Hruaitu – Pu Fung Dun

CT: : Na thuhla tawi ( Hminpum, suahnak khua, nupi fanau le unaupawl ) in sim aw?

FD::  Ka hmin cu Fung Dun. Mirang hmin tla ka nei lawk nan ka hmin ngai hnak in mirang hmin an thei tamsawn ruangah ka duh nawn lo ih ka pu ih i sak mi ka lai hmin lawng ka hmang.

Ka suahnak cu Falam in Rih zin feh ih khua hmaisabik Cerhmun khua asi. Unau thum lakih nauta bik ka si. Ka u le cu Pu Hlawn Mang le Pu Ngun Hlei Thang an si. Ka nupi cu Bawi Zing asi ih nausuak sazama asi.

CT: : Na fanau pawl ih tlawng kai mi le an hnatuan?

FD:: Nunau pathum cu hnatuan phah in tlawng an kai lai rero. Pahnih in Licensed Practical Nurse an theh zo ih tu Registered Nurse an kai bet lai. Pakhat cu LPN a kai lai rero. Mi pa pawl cu mivai/ramleng suak tambik ih thiam mi Shushi Bar nei in an tuan hruthro ko.

CT: : USA ah ziangtin, ziangtikah na rak thleng,Tu na umnak khua?

FD:: 1996 ah Guam ka thleng ih 2001 ah Washington DC,  2003 ah DC ih sin Seattle(Kent), Washington State ah ka vai ih tutiang kan umta.

CT: : Zirnak lam ah ziang tiang  na thleng?

Health Assistant ka theh hnu 1978 ah BA (History) ka ong. US ka thlen hnu BS in Organizational Management kumhnih sung Columbia College, MD ah 2003 tiang ka kai.

CT: : Party – Council san lai ah Falam ih na hnatuan pawl le ziangmi kan miphun hrangah na rak tuah?

FD:: Hmaisabik ka hnatuan mi cu Health Assistant (Khuate sibawi) asiih kan Laimi pawlih harhdamnak le thianhlimnak kan tthanso theinak ding bik asi.

Party-Council san lai a voi hnih nak Council ah  Chin State Council member (Part-time) 1978 in ka tel ih 1981 kum ih Falam Township Party Unit hrilah Party Secretary in hril ruangah Council member cu ka suahsan. Party Secretary term khat kumli ttheh tiang ka tuan.

CT: : Upat hnu ah USA na thleng sikhawh, kan Lairamte ziangtluk in na ngai theu?

FD:: Kan Lairam te ngaih a rehdeuh pangah tiah laitlang thawi bangawbik le  sokhlei phun zakim parnak Seattle, WA ih ka cer nak san asi. Mai suahsemnak le tthanlennak cu hngilh ngaingai a rak theih lo a si hi.

CT: : Na ngai bikmi in sim aw, Lairam ngai in na lunglen caan ah ziangtin na  hnem aw?

FD:: Ngathliar, survawrh le ramtawih asi bik. Cun ei dingah cun hritezik (hruitezik). Tahan bazaar ka thlen ih ka lei lo cang a um dahlo. Lunglen hnemtu ah laihla pawl ka ngai theu. Ka mawtaw sung khalah laihla a tam bik.

CT: : USA thleng kan Laimi ah rinsanmi suanvawr pakhat na si ih, USA ram ah na fate pawl an thanlen tikah ziangvek mizia in tthanglian haisehla na duh bik?

FD:: Pathian duhdawtu le lainunphung duhdaw thiam ih a tthangso mi si ter cu ka duh.

CT:  Chinmi ( Laimi ) sinak ah na ngaisan emem mi a um maw, ziang? Na uar lo emem mi teh a um le in sim aw?

FD:: Chinmi (Laimi) pawl hi Pathian zumtu kan si nak hi ka ngaisang bik. Mirang lakih thu ka sim tikah laitlang ah zianghman a suak lo nan Bawi Zisuh kan nei tiah ka sim theu.

Laimi iksiknak neituk le mai ttuan lo ruangih zabeng mi dungtun  sanmen pawl hi ka uar lo bik pawl an si.

CT: Mi tampi in Lairam hnakin Laimi kan duhdawt sawn a tul an ti, kan Lairam deldite maw kan va duhdawt ke, lole hmuntin ih um kan Laimi?

FD:: Khuitawk hmun ih kan um khal le kan laimi kan duhdawt hmaisa a ttul. Laimi na duhdawt ah cun lairam dildel te khal na duhdaw ko ding.

CT: : Falam khua ih Falam hotu lubik  na rak tuan lai ah Falam khawpi ziangvekin ceimawi or tthansoter na rak tum dah?

FD:: Hlan lai Falam bang ih hmuntin ramtin ih sin “Falam Par” tlantu an tam deuhdeuh ding ka rak beisei. Curuangah Party  Unit in kan penghrang hnatuan tu ding Council hril tikah cathiam, mifel le mi taima ttuanduhnak thinlung nei pawl Council ih ttuan ter ding ka rak tumtah nan a tawinak cun thu a phunphun ruangah a rak cang thei lo.

An hmin khal sim mai sehla kha lai ih kan neihmi sungin Pu Kap Tial le Dr Than Bil Luai tivek khuazuam /taima pawl thawn  ttuankhawm sehla ti hi ka rak saduhthah mi a si. (Tuisun nitiang zohman ka sim dah lo vekin an mah pahnih khal hi thu hi ka ruah dah ve lo.) Falam khuapi ceimawi dingah cun meisa le tidai thupi bik a si ih pursum leilawn nak kan zinpi Rih zin hi in thohsuahtu asi tin ka ruat.

CT: : Tuni kan Falam khawpi ziangtin thangso dingin sunmang na nei?

FD:: Falam khawpi tthangso ding ah khuasung um tu le ram leng um kan ttan tlang a ttul bik. Ramleng suak kan zaten kan neihsun te kan pek ngam ih kan kuat thiam a ttul . Meisa, tidai le Rih zin khal kan tawl rel sal a ttul. Sungkhat sisehsenpi/tlangpi hrangah siseh kan pek rori a ttul. A pawibik ka timi cu Falam mi hin pek lamah kan tlasam tuk lai.

CT: : Chin pawlpi cangsuak dingin ziangtin nan rak cangvai ti in ruah hnik aw?

FD:: US ka thlen ve ten pawlkom a um maw ti hi ka vei bik mi a si. Kan thlen hlan ah  pawlkom an rak um nan laimi zatei pehzom awk ngai ngai a rak um lo.US saklam ih um pawl in Dawngpui tin 1985 hrawng in an rak tuah theu vekin thlanglam um pawl khal in 1995 hrawng in Fanger an rak tuah ve nan pehtlaih awknak a rak um tuk lo.

Washington DC ka thlen veten Falam mi  tawkfang nawn an um nan pawlkom a um lo ruangah pawlkom dinding ka sawm ih 2002 April 12 ni ah Falam Pawlkom (National Capital Area) tin kan din suak ih Hotu ah Pu Defence Lalawng le Sungtuan ah kei mah thawn EC pasarih kan si. Hi pawlkom hin mipum cazin kan la ih Falam Address book le Chin tong ih biak khawmnak thla khat voihnih kan tuah thok thei.

( Culawng siloin November 22, 2002 ah Chinmi zatekom ih tuah mi Chin Community of USA (DC Area) dintu khal ah ka tel ve.) Cuisin state dangdang ih um laimi pawl thawn telephone siseh, ton khawmawknak a um tinte hi thu hi kan rel ih kan zaten kan duh cio nan hmunkhat ih tonkhawmawk nak a um hlan cu tuah suak thei a si lo. Culaifangah Lailun Foundation ih hoha nak in Chin Calai Seminar Atlanta khuapi ih an tuah tikah cuitum ih pawlpi dinsuak ding in ka pok.  Asinan LF ih tuah mi a si ih US um Falam mi kan huap thei lo ding titu pawlin  in neh ruangah Tungzing Kawmiti tiang lawng kan din thei ih hotu ah Dr. Lai Sum le asangtu ah kei mah thawn Kawmiti pasarih kan si.

A hmin cu Chin Pawlpi siseh tin Atlanta ih sin kan sak suak ih state dang khal mah le state ciar in Chin pawlpi dinding kan rel. Thurel nakah Pu Hrang Thawng khal a tel ih Battle Creek ih Chin pawlpi in puaila in in sawm uh tiah kan dil vekin Battle Creek ih ttuanvo neitu le mipi pawl thuthiamnak in inntek tuanvo an la ih kan tumtah vekin Chin Pawlpi(USA) cu Battle Creek ah November 30, 2002 dinsuak asi.

CT : : Chin Pawlpi-USA hi kan Laimi khaikhawmtu le rinsanbik mi pawlkom a si, hmanseh ziangruangah Laimi ( Falam ) ramdang um mi pawl thawn tuantlangnak ngaingai nan nei lo, nan connected lo a si pei? Hohatu dingbik nan si fawn?

FD:: Asi. Ttuantlang thei sehla ti tumtah cu kan neinan kan hlensuah thei hrih lo mi asi. Hmailam ah cun kan pehtlaih aw thei ding kan beisei ko.

CT: : Chin Pawlpi-USA  hi Nangmah hotu na tuan in  hna tampi an tuan thei ti a si, ziangtin kan miphun hrangah na zuam?

FD:: Pawlpi hnatuan hi mi pakhat zuamnak lawng ih cang thei mi a silo. Hotu pakhat si cun Leaders do it first…an ti vek ih ttuanhmaisabik tu si cu a ttul. Ttuanpi pawl thawn siseh mipi siseh mah rori ih tuletu thurawn ih ttuan vutvo a ttul. A cangcang ah cun an tawtawh deuh khal a ttul. Kan miphun le ram hrangah tiih pumpek awk ngam, ttuanpaih, zuam, le taimak a ttul.

CT: : Hmailam Chin Pawlpi vision in sim thei pei maw?

FD:: Chin Pawlpi hin kan Chin mi hrang rolung bun thei ding tumtah nak a nei. Hivek ttuansuak ding cun mipi kan zatei ttanrual a ttul. A cipciar cu tuahsuak hrih lo a siih nehhnu ah si deuhseh.

CT: : Laimi hotu mi pakhat si ahcun calai hi uar tengteng a tul or hotu cu calai misazet a si theu tiah na ruat maw?

FD:: Calai uar hi a tha bik nan hotu si ruangih uar tengteng ttul ticun ka hmu lemlo.  Hotu lakah calai milesa zet an tam vekin hotu zaten an si kher cuang lo men thei.

CT: : Kan calai na sunmang? Mino calai duhpawl hrangah ziangtin ruahnak in pe duh?

FD::  Ni khatkhat ah phunsang tlawng tiang zir thei siseh ti hi a si. Ramdang thleng pawlin kan tesinfa pawlin an run kilkhawi vivo thei nak dingah ttuanvo kan nei.

Mino calai duh pawl hin ca tampi ngan sinsin ih cabu, mekazin le thuthangca tivekin a phunphun ih suah ding a thupi zet.

CT: : “O” le ” AW” ahcun na buai zik lo ti aw?

FD:: Buai lo lawlaw. “O” lole “AW” ih an ngan khal le an ti duhsan ka thei thluh.

CT: : Calai ih thupitnak na theihmi ziangtin a si?

FD::  Calai a hloh a sile miphun kan hlo tinak a simai. Kan Chin sannikhuk tunghmun dingah kan calai kan dinsuah deuhdeuh a ttul.

CT: : CT hmuandumpi ah na rak leng man dah maw?

FD:: Kan rak tawivak ve theu. Santhar mino pawlih thiamnak le zuamnak hi ka uar zet.

CT: : Kan Chinmi hrangah cah lo theih lo a thupi tuk tin na ruah mi?

FD::  Fimthiamnak zirsan lamah tu hnakih kan zuam a ttul. Ahleice in mino pawl hnatuan tum mai loin nan thlennak kipah fimthiamnak zir hmaisa uh. Cun hnatuan ding kan neih mi ah tun awlo ih kan ttuan tlang a ttul. Chinmi hminsiat tertu siloin cawimawitu sihram uhsi tihi asi.

CT: : Na caan sunglawi in pek ruangah kan lungawi, kan Laimi hrangah thazang thar laknak a si kan zum.

FD:: Kei khal ka lungawi. Tthathnemnak um sun a um le Pathian sunlawihnak ah si hramseh.

August 30, 2010

%d bloggers like this: