Hlasak Thiam – Salai Lal Siang Awng

Profile:
Hmin               : Salai Lal Siang Awng (Sianga)
Suah ni            : 3 Dec. 1981
Suahnak khua  : Cerhmun, Falam Township
Nu le pa           : Rev. Dr. Lal Tin Hre & Nu Sen Hno Kai
Unau               : 4
Qualifications  : M.Th.
Hnatuan          : Lecturer
Umnak             : Sanchaung, Yangon.

1. Laimi lakih hlaphuahtu hminthang pakhat na si ih ziangtin hla na rak phuah thok? Thinlung lamih thu ngai deuhih thamtu ka rak neih ve kum 2005 ihsin hla ka phuah thok. Na hlaphuah mi zaten fing ziat a si zo? Ziangvek hla style na phuah tambik? A saktu teh zopawl an si?

A um hnuaihni. A zat ciah cu ka thei nawn lo. Record zo mi lawng te hla 15 hrawng an si. Slow lam ka phuah tambik. A saktu pawl cu: Salai Khaw Tin Uk (Kunrirak), Salai Cung San Awng (Cung Awng), Salai David Lal Ceu, Salai Zarte, Salai Thang Thang, Mai Lal Rin Kim (Makim) le Mai Za Nuam Sin (Susan) an si.

3. Pathian hla teh fing ziat na phuah zo? Zopawl in an sak?

Ka fel tawk lo a si ding ka phuah zat ciah ka thei lo. C2M2 – ah Mai Van Siang Men in hlakhat cu a sak. A dang cu Salai Zante le thawn suah kan tum lawng a si lai.

4. Pathian hla na phuah ding tikah ziangvekin timlamawknak na rak nei theu?

Pathian malsawm pek mi pakhatah ka ngai. Timlamawknak hranpa um lawn a tul dan vekin a ra cang suak ve mai theu.

5. A nung mi Pathian hla hi ziangruangah a sibik tin na ruat?

A nung mi Pathianih pek mi a si ruangah a nung tin ka ruat.

6. Na hlaphuah mi hi nangmah in teh na sak tum maw?

Tum ti lawng tla cu…vei tampi ka sak ve zo. Amah lawng te record ding cun a cang thei hrih lo a si hi. He.he..he..

7. Na hla phuah mi lakih na duh hleice mi teh a um maw?

Aw, um ve e. Mai Lal Rin Kim (Makim) ih in sak sak mi “Rin Um Ten” ti cassette ih “A Tha Ko” ti kha a si. Ziangah saw? Aw…beiseinak nung nei thei dingih thazang peknak a si ruangah. Ka phuah lai khalah keimah le keimah nasa takin thazang ka pe aw ve.

8. Lovesong hla ngai, sak le phuah siang lo le ngaineptu pawl hi ziangtin na hmu?

Lovesong hla ngai, sak le phuah siang lo tu pawl hi khatlamah an mawh lonak zawn a um thei awme. Ziangahtilen tu laiah zahmawh rawngkai le setan hla ti vek tiang a um phahphah. Amah lawng te lovesong pangai ngai, sak le phuah an sian cuang lo a si ah cun an luar tuk deuh tin ka ruat. Cun, lovesong hi hate song a si lo ti khal an theih bet tha in ka thei. Khatlamah an ngainep ti cun ka ruat siang lo. Leitlunin a tul mi bik duhdawtnak ngaingai hi an tep hrih lo a si sawn ding tin ka hmu. Thungai thlakin vun tep ve hai sehla cu a tulnak an thei ve ko ding.

9. Na nu le pa in teh lovesong hla phuah hi tha an lo pe ko maw?

Vei khat te hman in sawisel dah lo. Ka hla pawl uluk takin in ngai sak sawn theu. Tha in pe zetah ka ngai.

10. ‘Ka Duat Boihte’ hi mipi in kan lo theih tamnak na master piece a si tin lo ti sehla na el duh maw? Khai hla phuahsuak dingih a lo motivate-tu teh in theiter siang kem?

In ti ngai a si len, in ti mi ka el cun misual ka si pang ding. Hi hla phuahsuak thei dingih in motivate tu bikih ka theih cu 2005 kum hrawngih nasa takih ka thinlung i thamtu Bawihte ruangah a si in ka ngai.

11. Hla fing khat phuahsuak dingin ziangpawl an tul tin na ruat?

Mi vekin hlaphuah dan ka zir lo tikah, kei cun hmanrua (Material) tha tawk tak a um tul in ka thei.

12. Fial ruangih phuahsak mi hla teh a um theu maw? A um theu a si le mai ir-awmsuak phuah thawn ziangsi a danglamnak?


In duhdawttu ka nulepa 

Um phah theu. Ir-awmsuak cu sunglamih a um cia mi ngan suah a si vek laiah mi phuah fial mi cu polih tuah cawp hlri an si. A danglam aw zet.

13. Ziangvek can ah hla phuah hi nuam na tibik theu?

Thinlungah rit thetthet ih ka pai mi phuah suah can hi nuam ka ti bik. Zing, sun le zan ti lam hnakin ziang tik lai can khal a si thei.

14. Hla na phuah tikah a thluk maw a hlafang na phuah hmaisa?

Cui zawng te cu keiah cun a bangaw lo nasa. A thluk a um hmaisat can a um vekin a hlafang tla a um hmaisa ve theu.

15. Laihla na phuah tikah tongfang kan nei mal tuk tin na ruah can a um theu maw? Cui harsatnak cu ziangtin na paltlang theu?

Ruah can ka nei lo. Laimi hin tongfang tamtak kan rak nei ka ti duh. Tongfang thuhla ih harsat ka tawn theu khal hi mai mumal lo le ziangzawi mal ruagah si in ka ngai. Bible (a bik takin Solomon hla pawl) le cabu dang (lai pupa tong thawi pehpar aw mi deuh) tla siar in ka harsatnak cu ka paltlang theu.

16. Na hlaphuah mi ah na duhzawng le mipi duhzawng hi a tongaw theu ko maw?

Ka hlaphuah mi hmuahhmuah hi ka duh theh ruangah mipi duhzawng thawn a tongaw ko in ka thei.

17. Hla na phuah tikah ziangvek harsatnak na rak tong theu?

Harsatnak ka tawng theu ngai. Phunhnih in ka rel duh. 1) Duh vekih Music lam ka thiam tuk lo ruangah. 2) Mai duhdan lawng si lo in mipi in teh ziangtin an ruat ve ding tiih thu tampi ka ruah ruangah.

18. ‘Ka duat Bawihte,’ ti ih kawh ding teh na nei zo maw?

Ka rak kawh tum dah mi kha len a rem thei nawn si lo, duat takih vun kawh ding cu a cak um male…he.he.he..Tu fang cu an um hrih lo a si hi! Bawihte tiih ka kawh ding duh tla an um len cu ziang tik lai khalah in sim thei. Just joking!!!

19. A lawnglaknak hmun lo phuhruksaktu dingah ziangvek fala si a tul ding?

Ka duh a khung lem lo a lawnglaknak hmun tiih in suh mi in phuhruksak theitu cu a tha bik ko ding.

20. Na koppi ding thu ah thluak ih ruahnak maw lungthin ih feel mi kha nehnak na coter ding?

Lungthin ti cu lung le thin ti tlukin ka ruat. Ruahnak pakhat lawng ai cun Presbyterian pa takin lungthin ih feel mi cu nehnak ka co ter ko ding.

21. Artist pakhat hrangah tuarnak hi a sersiam mi art nungtertu a si an ti mi parah ziangtin na rel duh ve?

A dik zetin ka ruat. Amah lawng te a tuarnak ruangih a sersiam mi nung cu thatnak lamah si hram sehla a duh um zet ding.

22. Ramsung le ramleng ah na uar mi hlaphuahthiam hi zopawl an si?

Ramsung: Ke E Ti le Moe Min Aung. Ramleng: Russell Willis, Marti Frederiksen le Aerosmith pawl hi ka uar hleice.

23. Kan Laimi hlaphuahtu ah teh zosi na uar hai?

Salai Sun Ceu le Sayama Nu Eng.

24. Laimi lakah quality nei takih hlaphuahtu suak thar tampi an um theinak dingah ziang a tul?

Quality nei takih hlaphuahtu suak thar tampi an um theinak dingah cun zirnak, hla ngai tam, ca siar tam pawl hi nasa zetih kan tul mi si in ka ruat.

25. Tui kan Lai music dinhmun teh hi na diriam ko maw? Kan music quality a that vivo theinak dingah ziangpawl a tul tin na ruat?

Kan tlin tawk ten kan zuam cio ih ka di a riam zet ko. Amah lawngte hmabak tampi kan nei lai ti khal thei hngilh lo sehla. Kan music quality a that vivo theinak ding cun zirnak, zuamnak le duh ngaingainak kan tul in ka thei. Duhnak ngaingai a um lawngah zuam paihnak a ra, cui zuamnak cun mipakhat cu quality neitu dik takah a sersuah.

26. Falam Pawlpi Mino Yangon ah Secretary na tuan ti kan thei ih FPMY hin miphun hrangah ziangvekin cangvaihnak le tumtah mi nan nei?

FPMY cun thla hnih danah Talk le Fellowship hmang tlangin cangvaihnak kan nei. Cu lo outing ti vek le thil dang tul mi tete cu EC Meeting in a tikcu can zirin a rel khawm theu. Tumtahmi pawl cu: Calai le nungphung kilkhawiih cawisan, Ram le miphun thangso dingih zuam, lai mino a hleice in Falam mino pawl mah le mah nei (thi) aw thei dingih zuampi, phun le hnam hlo pawl hruaikir thei zuam, mino lakih milar, thiam hleice le zohthimtlak pawl sunlawih, pakhat le pakhat theithiamaw le nelaw thei dingin pawlkhawmawknak tha neih thei zuam, le biaknak, pawmdan le zumdan bangawlo hmanseh phun le hnam ih pumkhat si thei zuam ti tla in an si.

27. Lai tlangval lakah zohthimtlak pakhat na si tin kan lo hmu ih, mino pakhat felfai tei a pitlin theinak dingah ziang a tul tin na ruat?

Ai! Cu law mam e. Si, in sut tak zarah cun hi tin, mino felfai tei a pitlin theinak ding lamzin tampi um mi lakih sin a thupi bik dingih ka ruah mi, phunthumin ruahnak ka pe duh: 1) Pathian tihzah 2) A ti ding le tumtah mi theih fiang 3) Sinak lawng duh tuk lo in a sinak zawngah hmantlak le sawrtlak si dingih zuam hi a tul mi si in ka ruat.

28. Mino pakhat na si nan Bible tlawng hmun thum laiah lecturer na tuan ti tla kan rak thei; minopawl in professional job an ngah theinak dingah ziangvekin ruahnak na hlawm thei ding?

Si, a tlunih kan sim zo vekin ruahnak ka pek bet duh mi cu kan sinak zawn ciarah hmantlak le sawrtlak si kan tum ding. Culawngah, professional job cu kan mino pawlin an ngah thei ding. Hi tin question vun nei sehla, “Thei/thiam men tu si maw hman mi si na duh?”

29. Hmailam hrangih na sunmangpawl teh in hlawm siang kem?

Hlawm siang tuk. Ka sunmang pawl cu: Pathian ram a karhzai sinsin theinak ding, ram le miphun hrangih a hlawhtling mi composer leh lecturer si.

30. Sim duh mi na neih lai le…

Si, ruahban lo pin CT in interview in neiih ka lung a awi zet. Ram le miphun hrangih nan zuam, nan tuah le tuan mi hi Pathian theih pi mi a si vekin Ama’n lam lo hruai vivo hram seh. Nan hrangih thathnemnak zawngte tla ka rak nei ve pang a si len ziang tik lai can khalah lo bawm ding ka man ringring. Laimi hrang rin um zetih hnatuantu CT sun tel hmuahhmuah le hi group mail a hmangtu nan zaten, Pathianih pek mi mai talents ciar hmangin laimi phun hrang tan la sin sin in zuam cio uh si. Ka lung awi.

31. Nangmah thawi pehtlaihawk theidan lamzin in khihhmuh siang le…

Salai Lal Siang Awng
H.No. 18/6-A, Shwe La Win Street,
Sanchaung, Yangon, Myanmar.
Ph. 9501 – 500559
Email – lsajthriteen@gmail.com

%d bloggers like this: