Hringnun Thlalang I-IV

Zirsang ta poh an fim theh cuang lo. Zirsang lo khal fim zetzet an um. Pianpi fimnak a thupi tuk. Zirnak lawng zohnak menin tahawk a ngah lo.

Ruangpum tum ta poh an thinlungput a pi cuang lo. Ruangrai te khalah thinlungput tum zetzet an um. Ruangpum lawng zoh in ngaisan/ngainep mai a theih lo.

Sumpai nei ta poh an lian theh cuang lo, thinlung rethei an tor. Sumpai nei lo khal lian zet hmuh ding an um. Sumsaw lawng zoh in mi va dawt ding, a si lo.

Asinan lemcannak khawvel ahcun Zirsang si, fim si lo. Ruangpum tum nain thinlungput fate zet le sumpai neinei ih thuneihnak ah nitung kan rau cu a si bik hi!!!

Hringnun Thlalang II

Kum a thar vekin Hotu/hruaitu kan hril theu. Cu pawl cun thucah ropi zet an sim theu. “Ka palhnak, tlamtlinlonak a um asile hmaisong loten i sim uh” tiin. An sim bangin an palhnak zawntete hmaisong riai loin faksel ngam bupbo sehla an duh lemlo. An hua ih a netnak ah dotu ‘ral’ vekah mi an suah linglet.

“Kei cu ka thintawi, ka thinsia” tiih mi lakih relaw ringring pawl hi a taktak ahcun an hngal, an porhawk ruangah le an pehtlaihmi pawl zianghman ih an rel lo ruangah a si tlangpi. An tihzahmi hmai ahcun an zaidam thei zet nan…

Pawlkom pakhatkhatah hohatu (Lu-ban) hna hmuahhmuah kawhhran pakhat lole hrinhnam pakhatih kaih, ham theh hi a thatnak hnakin a thatlonak a tam!

Hringnun Thlalang III

Bommi si loin bawmtu si ka duh.
Diltu si loin petu si ka duh.
Cawmmi si loin cawmtu si ka duh.
Tirhkah men si loin fialtu si ka duh.
Mittha men si loin midik si ka duh.
Thlawsuah dongtu men si loin a siar thiamtu si ka duh.
Damsau zetih ziang kupkap si lo hnakin caan tawite sung nunmannei zetih hmang thiamtu si ka duh.
Ka lawngih tuantu si loin a takih tuahtu si ka duh.
Sunmang (vision) tampi neih ih pakhat hman hlensuak lo hnakin thil pakhatte tuahsuaktu si ka duh.
Vei tam tluksiat ih thawhsal cingcing hnakin vei khat hman tluksiat lo, ka duh.
Thiamnak lawng si lo, fimnak mi sumtheitu zirnak ka duh.

Hringnun Thlalang IV

Hi thu hi kan ruat dah maw? Minung hi kumkhua kan tunghmun lo ding! Asinan kan thih ding ni kan thei lo. Amahbelte dam san lawngte kan nei cio ti bang sehla…
Rin lopi’n natnak pakhatkhat lole cangsualnak (accident) pakhatkhat ruangah maw tuni ah na ‘THI’ ding tiah lo sim ta bang sehla ziangtin na um ding? Na lungkim pei maw na riahse ding? Na lungawi cu ka zum lo. Ziangahtile zohman thih duh kan um lo. Asile ziangah thih kan duh lo. Hringnun ah seherhmi, lo-hma suah ngah lo vekin theihawknak an hung lang zukzo a si lo maw…
Cuti asile Pathian ih dongtahnak sautersal in, ni khat lole thla khat lole kum khat hnuah na thih ding ni, lo thawnsaksal sehla…
Ziang bik tuahnak ah cui na caan sunglawi zet cu na hmang ding?
Cuvek caan ah mizaran kan si ahcun kan to men ding ka zum lo, zuri sabah men khalin kan um siang ka zum lo. Second tin, minute tin le nazi tin hin umzia a nei ding ih caan pamhmai kan khawhral siang hrimhrim lo ding…
Unau! na nunnak kha caan rei loteih ce.

Thuan Bil Fahniang

Comments

comments

Comments

%d bloggers like this: