Hruaitu Issue 148

 Thuhmaihruai

Hruaitu thuthang hi issue 105 nak tiang hrawng lawng group mail ah
kuat a si. Tuanvo nei tu pawl in kan mah Malaysia um pawl hrang ruat
ih tuah mi a si ruangah group mail ah kan thlah nawn  lo ding tin
relcat a rak si.

Asinan Malaysia ihsing ramdang a feh tu mi tampi pawl in Malaysia um
kan unau pawl thuhla le an tuah mi siar an duh ve ruangah le group
mail ih thlah dil tu an um hnuaihni ruangah kan rak lo kuat. Mai pum
cawmnak hawl in man lo zet karlak ah tawlrel mi a si ruangah a famkim
lo nak tampi a um ding. A siar tu pawl in fakselnak khal neih thei a
si.

Calai komiti

  Hruaitu zarhtin thuthang

  Issue 148

  26 August, 2007

  Editorial Hmurka

             Hruaitu Siartu zumtu U le nau,tunghmun harhdamih nan
umnak hrang  thla za cam phahin cibai kan lo buk a si

  .              Falam mi pawl hi kan dung lam kum100 hrawngah cun
Rirai biain thingbul lungbul bia kan si,sihmansehla cin le dan nei
tha mi kan si.Sakhuanak rak upattu kan si.kan pi le pu pawlin an
sakhuanak upat phah thawn dan fel faiih kil khawi aw mi an rak si.Kan
pu pa pawl sanah cun lo an feh tikah,an hlawn thil neih mi inn leng
tualah an suahta,rai an thawi tikah ,mi dang lut lo dingin kawt kain
thasawl an thiat,zo hman luh an tum nawn lo.Mi harsa bawm tul an um
tikah bawm awin an rak khawsa,rawl ei ding nei lo an rak pe aw,khaw
dangih pursum an um tikah mi dangin mai khawpi hman cawm thei lo tiin
an khawpi pawl nautat a rak si. Kum upa nauta,sakap mi lian tih zah
aw ten an rak um.
                 Tulai canah Laimi pawl, zumtu kan ti aw thluhih,ruah
ding mi kan nei,kum upa tihzah dan,farah nauta duhdawtnak le mitin
kan tlanlen danah kan pu pa dan tha pawl hngilh loin kan
kristiannakin Bawipai ram din uh si.

  CHINA RAMAH TIDAI LIAN

  China ram sak lam Jiangsu ram bial khat(province)ah ruah na satuk a
sur ruangah tidai a lianih suzhou kawtthler le khawlakah  khuk tiang
laiin tidai a lian,tui kum thalah kaw hlum leh ruahti maksak a sur
ruangah tidai lian leh tilikin mitampi 1,100 leng loin an thih phah
zo. Hi tidai lennak kiangkapih an khawpi Guangzhau,zhuhai le Foshan
ah khalah tilian a phan um thu dawn a si,hitiih china ramih tilian
leh khawhlum a thlennak san cu Climatic thlak theng awk natsat
ruangah a si tiin China thu thang cun a ngan.  .

  EAGLES PAWLIN HLA THAR SUAH DING

               Leilung tlunih Albums ting za leh kul(120million) leng
lo zuar suak tu Eagles pawl cun an album thar ding “Long Road Out Of
Eden” cu October thlaah an suah ding.Anni Group hi kum 1970ih siin
rak ding thawkin an mah leh cioih talent dawn mi hla sakin an rak lar
zetih kum1980ah Group hnget tak dinin  kum 1990 hnu lmah phei cun
Leitlunih Top Hits ah hminthang khawpin an hla  Hotel California leh
Life in the Fast Land Hla pawl tla cu leitlunih dai thei lo khawpin
an lar.
  An Band pawl Gleen Fray,Don Henley,Joe Walsh le Timothy B.Schmit an
si, tuih an hla thar dingih an hla hmai sabik ding `How Long’ ti Hla
tla cu Americanah Video leh Radioah an than zo,.an hla thar cu Wal-
Mart Store ah zuar suahnak leh tlang zarh  a si ding, A o,n Website
na rak zauh duh a si le(www.eagles-band.com) a si.

  MINUNGAH H5N1 KAI CAK

              Washington ah  Mathematical analysis pawlin vate ihsi
natnak kai theih (Bird Flue H5N1)cu  tui kum April thlaah Indonesia
ramah minung leh minung ihsiin awl ten a kai awk thei zia hmuh suah a
si,curuangah hi nat nak hi a darh cakin minung le minungah awl ten a
kai aw loh li theiih tihnungum natnak a si zia leh awlaiten
leilungtlun pumpiih a darh sarh thei zia a si ruangah a ra suah nak
Asia ram ihsin Africa ramah vate rual khatin an thlen a si tiin
leilung tlun pumpi health lamah ralrin a tul zia an than.

  MINUNG CELLS(CI NUNG)IN ZINGHNAM (RAT) LUNGNA(HEART ATTACK)DAMTER

              Minung kan ci nungin zinghnam lungna pawl cu a ti
damthei a si thu le an test nakih an hlawh tlin thu US mithiam pawlin
kan dung kar nipiah an puang,hi hlawh tlin nak hmangin minung hrangah
lungna leh lung tha lo pawl hrang khalah a hlawhtlin  le a hman theih
an beisei a si.

  CONGO RAMAH MINUNG100 LENGLO KHAWSIK NAT RUANGAH THI

            Kinshasa(congo)ah minung100 leng lo HEMORRHAGIC FEVER
ruangah an thi,hi natnak kaitu pawlin zarh hnih leng lo an nat a
siahcun an nunnak cu beisei umlo run theih nawn loin an thi cih tiin
an ram sibawi Jean-Constatin Kanow in a than,hi tivek natnak hi tui
hlan khalah Murburg le Ebola(congo) ram tho thoah a rak thlengin
minung 217 laiin kaiin 103 in an thih phah.

  LEILUNG TLUNIH DIAMOND TUM BIK

              Johannesburg South Africa Mining Company ih tuantu
Brett Jolly cun tlawngkai nihnih niah a hna tuannakah Diamond
(Lungmankhung) cu lei sungah si lo a hmu(sar)ih a hmuh pekah Diamond
si dingin a zum lo hmansehla zauh fiannakih an zauh tikah Diamond sit
tak a rak si tiin a rel,a tum lam cu7,000
  carats,a h
  mel(shape)cu bawhlung nem vek, a hringih tleu,tui dinhmunah cun
leilungtlunih tum bik a si,a hlanih tumbik cu kum1905ih Pretoria
ramih an hmuh tak cu  3,000carats lawng a si.S.Africa ram hi leilung
tlunih sui le ngun lamih ram lianbikih a pathumnak a si,a pakhatnak
cu Russia le a pahnihnak Bostwana an si.

  BAWHLUNG SIT THIAM PUERTA THI

              Spain Footballer lar tak Antonio Puerta cu spain Club
Sevilla Midfielder cun kan dung zarh te niah  Football an leh(sit)
laiah a tlu sualih lung phu cawlin a thi cih.Kum 22 ih upa Puerta
thihnak hi Spain ram lawng si lo,Europe ram le leitlun ih Players leh
FootBall lamih hruaitu pawlin an ui zia,an thin lung a thawn zia leh
an tuar pi zia thu an than,Puerta thih ruangah tlawng kai ni thum
niih Club leh Club Bawhlung sit ding pawl khalin an sit ding ni an
thawn,a rualpi(Players) pawl le an Club tantu(Fans) mi thawnghra
lenglo pawlin Puerta ih hrangih an ti thei neitabik cu a mah sunloih,
upatnak  thawn a taksa cu Sanchez Pizjuan stadium,Sevilla ah lain a
ruak thlah nak khawm an neihpi.Hi nah Puerta ih Fala,a ngaihzawng
(GirlFriend)  Mar Roldan thla 7 nau pai khal mitthli thawn a tel ve.

   YANGON KHAWSUNG LINE BUS MANKAI LE MIPI HAR DEUH DEUH

           15thJuly,07’ni ihsin Yangon khawsung Line Bus to man a kai
theh.A kai dan pawl cu, Ks 40/60 cu Ks 100/- ah,  Ks 80/- cu 120/-ah
le Ks 120 cu Ks 200/- tla an si.Line Bus to man a khun tuk ruangah a
hleicein shwepita,Mingaladon le Dagon ihsin khawsungih hna tuantu
pawlin har sat nak an tawng.Motor Bus to thei tu an mal vi voih
khawsung tlang lenglawng lawngkhat zetin an to thlang.  Cuti a si
laiah ral kap cozah uk nak duh lo le Democratic duhtu pawl cu,,cozah
ralkap in a thup tein thawng a thlak,a kai re  ro, hi mi ruangih
harsat nak le buai nak neuh neuh ram sungah a um thu thu thangin
nganin,Ralkap hotu pawl hnenah, ziang hman ram mipi thatnakding tuah
duh loih a thup ten a hreknak thu leh Democracy Leader Aung San Suu
Kyi a mai Innih kum 11 sung thawng thlak a si cu US President G.W
Bush khalin a mawh thluk thu a puang.AP

  BECKHAM  A KE NA

  England Mildfielder David Beckham cu a khuk vawrh lamah hliam a
neih ruangah MexicoClub Pachuca thawn Cup Final an sitah a tel suak
thei lo.Hi match ah hi a cem tiang 1-1in an neh awkih cui thehah
Petnalty an sitih 4-3in Los Angels Galaxy cu an sung.Pachuca
Midfeilder Fernando Salazor thawn napi an khawngawk ngah ruangah an
pahnihin hliam tuarin sit thei nawn loin an suak ve ve.Beck ih ke cu
a ilh a si tiin L.A Galxy Officialin an than.Cun Galxy a luhnak a rei
hlanih hliam a tuar ruangih a sit thei lo cu pawi a ti thu Beckin a
rel.Cuti a si laiah England Ramin hmai kum Euro 08′ hrangih qualified
hmaithla hrangah Beck cu a hliam a dam lohli thei an bei sei.

  NAUTE PHIR PATHUM
  Cincinnati ih umTlwngkai ni thum niah Victoria Lasita kum39 le a
pasal Tim Lasita 48 te cun a veikhat nak hrangah  fakhat lawng nei
dingih an beisei awk laiah rin loh piin phir unau thum an nei.a suak
hmaisabik Casey Alexander1.88kg,a sangtuCadenBradley2.2kglea
nautabikCarson Charles2.08kg tla an si.”Bawipai pekmi mawhphurhnak
kan parih a thum mi a si” Tim in a ti.

    PRINCESS DIANA

             Tlawng kai ni nga ni kha British Lal fa nu Princess
Diana thih cam a vawi10th nak a si,kum1997ih leilungtlun pumpi dai
reh thep thepih thih  ni kan sunlawih tak Diana cu a duhdawttu leh
lai natih  ngaisangtu pawlin  a mai hminih, a mah nghilh lonakih an
tuah mi Pangpar hmuan Ross Garden German sak lamih Sangherhousen
Queen of Heart”tiih tar nak hmunah mi tam pi an feh.Thil ropi tuah
suak theu nu thinlung tha leh  tulai(modern)takih cangvaithiam,”Na
thih hlan leh na thih hnukhalah ka lo duhdawt Princess”Dominique De
Fontenay in a ti.AP.

  50TH MERDEKA

  KUALALUMPUR: Ni 31stAug 1957 ihsin British thuneihnak laikihsin
zalennak (Independence) a rak ngah kum 50th kim nak cu malaysia
Primeminister  Datuk Seri Abdullah Ahmad Badawiin  Dataran Merdeka
hmunah lawmnak khawm kai hruaiin mipi tam pi pung khawm nak hmaiah
mipi hnenih fuihnak thu a rel.
  Tlawngkai ninga zingnazi12A.M nghakih mipi tampi pung khawm hmaiah
cun Primeminister Abdullah cun nazi 12 a kim veten zate “MERDEKA”
tiin au rualnak an nei.Abdullah cun,A ram mi(alaysians) pawlin
thlarau lamah Rukunegara tawn zawm awknak kan neih ruangah tui ni
tiang ram ralmuang a si,zalennak(Independence)hi a cem,a tawp men si
loin ,mipiin kan tul poimawh cu hi zalennak humhim leh a sinak theih
fiangk hi a si.Harsatnak rak paltlangtu  hruaitu pawl hngilh loin an
mai ruangih hi ti vek ram zalen leh ram ralmuang a hawng ding suakin
a sungah hnam dang dangi umkhawm le tangrual khawmin,diknak leh
thianhlimnak bulhram hi malaysian khua le ti pawlin kan kut sungah a
um ti theiin kan lo suan vawr na si MERDEKA tiih au phahin,hi kan ram
hi kum 50 te lawng hmel a hmu laiih kan dunglamih canliam zoah thil
tam pi tuah hrih lo leh hmai lam caanah hmabak tampi nei laiin
kum50ih upa hmel hmu hi tikhawpih a thang cak thei hi a sungih hnam
dang dang tanrual theinak  ruangah a si,a ti.A
ram mipiin cozah thawn thuneihnak hman
  gtlang(Power-sharing) tu leh danlam thuhla khalah rawn aw tlang
thei ram kan si,MERDEKA,MERDEKA,MERDEKA………….” a ti.
  Cutivek tho thoin,JOHOR BAHRU,IPOH,PENANG,MALACA Malaysia ram sung
hmun tinah 50Merdeka hi sung lawizetin mipi in kan hmang tlang thluh
a si.

  FPM Lucky Tiket on a si zo

              A tlun ih thu than awk zo a si vek in FPM(Falam Pawlkom
of Malaysia ) ih LuckyTiket on nak cu Pathian lam hruai nak in
tluang le lung awi ten kan theh suak thei ruang ah Pathian hmin kan
thang that.FPM in miphun hrang ih a hna tuan nak par ah  Upat in
Minung ra suak khawm tu khal kan tam zet ih a ra suak khawm tu par ah
Pawlkom hmin in lung awi nak tam pi kan nei a si.

              FPM ih hnatuan nak par ah lung kim pi in Lucky Tiket on
nak hmun insan tu LCF (Lai Christian Fellowship) Upa pawl le Pastor
par khal ah lungawinak tampi kan nei.Hmailam ah Pathian in thlawhsuah
mal za sawm hramseh.  Cun miphun hrang ih tan la tu pawl bawm thei
ring ring tu an si thei  nak hrang khal FPM cun thla kan cam a si.

  Lucky Tiket a ngah tu pawl cu a tang lam vek in a si.
     Number
Laksawng
  1.367                                                            TV
21″ (Audio vision)
  2.152
Mobil pho.(Nokia)
  3.329
Table fan  (Panisonic)
  Laksawng dang dang a ngah tu pawl ih number pawl,
  1.039    2.241
  3.227    4.379
  5.055    6.334
  7.203
                 Mai number ciar zoih in a ngah tu kan um a si len a
hnuai lam in contect no. ah sut in lak a theih a si.Pathian lam hruai
nak in zan lam 3:00 pm ah thlacam nak in tlung ten kan theh suak a si.

  Contact nak ding phone no.
   017 2880750
  017 6941462

  Pi Thang Tin Tlem in mual in liam san

              Pi Thang Tin Tlem (Mang Hlei Zing nu) Tuizarh  ah a
lungnat in a thi. Mual in lian san zo tu Pu No Zam  ih nupi a si. Ram
dang um   Kan Falam mi  pawl in hruaitu Ni Li Lian le U Pa Kai tei
pawl ih an nu a si. A tan ta mi fanau le sungkhat pawl hruaitu
thuthangin kan tuar pi a si.

  Solomon Menrihai VCD a suak zo

              Kan mino lakih santhar hlasak thiam bik pakhat Solomon
Menrihai cun a vei 1 nak hrang VCD a ti suak ve zo! A man hi KS- 2000
asi .
   Hmailam ahcun ramdang,  hmun dangdangah tla zuar suah vivo asi lai
ding ti thu dawn a si.

  Salai Eddy USA a thleng zo

  Kan LCF mino hohatu Salai Eddy cu 29 August ah Malaysia ihsin in
feh san. Indiana Polish ah damten a thlen thu hruaitu in a thuhla
dawn a si.

  Lucky Tiket zuar

No…………….

Hmin……………………………………….

Phone……………………………………..
  LCF Nauhak tlawng hrang sumpai hawlnak  in rak bawmtu
  pawl hnenah a tanglam ih thilri pawl laksawng ngah theih a si.

  *              Camera
  *              Telephone (Nokia)
  *              DVD player

  On ding ni…          7 October.
  A hmun                  LCF Biakinn

  Sumpai dawngtu……………………………………..

  LAIRAM THANSONAK ZOIN A TUAN DING
  Reuben Hrang
  Laimi pawl hin kan semnak khua le ram suahsan in hmun tinah kan
darh aw thluh. Kawlram khawpi pawl le ramdang tiang kan thleng.
Hitiih kan vahdarh thluh hi khua le ram hrangah thathnemnak a um pei
maw?
  Zohthimtlak Israel
  Pathian in Abraham hnenah ka lo pek mi ramah feh aw la, tefa tampi
na nei ding. Thlawsuah ka lo pe dingih na hmin ka thanter ding a ti
(Gen 12:3). Abraham cithlah Israel pawlih ram din tumnak cu tui
Israel ram hi a si. Asinan an tum dan vek a si thei lo. Egypt salah
kum 400 leng lo an tang, an suah hnu khalah Palestine, Syria pawl
thawn an do aw ringring. An ring a hung tung deuh tiah Babilon salah
an tang lala. An ral pawlin Jerusalem kulhpi tiang in an ur kang sak
thluh. BC 538 hrawngah an dinsal. Rome cozah kut hnuaiah an thleng
lala. Israel pawl hrangah khaw-ongnak a um thei lo.
  Cuticun Pathian hnamthlan Israel pawl cun harsatnak le ral kut tuar
thei loin ram tinah an tlandarh. Cuticun 1880 hrawng hmanah Germany
ramah Israel mi million 6 an um zo ti a si. Hitiih an thendarhawknak
ihsin an tong, an calai, sakhuanak, leitlun hmun tinah a thlen phah
thluh. An zawnzaihnak ihsin hmun tinah cathiam, milian a suahter.
Cuvekin kum zabi 20ih leitlun miropi bikih hril, US mi  hminthang cu
Israel mi Einstein a si. Leitlun Khristian mino pawlkom YMCA ih
sumpai hngatawknak bik khal Israel milian pawl an si. An thlennak
kipah mitaima, khua le ram duhdawttu, an calai cawisangtu an si.
Curuangah tui niah Leitlun phunsang tlawng tinah an ca zir ding a
umih, Bible mithiam si ding cun an tong thiam lo cun thil cang thei
lo tluk a si. Ram sung mi le ram leng thleng pawl tuan tlangnak le
zuamnakin 1948 May ni 14 ah an ram zalennak an ngah. An umnak hmun
cio ihsin an mi phun le ram thansonak an tuan ruangah Pathian kam cia
vekin an ram cu tui niah khuaitizu le
cawhnawi luannak leitlun pumpi theih ram thangso ah a cang.
  Pathian in Israel pawl harsatnak phunphun lakah thuthangtha karh
zai ter tuih a hman vekin kan ni laimi pawl khal a tum tah
hlawhtlingtertu le a sersiam mi lai ram minung cennak tlakih tuah
dingah tuanvo pek kan si.Cui tuanvo cu thuanthu pek mi tuanvo a si.
  Lairam maw Israel
  Mi hrekkhatin kannih Lairam cu a khua le ram, a minung khalin kan
zir lo. Zawng le Ngau tlannak hman a tha lo, khu le khamin a khat,
cicin hram thlaknak hmun tha kan nei lo, hman theih tiva khal a um
lo, ei-in hawlnak a har tuk tiin dunglet hawi loin kan tlansan.
Asilen Israel ram hi Lairam hnakin a tha cuang maw? Tha cuang lo.
Asinan kan sim zo vekin ram sung mi le hmun dang um pawl tuantlangnak
ruangah an ram lungkham cu khuai vulhnak tha bikah a cangih an ram
tlang car cu tu le caw vulhnak hmun tha bikah an canter. An tiva
neihsun Jordan cu an ram cawmtu electric suahnakah an hmang. An tipi
kap neihsun cu ramdang khualtlawng pawl hnenih sum lakluhnak tha bik
a si. An ram tili umsun Galilee cu hmun tinah la in thlaicinnak an
ram cawmtu-ah a cang.  Kan van a se tuk ziangih thahnem lo tipi thi
kan nei an ti rero mi cu a alnak dawmah tuah in a co lo phangih ram
tin cuhawk rero miah a cang.
  Asilen Lairam hi Israel ram vekin a cang thei pei maw? Tuan tum lo
uico tilian thlirih thlirtu pawl hrangah cun kan ramah thansonak, sum
lakluhnak tha a um lo kan ti men thei. Asilen hmun dang cu sim lo
Falam peng sungih kan neih mi Kawlram pumpi daih electric suah
theinak Run vapi, Tlairawn, Tiphei, Tinga, Lai le Phauva pawl teh
ziangah kan hmang. Israel ram hnakih tha Vuibula-tu, Lai-tu, Zamual-
tu, Aikawn-tu pawl teh hi tin maw an um lak men ding. Meihawl ram le
hmun dangih kan Far thing liangluang teh hitiin maw an rawp lak men
ding. Lungpi lungto, Mirang leilung (Cement) tha zet khi teh lamzin
phah nakah maw kan hman lai ding. Kan pangpar mawi phunkim le senhri
par mawi pawl teh thei lo ramdang hnenah maw kan kuat lai ding?
Varung (Valung), Ramthlo aa-lu, kawpi cinnak, Mangkheng, Thlanrawn
serthlum (lingmaw) cinnak tha zet pawl teh kan zoh men ding maw? Kan
neihsun Rih li sum lakluhnak tha bik ding le Buannel, Lai hna ramdang
hiptu ding pawl khi teh kan zoh liam vivo
men ding maw?
  Social Theology ngantu Reinhold Neibour cun, “Pathian ram kan ti mi
hi Pathian, bulpak le khua le tlang (Society) a kom-awk lawngah a kim
mi a si,” a ti. Kan unau laicin sempi pawl Pathian hnen thleng dingih
hruai hi Pathian pek mi tuanvo a siih kan khua kan ram minung cennak
tlakih tuah hi Pathian lungtum a si.
  Zo in a tuan ding?
  Kan khua kan ram thansonak zoin in tuansak pei? Israel pawl cun an
khua le ram humnak thansonakah anmah pumpak cio in tuanvo an neihzia
an thei aw. 1967 kumih Arab ram 12 le Israel doawknakah ni 6 sungih
an neh theinak khal nunau mipa ti um loih an tan tlang ruangah a
si.Hitumah Arab  pawlin an neih lakih tha bik ram dang neih hrih lo
Russia ral do van zam thawn Israel Bomb thlak ding a si.Vanzam sungah
bomb a khatin an phur.Arab pawl cun Israel ram vutcam can ding hngak
hlapin an rak thlir.An nahzi a kim,cui vanzam cu Israel panin a pawk
thlang.Ziang tikah bomb a thlak pei an ti re ro laiah Israel Televids
Vanzam tum hmun tualrawnah a vung tum zuai zo.Israel mipi cun kan ral
van zamziang tin kan hnenah a rawng tum tin mang bang zetin an rak
thlir,.tuanvo neitu pawlin an vung pan cu vanzam sung  ihsin Arab
tlangval  le Israel Fala mawi zet  cu tuanvo theh ngah lungawi zet
hmel puin an ra suak..Mairam himnak,thatnakah cun ziangvek dinhmun
can khal pawi an ti lo.
  Cuvek tho thoin 1976ah Israel ram leng tlawng vanzam cu an ram
panin a zam laiah hijack(neklawn)an si ta riai.Cuticun Palistin le
Germany misual pawl cun an kir piih Ukanda ramah an tum pi.Nazi 24
sungih an duhmi ngah lo len Israel mi 100 pawl cu thah thluh ding ti
a si.Israel cozahin cui thu an theih tikah  thinpit vansangin khua an
ruat.Neta bikih an cozah thu rel cat cu nazi 24 sungah run suah ding
ti a si.A runtu ding ral kap an hril cu a cuhin an cuh aw.Mi 12 an
hril ngah.Cu le tikcu rei lo te sungah Arab vanzam bang zet pakhat cu
Ukanda vanzam tum hmunah a vung tum.Arab ral thuam hruk mi ralkap12
cun misual pawl cu an kap ciam co thlang.Israel khaih tuar pawl khal
an mangbangin,a khurin an khur,neta bikah”Israel kan si a ti aw pawl
Vanzam sungah a rang thei bikin lutuh,a lo runtu nan unau pawl kan
si “tiin Hebrew tongih an run ti cun an lungawituk mitthli luang
phahin vanzam an pan ciam co.Culai fangih pitar pakhat sizung um ti
lo cu mi 99 him dam ten an ram an
thleng sal. Sikhalsehla an ral kap hotu bik Lt.Conel Johnathan cun a
nun nak pein a ruak thawn an ram a thleng.Israel pawl cun an ram
humnak,thansonak dingah cun an nunnak cemle ziang vek dinhmun thlen
khal an ui lo.A si le kan nih laimi pawlin teh kan khua kan ram tuah
tha tuah mi dang kut kan hngak lai ding maw?
   A vawi hnihnak leitlun ralpi laiah hin England pawl an sung cuahco
thlang. Germany ralkap pawl London khaw hnar an thleng. British
ralkap pawl hmun tinih an darhawk thluh ruangah an khawpi London hum
thei tlak an um  nawn lo. Germany kutih thlen ding cu an ngaingam
fawn lo. Cu tikah England cozah mangbang vansang ih an ram mipi hnen
thuthan cu “Nang ram duh dawtu na khua na ram in a lo pawimawh” ti a
si. Cuticun a tum a sen ti um loin ralkap an lut ciamco. Ni khatah mi
30,000 lenglo an lutih training pek le an umnak hrangah an buai sawn
ti a si. An nunau pawl khalin an pasal pawl hnenah, “Nang maw kei feh
sawn ding . .  kan tefa in ziang an rel ve ding?” an ti.Kan nih Laimi
pawlin teh kan te sin fa hnenah ziang kan roh ding.Na khua na ram
thansonak tuantu dingah Pathian in vancung mi a lo thlak lo ding,
ramdang mi khal a lo kawhsak lo ding. Tuanvo neitu cu nangmah le
keimah kan si. Na tesinfa pawlin ziang an rel ve ding? Nang Laimi na
khua na ram in a lo pawimawh.

                                                    A suahtu      Lai
Christian Fellowship

                Kuala Lumpur

                Malaysia

                                                              Calai
komiti      Rovel Thang

                Ronald

                Sang Nei Thang

                Lal Lian Ceu

                Simon

                Ngun Tiam

                Salai Mamang

                Pa Thawng Za Hnin

Thuthang laktu  Liante

                Ukte

                Thawngte

Zohfeltu            Pathuam

Sumkil              Pa Lal Ring Lian

Zemdarhtu        Salai Za Biak Sui

                Salai Za Tlen Luai

Advisor            Rev. S. Ni Luai

                Pa Khaw Lian Khup

                Pa Run Thuan Hre

                                                              Contact
nak      Hruaitu@…

Comments

comments

Comments

%d bloggers like this: