Hna tuan lo ih um thei hi uar ding a si pei maw?

By- Khar Thuan

Kan dunglam caan ahcun mipa in nupi hnatuan lo ih cawm thei uar san deuh a si. Nu pawl khal in cawm thei tu ding pasal hi an rak cuan deuh ngaingai. Cozah hna tuan pasal nei thei pawl tla cu hnatuan lo ih fangcang buh ei tukto ti ih ruah sang zet le ka thaw zet ih rak thangthat cio an si.

Tu lai ah hin ka theih thlithlam vek a si le nu pawl ih an rel mi cu mipa pawl an hrokhrawl tuk thlang, mipa zangzel hna tuan huam lo pawl in mi lian nunau an hawl an ti. Milian fanu an ton lo le mino thatha khal in nu thlawi lo le nuhmei milian an hawl mai an ti. Nu pawl in hnatuan huam lo mi ze, zuri sabah, mi zuva, cawm tul mipa pasal nei pang lo ding in ralrinnak an pe-aw rero thlang.

Hnatuan lo ih um thei uar kan sinak a langmi pakhat cu ramdang ih Baibal tlawng kai pawl hna tuan phah ih cawm-aw an um pang le nautat deuh an si theu. Pastor tuan cia pawl le phei cu minung ti hnim lo in pakan ti an va hnim ti tiang in copo nak ah hman a si. A ngaingai ahcun mi teima, mah le mah cawm aw rori ih tlawng kai thei cu porh tlak sawn ding a bang.

Cu vekin mino tampi tla cozah tlawng kai kan va si hman ah a mah te hna tuan phah in tlawng a kai thei mi cu uar deuhdeuh ding a si ko. Tuan mi pakhat lawng nei ih tuan dang cem lo cu a tha tuk thotho nan hna pakhat lawng a si lai. Tuan phah zir phah ti mi cu hnahnih cem thei a si ih a tha sinsin ti ih ruah ding a si deuh ko.

A si le hna tuan kan uar ti-aw seh la, ram leng cu ka thei tuk lo ruangah sim ngam lo in ramsung kan rel pei. Asile Lai ram ah tuan ding a um lo na ti ding maw? Na ti theu ka ti ve theu ko. Ruah that sal ahcun tuan ding a um ko ti a theih ding ka zum. Kan tuan zat in kan ngah thei deuh lo ti sawn hi a dik deuh ding. A tu ramdang ih kan hna tuan dan vek cio in tuan ahcun ngah zat cu a bang aw lo ding nan tuan ding cu a um hrimhrim ko.

Cun, a um lo le theih lo thu khal si lo in inn lam a si tiih kan daithlan thu khal a si thei. Hna tuan tenau deuh le fate in thok hmaisa tum lo in hnatuan tum tuk le tangka hram tampi lawng ih hnatuan kan tum ruang khal ah a si thei. Hna tuan kan upat lo thu, tuan lo ih um thei, in le ei huahho thei kan uar hrimhrim khal cu a si thei ve.

Mizo ram ih kan rak hlawh-awk theu lai thil tu tiang langfiang zet ih ka hmuh-awkmi cu ram dang ah mihmuhlonak ah kan va hlawh-aw ih inn lam ih hnatuan fial theih lo, tuan huam dah lo pawl hman in mi ek ruh tiang khal ngam in teimak kan va suah ciamco. Cule kan hlawh sun mi te thawn inn lam ah kan tlung tento ih karhzai ter tum cu sim lo, tuan ding zianghman a um lo kan ti ih kan to, kan um a har ih kan in, kan ei , a cem in kan feh lala.

Hnatuan ih cawm-awk thei hi uar a tul ih tumtah fumfe nei ih um tla a thupi. Fimnak kan zir khal ah cu tiang ka zir ding ih cu tin kha tin ka hmang ding ti tiang ih tumtah nak fel fai neih a tul. Nei cing hman in tuan suak a har ih neih lo cu hloh lawlaw a si ko. Cu vekin nuncan khuwsaknak ruat in kuli kan hlawh a si khal le kum ziat ka hlawh ding, ziangzat ka khawl ding ih hmai lamah ziang ka tuah ding ti ruat cuca lo ih kan um men ahcun kum a cem ding ih ziang cuca lo in kan cem ve ringring mai ding.

Mi kut hnuai ih thinlung zinfe zet ih rei tuk hnatuan cu tum lo ding tha tak a si. Um lan ta lo ding pawl hrangahcun. A rei tuk tik ah kan nu kan pa, kan u kan nau sungkhat khua le pi pawl tla hmu aw lo ih thihsan-awk tla a tam. Kan mah hrimhrim khal siang-aw lo cing in lai mi pawl ih na kan ti zawng takhla pi ih lu phum-awk khal a um pang thei mi a si, a um khal a um phah rero zo.

Nu pi fate pawl thawn then-awk rei tuk tla a tul, thil tha lo tampi a suak thei. Cuti si sawn lo in kanmah khua le ram te ah zohman ih uk lo, mah duh can ah ding, to thei phah in, nu le pa u le nau thawn, nu pi fate kiangah tuan tento sehla kan farah tuk cuang lo ding ka zum. A zat a bang aw lo hman ah ram dang ih kan tuan daan vek ih teimak zet ih kan tuan ahcun sum lut kan nei thei ringring ko ding.

Veikhat ngah ah a tombor ngah ih sung le khat pawl thawn hlat-awk ringring hnak cun mal deuh ngah khal le inn lam sungkhat pawl kiang ih um thei hi a manhla zet, a vaih ih vai ti si lawlaw cenglo ahcun. Inn lam a si ruang ah thin lung neh-aw lo in hna tuan huam lo ih um panglo ding cu a thupi zet ding.

Can tawite sung hrangahcun a hram din-awknak ding ah sum lut tam pipi ngah cu a tha, nain tampi ngah duh tuk ruang ih lam hla ih rei tuk um hi thil tha a si bik lem lo ding, sumpai a thu pi nan minung kan thu pi sinsin. Hnatuan kan uar ahcun kan umnak ram ah a tam le a mal tuan ding a um ko. Hna tuan uartu si hmaisa a thupi ding.

Tu lai san ahcun Tlangval pawl in Fala ngiarnak khal ah hna kan tuan tlang ding ih kan cawm aw ding ti vovo ding a si sawn. Nu khal in i cawm theitu a si kei maw ti in thla pang tiatia sawn lo in i cawn thei lo khal le ka lo cawm mai ding ti awk vulvo mai ding a si ko. Ram leng ih hnatuan kan uar vekin inn lam khal ah hnatuan kan uar ahcun cawm aw thei ding kan si ko. Kan rama har tuk e ti ih aihram rero cun zianghman a suah pi dah lo ding.

Ram dang ih harsat tuar ringring tla Pathian in in siang cawk lo ding ih inn ih kan tlun leh cio tikah neih cia cen in hnatuan lo ih um thei maw kan uar deuh ding, asilole neihsun te a hram ah hmang in hnatuan tuito ih cawmawk thei ha kan uar deuh ding?.

 

Comments

comments

Comments

%d bloggers like this: