Nimthlakau Interview – Salai Ral Kap Tluang

Salai Ral Kap Tluang ( Steven) Profile
Hmin                             : Ral Kap Tluang (Steven)
Suah ni                         : 1979.10.07
Nu le pa                        : Pu Ngun Pum, Nu Ro Lian Cuai
U le nau                        : 5 kan si. Fapa neihsun ka si.
Suahnak khua         : Tingo Khua, Kalay Township, Sagaing Div. Burma
Fimthiamnak          :               a. Phun 10 (1997) tiang Lairawn (Kalay)
b. LLB (Dagon University, Yangon, Burma) 2005
Hnatuan                      : President, Chin Refugee Committee, New Delhi (2011)
Innsungsang            : Single
Hobby                            : Casiar, Bicycle to, Zuknung zoh.
Ambition                     : Politician si ding.

CT: Delhi na thlen daan…ziang tumtahnak thawn Delhi ramcar na pan…?

Ka pa hi 1990 kum Burma hrilawknak ah Lairawn (Kalay) ih Chin National League for Democracy (CNLD) ih Organizer pakhat a rak si. Hih tumah kum 11 mi hrawng ka rak si nan Political Campaign an tuahnak ah ka Pa in in rak hruai ve theu ih cuisin thokin “Ka upat tik le Politician ka tuan ding” timi ruahnak ka neih phah. Cun ka Nu le Pa hi ca siar an rak peih zet tikah ka nauhak lai ihsin Cartoon zuk tete siar ka rak thokih tuisun tiangin Casiar hi ka paihbik mi pakhat ah a hung cang. Cutikah Politic lam ih ka thawtnak hi a thang vivo kan ti pei cu, Phunsang Tlawng (Mandalay, Monywa le Yangon) pawl ih ka kai lai ihsin Politic lam ah ka ti thei tawk in ka rak tel ve theu.

Phunsang Tlawng theh ih innlam ka ra tlun hnuah “Ram sungah cangvaihnak a har tuk, thinlung sungah ah len politics ih thei tawkih cangvaih ka duk tuk fawn, ram leng in cangvaih a remcang sawn ding” tin ram leng ka suaknak a si.

CT: CRC President hna na kaih thok daan?

Delhi ka ra thlen hnu 2009 kum ah khan Dr. Run Bik le Falam hotu dangdang pawlih duhsaknak thawn Falam Union Secretary ka tuan.

2009 September Chin Refugee Committee EC hrilawknak ah Falam palai ah ka rak tel ve. Cunah CRC EC in Vice President ah in rak hril.

2011 February thla ah CRC President hlun ramdang in vaihsan tikah CRC ih daan vekin President ah ka ron kai thoknak a si.

CT: CRC President na tuan hnu ih nan cangvaih daan le New Delhi Laimi pawl hrang ih na theitawk suah ih na tuah that tum daan?

2009 ah Delhi ih Chin Refugee hi 4000 lenglo kan um ih 2011 kum thokah 10,000 lenglo ah kan run thang. 2011 kumcem lam cun 20,000 hrawng kan si men thei.

Delhi ah Chin refugee nitin in kan pung vivo ruangah a hlan vekih kan feh dan kelih feh ringring tum kha cu a ngah nawn lo. Zin thar kan dap ih thil ti dan thar kan pol a cu tuk zo.

Delhi Chin refugee pawlih kan harsatnak le kan zonzaihnak pawl kan cingfel theinak ding ahcun ahmaisabikah “Advocacy and Campaign” kan tuah a tul zet. Ziangruangah tile Refugee thuhla ahcun Advocacy le Campaign hi a thupi tuk ih CRC in a tuan ding thupibik pakhat khal a si.

Curual rual in kan mah le Community sungah cakzetih hma kan lak thei cio a thupi zet ding.

CT: CRC ih hnatuan daan tlangpi le nan cangvaih daan?

CRC hi Community Based Social Organization a si vekin Chin refugee pawl ih hamthatnak ding hrang le Chin refugee thuhla tlangzarhnak ah pawlkom dangdang pawl thawn a cang thei tawk ih tuantlang hi a si bik.

CT: CRC hnatuan ih harsa na tibik mi?

Pawlkom tinah mah le tawk zawn cio ih harsatnak an nei ve cio ko ding ih kan nih CRC hnatuannak lam ahcun mi khua le ram ih um kan Mipi 10000 lenglo riantu kan si tikah kan mah le tawkte cun harsatnak a phunphun kan tong ko. Ahleice in;

1) India hi UN ih 1951 Convention Relating to the Status of Refugee ah le 1967 Protocol ah a tel ve duh lo lawng siloin India daanhrampi in humhimnak ngaingai in pek fawn lo tikah kan mipi pawl harsatnak an tuar tikah duhvek in hmalak a har zet.

2) CRC hi Laimi lak in siseh, foreign donors lak in siseh, sumpai kan ngah mi a tamlo tukih, mi harsa, bom tul zetmi Chin refugees duhvek in kan bawm thei lo.

3) Pawlkom a sinak vekin, Chin hnam CRC sungtel pawl zaten lungrual tiang kan hngakawk a tul ih, a cancan le thutluknak tuah a rei duh theu. Asinan himi cu harsa ti ding ah tla rel tham cu a si tuk lo.

CT: CRC na tuan hlanah The Other Media ah na tuan lawkih mipi hrang ah tamzet hna na tuan ti kan thei cuipawl thuhla cu in sim tha sal hnik hen…?

2009 September thla ah khan The Refugee Desk, the Other Media ah Community Social Worker hna ka rak tuan thok ih 2010 December thla tiang ka rak tuan.

Chin refugee pawl ih harsatnak thu UNHhhhhHCR zung in a cingfel theinak ding hrangah kan zung lam ihsin kan rak tawlrel bawm ih mi tampiin hlawknak an ngah tih ka hmuh tikah ka lung a awi zet. Pathian zangfahnak ruangah a si ko.

CT: Delhi UNHCR, Don Bosco, YMCA etc. pawl ih hnatuan daan le laimi pawl thawn an pehtlaihawk daan tla in ruah hram?

Delhi UNHCR le a Implementing Partners asimi Don Bosco, YMCA le Women Protection Clinic (Women Centre) pawl hin an mah le ti thei tawk ih Chin refugee pawl in riannak parah a hmaisa in lungawi thu sim ka duh hai.

Cun, saduh ka thah zet mi cu UN le IPs pawl hin Refugee pawl in riannak ah a cangthei tawkin mipi tamsawn ih duhdan si in a huap kau theibik ih hmalak tum hai sehla timi hi a si. Cun, ziangkim ah an Dingfelnak hi mithmuh theih si thei sehla ka duh zet fawn.

CT: Ziangruangah New Delhi ihsin ram thumnak feh an mal?

Ziangruangah an mal ti cu UNHCR kan suh a tul ding a bang…. J

Ramdang feh kan tam theinak ding hrang ahcun In kotu ding ram pawl in Delhi ih kan dinhmun fianten in theihpi ih kan hrang sangka an on kau deuh a tul a si bik ko.

CT: Laimi hrang ih na sunmang… ?

Pastor pakhat in Chin miphun thuhla a rak sim theu mi “We live in a forgotten Land, but we are the unforgotten People” timi hi kan theih ringirng dingah ka duh.

Burma ram sung khallih State farahbik si hman nungla Pathian in tul a ti ih a duh tik ahcun Miphun ropibik pakhat ih rel kan hlawh ve thei ko. Cumi dinhmun kan thlen theinak ding ahcun Human Resource kan neih that a thupibik.

India le Thailand tvk ih ram innhnen pawl Chin State feh tlangih Asia Super Highway an tuah ding thu ah kan nih Chin pawl hi zin cek le lei laitu hrang hrawng lawngih kan hlawkpi pang ding hi ka phang zet.

Cun Chin State hi ram nuam le a mawizetmi a sivekin “Eco Tourism” hi kan tuah lar thei le cu can saupi hrangah kan thathnempi ding ka zum. (Pualva tla hmuh ding a um lai men thei.)

Na personal tumtahmi tla in sim lawlaw cih thei awla kan duh?

Politician si ding a si. Ziangruangah tile Leitlun hrang thahnem santlai ih Nun man nei si ding hi ka duhbik mi a si.

Pathian hi kan hrangih a thabikih lamhruaitu a si vekin Pathian pakhat lawng hi ka ruahsannak a si.

CT: June 20, 2011 ni ih nan lamzawh daan le leitlun thuthanglatu pawl theihban tiang nan cangvaih daan kimcang deuh in in ruah aw?

Kei khal lo sim ka hiar zet. June 20, 2011 (Monday) kha World Refugee Day a si. Himi ni ah Delhi ih Chin refugee pawl kan nunnak a him lo zia le kan harsat zia pawl Leitlun pumpi ih simthannak hrangah tiah Chin refugee (3000) hrawng pok suak in Jantar Mantar ah kan himlonak kan va pho langaw.

Himi kan Lamzawh thuhla thawn pehparawin hlawknak a phunphun kan nei.

Copcilh ih kan hmuh mi cu India ih Chin miphun lole Burma ram thuhla a thei fiangtu deuh pawl in “Hitluk ih nan lungrual ih nan pungkhawmawk thei hi cu mangbangza ngaingai a si” an ti. Ti duhnakah Chin miphun hi kan Lung a rual zetih thil ti thei kan si ti kha India le Leitlun theihah kan pho langaw thei.

Cun UNHCR Chief of Mission hnenah kan Lamzawh thu ka hei sim tikah “A lungawi thu le CRC thawi Chin mipi hrang nasazetih hmalak vivo a duh thu in sim cih”.

Ram dangdangih um mi NGO, INGO hotu then khat pawl le Chin miphun hotu thenkhat pawl in thawmvang an rak thei tikah “Nan hmalak dan a ropi tuk” tin in ron lungawipi hai zet.

Atu a rei hlanah Delhi ih um Ram thangso pawl ih Embassy pawl le Ram Hotu pawl hnenah “Lam kan zawhnak san” pawl simfiangih kan hrangih theitawkih hma in laksak dingin nor bet vivo kan tum.

Himi hin Delhi ih Chin refugee pawl hrangah Ruahsannak thar a thlenter ka zum zet.

CT: UNHCR in teh an lo ngaih sak tha pam maw?

Hih thusuhnak thawn pehparawin a tlangpi thu cun;

1) UNCHR ahhin staff an mal ruangah maw ka thei lo, harsatnak kan ton caanah duhvek hin in bawm lohli thei lo theu.

2) Decicion-making process ah kan tel tam lo tuk

3) Africa ram leh ram dang ih UNCHR staff pawl cu an mah le refugee communities pawl thawn relationship tha ten an nei, cuvek cu Delhi ah kan hmu hrih lo. Hmalak ding tampi kan nei lai.

4) Laimi hi nan lungrual lotuk timi thupuhnak hi a diknak tla a um. Hivekih phuahlam an neihlo nak dingah kan lungrual thok tla a tul. Cuhnuah an mah UNCHR pawl hnen ah confidence nei zet in thu kan sim ve thei ding

5) UNCHR le India cozah pehtlaihawknak lam hi ziangvek ciah a si ti theih a har. Ziangruangah tile Laimi lak ihsin UNCHR zungih dinhmun sang kai ban kan um lo tikah, a tlun lam ih thil um dan ziang hman kan thei lo can a tam.

6) UNHCR staff tam zet hi human rights leh refugee rights training kai theh hai sehla cu kan mah refugee communities hrangah a tangkai zet ding ka zum.

CT: Chin refugee pawl hi Refugee ngaingai siloin Harsatnak/Farahnak ruangih Delhi ra thleng an si timi mi then khatih an rel mi hi ziangtin na hmuh daan in sim thei pei maw?

Himi hi a dik lo mi puhnak a si. UNHCR ih thufim pakhat ah “Refugee si ding hi zohman ih duh hril mi a silo” an ti vekin “Refugee sinak kan dil duhmi hi Refugee kan si cia zo ruangah a si” sawn. Kawlram Ralkap cozah ih “One race, one language, one religion” timi ih ruangah a hleice in Chin miphun pawl hi hrem le vuak velh a phunphun kan tuar. Culawng siloin kum 50 lenglo Ralkap uknak hnuaiih palbeh le hrem kan rak si tikah kan Nuhrin Covo in siatsuah sak hman theiaw loin kan rak tuar cuahco. Kan ram ah Zalennak dik kan ngah hlan sung ahcun himi buainak hi a reh dah cuanglo ding.

Curuangah kan khua le ram ah tlungsal ding si ta bang sehla zohman hin kan him ding a si tiih za ah za aamahkhan thei tu ding kan nei lo ih ruangah ram pakhat khat ih Humhimnak kan dil ding cu kan hrangah loh theih loh thil thu a si.

CT: Delhi hi Resettlement nan feh hlanih colh sungnak (transit point) ah lawng nan ruat tivek ih an rel mi teh?

Himi khal hi thu lolak puhawknak men a si. Delhi ih Chin refugee hrang third country resettlement in kawh ciamco lo cingin Chin Refugee a ni telin kan pung vivo zoh tikah Kawlram ah Ralkap acozah a si sung ahcun Refugee sinak dil hi a reh menmen lo ding.

CT: Tulai fang teah Leitlun ah Chin Refugee ziangzat hrawng kan um ke?

Cazin hi fiangfai ten theih a silo nan New Delhi ah 10,000 leng hrawng, North East India (Mizoram, Manipur tvk ) lamah 80,000-100,000  hrawng le Malaysia ah hin 50,000 hrawng kan si men ding.

CT: Ziangruangah Chin refugee kan pung ciamco a si pei?

A tlangpi thu in;

1) Kawl ralkap acozah in Chin state ih Ralkap a sopso ciamco ruangah mipi pawl zonzai tuk celh nawn lo ih tlan. (Militarization ruangah kan ti pei cu.)

2) Ralkap ih tuan hrimter tumnak ruangih ra tlan. (Force Recruitment)

3) 2008 Mautam ruangih harsatnak a phunphun tong rero zotu pawl kha bom thei dan ding tawlrelsak ih hnekin a phunphun ih phurit phurh bet celh nawn lo ih tlan.

4) North East India (Mizoram, Manipur tvk) ih um Chin refugee pawl himlonak a phunphun ruangah um ngam nawn loin Delhi ih ra tlan.

CT: Kan ramah Acozah thar a ding thlang si khawh himi hin Chin refugee pawl hrang ziangtlukin hmuar a neih na zum?

A si ko. Kan ramah athu cun Mipi ih thlantlinmi acozah tiaw mi a ding ngai. Asinan, himi acozah thar hi Leitlun pumpi ih an co hlangmi acozah a silo. Cun President thar U Thein Sein in President thar thusimnak ah National Reconciliation lam a thupit thu a sim. Cutiih a sim theh thla 6 hnu lam cun Mipi acozah thar tiawmi cun Tlangparmi le tainyintha dang pawl asi mi Kachin, Karen, Shan tivek pawl thah cimit tum ko ih a kah ciamco kan hmu thei. Atu vekih Ramsung ralpi (Civil War) a hliau alh ter vivo lawng siloin Tlangparmi nunau tampi duhlo cingin an pawngsual vivo bet fawn. Himi ralpi ruangah kan unau Kachin miphun 20000 lenglo raltlan in China ramri ah an relh rero zo. Hitivekih ram le mipi zawn ruat ngaingai lotu Ralkap milai Acozah a ding sung ahcun Chin refugee khal mal lam ih hnekin kan pungkarh vivo ding zum a um.

CT: Delhi ih Chin refugee pawl ih nan harsatnak le dinhmun tawiten in simfiang thei pei maw?

Aw.. simfiang thei tuk e.. Tulaifang te cu Delhi ih Chin refugee pawl lakih larzetmi tongfim pakhat a um.. cucu “Thih tih ah Delhi ka ra tlan. Asinan Delhi ahcun thih ka cak zet” timi hi a si.

CT: India acozah in Chin Refugee pawl a lo zohkhen dan thuthawn pehparawin sim duh mi na nei maw?

A si ko. A hmaisabik ah Chin refugee pawl in cohlan ruangah India acozah parah le a ram mipi pawl parah lungawinak simcawk lo kan nei. Asinan, India acozah ih Refugee pawl hrang hmalaknak lam ah cun riahsiat za in mal kan ti zet. A hleice in Refugee pawl hrangah Foreigner Regional Registration Office ih Residential Permit (India ih um siannak) ca cu Tourist pawl vekih tangka tampi cemih in tuahter hrim hi cu a poi ka ti zet. Rawl ei ding hman khopkham ih neilo refugee pawl himi PR tuahnak hrangah paisa an duhduh zat in dil tik ahcun a tuah thei lo kan tam sawn ih thin bangnak ngaingai a si.

CT: Cun, New Delhi laimi pawlih tulbikmi thil hi ziang a si pei?

Humhimnak kan tul bik. Community pakhat in 2011 kum tir thla 3 hrawngih police case an file mi case 15 hrawng cu India palik pawl in zianghman in tawlrel sak lo lawng hman si loin case then khat tla cu an hupphen hrim a bang ti ding khop in in ngaihsak lo.

Himi ruangah Delhi ih vai pawl in Chin refugee pawl cu duhduh ih tuahmawh a ngah timi lungput an neih phah thluh a si in kan thei ih ni tin ten tihphang le mangbang in kan khawsa.

CT: Kan rak theih dan ah Zaan Bazaarih vai pawl ih an hlon mi hanghnah hangrah tawt pawl tla nan sarih nan ei theu ti mi teh?

Si tuk maw le… Chin refugee tam sawn hi nuntukhawsaknak lam ah hmuhsuam nautat a phunphun tuarih hlawhawih pumcawm aw kan si tikah duhvekin ei le inn ding lei thei loin Zaan Bazaar ah Vai pawl in hnawm lakih an hlon mi hanghnah hangrah tawt pawl sar in kan nung thei ceu a si.

Tunai te sinsin cun an mah kiangkap um vai pawl in an hlonmi thinghnah parah zun leh ek an thawh, cumi rori kan Chin mipi pawl in an va sar theu ih, thin a na ngai ngai.

Cun nu pawl hrangah le zanlai bazaar tiak hnu ih hanghnah hangrah tot pawl sar asi tikah a phunphun in hmuhsuam leh tonsual ton a awl zet fawn.

CT: New Delhi laimi pawl biaknak lam ih an dinhmun in ruah bet aw?

Delhi ah tui kum 2011 tiang Chin Kawhhran le Fellowship (30) lenglo kan um zo.

CT: Kawhhran lamah tla na tuan phah ti kan thei ih in sim thei pei maw?

A si ngai. 2010 kum ihsin Delhi Burmese Christian Fellowship (DBCF) ah Deacon ka tuan thok ih April 2010 ihsin tui ni tiang Secretary hna ka tuan. Atu hi member – 800 hrawng kan si.

CT: Na nauhak nawnlo ih pangpar mawi khiah ding tivek na zuat zo maw?

2009 ih kum 30 ka kim hnu ka kum ka siar nawn loih… Ka hawl lai..

CT: Na hrangah nun timi ih sullam ziang a si?

Sim a va har ve… Mi dang hrangih thiltha tuahtu pawl hi nun man nei pawl an si ka ti.

Ka nauhak lai ah ka rak sim theu mi cu “Minung kan si vekin ni ni khatkhat ahcun kan thi ding nan kan hmin a thih lo ding hi a thupi”. Thenkhat cu nung cingih hmin thi zo pawl an um laiah thenkhat cu thih hnu tiangih hmin thi lo pawl an um lala. Ka sim duh mi cu hmin ngahnak men ah thil kan tuah ding asilo nan thil kan tuahmi ah hmin ngah bantu si ding ih zuam ding hi a si. Curuangah ka hrangah Nun timi hi mi hrangah a si.

CT: Mi va bawm ih a hlawknak le mi hrangih nun ih a hlawknak in sim ta?

Thin a nuam. Nun man a hla.

CT: Kan hngilh leuleu I ngaithiam aw…Mai Sokhlei Par khi na u ti kan thei. Asinan, hminsau deuh kan pek thu na nulepa hnenah in sim sak awla, Nunthuleng lalnu tiah hmin kan pe…A nunthuleng teh na rak siarsak ve maw?

CT Team pawl cingcing nan ti kim thei tuk aw….A si ngai. Mai Sokhlei Par hi ka u upabik a si. CT in Nunthuleng Lalnu tiah hmin nan pek mi cu ka lungawipi ve zet. Ziangah tile ka u Mai Sokhlei Par hi Calai hrangih Nung a si tin ka hmu ve.

Minung lakih ka uarbik pawl cu Thil tha lamih Thil Pakhat khat Nun pi ih Thih pi ngam tu pawl an si.

A nunthuleng ka rak siar ve theu ih a thangso zetih ka hmuh mi cu TongKoseh lam ah a si. Tahan ih seilian a si ve tikah Falam tong khun le tong koseh pawl hi kan thei tuk lo nan ka zum ban hnakin a run ngan suak tam zetih ka mangbang deuh ko.

Cun, a nunthuleng “Ka Lo Duh” hi Phunsang Tlawng ka theh pek teih kan inn ih a ngan mi a si ih kei tla ziangmaw cin cu ka rak theihpi ve tikah Nun thuleng ngan hi a rak ol lo zet.

CT: Mai Sokhlei Par thawn cabuai khat ih nan rawl kiltlang nak a rei thlang maw?

2007 kum ihsin a si ko.

CT: A hrimhrim in Laimi pawl innpi CT teh hi a thupten na rak bih theu maw?

CT hi nan ti tha zet. CT hi Chinmi ih Website kan neih hmaisabik lam a si ka zum. A hleice a tawlreltu pawl ka lo upat zet fawn. Tulaifang te ahcun Calai lamah nasazetin tan nan la ih Chin calai a thangso phah zet in ka hmu.

CT: Leitlun Chinmi pawl hrang cah duhmi na nei maw..?

Pathian thu ah um uh si.

Chin tong in tong uh si.

Chin Ram dinsaltu ding kan si ti thei aw uh si.

Fimthiamnak lamah a sang theibik ih kai tum uh si.

Ka pa ih thucah lo hlawm ve ka duh. “Khuitawk na feh ih na um tik khallah Mi hrang thathnem santlai na si thei lo hmanah mi hnoksak cu va si hrimhrim hlah aw” timi hi a si.

CT: Lo pehtlaihnak..?

WZ-37, Budella
Vikaspuri, New Delhi-110018
Mb- +91 88 00 14 90 55
Email:    steventluang@yahoo.com

%d bloggers like this: