Biaknak Lam – Pastor France

 

CHINLANDTODAY LE SAYA FRANCE.

Lai Christian Fellowship (Aizawl, Mizoram) ih Pastor hnatuan lai, Saya France cu, kan Chinlandtoday palai pakhat in, Aizawl a tlawn remcan laiah, amai inn rori ah lengin kawmnak a nei ih, a hnuai lam vek hi an kawmawk nak a si. (NB: Chinlandtoday=CT, France = F).

CT: Sayapa, hi CT hminin kawmnak le hmaitawnnak mallai lo neih kan duh ih, can siang zet ih in pek ruangih lungawinak kan lo sim hmaisa.

F: Keimah vek in kawm duhnak ruangah kei khal ka lungawi zet.

CT: Sayapa, na suahnak khua le hmin, na nu le pa le na unau pawl in sim thei kem maw?

F: Aw, Ka pa cu Za Ceu a siih, ka nu hi Ngun Lawm (1995, Oct ah mual in liam san) a si. Ka suahnak khua cu Falam peng ih Thanhniar (S), Laizo tlangkulh sungih um a si. Puitling unau cu 9 kan siih, mipa 5 le nunau 4 kan siih, kei hi a paruknak siin, mipa ahcun a lai ka si.

CT: Na nupi fanau pawl in sim thei bet awla, a lungawi um zet ding.

F: Si, Kum 1998, May 9 ah Chun Cung (AG Church) ah Pathian in ka rawngbawlpi dingih in pek mi Cer Hliang, Halkha Peng, Sung Cung khua thawn Patian hmaiah kut sihnak kan neiih, tuhi fa pa pahnih le fa nu pahnih Pathian thlawsuahnak in kan nei. A upa lam ihsin cun, Finny Van Duh Lian, Julie Van Sui Hnem, Buulah Thian Tha Nei le anautabik Ribert Thawng Tha Ceu pawl an si.

CT: Leitlun tlawng ziangzat tiangin ha na rak kai?

F: Ka kai sang lo zet, phun 8 hi thlathum ka kai man.

CT: Na Pianthar ni le thla na mang lai maw, zawi thuthang tha simnak in ha na pianthar:

F: Kum 1984 Feb ah Evan Rual Uk ih thuthangtha simnak in Pathian hnen ihsin Rundamnak ka rak co ih, cumi lai ahcun Phun 7 ka rak kai.

CT: Pathian rawngbawl in ziangtik ihsin na lut?

F: Kum 1984 Sept ihsin Rev. Van Uk (Mandalay Current Pastor) thlun in rawngbawlnak ka rak thawk.

CT: Rawngbawlnak ah harsat nak tawng lo cu sim ding an um mal zet ding ih, cumi harsatnak na tawn can ah, nangmah le nangmah kha ziangtin ha thazaang na pek awk theu?

F: Si ko, kei cu a tlangpi in zumlotu hnen lam si lo ih, Khristian pawl hnenah rawlbawlnak ka nei tam sawn ih, mi tamsawn rawngbawltu pawl ih an tuar mi harsatnak cu ka tawng lo tla a si men thei, hmansehla harsatnak ka tawn can ah thazang ka pekawk theu mi bik cu, “Pathian in kawhnak a siih, dungsiip thei ka si lo” timi a si bik ko.

CT: Na rawngbawlnak ah ziangmi hin ha na thazaang lo ti niam deuh bik?

F: Si, tam zet a um thei ding nan, ka sim duh mi deuh bik cu, nauhak no tuk ih rawngbawlnak ka rak thok le, leitlun fimthiamnak zir niam deuh ih Pathian hna ka tuannak hin can tam zet cu thin nau in in tuah theu.

CT: Cumi, na sim duh deuh cu tlawng phun sang deuh kai ih rawngbawl hi a tha na ti duhsan deuh maw?

F: Si hran tuk cuang lo nan, tlawng phunsang kai cingcing cun zir le hmuhtawnmi an nei tam dingih, zirh ding khal an thei tam sawn ding tiah ka ruat deuh. Keimah ahcun Pathian ih in kawhnak ka theih mi le ka thlacamnak, ‘Thih tiang rinum in’ ka timi hlensuah cu ka tum ko.

CT: Pathianih kawhnak na dawn dan in sim thei kemmaw? Mi hrekkhat in tleu ka hmu tina, a hrekin larawknak ka hmu ti simmaw, etc. tam zet an um bang hi na si ve maw?

F: Keimah cun cuvek laizawknak le thil dangdang cu ka hmu lo, kan Ca thiang sungih nganmi, ‘Hantuan ding tam, tuantu ding an mal’ timi le Isaiah sungih, ‘Zo si ka fial dingih, zo si ka hrang feh ding….Keimah ka um, keimah I fial aw’ timi hi ka dawnmi kawhnak cu a si bikih, cun no laiih Pathian hrangih pekawk tluk ih sunglawi le mankhung hi cem ter ka siang fawn lo.

CT: Zirnak lamah, Bible tlawngah Distance talih thehmi na nei maw?

F: Aw, sim tlak zet cu a si lo nan, Saya Sui Liang Mang ih pek mi, Rogma ah Certificate Course cun ka theh.

CT: Hmailam can hrangah, kum no lai na siih, zir vivo tumnak na nei maw?

F: Ka thinlungah tlawngkai cu duh zet hman khal sehla, tlawng sung ngaiih vung lut ding cun, nupi fanau nei zo kan si ih, ruah a har zet. Hmansehla, Pathian in bawmtu tha le can in on sak ahcun kai cu ka tum ko. Ka kum lam ahcun upa ah ka ruat aw hrimhrim lo.

CT: Kahtaphuakin vun lo sut sehla, tleirawl nun nawmnak na rak cen aw dah maw?

F: Uhmmm… Kum 16 ah ka pian thar ruangah, tleirawl lai can ka rak nei mal ih, cen ding a um lo a bang, hmansehla mipa tit a fam cu, duh kuahko ruang si lemlo in, vei hnihkhat cu zuu ka rak tep ve dah ko. (Hnihsuak tuk lemlo ih ha ti lang phah in).

CT: Aw, asile ziang kohhran hmin in ha rawngbawlnak na rak neih hmaisakbik?

F: Kum1985 ahkhan kan khua ih AG kohhran a um lo ruangah, Falam AG ah ka rak pe aw. Cutin ka feh vivo ih, kum 1987 ah AG in fulltime Minister (Rawngbawltu) ah in lak.

CT: Cun, na rawngbawlnak pawl in sim bet vivo mai ding maw si?

F: A hmisabik ah, kum 1987 akhan Tanbu (Kalaymyo) ah, Saya an neih lo ruangah, thla 5 saya va tuan sak in ka um. Cumi hnu ah, Taungphila AG nubu pawl in Evangelist ah in hmangih, 1987 in 1992 tiang a siih, 1994 ihsin Halkha lam AG thotho ah ka tuan ih, cuisin 1998 ihsin 2002 tiang Falam AG ah ka tuan, cumi hnuah Kalaymyo ah tuan in, kum 2006 ihsin tuisuni tiang, Aizawl LCF ah pastor ka tuan a si.

CT: Cumi na hnatuannak zo pawl ahcun Pastor in maw, Evan sawn in ha na tuan tam sawn?

F: Pastor siin tu LCF, Aizawl ahhin ka veikhatnak a si.

CT: Asile, LCF, Aizawl hin a sawm in maw an lo sawm, nangmah sawn in na dil ha?

F: Kei hi cu in rak sawm mi ka siih, ka hnatuan dan ding pawl in sim theih hnu ah, thlacamnak kan neiih, cumi ah Pathian duhdan a si zumnak thawn tuan dingin ka pe aw a si.

CT: Thudang pakhat (Hni deuh phah in), na hlawh zat cu na rel siang lo keiih, nan sungkaw khawpkham zat awm cu lawmman an lo pe maw?

F: E, si ko e, kan sungkua cun Pathian zaangfahnak in kan khawpkham ko.

CT: Na Fellowship ah vun kaat sehla, zarhpi ni veikhat ah mipum ziangzat hrawng khawm in thawhlawm lut hi ziangzat hrawng a si ti in sim thei kemmaw?

F: Si, zarhpi ni ahhin mipum hi 300 le 400 lak cu kan khawm ding a zum um, cun thawhhlawm pangai hi cu Rs. 2000 ihsin 3000 kiangkap cu kan ban theu. Cumi ah, thenhra thenkhat hi cu sim a har zet, a can ah Rs. 1000 a lut ih, a can len Rs. 10000 khal luh can a nei.

CT: Nan Fellowship ahhin member hi hmin na la maw?

F: Hminlak hi cu kan nei lo, Fellowship kan siih, mipi pawl in an kawhhran ah an khawm theiih, cun ziangtik lai khalah, kan hnenah an ra khawm thei theh fawn. Siat that ni khal, zoh thei cincin, kan lammi pawl cu kan zoh awk theh ko. An khawm khallen, khawm lo khallen, kan lam mi an si hnuhnu cu kan member ah kan ngai a si bik ko.

CT: Pathian thusimnak ahhin tong dang hman thei mi na nei maw?

F: Pathian thusimnak ahcun Falam lo cu Halkha hi ka ti theiih, mizo hi cun ka harsat deuh lai.

CT: Hnamdang mi karlak ah rawngbawlnak na neih dah maw?

F: Kan Laimi karlak ti lo ahcun ka nei mal zet. Ka neih dah mi cu Thado, Kachin, Shillong ih khasi le Mara pawl hnenah ka rak nei dah.

CT: LCF ihsin na term a cem tikah, ziangtin ha rawngbawlnak peh vivo na tum?

F: AG ka siih, tu khalhi ka term a kim cun, AG ih tuan sal ding ka si.

CT: Nan kohhran nan cah nak deuhbik ih na theih mi?

F: Kan EC, nubu, mino,  le members hi nasa zet in tan an lak hai ih, cumi cu kan thazaang an si bik ko.

CT: CT hi nan member pawl in in hlutsak na zum maw? Cun kan Laimi hrangah ziang tin ha na hmuh dan?

F: Laimi hrangih thupi zet mi, kan Calai thupi zia kan theisuak vivo ih, kan member sung khalah zuam zetzet an um ih, an hlawk pi zet ding ka zum.

CT: CT hrang na can sunglawi in pek ruangah kan lungawi.

F: Kei khal ka lungawi zet.

(NB: CT hin mi tibik le porh hleice, duh hleice a nei lo, rawngbawltu le cawisantlak minung cawisan hi kan tumtah mi a si).

(Visited 105 times, 1 visits today)
%d bloggers like this: