Hman Theinak Tampi A Um

October 2

Zarhte Ni

Hman Theinak Tampi A Um

Siar:

Efesa 5:1-7

A lo zirhtu pawl thu kha ttha tein ngai awla, fimnak kha na zir thei zat in zir aw.      – Thufim 23:12

Kumkhat Sung Baibal:

Isaiah 14 – 15

–    Efesa 5:1-16

Telephone cu pakhat le pakhat kawh awknak le biak awknak ih hmanmi a si ti na ciing ko lo maw! Tulai smart phone thar tthattha a ra suak tikah mi thawn biak awknak lawng si loin data hminsin kan duhmi pawl khumnak storehouse khal ah hman a theih. Mobile phone, (computer programs telmi) thawn na kombet tikah leknak thuthang phunphun na siar thei, games na lek thei, khualtlawn duhnak hmun na tawlrel thei, innkhan pawl na hawl thei, ih hnattuan tampi sim cawk lo ttuannak ih hman theih a si.

Phone ih thiltitheinak le kan hman thei daan hi mangbangza ngaingai a si. Asinan Ca Thianghlim ih in pekmi thiltitheinak thawn cun tahtthim ding rual a si lo. Bible ih thiltitheinak pawl cu Pathian hnen ihsin direct kan theihmi A Ttongkam thutak kan nunnak ih kan nunpi dingmi a si.

Filipi bung 2 zoh hnik aw, tahtthimnak ah: Lungrualnak (2:2), zawnruahnak (2:3), phunzai lonak (2:14), khawtleuvek ih tleunak (2:15). Asilole Efesa bung 5 zoh hnik aw: Pathian bangtuk si ding zuamnak (5:1), duhdawtnak thawn fehnak (5:2), nun thianhlimnak (5:3), ttong sual ttong lonak (5:4). Cule Thufim (Proverbs) zoh hnik aw. Kan nunnak hrangah hman ding ti cawk loin a um.

Himi pawl hi internet ihsin midang ih an lo sim ding hngak a ttul lo. Bible kha kau in siar awla Ca Thianghlim in na thlun dingmi lamzin a lo khihhmuh ding. Khristian nun hrangah thusuh duhmi na nei maw? Bible ah hawl aw. Thulehnak tampi a um, hmu ngah ko in hngak aw.   – Dave Branon

Bible kai hnget aw, hih lung mankhung rothil,

Kumkhua nunnak hmun lam hlomi hruai aw;

A man cu a hmun lo leitlun thil ih tah theih a si lo,

Ka thlarau, na hawl thei lai ah, cuih thluasuah cu hawl aw. – Smith

Bible in na hrang fimnak hlawnthil mankhung a nei.

Siar awla na nunnak hrangah hmang aw.

(Visited 30 times, 1 visits today)

Comments

comments

Comments

%d bloggers like this: