Biaknak Lam – Rev. Bawi Ceu

Rev. Bawi Ceu (Kalay, Shalom Pastor – Present) cu Bethany Aizawl in an kum 1m kim (Tin Jubilee) lawmnak ah Speaker ah an rak sawm ih, cumi can cu can tha ah rak lak in, an can mallai cu kan CT Family palai in rak lak sakin, hmaitawn thusuhnak mallai a rak nei ih, a hnuai lam vek hi an thu pawl cu a si:

CT: Sayapa, na can in pek ruangah kan lungawiih, na hmin ngai, na suahnak le na nu le pa in sim thei kemmaw?
BC: Ka hmin cu Rev. Micah Bawi Ceu ka siih, Falam Peng Chongthu khua ah 1972, Sept 26 ah ka suak. Unau 9 kan siih, ka nu cu 1994 ahkhan mual in liam san ih, ka pa cu Rev. Kap Hrim a siih, pastor pinsin zo a si, tuhi Haikhawl ah a um (Zuk Rev. Bawi Ceu le a inn sang nu)

CT: Tuhi khui hmun ah Pathian rawngbawk in na um?
BC: Kalaymyo ih Shalom Baptist Church ah, Tavuan khan pastor in ka um.

CT: Na innsang nu thawn nan kutsihawk kum le na fa le pawl?
BC: Kum 1999 April 23 ah Sui Khaw Thiang (Bualkhua) thawn kutsihnak kan neiih, Pathian thlawsuah fanau pathum (3) kan nei. A upabik cu Moody bawi Ling Thang sin, phun 4 a kaiih, Esther Van Cer hi tu kum ah phun 1 a kai. A nautabik Junise Sung Lan Mawi cu Mucu kai rero lai a si.

CT: Na innsang nu hi Pastor a rak tuan dah in kan thei ih, ziangtin ha tui a dinhmun?
BC: Si kum 7 rori pastor  a rak tuan dah ko. Hmansehla, tu cun Pathian thlawsuah fanau tla kan nei zo ih, curuangah a cawlhsan ih keimah hi in bawm sawn thlang.

CT: Tui na tuannak hlanih na rak tuah dahnak pawl in sim in, Tui nan tuannak ahhin, ziangtik ihsin ha nan luh thawk ti in vun sim bet lawlaw aw hen law?
BC: Si, tui kan tuannak hlan ahhin 2007 April ihsin Pathian le Kohhranin in ret thawk ih, cumi hlan ka rak tuan dahnak pawl cu: Falam Peng ah kum 9-10 hrawng a si ding. Falam Baptist Association hnuaiah Evangelist in kum 2 ka rak tuan ih, kum 2000 ah Min Soo ah (Shan ram nisuahnak saklam) ah Falam mi hnenah Pathian hnatuanin ka um. Cuisin, Aizawl ih Baptist pawl dinmi, Bethany Baptist Church ah ka rak tuan leh. Delhi DBCF ah Asst. Pastor tuan phah in tlawng ka kai ih, ka theh in, Laitlang Khawdar ah kum khat ka um. Cumi thehin, Kalaymyo ah kan thawn aw.

CT: Singai, na zirnak lam in sim bet thei kemmaw?
BC: Leitlun tlawng phun 10 ka thleng. Bible tlawng cu M.Th ka theh ve. Ka zir thawknak cu G.Th Tahan ih Bethel Theological Seminary ah ka rak kai ih, BD le M.Th hi Bharat ah kaiin, kum 2006 ahkhan Pathian zaangfahnak thawng in ka rak theh thei cu a si.

CT: Rawngbawlnak ahhin tha nau can na nei theu ko maw?
BC: Aw, minung sinak in nei ve tuk e. Thu ka sim/Sermon rero laiih, an rak ih thah le an rak biakaw tivek can ahhin, ka tha a nau, ka thusim ding mi tiang ka hngilh cupco in ka thei aw. Cun, Crusade Camping nak hmunah, Pathian thungai hiarhalnak nei lo pawl hnenih thusimnak neih khal khi har ka ti zet theu.

CT: Nan hnatuannak ih laksawng dawnmi ziangtin na hmu?
BC: Laksawng inpek mi cu har ka ti lo.

CT: Tong ziangzat in Pathian thu na sim thei?
BC: Mizo, Kawl hin ka sim theiih, Mirang khalin sim theiin ka ngai aw.

CT: Na rawngbawlnak ah ziangmi si thupi bikah na ruah?
BC: Pathian hna ka tuan sungih thupibik ih ka ruah mi cu, Ziangtin ha miin Pathian an hmuh thei ding? An pian thar thei dingih, nun danglamnak Pathian ah an sar thei ding timi hi ka hmui tin bik mi a si.

CT: Na rawngbawlnak ah ziangtin na aapaw?
BC: Dam sung Pathian hnatuan dingin ka hlan awih, a hman dandan i tuan dingin ka apaw.

CT: Tui na rawngbawlnak Kohhran ih tlaksam bik ih na hmuh mi?
BC: Kan tlaksam bik mi ih ka theih mi cu, Thlarau lam ahhin hnaset deuhthaw siin ka hmu laiih, Minung lamah hmaipan le kawmnuam (Lu hmuh zii) le leitlun lam ah farah kan tam deuh ih, thansoh kan tul zet laiin ka hmu.

CT: Thudangin, na tleirawl suah pek nun tawi ten in hun sum thei kem?
BC: (Ha… tiih hni zuamzi phahin) Zu cu ka tawk phahphah, nan nunau mipatnak lam cu paih tuk pawl ka rak si lemlo. Zu le sa khal hi, cuti lawmmam ih tawk tham ka si lo in ka thei. A tello ih tha theilo pawl ahcun ka tello in ka thei aw.

CT: Rawngbawlnak ah, cumi kha mi si deuh seh tiih hril mi na nei maw?
BC: Pathian hnatuan dingin hrilmi ka neilo. Pathian duhnak zawnah ka lungkim theh. Keimah cun Evan lam ka si hmang ka ti nan, Pathian thu sawn a si, pastor lam ah ka lut vivo ih, ka lut lan ta ding a bang.

CT: Tlawng kai peh vivo tumnak na nei maw?
BC: Si, himi thawn pehpar in, leitlun thiamnak a sang vivo ih, Pathian thu kan va rel le sim tikah, Amah Pathian thu lo deuh, Leitlun fimthiamnak lam ih kan sinak hi rak zoh tam zet an um. Curuangah, Dr (Doctor) buaih pakhat tal cu khum ta thei sehla tiah saduh ka that in thla ka cam rero. Cun, Asia lenglam deuh Doctor sithei sehla cu keimai duhthusam cu a famkim zet ding nan, Pathian kut ah ziangkim hi a um in ka thei ih, ka ap lai a si.

CT: Ramleng thleng kan Laimi pawl na ruah dan?
BC: Ramleng thleng ka si lemlo ruangah, an thlennak san ka thei lo ih, curuangah cutin kha tin tiih ruahnak/ruahdan ka nei lo. Thlarau lam ahcun an tlasam ding ka zum. Thla khal ka cam sak theu.

CT: Tulai kan ramsung zumtu pawl ih buaipi zet mi pakhat, Zumnak thu ahkhan?
BC: Zumnak ahcun Thlarau thianghlim tawng thamnak, cangvaihnak tello cun kan zum thei taktak lo tihi ka thumawknak a si.

CT: Ram (Politics) lam ziangtin na ruat?
BC: Phur ve zet kan va sihman ah, Pathian hnatuantu kan siih, kan thei cin cu kan hrial lam sawn a si.

CT: Kan Laimi na hmuh dan?
BC: Kan Laimi hi pumkhatnak lam hawi dingin kan tiaw rero nan, a har zet a si ding. A lenglam ah lungrual zet kan bagn nan, tong hman, duhmi le ruahnak lamah lungrual ngai cu a har a si hi; kan thek darhaw zet. Biaknak lam khalah ka thek deuh vivo ko a si hi. (Miphun le tongkam ruangah).

CT: Lungrual theinak lamzin a um maw?
BC: Lungrual theinak ding cu a har ding, kan tong, kan duhdan a bangawk lo. Lungrual theinak dingih thil pakhat a um ahcun, a thu le a rah suah dingih zir in kan lungrual thei zet men ding. (A lang lawng a si thei men. A har zet ding).

CT: Cabu ngan le suah na nei maw?
BC: Duhvek in kan suah thei lo. Cabu ngan cia ka nei nan, sumpai lam bawmtu ka neih lo ruangah duhvek in ka hmu lo. (Duhmi le ngan zo mi hman, suah cuang ding a si lo ruangah, paihnak khalin a tlin sal theu lo). Kan ram sung ihsin cabu vun suah ngai ding cun, a ngannak dingin, meisa kan nei ringring thei fawn lo, harsa zet in vun ngan khawsuak khal sehla, a suahnak ding lamah kan har lala ih, a har deuh lai cu a si hi.

CT: Ramleng bawmnak thawn hnatuantu pawl na hmuh dan?
BC: Ramleng bawmnak thuah a sung lam cu ka theihpi lemlo. A sual thluh ka ti ngam lo nan, Pathian lungkim theh cu a si ka zum lo. Nan Pathian lairel ding si in ka hmu.

CT: Ramleng ummi pawl na cah duh mi?
BC: Ram leng ummi kan Laimi hmun dangdang ah kan thek darhaw theh ih, ramsungah hman ding tha mino khal an tang tam nawn lo. Kohhran ah siseh, khawtlangah siseh, mizo rinsan tlak zetzet tam sawn cu an suak ih, kan ram cu nikhat hnu nikhat a har lam a pan vivo. Curuangah, ramleng thleng zo cio khalin, mai rak um dahnak khua le ram, Kohhran le Khawtlang hngilh sianglo ih an um ih, an sungkhat unau zo khal an bawm theinak zawn ih bawm tu an va si thei nak ding hrang hi ka cah duh ih, cun a hleice in Pathian hrimhrim hngilh lo ding timi hi uar zet in ka cah duh bet.

CT: Chinlandtoday na ruah dan?
BC: A tha ka ti lawlaw. Mifim hmaisa pawl ih, Global Village ti tongkam an hmanmi, Kan Laimi lak ih ti hlawhtlingtu siin ka hmu ih, fimthiamnak thawn hivek rori ih kan laitong thawn Internet website ih siar ding an ret thei hi cu uar an um in, zuam sin ding khal in ka cah duh a si.

CT: Can sunglawi zet in peknak parah kan lungawi.
BC: Kei khal ka lungawi.

%d bloggers like this: