Biaknak Lam – Rev. Dr. Lal Nei Kam

CT 1. Sayapa zaangfahten na suahkehnak le na innsungsang thu in sim hmaisa thei pei maw?

# LNK; Sim thei e, nan duhtak hmanah, ka lung a awi: Ka pa cu No Bawi (Tuallawt- Haimual khua) a siih, Ka nu cu Ngen Nei (Vuite- Thipcang khua) an si. Sekan (Cekan) an vaih hnu ah ka suak (12.2.1950, on sunday). Ka pa cun 1964 ka kum 14 ah in thihsan. Ka nu in, Pathian zangfahnak in in dampi lai, kum 86. Unau 6 lakah upabik ka si. Mipa 4, nunau 2 kan siih, Sekan, Tahan, Lunglei le Farkawn ah le keihi nupi fate thawn Yangon ah 1992 ihsin kan um.

Ka nupi cu a tikcu laiih Sekan falafel pakhat Lal Biak Vel (Nubiak-Ceenhrang) d/o Hrang Sum & Vai Lian Zing a si. Pathian in thlasuah pek induh ruangah nupi fel in pek. Kan fale tla an hrangih thabik ding nupi/pasal a pek ciar. November 4, 1969 ah Methodist Church, Sekan ah Lay Pastor Than Sai Lo, ih kutsihnak in kan nei aw.

Kan fale pawl cu: fapa upabik 1) Lal Ruat Kim in, in thihsan zo, fapa 1 Van Hre Mang a nei, Kualalampur ah a um. Kum 18. (2) No Hlei Hai @Than Htwe B.Th. MRE (a pasal Rev. Dr. Thawng Hlei Vum) a tu ah kum 39, fapa 4 thawn Insein, Yangon ah an um. 3).Thawm Hnin Thang (a nupi Ni-te) a tu kum 32, fate 2 thawn Bangkok ihsin Malay ah an um. 4) Tial Khal Thang. B.Th.(JMBC-Chennai), M.Div. (a nupi Maahming) a tu ah kum 30, S Korea ihsin Switzerland ah an um.

CT 2. Na tlawngkai cazirnak lamteh?
# LNK: Phunhrek ihsin phun 10 tiang cu: Sekan, Thing U Nau SDA Middle School, ICB Middle English School Tahan, SMS Zongte-Falam, No. (1) SHS Kalemyo, No.(1) SHS Falam (1972-3), 1975 Yangon ah U Aung Theing Han ih, “Waraying Nay-piah” tution ah phun 10 ka kai ih-  B. list assed (1976 Kalemyo). B.list passed (1977 Kalemyo, A- list passed (1978 Falam). # B.A. (Philosophy) 1982 RASU. University Correspondence Course, DUC hlan). # B.D. 1988-1992 UBS (Union Biblical seminary) Pune, Maharastra State, India. # M.Div. 1996 MCTS, Yangon. # D.Min. 2006 Union Theological seminary of Philippine Christian University (UTS-PCU). Dissertation Topic: “Motivating Myanmar Christians to Pray for Moral Recovery”. # March 4, 2007 Tamu ah LBA (Lairawn Baptist Association) in an thuruah thiamnak ruangah Special Ordination in pek.

CT 3. Hnatuannak lamteh, khuiah ziang hna na tuan dah?
# LNK: Hlawhneiih hna ka tuan thok kum 1973 June ihsin tuinitiang kum 38 sung ka zohsal tikah; 1.Cazirh,

2. Pathian thusim,

3. Calai lam hnatuan an si bik.
– Ta-mah Fanghum leinak “Kudawng” ah “Ta-lee Cazi”  thla  6.
– Tlawng Saya ….kum 13
-Calai hnatuan ….kum 2
– Pastor……. kum 2 le hrek
– Bible Tlawng Saya (yangon) kum 14
– Bible tlawngkai sung kum  9.

CT 4. Calai hnatuannak hi malte tal in sim fiang thei pei maw?
# LNK: A tawinak in sim sehla; B.A. ka theh ih hnakum 1983 ah “Zoeng bi-weekly News Magazine, Aizawl ih an thok pek kumah Circulation Manager ka tuan. Himi ihsin Calai lam hnatuan ka zir thok. A hnakum 1984 ah Sekan-Tahan ihsin “Hruaitu Magazine (monthly) A-4 size a laibilin pages 22, thla 7 (April – Octrober 1984) kan suah. Cyclo- style ih her a si. A cover lawng Press ah kan nam. Copy 500 ihsin 900 tiang a karh zai. Uk khat Ks. 2/- a si. Falam khawpi ah copy 600, Kalemyo t/s ah copy 300 kan zem darh.Editor & Publisher ka tuan. Affiliated Middle School- Sekan ah “Ta-uan-khaan Saya” tuanphah in ka ceem. Ka baang nan nuam ka ti zet. A cover parih address ah Dr. Za Hlei Thang le U Thang Kyi. LL.B. hmin kan hmang ih in thathnempi
zet.Sekan khua ihsin Tahan, U Thang Kyi inn ah binding le zemdarh hna ka va tuan. Dr. Than Bil Luai, Pu Thang Thuan (Late- Than lalhlun), Pu Dar Lian Sel (Late- Presbyterian), le Rev.Dr. Rem lal Lian in tla phun dang in in bawm hai ih an par ah ka lung a awi ngaingai.

CT 5. Ziangruangah nan suah peh vivo lo?
# LNK:  Mipi in an siar duh zet nan kan rak suahpeh theilo kha tutiangin poi ka ti. A san cu; A man hi a ciiplaap in a lut ih kan ngah kim thei fawn lo. Asuahnak lamah cun paisa a hlawm in cem a tul fawn ih sumpailam ah ka tlin aw nawn lo. Mi paisa cawi ding tla ka rak ngam lo. Kan nu ih zunghruk pakhat le kan innsang hrang kumkhat ei fanghum kan “saih” hnu ah kan colh san. Kan colh hnu thlakhat ah Tahan ih Laimi unau dang lak ihsin Myo-ne thuneitu hnenah heknak ca (miphun lungruallo nak tiin) a thleng ih, suah nawnlo dingin in dawn.

CT 6. Miphun le ram hrang thansonak duhtu le tuantu pakhat na rak sinak parah kan lung a awi ngaingai. Mi tampi in kan rak thei lo. Cuvek lam thildang tuah mi, na nei maw?
# LNK: Pathian lamhruainak in 1981 kumah Sekan ah le 1985 kumah Zotlang (Minhla-tithim) khua ah Affiliated Middle School tuah thei dingin Kalemyo TEO, U Nyan Myint Maung hnenah mah bulpak thuhla tul vekin ka leng rero ih ka dil ngah. Tahan ih Sui Sel ka sawm ih in leenpi. Tuinitiang khaw 2 ah an thathnempi ti ka theih tikah ka lung a awi ngaingai. Bangman ka nei in ka thei aw. Cu-cu ka rel ve thei sun a si.

CT 7. Cucu kan peng le miphun hrangih thilthatuk tawlrelsuaktu tulai tongih founder na rak si ziar si, kan miphun aiawh in lungawi thu kan lo sim. Saya Nang hi kum upat hnu ih cazir le cazirhtu pakhat a si tiin kan lo thei. Pathian thu duhzettu a si tiin tla kan lo theih dan a siih, Bible tlawng le Kawhhran lam tla na din lo maw?
# LNK:Thil tha zet pakhat a si. Duhsakih forhfialtu tla ka nei theu nan tumtahnak ngaingai ka nei lo. Ka ralthatnak le felnakin a tlinlo. Kawhhran din dinghin vei 2 sawmtu ka nei. Cun Bible tlawng din ding thuhla vei 2 a um nan, Pathian vo zemlo a si ding a pelhsolh ta. Asinan, Pathian thusim, zirh , ngan, siar le ngai cu ka nomawknak bik pakhat a si. Himi in lungawinak thup in neih ter  theu.

CT 8. Kan Laimi kawhran le mipi hruaitu pawl hi ziangtin na hmu? Remthat tul le dem deuhnak na nei  maw?
# LNK: Kan hruaitu pawl hi pacangtha, mifel, rinsan tlak, mi ngaihsak theizet an si. Milai cu zohman famkim cu a um aw lo ih a tam sawn cu tangdor le biaknuam zet an si. Culakah pahnihkhat cu mahte ret sangawktuk hmang khal cu an um ko ding ka zum. Cumi khi zapi hrangah poi ka ti mi a si. Mahte porhawknak cu Pathian ih huat bikmi a si. Cuitlunah siatralnak le tumsuknak a siih Pathian hnen ihsin a ra mi a si lo. Isaiah 14:12-15;Thufim 16:18;1 John 2:16.

CT 9. Mahte porhawknak cu tih a nung tuk ual. Pathian thu hiteh vei deuhmi na nei maw?
# LNK: Matthai 22: 37 Pathian duhdawt ding thu thawn peh aw in, kan Pathian hi zovek, ziangvek Pathian a si ti, ka thinlungah a um bik hmang ka ti. Hitin ka sim duh: Kan Pathian cu rundamtu Pathian ti lawng siloin, ziang hmuahhmuah sersiam ih umtertu- a umcia khal
umloter theitu, thiter-nungtertu, na ter-damter theitu, Nehtertu-sungtertu, fimter-aa tertu, sualnak ngaidamtu- thuthentu, liamnter-farahtertu, hlawhtlingter- tlasamtertu, thlasuahnak petu-camsiatnak thlengtertu, thiltha thlentertu-harsatnak thlentertu, nun sauter- tawitertu, ziang hmuahhmuah kilkhawiih cawmtu, remruatih khawkhaangtu, mitih hmuh theilo kutih tham theilo sihmansehla, anungmi, a ummi,a hmaisabik le a netabik, huham le cahnak
sangbik neitu vandumkulh khawhra vanhnuai ah a mahvek Pathian dang an um lo.

In duhdawtbiktu le kan zawn in ruatbiktu Pathian pakhat um sun a si ruangah upat tihzah rinsan nak thawn, zumih biak ding le thangthatih, ahnenah lungwi thu sim ringringnak ding, zianghmuahhmuah theitu le neitu, hmunkipih um Pathian nung a si. Cui Pathian cu “Ka theih a tul lo, ka thei duh lo” a ti ngam an um ding maw? An rak um hman ah nang le kei cun ka ti lo pei, ti-ah ka sawm aw duh. A lungawitertu sii ding kan zuam ding a tul.. (Thusimtu 2:26; Rom 12:1) Hi thu hi milunglut dingin, theifiangih zumhngetter thei dingah- thusimnakah si seh, thu zirhnak ah si seh, theihter ding hi ka lungthlitum, ka nunpi duhmi a si.

CT 10. A tha tuk, Pathian siinak tawi famkim zetin in sim. Hivekih Pathian na duhnak le theihnak hi khui ihsin, ziangtin a ra thok?
# LNK: Sim ka duhzetmi pakhat a si ve. Milai cu ma’i thuhla hi, miin ngai an paih maw, paih lo, ti khal thlir thiamlo in rel rero kan duh theu. Mi zapi dan deuh a rak si hmang ding! Pathian zaangfahnak in A hnenah hngilhtheilomi lungawinak vei 3 ka nei:

(1). Kum 16 ka si lai, ramlak ih cawhal ka khalh lai ah mahte thla ka cam lai ah Rundamnak in pek.

(2). 1991 January 13, kum 41, Union of Biblical Seminary (UBS), Pune, Maharastra State, India ah Bible tlawng ka kai laiah Howrah Station, Culcutta, Plateform no. 11, Gitanjalee Express (Culcutta to Bombay) ka bawh lai ah mangbangza Pathianih tongthamnak (God’s Touch) ka tong. “Tlang thawveng ih cawl vekin ka um, Thlilakih arhmul zuang vekin ka zaang viarviar. Lungawinak le hnangamnak in ka khat. Tih le phaanmi ziang hman ka nei lo.” Cui thu cu English in, Article ka ngan.Tuini tiang ka thlarau nun i caktertu bik, hmuhtonnak a si. Kum 20 lai a reizo nan, ka hngilh thei lo.

(3). Kum 2005 November, ka kum 55 ah Manila, Philippines ah Doctor of Ministry degree ngahnak ding dissertation (thesis) defence ka tuah theh ni ah zamrangzetin ka rilte ah “foodpoison” a cangih major operation (6 hrs.) tuahnak ihsin thih ka luat. Pathianin nunter hrih duhnak i nei a si ti ka theiih ka lung a awi, Pathian ka thangthat. Cumi thu pawl hin, Pathian in naihter, in duhter sinih a hnatuan in nuamtet.

CT 11. Cuticu, Pathian zumhngettu, Pathian mihman na rak si-si, kan lo thei cu kan lung a awi.
# LNK: Keimah ka lung a awi sawn. Pathian zumhnget zetah in ruat ding nan keimah cu nitin thlarau raldo nei ringring ka si.

CT 12. Thlarau raldo na ti cu mitampi in kan thei lo, maltetalin in sim fiang thei pei maw?
# LNK: Sim thei e. Thlarau raldo (Spiritual Warfare) timi cu thazetin kan nung kan ti lai khalah zumtu cu dotu ral 3 kan nei ringring.

1. Lei tlun thu le hla le thil le ri dawtnak, hahio nak.

2).Thlarau sual ih sual forhfialnak a phunphun (evil spirit) le 3).Mahih tisa duhhiarnak, taanghmasialnak, mah pakhat lawng thiambik, theibik, tlingbik, mawibik, upat sunlawih tlakbik tu ka si tiih ruatawknak (self) pawl an si.

CT 13. Ka lungawi. Zumtupawl ih ral phun 3 tla tu lawngah ka theifiang. Thu lo sutduh pakhat ka neihmi cu, Tulai kan leilungtlun khawsak tlanlendan ruri ah hin, zumlopiih a tumsuk le a thangso tla kan siih hahdam le hmuhremthiam dan a um thei pei maw?
# LNK: Ka lungwi. A dikbik ding cu ka ti lo nan, hmuhsuahmi thu 4 ka nei. Kan kiangkap minung kan theihmi le, in theitu lakah, lennaklam ah si maw, thiamnak lamah si maw, hminthannak lamah si maw, Position le rank lamah si maw, mawinak le cahnak lamah si maw, thiamnak lamah si maw, midang hleihtu si ringring thei sehla kan duh.  Asinan: (1) Mi kantahnak zawnah, kan tlunlammi, kan bangtheidingih kan ruahlomi, kan hun bangih, kan hun hleihmi tla an um ding. (2). Cuvekin,ziangtik hmanih in bang, in canlo, in tluklotu dingih kan ruahmiin, in hun canih, in hun hleihtu tla an um ding. (3).Ziangtik hmanih kan bang theilo ding, kan tluk theilo dingmi tampi an um ding. (4).Cuvekin, nangmah kha, a tu ih na neihzo, na theihzomi, na thiamzomi, na hmuhton le na thlencin na dinhmun ziangtik hmanih thlenglo, theilo, thiamlo, neibanlo ding milai tampi an um ve ding ti theiin, lungawi hnangam thindai ten na um thei.

CT 14. Cuvek ruahanak fim le tha in theihter cu ka lung a awi. Thudang deuh pakhat, Miphun le khua le ram duhdawt le humhalh dan ding ruahnak lamteh ziangvek in na nei?

# LNK: Kannih pawl hi, khui continent, khui ram, ziang miphun le minungih ra suak dingin simaw, suaklo dingin si maw, hril theinak kan nei lo. A tu ih kan miphun siinak khalhi miphun dangih in pek mi a si lo. Kan duhlocingih in hnonmi khal a si lo. Midangta kan neh lonmi khal a si lo. Kan miphun cu kan duhruangah khui hmunah, zo ih hnen ah kan dil (siau-apply) ih, kan ngahmi khal a si lo. Pathianih remruah le khawkhaannak a si. Duhlo in, thinhengih riahsiat ding khal a si lo. Duh ruangah porh-awkih hngalpi ding khal a si lo. Lungawiten asiidan vekin pomih cohlang ding kan si men, tiin ka hmu.

CT 15. Kan ruahdahlo zawngin thu in hmuhterih ka lungawi. Kan milesa hnenah seherh le theihter duhmi ziangha na neih?
# LNK Thu 3: Mahte umhmunih helhkammi thu menmen ka nei. Mi bulpak hnenah a si lo. (1). Pathian thunung inzirh, in cawmih infahtu kan duh le tlaihsanzetmi veve; local church Pastor le Evangelist hrekkhat, culole evangelist veve si maw, pastor veve si maw, Pathianih laksawng (gift) pekmi hmuhsakton thiamlonak thu theih tikah mipi kan thin a rak har. Nupa to-aw le velaw an um tikah an fatepawl cu umngaihnak theilo ih an um vek kan si. Thlai cu a tuhtu le ti-tawihtu an si veve men, a thangtertu le anungtertu ngaingai cu Pathian a si (1 Korin 3:6-7). Evangelist hi local church pakhat ah ret zik sehla, anmah in tla an paih lo men ding.

Church member in tla an duh reilo men ding. Cuvekin Pastor tla hi evangelist vekin khualtlawng veivakin Pathianthu simter vivo zik sehla sawmtu an um ringring lo men ding.anmah in tla an paih ringring lo thei. Lawm aw ih sunlawih aw ton ding, bawm aw ding, recommand aw tonih kawhhran thansonak ding ah tuantlang, tangtlang ding an si sawn.Pastor le Evangelist pitling pawlih lungput a si. (2). Kan Falam cafangkom danih “o” duhluantuktumnak le “aw” duhluantuk tumnak hi poi/pawi ka rak ti. “Zawhte” (cat) tla hi “Zohte” kan ti ngaingai pang dingih, “Tawtawrawt” tla hi “Totorot” ti ah kan ngan leh pang ding ka phang. Sawm aw thei le zirh aw theitu kan um hrihlo ah cun, a ngantu ih ngan duhmi kha theihthiamsak awk a tha bik hrih ding tin ka ruat. Mirang hman cafangkom duhdan bang awlo a um nan, an hmang veve men.

Eg. “Center” -”Centre”  “Honor- honour” an hmang veve men. Kannih falammi mimalte leilung pumpi le Kawlram pumpi sungah vun rel hrihhlah, Laimi sung lak hmanih mimalte kan siih sapah kan engtai aw rero cu Kawl thufim pakhat ih, “Nua-Kuai_ Cia- Kaih” ti vek kan hluan pang ding. Pakhat hmanmi kan neih tlang thei hlan sung cu, miphun le calai thansonak duh ngaingaitu kan si ah cun remawklonak ding tham a um in ka thei lo. Kan tribal hnamtenau lungmawl kan sinak a theihthei tuk. Tongnak ah, Zuri pawl hmanin, “Pacangpa sualawk men ruangih thinheng tla cu ningzahnak” an ti si maw. Caan a ra reideuh tikah bangrep ten kan hmang tlang leh ding ti ruahsan uh. “The same feather flock together” ti thufim a um. A ziazia ten ngaicang aw sehla, thinsau in hngak uh si.Mahte talin kan thin tisau cawp rero uh si. (3) Thufim pakhat in Inn luanglu a zun ah cun, a sungih milai um pawl cu an ciar hnianghniang thluh” ti bangin, leitlun rhmun hrekkhat ah le kan ram ah nitin nunkhawsak pumcawmnak hawl dan harnak tikcu le can iha run hersuah cun, mawhthlukawk tum hlah uhsi.

Kan thin a heng thluh ding. Bulpak ruahnak le kan tuar dan cio a bang aw lo tik ah, nun khawsak thanlen nomdeuhnak nei duhcio a si awk tikah hrekkhat hrangah ramleng suak tulnak tiang a ra thleng. Hrekkhat hrangah ramleng ih suahveh tullo ten, mah ramsungah hnangam le daiten nunkhawsak semrem ten an um thei.A thabik le dawt um zet an si.Ram lengih suaktu le suaklotu hi hmuansak le hmuanthlang, sungkhat nai le rualpi tla kan si aw theh ih, mit le hnar vek kan si tikah, hua aw thei le relse aw ding kan um lo. Thathnempi ton awk dan ding hawl thiam tum sehla, kan hlawkpi veve ding.Kan Bible sungah, Milai Nunnak hum duhah Egypt nurse le midwife pawlin Israel nunau pawlih nauneih dan thu ah, thuphan fimvar an hman vek,  cawn caan a ra thleng a si lo maw ti ah ruahsak, hmuhsak thiamnak neih a tha san ding lo maw? Ziangti tha ! “R” ngah theinak tikcu le caan a ra her tla hi a fehtu pawl ih dil ih ra um a si lo ding, Pathian ih khawkhan remruah a si lo ding maw tiin, ruat sehla, sawisel relsiat awknak a dem sinsin ding. Kan lung a awi tlang ding.

CT 16. Tlawng Saya tuan lakah senior lam na si ding tin kan lo ruat, Bible tlawng tha ziangtin kan thei-thei ding?
# LNK: Hi thusuhnak cu a thupituk ruangah na lungkimko ka lo let ngah thei ding ka zum lo. Midang tampi challenge nak dingah thu in sut ve ruangah hun rel ve men sehla:A kau tukih lo “phit” ding ka huphurh zet. Theihtul zet a si fawn.
1. Cazirh a that ruangih Tlawngta tam, kum reipi dingmi tlawng le
accriditation nei tha.
2. Cazirhtu saya pawlih Spiritual and acedamical Qualification of education a tlingmi le Library facility nei tha mi tlawng.
3. Sayapawl in thungaithlak le duhsakzetih Ca an zirhnak tlawng.
4. Pathian mihmanmi an suah tamnak tlawng (percentage)

CT 17. Cuvek tlawngtha si thei dingah ziang a tul?
# LNK: A tulmi cu theih a theih mei ko in ka ruat. Spiritual lam le Acedamic lam khalih Qualification tlingmi saya tampi neih a tul, Thatho zet le tlawngta duhsakzet ih ca an zirh theihnak dingah Tlawng neitu lam in rinsannak le hnianghnar deuh,  zalen deuh ih pehtlaihawknak tha thawn thlacamnak thawn tanlasehla a sual lo ding
tin ka ruat.

CT 18. Manlozet cingin tikcu in pekmi le thu in letmi par ah kan lung a awi ngaingai. Lo contact nak ding in sim thei pei maw?
# LNK Kei tla ka lung a awi. Nanmah ruahnak, mi dang hlawm theinak in tuahsak hi a manhla tuk. Contact No. Lal Nei Kam,
No. 52 / 5th. floor,
Mingala Street, Sanchaung, Yangon
HP: 09731 40041
Email: lnkmyanmar@gmail.com

(Visited 205 times, 1 visits today)
%d bloggers like this: