Hruaitu Issue 100

Editorial
  Ram hrang  hnatuan tu

  Leitlun a sang,fimnak le a karh sinsin,minung khal kan pungkarh
vivo,thiamnak khal hlanlai kan pi le pu pawl rak ruah ban lo mi tiang
kan thleng thlang,zo hman in mai miphun an phat san duh nawn lo,an
miphun hrangah tiin an caan tik cu an aap
!Laimi khal kan thangso rero,ram duhdawttu le ram hrang tuan tu kan
karh vivo,kan laimi le miphun in hmai a nawr rero….

              Asinan…miphnu hrang t.uan si tho si,ma¡¦i hlawk nak
ding hawl khal kan tam vivo ! Abraham Lincoln  le pawl san laiah kha
cun,an miphun hman si lo tiang hrang ah nasa zet in hmai an rak lak
dah.India Prime Minister hmaisa bik cun,a thlahlawh pawl an pek tum
tiang hman in, ¡§Kei cu miphun le ka ram hrangah ka t.uan,thlahlawh
cu mi harsa pe sawn uh¡¨ tiin a rak eel ngam.Asinan tuisun ih kan
laimi hrang tuan tu pawl hi,Thlahlawh cu kan pe thei lo,si hmansehla
an beisei ko lo maw ?

              A hleice in Malaysia kan zoh asile,kan miphun hrang
t.uan tu an tam,ka t.uan ti tu khal an tam ko,nan ziangah ha kan
t.hansoh thei cuang lo ? Ziangah ha kan t.uan nak mipi pawl in in
hmuhthiam pi thei lo ? Ruah ding tampi a um thei ding ? Hlawh kan
beisei maw,miih porh kan hngak ta lai ding ha ? Miphun hrang hnat.uan
kan ti mi ah hin,ma¡¦i lam hlawk nak a um thiang lo ding !!!

              Nang le keiih kan t.uan kan ti mi hin,kan sungkhat unau
hrang ah a si lo,miphun hrang ah a si a t.ul.Fiang ten kan ruat tlang
pei ?Tuan tlak teh kan si ngai ngai maw ? Fimthiamnak a t.ul lo,zir
sannak khal a tul lo…miphun hrang ti mi ah hin,kan miphun duhdawt
thei ngai ngai ding in,lungput ka nei maw ? ti hi mah le mah sut aw
cio sawn sehla.a tha sawn ko lo ding maw ?

  Na taksa pum zo ta?
                                                    By : Rev S. Ni
Luai

  ¡§ Nan taksa ruang pumpi cu thil t.halo sual tuahnak ah nan hmang
lo pei; cuhnak in nan zeizongza in thihnak ihsin nunnak ih thawh ter
mi bang in Pathian hnenah pe aw sawn uh la nan nunak zate thawn thil
t.ha tuahnak ah hmang sawn uh ( Rom 6 : 13 ).

  Ka duhdawt mi ka  u nau, ka fa le pawl cu ka nunnak ah hin ka sir
bikmi cu, ka taksa  thil t.halo tuahnak ah ka rak hmang rei mi kha a
si. Ka taksa neitu Pathian a si ti ka thei fiang tlai tuk. ¡§Bawipa i
ngaithiam aw¡¨ tilo bak sim ding ka thei lo.
              A lo neitu hnen ah na taksa pe awla, thil sual na tuah
dah lo ding. Cuti a si ruangah, ka u le ka nau pawl tla Pathian ih
zaangfahnak thawng in Pathian hnenah nan ruang pumpi cu a nung ih
pekmi raithawinak bangtuk in pek uh tiah ka lo dil. A hna t.uannak ah
pum a pe mi le A lungawi tertu si dingah ka lo sawm a si. Cumi cu
Pathian hnen ih nan pek dingmi biaknak taktak a si.  ( Rom 12 : 1)

  Khawitawk in na ra :
              Adam le Eve ih taksa pum cu Pathian sersiam mi a si.
Kan ni cu,Pathian hnen in,nu le pa feh tlang ih hrin mi kan si.
Sualnak sung ah an tlak veten,kan taksa pum hi sual tuahnak hriamnam
ah a cang. Cu hnu ah thihnak tiang a thleng. Sikhalsehla Jesuh Krih
kan zumnak ruangah taksa pum thar, nun  dang lam, nun thar, taksa
thar co hlang tu kan si, Haleluiah.
              Jesuh kan zum ih, a thu kan thlun le kan nunpi veten
Krih ih Thiangthlarau kan sungah a um ih Amah in kan taksa cu Khrih
taksa pum ah a cang ter. Curuangah Pathian biakinn kan si.  Kan taksa
pum hrimhrim ih Pathian sunloih ding kan si. Pathian duhdan vekih kan
taksa pum hi hmang ding kan  si.

  Ni neta caan ah :
              Ni neta ah kan taksa hi a thosal ding. Jesuh Khrih a
thosal ih kumkhua nung a si bangtuk in kan taksa hi Jesuh kan zumnak
ruangah thi theilo,kumkhua minung kan si thlang. Kan taksa hi Jesuh
Khrih ih ruang pumpi taksa a si; taksa ruak pumpi cu pakhat a si bang
tuk in kannih Khrihfa pawl hi tampi kan si nan thinlung khat, ruahnak
khat in kan nun thiam ve a t.ul. Jesuh Khrih cu kan lu bik a si.
Kawhhran hruaitu cu Jesuh a si.
              Zumtu pawl hi kumkhua ih umtlang ding kan si.Leilung
kan um lai khalah leilung mi umdan ih nung lo in vancung umdan ih nun
kan zuam ding.  Caan tawite leilung ih kan nun  sung hmanah kan
remawk lo ahcun, ziangtin ha kumkhua ih kan pawlawk thei ding? Midang
thawn pawl komaw theilo mi cu mai duhnak lawng ruattu pawl an si,
midang ruahnak cu an pom thei dah lo  (Thufim 18 : 1 ) . Kanmai
duhnak ih nung mi silo in Pathian duhnak sawn ih nung thei dingah
kannun hlan uh si.

  Pastor pa hnen ih cakuat….
  Pastor pa,
  Rom 7 : 14 – 25 thu um dan in sim fiang thei pei maw? Ka fiang thei
lo ee.

  Thuletnak : Bawi Krih ah unau t.ha na tlunah ka lung a awi tuk.
Pathian thu ah midang tamsawn an nun an ciah thei lo; mi tampi
leilung nawmcennk le sum le pai ih an buai lai ah hitivek ih Pathian
thu na ruat thei cu ka lung a awi tuk; Pathia in Jesuh Krih hmuihmel
sam keng in lo sersiam hram seh.
              Pathian thu hi a sullam theih a har tuk ih ca
thianghlim sungah , ¡§ ka thu nan theih thei nak dingah nan thinlung
sungah ka thlarau ka ret ding¡¨, ( Thufum 1 : 23 ) a ti bangin
Pathian cu thlarau  a si ih a thu khal thlarau thu a si. Curuangah
thlarau thianghlim kan neih hnu lawngah a thu hi kan  thei fiang thei
ding.
              Himi thu hi Paul in amah a tonmi vekin midang a zirh
t.heu. Thilt.ha cu kan thinlung cun tuah ding kan thei ko asinan kan
taksa in Pathian ih tuah lo ding a timi kan tuah t.heu. Thin nuam lo
minung ka si. Thihnak lam sung ih a thi ciami ka taksa hi zoso i
runsuak thei ding Pathian amah in kan Bawipa Jesuh Krih thawng in i
runsuak a si. Pathian hnenah thangt.hatnak um ko seh. ( Rom 7 : 24 –
25 ).
              Leilung tlun ah biaknak ding tampi an um. Thilt.ha tuah
an duh tuk t.ha le sia khal an thei t.heh. Asinan zohman in thil t.ha
ka tuah thei, ka fim, ka fel, ka tlamtling ti ngam tu an um  lo! Saam
119 : 9..Ziangtinso mino in ziaza thiang a neih thei ding? Na
thupekmi thlunnak lawngin a nei thei ding. Pathian pekmi thu ( word )
timi cu Jesuh Krih hi a si. Curuangah Paul in ziangahtile Krih Jesuh
thawn pehzomnak thawng in; nunnak in pe tu thlarau daan in sualnak le
thihnak lakah cun mi luat kan si zo.Tu thlarau daan in sualnak le
thihnak  dan ihsin in luat ter zo. Rom 8 : 2..tehkhinnak ah Tinbaw (
lawng ) cu tidai sung ih um ding ih tuah a si.Sihmansehla,a sungih
tidai a luhpang ah cun,a pil thotho,curuangah a lenglam le sung lam
cu pit zet in Kataza ben theh a t.ul.Cuvek thotho in sual fa le sual
hrin minung pawl cu kan luat theinak dingah Pathian duhdawtnak cun
Thlarau thianghlim hmangin kan thinlung sungah luat nak thu in burh
ngah zo,cui Thlarau thianghlim cu Pa
Pathian ih laksawng a si(Rom.5:5).Curuang ah Jesuh kan neih ngah hnu
lawng ah.cui Thlarau cun Ama¡¦i duhnak lamzin ah in hruai. ¡¥Zuuri lo
in,thlarau in khat sawn uh¡¦(Efesa 5:18).
              Thlarau thianghlim in kan thinlung sung a uk ngah hnu
lawng ah Pa Pathian ih duhdan kan thlun thei ding.Cu¡¦i thklarau
thianghlim ih uk mi minung si thei ding cun,Bible siar le Thlacam
nasat a tul ding.

  KA DUHDAWT ZET MI KA FALA ( Peh nak ).

   Ka inn tek pa thawn thunuam kan rel t.heh hnu cun,ka ihnak hmun ah
cun hnangam zet in ka it that thei. Caan reipi tiang itthat loih ka
rak ruah t.heu cu hna ngam ten ka tawng ngah thlang ding tiin ka
itthat ve cih mai .

              A thaizing khua a van ngah cun,ziang tinkim khi thar
verver in ka hmu t.heh ! Thaithawh kan ei t.heh ah,Parte tawng ding
cun ka tim ka tuah ih,ka feh cih.An inn hmai ka thlen zawng ah,Parte
pa cu a ra suak ih, ¡§ E.. Marem,mani kha mikhual thawn kan hnawk
reirei tuk ih,biak khal ka lo be man lo asi kha,na t.ha vivo ko ti ?
¡¨ ti phah cun ka kut in kai, ¡§ Ka t.ha ko sokhaw¡¨ ti phah in ka
rak kaih sak ve. Innsung lam ah va lut aw,a nu khal a um kha,a lo
ngai roh hokhaw,va feh aw,kei cu lo lam ka feh duak a  t.ul,ka ra
tlung cing ding ti cun i liam san ta.
              Inn saangka ka king ih,Ka parte cun rak ong phah in,
mawi le no siamsi ten in rak welcome.Inn sung ah cun tonak ding in
khih hmuh ta ih,a nu hnen ah cun, ¡§Ka nu,U Marem a ra hokhaw,a lo
hlam rero¡¨ tiin, thuphan var thawn a nu cu a ko ta.Parte nu
cunmithmai pan ten , ¡§E,marem rori na si lai ko ti aw,na va pitling
thlang ve,mani na thu rel mi le  ngai a nuam law law,na nu le pa na
unau pawl an dam t.ha maw ?¡¨ tiin  t.ongkam no tak in i biak
lohli.Ka thinlung te¡¦n,hi nu hu cu aw,a falat laiah buaipi tu a nei
tam ding a si hi,Parte nu ding rori a si ko tiphah in, ¡§ Nan mah
sawn nan rak dam ti aw,kan nih lam khal kan dam tlang sokhaw¡¨ ti in
ka sawn ve.
              Rei tawk fang kan biak awk ngah hnu cun,a fim cia
thawn,a fanu hrang ah in iai lemlo a si pei cu, ¡§ E,Parte na ni tei
in ah ka feh ta ding,kha tin na U Marem tla kha a khua a har pang
ding rak kawm aw maw¡¨ ti phah in angki phiar ding thawn a suak ve
lan ta.
              Khaih raw !! kan pahnih lawng kan si thlang,pa cang ka
caang mai lo ding maw,ka rel duh mi ka rel thlang lo ding maw? tti ka
thin lung cu a nawpaw rero.Parte khal tu cun ka kiang  rori ah a to
thlang,ka zoh cun a mawi nak a zual sin sin, ¡§ Parte,in duh lai ngai
ngai maw ?¡¨ tiin thu hram cu aka thawk,Parte cu ning zak vek,zak lo
vek,hnuai lam zoh phah in, ¡§ U Marem,na thinlung ngaingai in in sut
maw,in sut asile,ka lo duh ring ring,ti hi ka lo sawn nak ah le ka lo
duh nak a kel ring ring ti hi in hngilh sak siang hram aw hlah
maw…¡¨  Ka hrang a thlum bik mi aw ka thei thlang,ziang ka tuah
ding,ka kut cu a liang khat lam cu ka kuah ih,ka kut khat lam cun a
sam tlai hnianghni te cu ka culphah rero…
              Kan pahnih lawng in kan um nan,Leilung tlun thil dang
ngai mi ziang hman kan nei lo,ka lunghmui lawlaw a si hi ! Ka Parte
hmai cu a vawn tham ih,hnam ka tum,culeveten, ¡§ U Marem,in duh ngai
ngai a sile,hi vek cu,ka neiawk tik le kan tuah ding mi a si,tu cu si
lo¡¨ tiin in rak ti,ka ningzak cumco ko,nan mipa tiin, ¡§Ziang
pawi,kan duhdawk hnuhnu cu,hnamawk men cu a pawi maw si,in duh ngai
ngai lo si ding,ka lo ngai tuk sokhaw…¡¨ tiin ka hnam theinak ding
cun ka lem rero…asinan,ka Parte cun, ¡§ In duh a si ah cun,kha ti
vek khan na tawng ding a si lo,kei khal na hnam ka duh lo a silokan
neihawk tikah sun zan in in hnam lai ding ka lo tinak a si¡¨ tiin in
rak ti.
              Ka kuah nak kut cu ka la kir sal ih,Parte hmai zawn
rori ah cun ka va to,hmaitawn in kan to ngah thlang ih, ¡§Parte,in
zoh hnik aw¡¨ ka ti cu,mithmai ningzak a si ti theih thei ding khawp
a si,a hmai a sen  t.heh,nan a mawi nak a hlo cuang lo, ¡§ Ka lungawi
tuk,kha ti vek in in rak ti ka zum lo,fala thianghlim na si ko
ding,ka lo duhnak khal na ti tam sin sin,midang vek na si lo,nang cu
na dang¡¨ ka lungawi tuk maw¡¨ tiih ka sim cu,Parte khal a mithmai a
hawng lang fiang saal !
              Rei nawn fang kan um tlang ngah hnu cun,kei khal supawk
rero tul in ka theiaw nawn lo, ¡§ Parte in duh ngai ngai in ka
theiih,palai rawn fial sehla teh ziang tin ha na ruah?¡¨ tiin ka sut
thutthi ! Ka rin lo piin, t.awnglo thlain rei pi a um.In sawn lo ding
hmang ka tiih,ka khawruah a har cuah co.Ka thinlung cun,mitu ih kha
ti ka ti ruangah in  t.ih a si pei maw tla ka ti thul,neih ngai ngai
in rak duh lo teh a si pei maw ka ti thul…
              Zo zo khal  t.awng lo in rei nawn kan um tlang,ka supaw
thei nawn lo ih, ¡§ Parte in duh ngai ngai lai hmang tiin nan khua ka
ra tlawng ih,nang mah hmuh duh in,ziang hman in le in sawn fawn lo,in
duh ngai ngai maw ? Palai ka rawn fial pei maw ?¡¨ tiin a veihnih nak
ah ka sut saal.Cunah khal awlten a  t.awng hrih cuang lo,ka mang a
bang zik thlang maw tiah, ¡§ nangmah na thu¡¨ tiin coka lam ah in luh
san ta …..Celehei…khai ni tluk ih ka lungawi hi a um thei lai pei
maw .. ziang dang hman ka ruat thei nawn lo,ka lungawi cu um ngaih
nak khal ka thei lo,in hmutu rak um sehla,mi aa ah in neih ko ding !
              Coka a luh hnu rei lo te ah,a ra suak saal ih,hniphah
siamsi ten in ding a rawn cawi lut.Ka hmai ih cabuai ah cun a ret
ih,ka kiang nai te rori ah cun rawng to n,ka taang hngohsan cun a
zau,a sam rim le a taksa no mawi hngialhngi te cu ka taangah ret in,a
mit cun ka mit ah in zoh ih,a khabe no le mawi cu a lang fiang sin
sin,a hnar zum zik leuleu khal cun a hmai sawl zoh a ti rem hlei
ce.Kei khal in ka rak pawm ve ih,zo khal tawng ding thei lo cun rei
tawkfang kan um tlang ta…
              No hngialhngi ten kan pawm aw ihasinan reipi um thei
kan si lo,nupa kan sihrih lo pi ! Kei cun, ¡§Kha asile Parte,tuizanah
Palai ka rawn fial cih ding maw,a pawi maw ?¡¨ tiin tong hram cu ka
thawk saal,a nih khal in, ¡§Tu hi na rawn fial cih ding hmang ka ti
ih¡¨ tiin hnihsuah tla kan sai tlang thei vivo.
              Tlaipi tiang leng thei ka si lo,a zan ih ka inntekpa
fial ding ka si lai,ka nu le pa cun ziang tin hman in eel lo ding,cun
nupi nei ding ih vak suak ka si pam,tiin ka thinlung te cun ka hnem
phah aw ve rero. ¡§ Asile,ka tlung ta duak ding maw,palai fial ding
tla ka hawl ta ding¡¨ ka tilai ah cun,Parte pa  cu a hawng lang
dukdi ! ¡§E,Marem na rak um lai maw,to aw,thu nuam tla kan rel tlang
ta lai pei cu¡¨ tiin in kai nan,ka to rei ngam nawn lo,a zan lam
thleng dingka hngakhlap thawn,ka hrang ah mo neihnak darkhing a awn
ve thlang ding ti thei in hnangam ten ka tlung¡K.

  Hruaitu  volume 100 kimnak ah tiin,a hmin rak sak tu le rak dinsuak
tu,kan tihzahzet mi Salai Sen Hngilh Piang Kawmnak.. :

  ¡P        Hruaitu : Malaysia na ra thlen ni le ratsaal nak san in
sim thei duak pei maw ?
  ¡P        Pianga : 1999 Krismas zan ah khan Thailand ihsin,Kuala
Lumpur ka ra lut.(HNI PHAH IN) A neta tu cu July ni 8,2005 ah a si
ih,ka ratsaal nak san cu,Sumpai hawl dingah le theitawkih miphun
hrang ih hnat.uan phah cem ding ah a si.
  ¡P
  ¡P        Hruaitu : Kawlram na tlung kha nupi na nei ti vek kan
theiih,thu ngai a si maw ?fala pawl an va vai awm ve ?
  ¡P        Pianga : (Hni phah in ) Thu ngai ko,Evan.Van Lal Muan ih
fanu hniang te,Van Sui Nei(Suite)hmunt.ha khua ta ka va thiar.Biakinn
ah Pathian daan thianghlim in t.hitumnak kan tuah ta in ka
thei.Asinan,Suite tlan san in Malay ka ra saal a si hi !(Hnihsuak tuk
lem lo in a hni ).
  ¡P
  ¡P        Hruaitu : Cu cu Tlangval maw na si?Pa sawn ha ?
  ¡P        Pianga : Tlangval dah t.heu cu ka si,tu khalah Tlangval
tiih koh theih ka si ko.. ( kan hni tlang )
  ¡P        Hruaitu : Asile,thungai deuh in,Hruaitu nan rak dinsuah
dan tawifel ten in sim ta thei pei maw ?
  ¡P        Pianga : Kan laimi tampi cu,thil zianghman thei lo le aa
memmem kan tamtuk,cun calai khal ah kan niam tuk,ziang thuthang
theilo le mi lak ih thu mallai tal rel ding theilo kan tam,calai lam
khalah Laimi sisi ih,ma¡¦i t.ong thiam lo le siar thiam lo,cun ca lai
ngainat nak cang khal thiam lo kan tam tuk tikah,kan laica te kan
ngainat tlang ih,mi hmai khalah aa hleice tuk ih kan um lo nak dingah
ti ruahsan nak le Miphun t.hansoh ter duhnak thawn November thla 2003
ah khan a Vol.1 nak cu kan rak thawk.Hi hi LCF comittee member pawl
le calai Commitee pawl meeting nak neiin a hmin khal ah Hruaitu ti hi
kan pawm tlang ih suah thawk a si.
  ¡P        Hruaitu : Asile,tu hi a vol.100 nak kan thleng  hi na rak
ruat ve dah maw ?
  ¡P        Pianga : Aaa.aa.a. ka ruat ve ban dah lo,hna t.uan hlir
kan si ih,thlaruk le hrek tiang kha mahten ka rak buaipiih,a harsat
zia khal ka thei t.heh.Hi vek tiang tiang cu ka rak zum ban lo a
si.Hi hi pathian zaangfahnak thawn, nau le pawl in an rak tuah thei
cu,lungawi um za a si.T.uanvo rawn la tu pawl par khalah lungawinak
tampi ka neiin ka fak zet hai.
  ¡P        Hruaitu : Nan rak din thawk laiah khan suak thei lo ding
vek ih um caan a um t.heu an tiih,fala ruangah a si maw?
  ¡P        Pianga : (rei tawkfang kan hni tlang ta.. ) U T.huam
thawn hramthawktu kan si ta in ka thei,kan tuah rei deuh tikah man lo
tuk kan si ve tlang thawn, Maluri lam khal kan feh phah ko… suak lo
ding cu a si lo in ka thei .. ha ha….Maluri lamih Gospel Team feh
tam deuh cun,a suak lo zik t.heu ta in ka thei…
  ¡P
  ¡P        Hruaitu : Asile,hi hruaitu hi tu ni din hmun ah, ziang
vek in ha na hmuh ?
  ¡P        Pianga : A t.ha zet lo sawm.A tir aiin a t.ha vivo in ka
thei.Saya Ni Luai in le Pathian thu lamah t.an a rawn la thawn,lei
tlun thuthang lam khalah mipi pawl in siar ding an thei tam sin sin
ding ka zum.
  ¡P
  ¡P        Hruaitu : Tu hi Seino na ngan si khawh,hi hi Hruaitu
thawn feh tlan a theih pei maw ?
  ¡P        Pianga : Theih tuk e.Seino hi, pawl a t.henawk tik
ah,khatlam pawl in siar ding an neih loh pang ah tiin ka ngan.Kan
laica Malaysia ihsin a t.hansoh nak dingah cun, hi Seino cun t.uanpi
thei lo a nei lo.
  ¡P
  ¡P        Hruaitu : Tu hi ziang bik ha na t.uan,Khawi tawk ah ha na
um ?
  ¡P        Pianga : USJ-9,Subang jaya ih Spain company ah Chef
t.uanin ka um.
  ¡P
  ¡P        Hruaitu :  Kan calai lam hi kan t.hansoh vivo thei nak
ding ah ziangtinha tumtahnak na neih dan ?
  ¡P        Pianga :  Hnamdang le Ram t.hangso pawl ih  neih cia mi
calai t.hat.ha pawl hi kan lai ca ih neih t.heh tum ding,cun kan
laica siar paih ding in mipi pawl kan forhfial nasat a t.ul.Megazine
tiang khal tuah thei vivo ka tum ko.
  ¡P
  ¡P        Hruaitu : Si ngai,nan tuah thawk ah khan harsat nak
ziangvek ha nan rak tawn,mipi pawl teh in an lo welcome pam maw ?
  ¡P        Pianga : Kan tuah thawk,thlahnih in thla thum tiang
cu,kan tuahnak man hman kan hmu dah lo,ca siar paih an mal tuk
lai,kan bei khal a dong zik cuahco t.heu,thlali thlanga nak cin khan
mallai kan t.hangso ih,kan tha khal a tlung saal.Ih hmuh khawp lo le
zanvar kan men suah can hi a tam,kan thiamnak le a rak mal deuh
fawn,nan Pathian in thazaang  in pe ih,kan rak sualsuak ko a si kha.
  ¡P
  ¡P        Hruaitu : A man lam teh hi ziangtin ha na ruah ? a mal
tuk maw tam deuh ha ?
  ¡P        Pianga : A man hi Malaysia thuthang ruah cun a khung vek
nan,kan mai laica te rori ih duh tawk ih  International thuthang kan
siar hi cu a man ka ti tuk.A t.uan tu lam le zohman ih hlawh mallai
hman pek an si fawn lo,an bang man tiang hman an mahte hlir a si
fawn,thuruat deuh hrangah cun tlawmngaiih a man tam sawn hman ih
leisak rero tlak a si.
  ¡P        Hruaitu : Ziangha rel duh na neih lai ?
  ¡P        Pianga : Kan laica kan duhdawt ih t.hansoh kan duh
ngaingai ah cun,minung pakhat lawng silo,kan za ten kan t.an tlang
lawng ah kan calai hi a t.hang so ding.kan bawmawk vialvo a t.ul
ding.Tu laiih Lai thuthang Hruaitu le Seino simaw tal lei lo cu nun
man neilo le san man lo minung vakvai an si.
  ¡P        Hruaitu : Can in pek thei ruangah kan lungawi.
  ¡P        Pianga : Kei khal ka lungawi,Hruaitu hi kumkhua in san
sau hram seh.
  ¡P        (Cu tin lungawi aipuang ten kan thlah aw ta…)

  A si thei pei maw    ???

  * Laimi ka si ti fawn siih,Lai ca le lai thuthang siar dah lo si hi
a si thei pei maw ?
  * Laimi si fawn siih,lai miphun pawl umkhawmnak pal dah lo hi a si
thei pei maw ?
  * Kawhhran upa si fawn si,Zarhpi sun lawng ih khawm hi a man lo tuk
ruangah ka ti t.heu,a si thei pei maw ?
  * Pacangpa ti aw siih,nauhak tlan len dan ih um hi a si thei pei
amw ?
  * Ramdang ih um fawn si,sungkhat unau harsa pawl ih rintlak lo
minung si hi a si thei pei maw ?
  * Mi relsiat lawng thiam,sim t.hat thiam cuang si lo hi,a si thei
pei maw ?

  Rak ruat fiang aw maw …..

  * Nangmai phu tawk ten thlawsuah na dawng ko maw ?
  * Mi thawn thu nan eelawk nak khan nangmai sinak a pholang t.heu ti
na thei maw ?
  * Mi hlawhtlinnak thuanthu ngai tu maw na si ringring  ding,na
hlawhtlinnak thuanthu rel na tum ve maw ?
  * Hlawhtlinnak saangka Ong tu cu nangmah na si ring ring .
  * Na ka ihsi a suak mi t.ongkam cu nangmah bawmtu t.ha bik a si¡K

  Thuthang lawrkhawm

  Indonesia :

              Indonesia cun an ram sung ih bird flu tamtuk cu a do
let nakah tiin sii thar an tuah suak tum rero.Hi an sii thar tuah
ding mi hi Switzerland thawn t.uan tlang ding an si.
              Hi mi tuah nak ding ah hin,An ram sungih Finance
Minister le Agriculture minister cun an hruaitu bik Khai cu tangka
lam rak bawm ding in an dil.

  Pakistan :

              Pakistan ram khawpi Islamabad cu linghngin ruang ih
harsat vanduai nak an tawn mi parah Holly Wood flimstar(nunau)Angelia
Jolie cun bawmnak ding thu a kam.

  Ipoh :
              Malaysia palik pawl cun,motaw saikal (bike) lukuh um lo
ih tlan pawl cu kaih t.heh ding tiah a phuang. Hi thu hi nov.16 ah
khan an rak rel fel t.heh zo.

  Tourist :
              Air force ih hnatuan minung pathum le Sport hnat.uan
pakhat cu Tourist pawngsual ruangah kaih an si.Hi an pawngsual mi nu
hi,China mi a si ih,kum 31 ih upa a si.
              A hotel thlennak bathlar ih a  vak rero cu,zan nazi
10:00 hrawngah hi tei pathum hin an rak kai ih,a hmaisa bikah pakhat
lawng in a ih pi,cumi hnuah midang pawlin an thawk ve.Bawmnak duhih
a  au suak cu,hotel hnat.uan tu pawl in an thei ih,Klang palik hnenah
simin hi tei pali hi kaih an si.

  Rm 100,000 hlo :

              Meithal le ralthuam keng minung 4 cun,sui dawr cu an va
luhhnawh.A kiltu pawl cu innsungah an rak um ih,zinglam nazi 10:40
hrawngah hmaituam minung 4 cun an dawr sungah lut in tangka fai an
neihcia mi le sui pawl cu an lak sak.

              Hiti laiah hin,misual lakih pakhat cun,sui mankhung
umnak thlalang cu saubul thawn a sut rero nan,a hlawhsam ih,a hnatuan
tu hnenah tawh a dilih a sungih um 100,000 man cu an tlansuah pi !

  Baptist Khawmpi :

              Asia Baptist khawmpi cu tui thlasungah hin Malaysia ah
neih a si ding.kan tlangmi lak in Mizoram pawl khal hlarem nak nei
ding in an ra ding.

  Malaysia bank :

              Malaysia bank pawl cun tlakniam lam an
pan.Cutilaiah,May bank cun t.hansoh lam a pan rero lai.
              Leilung tlun ih thil dang lam vezet pakhat cu,Malaysia
Western Union cun tangka a pe suak thei lo ..

  Kanmah sung thu

  Kan lungawi :
                    Falam mi, midamlo kan theih mi pawl  LCF mipi ih
thla kan cam sak re ro mi pawl kha tu ah cun an za ten dam in an um
thluh zo , sizung um pawl khal an suak thluh zo. Zum tu kan
thlacamnak in hlawh tlintertu Pathian hmin thangt.hat in um seh.

              LCF biakin ah :
              December zarhkhat nak zarh te zan ah kan pastor ih hoha
nakin zan var thlacam nak kan nei saal ding, Ra tel thei tengteng tum
aw, danglamnak na nun ah na hmu ko ding.

  Refugee :

              Tulai hi UNHCR in midam lo,nauhak kum kimlo le mi harsa
tuk pawl an harsat dan ih zir in an bawm ih mi hrekkhat cu interview
tiang an tuahsak.Tui zarh sung cu UNHCR  ah kan falam mi nitin mi
nung 5-10  tiang an feh ring ring.

               Na ralring zo maw?

              Refugee interview tuah duh tu pawl hrangah nan case rak
tuah cia uh, UN pawl in lai mi a bur bur ih um deuh nak hmunah a rei
hlanah interview tuah in an ra mai ding. CRC hnt.uan tu Salai Bawi
Hre le Salai Eddy Mal sawm ,  ACR  hna t.uan tu,kan falam upa pawl
hnenah  nan t.ul mi pawl le rak lo contact nak ding fel fai ten rak
sim lohli aw.
                 UNHCR ah nangmah thu ten feh na  tum a si le na feh
hlan ah na case felfai ten tuah cia aw la thu thei tu pawl hnenah
zing zawi hmaisa aw, Veikhat na t.ong sual pang asi ah cun remsal a
theih nawn lo ding.

   Nunau pawl hrangah :

               November ni 23 Wednesday zan lam ah kawlram mi nunau
pakhat cu UNHCR zung ihsin Taxi in a hnat.uannak lamah a mah te lawng
in a tlung.Lamzin hla nawn an thlen hnu ah Taxi mawng tu ih rualpi
tiih  an zum mi     minung pahnih an ra lut ve, Cu¡¦i nunau nu cu an
sualpi ih a um nak in kiangah zinglam khawvan hlan deuh ah an ret sal.
               Nu nau nu ih sim danah  an mah ka hmuh ah cun ka thei
thiam ko ding a ti ruangah tu hi thu nei tu pawl in an hawl re ro
lai.Cu ti a si ruangah nu nau pawl  nan mah te lawngin Vai ( Kala)
pawl ih Taxi   to lo ding ih ral ring taktak a tul asi..
  Khawpi cu an t.hawn  :

              Kuttial zoh pawl ruangih an khawpi t.hawn mi cun hmel
mawi lam a pan rero.Nov¡¦6 ihsi khan an thawk ih,tucun hmelthar a
suah zik rero thlang.hi Pyin Mana hi Yangon ihsin 400km hmar lam ih
um a si.Hlanlai Mirang pawl khal in t.ha an rak ti zet mi a si.

  Thuthannak le sawmnak :

              Ni 24th November 2005 ah khan UNHCR pawl cun Falam
miphun pawl cu Sanpeng Flatah palnak an nei.Thu rel khawmnak rei
tawkfang neih a si hnuah, hitin thu in taan ta :
  Mi upa kum 50 ral kai cin pawl cu hawl ding le an um a sile a rang
thei bikih an hnen ah sim ding in an cah.
              Cumi cu zarhhnih sungih hawl hmu theiding in kan nih
lam khal in kan rak sim ve.A hnuailam ih phone number ah a rang thei
bik ih rak sim thei ding ah kan lo sawm.(Na hmin,khua le lo contact
thei nak ding  tahwn ).

  Pa Za Biak Thang     012-6848009
  Pa David Thang       012-6822231

  Krismas  :

              Kawlram cun a ram khawpi a t.hawn ruangah tui kum
Krismas hi yangon ah t.ha teih hman thei a si lai pei maw ? ti hi
Christian pawl thinlung sungih um tam bik a si.Christain pawl cun
nasa sawn in buai nak an thawk zik thlang.
              Nuam le ai puang teeih an rak hman t.heu nak hmun khal
cu hmun him a si nawn lo !

  Kei mah hi ….

              Thiltuah suak tam le t.uan tam i piang in keimah hi an
ti t.heu,Cui keimah hi ti mi cu,mipi hrangah ngai nuam bik a si dah
lo.
              Zianghman tuah suak thei lo khal in an thinlung ten
keimah hi,an ti thotho,mipi hrang ah thengre ai awn hman a tluk lo !

              Hmin nei tamih pianginn keimah hi ti t.heh sehla,zo si
be ngam nawn ding ?nau khal hin innsungsangah keimah hi tiin mipa
khum tum sehla,innsaang nuam an si kan ti thei pei maw ?

  ¡P        Hi Thusuhnak pawk hi a phi thei thei cu,Thla khat
sung ,man loin Hruaitu an la thei ding……..
  ¡P
  ¡P        Nauhak pa pakhat te cu kum 4 ih Upa a si,a u nute cu
cu¡¦i nauhak pa hnak in a let thum in a upa sawn. Cui nauhak pa te cu
kum 12 a si cun,a u nute cu kum ziat ha a si ding ?A san ngan cih aw
maw.
  ¡P
  ¡P        1.   16
  ¡P        2.    20
  ¡P        3.    24
  ¡P        4.    28
  ¡P        5.    32
  ¡P
  ¡P        Nunua,nauhak pahnih hin ngate 25 lai an kai,Suite cun
parte hnak  a let 4 ih tam in a kai.Parte cun ziang zat ha a kaih ve
ke?A suah thei dan ngan cih aw .
  ¡P
  ¡P
  ¡P        1.     4
  ¡P        2.      5
  ¡P        3.      8
  ¡P        4.    10
  ¡P        5.    15
  ¡P
  ¡P
  ¡P        Minung 10 in,ni 120 sungah inn 60 cu sii an hnih t.heh
thei.Minung panga in inn 30 cu niziatah an hnih t.heh thei ding ? A
san ngan aw.
  ¡P
  ¡P        1.   15
  ¡P        2.   30
  ¡P        3.   60
  ¡P        4.   120
  ¡P
  ¡P

   *****James cakuat cu December Thla,a zarh hnih nak ah exam tuah
ding a sitha teih phi pawl hnenah,laksawng awmmawi tawk tak pek a si
ding ***

  ¡P        Zoin ha theihpi ?
  ¡P
  ¡P        Khai le,kan rinlo le kan ruah ban loin,hi kan hruaitu
Zartin suak thuthang cun,a vol.100 nak rori a thleng ve thlang.Mirang
pawl ti dan ka cawng zik a si ah cun,Century rori a si ve thlang
tinak a si cu! Na rak ruat ve dah maw ? Leitlun mi fim pawl cun,vei
50 tiang ih thuthang suah thei cu lungawi um za a si an ti,vei 75
tiang suah thei cu,Thuthang tha a si an ti,vei 100 rori suah thei
cu,maksak le Lungawi dan ding hman thiam har lam a si tiah an rak sim
theu,Curuang unau,tui ni ih laica rori ih Thuthang vei 100nak kim
tiang ih na rak siar thei hi cu,mi vantha tawp nasi.
  ¡P
  ¡P              Cumiih lungawi hna hman na thiam loah cun maw,ruah
ding tampi a  um thei ding.A rak dinsuak tu pawl ih harsat nak
natheihthiam pi lo a si men thei,ziang vek in na hrangah,thlanhri put
in an tuan ti na thei lo tla a si men thei,nan na bawm thei nak um
sun cu maw,rak lei le mi hnen ih na lei ruangih na sirawk lo nak thu
rel in rak bawm thei ve na si.
  ¡P
              A parih kan tarlan mi khi,a vol 1 nak rori a si khi !
Khi ni ihsi thawk in,tuisun tiang lam hruai tu hi Pathian a si ti
cu,Zo in ha eel thei ding ? Malaysia ramah Sumpai hawl; ding in na
ra,a si nan na miphun hrangah na tuan thei ko,miin an porh lo lai
khal ih rak tuan rero tu,kan U le T.huama,Pianga le El-a pawl hi zoh
hnik aw,mi hnak ih hlawh an neih tam ruangih tuan an si ce lo,nangmah
an lo duhdawt ruang ah so khaw ! Tui ni ah nangin ,nangmai tong
ten,International thuthang na siar thei men hman khi ! Lungawi ih
Pathian thangthat le Lei rero ding na si lam lo maw si ? Zo in so lo
theih pi ding ? Nangmah kha na thupi bik ko lo maw ?.

              THUTHANG LAWRKHAWM

  Tlawngta pawl :

              Malaysia ih tlawngta,Tuluk mi ,malay sinak nei 8 cun
cozah hnen ah tluktlanawknak nasa sawn an dil.Hi ti an dilnak san
cu,Malaysia hin Under Graduate pawl cu,leng lam hna t.uan theinak a
pe lo.Cun Under graduate pawl cu,politics an thlun khal on an si lo.

              Hi tuluk 8 hin,an zalennak cu cozah up hloh sak lo ding
in an dil.Tlawng sung ah khal,tlawngta pawl komkhaawm ih tel theinak
ding in an dil.

  Methodist Afternoon School :

              Tlawngta minung 300 (mipa ) pawl cu,an sungkhat unau le
pawl thawn,a vei 45 nakah remawk nak puai pi an tuah tum.
              Hi Methodist ih kai tlawngta pawl hi,Methodist pawlpi
ih on mi a si vek in,an puaiah khal hin Trinity thawn pehpar mi hla
ropi an sak ding.Kum 60 ih upa nunau pathum cun hla rem ropi cu na
rem ding.

  World UNHCR :

              Leilng tlun pumpi ih UNHCR t.uanvo nei tu cun,Pakistan
ih Thlatang linghngin cun a ram sung refugee pawl t.ha sawn ih a kil
him theinak ding hrang ah a dil.
              Oct ni 8 ih linghngin cun minung 73,000 nunnak a lak
ih,3.5 miliion pawl cu um nak nei lo ko a tuah ! Pakistan ram hi
Leilungtlun ih Refugee pawl hrang ih t.uan tam bik lam an si.

  Rinlo pi¡¦n Su Kyi a suak !
              Aung San Su Kyi, National League of Democracy , General
Secretary,cu kum 2003 May thla ihsi khan a ma¡¦i innsung ah kaihhrem
a si.Sihmansehla,UNO le ram mipi pawl ih suak dingihan beisei laiah,
hnasua pawl cun,kum khat kaihhrem bet an tum ! Tu fang hi,reilo te
hrangah suah a si.

              Tu ah hin,Aung San Su Kyi lawn silo,Khun Tun Oo le
politics hruai tu pawl cu suah an si.NLD cun,hi an suah ruangah
hin,Kawlram cun a ram Democracy lamzin a zawh thawk tum a si pei
maw ? tiah an ti.

  Delhi :
              New Delhi palik pawl cun,pakistan mi pahnih cu rinhleh
thilthu ah an kai.Hi milai pahnih hin Pakistan hrangah t.uan ding in
New Delhi an lut ti thuthang an dawng ruang ah a si.

  :korea               Seoul (Korea khawpi bik) cun an ram sungah
artii(minung tuah cawp)cu hmang nawn lo ding in an ti.Hi mi hin Bird
flu a ti karh tiin an sim..

  Europe le Us remaw lo :

  Us  cun Europe pawl ih thil ti dan ah a lungkim lo.Hi an thilti tum
mi hi a thupte ih cangvai pawl (terrorist) do nak ding a si.Cu mi
ding cun.vanzam le Satte pawl khal an thlingthla rero ko.nan US cun a
lungkim pi lo thu a rel.

  Cu tikah,Britain cun,Us hnen  ah, ¡§ Sept¡¦11 2001 ih a thup te ih
thawnginn tla na ret mi pawl kha teh ?¡¨ a hei ti cuh,Pu Bush mithmai
a thim sualso ko.Sihmansehla khai an doawk nak ah khan Sweden vanzam
ke rawn an hmang a ti ve thung,curuangah Sweden pawl cun a si ngai le
ngai lo an  zoh thup rero lai.Hi rampi pahnih hin thinheng ih an ti
awk pangah cun,Leitlun hin buai a man thlang ti nak a si ding tiah
thuthang cun a sim.

  Singapore  :
              Singapore le ram cangkang cia pawl cu kan theih cia vek
in,an ram sungih Rit nak lam thil ( Drugs ) la lut pohpoh cu that
ding an si kha.Cuvek in,hmaizarh ah khin Australia mi cu Singapore ah
thah ding a si.
              Hi an thah ding mi pa hi,Kum 25 ih upa a siih,Melbourne
(Australia ram khawpi pakhat) ih um a si.Si t.halo mi 400gm cu a kut
sung ah kaih a si.Singapore cun ziang ti zawng hman in a ngai thiam
thei lo.A san cu,an ram fiak te,leilung tlun sumdawnnak hmunpi cu
Drugs zuar pawl in an Drugs zuar nak lamzinah nan hmang pang ding ti
hi an phang bik mi a si.Hipa hi  Nguyen Tuong a si.Australia cun
ngaithiam a dilsak rero nan,Singapore prime Minister cun,an phone a
rak kai duh riai lo !

              Hi ruangah hin,an ram pahnih ah Vanzam a lengvak
theilai pei maw atihi mi[pi pawl ih thusuhnak tam bik a si.

  Myanmar :
              Kawlram cu,Us President Bush le Malaysia Prime Minister
cun,a rang thei bikih an thu relsak ding tiah thukamnak an tuah
ta.Chram Tong,Kawlram mi,Thailand ih um hnenah cun,UN thuthennak
hngak loih kawlram cu a rang thei bik ih rel ding tiah an sim.
              Bush khal cun,Nov¡¦17 ah khan zo khal September ni 21
ih thuthang kha an rak siar a si ah cun,zianghman buaipi ding dang a
um lo.Kha¡¦i thu kha ka tongkam a sizo hman in rak bet hlah hai seh a
ti.( kahmi niih a tong mi cu,UN khal,zokhalin Kawlram thuthennak ding
hi kan lungkim tlang ko)ti kha a si.

  Kannih laimi pawl hrangih mithar si lem lo,nauta upa khal ih a hmin
kan sal zuatzo thei,hlasak ruangih USA tiang hman rak pal ve tu…a
aw ngai men hmanih pitar putar lung ti leng thei,fala tlangval  hrang
ngaih ti zual tham hi Daduh hin December thla ah a khui a t. hoh
(release)leh thlang ding.A cah duh nan um le Hruaitu editor pawl
hnenah nan sut thei.

  Tony Blair ( UK Prime Minister ) :

            England ram pumpi ih an siang,Tony Blair hin,tui Europe
ram thansohnak ding ih budget cu a pe thei lo ding tiah a hnuai ih
han t.uan cun a sim.
            British pawl khal in Blair hi bawm an tum lo,a rampi hman
in a hna t.uan hi bang thlang seh tiin an au suah pi  rero.
            Austtralia khal Tony Blair thawn an bawmawknak le an thil
tuah mi hmuah hmuah a bansan  zo thu a sim.Cu tikah,European ramah
Blair hrang cu dinsuah thei  sal nak ding a mal thlang vivo  tiah
Tlawngkai nili ni khan an ram thuthang la khawm tu pawl cun an rel.
  South Korea  :
            South Korea ih an Professor,Leilung tlun hman ih a thil
hmuhsuah mi ruang ih cawimawi nak rak ngah tu,Hwang Woo-suk cu an
Prime Minister in Arti hmang ding ih a fial ruangah hminsia in a um.
            South Korea Cozah cun,minung ih tuah mi arti hman a siang
lo a si kha! cutikah,a thupten an Prime Minister in hman a fial mi
cu,mipi hmai ah ningzah za a si tiin a mah le mah a pholang aw.

  Euro le UN :
            Euro ram hruaitu minung 25 cun,UN hnenih tangka lut
mi,ziang hman a sullam um lo ih hlo  cu, a ngai thiam thei lo thu a
rel.Hi tangka hi kum 2006 le 2007 tiangih UN budget hrang tiih an
khawl mi a si ih,Curuangah a rang thei bik ih an hman nak thu rel
fiang ding in Euro cun a ti.
            Kofe Annan khal in,tangka thuhla lam hi a thampi  lo thu
le fiahfai zet ih mipi hmuh ih pho lan thei si ding ih zuam ding thu
a sim.Hi budget hi US cun 25% pe in,Euro hin 35% rori an rak
pek.Ramthangso  rerolai 132 pawl,Ram 77 tiih kan theih t.heu mi pawl
thawn rel tlan nak an nei cing ding ti thu khal Kofe Annan hin a sim
tel.

  Israel :

              Israel cun an hruaitu hrilsaal nak ding hrang ah,March
28 khi an ret.Tu¡¦i an Prime Minister  Ariel¡¦s Sharon cun an ram
mipi pawl hrang ih foundation t.ha sawn a suah thei nak dingah kan
t.hawn a si a ti.Hi mi hi na thawn hlan ah cun,november thla hrang ah
ti a rak si nan,khat lam party pawl le an Prime Minister ruangah
t.hawn a si.
              tui an ram hruaitu Party hi 1977 ih rak din thawk mi
siin,1979 ah khan lal tohkham lawng thei ding ko in an rak cak man !
Sihmansehla,Prime Minister hnuaiih Cabinet minister tampi cun,Sharon
hi bawm an tum nawn lo thu an rel.

  British :
              Britain ram ih an Atorney General Peter Goldsmith cu
mani (23 Nov ) ah khan thuthang la kahwm tu pawl,an ram cozah thuhla
pawl le,cozah innpi sung thu pawl rel suak thei lo nak dan hmang ding
ih bum a si.

  Thailand le Singapore :

              Thailand cun Singapore thawn US $ 72.7 cem ding mi
project cu lungkim ten tlawngkai nithum ni (23 Nov )thukam nak an
tuah.Hi mi ih a tumtah mi cu,an ram pahnih pehtlaihawknak t.ha sin
sin in le Sumdawnnak le Touristsm t.ha sawn an neih theinak ding ah
ti a si.
  Pakistan :
              Kum 25 ih upa,Pakistan mi cu Al-Quida (Sept¡¦21.2002)
ih USA ih bomb thlak tuah puh a si ih,hi pa khal in Us ralkap pawl
hnenah,rei thusuh t.ul loin a si ti a rel ve.Hi mi thuhla ah hin
Pakistan in tampi an bawm ve tiah US cun a phuang bet.
  Irag cun Japan :
                          Irag cun US pawl hnenah a ram sungih um
mi,US ralkap pawl la suak dingin a fial rero laiah,Japan hnen thung
ah cun,Japan ralkap tam sawn,Irag ram sungih kuat lut ding in a ti.
              Hi ram pahnih hin hmai lam can khal ah tangtlang ih
hmai thar nawr vivo an tum.
  Mizoram :
                          Mizoram cu an hrilawk a nai thlang,Congress
le MPC  t.angtlang ding ih kan ruah  t.heu mi cun,MNF lam an her san
luai lo,MNF khal in an Lal tohkham cu mi dang ken an tum lo nasa.
              Hi  an Bye Election ah hin MNF le MPC tangtlang saal
ding vek khi an bang,cun Congress khal in bawm tu ding an hawl
rero.Campaign pawl khal in an kaa ih thuphan an rak khawl khawm cia
mi hmangin an theitawp an suah cio ko.Hi hi Mizoram ti nuam le ti
buai hlei ce tu a si.Hi an hrilawk ding mi hin Krismas ra thleng ding
mi hrnag boruak an ti sa vetvet thlang,Bazar lam khal ah,hrilawk nak
ding le sale tiih au an rawi aw cece ko.
  Europe :
     Europe ram cun sumdawnnak lam ah t.hansoh lam an pan rero,culai
ah an ram sung ah Australia pawl t.hangso cak bik lam an si.

  Singapore :
     Singapore cu,leitlunih network lam ah hmai an hruai
rero.Singapore ih a neih vek,card hmang ih tlangleng le Mawt.aw Card
ih to theih mi cu,ram cangkang sawn US hman in an nei thei lo !
              Hmai kum,2006 ah khi cun leilung tlun ih card thawn hna
t.uan tam bik si an tum.Tangka thawn thil lei lo ih,ziangkim ei le
inn khal si seh,Card thawn  tuah t.heh    an tum.

  India :
     Laimi pawl hrang ih hminthar si lo,India cun an ram economics
t.hannak ding ah tiin,tlawng tam sawn ah Sumdawnnak lel Economics zir
nak an ti tam sinsin tum.

  Malaysia :
     Malaysia cun,an ram sungih,ram dang mi tam tuk hin an ram
Economics a ti sia tiin an rel.Cutikah,an ram sung minung um pawl mal
sawn an si theinak ding hrangah tiin,hmai thar an la rero.
              Hi Malysia ramah hin,an ram mi  si lo,ramdang mi minung
35% tlunlam an si !! Hmai kum ah cun,65% si an zum thlang.Ei le inn
hawl lawng men si lo,mi bum ding hawl ih ram sung ra lut hi 15% hrang
an ti !

  David Pacin :
     Leitlun,mahte sumdawng ih milian tiih mi thei t.heu mi,David
Pacin cun,Megazine ih thuphan thu a ngan ruangah kaih le cawh kuan
ter a si.hi pa hin,Bird flu in North Asia  a tuam tel ve lo ati.

  Kofe Annan :

  Leitlun minung 100% kim hrang ah cun,a zuk lawng hmuh hmanin thu
tampi cu a rel ko ding ! i Kofe Annan hi,UN ah tangka thuhla a
theihpi lo thu Euro ram hruaitu pawl hnenah a sim ve a si cu.Sumpai
hnak in hmint.ha ka duh sawn a ti mi t.ongkam cu a thu rel mi diknak
a pholang fai nasa….

  KAWLRAM POLITICS THLIRNAK

  Politics timi ih sullam cu a ram mipi pawl hamt.hat nak ding le
mipi hrangih t.uanvo la ngam tu pawl ih tuah ding mi hi a si.Cu¡¦i
Politics awnmawi,mitin hrang rak si t.heu khan kan ram cu a dai ban
ve lo a si hi…
              Kawlram thu thawn pehparaw ih  Politics  thu rel
cu,Lungtum biak thawn a danglam nak a um lo,tiin UN ih palai an thlah
hmuahhmuah in  an rel t.heu.Kum 1990 ah khan Kawlram cu WCO (World
Custom¡¦s Organization) ah a lut.a sinan tui sun ni tiang in a hman
nak mipi in kan hmu thei cuang lo.
              ASEAN (Association of South East Asian Nation) khal in
Kawlram cu  Kum 2007 ah cun hmun harnak bik a si ko ding tiah a
phuang,kum 2002 ah kha cun an harnak an theih pi tuk hrih lo thu khal
a rel tel.
              Curuangah Kawlram t.hatnak ding hrang ah cun Kan pu
Bush le Kafe Annan ih t.ong men hin thu a rel sau thei nawn lo.Kum
1990 ih NLD (National League of Democracy)pawl ih hrilawknak an neih
ih an neh nak Ralkap pawl ih an pawmsak duh lo hnu kha Kum 15 a si
thlang,Kawlram ih Politics  hruai tu pawl cu Thawng inn ih khum le
thah an tuar rero a si hi !!

              Nov.15 ah khan New Light of Myanmar thuthang
cun,Kawlram Democracy hrang ah hin ruat lawng kan ruat lai, tiin an
rel a si kha.Kha mi khan thu ruat mi pawl hrang ah cun ruah nak tampi
in pe thei ding ka zum.An ruah lai mi cun,Ralkap do ngam tu um
sun,NLD party cu nasa sawn ih thuneihnak pek hnak cun,a cang thei
tawk ih thup hloh kha a si ko lo maw ? kan ruat an ti mi cu,ziang tin
ha nasa sawn ih NLD pawl kan phih ding ti sawn hi a rak si ..
              Thil cang thei mi, mipi hngahhlap bik le ruahsannak um
thei sun cu maw… US ralkap (Jet Fighter) cun kawl ram parah zam in
ziang tikah ha Rangoon ih Hnasau pawl cu asilole Pyin Mana lam cu an
kah ding ti hi a si ko.Nan,thil cang thei mai ding a bang fawn lo…..
              Kawlram mi a sungum le ram leng um pawl,thuruat thei
deuh pawl ih UNO an hmuh dan cu,Cahnah parih Pawpi(Tiger) zuk suai mi
vek,ha nei fawn si mi keu thei ngai ngai lo..Ziang tin ha maw Kawlram
thu cu an t.hen thei ding,China in UN ah Kawlram thut.hennak ding thu
hla ah   vote a pe tum lo nasa lai fawn.. President Bush vethung cun
a neh zo tho tho asi kha..
              Ziang ti a um vivo ding ? Thu  suh nak hlir in a khat
thlang a si hi !! Thu dang lam deuh kan beisei ngam lai pei maw ? US
teh hin an kap ngai ngai pei maw ? UN teh hin thu a rel thei ngai
ngai lai pei maw ? Maw kan dam sung caan tawite ah Kan ram a t.hat
pang ah cun tiin kan rel ring ring men ding ha….
              Kum 1988 ih tlawngta pawl an thawh t.um bang khan Ram
duhdawt tu ngai ngai,Kawlram mi ka si ti pawl hi,a ram sung ah kan
duh lo nak lang ter ngam sehla teh hi,UN hna kan ti thak ban sawn pei
maw ?

              UN in ziang an ti thei lo kan ti rero teh hi,kan mah
kan mawh sawn lo maw si ? Ma¡¦i ram si fawn si ih,ram dang mi ka
rinsan rero hi .. ka ram, ka ta a si tiin thisen tiang luang
sehla,UNO le Bush cu an cang rang sawn lo ding maw..????

Comments

comments

Comments

%d bloggers like this: