Biaknak Lam – Rev. Dr. Khaw Lian Uk

11 September 2009

Kan Chinmi rawngbawl tu lak ih hla puah thiam, nunneem, zaidam le kan uar  zetmi Rev. Dr. Khaw Lian  Uk cu CT palai in a umnak hmun Delhi Khawpi ah hmaiton thusuhnak a nei.

CT       : Na suahnak  khua le ram le innsungsang thu tawi in sim thei pei maw!

KLU    : A hmaisabikah kan Bawi Pa Jesuh hmin cu thangthat in um seh!

Chinland Today tuanvoneitu pawl hnen khalah lungawi thu ka sim a si.

August 30, 1968 ah Falam zato pi ah ka suak. Ka nu le pa cu Rev.Hau Khaw Thawng (Falam peng, Sial Sih khua) le Nu Hrang Hngel (Len Te) an si. Unau 7 kan si ih mipa 3 le nunau 4 lakah kei hi upabik ka si. Tu hi kan nu Mrs Niang San Vung thawn Pathian thlawsuah fanu pa hnih 1. Thian Lun Ting 2. Cing Huai Lun le fapa Joshua Van Nei Thang kan nei.

CT       : Secular  zirsannak lam teh!

KLU    : 1991 ah phunhra (B) in ka ong.

CT       : Pathian thu na zirnak lam teh in sim thei pei maw!

KLU    : Pathian lam hruainak in 1991 ah Tedim Baptist Theological College in Diploma of Theology ka zirsuak 1992 ah Evangelical Bible Seminary, Yangon in B.Th ka theh. 2004 ah Immanuel Theological Seminary, New Delhi in BD ka zirsuak. Lamhla zirnak (Correspondence) in 2005 ah Emmanuel Theological Seminary, Rajasthan Kota, India in M.Th ka theh ih 2006 ah Throne of Grace, Hyderabad, India in D.Th ka theh.

CT       : Harsa zet le zuamzet ih fimthiamnak na zirnak parah CT in kan lo lawm ih kan lo suang zet fawn, Na pianthar daan tla theih kan hiar zet ih in sim aw he..?

KLU    astor fa ka si vek in ka tlangval pekte tiangcu mi ih mitha an ti ve mi ka si. Asinan ka hung tlangval ve ih leitlun sualnak lamah thuk zetin ka rak pil. Baibal tlawng ka kai hnu tiang khalah Pathian le leitlun tahnak ahcun ka rak tlinglo nasa ti ka thei.

Asinan Pathian lainatnak cun I thlun ringring ih danglam tak in ka nun a sersiam sal. B.Th ka theh ih Pastor ka tuanhlan te ah zankhat cu thin bangzet cingin mitthli thawn thla ka cam ih  ka thlacam laiah larnak in kan Bawi Jesuh a thihhnu thinglamtah par in lei ah a ruak an run zawn  laifang kha kei mah an zawn  in ka hmu.

Thla ka cam theh cun Galali 2:19 ih “…a thinglamtah parah kei cu Krih thawn thah mi ka si zo” timi kha Pathian in fiangtuk in i theih terih Pathian mit hmuh ah cun Bawi Jesuh thihnak ttawmpitu ka sizia fiang ten ka thei aw .Cumi zan in thlarau lam piantharnak ka co a si. A tikcu cu July 17, 1994 zan a si.

Mi tlinglo tak ka sinan Jesuh in a zangfahnak ruangah  NUNTHAR i pek lawng silo in a thianghlim mi A HNA tuan ding ah I hril ve cu mak ka ti. Kan Pathian hmin thangthat in um seh!

CT       : Pathian hna na tuan thok ihsin tu ni tiang na tuannak a dotdot in (kum, na tuan thoknak khua le Association hmin) pawl in sim thei pei maw?a7-150x150

KLU    :  B.Th ka theh hnu 1995 ah CCOC ( Chin for Christ in One Centur ) missionary tuan ding ah  ka hmin ka pe,  in cohlang  ih ZBC office ah training tla ka kaizo nan Falam Batist Association khawmpi  ( Ramthlo khua )thurelnak vekin Len Hai Baptist Church ( Phautluan Area,FBA) ah pastor ka tuan. Kum 3 ka tuan hnu ah Phautluan Area nu le pa pawl in Ordination in dilsak ih FBA Golden Jubilee khawpual ah Ordination in pe.

ii) 1999 kum ihsin LBA (Lairawn Baptist Association) Falam Baptist Church, Khampat ah in dilnak vek in Pastor ka tuan.

iii) 2002 kum ah kan Kohhran hnenah Pathian thu zirsal ding ka dilmi cu in lungkim pi ih  Immanuel Theological Seminary, New Delhi ah B.D ka zir. 2003 kum ah Delhi Burmese Christian Fellowship in part time ih pastor tuan sak ding ah in dil ih lungawi ten ka cohlang. 2005 in DBCF ah full time in tuni tiang pastor ka tuan. (Zuk; a nufa pawl thawn)

CT       : Pastor hnatuan lawng silo in a dang rawngbawlnak teh na nei maw?

KLU    : Pathian in piantharnak I pek hnu ah pastor rawngbawlnak lawng si lo in crusade le camping tuahnak ding sangka tla I onsak vivo ih sawmnak ka don tikah kohhran upa lungkimnak a um le crusade/camping ka tuah phah theu.

CT       : Hla lam teh!

KLU    : Pathian in hla phuah thiamnak laksawng I pe ve in ka thei.

CT       : Aw, cuti asile cu “Sun ah Ni in” timi le ‘In hruaiding” timi kha nangmai phuahmi a simaw! Ziangtik ih na phuah mi ha an si, In sim thei pei maw?

KLU    : Sim thei ee! Sun ah Ni in ti mi cu Yangon Bible tlawng ka kai lai ih Pathian in I pei mi a si ih “In hruaiding” timi kha cu Len Hai khua I Pathian hna ka tuan lai ah Pathian in I pek mi a si.

CT       : Bible tlawng lam ah khal a tuan an lo ti a bang!

KLU    : Aw si ko. North India Theological Seminary le Sola Gratia Seminary ah a langten saya ka tuan.

CT       : Pathian hna na tuannak ih harsa na timi le nuam na timi pawl in sim thei pei maw?

KLU    : Pathian in I pek mi tuu ruun pawl cinghnia in in firsak tik ah le hruaitu hrek khat zumnak phatsan in khawvel lam ih an tlan tikah tuar har ka ti. Pathian hnatuan ih nuam ka tibik mi cu tuarnak pa khatkhat a thlen tikah cuih tuarnak phen ih malsawmnak ka hmuhsal theu mi te khi a si.

CT       : Falam Awn Mawi  khawmpi a veikhatnak Falam Khawpi ih an tuahmi ah Special singer ih an lo sawm lai ih na hlasak mi pawl kha mi phuahmi maw! Nangmai phuahmi so na sak!

KLU    : Pathian in ka hnen ih I pek mi lawnglawng an si ko.

CT       : Laimi leitlun lam le Pathain thu lam ih mi kan bang theinak dingah na ruah daan tawi famkim in in sim thei pei maw?

KLU    : Ziangtik lai khal ah Pathian phatsan lo phawt sehla. Mah le ti theinak zawn cio in missionary tuan sehla Pathian in thlawsuah in pe ko ding.

CT       : Tu ih na rawng bawlnak DBCF ah ziang tik tiang na tuan ding?

KLU    : Pathian in rem a ti le tu thla Sept 28, 2009 ah USA lam ah kan pok ve thlang ding a bang!

CT       : Hmailam na tumtah mi in sim siang pei maw!

KLU    : Khawi tawk I ka um khal le Pathian in sangka I on sak ahcun dam sung a hnatuan ding hi ka hrilmi le ka damsan a si ko. Ziangtin rawng ka bawl ding ticu Amah Pathian in I ngaihtuah sak ko ding ka zum.

CT       : Caan sunglawi takin pek ruangah CT hmin in lungawithu kan lo sim.KLU    : Aw, ngahtuk, ka lungawi tuk sawn so khaw.

(Visited 148 times, 1 visits today)
%d bloggers like this: