HNENUM LE SINGAPORE

HNENUM LE SINGAPORE

Mai August Hoi

Ram hminthang zet a si mi Singapore ah —,—,—— ih ka rat tikah khawcuan men dingih ra cu ka si lem lo. Singapore-pawl ih an uar zet mi hnenum dingih ra ka si. Hnenum dinhmun ih ka tawn mi hrekkhat hi ka ruah sal tikah tah maw hnih simaw ka duhsawn can a tam.

Singapore ka thlen vete’n ka inteknu in in ra hmuak ih an inn sung ka vung luh vete’n in rak hmuak ciamco hai. An lungawi tuk ah an khir, an au, hrekkhat in hnam phah, ka kiang lawnglawng ah an um ih an lung a awi ngaingai. Casiartu, rak ruat sual pang hlah. Lungawi ih in hmuaktupawl cu midang an si lo, an zuat mi uicopawl an si.

Thleng pek ti cu mirang tawng tla ka thiam tuk hrih fawn lo. Vawi khat cu cabu ka neih vek hi an nei. Ka pinu in kannih tla na cabu vek kan nei ve in ti tikah kei khal cun “Yes, Mom” ti men loin ka ta cu kanmai’ tawng ih leh mi a si ti kha ka sim duh mi cu a si. Asinan ka kaa ih a suak mi cu “I am a copy book” ti a si. Hnatuan hi ka zuam phah ih ka tuan that can ah ka pinu ih in pawrhsun cu “good girl” ti hi a si. A can ah in kawk asile thuthentu hmaiih ding mi ka bang tla ka tiaw theu. Ka mit hi ‘pup-pep pup-pep’ ti’n ka tarh ih ka zawnruattu teh an um nawn kei maw ti’n khua ka tang hrukhro theu.

Vawi khat cu ka suahcam (birthday) in tuahsak hmang ka ti ih ka lung a awi zet. “Happy Birthday” an vun ti cun ka haa 35 zate’n an lang thluh hmang ti ding a si. Asinan, ka lungawinak cun rei a daih lo nasa. Keimah si sawn loin kan suahni a bangaw mi an uico “Bubu” hrangah a rak si sawn. Pawi ka ti zet. Kan khawpa in mirang uico ah tla rak cang men lo ih a ti mi kha ka vun mang ruangro. Vawi khat lala cu suncaw an ei kha a tlai deuh. Hnenum ti cu an ei theh hnu lawngih ei theu kan si. Asinan, ka ril a rawng tuk thlang, ka tuar nawn lo ih in ko lo mi rori kha “Yes, Mom” tiin ring nawnin ka au. An rak theithiam ve mai ih a tawk deuh lai, “Sawri, kan tlai deuh,” in ti men.

A cancante lawng ih suak thei (off-day ngah) ka si ruangah ka suah ding can hi ka hngakhlap thei nasa. Vawi khat cu suak dingin ka timtuahaw ih ka sikat tawite kawng can cu ka vun hruh nan zamrangte’n ka thleng sal. Ziangahtile mi cu thla an cam tuknak ah an khuk a dum, a car theh. Asinan, kei cu ka inn rawtnak ah ka khuk hmuah a car theh. Curuangah jean bawngbi sau ka hruh sal. Cun kedam sang ka vun hruh lala ih hnipuan ka sawpnak ih ka kedil kuai mi kha a na phah thawn, mi hmuh ah a mawi lem lo ka ti ih but ka hruh sal.

A cancan ah cun hnenum dinhmun hi na ka tiin har ka ti phah theu. Salai Tuan Ling Thang ih “Thawngtla ka bang” ti mi kha keimah hi ka si ko tiih ka ruah can a tam. Kan Laitlang ih thlapi van can ah rualpipawl thawn kan len lai kha ka mang zet theu. Atu cu ziangtik thlapi a vang ding ti cu sim hrih hlah, amah thlapi hrimhrim ka hmuhlonak hi a kum telin a rei thlang.

Hnenum dinhmun hi cu a har ka ti can a tam. Asinan, Pathian thawn pehzawmtu hrangah cun ruahsannak a um, tuar theinak in pe. A na sawn mi cu Pathian thei lo ih harsa tuar hi a si, ruahsannak an nei lo. Leilungtlun ih zangfahzabik cu hmai lam ih ruahsannak neilotupawl an si ding ti’n ka ruat. Leitlun ih kan um sungah cun harsatnak cu a um ringring ko ding. Asinan, zumtu hrangah cun tih ding a um lo, kan Bawipa Zisuh in in nehsak zo.

Duhdawt mi unau, na hnatuannak ah harsat zawnzaih tuarin na um maw? Na phurh mi kawn teh a rit tukin na thei maw? Na thinphang hlah, na thilrit sawng dingah Bawipa Zisuh in a lo hngak (Mt. 11:28-30). Bawipa Zisuh hnenah pan mai aw.

Avei (3)nak FCFS Magazine (2010) ta lakmi a si.

(Visited 69 times, 1 visits today)

Comments

comments

One Comment

  1. lairawnsuakZAHAU says:

    Asi Thil tha nan run tar lang ……
    Kei khal in kha mi a voi thum(3) nak ta kha ka rak siar ve ko…..
    Hi mi thu thawn pehpar aw in Singapore(Hnem Um) ih a feh tu kan lai mi
    lawng si lo Hnam dang te te tla an feh thei vi vo tlang ih a lung awi um….
    An hna tuan nakih thil cang te te, hi vek um hi cu thin a nuam lo tuk ngai…
    Mi ram dang vekin kawl ram ah hin Hi mi thil cang ngaih sak thei nak ding ah Agency Liciens maw (Organization) (Association)(Recommend) thei nak pakhat khat ,mi an tuah duh sak si lo cun(POLITIC kan lut pang ding kan ca ngan ah….hehe) …..tu vial hrih ah,hi mi hna tuan ih a feh tu Kan U le Nau,Farnu le sung khat te te pawl thin sau ten le thei thiam aw hrih in ( asan cu kawl ram uk awk nak ruangah si…”Uk tu thin lung that tuknak ruangah asi”)….
    Ah ziang lam khal si seh la …..hi mi hna tuan ih ram dang mi vekin fel fai , hna ngam takin, zalen nak ,ti duh san cu (OPPORTUNITY)(HUMAN RIGHT)zawngin ngah thei ,nei thei ding in ??????.???????? hnen ah kan (?????)apply ih Answer
    ngak lai a si .A rei hlanah hi mi hna hin, hna tuan lar bik a ra si thei lai dingih kawl ram Nunau pawl za ten kan hna tuan tha bik a si lai ding ………

    …..
    …..
    Ka thin

Comments

%d bloggers like this: