Hminsintlak Tidamnak

March 1
Tlawngkai Nili

Hminsintlak Tidamnak

Jesuh cun hmaiton tein a zoh hngai ih an hnenah, “Himi hi minung hrang ahcun a si thei lomi a si, sikhalsehla Pathian hrang ahcun ziang hmuahhmuah a cang thei,” tiah a ti. – Matthai 19:26

Bible Siar Ding: Saam 77

Veikhat cu minung thiltitheinak le huham ih run thei nawn lo ding dinhmun ah ka um. Ka nupi cun ka thi ding rori ah a ruat thlang. Cuih caan ah Jesuh cu Damtertu Pathian a si timi ka nunnak in a thei. Thla ruk sung rori rilte peeng thling naa (appendicitis) ka tuar. Pastor ka ttuannak mission field ah zial parah ka ril ka lawng. Zaanvar thla ka cam, Asinan zianghman a danglam lo. Kan nu cun van ah a feh thlang ding si hi ti’n a ruat. Siibawi a ko. Siibawi in zianghman ruahsan ding a um nawn lo thu a sim, ka besiatuk. Thlaruk sung rori ka tuarnak ah ka cor thluh ruangah rai (operation) dingah a tlaituk thlang a ti. Kan nu cu beidong le thinlung kekkuai in a taanta.

Siibawi pa a tlun hnu ah tlangval pakhat le nutar pakhat sangka ah an ding. Nunau nu cu thlacam taktakmi a si ti ka theih mi a si. Ka ihnak khaan sungah an rung lut. Tlangval pa cu ka ihkhun parah khir tahrat in “Satan tlan aw” ti’n a dawi. “Suak aw, khawsia, Jesuh hmin in thu ka lo pek!” ti’n a au ciamco. Ka sungah khawsia a um lo tiih hun elnak ding caan khal ka nei lo. Jesuh hmin in thla an cam tikah hmakhatte ah ka dam.

Ka tho, hnipuan ka thlengh ih kan nu hnenah, “Ziang tuah ding um? Ka dam zo, hnattuan ka feh ding” ka ti ih ka pok suak. Ka suah hnu rei lote ah siibawi pa a rak ra saal ih, “Mr. Wigglesworth khui ah si?” ti’n a sut. Kan nu in, “Hnattuan a feh,” a ti. Cutikah Siibawi pa cun, “Nan pa cu a nungdam in na hmu nawn lo ding” a ti taa. Kan Pathian cu atak (real) a si. Tuni ah rundam theinak le damter theinak huham a nei. “Jesuh cu mani, tusun le thaisun a danglam dah lo” (Heb. 13:8). Tuni khalah ahlan vek thotho in mi a rundam ih minaa a damter. Nangmah Rundamtu le Tidamtu si a duh.

Aw, na zum ngam ahcun a cang thei a si. Na zum asile ziang a cang ding? Thil maksak a cang ding. Mihrek cun Pathian zaangfahnak hi an tep ngah hrih loih thlangam daihnak an nei lo. An zumlonak in cuih thluasuah sunglawi pawl cu a fir sak thluh a si. Thutak cu thei nacing in cohlang lo a cang thei. Bible siar cingin a kenmi nunnak ttawmpi lo a olte. Pathian Thu kan nun ah phuang aw dingin le Khrih nunnak kan co theinak dingah Thlarau Thianghlim ih bomnak kan ttul. Thlarau Thianghlim thawn kan khah hlan lo hih mangbangza rundamnak thu maksak hi kan thei thei lo ding.

Satan cu Pathian ih neh ciami a si ti kan theih ahcun ziangvek caan khal ah nehtu kan si ringirng ding.

@ Smith Wigglesworth

(Visited 21 times, 1 visits today)

Comments

comments

Comments

%d bloggers like this: