Hmuhsaknak le Mangbangza pawl

August 19
Zarhpi Ni

Hmuhsaknak le Mangbangza pawl

Bible Siar Ding: Matthai 12:38-42

Jesuh in, “Tuihsan milai hi mi ttha lo le Pathian ttihzah lo pawl nan va si so! Hmuhsaknak (Signs) tuah maw in fial? Ka tuah lo ding. Profet Jonah ih hmuhsaknak siar lo hmuhsaknak dang nan hmu lo ding? – Matthai 12:39

Mitkher thiam pawl in an thil hmuhmi a ra zohtu pawl mangbang ding ko bumnak le thlemnak a phunphun an hmang. Mipi cun thil pahnih in an hmu: Ttong kamkhat karah pawpi cu a lang caan le lang lo caan an umter thei.

Jesuh in vancung uknak thuthang a simlai ah mangbangza a tuah ttheu. A huham le a thuneihnak in minung tampi mangbang le khuaruahhar ko a tuah. Mi hrekkhat: Farasi pawl le Herod cun mangbangza tuah dingin tla an fial.

Sihmansehla, Jesuh cu mipi pawl ih zoh nuam ding men ah bumnak hmang tahrat in mangbangza tuah rerotu mitkher thiam a si lo. Mangbangza a tuahmi pawl in Amah cu Pathian a sinak, leitlun tisa nunnak parih thuneitu a sinak le thlarau thu khal ih thuneitu a sinak langter duh ah a tuahmi a si. Minaa tampi a damter le mipi pawl rawl a donak cu vancung ih um an Pa Pathian cu anmah damter duhtu le an taksa le an thlarau rilrawng lo dingin cawm theitu Pathian nung a si zia langter duhnak ruangah a si.

Dungthluntu Johan in ziangruangah a Thuthangtha (Gospel) cabu sungah Jesuh ih mangbangza a tuahmi pawl a ngan telh timi thu a sim fiang: “Hi hmuah ka ngannak sullam cu nannih in Jesuh cu Messiah, Pathian Fapa a si ti nan zum ih Amah nan zumnak thawngin le Amah ih hmin in nunnak nan neih theinak dingah a si” (20:31).

Tuni ah, mi tampi in mangbangza hmuh ding an hiarhal. Mangbangza tuahtu pawl dung an thlun ciamco, sikhalsehla danglam hleicebik mangbangza a simi: thlraulam hrintharnak mangbangza cu haal hna an thiam lo.

Mangbangza Bawipa, ka kiangkap ah Na tuahmi mangbangza pawl ka hmuh lo hmanah, ka hrangah mangbangza lakih maksakbik in tuahsak zomi:
Na sungih nunnak thar hi ciingkeng ringring dingin i bawm aw.

Ziangbangtuk mangbangza hrangah so thla ka cam ding? Tuni ah ka dil vekin ka nun ah langter lo hmanseh Pathian cu ka rin thei thotho pei maw?

@ Ava Pennington

(Visited 24 times, 1 visits today)

Comments

comments

Comments

%d bloggers like this: