Biaknak Lam – Timothy Thian Nun Thang

Timothy Thian Nun Thang

Timothy Thiante hi Pathian ih mihman mi pakhat a si. Hmuh veten mit hmai panzet , nel um zet a si.  Hitivekin USA a ra tlawn lai ah CT thawn thu suhnak can kan ngah hi a lungawi um ngaingai. Zumtu unau tampi hrangah Thlarau thazang ngah ding kan beisei.

CT: Na hminpum, na suak nak khua le nu lepa hmin le unau paziat nan si?

TT: Ka Hmin cu ”Thian Nun Thang” a si. Pathian hna ka tuan hnu-ah “Timothy” ti kan bet. “Timothy Thian Nun Thang (Thiante)” ka si. Cinmual Veng, Falam ah ka suak. Kan semsuahnak khua cu “Khuangli” a si. Ka Pa cu Pu Tuan Sum a siih, ka nu cu Pi No Hlei Tlem (Thi zo) a si. Ka suahpi Unau 5 kan si nan in thih san thluh zo, nautabik ka si. Tu-ih, Ka Nu – Phun Kip Thluai a siih, Unau 9 kan si.

CT: Na nupi hmin le a thuhla in sim thei pei maw?

TT: C. Konya Konyak Lunghu a si. A ni hi Nagaland – India, Mon Town ih suak mi a si. An hnam cu Lunghu a si. Kan mai Lai Miphun (Chin) an si. Kum no te a si lai ihsin Pathian hnatuan rero zo mi a si. North-east India ah le ram leng hmun dangdang khalah rawngbawlin a feh rero theu mi a si. B.A (Eng-Hon) a siih, Master of Art in Theology degree a nei.

CT: Nan nu thawn khawitawkah nan tawng aw, ziangtikah dam sung thutiam nan tuah?

TT: SAIACS, Bangalore ih  M.Th ka zirnak-ih tong-aw kan si. Cun 2006 Sepetember 8 ah damsung thutiam kan tuah.

CT: Na pianthar nithla le kum na cing maw aw! na kum ziangzatah na rak piangthar, zo thusimnak in?

TT: Pathian zangfahnak ih Ka Pa’i kaihhruainak zarah sentet lai ihsin Pathian Thu ah kan thangso. Asinan, Rundamnak – Khrih cu ka Rundamtu leh ka Bawipa ih ka pom leh mipi hmai rori-ih Theihpinak Thu kan phuan theinak cu Kum 7 mi ka si ah a siih, 1984 May, Falam-ah a si. Cu laiih in rak zirhtu cu Sayamah Hlawn Za Tling (Rev. Lal Ro Thang ih Innsang Nu – Gospel Baptist, Tahan) a si.

CT: Ziangtik ihsin rawngbawlnak ah na lut? Khawi khua ah crusade na rak tuah hmaisabik?

TT: Kum 12 a si ihsin Rawngbawlnak ka thawk. Tlawngpit can tinte in rawngbawlnak ka nei theu. Ka Crusade hmaisabik tuahnak cu “Khuangli” ah a siih, Zarh 2 sung (Buaite Tlawngpit) a rei.

CT: Mizoram ah Thuthangtha phuangtu mirang-mizo tawng let tu lakah a thiambik ti’n ziangruangah an lo ti?

TT: Pakhatnak ahcun Pathian Duhsaknak ruangah a si ka ti lo thei lo. 2005 kumah Leitlun ih Evangelist hminthang Dr. T.L. Osborn ih fanu Dr. LaDonna Osborn cu Mizoram-ah Crusade dingih sawm a siih, Kohhran-Pawl tinkom, Mizoram huapih tuah mi a si. Tawnglettu ding khal Kohhran hruaitu thatha le Mithiam ruat an si. A ra thlengih Program kan thawh taktak tikah Pathian Thu ah a Thucah ken mi vek tak takin an let suak thei ngaingai lo. Cu tikah, Rev. Lalrodinga Colney – Crusade Organizer, i theitu in, “Timothy-in let hnik ve reng reng seh,” tiin a rawnih cu mi ihsin in let ter. Pathian Thucah Pakhat – Rundamnak Thucah ah kan pumkhat tikah Pathian zarah ka letsuak thei. Cu mi ihsin, Crusade cem tiangin midangin tawnglet nawn lovin keimah hlirin ka let ta.

CT: Tuni na hnatuan rero lai mi ziang a si, ziangmi tuanvo na lak? Na tuan zo mi pawl in sim aw.

TT: A tlangpi thu-in Thuthang Tha Simtu – Evangelist ka si. Pathian zarah Kum 2 sung Pastor hna a rak tuan dah. Cun, Kum 7 sung Mission for Christ National Director, Myanmar ka tuan. Dinhmun dang nei lovin, Evangelist hrim hrim in Kum 9 (Ka rawngbawl tirin ka siar) rawng ka bawl. Tu hi, International Coordinator ih Kum 3 Mission For Christ (Pu Lalchungnunga ih din mi – Aizawl, Mizoram) ka tuan. Tui kum cun ka can (term) a tawp ding.

CT:  Thuthangtha ruangah na tuar mi lak ihsin har na ti bik mi le nuam na tibik mi theih kan duh?

TT: Thuthang Tha ruangih Tuarnak ti ding cun nepnawi tampi rel ding a um men thei. Tahthimnak-ah Hakha-Gangaw peng lamih 1993-94 rawng ka bawl laiah rualpi nei lo, Hramlak ih lamzin hloh tivek, Lamzinih Ralkap pawlih tibuai tivek, tiva ih fen tivek tete tampi rel ding cu a um. Asinan a harsa in ka thei lo. Pathian thlawsuah sawn an si ka ti. Nuam ka ti mi cu – Mi pakhat (tampi) maw Zisuh Rundamnak co ih Pathian Thu ah Lungawinak Thar a co maw hmuh leh theihpitu si hi a si.

CT: Laimi lakah nauhak bik reverend pek mi a si an lo ti ih a si ngai maw? Ziangruangah cutin kum note’n an lo pek?

TT: Cuti vekih in ti hi keimah rori cun ka Hna in thei dah lo. Hi tiih in sut hi mak ka ti nasa. Ka si ngai maw si ngai lo cu ka thei lo. Ka ruat dah ngelcel lo. Si, Reverend ka si hlan ihsin Kohhran Serh leh Sang a tul dan vekih ti thei dingih Special Permission (Kohhran Tulnak ruangah) tla cu in rak pe dah. Cu ti vekih Pathian zarih ka thansonak in hmuh vivo-nak ihsin a si kei cu – tui ka hnatuannak Mission for Christ in 1998 (Kum 21 ka si) ah Ordination in pe.

CT: Thuthangtha na sim mi lakah na sim uar bik mi thu ziang a si?

TT: Ka sim uar bik mi cu “Rundamnak Thuthang Tha – Zisuh lawng lawng hi Lamzin, Thutak leh Nunnak” a si. Cuih Thuthang Tha cu a huap kau zet. Khrih bangnak nunih Puitlinnak Nun tla a tel thluh. Thu ih theihfiangnak cun Nun Thlengnak tak tak in thlen a tul zia tla ka sim uar zet.

CT: Kawlram kan harsatnak, Lairam kan harsatnak na sim tikah ziangtluk na thinlung a kekkuai theu?

TT: Kan dinhmun ka ruah leh ka hmuh mi hi ka kaa-in ka rel suak thei ngaingai theu lo. Ka mitthli a tla ringring. “It is hard to be Burmese – Burma ram mi si hi a har em!”

CT: Kan kawlram kan miphun hrangah ziang tluk ruahsannak na nei? Kawlram hi Christian ram pi ah a suak lai ding na zum maw? Kan ram hrangah mithli tlak in thlacam na hohanak ah Pathian hnenah kan ram tha dingah a ni le thla tiang in nan dil dah maw?

TT: Pathian cu mi thleidan nei lo Pathian a si vekin Mi ram a that thei a si ahcun Kan ram a that lonak ding san ka thei lo. Kawlram leh kan Miphun cu hi ti ring ring kan si lo ding. Pathian ah Ruahsannak Nung ka nei. Khristian rampi ah a cangsuak thei ti ka zum. A cangsuak lai ding ti khal ka zum. Amah belte, Pathian cangvaihnak ding ahcun “Kan mah – ZUMTU” kan thupi tuk tiin ka hmu. Pathian cangvaihnak ding Kut-Ke cu Zumtu kan si. Kan ram tha dingah a Ni leh Thla khiak tiangin ka dil dah hrih lo. Pathian Caan-Timing a si ko. Kan mah hi kan READY-Ralrin Cia a tul tiin ka hmu.

CT: Evangelist lole Pastor ah zo na uar bik? Ziangruangah?

TT: Uar bik mi ti rel ding cu har ka ti nasa. Pathian ih a ret dan cio hi a bang-aw lo ih, ka uarnak hmun cio hi a bang aw lo. Hmin bul sal ding ka nei lo. Ka uar mi cu zo an si khal le, “Pathian in a Kawhnak vekih a cem tiangih a har a nuam ah maw Ding Ngam” pawl hi an si.

CT:  Mizoram ihsin US luhnak ding visa na dil lai ah harsatnak na tawng maw?

TT: Pathian zarah zianghman harsatnak ka nei lo. Pathian Caan rel taktak a si tiin ka ruat.

CT: USA na fehnak ihsin na hmuhtawn mi le thazang na ngah mi a um maw? Kawlram hrangah teh vision thar na hmuhphahnak a um maw?

TT: A tlangpi thu-in Pathian Duhdawttu pawl thawn kan tawng-aw tam bikih thazang ngahnak ding hlir a si ko. Kawlram hrangih Vision thar ciamco ti ding cu hmuhphah mi cu a um in ka thei lo. Kan ram ka zawn ruahnak cu a titam sinsin.

CT: Anetabik ah hmuntin um kan Chin miphun in kawlram sungih Mission hnatuannak thinlung a nei tu pawl hrangah ziangtin hnatuan cio dingah duhsaknak na nei?

TT: Ram nuam kan thlen tikah kan ram dinhmun hi a Thu lawngin kan thei thlang. Kan tep nawn lo tikah theih hngilh a awl zet. Kan ram tul zia hi Thlarau lam leh Taksa lam khalin cuan/thlir ringring hram dingah zangfah ka dil duh hai.

Sungkhat unau kan bawmnak ah siseh, Thuthang Tha thlen dah lonak hmunih Missionary thlahsuahnak ah siseh tampi kan tuan thei. Missionary Inn sangkhat hi US $50-60 (Inn san man tel lovin) in thlatin kan cawm thei.

Mission hna kan tuan tikah (1) Miphun thinlung – Racialism (2) Thurin neuh neuh – Minor Doctrines leh (3) Pawl – Denomination thinlung hin in ti buai lo hram seh la a pawimawh in ka thei. Hi pawl hi Thuthang Tha karhzainak khamtu an si theu.

CT: Kan thusuhnak kimcang takin in sannak in neih sak ruangah kan lungawi

TT: Kei khal tampi ka lungawi. Pathianin lo thlawhsuah hram seh. Amen.

%d bloggers like this: