih mihman sitheinak dingah tisa hiarnak tlansan le hrial
lawng si loin “dingfelnak (righteousness)” nei dingih zuam a ttul
hrih. Bible in dingfelnak hi thupizet in a sim. Greek
in, “dikaiosune” an tiih Mirang in righteosness ti;n hmun (305) lai
ah an let. A simduhbikmi cu hmuntin le ziangtiklai caan khalih
thildik tuah (right-doing in all places) tican a si. Pathian in
midingfel pawl hman a duh. Zumtu mi piangthar si cingin nun borhhlawh
nei pawl cu nitin a menmen ih hmanmi fang kan si dingih zaanthing le
tlak vek fang kan si ding. Asinan suup awk theinak, tisa hiarnak
hrial thei in dingfelnak kan neih ahcun sui le ngun vekin mannei
hleice le ni sunglawi ih hmanmi kan si thei ding.Joseph bangin rin-
umnak thawn midingfel kan si ahcun Pathian in a hmin sunlawinak ah in
hmang vingvo ding. Curuangah Saam ngantu in, “Mino in ziangti’nso
ziaza thiang  a neih thei ding?  Na thupekmi thlun lawngin,: a ti
bangin Pathian Thu ah tthum  aw ringring in dingfelnak nun neih ding
napi’n zuam uhsi!
  3. Zumnak cak dingin “Napi in Zuam aw”
  Pathian ih hmantlak sitheinak dingah zumnak ih a tthanglianmi kan
si hrimhrim a ttul. Bible in, “Zumnak cu thuthangtha theihnak ihsin a
ra,” a ti (Rom 10″16). Nang le kei zumtu kan sitheinak hi kan fim
thiamnak le kan hmuhtonmi ihsin si loin, Pathian thuthangtha simtu ih
a hmanmi pawl: Evangelist le Pastor pawl ih simzirhnak in Pathian ih
in rundamnak kan thei ih thlarau nun kan neih theinak a si. Peter in
zumnak ih nan tthanlen theinak dingah naute bangin thlarau hnawiti
haal uh, in ti (1Pet.2:2). Curuangah thlaraulam ih nutling le patling
kan sitheinak dingah Bible siarin Nitin Thlarau Rawl ei ringring kan
ttul. Biakkhwmnak tinte: [Nipi Ni zingkhawm, Nipi zaan, Zarhte zaan
le Nithum zaan khawm pawl] ah tla taimaak suah ih khawn ahcun thlarau
thazaang cahnak le zumnak ah tthanglian in na um ding. Zumnak cak nei
dingin napi in zuam aw.
4. Duhdawtnak nei dingin “Napi in Zuam aw”
  Pathian cu duhdawtnak a si. A Fapa neihsun ui loin in duhdawttu
Pathian cu thinlung tak in duhdawt ding kan si. Ka tithei tawk Amah
rian ding kan si. Awkaa men lawng si loin, ttuannak in duhdawtnak
atak in langter ding kan si (1John 3:18). Mai’ zawn lawnglawng
ruahnak thinlung siava taanta in
Kawhhran hrangah pumpeek ding kan si. Mi hmuahhmuah tlunah duhdawtnak
langter ding le ahleice in zumnaklam ih kan unau a simi kan Kawhhran
sungtel unau pawl tlunah duhdawtnak langter ding kan si. Cumi tlinh
dingah tisalam ih ttanlaaknak cun a har ko ding. Asinan thlacamnak
thawn Pathian hnenih bomnak kan diil ahcun Thlarau Thianghlim huham
cahnak thawngin nehtu kan si dingih Pathian hmin sunlawitertu kan si
thei ding. Duhdawtnak langtertu si dingin napi in zuam aw.
  5. Remdaihnak ngah dingin “Napi in Zuam aw.”
  Jesuh Khrih cu remdaihnak siangpahrang a si (Isa.9:6). Jesuh Khrih
ih Tlangpar Thuzirhnak ah “Remnak a tuahtu pawl cu mi thluasuak an
si, ziangahtile Pathian ih fahniang tiah kawh an si ding” ti’n a um
(Matt.5:9). Pathian le nangmah karlak ah remdaihnak um dingin zuam
aw. Na innsungsang ah remdaihnak um dingin zuam aw. Kawhhran le
Pawlkom sungah remdaihnak um dingin zuam aw. Na umnak hmunkip ih mi
zakip thawn remte le nuamzet ih um thei dingin zuam aw. Remnak
siatsuahtu le mi tokhroktu, le buainak a suahpitu si loin, buainak le
hnaihnoknak a rehtertu, miremtu le daihnak a tuahtu si zuam ringring
aw. Daihnak taktak a ngahtu si dingin le remdaihnak a ngahtu si
dingin napi in zuam aw.
  Thunetnak: :
   “Zuam aw” timi ttongfang hi na nitin nun ah kaihnget ringring aw.
Midang hnakin a ziangkim ah taimaak suah aw. Bible siar, thlacam,
khawm, peeknak, tettikhannak, le ramthar hnattuannak ah nasatak in
taimak suah in zuam aw. Thlarau nun siatsuahtu nolai tisa hiarnak cu
tlansan thei dingin zuam aw. Dingfelnak, zumnak, duhdawtnak le
daihnak ngah dingin napi in zuam aw. Cuticun Sui le Ngun ih tuahmi
thilri vekin Ni sunglawi le hmun thupi ih hman tlak na si thei ding.

Chin Community, Korea Hruaitu Pawl ( 2008 – 2009 )
  Hotu :    Salai Aung San Thang  ( Matupi )
Hotu Sang :   U Kyaw Kyaw   ( Tedim )
Sungtuan :   Salai Robert Biak Tluang  ( Falam )
Sungtuan bawm:    U Sian Za Mung   (Tedim)
Treasurer :   Salai Tuan Sang   ( Hakha )
Auditor :   Salai Peng Kulh   ( Hakha )
  Thuron Upa Pawl
Rev. Si Thar
Rev. Tual Lian Tuang
Saya Biak Sawn
Pu Than Hlei Hrang
  EC Members Pawl
U Lal Tlan Chuah
Salai Mang Pum
Tang Pau Pu lay
Salai Isac
Mai Tial Kip Thluai
Pa Sian Thang
Salai Tha Thawm Luai
Pa Kham Bawi
TaLTH
S.Kr

  Pa Bawi Lian Thio in – in thih san
   Tahan, Hmunlai khua ih um Mai. Lal Pek Cuai ih pa,,Pa Bawi
LianThio in tuizing 7 March  1:40 AM ah Pathian hnenah in
fehsan.Thaisun nazi 12:00 ah vuinak neih a si ding.A fanau pawl
hrangah thlaza cam sak tlang cio uh si.
  NB// Evan S. Tha Nei Fai ih pu (Anupi ih pa) a si.
  LEITLUN  THUTHANG

  Timor President in amah kaptu ngaithiam :

East Timor ram president Jose Ramos-Horta cun Febuary ni 11 ih a mai
umnak inn tiang rak kaptu tapung, a bik takin amah rori kap ngahtu
Alfredo Reinado Alves cu a ngaidam. President hi vei 3 rori an kap
ngah nan a thi lo. A kaptu cu an kap that cih, sinan, president cun
Alves ih sungkua cu cozah in a zohkil ding a ti. President Jose hi
¡®Nobel Peace Prize¡¯ tla a rak ngah zo. Prime minister tla a fehnak
lamzin ah an rak kap ve nan, an kap ngah lo. Tapung 17 kaih an si ih,
an hotu Gustao Salsinha cu an hawl rero lai. UN le Australia ralkap
in an bawm.
  Saudi Arabia-in tapung 28 an kawl :
  Kingdom of Saudi Arabia cozah cun Al-Qaeda member ding hawltu le
leitlun ih tapung cangvaihnak hruaitu pawl mi 28 cu an kutah an um
ih, thuhla tampi an sut rero lai tiah thu an than. Philippine cozah
khalin tu kum sungah president Arroyo that ding ih Al-Qaeda pawl
cangvaih tumnak le embassies bomb phuah tumnak tla an kham thei tiah
an phuang ve.
  Singapore cun ¡®Mas¡¯ an hawl rero lai :
  Kum 2001 ah Singapore International Airport ¡®Changi¡¯ siatsuah tum
nak le tapung thawn tuantlangnak neih ruang ih an kaih ¡®Mas Selamat
Kastari¡¯ cu a umnak thawng inn ihsin a suah hnu-ah, ram sung le ram
leng ah mi 1000 hrawngin an hawl rero. Mas¡¯ hi a sungkhat pawlin
thawng inn- ih an va veh lai-ah ek inn feh ding vekin a tlansuak.
  Israel le Palestinian do awk nak :
   Israel ralkap pawl cu Gaza khaw sung Jebaliya an siatsuah hnu-ah
an kir sal. Kan dung
  lawngkai ni khat ah Palestinian pawl in roket bomb thawn Israel
khawpi pakhat Askelon cu an beih ruangah ralkap pakhat a thi ih,
Jebaliya ih do-awk nakah ralkap 2 an thi. Palestinian ralkap 67 le
mipi 50 an thi ve.Gaza an suahsan nan Israel Prime minister Ehud
Ormart cun, ralkap kirsal nak cu reilote hrangah a si a ti.
Palestinian pawl cun an khua a siat ih, an mipi le ralkap tampi an
thih hman-ah ¡®kan neh ( we won )¡¯ tiah an au. US secretary of state
¡®Codolezza Rice¡¯ cun daihnak tuah dingin tlawngkai ni thum-ah ram
pahnih aiawh hruaitu a tawng.
  South America ram buainak :
  Colombia ram cun Ecuador ram mi, tapung hotu pakhat a dawinak ah,
Ecuador ramsung ah cozahpi theihter lo ralkap a luhter ih, Venezuela
ramsung tiang hawlsuah a tum ruangah, Venezuela president Hugo Chavez
cun ramri ah ralkap 6000 kuat-in a ram a kil ih, ¡°hi thil hi south
America sung ah ralpi thlenter thei a si¡± tiah a ti. Chavez cun
Colombia ram ih embassy cu a khar ter ih, ram pahnih pehtlaih awknak
tla a phit thluh; Colombia  president Alvaro Uribe hnenah, ¡°Na
duhduh tuah na tum a si ahcun na ramah ¡®Sukhois¡¯ ( Russia hnen ih a
lei raldonak vanzam thar ) ka rak thlah ding¡± a ti bet.
Ecuador khal in a ram kil ding in ralkap tampi a kuat ve. Colombia hi
USA bawmnak thawn tapung hawl an si ruangah, US security council
aiawh Gordon Johndroe cun, ¡°thil umdan tawlrel rero lai a si¡± a ti.
Tapung hruaitu ih an zum Raul Reyes hin thubuai 120 a nei ih, milai
firnak ( kidnapping ) vei 4 le milai thahnak ( murdering ) 60 a nei.

     THEIHKAUH NAK  LE  RUAH DING  TAM
   ( Compiled by BiakChawn )
  1. Bible sung ah : Sam 118:8 hi a lai bik ( center ) a si. Eve hmin
hi vei 4 lawng ngan a si. ¡®Bawipa¡¯ ti hi cafang tam bik a si ih,
Ruth cabu sungah Bawipa¡¯ tile ¡®Pathian¡¯ ti cafang zianghman ngan a
si lo. Job cabu hi a tikcu theih har bik a si ih, a umnak fiang zet
ih ngan hmuahhmuah-ah Eden¡¯ hmuan umnak hi theih har bik a si.
  2. Leiltun ah miphun tong dangdang a um thoknak cu ¡®babel in
saang¡¯ sak lai, Nimrod saan lai ( Genesis 11 ) ah a si ih, Judah
pawl ¡®Jubilee cabu¡¯ ahcun babel inn saang sak hlan hmuahhmuah ah
leitlun pumpi-ah ¡®hebrew tong¡¯ hi hman a si ih, cucu Eden hmuan
ihsin hman thok a si¡¯ tin an ngan.
  3. Rome cozah in leitlun ram tampi an uk lai ih krihfa pawl an hrem
lai ah, zumtu pawl cun anmah le anmah theihter awk nak le hminsin nak
ah ¡®nga ( fish )¡¯ lem an rak hmang. Cucu Greek tong ¡®Ikthus¡¯ a si
ih, ¡®Iesus Kristos Theos Huios Soeter¡¯ ( Rundamtu Bawipa Jesuh
Pathian Fapa ) ti nak a si.
  4. Milai hna ( ear ) cun 40 Hz ihsin 4 KHz tiang thil awn a thei
thei ih, 4 KHz hnak ih sang cu ¡®ultra-sound¡¯ a si ih, 40 Hz hnak in
niam cu ¡®Infra sound¡¯ an ti. Ultra sound hman ruangah, pumsung
naute le thil dangdang hmuh thei a si ih, mit ih hmuh ban loh vanzam
tla inn sung ihsin fiang zetin a theih thei. Infra sound cun electron
pawl a thawn ter thei ruangah  electronic lam le medical lamah an
hmang tam bik.
  5. Nga ( fish ) hi zanah an it that ve. An mit an sing ve. Asinan
an mit tuamtu vun cu a paa ( thin ) tuk ruangah an mitsin khal theih
thei a har zet. Dolphin hi ti an leuh chak bik. Nazi pakhat ah 60
kilometer ihsin 95 kilometers ih cak tiang tidai an leuh thei.
  6. Science lam ihsin vawn zoh ve hnik: Micro-biologist pawl cun
boruak hi ¡®bacteria le virus¡¯ lawnglawng in a khat thluh a ti.
Chemist ( chemistry lam ) pawl cun boruak cu ¡®atom le molecules¡¯
lawnglawng a khat an ti ve. Metereologist pawl cun ¡®tidai hu ( water
vapors ) lawnglawng in a khat an ti, Physicist pawl cun ¡®magnetic
energy ( hip awk thei nak ) in a khat an ti.
Geologist pawl cun ¡®vut ( dust ) le arsi ihsin a tla mi vut ( star
dust ) lawngin a khat an ti, bio-chemist pawl cun ¡®radio wave¡¯
lawngin a khat an ti, sociologist pawl cun ¡®duhdawtnak ding cantha¡¯
in a khat an ti. Theologist pawl cun ¡®Pathian Thlarau-in a khat¡¯ an
ti, Atheist ( Pathian a um lo titu ) pawl cun ¡®zianghman a um lo¡¯
an ti. Nangteh ziang so na khat ter ve ding?
  7. Leiltun ih thing rah rim sia bik le rim na bik cu Durian a si.
Leiltun ih hang-hnah hang-rah le rawlhmeh dang pohpoh ah an hman tam
bik le tel kim bik cu ¡®khahsuan sen ( onion ) a si ih, Asia ramah
milai pakhat in a damsung ah a malbik 25 kg a ei.
  8. Leitlun ah kut kehlam ( left hands ) hmang hi 7% an um ih,
hihi minung an si pek, pumsung an um lai ihsin an thluak kehlam cu a
tuahsuak aw hmaisa ( developed ) ti nak a si. Kan tong thiamnak le
kan tong suah ding pohpoh hi kan tong hlan-ah kan thluak keh lamah a
rak um cia zo ih, kan tong rero lai khalah a dangdang a rak tuah aw
zo.
  9. Milai kum 60 tlun lam cun a neih cia mi, ¡®a thlum le a al, a
thak le a haang¡¯ a theihnak cu, 50% ihsin 60% tiang  a nei nawn lo.
Mi zokhal, kan ihthah hlan hnak in zing kan tho pekah kan taksa a sau
deuh. Hihi tha-hri a dul thluh ruangah a si. Mitthi tla an thih hnu-
ah mal te-in an sau deuh.

MIFIM PAWL  TONGKAM  LE  THUFIM
      ( Compiled and edited by BiakChawn )
  1. Mi tampi cun an thinlung hnakin an hni-puan cu biak in ah   an
ra keng theu ih; a hleice-in London khawpi sung krihfa   pawl cun
biak in dar awn-ri theih thei nak ah inn neih an duh,   sinan kei cun
hell ram fehnak lamzin kapah dar tum ka duh   sawn. –
2. Pathian cun biak nak lam duhdawtnak siloin, thlarau lam rah   tha
suah dingin in duh. – Mark Higgin
3. Kohhran¡¯ hi leitlun ih pawlkhawm hmuahhmuah ahcun a sung   tel
member si ve lo hrang khal ah hlawknak ngah thei nak cu   a si. –
Martin Luther
4. Ka hmuh thei lo thil hmuahhmuah ruangah ka hmuh thei mi   pawl in
serhsiam tu i zum ter. – Ralph Waldo Emerson
5. Kawhhran pawl sungril bik ding cu biak in lenglam ah ret   ding a
si ih, kawhhran harhdam dan cu ¡®thlacam caan neih   dan¡¯ thawn tah
mi a si. – Richard Ambler
6. A lenglam ih ¡®daih nak¡¯ cu sunglam ih Pathian theih fiang   nak
le Amah thawn rem-awknak in a ra mi a si. – Harvagar
7. Krih neitu nun cu nazi mawi le tha zet vek a si; zoh a nuam,   a
cawl dah lo, a thianghlim, thil tha tuahin a can a hmang   thluh. –
Micheal Campbell
8. Nunau tha lo kawm hnakin thuanthu cabu pakhat kawm a   tha hnem
sawn. – English proverb
9. Na mizia cu na um lo hnu lawngah a fiang deuhdeuh. Na   sinak kha
nangmah hnakin midang in an thei.- Spanish prov  erb.
10. Milai lei ( tongue ) hi letmah pathum ( 3 inches ) hnak ih sau
cu a leng lam ihsin hmuh thei a si lo nan, pi ruk ( 6 feet ) ih
sang milai khal a that thei. – Japanese proverb

  Rebecca St. James
  – Salai Kawl Lian
  Rebecca St. James cun aliam cia mi canah kum 10 lenglo lai
Christian Music ih  alar bik mi lakah a tel mi a si. A hleice in anih
hi pop/rock/alternative style pawl hmangih saktu sinakin nunau hla
sak thiam lakih lar bik tla asi fawn.Cuihleiah tui kan dung kumrei
hrihlo ah khan Worship Album (Pathian biak nak lam hla)tla a ti suak
ve. A hmin ngai cu Rebecca Jean Smallbone asi. July 26,1977 ah
Australia khawpi Sydney ah a suak. A pa hi a USA lamih hnatuan a
thawn ruangah kum 14 mi siin a pai hnenah arak thlun cih ve.An vaih
hlante kum 13 asi lai ah”Refresh My Heart” album arak ti suak man ta.
1994 ah kum 16 mi siin “Rebecca St. James”album ati suak lehih cumi
cu copy million khat ai tam zuar suah asi!
  USA ahcun Franklin,Tennessee ah a khawsa ih kumkhat sungah concert
vawi 200 hrawng a tuah thei  theu. A thumawk nak bik cu Bawi Jesuh
Khrih ah asi. Leitlun pumpi ah Thuthangtha phuangin, a kiangkapih um
pawl hnenah khal Pathian duhdawt nak a lang ter thei ringring theu
fawn asi.
  A hlawhtlin nak le a lar bik nak san cu Pathian hrangih tuanvo alak
nakah hla a phuah le asak tikah Pathian cu a upat le a cawisan zia
fiangte ih a tuah ruangah asi” tiah Mark Moring, Campus Life Magazine
cun a ti.A vun betih ,”Ahla arak ngaitu pawlih thinlung lut le a hip
thei zet theu nak san cu a hla music  style pawl hi a thar in a tuah
thei ringring ih hlei ah Pathian duhdawt nak hi zahpi nak um riai lo
tei a phuansuah theu nak ruangah asi.”
  A hla thu le music ngan nak parih a thinlung ruah nak tisuak biktu
ziang asi? tiih an suh mi cu “A bulpi bik le a tam bik cu Bible
thukam asi.Cun ka hmuhtawn mi le, karak ngai dah theu mi music lakin
asi bik.Khristian music sak rero tu pawl lakih rak pitling kasi
ruangah cucu ka ngai tam mi bik asiih hlei ah Khristian radio tla ka
ngai tam zet ve.”
  A hla lar le tha zetzet tam bik nak cu kum 2003 ih a ti suah
mi “Wait for Me”album , hla 18 um nak sungih tel mi pawl an si. Himi
lak ihsin “Wait for Me” timi hla hi nu le pa neihawk hlan tiangih
hrial dingih a duh mi pawl aphuahsuah nak hla asi. Kum 2004 ah Live
Worship pakhat ati suak leh.Ziangruangah kum 2002 ih “Worship God”
album timi tisuah hnu reilo te ih naihaw te ih hitivek lam hawi
Worship album na tisuak? timi thusuh nak cu “Hitivekih Live Worship
album tuah ka duh nak hi a rei zet zo.
  Ziangah tile keimah rori tla hitvek Live Worship tuah nakih rak
pitling ve mi pakhat  kasi. Humham a nei zetih mi thawng tampi in CD
ihsi khalin Pathian anrak thangthat thei ve nak pakhat asiih  a tak
ram luh thei nak khal asi tin ka zum.Mipi a burpi ih hmunkhat te ih
Pathian biak thangthat thei nak si ruangah Zumtu u le nau khat le
khat lungrual nak tla alo neihterin na thinlungah Pathianih hnatuan a
hung lang ruangro mai ding.Curuagnah a tuah ding can dik takah ka
tuah ve mai nak asi ko”.
  Rebecca St.James ih album suah zo mi pawl:
  1.RefreshMy Heart 1991
2. RebeccaSt. James,  1994
3.Prayersand Worship,1995
4.Remixes,1995
5.God Single,1996
6.God, 1996  (ForeFront)
7.Christmas,1997 (ForeFront)
8.Pray, 1998 (ForeFront)
9.Transform,2000 (ForeFront)
10.WorshipGod, 2002 (ForeFront)
11.Wait for  Me:The BestFrom RebeccaSt.James,2003(ForeFront)
12LiveWorship,2004(ForeFrontS)
   November 1,2004 ah “She” timi cabu, a hleice in nunau pawl hrangah
a ngan suak ve. Himi cabu ah Himi cabu hi nunau pawl hnenih thazang
pekawk nak le fawrhfial awk nak lam asiih Bible in a neihmi nunau
pawl hrangih dan pawl khal fiang zet ten a tarlang cih fawn asi.
Megazine  cahram, thuthangca le TV pawlah  zumnak le sungkaw hrang ro
sunglawi asi mi pawl a simlang camcin theu.
  Kum 1997 ah “Pray”album in grammy award arak dawng dah. Culawng
siloin, the readers Campus Live Megazine khalin kum 2002 ah nunau
Pathian hla sak hminthang bik laksawng a rak pe ve. Nunau Khristian
hla saktu lakih mihip theitu bik asi tin K-Love, Air 1 radio le
Crosswalk.com pawlin anrak phuang ve thung asi.
  Ziangtinha na nun khawram umtu dan? tiih suh nak cu”Kum 25 mi kasi
ve zo ih mi a tam thei bikih Pathian hnenih hraui le A rawngbawl
nakih rinum tei um ding le Pathian in ka hrang a duh mi dan vekih ka
fehpit thei ding hi a thu pi zet.”Keimah bulpak thuhla lamah cun mi
zangfah lainat le duhdawt thei zet mi kasi ih ka bawm thei mi pawl
bawm tla ka duh zet. Ka rualpi le pawl khal ka duhdawt zet hai ko.
Asinan, fala(mino)dang vekih lengih lengsuak tahratih mai duhduh
danih va um ve dingih mi pakhatkhatih inrak beisei asi ahcun a
hlawhsam zet ding.
  Ziangah tile keicu midang vekih Pathian duhlo mi a tuah ve theimi
ka silo ruangah asi. Ka suahsem nak Australia hi ka ngaisang zetih ka
duhdawt zet  fawn. Hmailam canah tla ka um lai men thei.

Gradute ngah lak pawl
   March 6, 2008, Philippines ih um mi ¡°Manila Theological College¡±
kan laimi graduated mi pawl cu:
  1. Rev. Dr. Walter Myo Aung Ph. D. in Theology & Religion
  2. Pastor Mang Cuai Ph. D. in Theology & Religion (Falam Baptist
Church, Yangoon)
  3. Rev. Dr. Clifford Van Thang Ph. D. in Theology & Religion
  4. Mrs. Dr. Angela Than Than Ph. D. in Theology & Religion
  5. Mr. David Sian Hang Master of Theology (Th.M.)
  6. Pastor Van Lal Lawm M. Div. in Theology
  7. Pastor Sang Uk Ceu M. Div. in Theology
  8. Mr. Stephen Lal Ram Hngak M. Div. in Theology
  9. Mr. Simon Than Hu Luai M. A. in Theology

Kan lai mi pawl, kan men men lo. Pathian lam hruai nak hnuai ah hmai
kan nor sin sin pei uh !!!! Congratulation to all the graduates! To
God be the glory!!!!
  Nau pa,
Sang Sang

  Malaysia UN le Laimi Dinhmun
  – Reben Hrang
  Kan ruah vek a si lo ti hi Malaysia thleng thar pawl ih tongkam bik
asi. Laimi tam sawn Malaysia kan thlen nak cu UN ngah dingah kan ti
le’n a sual lo ding. Asinan, Kawlram ihsin kan rak ruah dan le Malay
thlen hnu si dan cu lei le van asi. Mi pahnih khat hrangah thingrah
til sar tluk in a ol lai ah mi tam sawn hrangah cun tupi sung ih
zukneng pacang kah tum vek asi.
  Malaysia cozah in UNHCR hi a laang te ih um a sian mi asi ih an ram
sungah reefugee le dik lo ih thleng mi an tam ruk ruangah UNHCR mawh
a phurh thlang. Malaysia ram sungah ram dang mi 2.5 million tluk an
um ih refugee 600,000 an um. Laimi refugee 23,000 leng lo kan um ih
zarhtin mi thar 100 hrawng an thleng ringring ti asi. a hleice in
Malaysia UN zung hi Laimi Khristian pawl duhsaknak hmun a si kan ti
le a sual lo ding. Ziangahtile UN zungah refugee  hrang tong lettu 37
an um ih cumi sungah laimi 23 an um.Asinan, UNHCR lam in Laimi pawl
Malaysia kan thlen dan an mangbang tuk thlang. UN lam ih sim dan asi
le nunau (rape case) hi lairam um ralkap hnak in an tam sawn ih awmna
hi laimi hmuahhmuah in an nei maw si ti ding khop in sii-lethmat a
cem thei lo. Thailand ram ah nauhak hlo a tamtuk thlang ruangah a
kham nakah nauhak lak nawn lo a si ih a lut cia pawl an nu le pa,
unau ben dingah kum khat hngah ter asi. Ziangvek case khal an lak tam
poh le an thleng tam sinsin ti a
sil.
  Refugee lam dinhmun thling thla tu pawl hmuh dan ah lamzin min hi a
min lai ah huahfai thluh tum asi le a min sinsin ti asi. Curuangah UN
pawl ti ngaihnak thei nawn lo in Kawlram mi pawl cu UN zung hmai
dansi nawn lo ding in kham asi. Malaysia zirnak lam company pakhat
hotu ih sim dan vek asile Laimi pawl in an vokte le arte hman taang
nawn lo in UN luh thluh an tum ruangah kan phit mi asi an ti ti asi.
Tu ahcun naupai, AIDS le emergency pawl hrangah sangka fate on sak
asi.
Curuangah mithar la nawn lo in UN card ngah cia pawl lawng
appointment pek in an sungkhat ben ter an si. February 12, 2008 ah mi
200 hnen ah pek zo asi ih March 11 ni ah 200 pek sal ding ti asi.
Appointment lak dan zoh tikah ben aw hrih lo case 1000 hrawng an um
lai ding ti asi. Tuah Malaysia ah Lai mi refugee registration tuah
hrih lo mi 20.000 leng lo kan um ih 2008 sung an lak dan ding hi zo
hmanih rel fiang thei asi lo.
  Mi tampi beisei dan ah cun mi hlun pawl an lak theh cun mi thar an
la ko ding ti ih zum cio asi. Asinan titi hrek khat ahcun kum 2008
sungah case 1000 lawng an la ding ti khal a um. UN lam ih thawmvang
theih dan ahcun Laimi pawl cu nan um hmun (community) ah lo tlawng in
kan lo la ding ti asi. Cuti asi ko nain ruah ding mi pakhat cu an UN
zung hmaiih security tha zet um cing hmanah vansang lamih nor awk
rero mi, nan hmun ah kan ra ding ti cu thil cang thei asi pei maw?
Ziang asi hmanah cuvek tikcu tak hi thleng thei leh hram sehla ti hi
Malaysia um Laimi pawlih kan thlacam mi asi.
  Malaysia Um Tikah Theih Tul Mi Pawl:
1. A malbik kum thum um dingin tim tuah aw, tum vek asi lo.
2. Case tuah fel fai ta lo in le a thei pawl rawn ta lo in UN luh tum
hrimhrim hlah.
3. Minit pa 5 interview hrangah ralring hmaisabik aw.
4. Nainganzi, ramhnuai mi, mi that, rukru thawn pehpar in case tuah
lo a tha.
5. Malaysia na thlen tikah taxi to ralring aw. Midum driver mawn mi
to hrimhrim hlah.
6. Taxi sungah tong tuk hlah. Rela hman mi an um (Palik zungah an lo
phurlut thei).
7. Zan khawthim hnuah vah lo a tha.Damiah le cianphaan palik
tonolteasi.
                     (Kan dung zarh sungih palik pawl ih an kahthat
mi misual pathum kha an mawtaw sungah palik thuamhnaw tampi a um ti
asi.)
8. Handphone man tamtuk lei hlah ! na veivah tikah paisa tam pai hlah.
   9. Na theih fiang lo mi hnen ah refugee na si thu sim hlah. UN
card nei khal kaih thei thotho asi.
  10. Palik, rela, na ton tikah zung thlen hlan ah tifel thei tum
aw.
                         (Zung thlen pang asile thla -6 ihsin kum- 10
tiang thawng tlak theih asi. Malay mipi tam sawn in an ram sungih
refugee tamtuk um an ning tuk thlang ti theih thiam a tha.)

Rual Kawmdan tha
  (Kan dung zarh peh)
– Falam Va Pual
  Ralbawi Lee le  thlanglam ralkap pawl cu an suak hlo thei. Cutikah
Lincoln a thinheng tuk ih hitin ca a ngan.
  Ka duhdawtzet mi Ralbawi Meade,
¡°Lee a tlan suak thei ruangah nehhnu ziangtluk harsatnak a rak
thleng ding ti na thei ding ah ka zum lo. Lee cu awl ai te ih kaih
thei mai dingih a um lai ah nan nehcia mi nehnak thawn do awla ralpi
a cem mai ding nan sikhawh. Tuvekin asile ziangtluk do awknak a sau
lai pei ti kan thei lo. A liam zo mi tlawngkai ni khat ni ah Lee neh
ko na do lo ih culai ih ralkap thenthum thenhnih lawng na hruai. Tiva
ral khat lam ahcun ziangtinsaw Lee neh ding in na do thei ding. Tu
ahcun thil pakhat khat pitlin ngaingai in na tuah thei ding ah ka lo
beisei nawn lo. Na hrangih can tha bik in a lo liamsan zo. Himi
ruangah kei khal sim cawk lo riahsiatnak ka nei¡±
  Ralbawi Meade in himi ca a hmuh tikah ziangtin a ruat pei.
Angaingai ahcun himi ca hi Meade in a hmu lo. Meade hnen ah a kuat
hrimhrim lo. Lincoln a thih hnu ah lincoln ih ca dang pawl lakah a
rak um mi an hmu.
  Ka zum nakah himi ca a ngan theh in White House inn sangka te ihsin
khuaram cuan in ¡° Aw asihrih lo ding, hitlukin manhlap a tul zik lo.
Keicun raldo dingah thupek a awlte ko nan, Meade ih a hmuhtawn mi vek
ralkap pawl ih thisen luang mi, an thih zawngih an tah awthawm,
hriamhma a tuar mi ralkap pawl hmuh ih hlei ah a nih vek ih ralhrut
ka si ahcun ka do ve cuang lo men ding. Ziangkhal sile a tlansuak mi
Nga cu tum zet hmansehla, a cem zo. Himi ca ka kuat asile keimah cu
ka hinhengnak a reh ding nan a siartu hrangah ninghan nak a suak
dingih ka mawh ngai ti hnakin a thiam thu a rel sawn ding. Cuihleiah
a ralbawi sinak ihsin hman a suak duh men ding tivek pawl a ruat
dingih amah le amah a thin dai dingin a hnem awk a si ding tin ka
ruat.
  Ziangruangah cutin ruat thei  tile a hmuhtawn zomi ruangah a si.
Midang mawhnak, an tlamtlin lo nak va tih lang ciamco nak in thil tha
a suah pi lo zia a thei fiangtu Lincoln cun a ca kuatlo in a ret sal
men a si ding. American President Franklin D. Roosevelt cun thubuai
hlabuai a neih tikah a umnak Inn Varpi (White House) rawl einak tlun
ciahciah ih a tar mi Lincoln zuk a zohih tui ka dinhmun le ka tawnmi
thubuai ah a nih sisehla ziangtin a tuah pei tin a ruat theu.
  Leitlun kan kiangkap ih kan pawlkawm rero mi milai pawl hi thudik
le dik lo thaten ruat thiam mi saram phun an si lo. Mai duhnak ih mi
fehpi duh mi, mah ruahnak lawng a dik tiih thuruah hmang mi, porh
awknak hlir ih a khat mi saram an si ti thei aw.
Curuangah  tling le tha  ih an theih awknak ah  sawisel le mawhthluk
hi cu an tuar thei hrimhrim lo ih an thih tiangin an lo hua ding.
Pathian rori hman in a ni neitabik a thlen hlan te ah mi pakhat parah
a tha maw tha lo simaw thuthennak va tuah  hlah ti ah Dr. Johnson in
a ngan.

  Chin Miphun Hrangah FRO
  Kan Falam mi hi Laimi thuanthu ah Laimi zate hrangah hnatuantu bik
le miphun hruaitu kan rak si ringring. Tuini khal ah kan miphun ih
auaw thei in FRO (Falam Refugee Organization ) in nasazet in hnatuan
a tum. UNHCR lam ah hrasatnak na nei a sile rak pan mai aw. Lo bawm
dingah Na hrang man cia in a um ringring.

  A suahtu        LCF, Malaysia
  Editor  Biak Chawn
Joint  Editor  Kawl Lian

Sumkil   Kawl Lian
Zemdarhtu            Obet Cungte
              Salai Liante

Calai kawmiti
         Johnson Liante
         Kawl Lian
         Mang Hlei Sang
         Biak Chawn
         Obed Cungte
  Advisor     Rev. Run Cung Mang
           Pa Tha Nei Thuam

Contact
     Hruaitu Thuthang
     42 A, Upper Ground Floor
     Wisma City Tower,
     JLN Alor, 50200
     Kuala Lumpur

Email : Hruaituthuthang@…
SMS : 016-972 3214 ( Biak)
  016-302 1254  ( Salai Kawl)

Comments

comments

Comments

%d bloggers like this: