Hruaitu Issue 168

Hruaitu
  Weekly News
  Issue 168
  27 Jan, 2008

  Zohfeltui’ Awkam

  LCF le Falam Miphun

      2008 , January ihsin LCF ah Pathian Thuthangtha phuangtu,
Laitlang rak thangphawktu Evan Van Hnuai Sum in a hmaisabik can a
hmang. Zarhli nak ah Evan Lal Eng Lian a rak thleng ih Thuthangtha
ngai in kan biakin khat thepthi in kan mipi an rak khawm thei.
Hmaizarh ah Evan S Tha Nei Fai a rak thleng lala ding. Pathian
thlawsuah kan dawng hleice kan ti lo thei lo.

  Thuthangtha in sim mi ah telh loin an um thei lo mi cu “Pathian a
neitu Miphun kan si hmaisak lawng ah Pathian thlawsuah mi miphun kan
si ding” ti a si. Falam timi hi Laitlang ih Khawpi hmaisabik asi
ih, khawhmin menmen a si.Hmansehla tuni ahcun kan khawpi hmin khal a
si ih kan miphun ti khal in kawh thei ah a cang thlang. Ziangkhal
sisehla,  Kan miphun in Pathian thu ah kan lut natsat a tul

  Kan miphun in Pathian thlawsuah tampi hmu in ramdang ah feh dutdo
uhsi ti kan duh ahcun Pathian thu ah tampi  kan ciah neh awk a  duh
um zet. Kan Falam mi thinlung, thlarau le taksa ah kan than vivo
theinak dingah  Pathian thu thawn LCF ah fun khawm aw in kan miphun
in thlawsuah kan ngah theinak ding Pathian hnenah dil uhsi.

  Khaw Min

  By: Van Member

  Khu le kham kaw hrum Tlanghrap le Tlangbo;
  A par ih thingkung hrampi le Lungto;
  Thlairah ci kim pangpar mawite an kho;
  An dok zurzo pakhat hman an tang lo;
  An hlo thluh zo, an tolh Khaamtaw dengah.
  Khawfur ruahpi ceen thlurthlo lai fangah.

  Ruahpi tam tuk tuar lo ah Lei a min
  Leilung a hnip, a derthawm ih a min
  Ruah tak bang in – in toih kan tlun ihsin
  Milai fa ih tuar thei lo harnak in
  Kan tlan kan vai kan hlo kan dok kan min
  Kirsal hersal tlungsal thiam nawn lo in.

  Khaw Min a dam sal thei ruah han hnu in;
  Khaw Min dam le mihur dam an rak thim.
  Mihur dam khal in fa a hring thei sal;
  Khaw Min dam khal ah thlai an cing thei sal.
  Khaw Min ruangah miphun an hlo thei lo;
  Minung Min ruangah sawn Miphun an hlo.

  PM in CNN hnen ah a sim

  Malaysia Prime Minister Abdullah Badawi in Malaysia ram pum ah a
rei hlan ah hril awknak tluang ten  an neih thei ding thu CNN leitlun
thuthang hnen ah a sim. PM in leitlun pursum leilawnnak forum ( World
Economic Forum) switzerland ram ah a sim mi a si. Himi thuhla thawn
pehpar in Malaysia um India mipi pawl hnen le NGO pawl hnen khal ah a
sim ringring mi a si thu a sim bet. Malaysia pursum leilawnnak
nasazet in politic lam ihsin khal an tumtah thu a sim.

  Kenya

  Kenya ram ah Political ihsin hnam khat le khat dodal awknak a suak
ih mai khua ah um ngam lo in raltlan pawl an um. Asir ih zuk khi a U
nute in a naupa rawl a barh lai a si khi. International Trade Fair,
Jamhuri Park ah a si.

  French President Nicolas India tlawng

  New Delhi:     : French an President Nicolas Sakozy cu India ah  a
tlawng. politic thuhla ruah awknak, Asian pursum leilawnnak thuhla
pawl an rel tlang. India kilkim awknak hrang ah a tul mi thilri
hriamhrei tuahnak hrangah dawr awk dingin French in a duh. Hmailam
can kum 5 sungah US$30 bil (RM 98.2 bil) rori hmang dingah ruahcia
nak an nei. Russia hnu thluh in  French hnen ihsin ral thuam  thilri
India in a lei tambiknak ram an si.

  Beirut ah Bomb puak

  Palik thlingthlatu (intelligent) bawi pakhat that tumnak ruangah
mawtaw parah bomb an puah. mi pali an thih phah.

  Afghanistan

              Pacang pakhat in a fanu cawi in miharsa bawmnak hngak
in a um lai fang a si. An ram ah vur tampi tlak lakah dai tiamtiam in
a fanau ei khawp hman hmu lo in Kabul khawpi ah an um. Sik le sa (
weather ) nikhua  daih tuk ruangah minung a mal bik 85 an ram nitlak
nak lam ah an thi.

  Falam duhdawt tu

                          Laitlang a rak hminthang tertu le a rak
ceimawi dahtu kan Falam te hi na ngai dah ve maw? Falam khua sungih
um ringringtu na si ahcun na ngai dah lemlo men ding. Asinan Falam ih
sin ni leh thla, kum rei pi sung khual hla na tlawn ah cun na ngai ve
ko ding. Kei khal ka ngai ve na sa.

              Hla sak thiam tu cun kan Falam ih par mawi nak pakhat a
si ve mi Sizungpi cu hi ti in zai hla mawi te thawn a awi:
  “Maw kan tlaih san bik mi Falam Sizung,
  Kawl le lai ram kulh in na thatnak par kan lo tlan,”asi a ti.

              Asinan tui kan Falam Sizungpi ih dinhmun ka von zoh tik
ah hin, hi hla phuah thiam tu pa ih zai hla mawi te thawi a rak awih
mi hi a va hman thiam nawn lo ve. Ning a va hang ruahro ve.

  Kan Falam Sizungpi hi a par mawinak a ziam zo maw si?
  Kan Falam Sizungpi a par thlantu an um nawn lo maw si?
  Kan Falam Sizungpi hin damnak in pe thei nawn lo maw si?
  Kan Falam Sizungpi hi a mah a dam nawn lo maw si?
  Kan Falam Sizungpi hi rinsan a tlak nawn lo maw si?
  Kan Falam Sizungpi hi a mah te lawng maw si thing riapri tei
Vankau                                         tlang ih a um?
  Kan Falam Sizungpi hi a duai maw si?

  Satan cu a duh le duai seh, asinan kan Falam pi cu duai hlah seh,

  Falam duhdawt nak thawn,
  Buddy

  2008 LCWF Hruaitu ding pawl

  1.         Shalom Nu
  2.         Nu Sang Pui
  3.         Nu Lal Fak Zual
  4.         Mercy Nu
  5.         Sayamah Thawng Par
  6.         Sansuah Nu
  7.         Mang Men Thluai
  8.         Nu Famte

  9.         Mang Kuk Nu
  10.       Nu Ngun Sui Mawi
  11.       Nu Lawng
  12.       Nu Chin Chin
  13.       Za Za Nu
  14.       Nu Mang Mang
  15.       Nu Van Sui Par

  Kimcang ten khawm thei tikah hohatu ding pawl hrilnak an nei leh
ding. Kan LCF thanson nak dingah NuBu pawl nasazet in cangvaih le
rawl ul thlacamnak thawn tan lak a thupi zet. Nubu pawl hmang in
Pathian sunlawinak lang vivo hramseh.

  A vei 1 nak
   Falam Pawlpi Fellowship nak le Sing song service

  FPM a vei khatnak fellowship nak le sing song service  a um ding.
Cuihlei ah Lucky Tiket draw nak khal tuah cih ding a si.
  27January 2008,
  Ahmun                                    Shalom Hall
  Acaan                                      4 – 8 Pm
  Thupuan,caan catu                  Nu Run Hnem Par le Mai Sui Rem
Par
  Thoknak thlacam                    Rev. Run Cung Mang
  Thu tawi simnak                     Rev. Za Thelh Lo
  Thlawsuah peknak                  Rev. Matthew Tin Za Uk
  Laksawng pe tu                      LCF Chairman, FCC
Chairman
      le FPM President
  ** Fala 15 in kan Falam Cultural Show an nei ding.
  ** Hlasak thiam le Music thiam pawl in hlasak le awnmawi tuanvo an
lak ding. Zapiten rak tel cio dingah sawm kan si.

  UNHCR le FRO

  Kan Falam mi in kan mah te todeuh awk tak in le zawnruahnak tumpi
thawn UN ah mithar a lut ding pawl hrangah case zohfel le a tul mi
phi thei ding in cincia a tul. Cumi hrangah UN ih tong let Pa Tuak
Tuak in 6:30 PM hnu ah zirhnak a nei. FPM zung ah a si.

  Cun UN card ngah zo OPE phi ding hrang khal ah Mai Khim Khim UN ih
OPE tuanvo neitu hnen ah cincia theh ding a si. Ziang thei lo pin UN
ah nangmah ten na feh a sile an lo reject pang ding phan a um zet.
FPM zung thotho. Zanlam 6:30 hnu ah a si ding.

  Chin National Day

  Lai Phun Suah Ni hrang Bawhlung sitnak 20 Jan ah Falam in Zotung
Goal 6 in an neh. Hmaizarh 3,Feb ah FaLam Vs Matupi an sit ding.
Leknak asinan nehnak cotu si kan duh. Thazang rak pek cio dingah kan
lo sawm. 4.00 PM

  FLM leng le val

  LAI THUFIM

                          1.    Sir awk hlan ih ralrin a tha
                                      2.    Ruat ta aw thil tha sawn
a um
                                      3.     A sia lam theih a ol sawn
                                      4.    O um nak dingih AW hman
hi pen ti aheu
                                      5.    Phun leh hnam ih phur
hnakin thansonak lam ih
phur atha sawn

                                        s.val

  Zualko

              Yagon Sanchaung Veng ih um Pu Van Lal Muan le Pi T’ha
Zung Thluai(Pu No Bual Hrang le Pu Kio Luai tei’ nau nu)tei’ fapa
pahnih cu mizan sun ah an unau in Yangon Tiva pi ah an tla ih in
thihsan.Tuition an ban thluh hnu nazi 3:00 ah Inn an tin ih an rual
(Kawlpa) unau thum thawn tidai leuh dingin an feh.An pathum in an tla
nan an rual (Kawlpa) cu midang in an bawmih an run thei ruangah an
mah unau hnih lawng an thi.A dang an rualpa ih unau hnih cu Tiva kap
in an rak zohih an leuh ve lo.Ziangkhal le vansiatnak rori kan tawng
a si.

  MITHI (UNAU HNIH TE) IH THUHLA TAWI
  (1)Mithi hmin: Lal Biak Lian…kum(11)
  (2)Mithi hmin: Siang Za Lian….Kum( 9)
  Pai’hmin: Pu Van Lal Muan.
  (Suahkehnak khua..Bualhrei, Falam Peng)
  Nui’hmin: Pi T’ha Zung Thluai
  Suahkehnak khua..Tlauhmun

    Thuthantu     Pa
Tuan

  Ca Kuat

              A thleng aw dah lo mi le a hmun ring2 mi kan biak kan
pa thian cu ahmin thangthat in um sin ko seh,lei taksa kan thanso
theinak ding ih in cawm tu sung hno FPM, thu thang hmun tin le ram
tin ih in lawr khawm sak theutu hruaitu,thla rau hnawi in fah theutu
afa hniang le pawl kan hrang cat lo ih rawl ul khal in thla in cam
sak theutu LCF.

  Kan mi phun hrang lung rual duh tu le tan rual cu cah nak asi ti
thei ih hele mang law ti ih hna in tuan sak ring2 tu FPM le Member,
harsatnak sum zing lak le rel siat nak thlisia bang hrang lak ih,
hmai lam hrang kan mi phun lung rual tei kan

  khawm tlang thei nak ding le lei tlun huap ih mi phun dang le ram
dang khal ih cawi san mi asi thei nak ding ah ti ih LFC arak din tu U
pa pawl,Nan parah kaa ih sim thiam lo mi lungawinak ka nei

  Tu ni tu can thleng in hmuntin le ram tin ih a um mi kan Laimi
hrang ah ti ih thlaza in cam saknak parah tam pi lungawi thu nan hnen
ih  sim hna athiam hrih lo mi kan lai mi hrang ai awh in cibai buk le
lung awi thu kan run lo sim.

  Lung rual tei par khat tlan ih kan mi phun par mawi apar suak sal
thei nak ding duh sak nak thawn,,,

                     From.Salai
Tawngte                                U S A,

  THEIHKAUHNAK  LE  RUAH  DING TAM
                                                        (By- Biak
Chawn)

  1.         Leilung tuamtu atmosphere ( boruak ) hnuai bik
‘troposphere’ cu kumtin mawtaw le tlangleng, factory le engine
phunphun ruangah a thianghlim lo deuhdeuh.Curuangah Europeon Union
cun kum 2012 ihsin mawtaw tuahtu company hmuahhmuah hnenah an thilri
tuah engine ihsin carbon dioxide mal deuh suahter thei dan ding
tawlrel thei dingah tumtahnak a nei. Kum 2006 sungih mawtaw ( car )
pawl in kilometer khat an fehnak ah carbon dioxide ( CO2 ) a suahdan
cu hitin a si:

  (1) Suzuki , Hyundai, Volkswagen, Ford,  Nissan le Mitsubishi  –
150 g  isin  160 g. (2)Mazda – 170 g. (3). BMW – 180 g.  (4). Toyota,
Honda, GM.  – 150 g. Mawtaw company hmingtha deuh pawl hnak in,
BlueMotion mawtaw pawl cun Carbon dioxide an suah mal. Polo
Bluemotion mawtaw cun Petrol ( US- gas ) gallon 1 ( 4 liters ) in
74.3 miles a tlan thei ih, kilometer 1 ah carbon dioxide 102 g a
suah. Hihi kum 2006 sungah boruak ti rimse lo bik mawtaw a si. Golf
Bluemotion cun 1 km ah 119 g a suah ih, Paasat Bluemotion cun 1 km ah
136 g, Touareg Bluemotion cun 1 km a tlan in 146 g carbon dioxide a
suah. German ih mawtaw suak thar ‘Mini Clubman’ cun 109 g a suah.
European Union cun kum 2012 hnu ahcun 150 g hnak ih tam suah lo thei
thluh ding in beisei nak le tumtah nak a nei.

  2.         Maryland, Greenbelt ih NASA Goddard Speace Flight Center
ih tuanvo neitu pawl cun Satellite zuk an ngah mi ruangah kum 2013
thal ( summer ) ahcun Artic tipi thuanthum ( Artic Ocean ) ah vur
hmuh ding a um nawn lo ding ( entirely ice free ) ti an phang zet
tiah VOA  Jan. ni 9 2008 cun a phuang. Leilung tuamtu boruak (
Atmosphere ) lawng  silo in, tipi thuanthum sung lam tiang a hlum
deuhdeuh ruangah vur tlang pawl an tiral ( melt ) vivo ih, a hlan ih
23 metres ih sah ( thick ) cu 6 ihsin 7 metres lawng a tang tiah NASA
Goddard thu than tu Jay Zwally cun a ngan.  Kum 2000 ihsin 2006
tiang  Artic tipi sung ih vur tlang 9% cu a tiral thluh ih, cucu kum
khat ah 100,000 squar kilometer hrawng a si i, kum 2007 sung ih
siatnak cu a roh deuhdeuh tiah USA ih Colorado National Snow and  Ice
Data Center ih researcher ‘Mark Serreze’ cun a sim. Tipi
thuanthum hi tihlum le tidai fehnak ( warm current and cold current )
a nei i, Artic ocean lam ih ti-hlum feh cu – Ireland
  ram sim lam Atlantic ocean isin zin khat lawng a zawh theu. Kum
2000 AD isin North  Pacific ocean lam in lamzin pahnih rori warm
current cu Artic ocean lam ah an feh. Hi ruangah leitlun ram tampi
cun boruak nikhua ( Climate ) danglam tampi an tuar ih, autumn ( thla-
tang thlen hlan ) ah khawsak lam thli ( north eastern wind ) a hrang
theu ruangah ‘Global warming’ thuhla in rung thangphawk sal a si.

  3.         Ram hmin le thildang hmin rak bangaw theu: Turkey ram le
Sai ar ( turkey ), Bulgaria ram le rose pangpar phunkhat (
bulgaria ), Cuba ram le vate hming ( cubba ) etc. Hivek hmin hin
pehtlaih awk nak an nei lo nan, thleng awk an si nawn lo. Sinan,
Bulgaria ram cun rose mual thuanthu a nei ih, kum zabi 18th  ihsin an
hmuhsuah, tuni tiang cui rose mual cu 780 square kilometers ( 301 sq
miles ) ih kau lai a si. May le June thla sung ih par theu rose
pangpar phunphun cu, kum khat sung duhtawk ei le in ding ( rose jam
le rose wine etc. ) hrangah an tuah theu. Hi ram hi Romans,
Thracians, Greeks, Macedonians, Slavs le Turks ( turkey ) pawl cun
hlan lai ihsin an mai ta si ding ah an rak lawng aw theu. Sinan, 865
A.D isin Orthodox Christianity cun neh nak a co.

  4.         Mawtaw tlan zuam awk nak ih mankhung bik pawl F1 (
Formula one ) driver pawl hin, zuam awk nak an neih lai ah, nazi
pakhat ah an taksa rih lam 8 pounds ( 3 kg hrawng ) an hloh theu ih,
nazi pakhat sung ih 300 kilometers tlan man lo cu,  an lek thei nawn
lo.
  5.         Britain, France, Greek le Germany ram hi leitlun pumpi
Olympic Game a um thawk ihsin kumtin an tel thei. Tui kum 2008
Olympic cu Tuluk ramah 8/08/08 ( Aug. ni 8, 2008 ) ah opening
ceremony tuah a si ding, hi number 8 hi tuluk pawl zum nak lam thawn
pehpar aw mi a si ruangah a si.
  6.         Scientist pawl cun leitlun ih vutnel ( sand ) hnakin van
ih arsi ( star ) an tam sawn ding an ti. Kum 2008 sung ih an thil
hmuhsuah thar a tlangpi in vawn ruat tlang sehla,..:
  1)        Arsi hi a dai deuh le a sa deuh ( cool star and hot
star ) a um ih, a dai pawl cu hi leilung ihsin an sen ( red ) ih, a
sa deuh pawl cu van rawng ( blue ) an si.
  2)        Arsi fate zet ‘Pulsar’ cu neutron tampi thawn tawtzet
ih tuah aw mi a sia ruangah, cui arsi cu keh pang in, a keh mi (
debris ) tangka tlang ( coin ) pakhat tia lawng cu leilung parah rung
tla ngah pang sehla, kan umnak leilung ahcun 100,000,000,000 kg ih
rit a si ding. [ Thil hmuahhmuah hi Atom thawn tuah mi a si, cui atom
pakhat ciau ahcun ‘ electron ( a lenglam bik ), nuclear ( a lai
bik ), proton le neutron ( nuclear kiang ih bet ) le thil dangdang an
um. Electron cu  negative a si ih, hmunkip ah a feh tlang thluh thei,
proton cu positive a si ih atom pakhat ih taksa ruak tuah tu bik a
si, nuclear cu power um nak bik a si i, neutron cu atom inn pi kiltu,
negative, positive le particle dangdang kaikhawmtu a si- ngantu ]

  3)        Ninu ( sun ) hi arsi a si ve, kum 1,100,000,000 hrawng ih
upa a si.Leilung  ih thing,oil,gas le a kang thei pohpoh hi nawt kang
thluh sela, ni sat dan tiang sa theiding cun zarh 1 hman a daih lo.Ni
cun magnetic poles a nei ih, cucu  kum 11 ah veikhat a rung her
danglam aw theu.Cucu ‘Solarmax’ an ti.Himi um can hmuh hi
piangthar pek hrang ahcun vision hmu vek in ruahawk a awl zet.
  5)        Norway ram, Spit Bergen ahcun thla thum le hrek rori ni a
tla lo, sinan equator ram vek cun ni  a sa fawn lo. North Pole (
leilung saklam cem nak ) ahcun kum khat ah ni 186 sung ni a suak lo
ih, a dang hmuah cu ni a tla ve dah lo.

  6)        Arsi, hip nak nei tam tuk pawl ( strong gravity ) cun
anmah le anmah cu te deuhdeuh in an tuah aw ih, neta bik ah ‘arsi
thi tawmkhawm ( black holes ) ah an cang. Cui arsi pawl cun
‘gravity’ cu magnetic field ah an tuah ih, an tawmkhawm tam
deuhdeuh len arsi dang an hip tam deuhdeuh. An hip zo arsi hrang
ahcun  suahsal nak lamzin a um nawn lo ih, cui arsi cu a hlo cih
ding. Scientist pawl theih ban tawk in, gravity nei tam bik arsi
‘Magnetar’ cun leilung ( earth ) hnak in a let
10,00,00,00,00,00,000 ( a thousand trillion times ) in magnetic field
a nei cak sawn ih, cui arsi cu kan umnak leilung isin 10,00,000 miles
( peng ) ah ra sela, minung taksa atom pawl hi a hip ding ih, sak le
thlang-sim le hmar ah kan taksa cu a tlek pet thluh thei ding. Cu vek
arsi cu kan Ninu um nak ‘milky way galaxy’ ah 12 hrawng an um ti
a si.
              Tleu nak nei nawn lo arsi tawm, arsi dang hiphlo rero
pawl cu,van pumpi ah khin ting tampi ( billions ) an um ih, anmah le
anmah khal an hip aw ngah ih,an cak deuhdeuh. Black holes cun lamzin
an nei ih, kan um nak naih bik tu ‘Quasars’ black holes cun kum
khat ah arsi 10 ihsin 20 tiang a hip theu ih,a cak deuhdeuh. Kan
solar system hi 3,00,00,000 miles ( peng ) in rak naih sela, kan cem
ve riai ding!![ An thuneih theinak sung ah um duh loin an umnak hmun
a tlansan tu vancungmi pawl kha cing ringring uh. Annih cu leilung
thuai khawthim ( Annih cu thimnak sungah- NIV ) sungah kumkhua in
thir cikcin in khiah an si ih, a maksakmi Ni ah Pathian ni an thu a
then sak leh hai ding. Juda 6 ]. Vancungmi pawl cu arsi vek an si (
Job 38:7 ), Pathian thu thlun lo ruangah, arsi fehnak nei lo,
‘black holes’ ( arsi thi tawmkhawm ) hnuai ih um vek ah an cang a
si. [ Job 38:36b ].

  8.         Japan ram ah Panasonic company cun leitlun ih battery
nun sau bik ( longest lasting ) an tuahsuak ih, Energiser le Duracell
pawl hnak in 20% in a daih rei. Electronic thilri hrang an tuah mi
battery pawl hi Cadmium thawn tuah a tambik, tui battery thar
‘Evolta’ cu, ‘voltage’ le ‘evolution’ ti lak kawp mi a
si.Alkaline a hmang.

  9.         Beijing ( China ) ih middle school hrek khat cun an
tlawngta nauhak pawl cu sunah ‘vawk rawl pe ding in an fial hrim
theu’ tiah an ram state media cun a than. “Hihi minung dik nak (
right ) upat lo nak le education tumtah mi hmuhsuam nak a si” tiah
‘human right activist’ pawl sandah an piah.

  10.       Iran ram ih film tuah tu director pawl cun Bawipa Jesu an
ruah dan le hmuh dan thuhla cu film in an suah ve. Kum 2004 ih Mel
Gibson movie ‘The Pasion of The Christ’ cu a story a dik lo tiah
director ‘Nader Talebzadeh’ cun a sim. Muslim pawl ruah dan cun,
Bawi Jesu cu thinglamtah par isin Pathian nih van ah a hruai cih ih,
a thi tu sawn cu Juda, Bawipa phatsan tu cu a si. Pathian fapa vek
cun an pawm lo nan, Bawi Jesuh hi prophet lunglawi 5 sungah a tel.
Adang pawl cu, Noah, Abraham, Mosi le Mohammad  an si.
  11.       Leitlun ih Laptop ( computer ) paa bik ( thinest ) cu
Apple company, California, USA tuah ‘Macbook Air laptop’ a si. US
$ 1,799 ( RM 5,860 ) man a si ih, leiltun hi cabu paa bik ( world
thinest book ) tin tla an ko.
  12.       Baibal sungah ramsa hmin ngan hmaisak bik cu ‘whale (
wi-lah-nga ) a si( Gen. 1:20 KJV ). Leitlun ah whale phun 6 an um :
Killer whale ( Artic tipi le Australian Antarctic basin ),Sperm whale
(south Pacific tipi ), Blue whale ( Antarctic tipi ),Gray whale (
north Pacific le Artic tipi ih um, hmin bang aw, taksa bangaw ciah
lo ), Humback whale ( north Atlantic tipi ), Bowhead whale ( north
Atlantic le Artic tipi ) ah an um.

  Sermon

  Pathian Lungawitertu
  Rev. Run Cung Mang

  Leitlun kan nunnak caan tawite sungah thupibik cu Sersiamtu Pathian
nung theih le a lungawiter ding hi a si. Cumi cu Pathian ih in
sersiam duhsanbik le a tumtahnakbik a si. Pathian theitu, a zum ih a
rinsantu le a lungawitertu cu nunman   nei le mi thluasuak an si.
Duhdawt mi nu le pa, u le nau pawl, nan nunnak cio vun zohfel saal
hnik uh! Tuni ahhin ziang dinhmun ah na ding? Pathian lungawtertu maw
na si? asilole Pathian riahsiatertu so na si? Pathian lungawitertu mi
lungawi le mi thluasuak kan si cio theinak dingah Bible sungih
Pathian Tongkam zoh in thlarau thazaang kan la tlang pei.

   1.       Pathian Theih ( Knowing God)
  Jeremiah 9:23-24 ah Bawipa ih simmi cu, “Mifim in a fimnak uar
hlahseh, micak in a cahnak hngalpi hlah seh, milian in a lennak ah
tluangkhawng hlah seh. Zokhal in uar awk a duh asile Keimah i
theihnak le i theihthiamnak ah uar aw sawn seh. Ziangahtile ka
duhdawtnak cu cem ti a nei lo ih, a dikmi le a hmanmi ka tuah
ringring a si. Himi pawl hi ka lungawitertu an si,” ti’n kan hmu.
Curuangah a fiangzetmi cu Pathian lungawiter theinak umsun cu
Amahtheih hi a si. Pathian cu i Sersiamtu, i Rundamtu le i
Thluasuahtu ti ih theih hi a sim duhmi a si. Cangan thiam hminthang
J.I Packer cun “Pathian Theih (Knowing God)” le “Pathian Thu Theih (
Knowing About God)” cu a dangpi a si ti’n a sim. Pathian thu tampi
thei ko nain Pathian zum lo (unbeliever) an um ih Pathian thuthuk
tampi a thei lemlo nain Pathian a thei taktaktu, thlarau nun taktak
ih Pathian kaihngettu an um a ti. Mihrek cun, Pathian neitu (
Possessor of God) le Pathian a um ti simtu fangmen (Professor of God)
ti’n tla an
ti. Nangteh khuimi ah na um ti nagmah le nagmah hliakhlai aw hnik
aw! Thuthang`ha Johan 17:3 ah, “Cuih kumkhua nunnak timi cu Pathian
taktak a simi Nangmah theih le na thlah mi Jesuh Khrih theih hi a
si,” ti’n kan hmu. Curuangah zumtu kumkhua nunnak kan nei kan timi cu
Sersiamtu Pa Pathian theih le Rundamtu Fapa Pathian Jesuh Khrih
kha “i Runtu le ka Bawipa” ti ih zumfek le rinsan khi a si. Khristian
maksak Paul in, “Mi hmuahhmuah rundam an si ih thutak an theih ding
cu Pathian duhmi a si, ti’n a sim (1 Tim. 2:4). Jesuh in, “Keimah cu
thutak, lamzin le nunnak ka si,” a ti (Johan 14:6). Curuangah kan
thlarau nun in Pathian a theih tikah Pathian fahniang kan si. Cumi cu
Pathian ih duhmi le Pathian lungawitertu a si.

   2.       Pathian hnen Lungawi thusim ( Thanksgiving)

   Pathian theitu, zumtu ih kan neih dingmi thinlungput cu Pathian ih
duhdawt zaangfahnak theithiam in Amah thangtthat le lungawi thusim hi
a si. Saam 50:23 ah, “Kan hnenih lungawinak nan langtermi hi ka thang
in tthattertu thawinak a si,” ti’n kan hmu. Paul in, “Cat loin nan
lungawi uh. Thlacam ringring uh. Nan parih ziangvek a thlen khal le
nan lungawi uh. Khrih Jesuh thawn a pehzom awmi nan nunnak cubangtuk
ih nung dingah Pathian in a duh a si,” ti’n thazaang a peeknak kan
hmu (1Thess 5:16-18). Pathian thangtthat le lungawi thusim hi a
Pathian lungawitertu a si.
  Leitlun retheinak ram ih nung kan si bangin kan ruah lo pipi le kan
duh lo cing khal in kan nunnak ah thinphaannak, buainak,
natfahnak      le ninghan riahsiatnak a phunphun kan tong ttheu.
Cuvek caan khal ah Amah thangtthat le A hnenih lungawi thusimnak nei
ringring ding in duhsak. Commentary ngantu mi hminthang Matthew Henry
ih nun ihsin thazaang kan laak ding ka duhmi a um: Veikhat cu rinlopi
in damiahttaih a tong. A thilri an lonsak thluh. Duhdawtu pawl in an
leengih tha an peek tikah amah riangri in, ‘Pathian hnenah lungawithu
sim ding pathum ka nei: 1) Ka thilri cu in long na’n ka nunnak a him;
2) veitampi hivek thuhla ka thei dah na’n atu veikhatte lawng ka
tong; 3) Midang thilri longtu si loin mi ih dawttlak ka sisawn
ruangah,’ a ti. A mak taktak si. Uar a um ngaingai. Cawntlak nun
neitu a si. Duhdawt mi nang le kei tla Pathian hnenah a phunzaitu si
loin lungawithu simtu sinak in tettittha si zuam uhsi!

  3.Midang Hlawmtu sinak ( Sharing)

  Zumtu pitling nun tahnak tahfung (measurement) pakhat cu peeknak
nun, asilole midang thawn thluasuah hlawm awk nun hi a si. Pathian
thuthangttha siseh, kan hmuhtonmi thlarau nun thuthup siseh,
fimthiamnak le thiltitheinak kan neihmi siseh, sumsaw le thilri kan
neihmi siseh zumnaklam in kan innsang a simi kawhhran sungah le kan
innhnen pawl le a ttulsammi pawl hnenah siangzet in pe ding le hlawm
(share) ding kan si. Bible in, “ngahlam hnakin peeklam ah lungawinak
a tamsawn,” (Tirh 20:35) timi hi hna ih theitu men lawng si loin a
nuncihtu kan si ding a thupi.

  Veikhat cu kawhhran home cell Bible zirnak ka fehlai ah Taxi
mawngtu thawn biaknak thu pawl kan reel. A timi pakhat cu: “Khrihfa
pawl hi mi ttha le mitirhsiang nan si. Mother Teresa, le Bill Gate
tla cu midang hrangah nasatak in an peek siang, ka uarzet” a ti. Ka
lungawi nasa. Ziangahtile zumlotu pakhat in cuvek ih Khristian pawl
in hmuh cu amak ka ti. Kawlram le hmuntin ih um Laimi zumtu pawl hi
mibum le mi hrokhrawl, mi duhham emem si loin, Kawhhran hnattuannak
le khua le ram, miphun `hansonak hrangah siangzet ih a thawhtu kan si
ding thla ka cam. Kan  kiangkap ih mi tlasam mangbang vansaang pawl
hnenah vanlam duhdawtnak langter theitu, ngahmi thluasuah mai’ zawn
lawng ruat ih ham tteitteitu si loin, pitling nun nei in midang a
hlawm siangtu kan si le Pathian lungawitertu kan si ding.

  Duhdawt mi zumtu, na khristian nun tthate’n zohfel saal hnik! Na
lungkim tawk maw? Zumtu na si pekte le atu na nunnak ah Pathian
theihnak ah na tthanglian maw? Bible in, “Kan Bawipa le in Runtu
Jesuh Khrih zaangah lainatnak le Amah theihnak sungah tthang vingvo
uh” ti’n in sawm (2Peter 3:18). Cule lungawi  nun neitu si ding tla
in forh; “Bawipa thawn nan pehzom awknak ahhin nan lungawi ringring
hram uh. Ka nolh saal hrih ding; nan lungawi hram uh,” (Filipi 4:4)
ti’n. Hebru cangantu in, “Tthatnak tuah kha hngilh hlah uhla, nan
neihmi midang thawn hlawm awk dingtla hngilh hlahuh; ziangahtile cumi
cu Pathian lungawitertu raithawinak an si,” a ti (Heb.13 :16).
Curuangah kan neihmi midang hnenah siangzet in a hlawmtu si zuam cio
uhsi!

   Theitu, Lungawitu le Hlawmtu cu mi lungawi le mi thluasuak an
si

  MIPA  LE  NUNAU  THUHLA  THEIH  TUL

              Hnihsuak le capoh thu a sinan, thudik an si. Milai nun
tibuaitu  le tinuamtu ‘nunau le mipa pehtlaihawk dan’, mithiam (
researchers ) pawl zirsuah mi hi ruat hman! Germany le France ram
ahcun upat hnu ah nupa then awknak a tam deuhdeuh an ti. German mipa
hi leiltlun ah an tirhfak bik ih, Russia mipa cu an duhham bik,
Australia ram ahcun nupi pasal vei hnih-thum then awk zo khal thil
mak a si nawn lo, zunghruk leisak awk tla a tangkai lem lo an ti.
Mipa hnak in nunau cun holiday hman le shopping feh an rei ih, mipa
cun nupi a neih hnu-ah ( a nupi nih mipa dang an zoh hnak in ) nunau
dang ( fala ) zoh an peih sawn.
              Sim ding le ngan ding a tam tuk ruangah, a tul len kan
peh vivo pei cu. Kan sinak tla a langthluh thei, zohfiangawk nak
siseh.
  1. Hnakhaih buntu mipa pawl cu nupi neih an ngam tuan deuh pei maw?
Tuarnak le nunau thuam thuhla ah experience an nei cia??
  2. Mipa cu a zum aw tuk. TV ah football tha ten a zoh len a lektu
pawl cu vung bawm thei ngaingai vekin a tong peih. Buainak a um khal
len a rak tawlrelpi duh i, an buai ngaingai ahcun, telephone khal a
nupi ( midang ) lawng a vawn/kaih ter theu.
  3. Mipa cun handphone lek hi an uar. Midang hmuh ah pawimawh zet
tuah an bang thei ruangah.
  4. Mipa cun thuthangca siar hmaisak bik an duh, a sungah riahsiat
nak thu a um ti an thei ko nan!!
  5. Thlalang hmai ah, mipa amah le amah a zoh awk dan cun, midang a
zohkil thei dan le zohkil thei lo dan ding a tifiang.
  6. Pasal cu mi lakah zianghman zirh hlah, amah ten a thup ten a zir
thei thluh;milak ahcun thil hmuahhmuah cu thei vekin ruat mai aw.
  7. Mipa hmuahhmuah in nunau hnen ihsin, “ kan kar thuhla hi
simfel a tul” ti thu hi thildang hmuahhmuah hnak in an tih bik.
Palik ( ralkap ) bawi bik hrangah tla a danglam cuang lo. A tihnung
thotho.

  8. Mipa cu mi 4 hnak ih tam an umkhawm ahcun leknak ( sport ) lam
thu an rel thawzet ih; nunau cun, mi 4 hnak in an tam ahcun mipa
thuhla an rel tam bik.
  9. Mipa, duhduh ei thei si, thau thei fawn lo cu,… ei le in lam
ahcun amah lawng in cui caan hmanter a tha.
  10. Nunau cun an mah le an mah ruah nak an nei tam, ‘duhnungza ka
si maw? ka duhmi ka ngah thei pei maw?’, mipa cun lenglam thil an
ruat tam sawn,… ka in le ram ding teh ziangtin? Tukum teh
Manchester maw Chelsea maw, Arsenal champion ding?..etc’
  11. Midang hnen ihsin sunlawihnak tongkam, “Na mawi tuk!,” ti
thu  a um ahcun, mipa cun lungawi thu a sim ih, nunau cun a zum dah
lo.
  12. Mipa cun nunau hnak in thit-awk nak thu rel an manhlap lem lo.
Nunau cun duhdawtnak ruangah lawng si loin, an thuamhnaw hruk nak ah
mipa bawm nak an tul theu. ( Dunglam zipper um.. etc. )
  13. Nunau cun a thuamhnaw a tet deuh len, ‘ thau deuh in a thei
aw ih, mipa cun a thuamhnaw a tet len, cui a thuamhnaw cu a com deuh
in a ruat.
  14. Nunau taw tum deuh cu a mawi ih, zoh a nuam an ti, mipa taw
fate lem lo cu motorsaikal to nakah a tha zet an ti.
  15. Mipa cun a suahvah nak ah a thuamhnaw hruk vek hru a hmuh
ahcun,… nunau vek in um nuam lo nak ah a hmang cuang lo.
  16. Nunau vantha bik cu, a duh tawk hmanding tuansuah sak thei tu
pasal neih fuh a si ih; mipa vantha bik cu, nupi hrang duhtawk hman
ding tuansuah sak theitu a si an ti.
  17. Mipa in nunau hnenah, “phone in ka lo biak ko ding” ti ta
in, a  biak sal lo a si ahcun, – a hngilh ruangah a si lo, number a
hloh ter  ruangah tla a si lo, a man lo tuk ruangah tla a si lo,.. a
biak ( call ) duh ngaingai lo ruangah a si. ( peh lai ding…… )

    – Biak Chawn –

(Visited 95 times, 1 visits today)

Comments

comments

Comments

%d bloggers like this: