Hlasak Thiam – BJ

Ziangtivekin, ziangtizawng khalin um in thuamaw khal sehla kan lo uar ringring ding ‘BJ BJ BJ’ an timi le a aw thaamte khi tiih nonawn thlennak hmun kip ih an rel rero mi BJ cu Malaysia CT Palai Salai David Nun Tho in Nimthlakau interviewnak nei dingah hmaitawn in an kawm aw.

Kan dung baihte ahkhan ‘BJ A Thi’ tiah thulenglawng kan leitlun hmun kip le ram kip ah a rak thang lawk, asinan tuini ah CT lengtupawl hnenah BJ Rock Vampire in a thihlo thu le thulenglawng rak thei ih rak lungphangtu pawl hnenah pawi a tinak le mipi a sunsaknak a lang ter sal a si.

CT: Chinmi  lakih hlasak thiam langsar BJ a hmaisabik ah CT hmin in na kut ka lo kai a si.

BJ: Welcome CT ! Lungawi.

CT: Ahmaisabik ah na suahkehnak hmun, khua le atu na umnak hmun in sim thei pei maw?

BJ: Ngahtuk!! Ka suahnak khua cu Falam,Chin State a siih atu Chinmi thawng tampi umnak hmun Chin Khualipi Malaysia ah ka um.

CT: Unau suahpi, Nu le Pa hmin pawl teh in sim thei pei maw? Na Innsang nu hmin le na fale hmin pawl?

BJ: Ahmaisa ah i hringtu Ka nu le Pa ihsin in ka thok ding. i hringtu nu Pi Ngun Nei le Pu Van Lal Sak teih fapa pahnihnak ka si. Ka Unau suahpi pawl cu Solomon (M.R.H), Zai Rem Sang, Sui Len Mawi, Ceu Sam, J. Benjamin (Tluang Za Thang), Lydia Lal Her Mawi, Van Lal Pek, Van Lal Hruaile pawl an si.

Ka innsang nu cu J. Hoi Lo Par a si ih fa pahnih mipa pakhat le nunau pakhat kan nei. Ka fapa te a hmin ahcun J. Bawi Nei Thang a siih duhkawhnak ah J.Kuk tin kan ko theu ih ka fanu te hmin cu Elizabeth J. Lal Tha Sin Mawi asi ih J. Mawi te a si.

CT: Series tamnawn na suah zo ih cu mi laksung ihsin mipi ih an lo thei lar bik mi Series hmin le suahkum (Produced Year) in sim thei pei maw?

BJ: Mipi in theih tambik tiih ka zum mi cu a vei(2)nak series sung ta Par Mitthliin a si lo sawm ka ti, hehehe…. Kum-2007 ah a suak ih in suahsaktu cu (Producer) I hringtu ka pa Van Lal Sak a si. A parah lungawi tampi ka nei.

CT: Chin Mino tamzet in na hla an ngai ih an sak tikah ziangtin na um(na feeling), na diriam maw?

BJ: An sak paih tak hman ah sak rero hai seh tiah tha ka pe ih an sak ti ka thei tikah ka diriam zet fawn. A tawizawng in ka sim asile ka hla an sak duh ih ka mangbang nasa. Ka lungawi zet.

CT: Na hla duhbik ?

BJ: Ziinkap Minung.

CT: Mi tampi in na zaihla an ngai le veten an bang mi a reh thei rori, BJ a aw (voice) hi a thlumzet an lo ti mi hi teh ziang tin na ruat? Ziangtivek in timtuahnak na nei? Na Aw pawl hi style suah in na rem hrim mi a si maw?

BJ: Ngai tlak ding ngaingai teh a rak um maw si? Hehehe…. A thlum le aal a um bangin huatu le duhtuza an rak si lala ding ka zum. A phunphun ih ruahawk daan a si ko. Ziangti khalin ka ruat ciamco lo. Hla ka sah ding tikah timtuahnak khal cutituk in ka tuah cuang lemlo. Cun, ka aw khal hi ka rem hrim ciamco dah lo. Hitin ka sung ihsin a hawng suak theu mi a si hrimhrim ko. In duhdawt ih ka hla in ngaisaktu pawl hnenah lungawi thu ka lo sim.

CT: Tubaite Chin Rocker Solomon Menhrihai (SMRH) in Kawlhla series a suah ih nangteh kawl series le kawlhla sak na tum ve maw?

BJ: Ka sak reo lam zo ih a rei hlanah BJ ih Ahngatayahlu timi series a suak cing ding. Theitawk suah ih in rak sunsak ding khalin ka lo ngen cih bet.

CT: Kan dung baihte ahkhan “BJ A Thi” timi thu kan rak thei….kan lau theh lawk…khakha ziangtilam thu ha?

BJ: Keimah le keimah khal ka thi ngaingai si pei maw tiah ka ti aw! Ka tthamawk nasa zan var in….hehehe…. Salai A Piang in thli a thlah men mi a si ding. Thulenglawng men a si kha. Kei lai Pacang kum-100 leng dam ka tum si. Group mail ih duhsaknak thawn i rak ngaihventupawl hnenah lungawinak simcawk lo ka neih rualrual in thusia si lo pipi a rak suak mi parah ka thin a nuam lo zet.

CT: Live Show, Concert vek veiziangzat mipi na awi zo? Studio ih hlasak le Concert Stage par ih hlasak a dang aw in na thei maw?

BJ: E Khai! A tam ruri thlang lo sawm! Ka siar ngelcel lo, dang lamnak tamtuk ee. Stage cingcing cu Stage a si ko dang nasa.

CT: Kan miphun le ram hrangah zaihla sak phah in ziangtivek sunmang na nei?

BJ: Ala! Zaanmang tiang ka nei, ka zuamnak ih hlawhlting mi par mawi cu ka ram le ka miphun hrang lo bak ah zo ih hrangah saw a si ding?

CT: Chin hlasak thiam ciocio ah zo si ngainaa ih na ngaisan bik?

BJ:  BJ (Rock Vampire)

CT: Asilen, leitlun pumhuap ih hlasak thiam lakah zo si na ngaisan, na duh, na uarbik? Ziang ruangah na uar?

BJ: An tam hnuaihni tthimnak ah Nirvana, Gun & Roses, EMN hum! Mi hlun pawl deuh an si ko. Ka duhnak bik cu an hla thu, an sak tikah cafang pakhat tin in mipi thinlung a neh lole mipi thinlung an la thei. Mi a hip zet cuipawl cu ka uarzetnak  a si.

CT: Chin Singers pawl ih kan tlaksamnak bik tiih na ruah mi in sim thei pei maw?

BJ: Hmin ngah hlanah hmin kan hawl ih kan zuam, hmin kan ngah tik ahle hmin control a tul lala. Curuanah rittheih thilribik an si ko in ka thei.

CT: Nangmah le nangmah na duhthu saam lo nak (weakness)bik in sim thei pei maw?

BJ: Veitampi ka thinlung ih um le tuah ding ih duhthusam vek in ka mipi (fan) pawl hnenah 100% ka pek sal thei lo mi hi a si. In duhdawttu pawl hnenah leiba tam zet ka nei a si.

CT: Nupi le fa te na nei zo ih na fa le pawl hmailam ah ziangtivek si ter na duh in sim thei pei maw?

BJ: Rocker pakhat nih cun a fa le rocker si ve ding cu a duh thusam bik a si ko ding. Amak ngaingai a tu ka fapa J.Kuk le ka fanu J. Elizabeth te hi hla sak pi ta lo in an it thah thei hrimhrim lo, an upat cun zianglam teh an bang pei maw theih hlah? Pa pakhat dinhmun in fale duhmi sawn le an paihsawn mi kha fehpi ih pi tlinter ding ka sa duh thah sawn ih tha pek ding kha ka tuanvo a sitin ruat.

17. CT: Hmai lamah ziangtivek in hmalak na tum ih ramthumnak lam ahteh feh tlang vivo na tum maw?

BJ: Hmm! Ka tum ciamco lem lo, Kawlram dinhmun, ukawknak a dai vivo le ding ih tlungkir sal ka tum ko. Cule ka suahnak ka khua le ka ram lo ahcun ka lu ruh phum ka siang lo lawlaw cu si.

CT: Ziangtin si na mipi in an lo pehtlaih thei ding?

BJ: Aw singai! Athupi bik tete….jbenjamin090@gmail.com ah in pehtlaih thei ringring.

CT: Hitivek na caan sunglawizet in pe ih na tlungah lungawinak simcawk lo kan nei ih himi interview asiartu kan Chin mipi tamzet khal thazang an ngah cio ding zumnak kan nei a si.

BJ: Keikhal CT par ahle ziinkap minung (BJ) ih thuhla arak siar paihtu nan zaten tlunah santlai hrih lo val in lungawinak simcawk lo ka nei ve a si. Lungawi nasa!!!

%d bloggers like this: