Hruaitu Issue 173

Hruaitu Thuthang
  Issue 173
  2 March, 2008

  Zohfeltui’ Awkam

  Thinlung khaisannak

  Leitlun cu tawnawknak can a um vekin thenawknak can khal a um lo
theilo. Hmunkhat te ah kan um sung tawite ah kan hrangah a thupi mi
ziang a si pei? Kum 20, 30 lenglo kan khua le kan ram ah mah le
hnatuan cio tuan in kan um, kawhhran le khawtlang ah siseh tuanpi
unau pawl thawn hna kan tuan tlang. Tidan le tuah dan a phunphun kan
nei. Mi hrek khat phei cun kan mai tidan lo a dang kan thei lo ih a
tha bik ah a ruattu tla kan um.

              Asinan hmundang, ramdang ah kan thleng ih kan khua le
ram ih kan tuahdan vekin kan kawhhran, Fellowship le community a
phunphun ah an rak tuah nawn lo. Cu pawl ih tuahdan cu a mawi lo, a
tha lo kan ti thei kem? Leitlun ah  saduhthat vekin tuah thei mi le
tuan theimi cu kan nei cio lo ding nan, a tha theibik a mawibik le
zoh cobik in tuah duhnak, hlawhtlin duhnak thinlung thawn tuah cio cu
a si ko ding  a zum um.

              Midang ih an tuah mi a thatnak lam zoh tum ve dah lo,
Biakinn khawm tik khalah a sawisel ding lawng zoh herher tivek, mi
dang ca ngan mi khal ka hrangah thathnemnak a um pei maw ti ih siar
lo in a sawisel lam tum cia ih siar tivek hi thil um thei a si. Rem a
tul mi pawl cu rem ngamnak thinlung kan neih vekin, kan mai tidan lo
vekin mi dang khal in kum tampi le thla tampi caan tampi an rak hmang
ih hna tampi an tuan suak ve a si ti khal theihhngilh lo sehla.
Midang mawi deuh ih hmuh tumnak thinlung khal kan neih thei a tul ve.
Kan mai mit lawng hmang in khua cuan loin, midang mit bun in khua kan
cuan khal a tul nak lai tampi a um.

            LAITLANG  DEIREL  ARSI
              *          Aw……
                          Nang Rev. Nung Kam
                          Kan lai miphun lakah
                          Pathian thu le calai ih
                          Kan pa bik miangmo ah
                          Na tling ko ee, na tling ko ee
                          Laitlang Deirel Arsi.
              *          An sim theu Deirel Arsi
                          Arsi lakah a cuang ce tin
                          Hmanseh…..
                          A cui Deirel Arsi hman
                          Na hmai ahcun a cuang ce lo
                          Kan lai miphun hrang.
              *          Laitlang Deirel Arsi, sian lo cing in
                          Mualza in liam san ta maw
                          Hawi lo par ton in riahrun
                          Na pai tang nuam sung ah
              *          Mual na liam hnu, na te fa rual tlan
                          Na sulhnu le zunthing tuar in
                          Nuar nei nau hniang bang
                          Tah zai kan sam ee
              *          Aw…..
                          Nang Rev. Nung Kam
                          Lai sem hrin hniang kan pa bik
                          Kan hngilh siang lo ee
                          Lai tlang Deirel Arsi tin
                          Kan ro lung dawl ah
                          Na hmin a cuang ding
                          San khuk tiang in.

  Salai J.V. Mawi

            Crusade Zuun

    -Van member

              + Crusade tuah tu Evan. Aw kam
               Hnathlam ah a caam.
              + Crusade tuah tu saya hmui hmel
              Mitthlam ah a zeel.

              * Crusade tuah tu a um lai ah:
              Piang thar lo ti ka phangih,
              Piang thar in ti vang seh ti’n
              Phuur aw ter,zuam aw ter in
              Tei ma aw ter re ro nan…,

              * Crusade tuah tu a um lo hnu:
              Zin kap ih tla mi Thlai ci bang kan hlo.
              Lungsedaap ih kho mi Thlaihnah bang kan caar.
              Hlingbur ih zaap mi Thlai kho bang kan taang.

              + Ram tthat nak ih a kho mi Thlaici bang,
              A let zakhat,A let sawm ruk
              A let sawm thum rah suah tu cu…;

              Crusade Zuun

  Khrih ih Thiisen le a Hmual

  – Rev. Run Cung Mang

  “Kan Lantaak Puai Tuufano a simi Khrih cu raithawinak ih peek a si
zo”(1Kor5:7)
  “A lo luatertu cu a sunglawimi Khrih Thiisen a si..”(1Pet.1:19)

  “Tuufa Thiisen le Thutak an phuannak thawngin nehnak an ngah
zo”(Rev.12:11)
   Thuhmaihruai

  Jesuh Khrih Thiisen cu zumtu in kan rundamnak, kumkhua nunnak
vanram kan luh theinak, kan suanlam le kan nehnak a si. Khuahlan kan
pupa pawl ih ttongfang pakhat ah, “thluasuah vanluhnak” an timi hi a
dikzet. Thluasuah kan timi ahhin thlarau-thinlung-taksa rundamnak
famkim a tel thluh. Rundamfa kan sitheinak hi Khrih kan zumnak
ruangah a si. Hih leitlun ah hnangamzet ih kan tlanleen theinak khal
hi Khrih thiisen kan rinnak ruang thotho ah a si. Caan netabik ah A
hnenih ngamzet ih kan luh theinak ding khal a thiisen sunglawi kan
suanlam ih kan hman ruangah a si ding. Bawipa Zaanriah: “Sabit le
Sangreu” kan hman tinte’n Khrih ih Thiisen le a hmual hi thupizet ih
kan ruah ringring a ttul.

   1.   Khrih Thiisen cu kan Passover

  Thukam Hlun Seem. 3 sungah, Eden duum sungih mawh nei lo rannung
thiisen in Adam le Evi a rundam ti kan hmu. Suah.12 sungah, Isreal mi
Egypt sal ih an taannak ihsin luatnak an ngah saal theinak dingah
Pathian in Tuufano Thiisen a hmang ti kan hmu. Inn sangka tung le
phei ih thiisen hnihmi in Pathian thinhennak ih siatsuahnak ihsin
Israel mipi a rundam.
  Thukam Thar ahcun Calvary thinglamtah parih Jesuh Khrih hnak sung
ihsin a luangmi thiisen cu misual kan rundamnak a sizia a tarlang.
Paul in, “Khrih cu kan Lantaak Puai Tuu Fano” a si, a ti (1Kor.5:7).
Hebru cangantu in, “Thiisen luang loin sual ngaidamnak a um lo” a ti
(Heb.9:22). Curuangah, Pathian in kan rundamnak hrangih in remruahmi
cu kan Lantaak Puai Tuu Fano Jesuh Khrih ih thiisen sunglawi lawng hi
a si.

  Passover hi na hrangah sullam neimi ttongfang  a si zo maw? A si
hrih lo pang asile tuni rori ah Jesuh Khrih cu “i Runtu le ka Bawipa”
ti’n cohlang thlang aw. Na cosaang zo asile nitin na nunram ah atak
in langter aw. Halleluijah! Pathian hmin sunglawi sinseh! Jesuh cu
kan hrang Pathian remruahmi Lantaak Tuufano (Passover Lamb) a si!
  2.  Khrih Thiisen cu kan Passport

  Tusan ahcun mikip in “Passport” timi ttongfang hi kan thei thluh ti
sehla kan palh lemlo ding. Ahleice in santhar mi tampi cun a theih
lawng hman si loin kan kai in ka tthathnempi rero zo. Passport,
Visa,… tivek pawl hi mipi tamsawn ih theihmi a si zo. Hih Cabute
(Passport) hi a olbik in kan sim asile ram pakhat ihsin a dang ram
pakhat feh theinak a si. Passport nei loin na ram ihsin a dang ram
picang pakhatkhat ah na tlawng thei lo ding.

   Jesuh in, “Keimah cu Thutak, Lamzin le Nunnak ka si, Keimah loin
zokhal ka Pa hnen an thleng thei lo ding,” a ti (John 14:6). Jesuh cu
vanram fehnak dingah kan Passport umsun a si. Jesuh Khrih siar lo
lamzin dang a um lo. Na Kawhhran le Pawl (Church & Denomination), na
thurin le na felnak, na zuamnak le milai tthatnak in vanram feh
theinak a um hrimhrim lo.
              Hih leiram a laangte kan umnak hmun ihsin kumkhua a
hmunmi vanram kan feh theinak ding umsun cu Jesuh Khrih kan zumnak
lawng hi a si. Zumtu hrangah leiram ihsin Vanram kan thlen theinak
ding kan Passport cu Jesuh Khrih hi a si. Duhdawt mi unau, Vanram
kainak dingah Passport na nei zo maw? Na nei hrih lo asile atu rori
ah Jesuh Khrih cu i Runtu le ka Bawipa” ti’n zumnak thawn cosang
thlang aw. Culo asile khua na tlai pang ding! Na nei felfai zo asile
hman  theih ringring dingin nitin tharter saal (renew) aw. Nitin
humhim mi na sitheinak dingah Jesuh Khrih Thiisen huham kha na
Passport ah keng ringring aw.

  3. Khrih Thiisen cu kan Password

  Atu kan san, kum zabu 21nak Information Technology (IT) san,
Internet E-mail le Computer san ah lo theih lo ih hman ttulmi
cu “Password” hi a si. Ahleice in Internet le E-mail a hmangtu poh
cun kan thei cio. Password lo cun  Internet hman a theih hrimhrim lo.
Interne zoh duh le E-mail kuat duh ahcun “user name” le “password” cu
lo theih lo ih ngan rori a ttul. Mihrek cun an computer midang in zoh
thei lo dingin password an ret ttheu. Password hngilh pang ahcun mah
lala hman in computer le e-mail hman a theih lo ding.

  Zumtu thlarau nunnak thawn tahtthim sehla, Khrih Thiisen cu ni
netabik vancungram saangka luh theinak dingih kan sim dingmi
ttongthup (password) a si. Vanram nuam ih luh theinak dingah na hman
dingmi password ding hi ziangmi a si pei? Kawhhran pakhat ih sungtel
sinak le na tuahtthatnak pawl tla na rinsan ih password ih na hman
cetci ahcun na mualpho tengteng ding. Vanram luh theinak password
umsun cu “Jesuh Khrih Thiisen” lawng a si. Bible in, “A lo luattertu
cu a sunglawimi Khrih Thiisen a si,” a ti (1Pet.1:19).
  Veikhat ah Pastor, Deacon le Pitar nu an thi ih vanram luhnak
sangka ah an tong aw ti a si. Sangka kiltu vancungmi in Pastor pa
kha  password a suh tikah Pastor pa cun, “Kei cu Kawhhran dinhtu le
hotu lubik ka si,” a ti. Cutikah vancungmi in, “A ngah lo, sorry” a
ti riai. Cule Deacon upa caan a thlengih anih cun, “Kei cu hotu ka
si, thawhhlawm tampi ka peek” ti’n a sim. Cutikah, anih khal cu “Na
lut thei lo, sorry” ti thotho a si. A netabik ah Pitar nu ih caan a
thleng ih anih cun, “Khrih Thiisen” ti’n a sim. Cutikah vancungmi
cun, “Na sim dik, kumkhua nunnomnak sungah lut aw,” a ti. Duhdawtmi
zumtu, Khrih Thiisen sunglawi lawng hi kan Vancungram luhtheinak
Password umsun a si.

  Thutlangkawmnak:
              Bible thiam thlaraumi mi hminthang Dr. Bob Gordon
in, “Jesuh Khrih ih Thiisen khihhmuhtu Bawipa Zaanriah in kan
thinlung khuaruahnak hmunnga ah in hruai” (five directions) a ti:

  A pakhatnak, Dunglam in hoikirter saal ih Calvary Thinglamtah ih
tlennak in mangter saal;
  A pahnihnak, Tlunlam in cuanter ih a zaangfahnak ruangah Pathian in
thangtthatter;

  A pathumnak, Kiangkap in herter ih zumtu unau tampi ruangah
lungawithu in simter;
  A palinak, Sunglam nun in cekfelter ih sualsirnak le tangdornak
thinlung in neihter;

  A panganak, Hmailam in cuanter ih Khrih ratsaalnak ruahsan in
pumpeek nun in neihter.

   Duhdawt mi zumtu nu le pa u le nau pawl, Bawipa Zaanriah kan hman
tikah, Khrih Thiisen sunglawi cu kan Luatnak Passover, kan Zalennak
Passport, le kan Tongthup Password a sizia thei thar ringring uhsi!
Khrih Thiisen ih mankhunzia le thiltitheinak cosaang in lungawi
aipuangzet in Bawipa cu thangtthat aw!
  Pathian in thluasuah malza in sawmsak hramseh!

  LEITLUN  THUTHANG

  Turkey cozah le Kurdish tapung do aw vivo :

  Iraq sak lam, Turkey ram Cukurka khaw kiangkap ih tlangram ah
Turkey cozah cun helicopter, vanzam le pukpi ( artillery ) pawl cu
Kurdish tapung pawl do nak dingah a hmang thawk. Kan dung tlawngkai
ni li ihsin Turkey ralkap 7 le kurdish tapung 79 lai an thi zo.
Kurdish lam thuphuangtu cun ralkap 15 that zo vekin an sim.

  Baghdad ah bomb phuah tam :

   Iraq ram sung ahcun a phunphun in bomb phuah vivo a si ruangah
milai tampi in thihnak an tuar rero. Kan dung tlawngkai ni nga ihsin
lamzin pi parah thirleng ( bicycle ) mawtawsaikal ( motorcycle ) le
rang leng ( horse cart ) khal feh lo ding in dan an tuah. Kan dung
tlawngkai ni li-ah rang leng hnuai ihsin bomb an phuah sal ruangah
himi dan hi tuah a si ih, mi tampi cun harnak an tuar rero.

  Colombo ah buainak tum deuhdeuh :

  Sri Lanka ih Tamil Tiger Force le cozah ralkap pawl do awk nak cu a
roh deuhdeuh. kan dung zarhpi ni-ah ralkap 40 le tapung 39 an thi.
Kum 1999 ihsin Tamil tapunng pawl hin thungai thlak in cozahpi cu an
do ih, kum 2000 hrawng ahcun an khawpi Colombo tiang an kulh zo.
India ram Prime minister Indira Ghandi le a fapa ( prime minister
thotho ) Rajib Ghandi te pahnih thattu khal Tamil tapung pawl hi an
si.

  Tuluk ram nikhua ( climate ) cu a se deuhdeuh
            2008 world olympic game thlengtu ding Tuluk ram cu nikhua
siat tuk ruangah a buai rero. Milai 159 an thi zo ih, 7 cu an hlo,
1,700,000 cu an um nak thawn sak an si zo. Tuluk ram hi August ni 8
ah Olympic awn nak puai tuah ding in a timtuah rero lai a si.

  Muslim tlangval pawl Fala ter ruangah mi 57 kaih an si :

  Saudi Arabia ram Mecca ah tlangval pawl in super market hmai-ah
fala an rak ter ih, biaknak lam palik pawl cun mi 57 an kai. Mecca hi
muslim biaknak ahcun khaw thianghlim a si ih, lamzin ah mawtaw sungah
pop hla lam vawn play le mirang ca ngan umnak T-shirt hruk tla kaih
an si tiah ramsung thuthangca `Okaz’ cun a ngan.

  Jackie Chan ih pa a thi :

   Jakie Chan ih pa Charles Chan cu kan dung tlawngkai ni hnih ah
HongKong sizungpi ah a thi. Charles hi kum 93 a si. 2004 ah Jakie
Chan cun a pa’i kum 90 nak birth day lawmnak  tuah in Malaysia ah
caan an rak hmang dah.

  East Timor tapung pawl ramdang in an bawm maw? :

  Timor Lest security force pawl cunkan dung tlawngkai ni thum ah
ramdang mi umnak in-ah ralkap uniform zun 500 le meithal tampi an kai
ngah tiah Joint Commander Filomeno Paixao cun news agency pawl a sim.
Ramdang mi hi khawitawk ram mi a si ti cu an sim duh lo.

  Suu Kyi tawng ding in timtuah :

  Indonesia Foreign minister Hassan Wirayuda cun tikcu caan remcang
hmaisabik ah Kawlram NLD leader Aung San Suu Kyi tawn a duh thu kan
dung tlawngkai ni li-ah a sim. Hi thu hi kawlram foreign minister
Nyan Win ih thu sim a theih ruangah a si.
  Nyan Win cun Kawlram dan thar tuah tum vek in  a cu zo a si tiah a
sim bet.rampi kan feh thei a si ahcun 2010 ah rampi hruaitu ding
hrilnak kan nei thei ko ding. Sinan, Aung San Suu Kyi cun ramdang mi
pasal a neih ruangah hruaitu si ding in hril thei a si lo men thei
tiah a ti. Hassan Wirayuda cun Kawlram thuhla hi ramdang mi hrang ah
le a ramsung ih miphun malsawn hrang khal ah zum tlak rori in Asean
pawl hin kan tawlrel sak

  Singapore ah tapung cangvaih nak um an tih :
              Singapore ih  Jemaah Islamiah ( JI ) ih hoha tu Mas
Selamat Bin Kastari cu a thiltuah tum ruangah an kai zo nan, kan dung
tlawngkai ni li-ah a tlansuak sal. An ret nak in-pi hi Nepal (
Gurkha ) security pawl cun an hual thepthep ko nan zianghman an thei
lo. Mas hin midang thawn tuantlang ih Singapore vanzam cu ruksuah (
hijack ) ih Changi airport siatsuah tum a si.

  Thaksin an ramah a kirsal :
              Thailand prime minister hlun Thaksin cu Hongkong lam ah
kum khat zik te a um hnu-ah an ramah a kirsal. Amah upat tu le ram
uktu pawl cun sunglawi zet in an rak hmuak nan, amah duhlo tu pawl
cun san-dah-piah nak ( demonstration ) an rak nei ve. Thaksin hin an
ram a thlen ve ten, ralkap pawl in tangka eiru ih an puh nak cu
thuthennak in-pi ah tawlrel ding in `court room’ a pan cih. Thaksin
le a nupi Pojaman hin, sualnak an rak nei pang a si ahcun kum 15
tiang thawng thlak thei an si ding.

  THEIHKAU NAK  LE  RUAH DING TAM

  1.         Kum 1983 February 22 ah Donald David cun minute 6 le
second 7 sung ah dunglam zawng in ( backward ) peng khat ( 1 mile ) a
tlan thei ih, hi hnak ih tlan cak an um hrih lo.

  2.         Kum 1979 February 19 ah leiltun ih nelrawn ( dessert )
kau    bik le sa bik Sahara ( Africa ) ahcun vur ( snow ) a tla ve.

  3.         Kaileng ( kidney ),milai tuah cawp hi kum 1949 ah
Milwaukee hospital, Wisconsin, USA ah an rak hmang thawk. A hmaisa
bik a thleng mi cun nazi 3 sung a awh ih, damlo cun a thihpi cih.

  4.         Mother Teressa cu kum 1986 ah Vatican city-ah pope John
Paul II cun `mi thianghlim sinak’ ( saint title ) a rak pe. Catholic
history ahcun Mother Teressa khawmpi nak caan hi a tawi bik ti a si.

  5.         Palik cun a tlangpi in misual hawl nak ah kutneh le
keneh an hawl theu nan, Burger Calvic Sewell cu leitlun ah `hna neh’
(ear print ) thawn an hawlsuah le kaih hmaisak bik a si. Calvic hin
hmun dangdang ah thil a fir hlan-ah phar le sangka ihsin thawmvang a
ngai hmaisa theu ruangah, a hna-neh vek hi hmun 13 ah hmuh a si.

  6.         Leitlun history ah a hmaisabiknak dingah  747 jumbo jet
vanzam, biofuel   thawn London khawpi ihsin a zam ter. Bio-fuel hi
thingrah le thil dangdang ihsin ngah thei mi oil le kerosene ( zi-
naan ) rawi mi a si ih, vanzam cu zoh sinnak ding a si ruangah a
sunga ahcun milai an tel lo. Vanzam hrang ih bio-fuel an tuah hmaisa
bik cu coconut oil le  babassu oil ( hihi hmur thuh lip-balm le
khahmul meh nak `shaving cream ah a tel tam zet ) an hmang. 24 Feb.
2008 1200 GMT ( Malay 8 pm ) ah Heathrow ihsin a zam ih Schipol ah
tluang ten a tum sal.

  7.         Thilnung fate bik, virus le bacteria pawl hi milai hrang
ih thathnemnak in pe thei dingin hman an si theu ih, cuvek hman dan
le tawlrel dan cu `biotechnology’ ti a si. Hlanlai ihsin hanghnah
hangrah lam tuah thatnak dingah caw ek le buh pawl an rak hmang theu
vekin tulai san ahcun virus le bacteria phunphun thawn thil tampi
tuah thei a si. Bacteria le fungi ( microbes ) pawl thawn `wine,
cheese le dawitel sang  ( laven bread/yeast bread ) tuah a si. Virus
hrekkhat cu natnak khamtu dingin `vaccines le antibiotics tuahnak ah
an hmang. Microbial enzymes thawn puansawpnak le thildang khawlhnak (
detergent powder ) tuah a si ih, tidai bal tuk ( sewage ) thiangfai
ter nak ding in bacteria hman a si.

  8.         Na hrangah thansonak ding khua a tlai dah lo ding ti na
fiang theinak dingah, leitlun mi hminthang pawl, mi theih an si hlan
ih an hnatuan hi cing ringring aw: American president Ronald Reagan
kha a hlan ahcun zuknung lamah actor ( min-taa ) a rak tuan dah.
James Bond film ih actor Sean Connery kha caw-hnawi zuartu (
milkman ) a rak si theu. Adolf Hitler kha zuk a phunphun ngan tu (
painter ) a si ih, cui hnu-ah thuthangca zuartu a tuan. Tulai zuknung
ih larzet `Rambo’ ( Sylvester Stallone ) cu `Gym teacher’ tuan in ei
a rak hawl theu. Cui hnu-ah painter hna a tuan ve. Dustin Hoffman cu
restaurent ah waiter a tuan theu ih, Martin Luther kha kutdawh nauhak
a rak si dah.

  9.         Leitlunah kum zabi 1 nak ( A.D ) ihsin kum 100 sung ih
linghnin ( earthquake ) zat cu a let khat  in a tam vivo ih, 19th
century ah vei 5000 hnak in a tam ih, 20th century ah vei 10000 hnak
in a tam. Linghnin cu `richer scale’ in tah theu a si ih, 5 rsc tiang
cu milai hrangah thil pawi tuk a thleng lo. Kum 1960 ih Morroco ram,
Agadir ih second 15 sung linghnin ruang ih milai thawng 12 thihnak cu
a rapthlak bik ih theih a si.

  MIFIM PAWL  TONGKAM  LE  THUFIM

  1.         Vanram cun a hnen ihsin suahsal nak ding sangka tuah a
tul lo ih, Hell ram cun suahnak sangka cu a tul tuk nan a nei
lo.                       – St.Augustine
  2.         Thlacamnak cu vanram naihnak a si ih, zumnak cu vanram
sangka in ong saktu a si. – St. Patrick
  3.         Zumnak upat ringringtu cu, cui a zum mi cun upat nak a
pe ve ding. – Mary Webb
  4.         Pathian hnen ih beiseinak nei ringringtu cu a beidawng
dah lo. – Lewis
  5.         Maw Bawipa, ka liang parah na baan kha ret ringring aw
la, ka hmur kiangah na kut umter ringring aw. – C.J.Coley
  6.         Pathian hmai ih khukbil thei ringringtu cu midang hmaiah
an dingsuak thei ringring ding. – Ivankova
  7.         Duhdawtnak cu in sungsang ihsin a um thawk ih, sinan,
cutawk ahcun a cawl ding a si lo. – Lincoln
  8.         Sumpai cu kawlnam ( namtawng ) hnakin a hriam sawn. –
        Ashanti proverb.
  9.         Pathian ni lamzin nuam in khihhmuh lo nan, cawlhnak nuam
cu in kam mi a si. – Billy Graham
  10.       Na caan lianzo mi cu na rem sal thei lo nan, na hmailam
caan na tih ruangah na tikcu caan hmanlai kha na siatsuah thei. –
                      Harry Scism.
  11.       Minung lamzin cu beidawngnak in a cem tiang in hruai,
Pathian in lamzin in tuahsak mi cu cemthei loruahsannak
in                    a khat.  – R.D. Emerson
  12.       Milai cun a kutah zianghman a um lo hnu lawngah Pathian
kut ah aap luh awk a duh theu. – Terry Hugy
  13.       Kei in thei ih, in hngilhsal a si ahcun, na zianghman a
hloral lo, sinan, Bawi Jesuh thei zo hnu-ih na hngilhsal ahcun na
n                        eih hmuahhmuah hnak ih tamsawn a hloral a
si. – John Wesley

  Khawruah har thu pawl

  1. Peknak
  A hlu pek dingah cun $ 10 cu a tam tuk an ti nan,
  Dawr fehnak ah cun a mal tuk an ti.
  $ 5, 10, 20 pawl tla an khawm paih ve nan,
  Fangkhat ca lawng khawm ding in an hnek.
  2. Khawm
  Zumtu pawl Biakinn sung ih nazii pa 2 to cu a rei tuk an ti nan,
  TV le zuksin an zoh tik ah cun, pa 2 cu kan khawp lo an ti.

  3. Thlacam
  Thlacam tikah a cam ding an thei lo nan,
  Rualpi hnen ttong ding cu a cem thei lo.
  4. Bible siar
  Bible bung khat siar ding cu a tamtuk an ti nan,
  Vuatthuh ( novel ) uk khat cu a siar an khawp lo.
  5. Khawm tonak
  Khawm tikah hmuah dung tabik ih to an cuh aw nan,
  Nomnak puai ah hmuah hmaibik to ngah an cuh aw.

  6. Midang simding thu
  Pathian ih duhdawtnak an tehmi cu midang sim ding hartuk an ti nan,
  Midang relsiat ding cu a nuam tuk in an thei.
  7. Zumnak
  Lei tlun thuthang pawl cu an zum an awl zet nan,
  Pathian tongkam ih simmi cu a cang thei lo tiah an el.
  8. Rundamnak
  Kumkhua nunnak neih ding cu an duh cio nan,
  Jesuh ih thihnak ruangah sual ngaithiam na si zo ti cu an zum duh
lo  .
  9. Hnipuan le ttong
  Hnipuan hruk dingah hmuah a mawi bik, a tha bik, a thiang bik an
hril nan,
  Ttong dingah hmuah an ttongka an hril dah lo.

  9. Email
  Hnihsuah sainak capo thu pawl cu email ih kuat sin ding an paih zet
nan,Pathian thu kuat dingah cun, vei hnih thum an ruat ta.

  Note: himi hi midang ta ka lehmi le keimah ih ka betmi a si.
  Ka lungawi,
  Carpenter

  Rev. Nung Kam ( Lairam Deirel ) in thih san

              26-2-08 Zanlam 4:00Pm hrawngah Tahan ihsin Vutbuak ah a
feh. EFCMQuarter ah a thum aw ih rei lote sung a colh hnu in a cabu
zuar dingkengin GBC biakinn lam a pan laiah a tlu ih biak theih nawn
lo in aum. Wesley Motor thawn an va hruai zik ih a thaw a rak cem zo
ruangaharuang hi Myohla ih an inn ah phurh cih a si.

  A fapa Evan. Ngun Tuan Thang INcinkhung ih crusade tuah rero lai
khalZan 10:00 Pm ah inn a ra thleng thei. A fapa Evan. Thang
  Hlei Ce hi Lairal tlang, Tlangkawi khua ah Crusade nei in a um rero
lai. A fanu Than Mawi le pawl Aizawl ih sin an ra tlung rero lai.
Thla campi cio uh si. An pafa za in Pathian thu karhzainak hrang hna
tuan rero ih an rak umhi a ropi riai a si.
  Pathian in a ruang khal a cawimawi ih Mipi tam zet in hlunghlai zet
inlenkhawm hla thawn zan men a si.

  Rualpi Kawmdan Tha   (Let ling mi)

  – Falam Vapual

  1931, March 7 ah New York khawpi ah ahlan ih an hmuh dah kel lo
mi “misualkaih”nak ropi zet a um. Zarh tampi kai ding ih an hawl mi
zu in le kuak fawp dah lo ,  asinan Meithal pahnih a kai mi pa
Crowley cu a fala hnen ih a len lai Palik pawl in an kulh ngah. Inn
sawng sangbik ah Crowley cu a relh ih palik 150 rual pawl cu a rak
kap ciamco. Cuti ih palik thawn an kap awknak cu mipi thawnghra
lenglo in an zoh hliarhliar.

              Crowley cu an  kai ngah ta riai. Palik bawi Mulrooney
in Crowley   cu New York khawpi ah a tihnung bik mi mithat cazin ah a
ret. “Hipa ih tihnun zia cu vate hmul tlak men hman kahthat a tum
ding” a ti. Asinan Crowley a mah le amah ziangtin a ruat aw ding na
zum? Palik pawl a umnak khan sung an lut ih an hmuh mi cu an kap awk
lai ih a ngan si awm tak thisen in a luan mi “A pehpartu hnenah” timi
cakuat sungah cun “ka thinlung muril sungah a nemzet mi thinlung,
thinnem lawng hman siloin duhdawtnak a um ih zohman tihnat a siang
lo”timi an hmu.

  Himi Crowley an kaih  hlan te ah sualnak a tuah mi cu Long Island
ih khawte lamzin pakhat ah feh in lamlak ah a cawl. Culaitak ah Palik
pakhat in ” zangfahten na mawtaw mawnnak laisin ka zoh thei pei maw?”
tiah a sut. Crowley cun zianghman tong loin a methal cu  a lak ih a
kap that men. Hitluk ih misual nunrong tak mai cu an kai ih that ding
in Sing Sing thawnginn pi ah an ret. Cui lai ah ziangtin a tong
tile “hitivek ih that ding ka sinak hi keimah in mi ka that ruangah a
si a ti lo. Ka nunnak ka humhim awk ruangah thah tiang ka tuar ding”
a ti. Hitluk ih mithat,misualpa in a mah le mah “ka sual ngai” a ti
aw lo.  Misual ret khawmnak Sing Sing Thawngtla kil Bawi Lawes cun
Himi thawnginn pi sungah thawng a tlak mi lakah mi malte lawngin ka
sual an ti awk thei a ti. Mi tampi cun an sualnak hnak in an thiam
thu an sim tam sawn. Hi pawl hi kan mah vekin thisen,taksa le nunnak
a neitu an si ve. Hitluk misual thuthennak zung ihsin kumkhua
thawngtla ding in le thi ding ih thu
an rel sakmi pawl hman in ka mawh ngai an ti thei lo ahcun kan
kiangkap ih um nitin thiltha ka tuah a ti aw pawl cu sim ding an um
lo.  Vei 100 an tuah sual mi ah vei 99 cu an mah le mah sual in an
thei awk lo hrimhrim. Cumi rori cu na sual,na palh le na mawh kan va
ti ahcun an duh pei maw?

  Mawhtluk awknak hi cu a lak men a si. Kan mawhthluk mipa ih sinak
kan thumsak a si ih amah le mah a zum awknak thinlung khal kan nat
ter, kan riahsiat ter. German ralkap lakah thinhengnak thuhla
pakhatkhat a um tikah a cawpcilh in mawhthluk le upa hnen ah thlenpi
lo ding timi dan an nei. Thinhengnak a suak mi daita ding in zan khat
hngak ta ding a si. Cawplecilh ih upa hnen thlentu pawl sawn riangri
cawhkuannak (dantat) an pek.

  Midang sual puh, dem le mawhthluk mai a that lo zia theitu Sal pawl
zalennak sual suaktu Abraham Licoln ih thula zoh sal sehla. 1842 ah a
mah le mah a duh awk zetmi, a zum awk zet mi James Shields timipa
Island ramthu thiam (Politician) cu Springfield Jounal ihsin Lincoln
in zawmtaihnak le rohnak ca a ngan. Cumi a siartu pawl cu an hnihsuak
theh. Cutikah James Shields a thinheng ih hmun fianrial ah Rang par
to in nam thawn sat that awk dingah an pahnih lungkimnak an nei.
Atikcu can a thlen taktak tikah an mah kil khawi tu pawl
              ruangah an lak ah thah awknak thleng lo ten a um thei
sal. Hitivek ih rapthlak a hmuh tawn mi ruangah Lincoln cu a nunnak
ah thu tampi a sim ih midang sual puh, mawhthluk pawl hi a duh nawn
lo.
  Abraham Licoln cu America President a tuan thawkin Sal luatnak a
tuah tikah an ram sungah ralpi a suak. Sal neih duh pawl in ral an
tho ih methal an kai. Lincoln ih ralbawi Mc Clellan, Pope, Burnside,
Hooker le Meade pawl pakhat hnu pakhat ral an sung vivo.

  Lincoln khal a beidawng tuk. Mipi hrekkhat pawl in ral sungtu ral
bawi pawl  ih an san tlaih lo zia pawl  an rel ih an thinheng zet.
Asinan Lincoln cun a hua hai lo ih duhdawtnak le lainatnak thawn
daiten a um. A nupi le midang pawl in thlanglam ral tho pawl an
mawhthluk le an thatlonak an sim hmanah “Nan mah le nanmah sual nan
puhawk duh lo vek in midang sual va puh hlah uh” a ti. Cuihleiah ” An
dinhmun ah kan ding ve sehla an mah vekin kan um ve ko ding sokhaw”
ti ah a ti bet.

  Veikhat cu 1863 July ni 3 ah Gettysburg ah ral do awknak a thawk.
July ni 4 zan ah ram pumpuluk in ruah tak tuk a sur ih Ti a lian
theh. Cutikah Thlanglam ralbawi Lee khal thlanglam ram pan in dung a
tawlh.Potomac tipi kap an thlen tikah Tipi cu tan / kan thei ding
asilo ih dunglam ihsin acozah ralkap in an dawi fawn, ti ngaihnak
thei lo in an tartahak. Himi dinhmun ah ralbawi Lee le a ralkap pawl
cu nam lohli sehla kaih theh mai ding an si ih ram sung ralpi khal a
reh/cem mai ding ti Lincoln in a thei. Cutikah a ralbawi Meade hnenah
raldo dingih meeting thurel rero tul lo in nawr lohli dingah thlirhri
a thawi. Mi pakhat khal ralbawi Meade hnen feh in ral pawl zamrang
dawi vivo lohli dingin a fial ter ih  theihternak ca a pek.

  Ralbawi Meade cun Lincoln ih thu thlun lo in raldo nak hrangah
meeting  a ko. Ral do lohli dingih a remcan lo thu a sim. Zamrang ih
do ding mi can saupi a hnuk. Cutikah Ruah a han ih tidai  a kang vivo.
( peh leh ding )

  TLANGVAL  LE  FALA  THUHLA  THEIH TUL

  ( Kan dung zarh ta peh zawm nak… )

  Pathian dan kan zoh ahcun, “Pathian nih a kawm zo cu minung in then
hlah seh” ti kan hmu. Khatlam zawngin vawn ruat sehla, minung duhdan
ih then awk thei a si ruangah hi thu hi a um a si tiah kan pawm a
tul. Nupa duhdawt aw zet, mi hmuhdan le theihdan ih hlim thei zet
khal in, a thupte in, an pahnih kar ih simtlak si lem lo ih an theih
mi pawl cu midang hnen ah simding tampi an nei theu.

  A tlangpi in, mipa in nunau OR a nupi thawn pehpar aw in, a duh lo
zawng le a rem thei lem lo zawng, nunau theih ding ih a duh mi pawl
cu: 1) Sungkhat unau le thil dangdang thuhla-ah thusim tlang ringring
tul theu hi,..nunau hin thil cu an si dan vek in an fehpi ve mai lo
ding maw? 2) Thilri pakhat khat lei ding in, a man awl bik duh ruang
ih hmun dangdang ih hawl rero hi tangka an ren awk tuk ruangah a si
lem lo a bang! 3) Thlalang ( mirror ) hmai-ah reipi zoh awk an hmang,
an danglam cuang fawn

  silo.
   4) Mipa par ih thikthu se ringring nunau hi duhdawt ngaingai ding
cun a awl lem lo e,
   5) Duh awk hlan hmuahhmuah ah thil tampi tul dah lem lo, duhdawttu
neih ve ten tulsam mi nei tam deuhdeuh nunau pawl hi ziangtin tuah
tha?!

  6) Mipa in ziang tluk in induh ti theih duh nak ruangah thil tul
lem lo le nin-um a phunphun tuahter tu an si-nak khal hi.
  7) Harnak pohpoh mahtei ruah tum nawn riai lo, mipa liang parah lu
ret in, mitthli malte thawn in lem ih, ruahpi an tul ringring tla hi,
na ruat ve dah maw?
  8) Thuamhnaw mawi zet cu an vawn hru ve theu nan, anmah thawn rem-
aw ( match ) ciah lo tla, sim ngam an si lo theu; sim khal len a lung
cuang lo.
   9) An duh lo zawng thil pohpoh a se thei bik ih a rel peih vek in,
tongkam tha tampi an sim peih lo theu teh ziangtin kan ruat ding?
   10) Mai insungsang harsat nak tawlrel hlan ah midang insungsang
harsatnak ruahpi ding cun `answer’ nei cia vek in an um thiam fawn.
  Fala hrang ahcun, mipa in a thup te ih an ruahdan theih thei a si
lo nan, nunau sinak tampi cu Pa pawl thurel khawm nak ah theih a awl
zet. Curuangah, mipa dinhmun, nunau in a theih tengteng ding pawl cu
a tlangpi in theih a tha.

   1) Mipa pohpoh cun nunau sinak le umdan hmuahhmuah thei vek in an
thei aw thluh.

   2) Mawza ( socks ) na leisak hlan ah a duhzawng colour sut hmaisa
aw.
  3) Mipa pohpoh in anmai mipa rim cu an duh tawk thluh, perfume ( zi-
hmui ) an neih lo khal len pawi an ti lem lo.

  4) Mipa cun mipa a si nak a theih tuk ruangah, “suak aw, ka lo hmu
peih nawn lo” tin na rak ti pang a si ahcun, a hrangah thazang lak
nak a si ih, a phur deuhdeuh ding. Sinan, na rak hnar duh ahcun, ” ka
lo duh,ka lo nei duh ih, nangmah thawn fate tla neih ka duh” tin rak
sim thei tum hramhram aw la, a lo tan lohli mai ding.

  5) Hmai thuh ( make-up ) zianghman na hmang lo cing ih “na mawi
tuk” a lo ti a si len, cui  tlangval cun alo bum a si.
   6) Mipa hmuhhmuah in an sam a tla kawlh ding an phang. Na duhnak
cu hitin awlsam ten na tilang thei ti nak a si.
  7) Lamzin fehnak ding an theih nawn lo hman ah midang suh an tum
dah lem lo. Khawlak an fehsuak ih, rualpi nei lo ih a rei tuk a si
ahcun, lamzin an hlo a si thei.

  8) Puai pakhat khat ah nan feh ahcun, nuanu mawi deuh a hmuh veten
na tlangval ( pasal ) mit cu zoh keukeu aw la, cui fala mawi thawn
tongka thawzet ih an biak awk ahcun ngawl tla a pawi lo.
   9) Mipa hrekkhat cun fala fehpi cing in fala dang zoh nuam an ti
tuk thotho, a san cu, mipa hmuahhmuah cutin an um ti thei aw.
  10) A kedam ( shoes ) ihsin mipa nun duhdan na thei thei ding.
  11) Sui mankhung pakhat a lo leisak ahcun na ngah ding hnak in a lo
pe tam zo in a thei ding.
  12) Khual tlawng rero mipa cu, sumdawngnak ruangah tlawng a si
ringring lo.
  13) Shopping lo fehpi cak zet tu cu, thuphan relhmang a si ding.
  14) Mipa cun na kiang um nuam ti zet in, rualpi thabik ding ih alo
sawm a si ahcun, a lo uar tinak a si.( Hmaizarh ah  pehzawm a si
ding )

  – BiakChawn

______________________________________________________________________
___________________________________

  A suahtu               LCF, Malaysia

  Editor                     Biak Chawn
  Joint  Editor                       Kawl Lian

  Sumkil                    Kawl Lian

  Zemdarhtu             Obet Cungte
                                 Salai Liante

  Calai kawmiti
                            Johnson Liante
                            Kawl Lian
                            Mang Hlei Sang
                            Biak Chawn
                            Obet Cungte

  Advisor     Rev. Run Cung Mang
                   Pa Tha Nei Thuam

  Contact
                Hruaitu Thuthang
                42 A, Upper Ground Floor
                Wisma City Tower,
                JLN Alor, 50200
                Kuala Lumpur

  Email : Hruaituthuthang@…
  SMS : 016-972 3214 ( Biak)
               016-302 1254  ( Salai Kawl)

Comments

comments

Comments

%d bloggers like this: