Biaknak Lam – Dr. Tuan Za Kip Thawng

 

“Ka innsangnu Biak Chin hi ka uar bik”

“Action songs, Nauhak hla, Choir, Quartet ti vek thaw cun Fing 1000 hrawng a si”

CT : Na hmin, na nu le pa, na suahnak, u nau ziangzat na nei, khawi tawk ah na um?

TZKT : Ka hmin cu Tuan Za Kip Thawng a si ih, Ca Te tin in ko tam deuh. Ka pa Pu Tin Dun le ka nu Pi Tlang Kip Zing an si. Kalrawn Hmunpi khua ah ka suak. Unau pa (5) kan si ih ka nau pakhat cu in liamsan zo. A tu hi Tahan, Taungphila ah ka um.

CT : Fimthiamnak lam ah ziang tiang na zir?

TZKT : Falam in phunhra ka ong. Zomi Theological College ah B.Th ka theh. Asia Evangelical College and Seminary ah Master of Ministry ka theh. Trinity Theological Open University in Doctor of Theology, Secunderabad ah lamhlat zirnak in ka theh. Faith Theological College and Seminary, Bangalore, ah Doctor of Philosophy lamhlat zirnak in ka theh suak. Secular lam ah cun Bachalor of Art (History) ka theh.

CT : Ziangtik ihsi khan Pathian thuthangtha na rak sim thawk ta?

TZKT : 1993 ihsi khan thuthangthasim ka rak sim thok.

CT : Na Sermon thupi hmaisabik na mang lai maw?

TZKT : Ai! Ka mang ngelcel nawnlo aw.

CT : Na Bible cang duhbik le hla duh bik in sim thei pei maw?

TZKT : Baibal caang cu duhbul ka nei lemlo, ka duh theh deuh. Hla belte cu Pathian ih I pek mi “Ka nunnak Krih” ti mi hi ka duh bik. Ka innsang nu Biak Chin in 1998 kum ah aw a thun ih, cui kum ah Mizoram hlasak thiam Bethsy in Mizo in a sak. Tu hrawng ah Mizoram ah an uar zet.

CT : Thuthangtha na phuannak kip ah nautatnak le dodalnak na tawng ko maw?

TZKT : A tawnggtam pawl ka si men ding ka ti rero.

CT : Thuthangtha sim ih na vah suakso nak ih nuam na tibiknak le harsa na tibiknak in sim thei pei maw?

TZKT : Thuthangtha sim in ka vahsukso nak ih nuam ka ti bik cu Pathian Thlarau phuanlang awk nak a um ih, keimah khal ah mana thar co ve si, mipi lam khal thlarau lam le taksa laman tul mi an ei ngah ih an di a riam sutso khi a si. Harsa tibik tak cu ka nei lemlo. Krih hrang ih harsat tuar hi ka lungawinak a si sawn.

CT : Thuthangtha sim in Lai khawte khaw ziangzat na pal?

TZKT : pathian in I pal ter tam pam. Ka thlen hrih lo nak a tam lai.

CT : Khui tawk ih thu na sim ah thlarau in nasa hleice in a lo pawl ih na theih awk?

TZKT : A tlangpi thu cun ka thlen nak ih piang ah Thlarau pawl nak cu ka dong ringring ko.

CT : Hla na phuhmi kan sak theu tikah mawi kan ti zet ih hla ziangzat na phuah fel?

TZKT : Ka hlaphuah mi hi, Action songs, Nauhak hla, Choir, Quartet ti vek thaw cun Fing 1000 hrawng a si.

CT : Kan Chinmi awnmawi thiam an sal tikah na hmin a lang ringring ih ziangtluk in awnmawi ah na rak hmang aw?

TZKT : Awnmawi lam ah cu ti ih hman awk ciamco nak ka nei tuk lo. Falam ah hin awnmawi uar mino tamdeuh hi cu ka zirhnak ih ra tel an tam. 1989 ihsin tuini tiang hi Tingtang tum, Keyboard, Hlaphuah daan, Drum tumdaan ti vek pawl hi tindan ka pe ringring.

Phunsang tlawngta pawl show tuah vek tla ah Bass ka rak tumsak theu. Zomi Theological College building saknak ding Fund hawl ah Lasho, Taungyi, Maingsho tivek pawl ah kan rak show dah ve. Dunglam zawng ih Guitar tum ti vek pawl ka rak hman ciamco lai hrawng male. Cule training ah hmun dang khaw dang khal in, in sawm tamzet pam. Biblical School of Theology Falam ih a rak um lai tla ah Music kumkhat sung ka rak zirh.

CT : Kan Chinmi sinak/umtu/ ziaza na duhlo zetmi thlengter thei sehla thlengter na duh zetmi a um maw?

TZKT : Umve ko. Culak ih pakhat cu, miphundang le tongdang lak ih va um ruang ih Chinmi si lo vek ih mi ih tong le phun ttawm kan hman theu hi tthin seh la a tha ka ti.

CT : Kan Chinmi hlasak thiam ah zo na uar bik?

TZKT : Ka innsangnu Biak Chin hi ka uar bik.

CT : Kan Chinmi thuthangtha sim pawl lakah zo na uar bik?

TZKT : Uarbik tak ka nei lemlo.

CT : Tuihnu kum (10) ah kan Chinmi ziangtluk in kan thangso in kan tla niam ding timi na ruahnak in hlawm thei pei maw?

TZKT : A minung hi cu tu hnak in fimnak le lennak ti vek ah kan than so deuh ka zum ih, kan Chin ram bel te hi ziang bang ngai pei maw?

CT : Pathian in a lo hmang ih na thuthangtha simnak ruangah mi paziat hrawng in piantharnak an co ding ti in sim thei pei maw?

TZKT : Pathian in a thei.

CT : Ruahlopin thla khat sung vial nung ding in um aw la, kan Chinmi hrangah ziangmi na tuah ta ding?

TZKT : Pathian thu ka ti thei tawk in ka sim ta ko ding.

CT : Chinmi ramkip ah raltlan ih kan vahvaih hi Pathian tumtah a si tin na pawm ve ko maw?

TZKT : Pathian remruat ti cun ka pom thei lo. A mahbel te Pathian in kan dinhmun in theihsak ti cu ka ring.

CT : Chinlandtoday siartu nikhat ah 100 lenglo an um ih cui pawl hnen ah thucah tawi sim duh na nei maw?

TZKT : Siar tam hi theih tam nak a si. Theihtam hi fimnak bawmtu pakhat a si.

CT : Chinlandtoday hi mi thawng tel in an thlir, Chinmi zate ta a si ih ziangtluk in kan Chin mipi hrangah hna a tuan thei ding na zum?

TZKT : Amah Chinland Today site ih tarlangmi ca pawl le thil um daan hoih in a siar tu Chin mipi hrang ah lam kip in thansonak bawm tu a si ding tiah ka ruat.

%d bloggers like this: