Hmasuanmi Thlenghnak

December 6

Tlawngkai Nikhat

Hmasuanmi Thlenghnak

Siar:

1 Thesaalon 1

Nan zumnak thuhla a rak theitu pawl hmuahhmuah in ziangbangtuk in milem pawl nan tlansan ih a dikmi le a nungmi Pathian rian dingah nan pan ti cu an sim.   – 1 Thesalon 1:9

Kumkhat Sung Baibal:

–          Daniel 3-4

–          1 Johan 5

United States Secret Servive cu 1865 ah dinh a si. An mission cu ziang a si? An tumtahmi cu paisa lem tuahtu pawl kham ih dollar humhim ding, cumi ihsin America rampi ih sipuazi hrangah hnattuan ding a si. Asinan hih hmuitinmi daan tuahtu upa pawl in 1902 ihsin an hmasuanmi an thlengh. Hnattuan dang an cem phah nain mi ih an theihnakbik cu US President kilvengtu an si.

Cuih US Acozah ngaihthlaknak hnattuannak ih hmasuan thlengh awknak cu Thesalonica khua ih um zumtu pawl ih nun thlengh awknak thawn tahtthim ahcun zianghman a si lo. Thlaraulam ih nun thlengh awknak an neihmi cu a hlat le a nai minung tampi ih theih ding tlak rori in an thlengh aw verver. Milem pawl tlansan in a dikmi le a nungmi Pathian rian dingah an pan (1 Thes. 1:9).

Paul in, “Nanmah cu Masidonia le Akhaia pengih a ummi zumtu Khristian pawl hrangah zohtthim tlak nan si. Ziangahtile Bawipai’ thu cu nanmah hnen ihsin Masidonia le Akhaia peng khuazakip ah a thlen lawng si loin Pathian nan zumnak thu cu khuaza ramkip ah a thang a si,” (cc. 7-8) a ti.

Milem biaknak ihsin a dikmi le a nungmi Pathian thawn pehtlaih awknak nei dingin an hmasuanmi (direction) thlengh awknak hi thuanthu cawn vek a si. An nun danglamnak cu mikip in an hmu thei.

Ka khuaruah harmi cu – kan thinlung le kan nunnak pumhlum thlengh awknak hi mi in an hmu thei ve maw? ti hi a si.    – Bill Crowder

Hmasuannak sual ah feh in,

Tumtahnak na nei lo asile;

Khrih in na nun lo thlengh in, lo uk seh,

Cun na tuahmi kip ah Amah sunloih aw.  – Hess

Khrih hnenih rat cu thu theihnak men a si lo;

nun thlengh awknak rori a si.

(Visited 29 times, 1 visits today)

Comments

comments

Comments

%d bloggers like this: