Hnawmpen Tikulh

 

July 30

Tlawngkai Ninga 

Hnawmpen Tikulh 

Siar:

Seemtirnak 1:20-28; 2:15 

Pathian in hmunkhat ih a kom awmi tidai cu, “Tifinriat” tiah a ko. Pathian in a tuah ciami a zoh tikah a ttha a ti.    – Seemtirnak 1:10 

Kumkhat Sung Baibal:

–   Saam 51-53

–   Rom 2 

Tih ni sun ah, tifinriat cu hnawm hlonnak ah hman ding a si ko tiah a cohlangtu pawl ih thu, riahsiatza thuthangca ka siar ngah. A tawizawng in hiti’n an ngan: “Pacific tipithuanthum sungah a fen ih a phuan aw reromi, plastic hnawmpen cu mak na tituk ding. Ton million 3 a simi plastic cu tipi parah a darh aw ih Texas ram hnakin a kau sawn. Vun zoh ahhin peng khat sungah plastic tom 46,000 tluk a phuan aw rero nan hmu ding.” Mi tthenkhat cun hihnak hmanin a kau sawnlai ding an ti. Plastic cu thil ttha lozet ah a cang, ziangahtile a ziam thei lo.           

Kan umnak leilungpi hi Pathian in Adam hnenih ttuanvo a pek vekin leilung le a sung um rannung le sersiammi zate zohkhentu dingah Pathian in ttuanvo in pek. Seemtirnak 2:15 sungah, “Pathian in a sersiammi pa cu loram ttuantu le kilkhawitu dingah Eden hmuan duum ah a umter.” Pathian in a sersiam ciami cu a zoh ih a ttha a timi sungah tifinriat le a sung ummi rannung tla an tel ttheh a si (Seemtirnak 1:10; 20-21).           

Tifinriat le tipithuanthum pawl cu sersiamtu Pathian ih tumzia le maksak zia in theihtertu ding le Amah thangtthat sinnak ih kan hman ding a si sawn. Poisa loin hnawmhlonnak ih hman ding cu a mawinak a siat ih a sung um rannung pawl hrangah ttih a nung. Leilung, tifinriat le sersiammi thil kilkhawi le duhdawt ding hi zumtu pawl ih kan ttuanvo tumpi a si.  – Marvin Williams 

Pathian ih sersiammi leilung,

Duh bang men in hmang hlah;

Amai’ leilung kilkawitu ding kan si,

Amah ai-ah ttuanvo la ding kan si. 

Pathian sersiammi kilkhawi cu, zumtu ih ttuanvo a si.

 

 

Comments

comments

Comments

%d bloggers like this: