Hngilh ni um lo… khi can

Hngilh ni um lo… khi can

By: Hniangsinpa

Tihni sun kha a si. Ziangdang tuah ding a um lo ih, ka umnak ram ahcun zarhte ni a si. Hnatuannak hmun feh a tullo remcang la in, ka naunu ih fa suahni lawmpi dingah, khawpi ihsin an umnak lam cu ka pan.

Ka umnak ihsin a hla tuk lo nan, Tiva rii ih um an si ruangah a hlum zet. Thawsa ka ti tuk, ka angki vun hlih lok mai ka tum nan, kum tam lam ka si ih, a mawi lo deuh, curuangah inn lengah to in, zilthli ka hawl rero nan, ‘Van rah’ an sim mi ka hluan lamlam.

Ruah sur thutthi sehla, rawl ei hlanah ti cu ka duhthusam a si. Kan Cunghlum Khuanu hi a rak duai lo, ka ruahnak i tawmpi hmang ti ding vek khin, rinloparalah ruah cu minute 10 hrawng a surih, cumi cun a si hi ca ngan thei dingih ruahnak thar in pe tu cu.

Ka naute inn kiang hulhliap ahcun to phah in kuak ka fawp rero ih, zual thum ka theh tiang in ka hmai lamih nauhak pawl cang ka zoh nan, ka lungthin ah ruahnak dang ziang hman in thlen lo. A zual nga nak ka fawp thok ih nauhak nute a au ka hmuh cun, ka ruahnak cu ka nauhak laiah a kiir theh.

Ti kawngih tidai cu a hrekin an dawlih, a hrekin thirleng te thawn ruahpi hnuai ahcun an tlan rero. An nu le pa an kiangah an um lo a si bik ding, khamtu an nei lo ih, zanlam rawlsuan le hnipuan hruh ding khal an ruat ban lo. Rawlhmen ziang an hmeh ding an thei lo ih, buh suan ding an neih le neih lo khal an theiaw hai lo. A va nuam zik em!!!

Ruahnak an hmang thei nan, an ruahnak cu an mah le mah ah a cem theh. Nunau le mipa an si ko nan, duhawknak lam a tel lo ih, huatawknak lam khal in an lungthin ah hmun a co ban ding ka zum lo. An au, an kio… an khek.. aw… a nuam a va nuam zik so!!! Kan nauhak lai ka mang ih, ka ruahnak cu ka rualpi pawl mi pawl an dam le dam lo thu, khui tawkah nupi/pasal fanau thawn an um ding? Ziang an tuah ding, ziang tin an um ding ti mi ka ruah cun, aw… ka hngilh thei lo, ka ruahnak khal a ding turto. Zo dang kawmtu ka tul lo, ka thinlung cu ka kawm ih, kan beaw phah rero khin ka thei aw… a can le ka hni ih, a can le ka lu thak lo mi cu ka kheuh phah rero.

Zo ha maw ngai lo, “Ka ra kiirsal nan, hmuh ding nan rak um lo. A hrek cu thlanmual lamah in liam san ih, hrek cu hmuh ban nawn lonak ram lam in pansan zo fawn… khui tawk ah ha maw nan um khawm?” tiah keimah le keimah cu ka beaw rero. Ruah a sur can ih, kan suah hngilh ko kan rak nawm lai can, vate sai ih kan zuamawk can, arpa sual huai neih zuamaw ih kan um can… aw… ziang dang a si lo e… lung cu in len a si…Khawmpi hngakhlap zet ih kan um lai can.. ka rel thiam lo… aw hngilh ni um lo.. khi can…

Kan hung tleirawl so ih, fala len ding ngai thei fawn si lo ih, zanvar kan men can khal a rak tam. Fala lengngam dawk le dawklo ih kan um lai can khal ka mitthlamah a reh cuang lo. Can mallai a hung herih, fala buaipi vek, buaipi ngaingai ngam lo ih kan um can khal kha maw… nazi in kan parah thuneihnak a rak nei lo ih, tlai phannak in kan thinlung ah hmun khal a khuar hrih fawn lo. Aw.. ka rual le pawl… lung nan va ti leng so!!! Nan rak ruat kiir ve dah hai maw? Mual liam zo kan can kha… hngilh nan siang ding maw si? tiah zo hman hmu lo khalsehla, ka lungthin cun ka rualpi pawl cu a hlam. Kan tlawngkai lai pawl ka mang ih, ka kuak fawh zat cu ka ruat ban nawn lo. “Rawl kan ei thlang ding ka U” timi aw ka theih cun, ka hmai kuat cii khawlnak cu a rak khat theh zo!!!

Rawl ei khawh veten inn lam kan pan ih, inn ka thlen hnu khalah, ka ruahnak cun in taan siang hrih lo a si bik ding, lamzin tluan ih ka ruauhmi pawl cu ca nganthiam zet um sehla, hihnak ih mawi le run/lunglen thlak in an ngan thei sawn ding. Lamzin tluan cu, hramhlak vek a siih, vate ai phun phun kan thei phah vivo. Vate thang kan kam lai pawl le zinghnam thang kan kam lai pawl ka ruat kiir lo thei lo. Aw!!! a va rak nuam lawmmam so. Zo dang kan ngai lo ih, ei le in thawn, silh le fen mawi pawl in kan thinlung a luah lo. Rawl ei ka thawt lo lai a um ngaingai thei fawn lo.

Can a hung reiih, tlangdang, mualdang ah kan um thluh hai. Kan hmuh tawn mi a bangaw lo ih, kan ruahnak khal kan umnak zirin a dang vivo. Hnatuan a rak tul ih, mi hmaiih hruh ding a rak tul. Tik le cu, nazi in ka parah thuneihnak an nei ih, kan duhdan le tumtahdan khal  in lawng/ting/neihsak theh. Nitin nun hman dan a dang vivo… ruah tuar kan phang, hramlak feh kan zuam nawn lo. Zan men rei kan phang ih, tikcu khello tu si phannak in kan khat.. aw… a har a si hi… Hngilh ni um lo … khi can kha….

(Visited 80 times, 1 visits today)

Comments

comments

One Comment

  1. Hniangsinpa,

    A siar nuam thei tuk.
    Na cangandan hi cawn tlak tuk.

Comments

%d bloggers like this: