Awnmawi – Zante

Profile:
Hmin                           : Ngun Zan Mang
Kawhduat                 : Zante
Suah ni                       : 15. 7. 1986
Nu le pai’ hmin       : Pu Tha Ling Thang le Pi Ngen Nei Tlem
Unau                           : Pariat lakah nautabik sangtu
Suahnak khua          : Ngal Ti
Tlawngphun             : B.Sc (Physic)
Tui’ umnak                 : Yangon

CT: Ziangtik ihsin thokin music hi na rak buaipi?

Zante: Phun thum phun li hrawng ih sin.

CT: Music thawn pehparawin special deuh ih zirnak na rak nei maw?

ZT: Special deuhih ka zir cu phunhra ka theh hnuah College kai phahin Tahan (Kalay) ah Thang Boih (Maan Nazi dawr pa) hnenah ka zir thokih,  College ka theh in Yangon ah GMI Saya David Sum tlawng ah ka kai ih ACM (Associate in Church Music) ti mi degree in pek.

CT: Music Instruments ah ziang mi khi si na line bik?

ZT: Lead Guitar hi ka major bik si.

CT: Prefessional khawvel ah ziangtik kum ah ziangvekin na rak lut?

ZT: Professional ti cu a tu tiang khal professional tin ka ruataw thei hrih loih..  music khawvel ka luhdan tisawn sehla. Tahan, Kalay ka rak um lai khalah hla le show tivek khalah ka tum phahphah zo.. ih, music tlawng ka theh hnuah hin thungaithlak deuhin ka lut vivo.  A hlan cu ti luamlamah a cang deuh. 2009 hrawngin a sibik ko.

CT: Tulai kan Chin music hi ziangtin na hmu? Tlaksamnak kan neih mi tete hi ziangvekin tuahtha sehla na duh?

ZT: Tu hlan kum kan zoh a si le kan thangso nasa tin ka hmu. Thapekawk hi a thupi zetih nu le pa tla hin fale tha pe sehla cun music training  tla peaw thei rero sehla a tha. Culen nu le pa khal siseh, mino khalin siseh, hla kan ngai mi hi a kel lawnglawng ngai loin, ramdang tuah mi hla tete, Pathian thangthatnak ih an hman mi hla tete, tivek tla hi tampin ngai in zirzawng sehla kan thangso deuh ding tin ka zum.

CT: Ziangvek music style na ngaina? Ziangvek style kha tum nuam na tibik?

ZT: Music hmuahhmuah cu ka ngaina theh (Hip Hop siar lo). Tum nuam ka ti cu modern rock pawl hi tum nuam ka ti bik. Ti dumdo pawl kha male.. heheeh…

CT: Kan Chin hla style pawl teh hi ziangtin na ruat? San a man na ti ko maw?

ZT: Tui hnu lam kan hla suak pawl ka ngai tikah san kan man nasa thlang  tin ka hmu. Sinan hrekkhat hi remthat ding tampi a um lai tin ka hmu. Laimipawl in Pathian thangthatnak ih kan hman mi country hlapawl tla hi kanmah kan Lai hla style te a si an ti ih.. hihi a dik lo. Hi mi cu Mirangpawl ih rak thun (tune) mi style a si; kanmah kan theih lo le kan thiam tawk lo ruangah phundang zetah a rak suak mi a si. Curuangah country a si tla len Mirangpawl tuah mi vek  kan cawng cengmang cu anmah vek dingin tuah thei/phuah thei tla hi zuam sehla a tha nasa ding.

CT: Professional musician pakhat si thei dingin ziangpawl a tul? Na rak zuamdanpawl in hlawm thei kem?

ZT: Professional si ding hin kei tla ka zuam rero laiih a tu tiang ka rak paltlangdan mallai lo hlawm sehla: kei cu ka nu le ka pa tla milian an si lo tikah sum le pai ka harsa zetih an tlin tawk ten ka zir ding tin ka dil tikah (ka nu le pa, ka u leih duhsaknak thawn) in el siang lo ten in rak kaiter. Culen ka zir tik khalah si ngaingai duhnak thinlung thawn ka zir. Ka thei tawkin a leng ta khal, zir mi sung ta si lo khal, ka hawl in ka zir bet. Cun rualpi mi theih khal nei tam dingin a cang thei tawkin ka kawm. Culen a hlan ka ton mi lo sim sehla: Show tivek le singsong service tivek can khalah ningzak lo ten keimah in ka lo tumsak ding tiah mi guitar sang in ka rak tumsak theu. Hla khal man la loin studio tum ding hawl in ka rak vak dah.

CT: Music khawvel na luh ah ziangvek harsatnakpawl na rak tong?

ZT: Harsatnak cu tam nasa. Mitu ka ti bangin sum le saw lam khalah ka harsa. Cun Yangon ka thleng pekah tla cun Kawl ttong len ka thiam tuk lemloih a har zet; sim duh mi len minute nga lai ruat tain ka rak sim theuih kan Sayapawl tla biak ka thiam lo nasaih apengparang  tlain ka rak be ngah theu. Rualpi kom can khalah a har nasa. Cupawl tla tuar tentoin Kawl unau tla ka rak pawl.. ih.. culen music ahhin hrekkhatpawl cu mi zuam (eltai) an paih zetih hla vun tum, si lo len pakhat khat vun sideuh sehla cumi pa cu a cumi ee a khami ee ti ih eltainak awkam an sim mi theihsal khi har ka ti zet. Kei cu mi eltai tla ka tum loih mi nih tla in in eltai lo sehla nuam ka ti zet. Mah tuah mi kha tha thei ding tawpih tuah kha ka zuamsawn.

CT: Tui na tumnak hmun le band teh in sim thei pei maw? Kimcangdeuh in in ruah aw.

ZT: Sim thei lutuk kei cu…;P Tu hi Promise Land Studio ah BLESS ME BAND ti in kan ding.

Lead-Zante ,   Bass-Piangpi ,    KB-Mungpi (Mung Mung),    Drum- Seng Aung  pawl kan si. Lai le Kachin lam thawn kan komaw culci.

CT: Na uar mi musician pawl tla theih kan duh.

ZT: Aw, cuti ti? Ka uar mi hi an tam nasaih uar hleicedeuh mi pawl ah cun guitarist ah Joesatriani, Stevevai,  John Petrucci, Chit San Maung pawl hi ka uar.

CT: Na hlaphuah mi tete tla kan rak hmu ih fing ziat na rak phuah zo? Zopawl in an sak? A hla style teh ziangvek an si?

ZT: Hla hi fing 60/70 hrawng lawng si ding ka phuah lai. A rak saktupawl cu Thlapi , Ma Kim, Susan le Tiger Girls pawl tla nih an sak. Style hi cu Modern le Slow Modern pawl a tam.

CT: Hla na phuah tikah a thluk maw na phuah hmaisat a hlathu? A hlathu (material) hi ziangtin na ngah theu?

ZT: A thluk hi ka ngan hmaisa theu. A thu hi cu neta ah ka bet theu. A bangawk lo eehh. Thenkhat cu mai feeling rori te ngan mi tla a um. Thenkhat cu mi feeling vun feel sak mi tla a um. A saktu ih zir tla’n ka ngansak hai.

CT: Hla fing khat na tum tikah hla mawiter dingah ziangtin arrangement na tuah theu?

ZT: A hmaisabik ah a music style ih zirin ka ruat ta. Cu theh in hlathu thawn pehparaw dingin ka tum. Tahthimnakah, a puakkuai mi lam si len puakkuai dingin ka ruat ih, cun a fehdan kalhmangah cu ngai nuam dingin le hlathu umzia zoh tlain ka rem.

CT: Series ziangzat hrawng na rak tum zo? Kawlhla maw Laihla an tam?

ZT: Series in cu kul hrawng lawng si ding. Hla fing in cu a tam nasa thlang.  Kawl le Lai cu an zatrep hrawng ding.  Tedim hla tla um hnuaihni..

CT: Chin music in mi kan bang theinak dingah ziang a tul tin na hmu?

ZT: Zirnak tampi kan tul. Culen a ngaitu khalin hla cangkang zetzetpawl tampin ngaih sehla.

Culen hla a suahtu tla hin quality tha zetzetin suah thei sehla, ti tuktak men loin.  VCD/DVD si tla len mah le camera te menin zuk loih professional deuh dingin, a suahtu khalin sum le pai ui loin, Lai hla si pam ti loin quality zoh sehla, cun a thupibik cu a ngaitu ding mipipawl hin kan ngai paih lo tla si len mah Laihla te tiah lungawipinak ah leisakawk hi taima sehla tha zet ding tiah ka sim duh.

CT: Hmailam hrangih na sunmang tla theih kan duh.

ZT: Kei cu “Zante” ka si ih sun ah mang ka man dah lo lo ti seh la nan zum men dingih..LOL  … aaa.. keimah le keimah hi ram theih khawvel tiang theih si thei sehla ti hi ka sunmang a si. Cu hnuah kan Chin music hin khawvel a khing ve ding hi a si. Cun ka Bawipai’ in pek mi music thiamnak hin Amah thangthat sunlawih sinsin thei ding tla hi ka sunmang le ka thulubik cu asi.

CT: Na hmuhton mi lakih na hngilh thei nawn lo ding mi thil pakhat in in sim aw.

ZT: Ka hmuh ton mipawl hi an um hnuaihni nan ka hngilh phahphah thlang. Asinan tu tiang ka vun ruataw ih ka hngilh lo mi te cu, ka nauhak lai kan khua crusade tuah laiah tihnimnak co ka duh tuk. Asinan ka pule in in rak siang lo. Cutikah cumi ttum ih in zirhtu hnenah ka  va feh ih tipil ka duh ve thu ka va sim. Sayapa cun, ‘Aw, si awkah,’ tin ka nu le pai’ hnenah in dilsak ih cutin ti ka rak pil ngah. Himi thu te hi cu ka cingringring lai.

CT: Na riahsiatbik ttum le na lungawibik ttum hi khui mi an si?

ZT: Kan vokte cinghnia ih a deh ttum hi ka riah a sebik in ka thei. Cule ka lungawibik ttum cu.. tthi (Lottery) poh sehla ka umdan dingpawl ka vun ruah hi cun, Pa Tuan danah,  ka lung hi a hung awi hluahhlo si mai.. hahahaaa..

CT: Thinbangnak (stress) na ton tikah ziangvekin na pahtlang theu?

ZT: Kannih cu Pathian fate kan si ih Amah in in umpi; ziangkim  Amah in rem in ruatsak ding  ti in thazang thar lak in ka hnemaw theu.

CT: Harsatnak parih na ruahdan?

ZT: Har sat nak a rat ta lo cun nomnak hi a ra hngalh dah lo!

CT: Music lamih phur thangthar nonawnpawl hnenah ziang mi ruahnak pek na duh?

ZT: A tu thok a tu si hngalh tum loin thinsau zetin kan zuam tento si len ni khat khatah cun kan hrangah hmun le caan a um leh ding.

CT: Lovesong ngai a duhlotupawl hi ziangtin na hmu?

ZT: An fiangdeuh lo ruangah tin ti sehla a na tuk deuh pei maw aw??

CT: Gospelsong ah tulai music style deuh (heavy deuh) ih an tuah le a lovesong style tuk tivekih an soisel theu mi parah ziang na sim duh?

ZT: Kan theihnak a sang tawk lo ruangah si ka ti. Mi nih (tehkhinnakah Mirang lam) ziangvek music in Pathian an thangthat ih ziangvek style an hmang ti tla theih a tha ko lo maw? Kei ka ruahdan cu a thabik mi music le a mawibik mi style in Pathian cu thangthat ding si ko ka ti.

CT: Music ih hmualneihzia tla in simfiang ta loah…

ZT: Pathian kan thangthatnak ah music tel lo a ngah lo bangin, kan riahsiat kan lungawi can ih kan hriamhrei thabik a si ko lo maw! Ka hmuhdanah cun music cu minung thinlung nehtubik a si.

CT: Falapawl hnenah na phone number rak lo pek sak  bang sehla rak thiktu ding an um pang pei maw?

ZT: Aah ….. um lem lo ding aa.. an rak um pang khal len lungawium si ko ..;p

CT: Pangpar tel pek na duh mi fala hi zovek/ziangvek an si pei?

ZT: Aa.. ka sim cawk lo ding. Ka sim len cuvek cu kei ka si lo an ti theh dingih netaah kawt tla ka kawt pang ding ..;P Ka rual Ma Kim dan takah ‘a nu te cu si phot ding’.. hehe..

CT: Na tuang lo timsaktu dingah Lainu kherkher na tideuh maw?

ZT: Pathian remruat dandan si ko. Lainute  si len cu a tha sinsin pei cu ti.

CT: Duhdawtnak hi ziangtin na ruat tin lo sut bang sehla ziangtin na sawn ding?

ZT: A tep zotupawl cun an thei ko dingih..  tii zuaizo ding ko mi tizur (tiral)ter theitu a si an ti ih midangpawl nih cu. Tepsan (test) hnik sehla ka cak nasa….

CT: Artist pakhat hrangah art diktak sersuak thei ding cun lungkuai (zunngai) ta kherkher a tul an ti mi hi dik na ti maw?

ZT: Aih, dik ka ti lo! Hi mi cu Pathian nih in pek mi talent a si ih. Pathian nih lungkuai ta uh in ti lo pi.. Bible ah a um lo.

CT: Nangmah thawn pehtlaih a duhtupawl hrangah ziangtin lamzin in kawhhmuh thei ding?

ZT: Sanchaung, Yangon, Myanmar. Email: jzan.guit@gmail.com, Ph -0949301795.

CT: Sim duh mi na neih lai le…

ZT: Hi tivekin duhsak zetih in rak suthlam mi parah CT hnenah lungawinak tampi ka nei. CT hi kan Lai website ah cun ka uarbik mi website a si. Laimi hrangah CT hi ding ringring hram seh! A rak siartu mipipawl hnen khalah lungawinak tampi ka nei. Hmailam khalah tha in pek ih bawmaw tawn ding ka duh.  Nan zate parah lungawinak sim cawk lo thawn…..        Zante (Guitarist:-)

(Visited 882 times, 1 visits today)
%d bloggers like this: