Hmuitinmi Tthelh

June 2
Zarhte Ni

Hmuitinmi Tthelh

Bible Siar Ding: Johan 5:39-47

Curuangah nan ei ah siseh, nan in ah siseh, ziang thil nan tuahmi kip ah Pathian sunlawinak hrangah tuah uh.
– 1 Korin 10:31

Mikip in lom le thangtthat cu kan duh cio. Mipi hmai ih thangtthat le lom kan ningzak hmanah kan thinlung sungte ahcun midang ih upatnak pek le lom cu kan duh.

Jesuh sanlai ih biaknaklam hotu pawl in an tuahmi cu dikzet ah an ruat aw ih anmah le anmah an thangtthat aw. Pathian Ttongkam an theih ih an thlunnak in rundam a si tiah an zum. Pathian Thu ih simmi Daan pawl cu a fatebik tiangin kan thlun thei thluh ruangah zianghman kan ttul nawn lo ti’n an ruat.

Sihmansehla, Jesuh in a kawk hngai, ziangahtile annih cu Pathian Thu ih a lenglam phaw hrawngah an buaizet ih Ca Thianghlim ih a langtermi muril cu an tthelh tariai. Daan thu sungih ummi zate le Thukam Hlun Profet zate ih an phuanmi hmuahhmuah in Messiah Jesuh Khrih an sawhkhih. Biaknaklam hruaitu pawl cun Ca Thianghlim cu an zirzoi nasa nain a langter duhmi thutak ngaingai cu an thei lo, an tthelh a si.

Tuni ah kannih tla “Khristian mi ttha ih sunlawinak” lawng thupituk ah ret tahrat in cumi lawng hmuitin in kan dawi, kan zuam ciamco ruangah Ca Thianghlim ih sim duhmi thulaimu kan tthelh cingcing ttheu si lo maw? Bible ih simmi hrekkhat pawl thlun thei ih kan ruah awk ruangah kanmah le kanmah kan thangtthat aw. Asinan kan sinak cun midang pawl a bum ttheu. Thil ttha kan tuahnak in midang pawl ih lom le thangtthat kan hlawh lai ah Pathian sunlawinak kha milai sunlawinak ah kan canter.

Sunglawi Bawipa, Na sunlawinak kha midang pawl ih
Lom le thangtthatnak ding hrangih ka canter pangmi a um asile
in ngaithiam hram aw.
Ka hmuitinmi cu Nangmah lawnglawng si thei ringring hram seh,
midang ih upat le thangtthatnak hnakin.

Tuni ah keimai’ sunlawinak si loin
Pathian sunlawinak sawn hawl dingah
ziangmi si ka tuah thei ding?

@ Ava Pennington

(Visited 22 times, 1 visits today)

Comments

comments

Comments

%d bloggers like this: