Hngauhsantlak Pehtlaihnak

October 22

Tlawngkai Nikhat

 

Hngauhsantlak Pehtlaihnak

                                                           

Bible Siar Ding: Saam 52:1-9

 

Sikhalsehla kei cu Pathian Inn kiang ih a khomi,

Olif thingkung bangtuk ka si.

A hmunmi a duhdawtnak cu kumkhua in ka rinsan a si.

– Saam 52:8

 

Na suahpi na unau pawl, asilole na rualpi pawl parah rinsannak le hngauhsannak thinlung na nei dah maw? anmai’ bomnak lawng rori na poimawhtuk caan ah nangmah cu zianghman si lo vekin an lo tuah dah maw?

Mi pawl in kan thinlung ih kan ruahnak vek si loin kan thin in harter caan a um ttheu men ding. An tumtah hrim tla a si thei, tumtah hrim lo tla si thei, an thupitter sawnmi asilole co-u an pekmi a thlengh aw thei men, kiangkap thil umtu daan in na thin a lo hnaihnok tla si men thei, asilole an thinlung khuaruahnak an thlengh tla a si mai thei. Ziang a va si hmanah atu le tu thinnom lonak le kaa zum vekin thil a hung si lo ruangah thinsiatnak kan tong thei. Netalam ahcun cuti vekih thinnatnak ton ding ttih ruangah zohman ka rinsan hngai nawn lo ding ti’n thuhrisahcatnak neih tla thil olte a si.

Bawipa cu milai bangin mi a lehrul lo. Anih cun A duhdawt zaangfahnak kan parah a karhzaiter deuhdeuh ih Amah ih hram rak thawhmi le tthangso dingin a cawmdawlmi kan pehtlaih awknak (relationship) parah hram a bun sawn a si. Pathian cun ziangtiklai caan khal ah kan tthatnak ding hrangah a tthabik le a cang thei dingbik in in lehrul a si. A ttul a si ahcun nunsimnak asilole duhdawtnak thawn nun remtthatnak tla in nei.

Kan dinhmun ziangvek a va si hmanah, kannih cu zalenzet in asilole rin-awzet in Bawipa ih duhdawt zaangfahnak parah kan hngauhsan thei a si, ziangahtile cumi cu Amah ih aamahkhannak parih kan pehtlaih awknak a si ruangah!

Bawipa, Na duhdawt zaangfahnak co dingah ka phu lo, cu cingin Nang cun ziangti khalih co thei dingin thu in tiamkam. Na duhdawt zaangfahnak cu ziang bangtuk nunsimnak thawih kop aw ih a ra thlen hmanah rinsan ngam thotho dingin in bawm hram aw.

Tuni ah Bawipa ih duhdawt zaangfahnak ka ttulmi ah ziangmi si ka ton?

Himi dinhmun ah ziangti’n A duhdawt zaangfahnak ka hngauhsan ding?

 

@Pennington

(Visited 24 times, 1 visits today)

Comments

comments

Comments

%d bloggers like this: