Hrilawknak le Chin Ramkhel Party pawl Dinhmun

12193753_871905492927599_2890438088038195064_nRampi hrilawknak result tla official in an suah phahphah nan rak hmu cio ding. Result famkim than thei dingin Election Commission khalin a zuam rero lai. Tuvek result a si vivo ahcun USDP + ralkap + Tlangparmi party pawl kom khalin cozah an din thei ding a bang lo. NLD in amahten cozah a din thei ding a zum um. Asinan, cozah an dinmi ah Shan le Yakhine party hotu pawl hrelh a tum lo thu Daw Aung San Suu Kyi in a sim rero zo. Ralkap pawl thawn khalin reconciliation remnak tuah a tum thu khal a sim zo.

Chin hmin in Political party 10 (pahra) a um ih, an hruaitu upa pawl hi mifim zetzet vek cu an bang nan, rinsantlak taktak an rak tam lem lo a bang zet. National level & State level politic khel lo in pumpak le hrinhnam (personal & communal) politics fiaktete in an khel rero men fang a rak si. Chin mipi zawn ruat lo in anmai’ lal theinak ding lohmasial fang an rak si. Chin MP pawl kum 5 sung ṭuanvo an rak nei nan, kan Chin mipi in ziangtluk in hrilawkdan cungcang (election process) an thei lo timi zoh tikah politician pawl in thu-umtudan diktak in an rak sim lo timi a fiang zet. Mipi lam hnen ihsin thuhla relsuahmi pawl ngai rero tikah mah le mah kha thupibik le lalbik vek nawnnawn hlir in an rak simaw deuh a si a zumum.

Rampi dinhmun felfaiten kan zoh asilen, Democratic Constitution hman nei thei hrih lomi kan si. Democratic Constitution nei thei dingin zuam rero lai ding fang kan si lai. Kawl pawl lawng ih zuam dingmi a si ce lo. Kawl pawl hnen ihsin lawngin thil dil ding le ngah ding thinlung neih ding khal a si lo. Falam ah NLD MP hril ruangih Falam khua hrang pakhatkhat tuahsak dingih hahiotu kan um asilen, kan ruahnak thleng a cu thlang. MP kan hriltlinmi pawl hi Kawl pawl hnenih kutdawh dingih hrilmi an si lo. Kawl pawl hnen kherkher ihsin thil pakhatkhat hahio ringring cu ṭhanso a harzik tuk aw. Kawl le miphun dang lakah Rampi thuhla ro va rel ve dingih kanmah aiawh ih kan thlahmi an si ti kan cing cio pei uh. Falam khua hmin in rampi tundinnak ah kan tel thei ve tiin lungawi sawn ding kan si. Rampi tundinnak hman ih tel theitu cun anmai khua le ram hrangah tuahtheimi tampi an nei ve ding. MP pawl in ziang in tuahsal thei ding tiih hahio rero hnakin, tui’ dinhmun ahcun rorelnak ah MP pawl ziangtin kan bawmton thei ding tiin thuruattu kan ṭul zet. Ram le miphun a duhdawttu ngaingai cun sinak a co le co lo ah a buai ding a si lo. Ram le miphun hrangah tui’ a dinhmun in ziang a tuah thei ve tiih hmangawtu ding sawn a si.

NLD in cozah din thei hman hai sehla, a thupibik Ministry pawl cu Ralkap kut sungah a um thotho lai ti tla kan theih a ṭul ding.
(1) Home Ministry
(2) Defence Ministry
(3) Border Security Ministry
pawl hi Commander-in-Chief Senior General Min Aung Hlaing ih ṭuanvo pek dingmi a si. Himi Minister pawl in President hnenah report an pek ṭul lo in Commander-in-Chief hnenih report pek ding an si.

Home Ministry kuthnuai ah Regions & States hmuahhmuah ih Police Forces, Government Administrations (Pyine, Khayine, Myone a-htwe-htwe ukchukyae), ramdang ih Myanmar Embassy hnaṭuan pawl, visa peknak pawl, etc. tiin an um. Lah-wah-kah ministry cu a um nan, khawtin ih Lah-wah-kah pawl cu himi Home Ministry kuthnuai ih um thotho an si. Adang Ministry pahnih thuhla cu a ṭul len ka ngan leh ding.

NLD an cak timen ih lungawi mai ding kan si hrih lo, ṭuanthok zik fang a si lai. Daw Suu a cakdam sung talah reform ṭulmi pawl in ṭhehpi thei sehla a duhum zet.

© Steven R Sunthang, Nov 10, 2015.

(Visited 1,023 times, 1 visits today)

Comments

comments

No Comments

  1. Na ngan tha lawlaw, khati ih ngam takih MP le kan phunpi lungput karlak thu tete pawl ca in kan ngan fiang thei a si le kan thangso ding. Lungawi

Comments

%d bloggers like this: