Hnam Hlo Theithiam Daan Ding Step 10

lost-sign-big.jpgStep 1: Na tappi ṭong hnakin, midang ṭong na hmang uar sawn ding. Cule, thusuhnak na tawng phahphah ding. Nang hi, ṭong tampi na thiam ih nan mai ṭong ngaingai hi ziang a si, an lo ti ding. Miṭhen cun, an ṭong na hman tamsawn ruangah anmah miphun ah an lo ruat ding.

Step 2: Ṭong tampi thiam cu, a sualnak a um lo timi thupi keng tahratin na tawivak thlang ding. Ṭong tampi na thiammi lak ihsin na rualpi tamsawn ih hmanmi ṭong na hmang cih thlang ding. Cule, nan ṭong ih ṭong ding cu rem na ti nawn lo ding.

Step 3: An ṭong na thiam. A nganlam khalah an mahvek tlukin na thiam ding. Cutin, anmah lakah anmah vekin na um ding. Anmah miphun ah an lo pomrem cuarco thlang ding. Nang khalin kei cu a pahnih in ka ceem thei ko tiah na cohlang hrethro thlang ding.

Step 4: Na tappi ṭongih mibiak hnakin, midang ṭong ih mibiak a rem na ti sawn ding. Cule, na rualpipawl khal nan ṭong ih na biak hnakin an ṭong ih na biak tikah ngaihsak na hlawh deuh ruangah nan ṭong cu nuam tete in na thlah ding.

Step 5: Mirang ṭong cu vanram ṭong ah na ruat betbet dingih kan Chin ṭong cun a daih lo tiah thu na sim tinte’n Mirang ṭong na bet phahphah fawn ding. Asinan, na ṭong hmunthum ih ṭhen hmun hnih cu Mirang ṭong na rak hmang ding. Cucu uar vekah na ruat sawn ding.

Step 6: Cule, senpi, unau le nan khawpi sungkhat pawlin nan ṭong ngaingai in an lo be ding. Asinan, na hnih lamlam a suak ding. Nan ṭong kha na hmang tam nawnlo ruangah a mawi nati thei nawn lo ding. Na kaa in a suak rem thei nawn lo ding. Cule, milakih vawn ṭong dingah na zahpi thlang ding.

Step 7: Lai hla/Chin hla pawl hnakin miphun dang pawlih hla khin a lo hnem thei sawn tiah na ruat aw thlang ding. Kan Chin hlapawl sawisel na thok ding. Na thuamhnaw hruk khal na theih lo karah na rak thlengaw ṭheh thlang ding.

Step 8: Na rualpi hlun pawl, inn lamih na taan ta mi pawl na zahpi ding. An cangvaihdaan a tenau tuk na ti thok ding. Miphun dang pawlih cangvaih dan, thuamhnaw hruk daan le hawiher daan cu na ngaisang sinsin ding. Na miphun ih nungphung neihmi ah na diriam thei nawnlo ding.

Step 9: Nangmah te in le na kirsal thiam nawn lo ding. Nun a lo simtu piang na ralah na tuah vivo ding. Miphun dang pawl hnen lamlamah zual na va ko ding. Na hmakhua a pit vivo ti khal na ruat thiam cuang fawnlo ding.

Step 10: Na sinak na ruat phah men thei. Asinan tu khalah “Hnam hlo” ka si ti na thei aw duh cuang lo ding. Nangmah hi, nunsim theih lo mai thu lawng duh pawl na rak si bet ding. Na fim laklawh fawn. Na miphun sinak thei in kirsal awla tampi Chinhmi na tuung ding thei ding ti khal na ruat baan hrimhrim nawnlo ding. Na paihlonak in a lo hnuk neh sawn ding.

Bet: Hi, natnak cu natnak dang vek siloin thinlung sungah “Duhlonak” le “Tlawmlaknak” in a khat. Atlangpi thu in kum 5-10 hnu ah a lang. Kum 15-25 rak tuar pawl cu an dam khawsuak lo. Dam lam hnakin thihpi hman an nuam sawn.

Comments

comments

Comments

%d bloggers like this: