Hruaitu – Salai Thawm Hlei Mang

Salai Thawm HLei Mang le Lentlang

Malaysia ah Laimi pawl an anhai ti thei ruangah Salai Thawm Hlei Mang (Pathawm ) cu kan hnen ah a rak thleng. Veikhat hmuh veten nel um zet le mit hmai pan zet siamsi ten a um ih kawm a nuam nasa. Cuticun a riahnak Imperial hotel ah lentlang cun va lengin hmaitawn thusuhnak a nei.

Lentlang : Nanu, napa le na khua, tui na um nak khua pawl in sim thei pei maw?

Pa Thawm : Ka pa Rev. Hrang Kap Hnin, kanu Pi Sui Ngun Tlem an si. Falam ih pitling ka si. Unau mipa 2 le nunau 3 kan nei ih, upa bik ka si. Tui ka umnak Khua cu Basel, Switzerland ram asi.

Lentlang :Ziangmi hna natuan ti in sim thei kem?
Pathawm : Basel khua i City mission (www.stadtmission-bs.ch) ah “Counsellor” (kan tong cun Seelsorger anti) hna 2001 thawk in katuan. Basel State Church ai awh in Restaurant le Hotel i hnatuantu pawl vehvai tu kanti pei cu. Cui tlun ah Basel i International Church pakhat „Mitenand Church“ ah Coordinator in katuan, Kan Church khawmtu hi 70-100 karlak kan si ih leitlun miphun tamzet an tel.

Lentlang : Kawlram na um lai ah ziangtluk kann miphun hrangah na rak pumpe aw?
Pa Thawm : Mandalay university ka kai lai 1988 buainak a rak suak tum ah karak telve. Neta mah le um nak cio ah kan rak tlungih Falam peng tlawngta pawlkom kan rak din i Hotu karak tuan. Kan tlansuah hnu cu CNF ah 1989-1992 tiang Finance Secretary ka tuan. CNF kan buai hnu, Delhi ah kum thum sung DBCF Sungtuan karak si.

Lentlang : Biaknak lam ah ziangmi degree na ngah?
Pathawm : New Delhi ah BD ka theh, Switzeland ka thlen hnu Diakonie Seminar timi ah kumkhat sung ka kai bet.

Lentlang : Ziangtik kum ihsin Switzeland na thleng ?
Pa Thawm : 1995 kum ah kathleng.

Lentlang : CNF ih nunnak tiang thap in hna na rak tuan lai ah na tuah ngah lo mi ti ih na seherh zet mi a um pang maw?
Pathawm : Ka tuan mi ah phur zet le nunnak pe in theihtawk kanrak tuan rero lai ah buainak, thenthek awk nak ahung suah tikah kan sunmang atawp tiang kanrak fehpi suak theilo mi cu a pawi ngaingai. Asi nan Pathian in kan zate hrangah athabik in inruahsak tin kazum.

Lentlang : CNF le CNA ih danglam nak?
Pathawm CNF cu political party pawlkom hmin a si ih, CNA cu ralkap an si.

Lentlang : Kan mipi in tuini tiang felfai zet in kan theihthei lo mi CNF sungih thenthek awknak a thleng mi hi in sim thei pei maw?
Pa Thawm : Dung lam thu cu a liam zo mi a si ih keimai duhdan cun sim rero ka duh lo nan,, thudik le thu fiang nan theih ding cu a tul ruangah a tawi zawng in ka lo sim ding. Kan CNF hotu bik parah pengdang kan unau pawl lungawi lonak le zum lo nak an rak nei, Cumi thu cu thu dik a si le silo hawlsuak tu inquiry committee khal a rang thei bik in tuah asi. Cumi committee i zingzawi nak hna atuan rero lai ah Pengdang kan unau Hakha le Matu pawl in Aanaa kanting an rak ti.

An cangvaih nak dodal in rak cangvai duh sehla thisen aluang ding ti kan hmuh ruangah mah Laimi le laimi cuvek asuah duhlo le thatnak ruat sawn in Falam peng mi zaten riahse cung in kansuak thluh. Cumi hnuah vawi hnih rem awk salnak le tuantlang sal thei dan lamzin kanrak hawl in kan be aw rero nan, compromise duhnak thinlung anneih lo ruangah kan be aw fel theilo. Himi buainak antuah ni hi kan Laimi dothleng (revolution) lungrualnak acem ni asi tiah karuat. Lehlam ah kan mino tampi riahsia le tutiang thinna kan um ti kathei, Hipawl hnen i ka sim duh mi cu acang zo mi pawl cu dungah tunsan i, hmailam ara dingmi sawn ruatin mai ti thei nak, hmun le ram, area cio ah zir thei tu in zir, cun mai tlin tawk in kan ram hrang kan tuan cio hi apawi mawh bik.

Lentlang : Tui na dinhmun ah kan miphun hrangah na tuan thei mi le na tuan rero laimi theih kan duh nan?
Pa Thawm : A tui ka umnak ah Swiss daan hnuai ah Association pakhat “Kinder Projekt Burma” 1997 kum ah kadin i Swiss mi pawl thawn kan tuan tlang, cumi Pawlkom ah adin thawk in President in kaum. Cumi pawlkom hmin in Falam le Kalaymyo ah Hngaktah 70 lenglo kan bawm. Cui tlun ah minung 20 lai full-time hnatuantu hlawh nei in kan ret thei.

Cun ram leng um kan Falam peng mi le sa pawl in rawnkhawm aw in 1999 kum ah Lailun Foundation kan din ih cumi ah cun tuini tiang Secretary ka tuan. Hi Lailun Foundation hin ramsung i kan tong, Calai le thansohnak phuphun hrangah hna tampi a tuan rero. Himi hnatuannak ah zocio khal kutkai aw in tuantlang cio ding ih kan duh zet. LF hnatuan mi hrekkhat pawl cu:

  1. Learner Dictionary 2001 thawk in Falam upa pawl thawn kan let rero i mai tong tei Dictionary kanneih thei nak ding kan zuam rero.

  2. Lai thuanthu pawimawh pawl zingzawi nak kantuah i cumi cu cabu i tuah thei kan tum. (Tuahfel zo asi)

  3. Laica ngan zuamnak, Zohthimtlak hrilnak, hlasak thiam le hlaphuah thiambik hrilnak le laksawng peknak, ramsung cakkhai harsat caan i bawmawk nak eg. Inn kang bawmnak etc… tivek pawl ansi.

Himi tarlan bakah tuan rero le ruah rero mi kan miphun le ram i tul pawimawh mi tampi aum. Cupawl tuansuak thei nak dingah sum le pai in siseh ruahnak thatha in siseh hmuntin ummi kan Falam mi zaten tuantlang dingah LF hmin in ka lo sawm duh asi.

Lentlang : Kan miphun in seherh nak ruangah in rak tlawngih lamzin fehnak man teh zo in, ziangmi pawlkom in an lo bawm? Zianghmuah a cem?

Pa Thawm : Pathian zarah ka ratnak man cu keimah ten ka tum awk thei. A cem tam lemlo.

Lentlang : Malaysia na rat nak ihsin kan miphun hrang thathnemnak ziangmi a um ding tin na ruat?
Pa Thawm : Keimah pumpak hrangah ka miphun pi ziangvek in nanum, ziangvek in harsat nak le lungawi nak nan nei ti kara lo hmu thei i tampi ka lungawi. Cuihleiah Refugee thuhla thawn pehpar aw in CARC hotu le CRC hnatuan tu pawl siseh thu tampi kan rel khawm thei ih lamzin thar ong aw vivo hramseh la ti saduh kathat zet.

Lentlang : “Kan miphun hrang hna a tuan nak ah nupi neih a hngilh zo” an lo ti ih thungai a si maw? Cun Lai fala pawl in lawnglai a simaw tin in sut tu an tam hnuaihni ih ziangtinha?
Pa Thawm : Fala (rualpi ) cu ka nei ko. Pathian in rem a ti sile a rei hlan ah a mah Pathian in pumkhat ah in kawm ko ding tin ka ruat. ( A fala thlalak cu KLIA airport ihsin a pawksuak zik lawngah in hmuh, kan khawpawl ti dan cun ” mifa maifa fala hmeltha a si ” Amah lawngte Laifala a sile silo cu kan sut theihhngilh riai.)

Lentlang : Malaysia um kan Laimi pawl hnenah thucah na duh mi?

Pathawm : ZU hman thiam hrihlo mino kantam zet lai i curuangah mino pawl in ZU tello i pawlkom kan zir atul. Zo vek khal Self control & Responsibility neih thei hi abik in cah kaduh. LCF nan cangvaihnak hi faktlak ngaingai asi. Pathian thu i kan hruai awk thiam hi apawi mawh zet. Cun ramdang i um kansi tikah ramdang mi Pawlkom, Kohhran pawl lak i kanva tel lo khal le an mah thawn thaten pehtlaih nak neih thei hi apawi mawh zet.

Lentlang : Hitivek in bangzet le ithmu khawp lo cingten na can tampi in pek mi parah le kan miphun parah duhsaknak thu tampi in sim ruangah kan lungawi.

Pa Thawm : Kei khal ka lungawi.

%d bloggers like this: