Hruaitu Issue 155

Hruaitu Weekly News
  Issue 155
  28 Octoer, 2007

  Zohfeltui` Awkam
  Tuanvo
  Tulai kan Laimi thuthang kan theih tam bik mi cu Kawlram ihsin kan
Laimi ( Falam ) Malaysia ra ding in an tim an tuah nasa ti a si.
UNHCR hnatuan dan hi theihthiam a har zet. Acancan ah thawngtla,
naupai,nauhak tivek in an lak.”Tulai cu mithar an lak lo lawlaw” an
ti lai khal ah Sii lethmat thawn a rak lut thei tawk cu an um thotho.
Ziang asikhalle kan ram in that ti um cuang lo, kan Laimi kan rinsan
zetzet mi pawl khal an rak thleng vivo.

  Malaysia ah ziangtik tiang kan um ding ti zohman in kan thei ban
lo. Cumi kan um sung can tawite ah kan miphun himnak hamthatnak le
kan thansonak ding cu bulpak silole pawlkom, Fellowship dinhmun in si
maw tawlrel le tuan natsat a tul ti cu a fiang nasa. Mi tampi cun kan
mai hlawknak/hamthatnak a um lo mi ah tel le tuah kan zuam theu lo.
Kan ram harsatnak le Malaysia kuli hlawhnak, harsatnak ihsin kan suah
lan vivo theinak dingah zo in tuanvo kan nei. Kan tuah thei mi a bang
awk lo ding. Kan mah le kan tuan ding mi a si ti kan theih mi ah a
famkim thei bik in tuah ding tuanvo kan nei.

  Mi hrek khat in kan nih Falam pawl cu midang (pengdang) nehhnu ah
kan feh ringring an ti. Feh hmaisak le neita ih dang lamnak a tam tuk
lo. Kan thlen tik cu can hi kan hrangah a thupi bik. Midang hnakin
kan tlai ti kan thei asilen a tha bik ih can hman le manhlap tak in
tuan kan tul a si mai.Kan Falam thuanthu kan zoh asile mi hmaisa kan
rak si sawn nan tu ni ah rahsuaktha hmuh ding a mal zet. Mi nehhnu
kan si ti thei in midang lan theh ding kan zuam a tul sawn.

  Estrada thawnginn ihsin a suak zo
  Philippine ih President hlun Joseph Estrada cu kum ruk le hrek a
rei thawn a tlak hnu ah a suak vuarvi zo. Manila ih an Film star
hminthang pakhat khal a si ve mi Estrada cu 2001 ihsin thawng an rak
thlak thawk. A suah hnu ah a hmaisabik in a nu kum 102 mi Hospital ih
um cu a veh hmaisa bik ih a mah duhdawt tu a sungkhat unau le a mah
rak support tu a party pawl in a tlunnak lamzin ihsin an rak hmuak.

  Bank an taih

  Taman Muda ih Public Bank cu Pistol keng mi pakhat in a taih. Paisa
RM- 20,450 a lak. Himi bank kiltu pa (zuk) Kamaruzzaman Hussin cu a
kap that hnuah Motocycle thawn a tlan hlo. Hussin cu Ampang Hospital
an thlen hnu nazi 1 ah a thi. A nupi in a thi ti a thei cu a shock
rori. “An nupa in A naupa ih nupi neihnak Kuantan ah a thaizing ah
tlung ding in an timtuah awk thehh zo mi a sinan” ti ah a sim.

  Pakistan ah thihcilh bomb puak sal
  Pakistan ih nitlaknak thlanglam ah thihcilh bomb a puak ih mi 30 an
thi. Minung 12 in hriamha an tuar. Mi thi 30 lakah 17 cu ralkap pawl
an si. Bomb puaknak hmun ah ralkap pawl kuat an si . Himi hmun hi
tourist pawl feh duhzetnak hmun a si. 2001 ih Taliban cozah US in a
do hnuah ralkap zatel in Pakistan ramri ah an tlan lut. Tui kum July
ihsin mi 400 lenglo cu bomb puak ruangah an nunnak a cem zo.

  Erra pasal a nei thlang ding
  Malaysia hlasak le zuknung can thiam Erra cu Suria FM chief
operating officer Zainal thawn November ni 3 ah an nei awk ding. An
pahnih in ” sungkua in nuam zet in tik cu can hman a tum thu le fanau
khal nei ding in tumtahnak an neih thu” an sim. Annih pahnih hi
september 7 ni ah ham awknak (engaged) an rak tuah zo.

  ACA pawl in Anwar tawng sal lo
  Malaysia ah ei ruknak do tu pawl Anti- Corruption Agency (ACA) timi
in hmuntin, zungtin ah eiruknak a um le um lo an check rero. Himi
pawl in an theih duh bikmi pakhat cu Anwar party (PKR) pawl ih kut
sungah a um. Cumicu Datuk pakhat in eiruknak thawn pehpar ih a tong
suak mi thil thupi tuk ( Amai bawmnak ruangih Bawi upa tuan mi pawl a
thin hengin a sim suaknak cu video in an rak lak mi a um) Cumi cu lak
dingah Malaysia Deputy Prime Minister hlun a si mi Anwar hnen ah a
thleng. ACA hotu Sazali in himi video khui lak dingah Anwar hnenah a
sim zo mi nan, thu dang pawimawh ruangah a lak sal lo. “Himi Video
khui hi a tu rori ah ACA pawl in an tul hrih lo an tul tikah ka pek
leh ko ding” ti ah Awar in a sim.A hnuai ih zuk hi Anwar support tu
pawl an si. ( Anwar hi Malaysia PM tuan ding a sinan PM tuan lo in
thawng kum 6 tlak tiang rak tuar tu a si. Mipi tampi in an thu an
ngai ih an support)

  PM hlun damten sizung ihsin
  Malaysia PM hlun Dr. Mahathir cu National heart Insititute (IJN)
sizung ihsin 21 October ah an inn lam pan in an tlung thei. Dr.
Mahathir in hitivekin pumzai (operation) veihnih a tuahnak a si. Tui
tum cu ni 50 rori an rei. A nupi dr. Siti in ” Hitivek in tik cu can
kan hmang thei sal ding timi ka ruat ban lo” tin a lungawi thu a sim.
Lamzin an tlunnak ah a tu le pawl in an rak hmuak. An lungawi tuk.
Tuni hi kan nih hrangah Hari raya a si ti ah an ti.

  California ah Meisa kang
  California thlanglam ih San Diego area ah thlipi a hrang ruangah
meisa a kang ih mi 500,000 lenglo cun an inn le lo tlansan in a
sahimnak hmun ah an tlan. Inn 700 leng kai tlansa in a um. Mi pakhat
in a nunnak a can phah ih mi 20 in hriamhma an tuar. Kilometre 1,000
area a siatsuah. President GeorgeW. Bush in Eergency thu
  n tuamhlawmawknak le bawmnak ding thu a pe. Himi khuaram ih an
Governor Arnold in “kan vansiatnak a feh tluang nak san cu ram a
ro/car tuk, khua a sa tuk hleiah thlipi a hrang fawn ruangah a si”
tin a sim. Leitlun zuknung can thiam pawl umnak hmun pakhat a si ve
ruangah Hollywood mi hmin thang pawl khal an umnak inn suahsan in a
himnak hmun ah an tlan ve. Neitabik thuthang vek asile himi ram ah
tuni tiangah hivekih nasa in meisa kang le thli hrang a um dah lo ti
a si.

  Bohmu Siang Dun in mual in liam san
  Kan sianglocingin Major Siang Dun (77 yrs)in 10/20/07 (7:15am) Ygn
Hospital -ah in thihsanih 10/22/07 (Mon.) 2:00pm ah thlaanmual -ah
FBCY in ruakvuinak an nei. Laimi sungah kan pabik pakhat a si, Falam
Council khalah (Chairman) netabik term pawlah a tuan.

  Falam Baptist Church Yangon hramdom ihsin rinsanbik Deacons pakhat
tuan phahin Pathian hnen in thlensan. A nupi Pi Thuam Hoi le fate –
tu le pawl hrangah thlazacamsak cio hram uhsi.

  Fate upabik ihsin …. Pi CungCung [Mrs. Robert Sumhlei; (563) 344-
8722 h, (563) 508-3991 c, Iowa]; Ms Sui Piang, Ygn; Pi Sui Dim Par,
Ygn; Van Hum Lian [‘Humpa’ (269)965-5007, BattleCreek, MI]; Pu Za
Hum, Malaysia; Ms MeeNge, Malaysia ah an um..

  Dr. Sheikh Muszaphar damten a lei ah a tum thei
  Malaysia ihsin Van boruak (Aakatah sakhan) ah a kai hmaisabik tu
Dr. Muszaphar cu ni 11 sung a rei hnu ah leilung ah damten a rak kir
sal thei. Deputy PM, Science, Technology upa pawl , an nupi cio le
Dr. Muszaphar ih a nu pawl cun control room ihsin Russian ram ah an
tum lai an rak zoh. An lungawi tukih an Pathian hneah lungawi thu an
sim. Malaysia ihsin Akatah ih va kai nak dingah an rampi sumpai hman
a tul ruangah a veihnihnak cu 2010 lole 2011 ah an kai sal ding. Himi
ih kai tu ding cu Dr. Faiz Khaleed a si ding tiah Dr. Zukeffeli cun a
sim cia.

  Salman Khan bail in a suak sal

  India zungnung can thiam hminthang Salman Khan cu ni 6 sung thawng
a tlak hnu ah bail cawp in a suak thei. A um sung can tawite ah
thawnginn cu ” hell ram ” vek a si tiah Mumbai DNA thuthang latu pawl
hnenah a sim. human right hnatuan tu pawl in thawnginn va zoh ding
khal ah a duhsak thu a sim.

  Genting Highland dintu pa a thi
  Leitlun khual tlawng ih vak tu pawl (Tourist ) pawl in Malaysia an
thlen veten feh lo theih lo tluk ih an ruah mi Genting Highland rak
dintu pa Lim Goh Tong cu 23 October ah a thi. Kum 90 a ti ih a tartuk
zo ruangih thi a si thu a fapa Lim Kok Thay in a sim. A ruak cu
hmaizarh tlawngkai ni khat ah Gohtong Villa, Genting Highland ah an
phum ding. A kum 19 kim ihsin Malaysia ah a rak lut. A rat luh tir ah
Suitcase le US$175 lawng a nei. Asinan tu ahcun Malaysia ih milian
bik 3rd nak le leitlun billianaire cazin ah a tel ve. Lim Goh Tong hi
fak lo rual a si lo. Genting highland khi tuah dingah sun mang a rak
man. Hna a tuan khal ah zuam zet le teima zet in a tuan. Malaysia
Prime Minister pathum thawn khal in a san a dotdot ten rualpi tha an
si. A hnatuan mi ruangah Malaysia ram sumpai lut a tam phah ih a hna
tuan mi parah ah PM pawl khal in Malaysia mino pawl ih zohthimtlak ah
an cawimawi.

  Feb 28, 1918 ah Anxi distric ah a suakih October 23, 2007 ah a nun
nak a cem.. University Tuku Abdul Rahman in Doctor degree an pe. kum
90 a birth day ah Malaysia PM Badawi thawn an biak awkah ah ” PM in
bawm aw, kan hnatuan kan bang tuk paisa hi awl aite ih ngah theih mi
a si lo, tex in niam deuh aw” tin a dil. Dr. Lim Goh Tong thuhla hi
ngan cawk ding a si lo. Tlawng kai sang lo ih Leitlun mi lian ah suak
ban ve mi a si. A thuhla hi zingzawi vivo tikah mi maktara upat tlak
a si thu MCA President Ong KaTing khal in a sim.
  (Thubet : :Malaysia thleng kan Laimi mi tampi in Christmas hmuahnak
le mikhual upa neih tik in kan fehpi ringirngnak hmunpi, Malaysia ka
thleng tive ih Genting Highland thleng ve lo cu tiih an rel rero mi
rak dingtu (Founder)cu a mah Dr. Lim Goh Tong a si ).

  ———————————————————-

  Jehovah Jireh
  By- Rev. Khar Thuan

  Pathian cu daihnak (Jehovah Shalom) a si vek in Pathian cu petu
(Jehovah Jireh) a si thu zoh thlang ka duh.
  Jehovah Jireh (Semtirnak 22:1-19).

  Jehovah Jireh ti hi kan Falam Baibol ah cun “Bawipa in a pek” ti in
a um. Tong dang deuh in kan sim a si le “Bawipa cu petu” a si ti ding
a si pei . Hi thu ih hramthawhnak hi Sem.22, cangkhatnak kan siar a
si le hniksaknak in hramthokmi a si ih tizahupatnak ih rahsuakmi a si.

  Pathian ih a hniksakmi Pathum zoh tlang hmaisa ka duh. Abraham
thuanthu hramthawhnak lam kan siar a si le Pathian in Abraham kha
tirh a fial hmaisa ringring. Abraham in Pathian ih fialmi a thlun ah
cun thlawsuah ding in thu a kam ve ringring. Pathian ih tirhfial vek
in Abraham khal in pakhat hrelh lo in a feh, a thlun hnohno ve
ringring ih thlawsuah a hmu ringring fawn.

  Sem. 22:- a ra thlen tik ah cun Pathian in amah tihzah ih a thu
thlunringringtu Abraham cu a hniksak thlang ih a fapa neih sun
thawinak ih pek a dil. Abraham in a hlan ih tihzahnak thawn a rak
thlunmi, a thu a rak ngaimi Pathian kha cu e, kha e ti lo te in a
fapa neihsun te cu pek a tum thotho. Cu tik ah Pathian in amah a
tihzahtu Abraham ih fapa a hum lawng si lo in thawinak ding hrang ah
tucang pakhat a pekbet. Abraham in tucang cu thawinak ah a hmang. Cui
hmun cu Abraham in Jehovah Jereh- “Pathian in a pek or Pathian cu
petu” tiah hmin a sak. Hi ti ih pek a sinak kha Pathian a tihzah
ruang ih siannak a si ti Pathian in a theih ruangah a si (22:12).
  Job khal hi Pathian biatu a si ih Pathian rinsanzettu a si fawn.
Amah cu mitha zet a si ih thil tha lo zianghman tuah a duh lo (Job
1:1). Job hi Pathian amah rori ih hniksak a si lo kan ti thei men
ding na in Sa tan pa ih hniksak ding in a siangtu amah Pathian a si
ruang ah Pathian ih hniksak a si lo kan ti thei lo ding. Atawi zawng
in kan sim le Job ih Fapa pasarih le fanu pathum, a lennak hmuahhmuah
an hloh lawng si lo in a taksa pum khal ah hmasia a khat thluh. Job
in sunralnak le natnak a tuarmi pawl hmuahmuah ruang ah Pathian
phatsan cuang lo in hngetkhoh zet in a dingsuak thei ruang ah a hlan
ih a neih mi hmuahmuah ih lethnih tam in Pathian in lennak a pek
(42:10), Fapa pasarih le fanu pathum a peksal(42:13) .

  Jesuh Khrih tla Satan ih hniksak ding in Thlarau in nelrawn ah a
fehpi (Matt.4:1-17) . Cui Thlarau timi kha Pathian Thlarau lo a dang
a si theinak a um lo. Hniksak ding ih a siangtu Pathian a si ruang ah
a tongfang in Jesuh Khrih a hniksaktu kha amah Pathian a si lo hman
ah a thu cun a si thotho. Jeshuh ih hniksaknak a nehnak bik cu
Pathian tongkam (ca thianghlim) in a si. Cu mi in a langtermi cu
Pathian tongkam par ah a ding ih Pathian thu a ngai. Cu lawng si lo
in Pathian ih tuah ding a fialmi famkimter ding ah tihnim tul lo hman
a thlahtu ih duhnak tuah in ti a pil. Jesuh in a hlawhmi cu “ka
duhdawt zetmi ka Fapa (Matt. 3:17)” ti a si hngehnge .]
  Atlun lam ih Mi pathum tla ih thu ka siar tin te in thu pakhat hi
nun i simtu vek in an lang ringring. Cu mi cu: Jehovah Jireh “Pathian
hi tla cop thu ruatmenmi, tum-aw copcop mi si lo in amah tihzahtu le
a thu ngaitupawl hrang ah pekdingmi tiamkamtu, timtuahciatu,
pengaingaitu a si”. Pathian kan tihzah ih a thu kan ngai ah cun a
Fapa duh zet tiah kawh kan si ih kan tulsamnak hmuahhmuah khal pek
kan si lawng si lo, kan sunralmipawl khal a letlet ih pek kan si ding
ti cu pathian ih in kammi le in retsakciami a si. Amahbelte pek a
sinak ding ah Abraham in vei ziangzat Pathian ih fialmi a rak thlun
zo, Job in Pathian phatsan duh riai lo in ziangtluk in a tang, rin a
tlak, Jesuh Khrih in a Pa ih duhnak ziangzat a famkimter ti thu hi
ruahcih ringring a tul. Pathian tihzahnak ci, rinumnak ci, thungainak
ci tampi an tuh hnu ah pekbet an si ti hi a thupitnak zawn a si.
Khumkhaw nunak ngah ding ih Run kan sinak ding ah kan mai cituh tulmi
a um lo na in zumtu pawl pekbet kan si
theinak ding ah cun thlaici tuhmi um a tul ti hi kan Baibol cang
hrilmi pawl in in zirhmi a si. Pathian cu petu a si tiah duh mi ngah
ding lawng ruahsan ringring ih um cu ngah lo vek ih kan theihawk tik
ah Pathian ih umpilomi le peklomi ih ruahawk pang a ol zet. Pathian
duhnak tuah lawng ruattu nu lole pa in a rin lo pi in pek a si ah hin
lungawinak a tam cuang ding, Abraham ih lungawi ding zia khi ka ih
sim le rel cawk ding a si zik lo.

  [Ruahthattulmi : (1) Minung in Pathian ih lungawi zawng,
lungawitlak ding in kan tuahtheimi le kan thluntheimi a um lo ti hi
luar tuk in kan fehpi a si le a thangtheilomi, a kuhkhehmi zumtu kan
si ding. Khat lam ah tuah ding, tuan ding, le thlun ding tulzia
lawnglawng luar tuk in kan fehpi le Pathian zangfahnak ih sunlawizia
teptheingaingaifawn lomi zumtu kan si ding. Zangfahnak laksawng ih
sunlawizia, thawtnam kan theihngah hnu ah cun Pathian ih duhnak tuah
cu Jesuh Khrih in ka rawl thaw bik a si a rak ti bang in kan rawl
thaw bik a si fawn ding; (2) Johovah Jireh thu ah Pathian cu a
hniksaktu a si vek in a hniksaktu cun a hniksakmi pa kha a lungkim
zawng a si le ziang thawsuah ka pe ding ih a huat zawng a si le ziang
cawhkuan ka pe ding ti cu theicia lo luala men in thlacop ring in a
um lo ding].

  ————————————————————-

  Hruaitu
  By- Hre Mang

  Kan dung zarh a peh

  MiPehtlaihnak
  “Leadership is relationship”,”Hotu cu pehtlaihnak asi” an rak ti
theu. Curuangah politician pawlin lamtang an hawlnakah midang an
pehtlaih tumnak hrangah lamzin a umum hmangin an tuah theu, sungkhat
sinak, rualpitha sinak, phurzawng bang aw aw, khua le ram, pi le pu
ihsin pehtlaih awknak lamzin an dap ciamco theu. Hotu pakhat cun a
homi pawl thawn pehtlaih awknak tha zet a neih ringring thiam a thupi
zet fawn. A pehtlaihmi mimal pakhat cio a pehtlaihdan khalah nunphung
le sakhua biaknak thuthlung pawl thawn a mil aw mi asi a tul. A
pehtlaihmi pawl thawn lawng hman si loin a pehtlaih mi, a homi milai
pawl thawn a pehtlai tu milai pawl tiang khal pehtlaihnak tha a tuah
thei asile a tha, amah mimal in a pehtlai thei lo hmanah ral awknak
le huat awknak um lo ding a thupi fawn. A homi, mipi duhnak le
lungawizawng siattuahtu pawl thawn rualpitha asi thei fawn lo.

  Raltha:

  Khuhlan ral san lai ahcun hotu pawl hi ralhmaithi ngam, paraltha an
rak si theu. Santhar san khalah hotu pakhat cu a ral a that hrimhrim
a tul. Senpi vangtlang thatnak hrang ah a nun a pek ngam asile
dungtluntu mi zapi khalin raltha zetin an thlun ngam sinsin ding.
Hotu pakhat cun midang kut in rul kaihtum men a ngah lo. A tul asile
thihnak le nunnak karlak khalah a din ngam a tul. Senpi vangtlang
tumtahnak a hlawhthlin theinak ding hrangah le thudik thuhman a dinpi
nakah nunphung, dan le dun, nunthuken pawl kenkawh dingin raltha zet
in a mai nunnak le dinhmun canpual tiang hloh ding khawp khalin a
tuldan vekin a pek awkih ke a kar ngam a tul. Pa raltha cun amai
mawhnak khal a pawm ngam ih mipi hmaiah “ka mawh ngai asi” a ti ngam
khal a tul. A homi pawl khal lamzin dikah feh dingin raltha zetin
thudik le lamzin dikah a hruai ngam a tul. Hotu raltha cun a homi
pawl lamzin pengah an feh pang lo nak ding hrangah raltha zetin thu a
sim ngam a tul fawn.

  Taima/Tuarfai:

  Hotu tuan tu pawl hin an homi pawl theih lo le tluk lo ding khawpin
taimak le tairialnak an nei theu. Mipi lennak le thatnak ei le in in
cen men si loin mipi harsatnak le thuanthu tuahthat ding cu
liangparah suangin mipi theih maw theih lo khalah taima zetin cantha
hmuahhmuah tangkai zetin hmang thei dingin a zuam tento theu. Hotu
pakhat cun mipi hnen ihsin ngah dingmi hlawknak hnakin mipi hrangah
ziang thiltha ka tuahsak ding timi thinlung a nei ih mipi theih lo
khalah an hrangah thiltha tuahsak dingin le lamzin tha sialsak dingin
hna a tuan rero. A mipi hrangih a sunmang a hlawhthlin theinak ding
hrangah mit hmuh in ruahsan ding a um lo can khalah a zuam sunzawm
rero theu. Phurnak men ah hngat aw aw in kekar le fehtu si loin
sunmang, le tumtahnakin a kairuai ih can tawite sung harsatnak cu a
kumkhua hmailam saupi hrang thatnak ding hrang ruat in a tuar tento,
a tuan tento theu.

  Thinsau:
  Hotu pitling cun thinsahru (emotional feeling) a neh hrimhrim a
tul. Thinsahru thawn thinheng nakin a cangvai theutu mi pa in hotu a
tuan tikah tawh hren lomi insungah thil mankhung ret tikah ziangtik
lai khalah fifir pawlin an ruk thei ringring vek khi asi. Thinsahru
thawn thinheng a hmang tu cu ziangtikah a thin a heng ding ti sim
theih asi loih a homi mipi le mipi tumtah mi lamzin khal a thinsahru
in ziangtikah a siatsuah theh ding ti sim theih asilo. Cun hotu
pitling cun mipi in an theihthiam lo lai khalah thinsau ten simfiang
in lamzin dikah mipi a kaihruai ringring theu. Dinhmun a tha lo ih
mipi hrang zianghman ruahsan ding a um lo lai khalah hmailam saupi
sawn kha zoh in lamzin dik le kumkhua daih lamzin sawn kha a mit in a
hmu ringring theu. Can tawite sung thinhengnak ruangah kumkhua daih
thiltha kha siatsuah loin can tawite hrang thiltha pawl cu a kumkhua
daih senpi vangtlang thatnak hrangah hman a thiam in khua a ruat sawn
theu.

  Duhdawtnak: Hotu cun duhdawtnak a tlaksam asile amah mimal hrang
hlawknak a um lo can ah mipi hrangah zianghman thiltha a tuah dah lo
ding. Duhdawtnak ti tikah amah a duhdawttu le a mai hrangah thiltha a
tuah tu pawl lawng si loin a homi pawl lakah a mah a duhdawt lotu, a
mah a huatu, a mah in a duh lem lomi pawl hrang khalah rualran ten
hlawknak le thiltha khal a tuahsak theu. Duhdawtnak cun amai hmaikhua
a sial lo ih mipi hrang thiltha sawn kha a ruat. Ziangkim a neihmi
milai nunnak le bungrua hmuahhmuah khal a duhdawtmi pawl lungawinak
hrangah a pe siangih thatnak hrangah a ziangkim cu a peksuak theu.
Midang hnen ihsin ziangvek hlawknak, lalnak, upatnak, hminthatnak le
canpual tha ka ngah ding timi hnakin a duhdawtmi pawl hrangah
ziangvek thiltha ka tuahsak thei ding timi a ruat sawn. THiltha a
theihmi cu ziangtik hmanah a sup aw dah lo ih amai hrang lawngah a
ret/thup dah fawn lo. A duhdawtmi pawl hrang thatnak le lungawinak
hrang cu a zuam tento in lamzin a hawl
tento theu. Cuticun a homi pawl thatnak le lungawinak, tumtahnak a
hlawhtlin theinak ding hrangah a nunnak le neihmi pawl kha a pe sawn
theu. A tawizawngin, duhdawtnak cun pek awknak a hring suak sawn
theu. Mipi lungawinak cu a lungawinak asiih mipi hlawhtlinnak cu a
hlawhtlinnak vekin a ruat sawn.
  Hotu hringsuak:
  Hotu pitling cun hotu dang a hring suak. Milai cu a kumkhua dam
ding kan um lo vekin leitlun theihnak le hmuhnak khal sankhat hnu
sakhat a karhzai sinsin. Curuangah, hotu tha cun a homi pawl lakah
amah hnakin fimsawn, theisawn le thiltithei sawn an suak theinak ding
lamzin hawlin hotu dang, a duhdawtmi mipi pawl hrang thiltha le
lungawinak tamsinsin tuahsak thei tu ding hotu a hring suak theu.
Cutin siloin hotu tha lo cun amah hnakin a fim deuh le thuthei deuh,
thiltha tuah thei sawn ding pohpoh cu a hua ih a dodal, lamzin a phih
sak theu. Cutikah amah a thi asilole a mah in thiltha a tuah thei
nawn lo tikah a kaihruai mi pawl (mibur maw pawlkom khal) a cemlam an
pan theu. Hotu pakhat cu hotu tha asimaw ti theih duh asile hotu dang
a hring suak maw ti hi zoh in theihtheih asi. Khuahlan san ahcun lal
le hotu pawl cun an damsung, an mit an men sung hotu le lal an rak
tuan theu. Santhar san ahcun kumkhat hnu khumkhat fimnak, theihnak,
le hmuhnak a karhzai sinsin tikah hotu
pakhat in a damsung a mit a meng sung hotu a tuan ringring asile
senpi vangtlang thansohnak tampi a dal sawn theu. Hotu tha cun amah
hnakin a fimsawn le senpi vangtlang hrang thiltha tam sinsin a tuah
thei tu hotu dang a hring suak ringring theu.

  Hotu cu ziang asi?
  Milai thuanthu kum thawng reipi kan zohsal asile hotu cu ziang asi
tile mibur umkhawm (band age) san lai ahcun anlakah a cakbik, sakah
sanlai (hunting age) asile sakap thei bik, tribal san asile tribal
chief pawlin hotu, lal an rak tuan. Laimi “khuahlan san lai” ahcun
pupa san ihsin a thlahthlah in mah le ramthen sungah hotu an tuan
vivo theu. Santhar san, kawlram independent hnu lam kan zoh asile
laimi lakah hotu cu zo asi timi ah thinglungput ruahdan (concept)
thleng tulmi a um. Santhar tlan zuam awknak sanah kan miphun hin rual
a ban in rual a pawl ve ding asile kan khawruahdan le lungput
hrimhrim hi khuahlan san lungput le khawruahdan tlansan in kan thleng
hrimhrim a tul. Khuahlan lal san le kawl ralkap pawl in ci in tuh mi
thinlungput pawl khal thleng a tul. “Sabikti thar cu savun tithawl
hlun sungah kan thun nawn lo a tul.” Santhar san ahcun pawlkom dindan
le kaihruai awkdan khal thleng vivo a tul vekin le senpi vangtlang
tulmi, mimal pakhat cio in hotu pawl parah
an hngat awknak san (thu) khal a thleng awk vivo vekin hotu cu ziang
asi ti kan ruah dan pawl khal kan thleng vivo a tul. Santhar san
ahcun hotu pawl cu mipi pawl lu-hngatnak, kumkhua lal, rosar in sar
mi dinhmun, khuahlanah an hminthatnak ruangah hotu tuanter mi, tvp,
si nawn loin santhar minung pawlin ziang kan tul, santhar minung pawl
ziangtiang hotu le senpi vangtlang parah an tthum aw ding, senpi
vangtlang duhmi le tumtah mi tuansuak dingin ziangvek thiamnak le
theihnak a tul, ziangvek pek awknak a tul, ziangvek lungput a tul,
tvp, pawl parah hngat sawn in hotu hawlthiam le hrilthiam a thupi.
Khuahlan san ahcun hotu pawl cu mipi uktu an rak si theu; asinan
santhar san ahcun hotu pawl cu mipi duhmi le senpi vangtlang hrang
thiltha tuansuak tu ding, senpi mipi siahhlawh vekin hma latu sawn a
si a tul. Senpi vangtlang tulmi le mamawh mi tuahsuak thei dingin
senpi bungrua (public resources) pawl kha hmualnei zet (efective) in
a hmang thei tu mipi kaihruaitu asi thei sawn
a tul. Hotu cu dinhmun siloin hnatuan tuantu asi tiah ruat le
hmuhthiam a thupi. …..peh lai ding

  Hmaizarh ah aw!!!

Comments

comments

Comments

%d bloggers like this: